Та нуналэ Ижын кык концерт чакламын вал. «Аксионын» шулдыртӥзы азьвыл «арганчиос», нош филармониын ортчиз «Узы-боры Выль ар» концерт-коктейль. Залын буш интыос ӧй вал, учкисьёслы тунсыко потӥз, лэся, маин паймытозы та рад эстрада кырӟанъя «Шулдыр ӝыт» театрысь артистъёс.

Удмурт кун филармониен кивалтӥсь Алексей Фомин верамъя, соос Выль арлы сӥзем котькуд концертэз азьвылэзлэсь тунсыкогес, ӟечгес карыны тыршо. Учкисьёс капчи мылкыдын, усто шутэтскыса, соос дорысь мед кошкозы но озьы ик мыло-кыдо мукет ужрадъёсазы мед вуылозы.

- Выль арлы программаямы лыдэ басьтыны тыршим удмурт но ӟуч учкисьёсмес, ӧм вунэтэ нылпиосты но. Тани 23-тӥ декабре «Avis cantu» бадӟым концерт сётӥз. Туннэысен кутскыса, 30-тӥ декабрёзь мыноз пичи учкисьёслы сӥзем праздник. 5-11 аресъем нылпиосты выжыкыл дуннее вуттозы смешарикъёс. Калык дышиз ини, январе Удмуртиысь калык артистка Анна Плотникова соосты люка но шулдыртэ шуыса. Ар кутсконын со нош ик концерт сётоз, отчы пыриськозы шаерысьтымы усто арганчиос-кырӟасьёс. Нош таиз концертмы герӟаськемын нырысетӥ удмурт киноен «Узы-борыен». Сое нуозы та фильмын шудэм адямиос, чузъяськозы тол сярысь тодмо но туала кырӟанъёс, учкисьёс адӟозы выль ымныръёсты, луозы кузьымъёс, фойеын эктонъёс, – шуиз Алексей Юрьевич.

Концерт калыклы туж кельшиз. Отын трос пол чузъяськылӥз «узы-боры» кыл но киноысь крезьгуръёс. Ваньмыз огинэ суралтэмын но туж ческыт вал.

Концертэз нуизы Удмуртиысь культура удысысь дано ужась Леонид Гусев («Узы-борыысь» дедуш), Удмурт кун университетысь студентка Ирина Зангарик (дыды) но Удмурт театрысь артист Юрий Ерошкин (продюсер Роберт). Соослэн концерт нуэмзы вылымтэ ай, оло, соин куд-ог дыръя ӵемтылӥзы, возьдаськылӥзы.

Учкисьёслы узыё-борыё, эмезё-палэзё, ваньбуро-байлыко улон сӥзиз Россиысь дано артистка Галина Платонова. Костыльёссэ сцена вылэ ик куштыса, кырӟаз Удмуртиысь калык артист Геннадий Ганьков. «Узы-боры» киноын кырӟам нылаш, Алнашысь егит усточи Алина Антонова быдэстӥз француз джазэз удмурт кылын. Залэз задоренызы кенжытӥзы «Герберысь» воргоронъёс но «Малпанысь» нылъёс.

Алнаш ёрос администрациысь культура ёзэн кивалтӥсь, «Натӥ» дуэтын кырӟась Наталья Антонова концертъёсын эркиям адями. Со залын пукись мурт кадь гинэ уг учкы – котькуд ласянь дунъя сцена вылэ потӥсьёсты.

- Та концертэз дасясьёс – режиссёр Павел Поздеев но сценарийзэ гожтӥсь Дарали Лели – умой программа малпаллям. Со нимаз люкетъёслэсь итылэмын ӧвӧл, огез бордысь потэ мукетыз. Залэз но вунэтӥллямтэ, учкисьёслы конкурсъёс дасяллям, калыклы со кельше. Но одӥг шексэс вераме потэ. Концертэз нуисьёс ӝӧк сьӧры пуксизы но всё. Нош залэз кин вырӟытоз? Шоразы учкыса, ачим сцена вылэ потоно кадь луи. Нош кырӟасьёс шумпотто гинэ. Марина Галичанина выль уженыз кельшиз, «Герберлы» кемалась синмаськемын ини. Регина Музияновалы калык кырӟанъёстыгес быдэсъяно, дыр. Оглом концерт Выль арлы тупа, – мылкыдзэ усьтӥз Наталья Васильевна.

Галина Семёнова.

Куинь ар курегпузлы чик уд ёрме, нуналлы быдэ кадь пузало. Бадӟымесь ни соос, кык арня сюдыса, пузаны кутскозы.

Шумпотӥ таӵе иворлы. Малпасько, али юэ трос ӧвӧл, бӧрысь чабей шедьтӥ ке, витьсэ-куатьсэ басьто на.

Май толэзьлэн но пумыз вуэ ни – одӥг курегпузэ но ӧвӧл. Куреглэсь берпалзэ кырмаса уд ветлы ук. Школае дыртоно. Ӝыт пузан интызэс учкисько – буш. Ӵуказеяз но озьы ик. Скал ум вордӥське бере, малпасько, нылпиослы школае мыныкузы, глазунья шуон коть пӧрасал. Магазинысь басьтэм курегпузлэн ӵужез ик тӧдьы уго, сое басьтэм но уг поты.

Огнунал школаысь бер вуи, магазинъёс ворсаськемын, нош дорын нянь сяна сиён ӧвӧл.

- Ма та вуз карисьёс монэ воксё тупатъязы, лэся, кык толэзь сюдӥсько ини курегъёсме, одӥг пуззы но ӧвӧл. Вань меда пайдаез таос понна ю басьтыса? Ӵогоно. Малпанэз быроз. Ӝогак тӥр кутыса, коткасьёсы доры потӥ, сюры вылын пукись курегъёсме ваньзэсты ӵогыса, корка пыртӥ. Вуэ пӧзе ини вылэм, соку ик пӧсьвуай. Ӝыны час куспын гонзэс ишки. Ну, малпасько, тупатъяд монэ вуз карись, ничего, пуз интые табере сӥль сиём ини. Пушъёссэс поттаны кутски но… коть куараен бӧрд – куинезлэн ик туж трос пуз серелъёссы, курегпузӵуж быдӟаесь, тӧдьы кандыкенэз но вань. Коть курегдэ сэрпалты, коть астэ тышка… Воже потэмен, лэся, сӥльзэс но тыро-пыдо ӧй сиы. Иське, вузано вал со вандэм курегъёсты, холодильнике но ӧвӧл бере. Арам лэсьтӥ – ванез ӧвӧл карись луи. Визьмо адямиос серекъяса кырӟало: Пузась курегме вузаса, кышнолы арган басьтӥ… Мон ӧй басьты.

Лапас йылтӥ коӵолэсь коӵыр-р! карыса лобамзэ учкыса, нылы шуэ:

-  Анай, юнме, дыр, курегъёсмес вандылӥд. Коткасьёслэн сьӧлыксы ӧй вал, курегпузъёссэс коӵо нуллэ вылэм. Учкы ай, юбо йылэ нош ик огез пуксиз. Оло, самой со коӵо ик асьме дорын гусъяськиз, кӧня ар уло соос?

- Ӧйтӧд… Курег пузан интыысь мон алигес но коӵолэсь лобӟемзэ адӟи ай. Бен, серем кариз асьмеды куӵо-коӵо. Со дырысен куараез ик синазькыль потэ ни…

 Раиса Покоева. 

Пичи Пурга ёрос,

Шор Кечол гурт.