Эх, пие, макем мон янгыш тон азьын! Нуналлы быдэ вӧсь карисько тонэ. Но оскы: ачим но валатэк, вӧсь карисько!

Мынам ноку тодам уг лыктылы: тыныд вить арес гинэ ай. Ӵукна, уже бере кылемелэсь кышкаса, тонэ зурк-зарк сайкатӥсько. Назьылляськемед потэ шуыса, уг ик малпаськы. Кемагес посӥськиськод ке, шобреттэ вылысьтыд соку ик кыскисько но, мугорыд салкым коркан соку ик «ӟазег куэн» шобыртӥське. Кынмемедлэсь курдаса, тэтчыса ик султӥськод, дӥсьтэ утчаны кутскиськод. Тыбырад вешаны тодам но уг лыкты. Соку ик султыны уг яра, погылляськоно кӧня ке шуыса, эмъясьёслэн алэмзы но кемалась вунэмын ни.

Соку ик мисьтӥськыны уллясько. Ву шапыкъёстэ пазяса кельтӥськод ке, сюлэмам олокытысь вожпотон бугырске. Мучоло чалмыт кутэм но адӟымтэ дыръяд ӵушалтэм интые, кымесад тэшкыльтӥсько но куаретӥсько: чылкытгес луыны ку дышод, ӵӧж?

Кымесысьтыд гордэктэмез бырыса уг вуы на. Оло куалектэменыд, оло дыртытэменым, гадь вылад уськытӥськод чай шапыктэ я ӝуктэ. Мон нош ик урмисько. Тусьты-пуньыдэ ик азьысьтыд ишкалтӥсько. Вылаз ик – «парсь» шуисько.

Озьы, пие, озьы, «мусое», «дуное» шуэм интые, мон тонэ «парсь» карисько. Нылпи садысь ӝыт басьтыкум, тон монэ куддыръя шумпоттыны выриськод ас киыныд кыӵе ке лэсьтэм чачаеныд. Пичи кикыосыд туж чебер лякылыны выриллям машина. Нош мон шораз но уг учкиськы. Секыт ужам бере йыр жон! вазе, одӥг гинэ малпанлы отын интыез вань: табере ведь тае маин ке сюдоно на. Нош тон весь ёртӥськод: чебер-а, атай, лэсьтӥ? Будэтӥськод на: мон сое тыныд кузьмасько, тынэсьтыд машинадэ лэсьтӥ. Кельше-а? Нош мон, пал синмын но шораз учкытэк, кеськисько: пыд улын эн костаськы! Тон, номыр куаретыны дӥсьтытэк, кытчы ке огшаплы ышиськод. Пыд улам, зэмен ик, уд костаськиськы ни. Но тыбырыным шӧдӥсько: ӧс сьӧрысен лушкем учкылӥськод шорам. Тон астэ янгышен шӧдэменыд, ачид но валатэк, ӧс мышкысен уӵеръяськод. Нош мыным йӧтэ: чакла таид выросъёсме. Уката урмисько: мын коть телевизор учкы! Телевизор адямиез воштоз, шунытсэ кузьмалоз кожасько, лэся.

Тынад монэн вераськемед потэ. Кызьы нуналыд ортчиз – мадьыны кутскиськод. Сиськондэ ик вунэтыса. Группаысьтыды ик кыӵе ке нылашлы синмаськи, шуид вал кадь. Юаны вырид: чупаськыны яра ни-а? Валэктонме возьмад. Нош мон, мар вазьыны паймыса, оло, юандэ воксё но пель сьӧртӥм лэзьыса, кеськи: сиськыку уг верасько – гуньдод!

Ӝыт но мон уг юалляськиськы тынэсьтыд номыре. Вӧзад выдӥсько но куаретӥсько: кӧл ни, бучыра. Выжыкыл лыдӟыны гинэ но куддыр ӟигары уг тырмы. Книга лыдӟонъям одӥг-ог ачим умме усисько. Бератаз сайкасько тынад маяллямедлэсь, монэ чупамедлэсь. Возьыт луэ но тэтчыса кошкисько. Нош ик вазисько: кӧл ни, ослоп! Мукет сэреге потыса, ачим кема дыр ӵоже кылӥсько на солань-талань берыкъяськемдэ. Соку но дорад уг мынӥськы. Курдасько: нуныяй ке, зэмос пиосмуртэ тынэсьтыд будэтыны уг быгаты, ныл кадь эркияськись луод. Ачим огпол ке но тонэ рос-прос вешасал ке! Огпол но рос-прос ӟыгыртыны но уг валаськы. Нодтэм мон.

Нош тон, нунал вордӥське ке, весь бордам йӧттӥськыны-няняськыны выриськод. Но мынам шутэтскон нуналъёсы но тонэ алвылам пуктылыны дыры уг тырмы. Аслым юртъер котырын весь кыӵе ке уж шедьтӥсько. Тон нош ик я кортӵог мыным ваёд, я пуме кутыны юрттод. Кияд шырпу пырыку но, тонэ жаляны уг валаськы. «Ачид янгыш» шуисько но тонэ уллясько. Нырдэ кысканы кутскиськод ке, кеськисько на: бӧрдыса утча – тышкало! Кошкиськод. Жугемелэсь курдаса ик, оло, воксё син азьысьтым ышиськод.

Нош туннэ, туннэ мон воксё куашкатӥ тонэ, пие. Эшъёсыныд шудӥськод вал. Ньыльпыдесъяськыса ик машинаяд луо тыриськод. Юлтошъёсыдлы ушъяськиськод: учке ай, кыӵе чебер машина мыным атай басьтӥз. Алдаськод тон соосты. Ӵужапаед кузьмаз со чачаез тыныд. Мынам шудонъёс утчаса ветлыны дыры ик ӧвӧл. Озьы ке но тон эшъёсыд азьын монэ Инмар чот кариськод. Нош мон тонэ соос азьын ултӥясько. Туннэ ачим но валатэк кыли шорад кеськемме: «Кин ньыльпыдесъяськыса шудэ, парсь? Астэ уксё поттыны лэзё ай калготки кесямед понна!»

Озьы шуи но дыбыр-колтыр пыри доре. Газет лыдӟон борды пукси. Кылӥ: тон но сьӧрам. Азям султӥд гинэ – мон лек вази ни: «Мар кулэ?» «Пие» шуыны но ымы ӧз пыры. Нош тон, лекме кылытэк кадь, бордам ӟыгырскид но шуид: «Атай, яратӥсько мон тонэ». Мон тонэ соку но палэнтӥ. Уг ваньмиськы, шуи. Тон нош ик шыпыт кошкид.

Пие, вождэ эн вай мыным. Берыд ышемед бере гинэ валай кадь «яратӥсько» шуэмдэ. Соку гинэ йырам пыризы кадь со мусо кылъёсыд. Но соку но сьӧрад ӧй поты, ӧй суты, ӧй ӟыгырты тонэ. Али гинэ тани дӥсьтӥ вӧзад пуксьыны. Но тон изиськод ни. Тон номыре уд шӧдылӥськы. Нош мынам бам вылтӥм гылӟо синвуосы.

Пие, простить кар шузи атайдэ. Мон весь вунэтӥсько: тыныд вить арес гинэ ай. Тон бадӟым адями ӧвӧл на ваньзэ соку ик шонер но быгатыса лэсьтыны. Асэным ӵошатӥсько, лэся, тонэ. Ачим кадь соку ик луыны кулэ, кожасько: саптаськытэк сиськись, лушкем лыдӟиськыса пукись, ужась. Ачим ваньмызлы соку ик дышысал ке! Аслэсьтым пичи дырме воксё вунэтӥськем ни. Нош тынэсьтыд но шаянгес вал. Тусьты-пуньыез но пильылӥ, атайлэсь уксёзэ но лушкалляй. Мон али ке но янгышъёс лэсьтӥсько на.

Но, пие, кылме сётӥсько: ӵукнаысен монэ уд тодма ни. Тупатско. Одно тупатско! Мон тонэ ноку уг пыкылы ни. Мон яратӥсько тонэ.

Елена Сараматова.

Магазинын вить-куать мурт сылэ. Параска чырткемъяськиз но ӧйтӧд кудзылэсь юаз:

- Мар-о Наталь сомында басьяськиз ай, вань товардэс ӧз быдты-а?

- Толон гинэ вуз вайизы, ваньдылы тырмоз, – коньдон чотанъяз шуиз продавец Валя.

- Али ик нуны сюанлы дасясько ни шат? Кензы, пыд азьзэ адӟытэк, мырдэм ветлэ ни, – йыркуро куаретӥз нылкышно.

- Нош тынад йыртышкад йӧтэ, о-о, Парски, Володя Зинадэ кулэ ӧз кары но бускель гуртысь Любаез басьтӥз шуыса, – будэтӥз вуз карись.

- Нош тон кылдэ уд шӧдӥськы чик, – вожез потыса ик, кутскиз танӥськыны Параска. Собере гань-гань куаретӥз: – Уг, воже уг поты, Зинае солэсь устогес карт шедьтоз ай. Со мынам чебер но, визьмо но. Нош со Любазылэн не тус аслам кадь огшорыгес, не мугор боды кадь, сандыкез но, пе, буш вал. Мынамезлэн пирданэз кык машинае но уз тэры.

- Однако пирданэн но кулэ ӧз каре кадь дыдыдэ, – серектӥз бускелез.

