О. Чужанова пиеныз.

Удмуртиысь калык артистка Ольга Чужанова апрель толэзе 60 арес тырмонзэ пусйиз. Москваысь Щукин нимо театр училищеез йылпумъяса, со кема аръёс ӵоже Удмурт театрын тыршиз, собере выжиз Ӟуч драмая театре.

- Артистэ дышетскыны мынэ сыӵе адями, кудӥзлэн сцена вылын шудыны Инмарен сётэм быгатонлыкез вань.

- Озьы. Талантэд ӧз ке луы, котькӧня пычкиськы, юнме азьысь со уз поты. Пичи дырысеным ик кырӟаны-вераны яратӥ. Школаын дышетскыкум, мыло-кыдо пыриськылӥ самодеятельносте. Нош кӧня общественной ужен выриськиз! Со понна милемыз, ёросысьтымы тямыс муртэ, Москвае экскурсие лэзьязы.

Вордӥськи Дэри ёросысь Пероггуртын. Пичи дыръям тятяен анае люкиськиллям. Анаен Иже кошкиськеммы. Анае, Анна Тимофеевна, заводын ужам. Быдэ вуыса, тятяме утчай на вал, но сое улэпкын ӧй адӟы ни. Тодӥсько на, школае мынон азям анаелэн вордӥськем Подшивал гуртаз улыны бертӥмы. Со нылпи садэ интыяськиз, няня луыса ужаз. Дасэтӥ классэ мынон арам нош Иже улыны выжимы. Ӟуч нылпиос пӧлын асме удмурт шуыса пачкатыса ӧй возьы, котькыӵе ужрадъёсы мыло-кыдо пыриськылӥ. Концертъёсын удмурт кырӟанъёсты кырӟасько вал.

Дасэтӥ классэ выжем мурт, газетысь ялон адӟисько: Удмурт театр егитъёсты дышетскыны келя Москвае. Нош мынам ке арлыды уггес тупа на. Быдэс арзэ куректыса ветлӥ: вуоно арын кин монэ артистэ дышетскыны кутоз на. Школаез йылпумъяй но нош ялон шедьтӥ. Таяз радэ удмурт филармония кылбур лыдӟонъя конкурс, пе, ортчытэ. Эстрадая артистъёсты дасяны Ленинградэ, пе, келялозы. Бурдъяськыса отчы вамыштӥ. Малпасько, таяз пырыны быгатӥ ке, оло, азьланяз артист но луыны быгато. Огзэ турез ортчи. Ӟуч кылбуръёсты дасяй вал, туж умой лыдӟиськем, лэся. Мукетаз лыктӥ но, филармониысь Николай Семёнович Зубков индылэ: тыныд артистэ мыноно вал. Пумитаз шуисько: аслам но отчы мынэме потэ, но кин монэ басьтоз на. Мын ай, Удмурт театре ветлыса, оскалты, отын кӧня ке муртэ кутом шуизы на кадь. Кылбур лыдӟем сяна, удмурт кылын диктант, пе, гожтоно. Э, малпасько, мар отын шугез ини! Гожтӥ но – «кык» пуктӥллям. Анай кылэз угось мон ӧй дышеты. Бӧрысь милемыз диктант гожъяны дышетӥзы на.

Училищее пырон азьын мон удмурт грамматикаез ӟеч валаны кутски ини (Москваын анай кыллы дышетӥз тодосчи Тамара Ивановна Тепляшина). Тӥни сыӵе вал мынам артистэ мынон сюресэ. Озьы Щукин нимо училищее вуи. Сизьым муртэ Москвае дышетскыны келязы на, кылем арыназ келям пиналъёслэн лыдзы ӧжытгес потэм, лэся.

- Учкись понна тӥ тужгес но паймымон рольёсты быдэсъяды, пичи пиосты быгатыса шудылӥды, ӵемысь выжыкыл улонэ зымылӥды.

- Артистэ дышетскыны келякузы, шуизы вал: пичиослэсь рольёссэс шудод. Мугорыд но, пе, соослы тупа. Мон угось чиед но пичи вал. Дышетскыса бертэммы бере мыным соку ик «Кам вадьсын гудыръя» спектакльысь Миколлэсь но «Улэм потэысь» Любалэсь рольёссэс сётӥзы. Выжыкылъёсын трос шудӥ. Нылпиос понна тунсыко ужаны. Соос куддыръя асьсэды зэмос выжыкылын кожало.

- Шуо, артист, пе, сцена вылын аслэсьтыз улонзэ шудэ.

- Роль пӧрме ке, со туж шумпотымон ини. Котькуд рольдэ сюлэм пыртӥд поттӥськод. Ролез дышетыку гинэ но, ымныр тус ик воштӥське. Ульчаысен тодмоосме пумитасько ке, паймыса но жаляса юаллясько: мар луиз, ымныр тусыд шулӟектэмын. Сюлэмъя быръем уж котькыӵе шуг-секытэз вормыны быгатэ.

- Сцена вылын шудэмдылы вуоно арын 40 ар тырмоз. Со дыр куспын лыдъянтэм рольёс шудэмын. Кудъёсыз, сюлэмады тужгес но пыӵаса, кылизы?

- «Инвожо уйшоре но пиштэ» спектакльысь Нина но «Сюлэм куараысь» Фаина. Со спектакльёсын аслэсьтым улонме шудӥсько кадь потылӥ. Артистэ ӵош дышетскем эшъёсыным – Пётр Романовен, Раиса Нефёдоваен, Фаина Будинаен, Вячеслав Байковен, Сергей Марковен – кыӵе гинэ образъёс ӧм кылдытэ. Жаль, Сергеймы улонысь дырызлэсь вазь кошкиз. Ми соин ог-огзэс яратӥсь муртъёсты трос гинэ шудӥмы: «Инвожо уйшоре но пиштэ», «Улэм потэ», «Дуринчи кар» но трос мукет спектакльёсын.

- Удмурт театрысь малы ке но Ӟучаз выжиды. Со воштӥськонъёс улондэс мукет ӧре ӧз кожытэ-а?

- Зэм но, Ӟуч драмая театре кошки. Отысь Сафронов режиссёр вань театръёсысь артистъёсын ӵош проект (спектакльёс пуктылыны) малпам вылэм. Мынам шудэме кельшиз, лэся, Владимир Иванович монэ доразы ӧтиз. Но мон со пумысен кема малпаськи. Аслэсьтыд юрттэ куштыса, кошкыны капчи ӧвӧл. Лыктэме бере ик мыло-кыдо шудӥ «В сумерках» спектакльын анаез, «Ретроын» – Диана Владимировнаез, «Пока она умирала» пьесаын – бызьытэк кылем Татьяна нылмуртэ. Со роль мыным али ке но туж кельше.

- Быдэстымтэ рольёсты но котыртӥды гожеръяло, луоз?

