Ф. Ермаков улэ осконэн: К. Герд­- лэн гожтэм ужъёсыз шедёзы.

30-тӥ апреле 85 арес тырме дано удмурт профессорлы Фома Кузьмич Ермаковлы. Бубизлы но мумизлы – Кузьма Иванович но Анастасия Михайловна кузпалъёслы – Инмар нуны сётӥз, 15 ар ӵош улыса гинэ. Но Вавож районысь Кионгуртын вордскем пилы пичи дырысеныз ик чидано луиз пӧртэм шуг-секытъёсты. Соос сярысь Фома Кузьмич гожтӥз 2007-тӥ арын потэм «Мои пути-перепутья» книгаяз.

Сизьым аресъем пияшлэн югыт дуннеез шӧдтэк шорысь пилиськиз 1934-тӥ арын. Атайзэ – гуртын колхоз кылдытонэ пыриськем муртэ, колхоз правленилэсь секретарьзэ – ужысь мозмытӥзы но кулаке поттӥзы. Зэм, 1 но љыны ар ортчыса, УАССР-ысь ЦИК та решениез янгышен лыдъяз, колоние келям воргоронэз Можга городэ «Дубитель» заводэз лэсьтонэ берыктӥзы. Но таӵе адӟон куасалтӥз кышнозэ – 1940-тӥ арын пичи Фома анайтэк кылиз.

Кулаке поттэм семьяысь шуыса Фома Ермаковез школае но уг куто вал. Но пияш понна дурбасьтӥз дышетӥсь И. В. Ларионов. Тодон-валан люканы лыктэм пияш директорез паймытӥз: 7 аресъем тэшкыли 1-тӥ но 2-тӥ класслэсь программазэс дышетскытэк но тодэ. Но Ларионов куриз Фомаез огъёзъёсыз пӧлы кельтыны – бадӟымъёс, пе, вожъяськыса вӧсь карозы этеез.

Школае лыктэм пияш сак йырсазезлы луыса мукетъёссэ но паймытъяз. Со нимын-тулын вераны тодылӥз партилэн ЦК-езлэсь вань секретарьёссэ, калык комиссаръёсты. Директор Фомаез юри пыртэ вал 7-тӥ классын дышетскисьёслэн (соку Кионгуртын семилетка школа гинэ вал) обществознание уроказы тодон-валанзэ возьматон понна.

Быдӟым ож кутскон аре Фома Ермаков школаез йылпумъяз. Но шор ёзо школае мыныны ӧз быгаты – со вакытэ дышетскем понна коньдон тыроно вал. Таин валлин пияш пыриз пудо эмъянъя техникуме – Можгаысь техникум ӵапак эвакуацие поттэмын вал Вавож черкогуртэ. Татын нуналаз кык пол сюдӥзы, стипендия тыризы. Техникумын но Ермаков «витьёслы» дышетскиз. 3 ар ортчыса, пудо першалын ужаны кутскиз. Дышетсконзэ азьланьтыны Фома быгатӥз 1949-тӥ арын гинэ.

* * *

Удмурт пединститутысь филология факультетлэн удмурт люкетаз пырыса, егит мурт зымиз студент улонэ. Вутскиз дышетскыны но, институтысь студентъёслэн профкоменызы кивалтыны но. Вузэз йылпумъям муртлы школаын ужаны кема ӧз кылды. Улон сюресэз сое вуттӥз «Удгиз» издательствое редакторе. Вуоно араз Ермаковез ӧтизы Историяя, кылъя но литературая Удмурт институтэ. Вакчи дыр куспын егит тодосчи М. Петров писательлэн творчествоезъя диссертацизэ дасяз. 1961-тӥ арын ужзэ утиз СССР-ысь Наукаосъя академилэн А. М. Горький нимо литературая институтаз. Озьы 33 аресаз Фома Кузьмич луиз литератураез эскеронъя нырысетӥ удмурт-кандидат. Солэсь азьвылгес – 1958-тӥ арын – Ермаков кутэмын вал СССР-ысь Писательёслэн союзазы. 22 арлэсь ятыр тодосчи тыршиз УдНИИ-ын. Наукая ужъёс гожъян но печатлан висказ трос удысъёсын берганы вутскиз.

Но визьмо, сэзь тодосчилэн сюлэмыз сэректӥз 1920-тӥ-1930-тӥ аръёсы быдтэм писательёслэсь, тужгес но К. Гердлэсь, ужъёссэс но гожъямъёссэс вунэтэмзы пумысен, КПСС-лэн Удмурт обкомезлэн но УдНИИ-лэн директорезлэн «паллян» политиказы пумысен. Сыӵе мылкыдын Фома Кузьмич 1976-тӥ арын гожтэт ыстӥз Компартилэн ЦК-яз. Но югдур воксё мыддорин берытскиз – Ермаковез партиысь куштӥзы, ужысь кошкытӥзы. Зэмлык шараяськиз, кык ар ортчыса. Фома Кузьмичлы берыктӥзы партбилетсэ, Москва косэмъя пезьдытӥзы обкомысь куд-ог кивалтӥсьёсты.

Озьы ке но тодосчилы пыд пуктӥсьёс ичигес ӧз луэ. Со ӧз быгаты берытскыны институтэ но, уже ӧз кутэ университетэ но. 1984-тӥ арын гинэ тодосчи интыяськыны быгатӥз Дышетӥсьёслэсь тодон-валанзэс будэтонъя институтэ. Нош кыл вӧлдӥсьёс, вожъяськисьёс ӧз чалме – 30 арлэсь кема соос люкетӥзы на Ермаковлы ужъёссэ печатланы но книгаоссэ поттыны.

* * *

2004-тӥ арын венгер тодосчи Петер Домокош Будапештын поттӥз Гердлэсь сборниксэ. Книгалэн азькылаз со гожтэ: «Гердэз нимазы социализмлэн шайтанэз шуыса, куддыръя небытгес курлазы – кулак кылбурчи шуизы. Одӥг мурт гинэ – Фома Кузьмич Ермаков, удмурт литератураез нырысьсэ эскерись – дӥсьтӥз кылбурчиен артэ сылыны, со понна аслэсьтыз карьеразэ но ӧз жаля. Герд кылиз аслаз гожтэм произведениосаз, но соосты печатлан понна нюръяськоно луиз ни Ф. Ермаковлы. Таин йырин учёнойлэн аслаз карьераез ӧз пӧрмы. Кӧня ке доктор диссертацилы тырмымон рукописьсэ берыктӥзы. Фома Кузьмичлы луыса туннэ Удмуртиын чузъясько Гердлэн нимыз но, произведениосыз но. Ачиз Ермаков вылӥ тубатъёсын уг адскы. Со дыре ик Удмуртиын но, солэн палэназ но фин-угор удысэз эскерисьёс лыдъяло Фома Кузьмичез тужгес дано, лэчыт кыло но зэмос тодосчиен. Герд котыре «лякиськисьёс» али трос, соос пӧлысь Ермаков гинэ данъямон луэ».

Республикаын Фома Кузьмичез дунъяны кутскизы 1990-тӥ аръёсы гинэ. Сокугес ик дано нимъёсын – УАССР-ысь культура удысысь дано ужась, Удмурт Республикаысь наука удысысь дано ужась – пусйизы. «Удмурт кенеш» огазеяськон 1992-тӥ арын сётӥз К. Герд нимо премия. Таос борды ватсаськизы на Россиысь но кунгож сьӧрысь мукет вылӥ нимъёс. 2001-тӥ арын Фома Кузьмичлэн кема аръёс ӵоже нюръяськемезлэн емышез кисьмаз. Югыт дуннеез адӟиз К. Гердлэн люкам сочинениосызлэн нырысетӥ томез. Нялтас вераса, та уж дась вал ни 1992-тӥ арын. Ӟеч изданиез печатланы ӧз быгатэ дано удмурт кылбурчилэн но тодосчилэн 100 аръем юбилеезлы 1998-тӥ арын. Берлоез 6-тӥ том печатласькиз ни 2005-тӥ арын.

Но профессор уг буйга: уго печатламын Гердлэн одӥг куиньмос произведениосыз но ужъёсыз гинэ. Рукописьёслэн бадӟым люкетсы шедьтымтэ на. Озьы ке но Фома Кузьмич улэ осконэн: гожтэм ужъёс шедёзы, уго Герд огзэ но произведенизэ одӥг экземплярен гинэ уг кельты вылэм.