- Мыскыллялэ, ойдо, адӟом ай, кин шудо луоз, нош кин бӧрдоз, шӧдтэк ум кыле, дыр, – шуиз параска но укно пала берытскиз. Черодэз вуытозь, со нокинэн но ӧз вераськы ни. Со куспын лавкае Натальлэн бускелез пыриз. Кыллы бырем Нина чан-чан куараеныз кутскиз:

- Умоесь-а, кенакъёс, выль ивор тодэмды потэ-а?

Магазинын сылӥсь кыш-

ноос коӵоос кадь ымзэс усьтӥзы, Ниналэсь верамзэ возьмаса.

- Татчы лыктыкум, Микол Натальёс дорысь «Скорой» кошкиз. Любазы шугектэм.

Параска пельёссэ сак кариз. Ас понназ малпаз: кыӵе усто учыр тупаз ай.

- Параска апай, мар басьтод? – кышномуртлэсь малпанъёссэ куспетӥ кариз вуз карись.

Нылкышно огшап шып сылӥз но, уксётэк лык-тӥськем шуыса, лавкаысь пырс потӥз.

* * *

Параска гушъяса-гушъяса ик нюк улысь ошмес дуре васькиз. Гуртоос татчы гужем ӵем ветло: вулы но, миськем арбериоссэс гылъяны но. Нош толалтэ кожасез ичи. Параска бушатӥз ведра пуктон инты. Дорысьтыз дыртыса потӥз, лымы мычон лопата кутыны йыраз ӧз лыкты. Секыт шуыса, ведраоссэ пачыл-пачыл ӧз тырмыты, корка дорозяз кыдёкегес ик мыноно уго. Но таӵе муг шедьыку, со кык-куинь иськемез но ортчыны дась.

- Параски, толалтэ куазен ошмесэ васькад шат, колонкады кынмиз-а, мар-а? – вазиз пумитаз сюрем кышномурт.

- Кынмем, лэся, – йырзэ ӝутъятэк, шуиз со.

- Ма, милямаз ву бызе, кож вал татчы, – уг дугды бускель урамысь кенак.

- Тӥляд вуэныды чай ческыт уг луы, напез но уг поты, – будэтӥз Параска, пумитаз шедем адямиез ас понназ тышкаськыса: мар ужез, кытысь мон ву вайисько, солэн пельпумъёсыз уг жадё ук, акылес боды.

* * *

Любалэн кӧтыз вандэм кадь вӧсь луэ. Огшаплы лэзе но нош ик кырме, азьвыллэсь но зол шымыртэ. Врач учкиз но кышномуртлы шуиз, вазь на ай, пе, чида. Нош кызьы сыӵе вӧсез чидалод? Кӧй мугоро акушерка, зӧк чиньыоссэ позыръяса ик, Любалы шуэ:

- Нырысьсэ вайисьёс кема курадӟо, ӝытозь уд ворды на.

Выль кенлэн синвуосыз ик потӥзы, нош трактор мугоро акушерка серектӥз гинэ:

- Пиосмурт улэ выдыны гинэ капчи, соку ӧд бӧрды, дыр, табере чида.

Палатаын Любаен ӵош улӥсь нылкышно шуиз:

- Эн кылзы со пересь куткаез, ассэ нокин кышно басьтымтэ но лексэ асьме вылэ кисьтэ. Тон выдыса эн кылльы, кызьы умой, озьы ик кариськы: сылыса-а, ветлыса-а. Кӧтыд ӵемгес но ӵемгес вӧсь луэ ке, озьыен, ӝоген ваёд ни.

Нош ӝытазе кӧй акушеркалы но серем ӧй вал ни, врач но бызьылӥсь луиз. Соос ӧз валалэ, малы Любалэн пиналыз вордӥськыны уг вормы. Нуны укыр бадӟым ӧвӧл, пачкамын ӧвӧл, анайлэн вуосыз кошкизы, нош пиналлэн югыт дуннее потон тодаз ик ӧвӧл. Люба ӧз шӧды ни, кызьы сое операционное нуизы. Врачъёс нунызэ кӧттӥз поттоно кариськизы. Но татын но егит анайлы ӧз удалты, Любалэн вордскымтэ нылыз пушказ кулӥз. Наркозлэсь сайкам кышномуртлы врач вакчияк шуиз:

- 20 ар ужатозям, таӵе учырен пумиськылэме ӧй вал на. Ваньмыз чакламъя мынӥз кадь, нош пӧрмиз тӥни кызьы. Нуныедлэн гогыез чырты котыртӥз кык пол бинялскем, соин ик кеказ, луоз.

Кыӵе кышкыт кылъёс. Соосты валаны Люба ӧз быгаты. Кызьы озьы, укмыс толэзь ӵоже витем нуны кулэ? Малы, кин янгыш, мар табере кароно? Люба быдэс уйзэ бӧрдыса ортчытӥз. Нырысь нунызэ жаляз, собере ассэ, бӧрысь картсэ. Кызьы со Володяезлы вералоз, пиналзы лултэм вордскиз шуыса?

* * *

Люба ньылетӥ нуналзэ кылле ини нылпи ваён юртын. Кӧня улэ ни, сомында ик бӧрдэ. Нунызэс нонтӥсь анайёсты адӟе ке, гадьёсыз тыро, нош сюлэмзэ ныж пуртэн вандо кадь. Нылыз кулэм сяна, кышномуртлэн аслаз но тазалыкез чутыны ӧдъяз. Вир кошконзэ врачъёс нокызьы но дугдытыны уг быгато. Капельница пуктыло, уколъёс бышкало, пичияк умой луэ кадь, собере нош ик вир кошке. Люба нуназезэ кызьы ке чида ай, нош уйин коть чир черекъя. Кызьы укно сьӧрын кезьыт тӧл вузэ, Любалэн лулыз но озьы ик бӧрдэ. Уйвӧтъёсаз пичи нылзэ адӟе, сыӵе мусо, чебер, таза кадь со. Нош кылем уй валантэм вӧтаз. Гуртазы кадь со. Бускель урамысьтызы Параска соос доры тэркы трос шуэн лыктэм но Любаез куно карыны выре. Ме, пе, си, юри тыныд шуыса бичай. Выль кен пыкиськыны выре, шуэз уг яратӥськы, чырс потэ, шуэ. Нош арлыдо кенак вань шузэ корка котыртӥ пазяз но серекъя: э-э, гыдыке, та шу шоры учкыса, эк, шу, шуод ай. Параска кошкиз, нош лымы вылэ пазьгем шу гурыос, вир шапыкъёс кадь пиштыса, кылизы.

Ӵукнаяз врач Любаез учкиз но шуиз, Иже келяно, дыр, тонэ. Тазьы ик виред кошкиз ке, кема ӧвӧл ачид но нуныед сьӧры кошкод. Вань одӥг амал, но соку ноку но пинал вайыны уд быгаты ни. Шутэтскон нуналъёсы чаклалом ай, ӧз ке ортчы, Иже келялом.

Люба бӧрдыса палатаяз пыриз. Эшез солэсь верамзэ чал-чал кылзӥз но шуиз:

- Мон ачим татысь, Кизнерысь, нош быземын Киров улосысь Уржуме. Отын туж тодмо туно улэ, пор песянай, ми палан сое Такъян гинэ шуо. Тон, дораз ветлыса, утча вал. Больница юрттыны уг быгаты бере, оло, солэн пайдаез луоз. Талэсь уродгес уз луы ни.

- Кызьы сокеме мыном? Мынам вамышъяны но ӟигары ӧвӧл. Собере уг оскиськы мон туноослы.

- Ӵуказе кӧснунал, обход ӧвӧл, карттэ машинаен ӧть. Процедураос бере пуксёды но кошкоды, ӝытозь вуоды ук. Татын медаз тодэ. Кузпалыд сьӧраз тыныд дӥськут мед кутоз.

* * *

Володя пумит ӧз луы. Укмыс час котырын соос сюрес вылын вал ини. Кыксы ик шып мынӥзы. Люба ӧз тоды, мар сярысь вераськыны, нош картэз ӧз вала кудлань вазьыны, кышноез медаз ӝожомы шуыса. Озьы ик ортчизы кузь сюресэз.

Кулэ коркаез шедьтыса, Люба туно доры пыриз. Арлыдо кышномурт гур азяз берга вал. Сьӧрлось кунолы со чик ӧз паймы кадь.

- Лыктӥд бере, чаль татӥгес, мар ӧс дорын сылӥськод. Ойдо чай юом. Мон туннэ шуэн перог пыжи. Анае шунянь туж яратэ вал. Война вылтӥ уго сиён туж ик ӧй вал. Мемей нюлэскы ветлоз но та горд емышъёсты бичалоз, собере я шу кисаль пќзьтоз, я шуэн пыжиськоз. Солэсь но ческыт сиён ӧй вал кадь, – тодаз вае туно.

Люба ӟигартэк лэзиськиз пукон вылэ. Нош Такъян апай со шоры уг ик учкы. Чай лэзён куспаз шуэ:

- Нылыдлы Такъян ним пон, ява, чукыныны но эн вунэты.

Любаез чабкизы кадь. Кыӵе туно со, уг ке адӟы, нуныез али гинэ кулӥз шуыса. Кышномурт ымзэ усьтӥз ни вал. Туно куспетӥ кариз:

- Сюресэд кузь, чайдэ ю но мынэ бертэ.

- Мон татчы чай юыны ӧй лыкты, – ӝожомиз Люба.