- Ма, кызьы сотэк. Котькуд артистлэн сыӵе малпанъёс йыраз уло, дыр. «Гамлет» но «Ромео и Джульетта» спектакльёсын шудэме потэ вал. Юн сямо, мур пуштросъем но отын ик яратыны быгатӥсь ненег нылкышноосты возьматысал. Но ваньмыз потэ режиссёр бордысь. Мон театрамы али артистъёс пӧлысь тужгес но мӧйыез луисько. Та нуналъёсы шудӥсько «Валентин и Валентина» спектакльысь арлыдо нылкышноез. Талэсь азьвыл шудӥ «Господин, который платит» спектакльысь господинлэн кузпалызлэсь анайзэ. Со роль сюлэмыя вал. Но малы ке спектаклез репертуарысь куштӥзы. Ивортэме потэ: туэ сӥзьыл ӝытме ортчытыны малпасько. Отын вань яратоно рольёсме шудо.

Ӟуч театрын артистъёсты дунъяло, отын ноку но массовкаосы уг поттало. Нокыӵе споръяськон-керетонъёс уг луыло. Асме мон отын туж умой шӧдӥсько. Ма, асламаз но, Удмуртаз, премьераосты учкыны вуылӥсько. Мынам отын вань улонэ ортчиз ук, мон удмурт артистъёс понна висисько, сюлмаськисько, тодэме потэ, кызьы созэ яке тазэ спектаклез шудозы.

- Сцена вылын шудыны сяна, улонын мар карыны яратӥськоды?

- Яратӥсько керттӥсь­кыны. Нылпиосме пичи дыръязы аслам керттэм дӥськутэным нуллӥ. Книга лыдӟисько, сад-бакчаям ужасько. Женя кузпалыным (артист Евгений Андреев – Л. Т.) машинае пуксиськом но бакчаямы ширтӥськом, куддыръя ачим но руль сьӧрын мынӥсько. Милемлы нокыӵе зарезьёс кулэ ӧвӧл – бакчаямы шутэтскиськом. Музъемын бугыръяськыку, сюлэм ик ыркак луэ, жадемез но, вань куректон-сюлмаськонэз но отын вунэтоно. Нуныкайёсы котырын вырыны яратӥсько. Соос мынам куинь кузя ини, ваньзы нылъёс.

Оля нылы лэсьтӥськон удысын ужа, нош Рома пие – вуз карон бордын. Пиелэн семьяеныз ӵош улӥськомы. Мамае но бордамы ик. Со милемлы трос юрттэ. Гастрольёсы кошкылыкумы но, нылпиосын со пукылӥз. Ма, вазен улон туж шулдыр вал, куддыръя нылпиосын ӵош гастрольёсы потамы.

Семьяеным яратӥськом губияны. Одӥг пол Киров улосэ коньыгуби бичаны мынӥмы. Йыромим. Кыӵе ке гурт доры машинамес дугдытӥм но мотоциклэн кошкисьёслэсь, кызьы татысь потоно шуыса, юалляськиськом. Нош соос туклячиелэсь, пе, бӧрысь юало: бен со Чужанова артистка ӧй вал-а? Сыӵе дыръя сюлэм ик оломар луэ, сокем пыдлось гуртъёсысь ведь адямиос азьло спектакльёсты учкыны ветло вал, телевизор пыр но спектакльёсты сётъязы.

- Бакчаын рольёс но капчиен дышетӥськоды, дыр?

- Рольёс сярысь ке верано, мон соосты дышетыны чик уг курадӟиськы, текстэз репетициосысен огпол-кык пол учкисько но, монологъёс йырам кылё.

- Одӥгаз «Тулыс театр» фестивальын тӥледыз туж вылӥ дунъязы.

- Зэм ик но, мон понна со бадӟым шумпотон вал. 2010-тӥ арын «Мария Стюарт» спектакльын пичи гинэ роле вал. Шудэме сокем кельшем, мон понна нимысьтыз номинация малпаллям: пичи ролез быгатыса шудэмелы нырысетӥ инты сётӥзы.

- «Пересь» рольёсты тӥледыз уг вормо, сыӵе ик егит но веськрес возиськиськоды.

- Таиз ласянь мамаелы тау шуыны кулэ. 80 арес ни ке но, чырткем но чебер возиське. Но мынам мукет малпанэ: мӧйымемъя йӧн-йӧн, нуш-нуш мугоро нылкышноез шудэме потэ.

- Инмарлы оскиськоды. Кытысь меда со тӥляд лулады-вирады пыӵамын?

- Пичи дыръямы мамаосмы Сов.-Никольской черке ветлылӥзы. Ми но сьӧразы улляськыса сямен мынӥськомы вал. Милемлы отын праздникын кадь шулдыр потылӥз. Кин маин быгатэ утялтэ, кампет сётэ. Но ми соку черке, номыре но валатэк, ветлӥмы. Школаын, Инмар ӧвӧл шуыса, будэтӥзы. Арлыд ортчемъя сюлэм черке кыстӥське, отын чылкытатӥськиськод кадь.

Анае егит дыръяз лекгес вал, монэ кырмыса будэтӥз. Одӥг пол шудыкум усьтонме ыштӥ. Кызьы солы вералом шуыса, ну куректӥсько ини. Пичи мар ке, «Инмаре, шедьты» шуыса, бӧрдӥсько. Кема ик ӧй ветлы, шедьтӥ усьтонме. Со дырысен вылӥ кужымъёслы оскон пыӵаса кылиз.

Любовь Тихонова.

Л. Романов «Вдохновение» статуэткаез сётэ В. Ломаевлы.

Театрлэн калыккуспо нуналэзлы сӥзьыса, шаерысьтымы кун но муниципал театръёс котькуд аре капустник ортчыто. Таяз учыре сценкаос но миниатюраос драконэн герӟамын вал.

Драмая ӟуч театре люкаськемъёс ӟырдыт кичабонъёсын пумитазы Опера но балетъя театрысь артистъёслэсь ужзэс. Соос ик мынозы капустникъёсъя Нижний Новгородын радъям «Золотая коза» фестивале. Удмурт театрысь артистъёслэсь маскаръяськемзэс но учкисьёс шуныт пумитазы.

Театрлэн нуналэзлы сӥзем шулдыръяськон герӟамын вал «Театр тулыс» фестивалез йылпумъянэн. Москваысь вуэм но шаерысьтымы дунъясьёс тямыс нунал ӵоже укмыс спектаклез учкизы, сэрттӥзы-пертчизы.

Устоеныз лыдъямын Глазовысь «Парафраз» театрлэн «Чудовище» трагикомедиез. Нош устоез режиссёр луиз Ижысь «Молодой человек» театрысь Андрей Опарин «Мальчиш-Кибальчиш» уженыз. Нылкышнолэсь рользэ быгатыса шудӥз Мунё театрысь артистка Галина Шевякова – Турандот, нош пиосмуртъёс пӧлысь пусъемын Драмая ӟуч театрысь Михаил Солодянкин – «Женитьба» спектакльысь Подколесин.