«Улонме пайдатэк ӧй ортчыты, – гожтэ Фома Кузьмич. – Калыклы, удмурт литературалэн но культуралэн азинсконазы аслам ужъёсыным кыӵе ке пытьы кельтӥ. Малпасько, соос сярысь ӟеч кыл вералозы удмурт калыклэсь культуразэ но литературазэ дунъясьёс. Нош тушмонъёслэсь (соос али но ичи ӧвӧл) умой дунъет возьманы уг кылды. Ваньзэ возьматоз дыр. Со котькудӥзлы берыктоз быдэстэм ужезъя. Мынам но ужъёсы дунъямын луозы 21-тӥ даурын»

Елена Скворцова.

Галина Кулакова кылем даурысь 60-тӥ-80-тӥ аръёсы дуннеысь тужгес кужмоез куасэн бызьылӥсь вал.

Арнянуналэ аслэсьтыз 70 арес тырмонзэ пусъёз шаерысьтымы одӥгез тодмо адями, спортысь легенда Галина Кулакова. Улосчимес ӟечкыланы вуозы Россилэн пӧртэм сэрегъёсысьтыз дано спортсменъёс, кивалтӥсьёс. Вазь ӵукнаысен Галина Алексеевнаез резиденциын пумиталоз Удмуртилэн Президентэз Александр Волков.

Галина Кулакова сярысь трос гожъямын. Шаерысьтымы куасэн бызьылӥсь ньыль пол Олимпиадае пыриськемын, 4 зарни, 2 азвесь, 2 туй медальёс басьтэмын. Дуннеын, Европаын но СССР-ын ортчем ӵошатсконъёсын вормонъёсыз вераса быдтонтэм. Спортын басьтэм азинсконъёсыз понна пусъемын Ленин но «Знак Почёта» орденъёсын, «Удмурт Республикаысь культура удысысь дано ужась» нимын. Улон сюресэз сярысь гожтӥз «Кому покоряется лыжня» книга.

Галина Кулакова кылем даурысь 60-тӥ-80-тћ аръёсы дуннеысь тужгес кужмоез куасэн бызьылӥсь вал. Вордскемын но будэмын со Вотка ёросысь Степаново гуртын. Пичи мугоро нылашез нырысь ик синйылтэм Воткаысь тренер Пётр Наймушин. Егит муртлэсь кужымзэ, юн сямзэ шӧдэм, техниказэ волятыны ӧдъям. Со дырысен гуртысь нылашлэн чылкак мукет улонэз кутскиз. Куасэн бызьылон сяменыз быдэс дуннеен тодматскиз.

Бадӟым спортлэсь Галина Кулакова ньыльдон аресказ мозмытскиз. 15 ар ӵоже бадӟым ӵошатсконъёсын бызьылытозяз, Удмуртиысь спортсмен троссэ чидаз: 1968-тӥ арын нырысьсэ Олимпиадае пыриськыса ик, зарни медаль дорозь сузьтӥське ни вал, финиш азьын усиз но вормисьлы 3 секунд келяз. Удмуртиысь нылаш соку нырысьсэ шара бӧрдӥз. 1972-тӥ арын секыт висён пыд вылысьтыз погыртӥз. Эмъясьёс куасъёссэ вунэтыны косӥзы вал, ваменэс сямо спортсмен аслэсьтыз кариз. Собере мукет йыр висён шедиз, допинген герӟаськем ӵашетонъёс котыраз ӝутскизы. Силё-сюрно журналистъёс но ялан пыд улын костаськизы.

Соин но, дыр, трос калык пӧлын улыны, вераськыны Галина Алексеевна чик но дышемын ӧвӧл. Бадӟым спортысь кошкемез бере дано спортсменмы улӥз городын. Нош одӥг нуналэ, 3 висъетэн квартиразэ шаерысьтымы егитгес спортсменкалы Тамара Тихоновалы кельтыса, городлэсь палэнэ пегӟоно кариськиз. Дэри ёросысь Италмас каргуртэ улыны интыяськиз шаерысьтымы мукет спортсменэн Нина Парамоноваен ӵош. Выль интылы чемпионъёс ӝог дышизы. Асьсэ люкам коньдонэнызы музъем басьтӥзы, юртъер пуктӥзы, пудо живот будэтыны кутскизы.

- Пичи дыръям ик, гурт ужлы дышыса, будӥ, – шуэ Галина Алексеевна. – Семьяямы укмыс нылпи вал. Атаймы оже быриз, паймисько анаймылэн чиданлыкезлы, ваньмес пыд выламы султытыны быгатӥз. Витетӥ классын дышетскыкумы, семьямылы юрт пуктӥмы, вань гуртоос шорамы паймыса учкизы. Жаль, та вакытэ милям юртмы быдэс гуртэн ӵош Вотка водохранилище пыдсын сисьме. Школаез йылпумъяса, дышетскон сярысь ӧй но малпаськылы, анае сьӧры фермае вамыштӥ. Нырысь ик кунян сюдӥ, отӥяз скал кыскисьын ужай.

Пудоез яратэмез Галина Кулаковалэн, Италмасэ вуыса но, юн шӧдӥськиз на. Нырысь аръёсаз дано спортсменъёс, чипы-курег сяна, кунян быдэтӥзы. Турын но турназы, асьсэос ик гидазы но ворттӥзы, толлы будэтэм пудозэс сӥльлы вандылӥзы. Сӥльзы укыр трос люкаськемысь, спортсменъёс сю­ро таза пудо вордонлэсь куштӥськыны малпазы. Та вакытэ соослэн дасо мында курегъёссы но бадӟым бакчазы.

- Тужгес но бадӟым шумпотонмы – парник, – вераськонамы итӥське Нина Парамонова. – Арлы быдэ 29-тӥ апреле Галина Алексеевналы вордскем нуналэзлы шуыса кузьмалляй бакчаямы будэтэм кияр. Таӵе сямылэсь туэ но ӧй куштӥськы. Юбилейзэ шӧдыса, лэся, мерттэм емыше вазьгес вуыны ӧдъяз вал, но… Оло син усиз, оло мудӥськись шыръёс озьы йыртэмазы, кылем арня пумын вань будосъёсме кин ке выжытӥз ик вандылэм. Коть йыркуръяськы, коть бӧрд табере.

Кунооссэс пумитаны спортсменъёс вазь тулыс ик дасяськыны кутскизы. Юртъер котырысьтызы лымызэс пазязы, утялтӥськизы-сузяськизы.

- Музей кылдытон сярысь малпанъёсме быдэстыны быгатэмысьтым шумпотӥсько, – шуэ Галина Алексеевна. – Уно сю медальёсты, кубокъёсты, вымпелъёсты шыкысын токма возьытозь, калык азе поттыса, умой каримы. Куасъёсы но татын ик. Бен, нырысетӥ куз куасме гурын сутӥ, вышкылэсь лэсьтэмын вал соос, мукетъёссэ пӧртэм городъёсысь музейёсы люкылӥ, берлоосыз гинэ татын. Ваньмыз умой радъямын кадь, одӥгзэ жалясько: музеймес улон юртамы интыямы. Куное ветлӥсьёслэн лыдзы укыр трос луоз ӧй кожа вал, куд-ог дыръя ас ужъёсмес но быдэстыса ум вуттӥське соосын сэрен.

Тросэз малпало, дано спортсменъёсты Совето Союзлэн вылӥ кивалтӥсьёсыз укыр нуныязы, узырмыны юрттӥзы, дыр, шуыса. Сыӵеосты Галина Алексеевна буйгатыны дыртэ, Л. Брежневен но, М. Горбачёвен но, Б. Ельцинэн но нимысьтыз пумиськылэмын ӧвӧл. Данзэ ачиз дуриз. 1984-тӥ арын Олимпийской комитетлэн президентэз Хуан Антонио Самаранч ке шат Галина Кулаковаез сӥлы кариз дуннеысь спортэз азинтыны юрттэмез понна Олимпиадалэн азвесь орденэныз. Соиз валамон: Галина Кулаковалэсь куасэн бызьылыса ортчем сюрессэ чотад ке, паймод: Музъем котыртӥ куинь пол котырскымон 120 сюрс иськем люкаське.