Такъян выль кен шоры кема учкиз, Любаез со синъёс сӥсъязы кадь. Собере туно ӝӧк вылысь шунянез басьтӥз но шуиз:

- Тани та пыжиськемез машинае пуксемед бере ик си, огкутскемен копаксэ…

* * *

Параскалэн мылкыд тулыс нунал кадь. Капказьзэ мычыны потӥз но, бускелез Орина шуэ:

- Параски, кылӥд-а, Микол Володяослэн нунызы арам луэм, лултэм, пе, вордскем.

- Чик уг паймиськы, муртлэн синвуэз сьӧлыктэм пинал вылэ усиз, луоз. Володялы луыса Зинуке кӧня бӧрдӥз. Табере ачиз мед вузоз. Со гинэ мар, кышноез нуныез сьӧры кошкоз ай, адӟод, – вазиз кышномурт.

- Остэ, Параска, мар сыӵе вераськиськод?

- Мае тодско, сое ик верасько. Малы, кожаськод, мон тол куазен ошмесэ васькай. Как тодӥ, Любаез роддоме нуизы шуыса, соку ик вулы васькай. Ведраме тырмытӥ, доре вайи но тунгонай, Миколъёслэн выль кензы вордыны медаз вормы шуыса. Нош собере, кык нунал ортчыса, кыл вераса, вузэ кисьтӥ. Кызьы ошмесысь ву бызе, озьы ик Любазылэн вирез мед кошкоз шуыса, – верамзэ валатэк-а, ушъяськемез потыса-а, шуиз со.

Орина номыр ӧз куареты, вылысьтыз вылаз кирос тырыса, азбараз пыриз. Нош Параска, нокыӵе кариськытэк, капказьзэ мычиз.

* * *

Люба шуэн пыжиськемез кияз кема бергатӥз. Мар кароно: куштоно яке сиёно?

- Пӧраськемез яратӥсь-код ук, си, нуназе ортчиз ини, тон ке сютэм ай. Бурмон понна сиськыны кулэ, учкы ай, кыӵе начармид ини, – сюлмаськиз Володя.

Люба куаш куртчиз шунянез. Ческыт ик вылэм, яке кӧтыз сыӵе сюмаз-а? Сиськемез бере кышномуртлэн иземез потыны кутскиз. Сюрессы кузь бере, гань-гань кариськиз. Но час ортчыса, кӧтыз чутыръяны кутскиз. Нырысь каллен, собере золгес но золгес. Кышномурт, нуны вайыкуз кадь, курадӟыны ӧдъяз. Огшап озьы мынӥзы ик ай, собере Люба ӧз ни чида, машина трос ӝуштыны кутскиз. Картэз сюрес урдсы дугдӥз. Люба машинаысь гыж потӥз ини. Вӧсьлы чидатэк, нылкышно лымыын погылляськиз, собере ӧсконэз пӧсьтӥз. Картэз, мар карыны валатэк, Люба котыртӥ берга:

- Мон но мон ини, врачъёслы оскытэк, тонэ олокытчы нуи, малы кылзӥськи? Мар каром, татчы кулӥд ке, тонтэк мон но уг улы! Кытысь-марысь со туноез тодӥд, эмъян интые ведназ, дыр, – кузпалзэ ӝутонъяз кесяськиз Володя.

Нош Любалэн вераськыны ӟигарыз ӧй вал ни, ымдуръёсыз лызэсь, ачиз кӧдэктэмын, кымесаз пӧсям вуэз быльырамын. Пиосмурт сое машиналэн бер пуконаз выдтӥз. Больницаозь Володя лобаса мынӥз. Люба синъёссэ ӧз усья, одӥг-ог лулӟылӥз гинэ. Озьыен, улэп, кышноезлэсь шокамзэ кылзыса, ширтӥз Володя. Нылпи ваён юртын висисьсэс ыштӥзы ни вал. Картэз Любаез, ки йылаз ӝутыса, пыртӥз, нош машинаысь сидение вылэ вир пытьы кылиз. Врач урмыса кесяськиз пиосмурт шоры. Любаез со нырысь кулэмын малпаз, собере йырсазьзэ ыштэм кожаз, нош егит нылкышно изе вал.

…Кык час ортчыса, выль кен сайказ. Соку гинэ гань-гань шокчизы эмъясьёс но, Володя но, палатаын Любаен ӵош кыллись но, сое туно доры ыстэм нылкышно но.

…Нош ар ортчыса, Микол Натальлэн корказ нуны бӧрдэм куара кылӥськиз. Люба нылызлы Такъян ним понӥз. Нуны сюанэ соос вань бӧляксэс ӧтизы. Узыр ӝӧк вылын шуэн пыжиськем но вал.

Галина Савина.

А. Никонова библиотекарь (сылӥсез) лыдӟиськисьёсын.

Алнаш ёросын ваньмыз-ӧвӧлэз 19 гурт библиотека. Туймыйыл гуртысез алигес пусйиз 60 аръем юбилейзэ.

Туймыйылын 2 библиотека: одӥгез – школа бордын, музонэз клубын. Озьы ке но огез но буш уг улы. Гуртын ваньмыз-ӧвӧлэз 870 улӥсез. Лыдӟиськисьёссы понна библиотекарьёс вожмасько, ява. Калыкез бордазы кыскон, книгаос котыре бинён вылысь олокыӵе но ужрадъёс радъяло. Озьы ёрос ӵошатсконын Туймыйыл гурт библиотека туэ нырысетӥ интые потӥз.

Татын уго книга бордын гинэ уг пуко. Библиотекаын ужасьёс Анна Никонова но Лилия Лебедева кык клуб кылдытӥзы – «Майбыр» но «Туймыйыл тугоко».

Нырысетӥяз тазалыкез юнматонэн выро. Отчы ветлӥсьёс туннэ ог кызь кузя люкасько. Ваньзыгес ик 45 ареслэсь ортчемъёс. Ог-огзылы визь-кенешен юрттэм, вераськем сяна, пӧлазы одно ик ӧте я массаж лэсьтӥсез, я педиатрез. Таосты пӧртэм темаосъя лекция лыдӟыны, малы но солы дышетыны куро. Но весь юртъер пушкын уд пукы ук. Гимнастика лэсьтэмзы бере толалтэ куас вылэ султо, кезьыт вуэн пыласько, шуныт куазь вуэмен, инкуазе потало. Иже но «майбыръёс» вуыло спектакль я концерт учкыны. Автобус асьсэос ик шедьто, бензинлы дун тыро но ширто. Гуртысь ужез ужаса ноку уд быдты, шутэтскыны но кулэ, шуо нылкышноос.

«Туймыйыл тугоко» кылбурчиосты огазея. Котырес ӝӧк сьӧры толэзьлы кык пол люкаськыло, выль ужъёсынызы тодмато.

Азьланяз библиотекаязы тэшкылиосты но кызьы ке кыткыны медо. Пичиысен, пе, книгаез яратон мылкыд пыӵатоно.

- Зэм, егитъёс пӧлын лыдӟиськисьёс ӧжытгес, – лулӟе Анна Никонова. – Соосыз но детектив кадьёстыгес гинэ басьяло. Нош классика вужере кыле. Тазэ уногес лыдӟо арлыдоос. Соос историен но тунсыкъясько. Дасо ар талэсь азьло гинэ мӧйыосты библиотекаысь шер пумиталод вал. Весь ӧз ваньмылэ юртъер котырысьтызы. Туннэ ужзэс капчиятӥз ни техника. Мисьтаськыны гинэ но машиналы оскемын уго. Кин но со серектэ: пересьёс быризы ке, библиотекае пырась уз луы ни. Но мон юн оскисько: библиотека уз быры, гуртысь вань юртъеръёсы Интернет ке но вуиз. Книгаез кие кутыса, котькуд бамзэ берыкъяса лыдӟонлэн аслаз номырин воштонтэм шӧмыз уго. Матысь эшен кадь, ваче син вераськыса, пукиськод.

Библиотекалэн фондаз туннэ 4 сюрс 357 книга. Та пӧлысь 430-эз – удмурт изданиос. Но Никоноваен Лебедева таин гинэ уг буйгало. Библиотекалэн юбилеезлы кузьмам уксёен но книгаос басьтӥзы. Соин гурт калык удмурт книга-газетъёсты уг лыдӟы, шуыны уг луы. Удмурт газет-журналъёс понна вожмасько но. Дорысьтызы но куд-огез подшивкае аслэсьтыззэ вае. Собере, дэмен люкаськыса, пуштросэз пумысен но кенешо. Лыдӟиськисьёс асьсэос но шуо ук: ми татын бадӟым семьяын кадь. Библиотекамы ӧз луы ке, кытын огазе люкаськомы на.

Елена Фёдорова.

Г. Романова, В. Векшин, Л. Нянькина.

Национальной библиотекаын ортчиз Ашальчи Окилэн кылбуръёсыныз, веросъёсыныз но со сярысь тодэ ваёнъёсын «Та буртчин бурдъёсы» книгаен тодматскон.

Книга потӥз кылем арлэн пумаз «Удмуртия» издательствоын 2 сюрс тиражен. Печатламын ӟуч но удмурт кылын. Книгалы дунне вылэ вордскыны юрттӥзы Алнашысь А. Окилэн музееныз кивалтӥсь Мария Петрова но кылбурчи Лидия Нянькина.