Синйылтытэк ӧз кыльы Удмурт театрлэн «Улон – шудон» драмаез. Усто сценография но костюмъёс понна дунъямын суредась Ольга Глухова. Берло аръёсы та номинациен пусъемъёс ӧй вал. Кема аръёс ӵоже улонзэ Удмурт театрлы сӥземез понна сӥлы каремын театрысь валтӥсь режиссёр Леонид Романов. Солы ик оскизы «Вдохновение» статуэткаез сётыны Глазовысь «Парафраз» театрысь кутскись артистлы Владимир Ломаевлы.

Вормисе потэмъёс ваньмыз ик пусъемын статуэткаосын но дуно кузьымъёсын. Вераны кулэ, таяз фестивальын выль номинациос но кылдӥзы: кыкетӥ планысь ролез шудӥсь – Драмая ӟуч театрысь артист Николай Ротов, сезонлэн усьтонэз – Глазовысь студент Иван Васильев, спектаклез выль сямен пуктӥсь – Операя но балетъя театрысь Николай Маркелов.

Ар ортчыса, театръёс понна вуоз 13-тӥ тулыс. Сое усьтоз но ворсалоз фестивальлэн гимнэз – Театрын ужасьёслэн огазеяськонзы та пумысен конкурс ялӥз.

Лия Малых.

Валэктон сётэ «Перепечкин» огазеяськонлэсь азьветлӥсьсэ Роман Дементьевез. Ӵапак «Перепечкинысь» егит ужбергатӥсьёс басьтӥськизы «Зарни перепечез» радъян борды.

- Роман, мар со сыӵе «Зарни перепеч» – концерт, ӵошатскон яке эшшо маке?

- Асьмеос, удмуртъёс, ушъяськыны ум быгатӥське «Песня года», «Золотой граммофон», «Золотой орёл» кадь ӵошатсконъёсын. Кытын учкисьёс, куаразэс сётыса, дунъяны но данъяны быгато тужгес но кельшымон артистэз, кырӟанэз. Тодмо продюсер Паша Поздеев малпан кенжытӥз: оло, удмурт артистъёс пӧлын но таӵе ӵошатскон радъяно?! Милемлы, «Перепечкин» огазеяськонысь ужбергатӥсьёслы, та идея туж кельшиз. Бордамы итӥськиз тодмо кырӟась Марина Галичанина – со радъя ужрадлэсь чеберлыкъя люкетсэ.

Озьыен, 1-тӥ апреле Удмурт театрын ортчоз тужгес усто удмурт артистэз быръён. Вормисе потэм мурт пусъемын луоз ӵошатсконлэн пусэныз – зарни перепечен – но 15 сюрс манет премиен. Кыкетӥ интые потэм артистлы сётӥськоз 10 сюрс манет, куинетӥ интые ӝутӥськемлы – 5 сюрс манет.

- Перепечты, оло, зэмос зарнилэсь кисьтэмын луоз?

- Перепеч удмуртъёслэн, туала кылын вераса, брендзы луиз ни. Озьы ик милям огазеяськонмылэн пусэз но со. Малпанэ вуим вормисе потэм артистэз та «пыжосэн» пусйыны. Сое дасян бордын тыршо «Мугур» студиысь кибашлыос (кивалтӥсьсы Анатолий Степанов). Со зарнивуамын луоз.

- Вормисе потэм мурт, сое чыртыяз ошыса нуллоз-а – чыртывесез кадь?

- Уз, со луоз кубок выллем – сое ӝажы вылэ пуктыны но луоз. Малпасько, номыр уродэз ӧвӧл, ужрадлэсь поттэм коньдон артистъёслы ик берыктӥськиз ке?! Учке ай, артистъёслы фонограмма лэсьтыны кӧня коньдон кулэ! Веранэз ӧвӧл ни костюмъёс сярысь… Нош татын соослы луонлык усьтӥське премия басьтыны.

- Зэм но, таӵеез удмурт эстрадаын ӧй вал на кадь…

- «Зарни перепеч» огшоры ӵошатскон гинэ уз луы – со зэмос шоу луоз. Сцена вылысен чузъяськозы капчиесь но серемесэсь веранъёс, адӟытонъёс. Озьы, оло, кутскон сётысалмы выль жанрлы. Шуом, «Камеди клаб» выллем – но удмурт кылын.

Пусйыны кулэ: та проект нырысьсэ радъяське, соин ик со пумысен кылдэм идеяосмес ваньзэ улонэ пыӵатыны ум пӧрмытэ ай. Малпан вань, «Оскарын» выллем артистъёсмес лимузинэн вайыны, соос понна горд ковёр вальыны… Со сяна, радъяммы потэ «Евровидение» ӵошатскон выллем удмурт конкурс – «Элькуновидение». Азьланез пумысен малпанъёс лачак!

- Кызьы радъяськоз куара сётон – 1-тӥ апреле ик тодыны быгатомы-а вормисе потэмъёслэсь нимзэс-тулзэс?

- Антракт дыръя Удмурт театрлэн фойеысьтыз синйылтоды пиштӥсь футболкаосын – со вылын пусъемын луоз соизлэн я таизлэн артистлэн нимыз – поръясь егит нылъёсты но пиосты. Соос доры лыктыса но пырон билеттэс соослы сётыса, вераны быгатоды соизлы я таизлы артистлы синмаськемдэс. Мӧзмыт уз луы – таиз точно!

Елена Тугашова.

Сергей Наговицын (бурысез).

Москваысь Щепкин нимо театральной училищее пырем удмурт егитъёс пӧлысь одӥгез – Сергей Наговицын. Со туж шыпыт, востэм ке но, кулэ дыръяз шулдыръяськыны но, ассэ сереме уськытыны но быгатэ.

Серёжа вордскемын Балезино ёросысь Кӧснюк гуртын. Люк черкогуртысь школаез йылпумъяса, Ижкаре, Удмурт театрын ортчись конкурсэ дыртэ. Али пияш серекъяса тодаз вае:

- Щепкин нимо училищее пырытозям, театре ветлэме ик ӧй вал. Переноснойзэ учки, но соиз воксё мукет ук! Нырысьсэ спектакль адӟи Москваын.

Вань егитъёсмылы дышымтэысьтызы училищелэн куронъёсыз секыт йӧтӥзы. Нагрузкаез чидатэк, нылъёс бӧрдылӥзы но. Вазь ӵукнаысен бер ӝытозь дышетскон интыысьтызы уг потало: нырысь пуко пӧртэм лекциосын, собере театр мастерствоя занятиосын. ӝожтӥськемзы но вань: «дышетсконысь бертыны ум вуттӥське на, номыртэм жадемын. Нош огъяулонниямы сиён пӧрано на, урокмес дасяно. Эшъёсмы ке, юри ӧчкарыса кадь, соку аська яке ВКонтакте пыр «Я, мон изё ни. Ческыт уйвӧтъёс!» гожто. Йыр кур луэ ук!»