Асьме шаерын спортэн герӟаськем ужрадъёслэн лыдзы арлы быдэ сюрслэсь ятыр ортче. Галина Кулаковалы тужгес матын луо Гурт шудонъёс. Синмаськыса учке туала егитъёс шоры, соослэн быгатонлыкъёссэс будэтыны луонлыкъёссы вань. Тужгес но данъяське шаерысьтымы куасэн бызьылӥсьёсын, Россилэн сборнояз шедем воргоронъёсын. Уггес вала кузь коньдон сьӧры уйиськисьёсты. Ас вакытаз Галина Кулаковаез улыны ӧтьылӥзы Москвае. Но вордскем палъёссэ номырин ӧз вошты, ваньмызлы серекъяса шуылӥз: мыным лымы кулэ. Озьы пичи Удмуртимес кунгож сьӧрын улӥсьёс но ӟеч тодо Чайковскийлэн, Калашниковлэн но Кулаковалэн нимъёссыя.

Валентина Емельянова.

Огез возьматонэз сӥземын вал Алнаш калыклэн синмаськымон пиезлы, «Гудыри» газетэз кылдытӥсьёс пӧлысь одӥгезлы Пётр Павлович Гущинлы. Мыным соин пумиськылыны ӧз кылдылы, но война бере газет-журналъёсысь нимтулзэ пумиталляй. Собере, Алнашын улыкум, солэн коркаез вӧзтӥ одӥг пол гинэ ӧй ортчылы.

Атаелэсь но та нимтулэз верамзэ кылылӥ. Нырысетӥ газетын ужасьёслэсь нимъёссэс поттылыкуз, Гущинлэн но нимтулыз вал.

1964-тӥ арын Кизнере улыны выжыяськеме бере тодматски та палан шер пумиськылӥсь фамилиен адямиен. Вераськонъямы тодӥмы: кыкмы ик Алнаш музъем вылын кисьмаськеммы. Григорий Петрович Гущинэн собере матысь эшъёс луимы.

Али Григорий Петровичлы 82 арес ини. Арлыдъёсыз ванен но висеменыз сэрен толалтэ ульчаетӥ туж уг ветлы. В. Алашеевлэн возьматонэз бере кӧня ке нунал ортчыса, Григорий Петрович доры мыноно кариськи. Коркаосмы артэ сыло, кусыпмы ог кык сю метр сяна уз луы. Григорий Петрович монэ кузпалэныз Нина Александровнаен ӵош пумитазы. Передачаез учкыны быгатэмзылы ачим но шумпотӥ. Мынам тросгес тодэме потӥз Григорий Петрович сярысь. Угось со Пётр Павловичлэн самой пичиез. Со сяна, улэпез ӧвӧл ни. 38 аресъем Мария Герасимовна но Пётр Павлович Гущинъёслэн 1930-тӥ арын Гриша пизы вордӥськиз. Чырткем но таза будӥз пиналзы, бӧрдэм куараез но, пе, уг кылӥськылы вал. Кӧкыын кыллись пизылэн ымаз, нянь пушез сакырен сураса, басмае бинялтыса, донго но нуны сюпетэ гинэ. Ымысьтыз чечымез усе ке, чиньыоссэ сюпсе.

- Алнаш шор ёзо школаын 6 ар дышетскыса вуттӥ – война пуромиз, – веранзэ мытӥз Григорий Петрович. – Соин ик дышетсконме куспетӥ кароно луи. «Мотор» нимо колхозысьтымы трос воргоронъёсты мобилизовать каризы, мӧйыоссэ трудармие басьтӥзы. Дядяйме (атайзэс озьы шуо вал) но Ижевске нуизы. Колхоз ужъёс ваньмыз нылкышноос, пересьёс но мон кадь 11-15 аресъем пиналъёс вылэ усизы. Рос-прос юнманы вуымтэ мугоръёсмес, секыт ужъёсты быдэсъяса, тӥямы. Мыным нырысь парсьёсты возьманы оскизы, собере – валъёсты. Война бере монэ пыдкутчан вурон но тупатъян цехе мастер вӧзы дышетскисе басьтӥзы.

Выль ужез борды Гриша сюлэмзэ сётыса ик басьтӥськиз. Но малпамтэ шорысь дышыны кутскем удысысьтыз кошконо луиз.

- Кызьы монэ, дас сизьым аресъем пияшез, выль уже басьтӥзы, али ке но уг валаськы. Законъя почтаын фельдъегерын ужан понна 22 ареслэсь егит медад луы, дышетскемед но шор ёзо мед луоз. Ӧйтӧд, дядяелэн данэз бадӟым вал-а, мар-а. Монэ кутӥзы. 1950-тӥ арозь фельдъегер луыса ужаме бере армие басьтӥзы. Поездэн но ветлэме, бадӟым зарезез но адӟеме ӧй вал на. Владивостокозь быдэс толэзь мынӥмы кадь, отын егит солдатлэсь курссэ ортчыса, кыдёкысь Кунашир шормуӵе нуизы. Куинь но ӝыны ар служить кари. Гуртам радиотелеграфист специальностен но старшой сержант званиен бертӥ.

Кӧня ке ял кареме бере нош ик почтае вамыштӥ. Азьло ужам интые буш ӧй вал. Куинь толэзь Голюшурмаысь почтаын ужаса вуттӥ гинэ, азьвыл кивалтӥсе жингыртэ, лыкты, пе, ужан инты сярысь вераськомы. Озьы мон Кизнере вуи.

Нырысь нуналысен ик ужын но, ульчаын но монэ паймытӥз одӥгез: анай кылын вераськисьёс чик уг кылӥсько. Улыса валай: гуртъёсын удмурт куараос чузъясько ке, каргуртамы – ӵемгес ӟучез но бигерез кылод. Кизнерын 17 ар фельдъегерын тырши. Лушкем гожтэтъёсыз, Кизнере сяна, Грак ёросэ но нуллоно вал. Ужан вискам тямыс классэз быдтыса, Казаньысь связья электромеханикая техникумез йылпумъяй на.

- Вуоно кузпалдэ но татысен пумитад-а?

- Соку мон союзпечатьын ужасько вал, кабинетъёсмы артэ, нуналлы быдэ пумиськылӥмы, – веранзэ мытӥз кышноез Нина Александровна. – Хорын кырӟасько вал бере, ӧтёно кариськи. Ойдо, шуисько, кырӟаны, милям пиосмурт куараосмы уг тырмо. Со куарае ӧвӧл, шуиз. Нош арня вискын репетицие вуиз. Озьы монэ келясь но, собере кузпал но сюриз. Кырӟантэк улыны уг быгатӥськы. Ачим валатэк ик кылисько – ураметӥ ветлыкум но, кырӟаны кутскисько.

- Кивалтӥсьёс 1967-тӥ арын ёросысь связья узелэ начальнике пуктӥзы. Татын сюлмысь тыршемме уно медальёсын пусйизы. 28-тӥ куартолэзе, Пограничникъёслэн нуналазы, частьёсын службазэс ортчытэмъёс, вож картузъёссэс изьыяса, ульчаосы пото. Мынам сыӵе картузэ ӧй вал ни. Шоразы вожъяськысагес учкылӥ. Соин ик Дальневосточной пограничной управление, мылкыдме вераса, гожтэт ыстӥ. Озьы монэ кыӵе ке ужрадэ ӧтизы. Номыр малпатэк, кузпалэным мынӥмы. Зал тыр люкаськем калык азьын ёросмылэн йырыз А. Плотников монэ сцена вылэ ӧтиз. Туби но сылӥсько: малы монэ татчы поттӥзы? Кузёмы лыдӟе: Пограничной войскоослы 90 ар тырмонэн валче медален но кунгожез утёнъя службалэн III степенё гадьпусэныз данъяськом. Собере пакетысьтыз вож картуз поттыса, йырам изьыяз. Шумпотонэ пачыл вал. Табере 28-тӥ мае, вож картузме изьыяса, корка пушкытӥм ветлӥсько.

- Дядяед Пётр Павлович улытозяз удмурт калыкмылэсь улонзэ ӟечгес карон понна сюлмаськыса улӥз. Йылол-сямъёсты утьыны, тупаса но кенешыса улыны дышетӥз.

- Люкиськон гожтэтаз дядие гожтэм: «Ноку но, нокинлэсь но урод кылзэ кылэме ӧвӧл. Аслэсьтым кылылӥды, кӧтъёстэс урод карыны шедьтӥ ке, простить каре». Тани дядяелэн улэм аресозяз вуисько ни, та верам кылъёссэ тодам вайыса, адямилы гинэ ӧвӧл, пудо-животлы но урод кылын уг вазиськылӥськы. Асме шудоен лыдъясько. Кык ныл будэтӥмы. Милемлы соос быдэн кык нуныкайёс кузьмазы, 4 правнукъёсмы.