Библиотекаын ужасьёс бадӟым выставка дасяллям. Люкаськем калыкез – студентъёсты, кылбурчиосты – ӟеч мылкыдын пумитазы А. Окилэн кылъёсызъя гожтэм кырӟанъёс…

Книгаен тодматсконэз усьтӥз Лидия Нянькина:

- А. Окилэсь чуръёссэ нырысь ик лыдӟись доры вуттыны пӧрмытӥзы критик Алексей Ермолаев но кылбурчи, фольклорист Пётр Поздеев – «Кенеш» журналын но «Гудыри» («Удмурт дунне») газетын печатлам ужъёссэ огинэ люкаса, бичет поттӥзы. Таӵе ик уж борды кутскыны мыным ӵектонэн вазиськиз М. Петрова: кылбурчилэсь вань веросъёссэ, кылбуръёссэ но со сярысь тодэ ваёнъёсты одӥг книгаен поттыса, пе, умой ӧй луысал меда? Та книга дышетӥсьёслы но, лыдӟисьёслы но бадӟым юрттэт сётысал. Пусъёно созэ но: кылбурчилэсь юртсэ музейлы шуыса тупатъяку, лэсьтӥськисьёс выж улысь ӵужектэм бумага шедьтӥллям но сое отын ужасьлы Наталья Фадеевалы сётӥллям. Нылкышно кылбурез музейлэн архиваз интыям. Ми малпамъя, кылбурчи сое гожтэм но ляб шуыса-а яке мукет муген-а пыдло ватэм. Угось со, фронтэ ветлэм сяна, кык пол пытсэт сьӧрын пуконо луиз. Та шедьтэм кылбурез ӟуч кылэ берыктӥз ӟуч кылбурчи Василий Глушков.

А. Оки веросъёс пиналъёслыгес гожъяз. Пӧлаз вань мӧйыослы сӥземъёсыз но.

Книгалы дунъет сётыса, аслэсьтыз малпанъёссэ вераз Удмурт кун университетысь тодосчи Любовь Фёдорова:

- Котькуд книга лэсьтэ выль вамыш. Удмурт нылкышно поэзиен тунсыкъяськисько бере, та книга мыным тодосчилы но дышетӥсьлы сямен туж дуно. Отчы пыртэмын кылбурчилэн быдэс творчествоез. Книга узыр туспуктэмъёсын. Нош со сярысь тодэ ваёнъёсты лыдӟемъя лыдӟем потэ. Книга мыным тунсыко со понна но: котькуд кылбур я верос улэ, ку но кыӵе арын со гожтэмын шуыса, пусйылэмын. Соос трос выльзэ усьто: кытын со вакытэ кылбурчи улӥз но ужаз.

- Лина Григорьевнаез мон пичи дырысеным тодӥсько, – вератэк ӧз чида Удмуртиысь дано суредась Семён Виноградов. – Пересь анаелэн синъёсыз висё вал – трахомаен курадӟиз. Сое йӧнатыны шуыса, эмчи ми доры ӵемысь пыралляз. Со тӧдьы халатэн дӥсяськемын луэ вал. Мыным, пичи муртлы, котьмар тунсыко потылӥз. Со пересь анаеным мар каре шуыса, лушкем учкыса сылылӥ. Пересь муртлэн бамтӥз чур гинэ вир виялляз. Соин ик тӧдьы халатэн апайлэсь кышкалляй. Соизлы но паймисько вал: малы урамысь одӥг пуны но та нылкышно шоры уг уты? Ачиз тусын-буйын чебер ик ӧвӧл кадь, нош адямиос сое гажало, шораз капчиен вазисько. Соку мон уг валаськы вал ай, висисьёсты йӧнатыса, со коркась коркатӥ ветлэ вылэм шуыса.

- Мынам но А. Оки сярысь вераме потэ, Миша агае Казаньын рабфакын Лина Григорьевнаен ӵош дышетскиз, – кыдёкысь аръёсты тодаз вае Евгения Ивановна Афонова. – Агае нюлэсчи луиз, нош Лина Григорьевна – врач. Озьы ик кузпалы но П. Поздеев А. Окиен герӟаськемын вал – кылбуръёссэ огинэ люкаса, критикен А. Ермолаевен «Мон тодам вайисько» бичетсэ поттӥзы.

Кылбурчи Галина Романова А. Окилы сӥзем кылбурзэ лыдӟиз но вераськисьёс радэ итӥськиз:

- Шумпотӥсько, А. Оки сярысь таӵе книга потӥз шуыса. Кин тодэ, оло, азьланяз со сярысь пьесаос но повестьёс гожтӥсьёс луозы ай. Данъяськыса вераны быгатӥсько: Нина Малых Удмурт нылкышно кенешен кивалтыку, ми дано удмурт нылкышноос понна А. Оки нимо премия кылдытӥмы. Нырысетӥез сыӵе ним сётэмын вал кылбурчилы Алла Кузнецовалы, кыкетӥ араз – Людмила Кутяновалы. Табере со республикаысьтымы нылкышноос понна данлэсь но дан премия луэ.

- Лина апай сярысь мон татын сыӵе троссэ тодӥ, – вера кылбурчилэн матысь ӵыжы-выжыез Владимир Векшин. – Ми Варзи-Ятчиын улӥмы. Озьы ке но ӵем вуылӥськом вал Лина апайёс доры. 5-тӥ классэ монэ Алнаш школае выжтыны малпазы. Ми дорын ик улод, шуизы Лина апаен кузпалыныз Иван Карачёвен. Со агроном луыса ужаз. Лина апаймы туж лякыт, визьмо но сабырлы нылкышно вал. Со вакытэ соослэн кадь интеллигентной семьяосты адӟылэме ӧй вал. Мыным, гуртын улӥсь муртлы, паймымон потылӥз: соос сиськыкузы ӝӧк вылазы салфеткаос, пӧртэм пуньыос, вилкаос, рюмкаос тырылӥзы. Нош кыӵе бадӟым библиотеказы вал! Тодӥсько на: соос Геннадий Красильниковлэн семьяеныз ӟеч кусып возьылӥзы.

Лина апай монэ Вовка шуылӥз. Мон пичи дыръям туж кепырась вал. Со шоры вазьылыны ик ӧй дӥсьтылы. Лина апай нош мыным шуылӥз: тон, Вовка, тодосчи луод. Солэн кылызлы луыса ик, дыр, Ижысь пединститутэ дышетскыны пыри. Собере аспирантурае кошки. Лина апайлэсь верам кылъёссэ быдэстӥ: тодосчи луи. Ми ноку но ӧм тодэ, Лина апаймы кылбурчи вылэм шуыса. Со мыным «Словарь иностранных слов» кыллюкам кузьмаз. Со синпель мыным котьмалэсь но дуно потэ. Лина апаелэсь гожтэтъёссэ но киям возисько. Куке-соку соос музее вуозы, дыр. Лина Григорьевналы калыкез эмъянын кема но усто тыршемез понна орден но сётӥзы, со Удмурт АССР-ысь дано врач вал. Нош кырӟанъёссэ солэсь троссэ калыклэн шуыса кырӟало. Иське, соос сыӵе кужмоесь. Бадӟым тау шуэме потэ книгалэн авторъёсызлы солы дунне вылэ вордскыны юрттэмзылы.

- Та книгаез дасяны капчи ӧй вал, – вераз «Удмуртия» издательствоен кивалтӥсь Юрий Кузнецов. – Но шумпотоно: кема аръёс ортчыса но, со кие кутымон но лыдӟымон пӧрмиз.

Табере адямиослэн луонлыксы вань кылбурчилэн улон-вылонэз сярысь сыӵе троссэ, кылымтэзэ тодыны. Нош ай кӧняез усьтымтэ, шарае потымтэ учыръёс кылемын на, луоз.

Любовь Тихонова.

Та ужрад тулыслы быдэ ӧсъёссэ вӧлъя странаысьтымы 76 улосын – отчы пырисько 1 миллионлэсь ятыр кырӟаны-вераны, эктыны-шулдыръяськыны яратӥсь студентъёс.

Республикаысьтымы Егитъёсын ужанъя министерство кичӧлтэмъя шаерамы но «Студентъёслэн тулыссы» паськыт радъяське. Фестивальлы йылпумъянъёс лэсьтэмын та нуналъёсы Ижысь культурая «Интеграл» юртын.

«Студентъёслэн тулыссы» егитъёслы паськыт луонлыкъёс усьтэ быгатонлыкъёссэс возьматыны, тужгес но усто студентлэсь нимзэ басьтон понна нюръяськыны. Фестиваль радъяськиз укмыс номинациосъя: кылсярысь, тужгес усто эктӥсь, кырӟась, мода возьматӥсь но мукет. Фестиваль финалозь кыстӥськиз, эсьмаса, куинь толэзь ӵоже.

Пусйыны кулэ: фестивальлэсь палэнэ уг кылё кун кивалтӥсьёс но пырисько вузын ортчись котькуд люкетаз. Студентъёсын ӵош егит дырзэс тодазы ваё, мылкыдзэс капчи каро но таин валче туала нылъёсты-пиосты ӟечгес валаны тыршо. Ижысь «Интеграл» юртэ но люкаськизы уно министерствоослэн но ведомствоослэн кивалтӥсьёссы. Соосты пумитаз егитъёсын ужанъя министр Владимир Соловьёв.

Кин бен вормисе потӥз «Студентъёслэн тулыссы» фестивальын? Быръемын 35 адями. Соослы ик Удмуртилэсь данзэ утёно луоз Челябинскын ортчись «Россиысь студентъёслэн тулыссы-2012» фестивальын. Отын соос кужымзэс мерталозы мукет улосъёсысь студентъёсын ӵош. Нялтас вераса, та фестиваль кунамы радъяське ини 20 ар ӵоже.