Но Сергей малпамъя, соосты таӵе режим трос умоезлы дышетӥз: ог-огдэ капчиенгес валаськод, кусыпъёсыз утьыны тыршиськод, дырдэ юнме уд быдтӥськы.

Тросэз удмурт егитъёс Серёжаез «Узы-боры» киноысь синйылтӥзы. Со валтӥсь ролез ӧз шуды ке но, ассэ йыре кыльымон возьматӥз. Киное сюремез сярысь пияш тазьы вера:

- Огъяулонниын Костя Никитинэн ӵош улӥсько. Комнатае пырыкум, со кыӵе ке нылашен скайп пыр вераське вал. Берло тодӥ, со Зангарик шуыса. Тодматским соин. Ирина ик вераз кино сярысь, ӵектӥз шудыны. Мон пумит ӧй луы, маке пӧрмоз шуыса быдэсак ӧй оскы ке но. Та ролез очки нуллэмысьтым сётӥзы, дыр.

Кылем гужем, шутэтскон нуналъёссэ дораз семьяеныз ортчытэм интые, Серёжа быгатӥсь удмурт нылпиос понна радъяськись «Усточикар» лагерьын ужаз. Отын со вожатой вал.

- Та лагерьын пичи дыръям шутэтскыны шуд усиз. Быгатонлыкъёсме волятӥ «Эстрада» отрядын. Нош вожатой нырысетӥзэ вал. Ноку ӧй малпа, со сыӵе секыт, вань ӟигарез, мылкыдэз, кужымез, сюлэмез курись уж шуыса. Озьы ке но лагерь туж яраз, эшшо ужасал на. Сюлэмы шумпотэ: сомында быгатӥсь удмурт нылпиос будо!

Лена Рябина.

Игнатий Гаврилов.

Игнатий Гаврилов Удмурт театрез кылдытӥсьёс пӧлысь одӥгез луэ. Сцена вылын шудон законъёсты ӟеч валась драматург пьесаос гожъян но соосты пуктон борды басьтӥськиз.

Озьы со 1931-тӥ арын 7-тӥ феврале «Вало ӧр куашетэ» пьесазэ пуктӥз. Та бордысен кутскиз Удмурт театр, шуыны луэ. Игнатий Гаврилович гожтӥз 40 котыр пьеса. Удмурт театрын солэн мында ужъёсыз нокинлэн пуктэмын ӧвӧл.

Мынам мадеме потэ драматург но солэн семьяез сярысь тодэ ваёнъёсме. Мон соосты пичи дырысеным тодӥсько. Гожтӥсько сое, мар сюлэмам кылиз.

…Пичи гинэ улон сэрег. Отын сыло койка, ӝӧк, кык табуретка, сандык, пичи гинэ шкаф, дасо мында книгаосын ӝажы. Ӵукна сайкасько но уг адӟиськы мамаме. Ӝӧк сьӧрын пуке Вася агае. Со мар ке но суреда.

- Кытын мама? – юасько.

- Театрын, – шуэ агае.

- Нош атай?

- Со но театрын. Изь.

- Уг поты.

- Соку султы но дӥсяськы. Ӝоггес!

Коридоре потӥмы. Отын ӟус вылын вуэн ведра но кобы. Сэрегын таз. Агае кобыысь киосам ву киськаз. Собере ӵушкон сётӥз. Со куспын бускель комнатаысь песянай потӥз.

- Тон сайкад ни-а, нылы? Томаен Лёва кӧло на. Бергес лыкты, ява.

- Вася, Томалэн но мамаез театрын-а? – юасько.

- О-о.

- Нош атаез? Мон солэсь кышкасько. Со лек.

- Лек ӧвӧл. Йӧн-ӥӧн адями со.

- Нош асьмелэн йӧн-йӧн ӧвӧл-а, мар-а?

- Тон шузи.

- Мон шузи ӧвӧл. Ваньзэ верало мамалы. Вот соку тыныд йӧтоз.

Бускель песянай – УАССР-ысь калык артисткалэн Клавдия Гавриловалэн (Игнатий Гавриловлэн кузпалызлэн) анаез. Тома но Лёва – Гавриловъёслэн пиналъёссы. Тамара Игнатьевна луиз крезьгуро театрысь артистка, жаль, улонысь кошкиз ини. Лев Игнатьевич – инженер-авиаконструктор.

Мон ӵемысь Гавриловъёс доры вуылӥ. Угось ми Тамараен огъёзъёс вал, ӵош шудӥмы. Соослэн квартиразы куинь бадӟым комнатаен, нокинлы люкетытэк, нылпиослы тырме вал шудыны. Песянайзы гинэ милемыз ӵашетыны ӧз лэзьылы. Индылӥз но алылӥз: Игнатий Гаврилович ужа, эн аляктэ, чалмыт шудэ. Валтӥсь драматург, Удмурт АССР-ысь Писательёслэн огазеяськонэнызы кивалтӥсь, УАССР-ысь Верховной Советлэн депутатэз Игнатий Гаврилов мон понна Тамара эшелэн атаез вал. Клавдия Кузьминичнаез ми эшъёсыным Клава апай гинэ шуылӥмы. Нош атайзы шоры нимын-тулын вазьылӥмы – Игнатий Гаврилович. Со туж яратӥз нылзэ, шораз Томик гинэ шуыса вазьылӥз.

Гаврилов кузпалъёс туж трос ужазы. Гурт котырысь уж но нылпиосты эскерон-чаклан быдэсак песянайзы вылын вал. Со Псков губерниысь удмурт Михайловской черкогуртын вордскемын. Удмурт кылын верамез умой валалляз. Но туж суро-пожо вераськылӥз. Нуныкайёсыз шоры со лякытак гинэ дитятко шуыса вазиськылӥз. Монэ но озьы ик шуылӥз. Али ке но солэн мусо вазиськемез пель сьӧрам чузъяське. Пересь мурт понна ми быдэ вуыса но дитяткоос кылимы.

* * *

Быдӟым ож кутскыса, Игнатий Гавриловичез фронтэ басьтӥзы. Тросэз артистъёс ож лудэ кошкемен, театрез огдырлы ворсазы. Кӧня ке дыр ортчыса, артистъёсты выльысь люказы. Театрлэсь ёзъёссэ Алнаш черкогуртэ но Можга городэ интыязы. Игнатий Гавриловичлэн кузпалыз но, Клавдия Кузьминична, Удмурт филармонилэн концерт бригадаеныз фронтэ кошкиз. Тамараез выныныз ӵош келязы Вавож ёросын улӥсь песянайзы доры. Тамара эшеным ми выльысь пумиськимы 1945-тӥ арын, война бырыса, Иже вуэммы бере гинэ. Клавдия Кузьминична но бертэмын вал ини.