Николай Павлов.

Кизнер посёлок.

Пичи Пурга ёросысь Вылын Юри гуртын 1961-тӥ ар. К. Михайлов - бур паласен кыкетӥез.

Удмурт кылын передачаос телевидениын рос-прос потыны кутскизы, Константин Михайлов вуыса. Собере 18 ар ӵоже со возьматъяз ужась калыкез, учёнойёсты, пӧртэм удысъёсысь азьветлӥсе потэмъёсты, писательёсты, артистъёсты…

1959-тӥ ар. Февраль толэзь. «Удмуртия» издательствоысь редакторлы Константин Михайловлы жингыртӥз телестудилэн директорез Николай Петров. Мугзэ валэктытэк, уж дораз пыраны куриз. Пумиськемзы бере кема кенешизы. Николай Иванович дэмлаз Костялы удмурт передачаос лэсьтон борды басьтӥськыны. Соос бордын ужало ни, пе, Виталий Николаев но Эльза Борисова, но городын будэменызы сэрен удмурт кылэз лябгес тодо. Нош чагыр экранын чузъяськыны кулэ чебер анай кыл.

- Тӥ быгатоды, – оскытӥз со Константин Николаевичез.

4-тӥ феврале Костя Михайлов телевидениын ужаны кутскиз. Редакторъёс трос ӧй вал: А. Изергина, Э. Борисова, Ю. Сизых, О. Кугучев, В. Николаев. Но соос ваньзы сямен ӟуч кылын ужало, нош удмурт передачаосты поттыны режиссёр но звукорежиссёр, операторъёс, диктор но ӧвӧл. Соин ик нырысь-валысь трос гинэ сюлмаськонъёс кылдылӥзы. Огполаз оператор кудпала камеразэ карыны уг вала, мукет дыръя ачиз режиссёр но шугъяське. Соин Костя ӵем дыръя вӧзаз валэктыса пукылӥз.

Нырысетӥ передачазэ Костя Михайлов дасяз, Удмурт пединститутысь студентъёсты ӧтьыса. Меӵак эфирын вераськизы Генрих Перевощиков, Семён Михайлов, Роман Валишин. Нош 1-тӥ майлы дасямзэ нуизы кылбурчиос: Афанасий Лужанин, Семён Перевозчиков, Александр Вотяков, Анатолий Волков.

К. Михайлов уйёсы но гожъяськыса пукылӥз. Вань удмурт писательёслэсь произведениоссэс сюлэм пыртӥз поттылӥз.

Нырысетӥез телеспектакль дасямын вал Геннадий Красильниковлэн «Дусым» веросэзъя. Уно учкисьёслы со тунсыко потэм. Мукет телеспектальёсыз но калыклэсь мылкыдзэ бурдъяллязы. Учкисьёс студиын ужасьёслэсь ялан выль ужъёссэс возьмаллязы.

Рольёсты шудылӥзы соку ай егитэсь, но калык пӧлын тодмо луэм артистъёс: Леонид Романов, Валентина Загуляева, Нина Бакишева, Василий Перевощиков, Иван Протодьяконов, Полина Ухова, Борис Безумов но мукетъёсыз.

Ужаны ӧтьылӥзы Удмурт радиоысь дикторъёсты но. Тани Милитина Гаврилова артистъёсын тодматылӥз. Нош Полина Ухова, телевидение ужаны лыктыса, иворъёсты нуиз. Бӧрысьгес удмурт диктор луыса ужаны кутскиз Милена Воронцова.

1961-тӥ арын Ленинградысь театральной институтэз йылпумъяса, телестудие вуиз удмурт режиссёр Василий Иванов. Михайловлы ӵошен капчи ужаны луиз. Нош 1967-тӥ арын режиссёрын ужаны кутскиз Иван Данилов. Костяен соос эшъяськизы. Зор-кот-а, ӟырт кезьыт-а – ялан командировкаын. Планэн чаклам передачаез лэсьтоно ук. Куд-ог дыръя машина но ӧз сётъялэ. Кузь сюрес вылэ потталлязы я пыдын, я одӥг пала мынӥсь техникаен. Кӧт сюман дыръёс но луылӥзы.

Одӥг сӥзьылэ Костя но Ваня вуиллям мынам гуртам, Эгра ёросысь Тюптие, телеочерк дасяны.

Кыкназы но котмемын, кынмемын, сиемзы потэ. Операторзы котьку сямен Олег Чирков. Сиськыны пуксьыса но, со камеразэ вӧзаз интыялляз, медаз ышы, медаз тӥяськы. Ми палан соос дасязы А. Смирнов сярысь телеочерк. Кылем даур кутскыку, Заякино гурт дорын со ог 100 кедр мерттэм. Али соос ӝужытэсь, чебересь, трос мульы сёто. Алексей Смирновлэн вордэм нылыз Лидия Николаевна (дышетӥсь) пыр-поч возьматӥз но валэктӥз та нюлэслэсь кылдэмзэ. Туж умой телеочерк пӧрмиз.

1963-тӥ арын ми Костяен Москвае кемдӥм. Ӵапак тупам Валентина Терешкова но Валерий Быковский космонавтъёсты пумитанэ. Соосты Никита Хрущёв ӟечкылаз. Костя трос туспуктэмъёс лэсьтӥз. Фоторепортажез чагыр экранын возьматэмын вал.

Телевидениын 1978-тӥ арозь ужатозяз, К. Михайлов туж трос теле- но фотоочеркъёс лэсьтӥз. Бӧрысь со ужаз «Дась лу!», «Советской Удмуртия» газетъёсын. Умой тыршемез пусъемын медальёсын но грамотаосын.

Милитина Михайлова,

К. Михайловлэн кузпалыз.

Та чебер куараё усто кырӟаны быгатӥсь нылкышно вордӥськемын 1937-тӥ арын Красногорск ёросысь Чумовай гуртын. Анаез туж яратэ вал кырӟаны. Таӵе мылкыдыз вить нылызлы ик пыӵам. Оло, кырӟан ик юн герӟаз соосты – вань ужзэс ӵош лэсьтылӥзы.

Кин тодэ, кыӵе адӟон вите вал Дашаез. Но Глафира апаез, Иже бызьыса, сузэрзэ городэ вайиз, пиналме, пе, утёд. Но нылпи будэм бере Дашалы уж утчано луиз. Столовое интыяськиз. Ӵапак отын ужакуз, Москваысь Удмуртие лыктэм адями нылмуртэ шоркаре ӝутканы ӧдъяз, тыныд, пе, консерваторие мыноно. Кырӟамзэ кылэм уго.

Вуэм ик Даша Москваысь П. Чайковский нимо консерваторие. Кылзӥллям, ярам соослы кырӟамез, нош дышетскемез ӧжыт, нотаосыз уг тоды. Соку консерватория бордын ужась крезьгуръя училищее пыртӥллям. 1960-тӥ аръёсы удмурт землячество ӧй вал на. Озьы ке но Москвае вуэм удмуртъёс огазе люкаськылӥмы: история наукаосъя доктор К. Пономарёв, писатель П. Кубашев, мон, балетмейстер Р. Кайшев, Д. Поторочина, поэт но дипломат Я. Майков но мукетъёсыз. Мынам туж кылэме потэ вал Дашалэсь кырӟамзэ. Огпол гинэ ӧй вазиськылы солы та куронэн. Со ялан кыӵе ке муг шедьтылӥз та вераськонлэсь палэнскыны. Эшъяськиськом бере, ӧтьылэ вал со монэ консерваторие но, общежитиязы но. Отын пӧртэм инструментъёсын шудӥсьёсыз трос адӟылӥ, но кырӟась шоры ӧй ӝимылы.

Огпол Даша монэ консерваторилэн концерт возьматъян залаз ӧтиз. Ма луоз отын, ӧз валэкты. Монэ пуктӥз но ачиз сцена вылэ тубиз. Учкисьёс 2-3 кузя гинэ. Сцена вылын – роялен шудӥсь. Со вӧзы султыса, Даша небыт но зол куараен кырӟаны кутскиз. Куараез нап, кужмо. Кыӵе ке но ариос но, кырӟан но быдэстӥз. Удмуртъёслэсь кылэме ӧй вал на опера кырӟамзэс. Туж шумпотӥ. Берлогес Дашалэсь юасько: малы сыӵе ӧжыт адямиослы сыӵе зол концерт возьматӥд? Мон, пе, зачёт озьы сётӥ.