Шумпотымон: шаерамы ортчись фестивальын вормисе потӥз удмурт эстрадаысь кизили, «Сайлент Ву Гур» рок-группаысь кыр-њась Светлана Ручкина. Со нырысетӥ инты басьтӥз «Калык вокал» номинациын – фестивале пыриськиз «Русалки» кырӟанэныз. Но «Интегралын» йылпумъянъёс лэсьтон ужрадэ Светӥлы пыриськыны ӧз кылды – со кошкемын Эстониын ортчись конференцие. Фестивальлэн дипломеныз но кубокеныз, озьы ик синпель кузьыменыз Светӥез пусъёзы Удмуртие вуэмез бере. Но вордскем шаераз но солы ӝегатскыны уз кылды: Эстониысь вуоз гинэ, вырӟоз ини Челябинске – «Россиысь студентъёслэн тулыссы-2012» фестивальын вожвылъяськоз. Оскиськом, отын но Удмуртиысь студентъёс яркыт пиштозы.

Елена Тугашова.

Галина Семёнова

- Сергей Леонидович, малы одно ик та выжыкылэз фестивале вайиды?
- Малы ке шуоно со мыным кельше, озьы ик, кызьы кельше П. Чайковскийлэн крезьгурез.  Мон азьвылгес быдэстӥ Б. Шергинлэсь «Волшебное кольцозэ». Ш. Перролэсь «Спящая красавицазэ» лыдӟи 2007-тӥ арын Москваысь сцена вылын. Собере со нокытын ӧз чузъяськылы ни, Воткинскын но Ижын сяна. Соин ик  «Оркестрен выжыкыл» – эксклюзив. Таӵе уж мыным туж яра.

- Кӧня репетициосты вал Удмуртиысь симфонической оркестрен, соку ик-а ог-огдэс шӧдӥды?
- Нотаос оркестрлы лэземын вал апрель кутсконын, но валче репетиция ортчытӥмы Воткинскын концерт азьын гинэ. Огкыл шедьтӥм капчиен. Удмуртиысь симфонической оркестр туж усто – зэмос команда. Тани мон лыдӟисько выжыкыл, нош мышкам шудэ  симфонической оркестр, быдэстэ Чайковскийлэсь паймымон гуръёссэ, со крезьгурлэсь тыбырам адреналин бышко кадь.

- Кыӵе крезьгурез яратӥськоды?
- Пӧртэм. Малпасько, дунне уз быгаты улыны поэзитэк, искусствотэк но крезьгуртэк. Крезьгур чузъяське, машинаын мыныкум, дорын, йырам. Лычсузьыса кылзӥсько Ю. Шевчукез, «Битлз» группаез, Л. Бетховенлэсь 5-тӥ симфонизэ, яратӥсько В. Моцартэз. Мон ноку но уг вала, дыр, кызьы адями гожтыны быгатэ «Реквиемез». В. Моцартлэсь берпуметӥ произведенизэ мон котьку паймыса кылзӥсько.

- Театрын шудӥсь артистъёс тросэз кырӟало, тӥляд сыӵе мылкыдды ӧз кылды-а «Стиляги» киноын кырӟамды бере?
- Мон – драмая театрысь артист,  кырӟась ӧвӧл. «Стилягиын» кырӟай соин гинэ, малы ке шуоно режиссёр Валерий Тодоровский но крезьгурчи Константин Меладзе  туж куризы. Хобби выллем ик луэ мультфильмъёслы куара сётон. Кылсярысь, «Рататуй», «Иван Царевич и Серый Волк» кадьёссэ. Нялтас вераса, аслым но отын ужаны тунсыко вал,  5 но ӝыны аресъем пиелы мультфильм туж кельшиз.

- «Современник» театр гастрольёсы пота-а? Оло, Иже но вуысалды?
- Нош малы Ижевск милемды уг ӧтьы? «Современник» Москваын гинэ уг ужа. Матысь дыре дасяськиськом Екатеринбурге, июнь толэзе мыномы Самарае. Пичи городъёсысь театръёслэн «Современникез» адӟемзы потэ, дыр, но ужпум коньдон борды пыкиське. Удмуртия уксё шедьтысал ке, ми дорады спектакльмес вайысалмы,  но милемлы сыӵе вазиськонъёс  татчыозь ӧй вал на.

- Воткинскын синмаськиды учкисьёслы но П. Чайковскийлэн музеезлы, нош Ижын малы ке паймиды-а?
- Урод сюресъёстылы. Ужас, мар со сыӵе! Мон дорады лыктӥ Пермьысь. Валасько, Россиысь сюресъёс – странамылэн висёнэз, но таӵе-таӵе тӥяськемъёссэ, нюко-гопооссэ мынам адӟылэме ӧй вал на.

- Нош брангурт песяйёсмы уг кельшо шат?
- О-о, мон соослы синмаськемын. Туж шумпотӥсько, песяйёсыныды тодматскыны кылдӥз шуыса. Уката зол лӧптӥсько, ӵапак соос Бакуэ мынозы шуыса. Соос зэмосэсь, мусоесь. Ижысь вань маскарчиосты огинэ люкад ке но, адямиос сыӵе уз пальпотэ, нош таоссэ огпол адӟизы ке, уз вунэтэ ни.
* * *
С. Гармашлэн  Брангуртысь песяйёсын данъяськемез вӧзы Операя но балетъя театрын концерт бере  итӥськиз на Ижысь учкисьёслы  синмаськемез но. Артист тау кариз, выжыкыл лыдӟыкуз, залын туж шыпыт вал шуыса. Выжыкылэз зал шокатэк кадь кылзӥз, сокем аспӧртэм но тунсыко со кылӥськиз. Артистлэн пальпотэмез возьматӥз: Ижысь зал но сое ӧз пӧя – шоркарамы улӥсьёс Гармашлы сылыса чабизы.

Галина Семёнова

- Удмуртъёс, нунызы вордӥське ке, со узыр мед луоз шуыса, гогызэ гид сэргы вато вылэм, кырӟаны-вераны усточи медло шуыса – арган пушкы. Йыринтӥллям-а озьы Ганьков артистлэн анаез-песяез? (Вера Бикузина, Иж).

- Чик уг тодӥськы, вераллямзы ӧвӧл. Нош кырӟаны быгатон выжемын песяелэсь.

- Ижысь культурая училищеын кызьы сое нимало вал? (Тамара Ефремова, Пичи Пурга ёросысь Вуж Мӧнья гурт).

- Макаревич. Малыез валамон – ялан кырӟамысьтым, гитараен шудэмысьтым. Со вакытэ Андрей Макаревич данын вал бере, мыным сыӵе кушем ним йӧтӥськиз – аслым туж кельше вал.

- Тодӥсько, аслэсьтыз кырӟан удыссэ Ганьков мытӥз гуртысь клубы-сен. Кызьы со шедиз Иже? (Ольга Поторочина, Красногорск).

- Зэмзэ но, училище бере монэ кузпалэным ӵош келязы Можга ёросысь Бадӟымсурдэ ужаны. Монэ соку ик директоре пуктӥзы, Светлана клубын, школаын, нылпи садын крезьгуръя дышетӥсь луыса ужаз. Ужамы туж мыло-кыдо. Отын ик нырысетӥ кырӟанъёсы кылдыны кутскизы. Ижын вордскем ӟуч кузпалы воксё гурт улонлы дышиз, удмурт сямен вераськыны кутскиз ни вал, но гочатӥз Ижын дунтэк квартира басьтыны луонлык. Варманайёс, квартиразылэсь снос улэ шедёнзэ тодыса, милемыз ӝогак татчы ӧтизы, семьямы нимаз ни бере, озьыен, патер но нимаз висъяны кулэ. Тӥни со луиз Иже каръяськеммы. Мон нырысь «Октябрь» дворецын администратор вал, собере дораз ужаны ӧтиз Анатолий Ушаков.

- Шуд – со куке тонэ валало. Вань-а валан Ганьковлэн семьяяз, уг тыш-касько-а сое семьяосыз ялан кырӟамысьтыз? Азин­тэ-а удыссэ нылыз? (Нина Александрова, Алнаш).

- Валаны валало, но алэмзы вань. Жалямысьтызы, дыр. Песяй весь шуэ вал: эн кыска весь со аргандэ, пӧсялод-нюлалод, собере висьыны усёд. Вина удӥсьёс но сюрозы, изъянтозы… Кузпалы нырысь-валысь так-то ужелы вожа вал: нуназе репетициын, ӝыт концертын, котьку калык пӧлын… Но бӧрысь буйгаз, юрттыны кутскиз. Кырӟан гожтӥсько ке, нырысь ик солы возьматӥсько. Светланалэн крезьгуръя тодон-валанэз туж ӟеч, училищеын со ваньмызлэсь усто аккордеонэн шудэ вал, соин мыным туж дуно солэн малпанэз. Уг ке курла, озьыен, ӟеч, калыке поттыны луоно. Нош варманае туж яратэ вал кырӟамме. Кудӥз юа: ӟуч вармайёсыд удмуртысьтыд урод ӧз каре-а? Ноку но ултӥямзы ӧвӧл. Вылаз ик, варматай ачиз музыкант вал, огкыл ми соин туж ӝог шедьтӥм.

Настя нылмы пичи дыръяз туж кырӟалляз, но собере аналскиз. Удмурт универ-ситетысь кунсьӧр кылъёсъя факультетэз йылпумъяз, англи кыллы дышетэ. Тун-сыкъяське испан но турок кылъёсын, ваньмон дыръяз эктонъёсын выре.