Игнатий Гавриловлэсь секыт, шимес аръёсы но спектакльёссэ ӧз вунэтэ, сцена вылын шудӥзы. 1944-тӥ арын Можга городын пуктэмын «Аннок» пьесаез, 1945-тӥ арын Ижын – «Камит Усманов». Та спектакль крезьгуро луэ. Отын нимысьтыз кырӟасьёсыз но вань. Юромо спектакльлы крезьгур гожтӥз Н. Греховодов. Камитэз шудӥз Григорий Титов. Артистлэн чебер куараез паймытӥз учкисез. Нош Камитлэсь пичи пизэ, Гарасез, Гавриловъёслэн Тамара нылзылы шудыны ӵектӥзы. Анай-атаез тодмо адямиос шуыса ӧз, нылаш ачиз но быгатӥсь вал. Тамара крезьгуръя школаын дышетскиз, чебер кырӟаз.

«Камит Усманов» – Удмурт театрлэн со вакытысь тужгес но дано ужез. Мон но Тамараен данъяськылӥ. 13 аресъем нылаш нырысьсэ профессионал артистъёсын ӵош бадӟым сцена вылын шудӥз.

Ож бырем бере Игнатий Гавриловичез келязы Латвие, Вентспилс городэ. Отын со военной газетын тыршиз. 1947-тӥ арын гинэ Гаврилов кузпалъёс Иже бертӥзы. Игнатий Гавриловичез соку ик Удмурт театре кивалтӥсе пуктӥзы. Драматург нош ик пьесаос гожъяны но соосты сцена вылын пуктыны кутскиз. Ми, нылпиос, будӥмы. Игнатий Гавриловичлэн милемын кусыпъёсыз мукетэсьгес луизы, бадӟым муртъёсын сямен вераськыны кутскиз.

Гавриловъёслэн квартираязы атайзылэн ужан кабинетэз вал. Таӵе ик син азям пуксе бумагаосын тырмытэм ӝӧкез. Солэн туж трос вал книгаосыз. Ми со книгаосты мыло-кыдо лыдӟылӥмы. Вераны кулэ, Гавриловъёс сямен тросэз артистъёс сокем бадӟым библиотека возьыны ӧз быгатэ, малы ке шуоно улон интызы туж ӟоскыт вал. Тросэз улӥзы кунокуаосын, коммунальной комнатаосын. Озьы ке но Гаврилов кузпалъёс но, пиналъёссы но ноку ӧз вылтӥяське.

Ӵемысь кылылӥ кузпалъёслэсь ваче кенешонъёссэс. Игнатий Гаврилович ӝӧк сьӧрысьтыз султэ но, киоссэ кусказ тырыса, кабинетэтӥз сэрегысь сэреге ветлэ. Собере кузпалызлы вазе:

- Клавочка, мон малпасько, татын тазьы гожтоно, нош со интызэ ӵушоно, куштоно, кызьы тон малпаськод? – собере рукописьсэ шара лыдӟыны кутске.

Клавдия Кузьминична кузпалыз шоры яратыса но гажаса вакчияк Гави шуыса вазиськылӥз. Пиналъёссы азьын ог-огзэсты папочка но мамочка шуылӥзы.

Улытозяз Игнатий Гаврилович Клавдия Кузьминична понна матысь эш но дышетӥсь вал. Нош Клавдия Кузьминична – ӟеч юрттӥсь. Кузпалызлэн гожтэм пьесаосаз Клавдия Кузьминична ваньмаз сямен шудӥз. «Вало ӧр куашетэ» спектакльысь Куашкам туно-пелё бордысен кутскыса (драматурглэн нырысетӥ ужез вал со).

Клавдия Кузьминична – улонэз яратӥсь, мыло-кыдо, адямиен вераськыны быгатӥсь вал. Синъёсаз котьку тылгизьы, ымныраз – пальпотон. Секыт вакытъёсыз дыръя но со куашкам мылкыдзэ ӧз возьматъя. Клавдия Кузьминичналэн задор, капчи сямызлы луыса ик, дыр, Игнатий Гаврилович берпуметӥ шокчытозяз гожъяськиз.

1950-тӥ аръёслэн кутсконазы Тамара Москвае консерваторие дышетскыны кошке. Нош мон Удмурт пединститутэ пыри. Эше кыдёке кошкем бере Гавриловъёс доры шергес вуылž. Одӥг пол, шуныт гужем, ульчаысен Игнатий Гавриловичез пумитай. Со монэ китӥм кутӥз но шуэ:

- Ойдо кӧня ке поръялом. Кенешом. Тон нылылэн матысь эшез ук.

Шӧдӥ: Игнатий Гаврилович малы ке но туж сюлэмшугъяське, мар ке но мыным верамез потэ. Кык час пала ми садэтӥ поръямы. Игнатий Гаврилович литература, театр но улон сярысь вераськиз. Мыным но юанъёс сётъяз, собере ачиз ик соослы валэктонъёс шедьтылӥз.

Мон соку Игнатий Гавриловичлэсь нырысьсэ адӟи бугыръяськись мылкыдзэ. Удмуртиысь Писательёслэн союзазы ужасьёс Игнатий Гавриловичлэсь берло гожтэм произведенизэ озьыгес кариллям. Вылаз ик, Гавриловъёслэн семьязылы вожъяськисьёс Клавдия Кузьминична сярысь олокыӵе но супыльтонъёс вӧлдыны кутскиллям. Лякыт сямо но визьнодо нылкышно та секыт учырысь потыны ачиз ик быгатӥз.

* * *

Удмурт калык но Удмурт театр понна вераны луонтэм трос лэсьтӥз Игнатий Гаврилов. Драматурглэн но артистлэн калык понна тыршемез пусъемын РСФСР-ысь искусство удысысь дано ужась нимын. Со – Горд Кизили орденлэн кавалерез, УАССР-ысь Кун премилэн лауреатэз.

Огвакытэ «Советской Удмуртия» газетлэн бамъёсаз гожъязы: Удмурт театрлы Игнатий Гаврилов драматурглэсь нимзэ сётоно. Табере со вераськонъёс чалмизы.

Анна Евсеева.

Г. Дадамян.

«Театр тулыс» фестиваль улсын шаерамы вуылӥз Москваысь куно Геннадий Дадамян.

Россиысь театр искусствоосъя профессор, экономика наукаосъя кандидат, Россиысь Культурая министерстволэн сцена искусство удысын ужасьёсызлэн вылӥ школазылэн директорез Драмая ӟуч театрын пумиськылӥз театрез яратӥсьёсын.