Консерваториез быдтон азяз юай, ужаны кытчы мынод шуыса.

- Бадӟым театре ӧтё, уг тодӥськы али, мар кароно, – шуиз Даша.

- Мон Удмуртие бертӥсько. Ойдо ӵошен, отын но усто кырӟасьёс кулэ, – дэмлай.

Уг тодӥськы, кыӵе муг вуттӥз Дашаез Удмуртие. Аслым тазэ шара ӧз вералля. Но берлозэ адӟиськыны кылдӥз 1990-тӥ аръёсы Ижысь Шор площадьысен. Соку калык отчы олокыӵе мугъёсын но люкаськылэ вал.

- «Удмурт кенеш» огазеяськонлы йыре кинэ быръём, шуиськоды. Тани Виноградовез ӝутоно. Со визьмо. Мон сое куке но яратӥсько вал, – шӧдтэк шорысь шуиз Даша адямиослы.

Мон эшъяськиськом кожасько вал, монэ яратэ шуыса, тодам но ӧз лыктылы. Суредан сяна, со аръёсы мыным номыр кулэ ӧй вал угось. Дашалэн озьы верамез бере ӧкынӥ (валатски): оло, мынэсьтым кылзӥськыса, Удмуртие бертӥз.

Ӝожомылӥ, республикаысь суредасьёс монэ, Москваысь бертэм адямиез, умой ӧз пумиталэ шуыса. Но артистъёс, кырӟасьёс эшшо но алама пумитало вылэм юлтошъёссэс. Даша со сярысь ӝожтӥськыса вераз огпол, туж зол зӥбо, сюрес уг сёто, шуиз. Йылтӥз: мынам депрессия.

Зэм, калык сое туж яратылӥз. Удмурт кун филармониын солист вал. Берло аръёссэ Ижысь крезьгуръя училищеын егитъёсты дышетӥз. Кулӥз 1992-тӥ арын. Берпуметӥ сюресаз келясьёс лачак вал. Туж чебер кырӟалляз, сюлэмез бугыръяз уго. Котьма ке но Удмуртиын со аслыз инты ӧз шедьты, «эшъёсызлэн» вожъяськемзы ӝокатӥз сое. Малпасько: Москваысь Бадӟым театре ке мынысалыз, Удмуртилы дан но вайысал, ачиз но сыӵе шуген ӧй улысал.

Семён ВИНОГРАДОВ,

Удмуртиысь калык художник.

«Якшур-Бӧдья ёрос исполкомлэн секретарезлы.

Якшур-Бӧдьяысь педтехникум куре ыстыны Кӧсвай гуртысь Назар Ардашевез кулаке поттэмен валче солэсь пизэ Семён Ардашевез дышетӥсьёслэн курсысьтызы уллян сярысь постановлениез. 1934-тӥ ар, 13-тӥ май».

Удмуртилэн архивысьтыз та документэз шедьтыса, гуньдэм кадь луи. 15 ар ӵоже школаын историез дышетыса, пиналъёслы ялан мадьылӥ кулаке поттонлэн мынэмез сярысь. Котьку оскыса улӥ, совето кун шонер лэсьтӥз шуыса. Мукет палдурзэ ӧй ик адӟылы.

Назар Ардашевен луэм учыр сярысь мон кылзӥ ни вал Кӧсвай гуртысь ик Фаина Константиновна Широбоковалэсь. Назар Ардашевез Кӧсвай воргоронъёс лушкем кенешазы кулаке поттыны кариськиллям. Та гуртэ со палэнысь вуэм адями, озьыен, гурт пыртос.

Мыным тунсыко потӥз та учыр. Архивысь кури Назар Ардашев сярысь документъёсты. Солэн дышетскемез вылымтэ, соин ик вань документъёсты, куронъёсты-вазиськонъёсты со интые чебер гожъям Семён пиез. Кулаке янгышен поттэмын шуыса, трос пол вазиськылэмын гурт но ёрос кенешъёсы. Но интыысь кивалтӥсьёс нокыӵе ужрадъёс кутӥллямтэ.

Нокытысь юрттэк шедьтытэк, Ардашевъёс вазисько обкомысь куронъёсъя бюрое. Отын гожтэмын, Назар Ардашев куинь войнаын ожмаськемын шуыса: Русско-Японской, Нырысетӥ но Граждан ожъёсын. Кӧня ке пол сӧсырмыны сюрылэм, соин сэрен 1902-тӥ арын со Гужмовыр гуртысь Якшуре ужаны лыктэм. Мукетъёс сямен ик, будэтэм ӟег, чабей, йыды, картош. Толалтэ Иж заводлы нюлэс дасянын ужам. Уждун тыриллям писпу дасям дунлэсь 5 процентсэ. Та ужъёсын Ардашев кӧня ке коньдон люканы быгатэм но пызь изон тӥрлык басьтэм.

Якшуре улыны выжемез бере гуртысь воргоронъёс соку ик со шоры кырыж учкыны кутскиллям, пыртос шуиллям. Праздник нуналъёсы басьтыны курылӥллям кабак вина яке дораз пӧзьтэмзэ.

Якшур гурт ялан паськытаз. Озьы ичи но ичи кылизы гырон-кизён муос, пудо возьман возьёс. Ёрос кивалтӥсьёс мукет гурт пуктыны лэзиллям. Сое нимазы Кӧсвай. Отчы тросгес улыны выжизы узыр улӥсь семьяосысь. Соос ик музъемез люконэ но пыриськизы. Шур дурысь музъем басьтонэ куанеръёсты ӧтчаллямтэ. Озьы куать куанер хозяйстволы музъем палэнэ сюрем. Соос пӧлын вал Назар Ардашев но.

Кӧсвай воргоронъёс ужаны быгатӥзы. Кылем даурысь 20-тӥ аръёсы нюлэс кораллям, сое шур кузя лэзьяллям, со сяна, сюресъёс но выжъёс лэсьтылӥллям. Соосын ӝутэмын Игерман шур вамен выж но. Со бордын ужамез понна Ардашевлы ӝыны уждунзэ гинэ сётӥллям.

Ардашевез кулаке поттӥллям 1931-тӥ арын. Документъёсын гожтэмын, со гуртысьтыз адямиосты вукояз ужатэм но ар куспын 900 пуд ю тысь люканы быгатэм шуыса. Ваньбурез сярысь верамын: валэз, скалэз, парсез, 4 ыжез, уробоез, дӧдьыез, вал кыткон тӥрлыкез – ваньмыз 1 сюрс 600 манет тыр. Вукозэ сётӥллям колхозлы.

Документъёсын вань со вылэ ужамъёслэн, шонергес луоз, дыр, со чотын улӥсьёслэн фамилиоссы но: Машковцевъёс, Широбоковъёс но мукет.

Назар Васильевич ужатэм адямиослы тырмыт коньдон тырем. Озьы ке но 1934-тӥ арын 11-тӥ июле сое кулаке поттӥзы.

Чылкыт нимыз берыктэмын 1992-тӥ арын.

Кулаке поттэмзы бере Н. Ардашевез уллязы коркасьтыз, талазы ваньбурзэ но пудо животсэ. Кык ар ӵоже та семья мунчоосын, кеносъёсын улӥз. Собере гинэ Ардашевъёс мунчо быдӟа гинэ куинь укноен корка пуктыны быгатӥзы.

Кулаке поттэмзы бере Назар Васильевич ужаз колхозлэн муш пасекаяз, собере возьмаз гурт калыклэсь пудозэ. Кин мар сётэмъя улӥз. Кулӥз 1951-тӥ арын.

Н. Ардашевлэн 4 пиналэз вал: кык пи но кык ныл. Атайзэс кулаке поттэм бере но дышетӥсьёслэн курсысьтызы уллямзы бере, Семён пиез улыны кошкиз Иваново городэ, отын ик семья кылдытӥз. Быдӟым оже басьтэмзы бере со нырысетӥ нуналъёсаз ик чиптэм-чаптэм ышиз-быриз. Назар Васильевичлэн Маша нылыз вордскемын 1917-тӥ арын. Со пырыны турттэ вал Ижевскысь рабфаке. Отчы ӧз кутэ, кошкиз выныз доры Иваново городэ. Отын педучилищеын дышетскиз, нош война бӧрсьы берытскиз вордскем палъёсаз, ужаз дышетӥсь луыса. Григорий нырысь дышетскиз Ижевскысь крезьгуръя училищеын, собере йылпумъяз военной училищеез. Взводлэн командирез, лейтенант Ардашев геройлыко быриз Быдӟым ожын. Елизавета йылпумъяз Якшур-Бӧдьяысь педучилищеез, ужаз Канифольной гуртын. Али но отын ик улэ. Тӥни сыӵе улон сюрессы Ардашевъёслэн.