- 1993-тӥ арын южтолэзе Ленинградэ вуылӥм. Отысь Невский проспектын мон калык азьын Ганьковлэсь кырӟанзэ быдэстӥ. Вань ортчисьёс дугдыса ик кылзӥзы, юаськизы. Тодэ на-а ачиз Ганьков, кыӵе кырӟанэз тужгес данын вал со вакытэ? (Николай Емельянов, Можга ёрос).

- Тау кырӟанъёсме гажамды понна. Малпасько, соку калык пӧлын туж вӧлмемын вал «Тулыс сяськаос ӝужаку» кырӟан. Мон понна соос ваньмыз дуно. Котькудаз сюлэм понэмын. Шумпотӥсько, 50 аресэлы кырӟанъёсы лыдзыя 50-лэсь трос люкаськизы.

- Басьтэ-а тырмыт шумпотон творчествоезлэсь, яке маке уг тырмы? (Татьяна Семёнова, Пичи Пурга ёрос).

- Творчествоен вырись муртлы ваньмыз тырмыт потӥз ке, со выльзэ кылдытэмысь дугдоз. Мынам но озьы ик, эшшо шулдыргес, мургес кырӟан гожтэм потэ. Шумпотон басьтӥсько, куке кырӟанъёсы калыке вӧлмо, соос ӝӧк сьӧрын чузъяськыны кутско, калык кырӟан луо ке. Куддыръя калык пӧлын пукон сямен кин ке шуэ: ойдолэ сыӵе-таӵе калык кырӟанэз мытом. Сыӵе дыръя сюлэм шунытак луэ.

- Улон сюрестэс выльысь мытоно луысал ке, бырйысалды на-а артистлэсь ужзэ? Оло, ужбергатӥсь луысалды? (Ирина Каурова, Яр).

- Ӧй. Пинал дыръя, со артистъёс шоры учкыса, малпано: кыӵе майбыр уло таос: кырӟало-тэтчало, со понна эшшо ке уксё басьто. Но вылам вуиз но, шӧдӥ, мар со сыӵе. Мыным туж кельше кырӟаны, калыклы шумпотон кузьманы, но туала арын артист маин но вырыны кулэ ӧвӧл: концерт радъянэн но, билет вӧлмытонэн но. Ярам, уждун ке йӧно луысал.

Шонерзэ вераса, артистэ ведь мон ноку ӧй дасяськылы – озьы пӧрмиз. Школа бере, армие мынытозь, одӥг арзэ Можгалась заводын тырши. Армия бере но нокыӵе мукет малпанъёсы ӧй вал, шофёре ке шат, атай сямен. Со мынам быдэс улонзэ руль бергатӥз. Но двоюродной выны Гена Прохоров Иже ӝутканы кутскиз. Мон, пе, культпросветэ пырыны малпай, ойдо монэн ӵош, коть эшлы ке но. Озьы мон сьӧраз калъяськи. Мынӥ бере, асме эскероно кожай ни-а, мар-а. Озьы студент луи. Генае бӧрысь дышетсконзэ куштӥз, нош мон кырӟан сюрес вылэ султӥ.

- Москваысь яркыт кизилиос вожмаськыса политикае мыно, Кун Думаын пуко. Малы политикалэсь палэнско удмурт артистъёс? (Надежда Макарова, Шаркан).

- Чик выреме уг поты со политикаен, уг но тунсыкъяськиськы, дырын-дырын телевизорысь гинэ кылзӥсько. Мукетъёсыз но кин-о бен тупа кадь? Н. Уткина шат? Политикаен мед вырысалзы визьмо политикъёс, сыӵеосыз культураез но валасалзы. Нош мар али со кизилиослэн Думаын пукемзы – асьсэлэсь сылмись данзэс берыктыны выро, уксё пуйыоссы понна золгес сюлмасько. Зэм, политикае пырисько ни пор эшъёсмы. Верало, отысь Кун Кенешазы артистъёс вуэм бере культура удыссы капчигес шокчиз. Кылсярысь, нимо-дано нимъёсын пусъемъёслы отын льготаос чакламын. Нош милям? «Удмуртиысь калык артист» ним сётӥзы, нош уждунэ одӥг копейкалы но ӧз йылы.

- Малы ӧвӧл ни «Лулгур» ансамбль? (Валентина Бахматова, Можга ёросысь Удмурт Пычас гурт).

- Созэ Надежда Эдуардовна Уткиналэсь юано, кивалтӥсез со вал.

- Маин тунсыкъяське на Ганьков, кырӟанэн сяна? Кызьы шутэтске отпусказ? (Анастасия Загребина, Якшур-Бӧдья ёрос).

- Быдэс отпускме ортчы­тӥсько, шур, тымет дурын чорыгаса – тол ӵоже жадемме ву кадь номыр уг веськаты. Малы ке пинал дырысен озьы – службаме Тихий океан дурын ортчытӥ, соин-а, мар-а. Али нокытчы палэнэ уг ветлӥськы, Удмурт шаерын тодмоос, эшъёс тырмо, я соиз, я таиз ӧте.

- Туэ «Зарни перепеч» конкурсын Г. Ганьков куинетӥ интые кылиз. Кык яркыт кизилиосты – Ганьковез но Плотниковаез – азьпалтӥз егит студент Николай Анисимов. Кӧтты ӝож ӧвӧл-а? Кызьы малпаськоды, маин герӟаськемын учкись ласянь сыӵе быръён? («Шунды» дэменлыкысь егитъёс).

- Мон котькуд выль нимлы шумпотӥсько. Колялэн аспӧртэм куара тембрез, со егит, чебер. Ми акыльтӥмгес ни, дыр – калык возьма выль артистъёсты. Азьланяз но Колялы вормонъёс, яркыт творчество сӥзисько.

Туж тау карисько «Зарни перепечез» радъясьёслы. Эх, мон пиналгес дыръя ке сыӵе ӵошатсконъёс луысалзы, кӧня «зарни перепеч» сиысал!

- Одӥгысьтыз концертысь Г. Ганьковез костылен адӟи. Мар луиз артистэн, кыӵе ини тазалыкез? (Надежда Абрамова, Иж).

- Одӥг концертэ гинэ озьы ӧй пота ни, мар карод, ялан дорын уд пукы ук, нош пыд бурмыны курадӟе. Ар но ӝыны чутӥсько. Уйин концертысь бертыкум, руль сьӧрын умме усиськем. Концерт бере сотэк но туж жадиське, нош татын эшшо ку-инь час котыр машина валтоно. Сайкай ни «Жигулиен» 180 градуслы берытскем бере, пыдъёсысьтым кык лы мычиськемын, вир пызъе, бордам Аня Плотникова черекъя. Ярам, солы номыр ӧз луы. Машинаос уг дугдо, «Скорой» уг вуы. Кыӵе ке еж водитель гинэ дугдӥз, ярам, кемалась ӧвӧл право басьтэм вылэм, тодэ на, кызьы нырысетӥ юрттэт сётоно.

- Кин юрттӥз секыт учырады? (Галина Золотарёва, Иж).

- Мынам туж трос эшъёсы, ӵыжы-выжыосы, вань­­мызлы тау, ӧз вунэтэ. Больницае но ветлӥзы, лӧпкытъяны выризы. Ӧжыт пыд вылам султӥ но, давай калык пӧлы пот ни, шуизы – концертъёсы, телевидение ӧтчаны кутскизы. Дорын пукыса гинэ, уд бурмы ук. Но мон оскисько, тэтчало на шуыса. Вот атай азьын возьыт, ар талэсь азьло улонысь кошкиз ни ке но. Со быдэс улонзэ машина нуллӥз, одӥг авария но ӧз лэсьты, нош мон тӥни…

- Кыӵе кырӟанъёсын шумпоттоды юбилей ӝытады? (Зинаида Михайлова, Эгра ёрос).

- Чузъяськозы вужъёсыз но, выльёсыз но кырӟанъёсы. Аслым туж кельше анай сярысь кырӟанэ, сое нокин ӧз кылылы на. Кылъёссэ гожтӥз Можга ёросысь Римма Рылова. Зэм, кышкаськогес бадӟым концертын быдэстыны – со аслам сюлэмам сыӵе зол йӧтэ, синкылиосы потыны кутско. Мукетъёссэ уг вера, лыктэ 1-тӥ мае концертам Удмурт кун филармоние, тулыслы ӵошен шумпотом. Ваньдэс ӟечкыласько праздникен. Яратон но оскон тӥледлы ваньдылы, котьку кырӟалэ – озьы шулдыргес.

* Тунсыко юан сётӥсьлы Геннадий Ганьков сӥзиз вал концертаз ӧтён билет. Сое артист ачиз бырйиз. Сыӵе шуд пуйы луиз Можга ёросысь Николай Емельянов. Куриськом Николай Нико­лаевичез ӝегатскытэк ре­дакцие жингыртыны.

«Сотворение мира» балет.

24-тӥ апреле Воткинскын Андрей Петровлэн «Сотворение мира» балетэныз усьтӥськиз «П. Чайковскийлэн вордӥськем палъёсаз» нимо 55-тӥез крезьгуро фестиваль.

Та дано балетэз, со дуннеысь 60 театръёсын пуктэмын но Гиннеслэн рекордъ­ёсъя книгаяз пыртэмын, Удмуртие вайиз Москваысь Наталия Касаткиналэн но Владимир Василёвлэн классической балетъя академической кун театрзы.