Геннадий Григорьевич республикаямы одӥг пол гинэ вуылэмын ӧвӧл ни. Шаерамы улӥсьёс понна бадӟым шудэн лыдъяз Удмуртилэн Президентэзлэн театр удыслы саклык висъямзэ. Озьы ик умоен пусйиз егитъёсты артистэ дышетскыны келямез но Драмая ӟуч театрын Пинал учкисьёслы театр (ТЮЗ) кылдытонэз.

Г. Дадамян люкаськемъёслы мадиз театрлэн вашкала но туала историез сярысь, юанъёслы валэктонъёс сётӥз. Уждун но улон инты пумысен артистъёсты шугъяськытӥсь ужпумъя шуиз, «Театр сярысь» закон кутэмын ӧз ке луы, югдур уз воштӥськы. Нош тая дасям законопроект Россиысь Кун Думае эскеронозь но вуымтэ. Но Москваысь куно ӟечезлы оскемзэ вераз ик. Владимир Путинлэн Россилэн азьланезлы сӥзем статьяосаз куд-ог ужпумъёс пусъемын, пе. Соос улонэ пыӵазы ке, культура удыс ӧжытак ке но капчигес шокчоз.

Лия Малых.

Фестиваль усьтӥськиз 15-тӥ мартэ Драмая ӟуч театрлэн «Женитьба» спектакленыз, ворсаськоз но та театрлэн «Валентин и Валентина» уженыз. Глазовысь «Парафраз» театр но кык ужзэ возьматоз – «Просто игра» но «Чудище». Быдэн одӥг спектаклен пото Удмурт театр («Улон-шудон»), Мунё театр («Принцесса Турандот»), Операя но балетъя театр («Vivat, Дягилев»), Сарапулысь драмая театр («Зимняя сказка»), Ижысь егитъёслэн «Молодой человек» театрзы («Мальчиш-Кибальчиш»).

Удмуртиын «Театр тулыс» ортче ни 1989-тӥ арысен. Радъя фестивалез элькунысьтымы Культурая, печатья но иворъёсъя министерство но Театрын ужасьёслэн огазеяськонзы Россиысь Театръёсын ужасьёслэн огазеяськонэнызы ӵош. Мар пӧртэмлыкез луоз таяз арын?

Москваысь но шаерысьтымы театр искусствоез дунъясьёсын ӵош спектакльёсты эскеронэ пыриськозы УдГУ-ысь студентъёс – вуоно журналистъёс, критикъёс. Но куара сётонэ соос уз пыриське. Вылез со но: 23-тӥ мартэ 13 часын Драмая ӟуч театрын мастер-класс ортчытоз Геннадий Дадамян, Россиысь театр искусствоосъя профессор, экономика наукаосъя кандидат, Россиысь искусствоосъя дано ужась, Россиысь сцена искусство удысын ужасьёслэн вылӥ школазылэн директорез.

Театръёслэн ужъёссы дунъямын луозы 7 номинациосъя: «Устоез спектакль», «Режиссёрлэн усто ужез», «Суредасьлэн усто ужез», «Устоез воргорон роль», «Устоез нылкышно роль», «Оскон» – кутскись артистлы», «Сӥлы карон» – сцена вылын кема аръёс ӵоже ужасьлы.

Берло номинациын вормись тодмо ни – тазэ быръе Удмуртиысь Театръёсын ужасьёслэн огазеяськонзы. Фестивалез йылпумъян ужрадын (ортчоз 26-тӥ мартэ Драмая ӟуч театрын) вормисьёсты пусъёзы «Вдохновение» статуэткаен но кузьымъёсын. «Сӥлы карон» дунъет сётэмын луоз Удмурт театрысь валтӥсь режиссёрлы, Россиысь искусство удысысь дано ужасьлы, Удмуртиысь калык артистлы Леонид Романовлы.

Лия Малых.

«Бызьыны вуэм песяйёс» спектакльысь суред.

80 ар ӵоже ини Удмурт театрлэсь сценазэ узырмыто, учкисез шумпотто быгатонлыко удмурт артистъёс. Соос пӧлысь одӥгез арлыдоез – Ленинградысь театральной институтысь национальной студилэсь кыкетӥ выпусксэ йылпумъям мурт, РСФСР-ысь дано артист, УАССР-ысь калык артист Геннадий Соловьёв.

Удмурт сценалы со 50 арзэ сётӥз.

1961-тӥ арысен ини со асьме учкисьёсты паймытъя но шумпоттэ аслаз быгатонлыкъёсыныз. Соин ӵош дышетскем артистъёс ваньзы яркыт кизилиос луизы: РСФСР-ысь но УАССР-ысь калык артистка Вероника Садаева, РСФСР-ысь дано но УАССР-ысь калык артистка Валентина Загуляева, РСФСР-ысь дано деятель, УАССР-ысь калык артист, Удмурт театрысь валтӥсь режиссёр Леонид Романов. Озьы ик соосын одӥг курсын дышетскемын Удмуртиысь калык писатель, Удмуртиысь Писательёслэн огазеяськонэнызы кивалтӥсь, драматург Егор Загребин, Удмурт Республикаысь калык артист Юрий Яковлев, УАССР-ысь дано артистка Полина Ухова, Удмурт телевидениысь тодмо режиссёр Василий Иванов.

Дышетсконзэс йылпумъяса, егит артистъёс Удмурт театре уно гинэ диплом ужъёссэс вайизы. Шумпотыса верано, со спектакльёс театрлэн репертуараз пыризы. Али ке но соосты возьмато. Ленинградысь театральной институтын йыр-визь люкам артистъёс соку ик одӥг кыл шедьтӥзы арлыдо эшъёсынызы – соослэсь азьвыл та институтын ик дышетскем артистъёсын. Егитъёс театрысь артистъёсын ӵош пуктӥзы Егор Загребинлэсь «Тулыс зор» пьесазэ. Спектакль синмаськымон усто пӧрмиз, учкись но сое шуныт пумитаз. Удмурт театрлэн сцена вылаз сое 31 пол шудӥзы ини.

Мыным удалтӥз: гожъясько сыӵе артистъёс сярысь, кудъёсыныз пичи но егит дырмы ӵош ортчиз, бӧрысь, быдэ вуыса, Удмурт театрын ужаны кемдӥз. Геннадий Соловьёв артистэн театре ужаны лыктэме бере тодматски. Куке Ижын культурая училищеын (али со колледж), режиссёрско-театральной специализация предметэн чебер вераськыны дышетыкум, ӵемысь ӧтчай театръёсысь артистъёсты. Со муген ик ми доры вуиз Геннадий Соловьёв но: чебер, ӝужыт, егит, сьӧд бабля йырсиё. Бӧрысь мон артистлэсь трос спектакльёсын шудэмъёссэ адӟи.