Александр ЗУЕВ.

Камашев кузпалъёс.

Можга ёросысь Камыжлы (Камышлы) гуртысь Алевтина Николаевна Камашева куамын ар ӵоже почтальонка луыса ужаз. Егит дыръям газетъёсме, сумкае секыт ке но, бызьылыса люкылӥсько вал, вера нылкышно. Сыӵе мыло-кыдо, пе, ужай. Табере пыдъёсы лябӟизы, шуэ.

- Арлы быдэ «Удмурт дунне» газетэз басьтӥмы, – веранзэ азинтэ Алевтина Николаевна. – Ма, али но сое мыло-кыдо лыдӟиськом. Газетэз возьмаса гинэ пукисько. Дыраз уг вутто ке, ӧз вае меда шуыса, пырак уйин но ящикме учкыны потасько. Газет матысь эше кадь потэ ни. Сотэк мынам улэме уг луы. Отысь материалъёсты лыдӟыса, адямиосын адӟиськем кадь потӥсько. Журналистъёсты но нимын-тулын тодӥсько. Елена Сараматовалэсь, Любовь Тихоновалэсь, Зинаида Рябининалэсь гожъямъёссэс яратыса лыдӟисько. Кузпалы Виталий Андриянович берло аръёссэ ляб адӟыны кутскиз. Колхозысь котькыӵе ужез со быдэсъяз. Гуртамы староста но вал. Тазалыкез лябӟемен, быдэс газетэз ачим лыдӟыса сётӥсько.

Гуртамы 25 корка. Вазен котькуд семья «Советской Удмуртия» газетэз басьтылӥз. Яратыса сое лыдӟылӥз. Табере мӧйыослэн синъёссы лябӟо, лыдӟиськисьёс пумен ӧжыт но ӧжыт кылё. Егитъёслэн уг поты гуртэ кылемзы, городэ кошко. Нош милемыз, мӧйы калыкез, номырин гуртысь уд потты ни. Ӝамдэлы гинэ палэнэ мынӥськом ке, ӝоггес доре бертэм потэ. Туннэ нунал ортче ке, Инмарлы тау шуиськом. Виталиен улэммылы кайта 45 ар луоз. Нош али гинэ сюан ортчытӥмы кадь вал. Ми соин ӵош куинь нылпи вордӥмы. Бадӟымез, Вася пимы, гуртамы ик улэ, ужаны сьӧрло вахтаен ветлэ. Кузпалыз Ломеслудын нылпи садын тырше. Соослэн куинь пиоссы будо. Нуныкайёсмы нуналаз олокӧня пол милемыз чакланы ветло. Милемлы оломар но ужаса сёто.

Покчиосыз пиналъёсмы Павелэн Надежда Можга городын уло. Паша банкоматъёсты тупатъясь луыса ужа, нош Надя – медсестра. Соослэн но асьсэлэн семьяоссы вань ини. Ваньмыз-ӧвӧлэз 7 нуныкайёсмы будо.

Огъёзъёсыным арнянуналъёсы черке ветлӥськом. Отын эшъёсынымы адӟиськиськом. Кузпалы милемыз машинаен автобусозь каллен-каллен нуыны быгатэ. Ой, шумпото ук эшъёсы. Чырткем мед луод на ай, шуо солы.

Талэсь алама улонмы медаз луы ни. Нянь басьтыны пенсия мед сётозы. Бакча сиёнмы удалтэ. Кубистамы мар ке мында. Кинлы кулэ – мед лыктозы. Йӧгуамы куинь вышкы нюртӥм (сылалтӥм). Нылпиосмылэн ваньзылэн асьсэлэн бакчаоссы вань. Номырлы уг ёрмо. Кузпалы серекъяса вера: тон, пе, Аля, вуоно арын кубистадэ табере кык убое мертты, ява. Мон пумитаз ӧчкарыса сямен мертто, мертто, шуисько.

Вазен юн курадӟыса улӥськиз. Пинал дыр ужаса ортчиз. Ми пичиысен анайтэк кылимы. Тятямы войнае быриз. Выныз но ож лудысь ӧз берты ни. Кык вынъёслэн сизьым нылпиоссы огинын будӥмы. Чидаз ке чидаз ини пересь нэнэмы (атаймылэн нэнэез). Милемын ӵош солэн Насьта нылыз улӥз на. Милемыз пыд йыламы ӝутон понна, юасьёсыз ке но вал, мискинь апаймы таки нокинлы ӧз бызьы. Мама шуонды ке но ӧвӧл, бабады коть вань ай, шуылӥз нэнэмы. 80 аресозь улӥз. Апаймы 88-лэсь ортчыса, улонысь кошкиз. Вазен пу ворттыны вал но уг сёто вал. Инмар понна ошъёсын сьӧд тэле ветлӥзы.

Озьы ке но котькуд ужез вемеен, ӵош быдэстылӥзы. Табере бӧляк-иськавынэн валче вырись ӧвӧл ни. Котькудӥз ас понназ улэ. Табере гань-гань улӥськом ини уго. Гуртамы газ но, ву но пыртэмын. Сюресмы умой. Гуртын улӥсь калыклэн улонэз сярысь «Россия» хозяйстволэн кивалтӥсез Аркадий Вершинин сюлмаське. Со ке ӧй луысал, кытын вал ай милемлы таӵе улон.

Любовь ТИХОНОВА.

Туспуктӥз Александр СМАКЛОВСКИЙ.

З. Ермакова но М. Дашкова.

Дэри ёросысь Ожмос черкогуртын сюлмо но шаплы песянайёс уло. Зоя Ермакова куамын ар ужамын фермаын, берло дас одӥг арзэ тыршиз почтаын. Фронт мышкысь ветеран ньыль нылпи будэтӥз, тылӝуысь сӧсырмыса бертэм картсэ утялтӥз. Ожысь ветеранлэн палкышноез шуыса, солы улон югдурзэ тупатыны сертификат висъязы.

- Палэнэ кошкеме уг поты, – шуэ Зоя Терентьевна, – Ожмосэ ик корка басьтыны мылкыд кари. Нылы но гуртамы улэ, со юрттӥське мыным.

З. Т. Ермаковалы тямыстон кык арес ни, но лыдӟиськытэк улыны уг чида. Со – ёросазы потӥсь «Пригородные вести» но «Удмурт дунне» газетъёслэн эшсы. Газетмес, «Удмурт коммуна» нимын потыкуз ик, лыдӟыны кутскем ни. Бускельёсы уг, пе, гожтӥсько, мар ке умойзэ яке уродзэ лыдӟисько ке, соослы верасько ни тодэмме. Аслэсьтыз малпанъёссэ газетмылэн редакцияз но гожтэ.

Песянайлэсь мылкыдзэ тужгес но бугырто азьло аръёсы секыт улэм-вылэм сярысь гожъямъёс, ачиз но уго со пыр ортчемын. Сюлмы вӧсь луыса ик, пе, лыдӟи Иван Аркашевлэсь валъёс сярысь статьязэ («Кытчы ышизы Пегась но Лётчик?», 9-тӥ декабрь). Тодаз вае пичи дыръяз жуммем валъёсын ужамзэ.

Нош Мария Дашкова кызь сизьым арзэ ужаз гуртысьтызы больницаын, дас ньыль арзэ дояркаын тыршиз. Таиз но песянай тэк улонэз уг тоды, гуртысьтызы арлыдоосын ӵош «Азвесь» ансамбле ветлэ. Ваньмы дас куинь кузя, пе, люкаськиськом, одӥг семья кадь ик шулдыр улӥськом.

Маргарита Терентьевна ачиз но бадӟым семьяын улэ. Пиез Иван Сергеевич но кенэз Роза Владимировна, куинь пи вордыса, анай-атай юрттэттэк кылем пичи экеез вордыны басьтӥзы – таиз нылпи садэ ветлэ. Нош бадӟымез внукез али гинэ армиысь бертӥз, пичиосызгес школаын дышетско. Песянай данъяське нылпиосыныз но внукъёсыныз. Ачиз со куинь пинал вордӥз, одӥгез улонысь кошкем ни. Но задор мылкыдо нылкышно куректонлы уг сётскы.