Ижысь учкисьёс соин тодматскизы 25-тӥ апреле. Балет кутскон азьын академической кун театрлэн чеберлыкъя кивалтӥсез Наталия Касаткина но балет труппалэн директорез Сергей Белорыбкин журналистъёсын пумиськизы. Россиысь калык артистка Наталия Касаткина верамъя, шаерамы соос 4-тӥзэ вуо ини.

- Артистъёсмы тодо ке, Удмуртие мыноно шуыса, туж капчиен ӝутӥсько. Малы ке шуоно шӧдо, кыӵе шуныт татын соосты пумитало учкисьёс. Мыным потэ, тӥ дорын ваньзэ лэсьто сюлмысь но яратыса. Кенешимы ини культурая, печатья но иворъёсъя министреныды Дмитрий Ивановен, Удмурт кун филармонилэн кивалтӥсеныз Алексей Фоминэн. Шумпотымон: соос сомында тодо, дунъяло крезьгурез но искусствоез. Тӥледлы зэмзэ ик удалтэмын – туала вакытэ таӵе фестивальёс ортчытъяны секыт. Та ужрадэ угось туж дано артистъёс но оркестръ­ёс пырисько. Соин ик милемлы бадӟым дан, балетмес Удмуртие ӧтӥзы шуыса, – мылкыдзэ усьтэ Наталия Дмитриевна.

- Берлозэ ми татчы вуылӥм ог вить ар талэсь азьло, вайылӥмы Сергей Прокофьевлэсь «Золушказэ» но Игорь Стравинскийлэсь «Жар-птицазэ». Таяз радэ шумпоттыны малпам Андрей Петровлэн «Сотворение мира» балетэныз, кинлы ке со тодмо, дыр, «Адам и Ева» шуыса. Кин ке юалоз, вылды, малы Чайковский ӧвӧл? Ми пуктӥм Пётр Ильичлэсь «Лебединое озерозэ», «Щелкунчиксэ», «Спящая красавицазэ». Но мон пусйысал сое: А. Петров Чайковский сямен ик крезьгур кылдытъяны быгатӥз. Сыӵе гурез юромо уд малпа. Со сюлмысь потэ но лулысь лулэ аслыз сюрес шедьтэ. Собере ми ваньмы Чайковскийлэн дышетскисьёсыз. Потэ вылэм Ижысь учкисьёслы быдэс балет цикл ваеммы, – шуэ Россиысь дано артист но 20 ар ӵоже та балетын тыршись Сергей Белорыбкин.

* * *

Москваысь куноосын вераськон йылпумъяськиз гинэ, Операя но балетъя театрлэн залэз калыкен тымиськыны кутскиз. П. Чайковскийлы сӥзем фестивалез усьтӥз министр Дмитрий Иванов:

- Москваысь классической балет, таӵе нимын быдэс дуннеын тодо вал та коллективез, кылдӥз 1966-тӥ арын, кивалтӥз соин дано Игорь Моисеев. 1977-тӥ арысен чеберлыкъя кивалтӥсез луиз Владимир Василёв, валтӥсь балетмейстерез – Наталия Касаткина. Озьы труппа концерт коллективысь пӧрмиз балет театрлы. Котькуд ар татысь 75 артист пӧртэм спектакль­ёсын дуннеез котыръя, 30 тонна декорациос, 4 сюрс костюмъёс но тунсыко репертуар – ваньмыз учкисьёс понна.

Тани тылъёс кысӥзы. Чузъяськиз крезьгур. Кутскиз балет. Валтӥсь геройёс: Инмар, Шайтан, Адам но Ева, кылчинъёс, чёртъ­ёс. Нырысь 15 минутсэ номыре валатэк пуки. Чузъяськись крезьгурез но артистъёслэсь эктэмзэс герӟаны ӧй быгаты, мар соос вераны выро выросъёсынызы – ӧйтӧд. Но пумен суред усьтӥськиз: кызьы кылдӥз музъем, кызьы ваче кымес вуо югыт но пеймыт кужымъёс, кызьы мӧзме но курадӟе Адам… Озьы балетлэн нырысетӥ люкетэз туж ӝог ортчиз.

* * *

Пусйыны кулэ: Операя но балетъя театрын пуконъёс бушесь ӧй вал. Озьыен, шоркарамы улӥсьёс искусство котыре кыстӥсько. Залысь потыкум, пумиськи Удмуртиысь калык но Россиысь дано артисткаен Галина Платоноваен но солэн нылыныз, «Малпан» группаысь кырӟасен Наталья Ушаковаен.

- Балетэ азьло туж ӵем ветлӥсько вал, уката ик Ленинградын дышетскыкум, – вера Галина Иосифовна. – Берло дыре асьме балетэнгес улӥськом, шуыны луоз. Соин ик Москваысь артистъёс шоры мукет синмын учки. Туж синмаськи. Котькуд выроссы кутсконысеныз пумозяз малпамын – соос палёмыто. Вунэтӥськод, тон Ижысь театрын пукиськод шуыса.

- Наталия Касаткиналэн но Владимир Василёвлэн театрзылэсь постановказэс нырысьсэ учкисько. Туж кельшиз. Ачид но валатэк соосты ӵошатӥськод асьме театрысь артистъёсын. Валамон ини: Москваысь куноослэн балетсы кужмогес. Декорациос, тыллэн пуктэмез – ваньмыз та постановкаез тунсыко каро. Яразы мизансценаослэн кызьы пуктэмзы, соос балетлэсь пуштроссэ умойгес усьто. Соку ик син шоры йӧтэ режиссёрлэн тунсыко ужамез. Артистъёссылэсь шудэмзэс но пусйытэк уг луы: нокин но уг лэчыра, ваньзылэн выросъёссы вӧлэм кадесь. Мон П. Чайковскийлэн 55-тӥ фестиваляз вань концертъёсы билетъёс басьтӥ. Уго асьмелы быдэс дуннелы тодмо луэм усточиосты адӟыны луонлык кылдэ. Ӵуказе нуналэз чидатэк витисько ини. Россиысь калык артист Сергей Гармаш Ш. Перролэсь «Спящая красавица» выжыкылзэ лыдӟоз. Мыным со туж тунсыко, малы ке шуоно симфонической оркестр шудэм улсын верам выжыкылэз кылзэме ӧй вал на, – шуиз Наталья Ушакова.

* * *

Но тани антракт йылпумъяськиз, балетлэн кыке­тӥ действиез кутскиз ини. Тылъёс кысыса ӧз вуттэ на. Син шорам йӧтӥз вӧзамгес ик пукись Наталия Касаткина. Со туж сак учке сцена шоры. Дунъя артистъёсызлэсь шудэмзэс. Наталия Дмитриевналэн мугорыз уг выры, нош пыдъёсыз сыӵе ик «вамышъёс» лэсьто, кызьы экто артистъёс. Шӧдӥське: со ачиз но али сцена вылын…

Галина Семёнова.

О. Чужанова пиеныз.

Удмуртиысь калык артистка Ольга Чужанова апрель толэзе 60 арес тырмонзэ пусйиз. Москваысь Щукин нимо театр училищеез йылпумъяса, со кема аръёс ӵоже Удмурт театрын тыршиз, собере выжиз Ӟуч драмая театре.

- Артистэ дышетскыны мынэ сыӵе адями, кудӥзлэн сцена вылын шудыны Инмарен сётэм быгатонлыкез вань.

- Озьы. Талантэд ӧз ке луы, котькӧня пычкиськы, юнме азьысь со уз поты. Пичи дырысеным ик кырӟаны-вераны яратӥ. Школаын дышетскыкум, мыло-кыдо пыриськылӥ самодеятельносте. Нош кӧня общественной ужен выриськиз! Со понна милемыз, ёросысьтымы тямыс муртэ, Москвае экскурсие лэзьязы.

Вордӥськи Дэри ёросысь Пероггуртын. Пичи дыръям тятяен анае люкиськиллям. Анаен Иже кошкиськеммы. Анае, Анна Тимофеевна, заводын ужам. Быдэ вуыса, тятяме утчай на вал, но сое улэпкын ӧй адӟы ни. Тодӥсько на, школае мынон азям анаелэн вордӥськем Подшивал гуртаз улыны бертӥмы. Со нылпи садэ интыяськиз, няня луыса ужаз. Дасэтӥ классэ мынон арам нош Иже улыны выжимы. Ӟуч нылпиос пӧлын асме удмурт шуыса пачкатыса ӧй возьы, котькыӵе ужрадъёсы мыло-кыдо пыриськылӥ. Концертъёсын удмурт кырӟанъёсты кырӟасько вал.

Дасэтӥ классэ выжем мурт, газетысь ялон адӟисько: Удмурт театр егитъёсты дышетскыны келя Москвае. Нош мынам ке арлыды уггес тупа на. Быдэс арзэ куректыса ветлӥ: вуоно арын кин монэ артистэ дышетскыны кутоз на. Школаез йылпумъяй но нош ялон шедьтӥ. Таяз радэ удмурт филармония кылбур лыдӟонъя конкурс, пе, ортчытэ. Эстрадая артистъёсты дасяны Ленинградэ, пе, келялозы. Бурдъяськыса отчы вамыштӥ. Малпасько, таяз пырыны быгатӥ ке, оло, азьланяз артист но луыны быгато. Огзэ турез ортчи. Ӟуч кылбуръёсты дасяй вал, туж умой лыдӟиськем, лэся. Мукетаз лыктӥ но, филармониысь Николай Семёнович Зубков индылэ: тыныд артистэ мыноно вал. Пумитаз шуисько: аслам но отчы мынэме потэ, но кин монэ басьтоз на. Мын ай, Удмурт театре ветлыса, оскалты, отын кӧня ке муртэ кутом шуизы на кадь. Кылбур лыдӟем сяна, удмурт кылын диктант, пе, гожтоно. Э, малпасько, мар отын шугез ини! Гожтӥ но – «кык» пуктӥллям. Анай кылэз угось мон ӧй дышеты. Бӧрысь милемыз диктант гожъяны дышетӥзы на.