Геннадий Капитоновичлэн тужгес но яркытэз ролез – С. Широбоковлэн «Ой, чебер нылъёс» комедиысьтыз Гирой. Капчи мылкыдъем но кильтро сямо удмурт Дон Жуан сереме усе: кыкез ик дусымъёсыз туганзылэсь берытскизы, кулэ ӧз каре. Мазэ-созэ валатэк, ымнырыз кузялэс луыса, мискинь Гирой интыяз ик сылыса кыле. Та комедия пуктэмын вал 1969-тӥ арын искусство удысысь сиё-дано ужасен Г. Веретенниковен.

Егит дыръяз ик Геннадий Соловьёвлы алама сямо муртъёслэсь рольёссэс шудыны оскылӥзы. Кылсярысь, А. Вампиловлэн «Кылем гужем Чулимскын» спектакляз со шудӥз Мечеткинэз: та воргоронлы номыр уг кельшы, кылзэ верась но ӟургетӥсь бухгалтер льӧль малпанэн улэ, кузпал басьтыны егит нылашез турттэ. И. Гавриловлэн «Кезьыт ошмес» пьесаяз Геннадий Соловьёв озьы ик быгатыса шудэ Юска кулакез. А. Григорьевлэн «Эмезь кисьмаку» спектакляз – валтӥсь агрономлэсь Харитонлэсь рользэ. Учкись азе потэ укыр йӧно кивалтӥсь, отын ик со ёрос йыръёс азьын ассэ шузиен возьматэ. Харитонлэсь сямзэ Соловьёв туж мур возьматӥз, гурт адямилэсь пуш дуннезэ ас сяменыз кыре поттыны тыршиз.

Мон малпасько, йӧнтэм сямо геройёсты шудыны трослы секытгес. Но Геннадий Капитонович вань рольёссэ мыло-кыдо шудэ, соослэсь сямъёссэс учкисьлы кыӵе вань сыӵеен возьматыны тырше.

Геннадий Капитонович шудӥз комедиосын, трагедиосын но драмаосын. Музон артистъёслэсь со висъяськылӥз небыт, валамон но чебер вераськеменыз, аспӧртэм куараеныз, вирсэрлы луэменыз, сцена вылын капчи шудэменыз. Котькуд рользэ возьматэ озьы, валаса но уд вуттӥськы, учкисез улон ӧраз кожытэ, оломар сямен аслаз пуш дуннеяз выйытыны быгатэ. Кышкасьтэм, дӥсьтӥсь, яратӥсь…

Кылсярысь П. Блиновлэн «Улэм потэ» спектакльысьтыз Омелез, вань сюлэм шунытсэ поныса, шудӥз. Учкись понна со вунонтэм кылёз.

Е. Загребинлэн «Эш-Тэрек» спектакляз Геннадий Соловьёв быгатыса шудэ Салихан булгар ханэз, сое адӟыса, выльысь но выльысь паймоно артистлэн талантэзлы: чебер но яркыт дӥсез сое эшшо но йӧно каро. Кескич, алама сямо хан, бускельёссэ – удмуртъёсты – киултыны турттэ. Но сук сямо воргорон со вакытэ ик, атай сямен, ненег но кужмо яратыны быгатэ аслэсьтыз Алсу нылзэ.

Кӧня ке ар талэсь азьвыл, артистэн кенешыса пукыкумы, мон солы аслэсьтым малпанме верай: асьме театр М. Шолоховлэн «Тихий Дон» книгаезъя спектакль пуктысал ке, Григорий Мелеховлэсь рользэ тӥ кадь усто шудӥсез ӧй луысал, дыр. Геннадий Капитонович мон шоры кескичак гинэ учкиз но, мыняк потыса, шуиз: мынам но сюлэмам сыӵе малпанэ пуке.

Собере артист мыло-кыдо тодаз вайиз Ленинградын дышетскон аръёссэ: ми, пе, институтын ӵемысь пумиськылӥмы Григорий Мелеховез шудӥсь студентэн Пётр Глебовен, соин огпол гинэ ӧм вераськылэ киноын шудэмез сярысь но. Пётр удмурт пияшлы шуэм: тон быгатысалыд, дыр, Мелеховез шудыны, тусыд но, мугорыд но солы тупамон.

Но Геннадий Соловьёвлы та малпанзэ быдэстыны кылдымтэ. Ма солы гинэ-а? Тросэзлэн артистъёслэн чебересь малпанъёссы улонэ пыӵатэк кылё.

* * *

Геннадий Капитонович вордскемын Алнаш ёросысь Котнырпочинкаын. Со пумтэм яратэ вордӥськем палъёссэ, гажа отын улӥсь но ужась калыксэ. Солэсь быгатыса шудэмзэ адӟемзы потыса, чидатэк витё. Ма Алнаш палъёс гинэ-а? Геннадий Капитоновичез ярато Удмурт шаерысь котькуд гуртын.

Артист сяна, Геннадий Соловьёвлэсь ӟеч зоотехник но пӧрмысал, дыр. Ас вакытаз со Асанысь совхоз-техникумын дышетскиз. Собере егит специалистэз ужаны келязы Ува посёлоке. Отын со ёросысь гурт удысъя управлениын тыршиз. Пияшлы быръем ужез лазеггес потӥз, улоназ мар ке уг тырмы кадь, дышетскыны пырон понна экзаменъёс сётъяз военной училищее. Но улон Соловьёвез чылкак мукет ӧре вуттӥз…

16-тӥ феврале аслаз юбилей ӝытаз Геннадий Соловьёв шудоз яратоно рольёсыз пӧлысь одӥгзэ – башкир драматурглэн Ф. Буляковлэн «Бызьыны вуэм песяйёс» драмаысьтыз Абдуллаез. Та драма 20 ар ӵоже ини Удмурт театрлэн сцена вылысьтыз уг ышы. Калык сое яратэ, мыло-кыдо учкыны ветлэ.

Юбилярез ӟечкыланы вуозы эшъёсыз, матысь ӵыжы-выжыосыз, гуртоосыз, творчествозэ яратӥсьёсыз. Ваньзы ӵош соос пусъёзы артистлэсь 80 арес тырмонзэ но Ленинградысь театральной институтын дышетскемез дырысен 50 ар тырмонзэ. Геннадий Капитоновичен ӵош дышетскем артистъёс тодазы ваёзы дышетӥсьёссэс, кудъёсыз удмурт нылъёсты но пиосты дышетӥзы театрез яратыны, сцена вылын астэ возьыны, улыны, ужаны.

Артистлэн сцена вылын быгатыса но трос аръёс ӵоже мыло-кыдо шудэмез узырмытэ Удмурт театрлэсь улонзэ но историзэ.

Тазалык тӥледлы, Геннадий Капитонович!

Анна Евсеева.

«Улон-шудон» спектакльысь суред.