Лия МАЛЫХ.

Туспуктӥз Владимир БЕЛОМОРСКИХ.

Малпанзы ньыльдон кык ар ортчыса быдэсмиз. Александр Иванович табере академик, наукаосъя кык полэс доктор (географияя но гурт удысъя), научно-исследовательской институтлэн директорез. Нош Семён Карпович – кылбурчи но журналист, Россиысь культура удысысь  дано ужась.

Кылем арын Ижевскысь гурт удысъя академия А. И. Костяевез огдырлы ас дораз ӧтиз, кун экзаменъёсъя комиссилы тӧро кариськыны ӵектӥз. Санкт-Петербургысь  Ижкаре потон азяз Александр Иванович тодаз вайиз армиын ӵош служить карем пиосты. Нырысь ик Семён Карпов син азяз пуксиз. Эшсэ Интернет пыр шедьтӥз.

- Пограничниклэн нуналаз мон вордӥськем Тыло гуртам вал, – тодаз вае Семён Карпович. – Телефонам жингыртӥсь вань. Кылзӥсько но пельёсылы уг оскиськы: Саша Костяев вераське. Сыӵе дыръя шумпотон быдэс мугорез инме ӝутыны турттэ кадь.

Академиклэн Ижевскын ваньмон дырыз ӧжыт вал, озьы ке но кык эшъёс кӧня ке пол пумиськылӥзы. Туэ но А. Костяев Ижевске вуылӥз. Уж висказ со Семён Карповен но гурт хозяйствоя адемиысь дышетӥсьёсын ӵош чорыганы ветлӥз, шоркарен тодматскиз.  Александр Иванович – ӟуч, Киров улосвылысь Богородск ёросысь Черемисы гуртын вордӥськемын.

Карпов армие Можга педучилищеез йылпумъямез бере вуэмын, школаын ужаса вуттымтэ. Нош Костяев дас классэз быдтыса, асьсэ школаязы ик пиналъёсты дышетэм. Солы физкультурая, физикая, черчениея урокъёсты нуыны оскиллям. Дышетӥсьёс уг тырмо вал угось. Сашалэн школаын ужамез но Сенькалэн педучилищеын тодон-валан люкамез кык егит пиосты армиысен ог-огзы борды матэгес кариз. С. Карпов кылбуръёс но, ӵош служить карись эшъёсыз сярысь статьяос но гожъялляз. А. Костяев сярысь но газетэ материал поттӥз – таиз пӧртэм ӵошатсконъёсы пыриськылӥз, котьма ласянь адӟем карымон вал.

- Саша ачиз но армиын дыръяз кылбуръёс гожъя вылэм. Нокинлы возьматъямтэ, – эшез сярысь вера Семён Карпов. – Дневнике гожъям чуръёсыз али но вань на.

Армиысь бертэмзы бере Семёнлэн но Александрлэн улонзы огвыллемгес радъяськиз. Кыкназы ик дышетӥсьёс луизы, со вакытэ ик тодон-валанзэс будэтӥзы. Одӥгез Пермь университетэ пыриз, мукетыз – Удмурт пединститутэ. Бӧрысьгес соос вордӥськем палъёсысьтызы кошкизы. Александр Иванович дышетсконзэ Ленинградысь аспирантураын азьланьтӥз, Семён Карпович Удмурт телевидение ужаны интыяськиз. Кык эшъёс асьсэ быръем удысазы тодмо но дано адямиос луизы.

Александр Костяев но Семён Карпов шоры учкыса, малпаськод: зэмос эшъяськонлэн гожъёсыз ӧвӧл, солы аръёс но, кузь сюрес но уг люкето. Туэ сӥзьыл эшъёс кыкназы ик 65 арессэс пусйизы.

- Пограничникъёслэн эшъяськонзы юн, ог-огзэс шуг-секытысь поттыны соос котьку юрттозы. Мон тани Интернетын сайт усьтӥ. Ӵош служить карем эшъёсмес утчасько, – вера А. И. Костяев. – Ортчем сюрес шоры мӧйымемъя мукет синмын учкыны кутскиськод, дунъет сётон но кӧня ке воштӥське. Нош зэмос эшъяськонлэн кужымез уг лябӟы.

Ульфат Бадретдинов.

В. Успенский.

Легендалы пӧрмем ӟуч лётчиклэн Алексей Маресьевлэн нимыз быдэс дуннелы тодмо Борис Полевойлэн «Повесть о настоящем человеке» книгаезлы луыса. Быдӟым Отечественной война вакытэ 26 аресъем Маресьевлэсь самолётсэ фашистъёс уськытӥзы. Сӧсырмем пыдъёсын воргорон нюлэскытӥ кык арнялэсь ятыр нюжтӥськиз асьмелэнъёс пала. Гангрена кутскыса, пыдъёссэ вандоно луиз. Но пилотлэн мылкыдыз лобаны куриськиз, со протезъёсын но быгатӥз на омыре ӝутскыны, фашистъёслы пунэмзэ берыктыны. Сыӵе быдӟым малпанзэ быдэстыны юрттӥзы эмчиос.

Лётчиклы операция лэсьтӥз но сое пыд вылаз султытӥз Вятка губерниын вордскем Василий Васильевич Успенский – атаезъя удмурт. Медицина наукаосъя доктор, профессор, медицинаысь генерал-лейтенант сярысь тодӥллям Национальной библиотекаысь специалистъёс. Вера валтӥсь библиограф Елена Иванова.

- Елена Анатольевна, кытысь тӥ тодӥды Успенскийлэсь выжыоссэ?

- Милям ужмы сыӵе: пӧртэм интыосысь вуэм книгаосты учкылӥськомы но Удмурт шаерен герӟаськем иворъёсты утчаськомы. Киров но Тверь (Калинин) улосъёсын та адями сярысь кемалась ӟеч тодо. Нош ми доры со сярысь книга алигес гинэ вуиз.

- Кин но кытысь со вылэм?

- Василий Васильевич Успенский вордскемын Вятка вӧзысь гуртын 1881-тӥ арын 20-тӥ толсуре. Атаез – удмурт, вуриськисьёс пӧлысь потэм купец Дмитрий Филимонович Чучалов. Соку Киров город котырын трос удмуртъёс улӥзы. Вася пичи дыръя ик анаез Ольга Ивановна кулэм. Дмитрий Филимонович выль кышно басьтэм.

Со пичи Васялы зэмос анай луыны  быгатымтэ, соин но, дыр, куать аресъем пияшкаез Дмитрий Филимонович Ижкаре келяно луэм. Отын улэ вал Василийлэн ӵужапаез Екатерина Ивановна. Солэн картэз, Василий Александрович Успенский, ужаз Александр Невский соборын протоиерей луыса. Со ик вордос пизылы атай нимзэ но фамилизэ сётэм. Озьы Василий Дмитриевич Чучалов Василий Васильевич Успенскийлы пӧрмиз.

Вася пичиысен ик кырӟаз черкысь хорын, дышетскиз духовной училищеын. Нош 14 аресказ выль анай-атаез сое Казаньысь семинарие интыязы. Ваньмыз умой луысал, но егит семинаристлы пыӵазы революционной мылкыдъёс. Эшъёссэ бугыръяськонъёсы ӝутэмез понна 16 аресъем пиез семинариысь уллязы. Соку анай-атаез вожпотэменызы вордос пизылэсь куштӥськизы. Пияш аслыз ачиз кӧттыр утчано луиз. Сарапулын земской статистлэсь ужзэ шедьтӥз, контораын ик улыса, классической гимназилэн куронъёсызъя экзаменъёслы дасяськиз но капчиен отчы пыриз.