Училищее пырон азьын мон удмурт грамматикаез ӟеч валаны кутски ини (Москваын анай кыллы дышетӥз тодосчи Тамара Ивановна Тепляшина). Тӥни сыӵе вал мынам артистэ мынон сюресэ. Озьы Щукин нимо училищее вуи. Сизьым муртэ Москвае дышетскыны келязы на, кылем арыназ келям пиналъёслэн лыдзы ӧжытгес потэм, лэся.

- Учкись понна тӥ тужгес но паймымон рольёсты быдэсъяды, пичи пиосты быгатыса шудылӥды, ӵемысь выжыкыл улонэ зымылӥды.

- Артистэ дышетскыны келякузы, шуизы вал: пичиослэсь рольёссэс шудод. Мугорыд но, пе, соослы тупа. Мон угось чиед но пичи вал. Дышетскыса бертэммы бере мыным соку ик «Кам вадьсын гудыръя» спектакльысь Миколлэсь но «Улэм потэысь» Любалэсь рольёссэс сётӥзы. Выжыкылъёсын трос шудӥ. Нылпиос понна тунсыко ужаны. Соос куддыръя асьсэды зэмос выжыкылын кожало.

- Шуо, артист, пе, сцена вылын аслэсьтыз улонзэ шудэ.

- Роль пӧрме ке, со туж шумпотымон ини. Котькуд рольдэ сюлэм пыртӥд поттӥськод. Ролез дышетыку гинэ но, ымныр тус ик воштӥське. Ульчаысен тодмоосме пумитасько ке, паймыса но жаляса юаллясько: мар луиз, ымныр тусыд шулӟектэмын. Сюлэмъя быръем уж котькыӵе шуг-секытэз вормыны быгатэ.

- Сцена вылын шудэмдылы вуоно арын 40 ар тырмоз. Со дыр куспын лыдъянтэм рольёс шудэмын. Кудъёсыз, сюлэмады тужгес но пыӵаса, кылизы?

- «Инвожо уйшоре но пиштэ» спектакльысь Нина но «Сюлэм куараысь» Фаина. Со спектакльёсын аслэсьтым улонме шудӥсько кадь потылӥ. Артистэ ӵош дышетскем эшъёсыным – Пётр Романовен, Раиса Нефёдоваен, Фаина Будинаен, Вячеслав Байковен, Сергей Марковен – кыӵе гинэ образъёс ӧм кылдытэ. Жаль, Сергеймы улонысь дырызлэсь вазь кошкиз. Ми соин ог-огзэс яратӥсь муртъёсты трос гинэ шудӥмы: «Инвожо уйшоре но пиштэ», «Улэм потэ», «Дуринчи кар» но трос мукет спектакльёсын.

- Удмурт театрысь малы ке но Ӟучаз выжиды. Со воштӥськонъёс улондэс мукет ӧре ӧз кожытэ-а?

- Зэм но, Ӟуч драмая театре кошки. Отысь Сафронов режиссёр вань театръёсысь артистъёсын ӵош проект (спектакльёс пуктылыны) малпам вылэм. Мынам шудэме кельшиз, лэся, Владимир Иванович монэ доразы ӧтиз. Но мон со пумысен кема малпаськи. Аслэсьтыд юрттэ куштыса, кошкыны капчи ӧвӧл. Лыктэме бере ик мыло-кыдо шудӥ «В сумерках» спектакльын анаез, «Ретроын» – Диана Владимировнаез, «Пока она умирала» пьесаын – бызьытэк кылем Татьяна нылмуртэ. Со роль мыным али ке но туж кельше.

- Быдэстымтэ рольёсты но котыртӥды гожеръяло, луоз?

- Ма, кызьы сотэк. Котькуд артистлэн сыӵе малпанъёс йыраз уло, дыр. «Гамлет» но «Ромео и Джульетта» спектакльёсын шудэме потэ вал. Юн сямо, мур пуштросъем но отын ик яратыны быгатӥсь ненег нылкышноосты возьматысал. Но ваньмыз потэ режиссёр бордысь. Мон театрамы али артистъёс пӧлысь тужгес но мӧйыез луисько. Та нуналъёсы шудӥсько «Валентин и Валентина» спектакльысь арлыдо нылкышноез. Талэсь азьвыл шудӥ «Господин, который платит» спектакльысь господинлэн кузпалызлэсь анайзэ. Со роль сюлэмыя вал. Но малы ке спектаклез репертуарысь куштӥзы. Ивортэме потэ: туэ сӥзьыл ӝытме ортчытыны малпасько. Отын вань яратоно рольёсме шудо.

Ӟуч театрын артистъёсты дунъяло, отын ноку но массовкаосы уг поттало. Нокыӵе споръяськон-керетонъёс уг луыло. Асме мон отын туж умой шӧдӥсько. Ма, асламаз но, Удмуртаз, премьераосты учкыны вуылӥсько. Мынам отын вань улонэ ортчиз ук, мон удмурт артистъёс понна висисько, сюлмаськисько, тодэме потэ, кызьы созэ яке тазэ спектаклез шудозы.

- Сцена вылын шудыны сяна, улонын мар карыны яратӥськоды?

- Яратӥсько керттӥсь­кыны. Нылпиосме пичи дыръязы аслам керттэм дӥськутэным нуллӥ. Книга лыдӟисько, сад-бакчаям ужасько. Женя кузпалыным (артист Евгений Андреев – Л. Т.) машинае пуксиськом но бакчаямы ширтӥськом, куддыръя ачим но руль сьӧрын мынӥсько. Милемлы нокыӵе зарезьёс кулэ ӧвӧл – бакчаямы шутэтскиськом. Музъемын бугыръяськыку, сюлэм ик ыркак луэ, жадемез но, вань куректон-сюлмаськонэз но отын вунэтоно. Нуныкайёсы котырын вырыны яратӥсько. Соос мынам куинь кузя ини, ваньзы нылъёс.

Оля нылы лэсьтӥськон удысын ужа, нош Рома пие – вуз карон бордын. Пиелэн семьяеныз ӵош улӥськомы. Мамае но бордамы ик. Со милемлы трос юрттэ. Гастрольёсы кошкылыкумы но, нылпиосын со пукылӥз. Ма, вазен улон туж шулдыр вал, куддыръя нылпиосын ӵош гастрольёсы потамы.

Семьяеным яратӥськом губияны. Одӥг пол Киров улосэ коньыгуби бичаны мынӥмы. Йыромим. Кыӵе ке гурт доры машинамес дугдытӥм но мотоциклэн кошкисьёслэсь, кызьы татысь потоно шуыса, юалляськиськом. Нош соос туклячиелэсь, пе, бӧрысь юало: бен со Чужанова артистка ӧй вал-а? Сыӵе дыръя сюлэм ик оломар луэ, сокем пыдлось гуртъёсысь ведь адямиос азьло спектакльёсты учкыны ветло вал, телевизор пыр но спектакльёсты сётъязы.

- Бакчаын рольёс но капчиен дышетӥськоды, дыр?

- Рольёс сярысь ке верано, мон соосты дышетыны чик уг курадӟиськы, текстэз репетициосысен огпол-кык пол учкисько но, монологъёс йырам кылё.

- Одӥгаз «Тулыс театр» фестивальын тӥледыз туж вылӥ дунъязы.

- Зэм ик но, мон понна со бадӟым шумпотон вал. 2010-тӥ арын «Мария Стюарт» спектакльын пичи гинэ роле вал. Шудэме сокем кельшем, мон понна нимысьтыз номинация малпаллям: пичи ролез быгатыса шудэмелы нырысетӥ инты сётӥзы.

- «Пересь» рольёсты тӥледыз уг вормо, сыӵе ик егит но веськрес возиськиськоды.

- Таиз ласянь мамаелы тау шуыны кулэ. 80 арес ни ке но, чырткем но чебер возиське. Но мынам мукет малпанэ: мӧйымемъя йӧн-йӧн, нуш-нуш мугоро нылкышноез шудэме потэ.

- Инмарлы оскиськоды. Кытысь меда со тӥляд лулады-вирады пыӵамын?

- Пичи дыръямы мамаосмы Сов.-Никольской черке ветлылӥзы. Ми но сьӧразы улляськыса сямен мынӥськомы вал. Милемлы отын праздникын кадь шулдыр потылӥз. Кин маин быгатэ утялтэ, кампет сётэ. Но ми соку черке, номыре но валатэк, ветлӥмы. Школаын, Инмар ӧвӧл шуыса, будэтӥзы. Арлыд ортчемъя сюлэм черке кыстӥське, отын чылкытатӥськиськод кадь.

Анае егит дыръяз лекгес вал, монэ кырмыса будэтӥз. Одӥг пол шудыкум усьтонме ыштӥ. Кызьы солы вералом шуыса, ну куректӥсько ини. Пичи мар ке, «Инмаре, шедьты» шуыса, бӧрдӥсько. Кема ик ӧй ветлы, шедьтӥ усьтонме. Со дырысен вылӥ кужымъёслы оскон пыӵаса кылиз.

Любовь Тихонова.