Сое йылпумъяса, Василий Успенский Казаньысь университетэ эмъясе дышетскыны пыриз. Ассэ сюдон-дӥсян вылысь пиналъёслы урокъёс сётъяз, земствоын ужъёсты быдэсъяз, Казаньысь операысь хорын кырӟаз. Революционной мылкыдыз понна университетысь но уллямын вал, кӧня ке пытсэт сьӧрын пукиз, ссылкаын но улӥз. Кошкиз Москваысь университетэ. Тифен но холераен нюръяськись экспедициен ӵош Персие вуылӥз, тодматскиз Парижысь Пастеровской институтысь Шарль Николь профессорен.  бугырес 1905-тӥ арын улосчимес Москва университетысь но пешкытӥзы, «Кресты» тюрьмаын пукытӥзы но ссылкае келязы. Студент отысь Францие пегӟиз. Ӟеч тодмоез Шарль Николь юрттэмъя Пастеровской институтын бактериологияя кык аръем курсъёсты ортчиз, Парижысь тросаз клиникаосы вуылӥз. Со вакытлы Василий Успенский ӟеч тодэ ни вал француз но немец кылъёсты, лыдӟиськылӥз англи кылын.

1910-тӥ арын Василий Васильевич Россие берытскиз. Москваысь университетын экзаменъёс сётъян висказ Тамбов котырысь Кирсанов уездын тифен нюръяськиз. Вуоно гужемаз басьтӥз уездной врач но лекарь луэмез сярысь диплом. Москваысь Старо-Екатерининской больницаын тодмо эмчиос вӧзын стажировка ортчиз. Но бугырес мылкыдо адямилы Москва котырын ужаны инты ӧз шедьы.

1912-тӥ арын Успенский Кострома губерниысь Кологрив городэ интыяське. Чугун сюрес станцилы 100 иськемысь городын со валтӥсь эмчи но хирургияя ёзэн кивалтӥсь луэ. Со вакытэ Василий Успенский кышнояськемын ни вал, Сергей пизы вордскиз. Василий Васильевич вань кужымзэ сётӥз эмъян удыслы. Кӧтпуш висёнъёсъя хирург лэсьтылӥз синлы но операциос, кышномурт висёнъёсты но эмъяз, нылпи вордскыку кылдэм секыт учыръёсы но юрттылӥз. Соку Успенскийёслэн юртазы люкаськылӥзы Кологривысь дышетӥсьёс, эмчиос, юристъёс. Василий Васильевич больница вӧзы арама мерттӥз, больница котыре кизиз газон.

- Нош ку Успенский вуиз Твере?

- 1918-тӥ арын Успенский отчы кышноезлэн ӵыжы-выжыосыз доры адӟиськыны мынэ. Но сое басьто Граждан оже. Хирург луыса ужа 902-тӥ эвакогоспитальын, собере Шор госпитальын. Вуоно араз гужем татчы улыны лыктэ семьяез но. Со дырысен Василий Васильевичлэн вань улонэз герӟаськемын Тверь (Калинин) городэн но та улосвылысь калыкез эмъянэн.

1921-тӥ арысен Успенский рос-прос наука борды басьтӥське но аслыз кивоштӥсьёс дасяны кутске. 1916-тӥ аръёсысен медицина журналъёсын потылӥзы солэн лы чигон но сое бурмытон сярысь статьяосыз. Собере печатласькыны кутскизы пуш висёнъёс сярысь, пыктосъёсты вандылон сярысь бадӟымесь ужъёсыз. Куд-ог операциос солэн нимыныз нимамын.

1934-тӥ арын эмчи-тодосчи, француз кылысь ӟуче берыктыса, печатла Ж. Мезоннелэсь «Малая хирургия» книгазэ. Успенский мылысь-кыдысь басьтӥське медициналэн пӧртэм удысъёсыз борды. Кызьы гожтэ солы характеристикаын СССР-ысь Медициная академилэн член-корреспондентэз, профессор А. Багдасаров, В. Успенский 1923-тӥ арысен кутскиз таза адямилэсь вирзэ басьтыса висисьёслы лэзьылыны. Совето Союзын донор ужен вырись институт, куинь ар ортчыса гинэ, усьтӥськиз ай. Москваысь эмчиослэсь тодон-валанзэс будэтонъя институт пӧртэм удысъёсъя курсъёссэ Успенский дорын ортчытъяны ӧдъяз. Уно ужамез но егитъёсты будэтыны трос сюлмаськемез понна эшъёсыз сое «русский чернозём» шуылӥзы. Со адямиосты юн гажаз, калык но со доры кыстӥськиз.

- Сыӵе трос лэсьтэм муртэ данъяны ӧз вунэтэ, дыр.

- Вылӥ аттестационной комиссия В. Успенскийлы, вань гожтэм ужъёссэ лыдэ басьтыса, кандидат луытэк но диссертация утьытэк, медицина удысысь доктор степень сётӥз. 1937-тӥ арын профессор луиз. Со дыре ик солы Россия Федерациысь дано эмчи ним сётӥзы.

Быдӟым Отечественной война аръёсы Василий Успенский эвакогоспитальын валтӥсь хирург вал. Татчы вайылӥзы ожын секыт сӧсырмемъёсты но тушмон мышкын вӧсь луэм покчиосты. Куинь сюрслэсь ятыр нылпиосты пыд йылазы султытӥз со, уно сюрсъёсын ожгарчиосты фронтэ берыктӥз.

Война вакытэ та госпитале вуылӥз Климентина Черчилль госпожа но. 1944-тӥ арын 18-тӥ коньывуонэ потэм «Правда» газетын гожтэмын солэн Лондонысь радио пыр верамез. Отын со Успенский докторлэсь но мукет эмъясьёслэсь геройлыко ужамзэс пусъе.

- Елена Анатольевна, Маресьев лётчикен югдур кызьы луиз?

- Дано лётчиклэсь пыдъёссэ гангрена сисьтыны ӧдъям. Туж секыт операциез ортчытэм Василий Васильевич. Б. Полевойлэн «Повесть о настоящем человеке» книгаяз профессорлэн нимыз но воштэмын ӧвӧл. Вераны кулэ, Маресьев больницаысь кошкыку, доктор солы кузьмам дуно писпулэсь, слон лылэсь кутонэн чебермам бодызэ.

Та книгаез суредась Н. Жуков докторлэсь тусбуйзэ лэсьтэм. Нош бӧрысь, та книгая кино дасяку, Алексей Дикий артистлы Василий Успенскийлэн ымнырызъя грим лэсьтӥллям. Солэн туспуктэмез: пурысьтам йырсиё, батыр мугоро, сӥлё-виро, таза воргорон. Нош синъёсаз тылсиос шудо. Успенскийлэн лулпуш кужымез бадӟым вылэм. Со юрттӥз бадӟым организатор луыны. Калининын со кык библиотека люкам. Огез – город понна, мукетыз – аслаз. Дораз со возиз эмъяськонъя быдэс дуннеысь книгаосты но журналъёсты, чеберлыко классикаез. Яратэ вал лыдӟиськыны, литература сярысь калык азьын вераськыны.

- Но Калининэ фашистъёс пыризы.

- Зэм, соос куашкатӥзы больницалэсь выль юртсэ, лушказы вань инструментъёсты но оборудованиез, быдтӥзы пыктосъёсты вандылыса эмъян сярысь монографилы дасям ужъёссэ. Озьы ке но Василий Васильевич ӧз юскиськы. Улонысь кошкиз 1952-тӥ арын.

- Нош кыӵе семьяез солэн?

- Василий Успенский кышнояськиз 1910-тӥ арын Тулаысь Фаворский священниклэн 20 аресъем Наталья нылыныз. Вордскиз Сергей пизы. Октябрь революция азьын Ольга нылзы вордскиз на. Сергей атаезлэсь сюрессэ бырйиз, эмчи луиз. Быдӟым ож азьын атаезлэн кивалтоно больницаяз ужаз но наукаен выриз. Василий Васильевич солы туж оскылӥз, бадӟым учёной луоз шуыса. Но Сергей фронтэ кошкиз, быриз.

- Василий Васильевич Иже вуылӥз на-а?

- Со сярысь тодмо ӧвӧл. Но тодмо мукетыз. Дмитрий Филимонович Чучалов Вяткаын тодмо купец луэм. Удмурт воргоронлэн вылэм ини лавкаосыз но, гостиницаез но. Со атай нимзэ но фамилизэ воштэм пиезлы ялан юрттӥськылэм. Василий Успенский семья кылдытэмез бере Кологриве атаезлэн ыстэм коньдонэныз улон юрт басьтӥз. Вяткае Василий Васильевич вуылӥз ик, дыр.

Быдӟым врачлэн вордскемез дырысен 120 ар тырмон азьын, 2001-тӥ арын толсуре, Тверьысь 1 номеро больницалы сётэмын медицина наукаосъя докторлэн В. Успенскийлэн нимыз.

Владимир Михайлов.