Соос артэ ке, ымнырысьтызы серекъян-мынян уг бырылы. Кыкназылэн но синъёсазы шуд пырыос чиляло. Ватыны сое нокызьы но уг луы. Ма, кулэ но ӧвӧл: соослэн шудо луэмзы артысь адямиослы шуныт но югытлык ваё.

Удмуртиысь дано артистъёс Валентина но Игорь МОИСЕЕВЪЁС асьсэ сярысь верало: милемыз валтэ яратон.

Театре соос пӧртэм аръёсы лыктӥзы. Валентина, Москваысь ГИТИС-эз йылпумъяса, театрын ужа ни вал. Нош Игорь школа бере армиын служить кариз, собере гинэ Москваысь Щепкин нимо вылӥ театр училище пыр потӥз.

Валентинаез Игорь солэсь азьло синйылтӥз вал ини. Егор Загребинлэн «Эн кушты монэ, туганэ» спектакляз Валя Чернова огзэ героиняез шудӥз. Пияшлэн, сое адӟыса, сюлэмыз ик интыысьтыз, оло, вырӟиз. Нылашлэсь тусбуйзэ вунэтыны ӧз ни быгаты. Училищезэ йылпумъяса, ужаны театре вуэмез бере ини, Черноваен тодматскиз. Со вакытэ Валя тодмо артистка вал ини. Кӧня ке дыр ортчыса, Игорь Валялэсь кизэ куриз: Чернова луиз Моисеева.

Игорь Моисеев театрын ассэ котыр ласянь ӟечен возьматӥз. Режиссёръёс, быгатонлыксэ шӧдыса, котькудаз сямен спектакле ӧтё. Зэм ик но, А. Шкляевлэн «Дор» пьесаяз со быгатыса шудӥз операторез. Е. Шварцлэн «Тайны лесного царства» выжыкылаз – нюлэс Коркаез. Моисеев котькуд роляз, образаз быгатыса пыре. Учкись сое яратэ но гажа. С. Широбоковлэн «Ой, чебер нылъёс» комедияз, крезьгурзэ гожтӥз Н. Шкляев, Моисеев шудӥз Гироез, кудӥз егит, чебер Сонялэсь кизэ куре. Г. Романовалэн но А. Сергеевлэн «Шунды-Мумы» драмаязы быгатыса шудэ агайзэ но калыксэ вузась Гореез. Ваче пумит пуктыны луэ чылкак мукет ролез – Анкиловлэн «Солдатская вдова» пьесаезъя спектакльысь калыксэ гажась но яратӥсь Григориез.

2000-тӥ арын март толэзе «Айна» крезьгуро драмалэн (И. Гавриловлэн пьесаезъя) премьераез ортчиз. Солэн авторез Т. Чернова, режиссёрез В. Ушаков, крезьгурзэ гожтӥз Н. Шабалин. Игорь Моисеев отын Айнаез яратӥсь Бурашез шудэ. Бурашлэсь но Айналэсь яратонзэс турка Артан нимо пияш. Со но куанер семьяын будэм нылашез сюлмысьтыз яратэ. Но Артанлэн узыр анай-атаез музон нылэз, ванё-буро семьяысь, кен курало. Валамон ини, та герӟетысь потон понна одӥгезлы яратӥсь сюлэмлы улонысь кошконо луэ. Пиос угось ог-огзылы сюрес уг сёто. Ваче пумит султо. Котькудӥз аслаз шудэз понна жугиськыны дась. Моисеевлэн быгатыса шудэмез учкисез паймытӥз.

Айнаез шудӥз Валентина. Игорь шуэ: спектакльын шудыкум, мон Айна понна гинэ ӧй ожмаськы, нюръяськи яратоно Валяе понна. Соин ик кузпалъёслэн сцена вылын юромо шудэмзы ӧз шӧдӥськы, соос зэмос улонэз возьматӥзы, кожалод. Ма, мыным котьку но капчи но умой шудыны Валяен, шуэ Игорь. «Дочь русского актёра» водевильын Валя Верочкаез шудӥз, нош Игорь – Ушицаез. Геройёс вискытӥ сьӧд коӵыш ортче. Соослэн ог-огзэс валанзы тӧлӟе. Но Игорен Валентина солы уг сётӥсько: улонын соослэн озьы луыны кулэ ӧвӧл.

Валентина Моисеева кызь ар ӵоже витьтонлэсь ятыр рольёсты шудӥз. Соос пӧлысь тужгес но висъяны луысал В. Колпаковлэн «Слон» спектакльысьтыз Дашаез, С. Широбоковлэн «Ой, чебер нылъёс» пьесаысьтыз Тоняез. Мусо, ненег, чебер куараё актриса котьку но рольёссэ быгатыса но яркыт шудэ. В. Ушаков режиссёрлэн «Италмас» кинофильмаз со валтӥсь ролез шудӥз. Озьы ик со ассэ зэмос артистэн возьматӥз П. Захаровлэн «Эбга» трагедияз но Т. Черновалэн но В. Ушаковлэн «Айна» спектаклязы. Солэсь шудэм рольёссэ вераса уд быдты. Озьы Валентина Михайловна трос шудэ выжыкылъёсын.

Мынам малпамея, артистка туннэ быдэсак ӧз на усьтӥськы. Ачиз но со та пумысен вера:

- Уг поты, роль сётэмзэс возьмаса, огшоры пукеме. Потэ мар ке но выльзэ утчаме, шедьтыны сыӵе режиссёрез, со мынэсьтым быгатонлыкме шарае поттыны мед пӧрмытоз.

Та ласянь Моисеев кузпалъёслы алигес удалтӥз. Талантсылэсь аспӧртэмлыкъёссэ шӧдӥз но усьтыны юрттӥз егит режиссёр Алексей Ложкин «Улон-шудон» спектакльын (Ю. Поляковлэн «Одноклассники» пьесаезъя). Игорь шудэ узыр ужбергатӥсез Виктор Черметовез – кас сюлэмо адямиез. Сое возьматонъяз артистлэн ветлэмез, выросъёсыз ик воштӥськизы, ымныраз лек тус пыӵаз. Со вӧзын Валентиналэн героиняез – куке но чеберайёслэн конкурсъёсазы вормылэм Анна Фаликова – номыр сярысь сюлмаськисьтэм бубыли кадь адӟиське, дугдылытэк гольтыръяське. Но кыкназылэн со синпӧет гинэ. 40 аресъем адямиослэн туж пыдлон пушказы ватӥськемын пичи дырысь югыт малпанъёс-осконъёс.

Туннэ Моисеевъёс пыро Удмурт театрысь валтӥсь артистъёс пӧлы, учкисьёс соосты тодо, ярато. Но Валентина но Игорь таин гинэ уг буйгатско, ялан утчасько, бугыръясько.

Асьсэ кадь сямо, ужез яратӥсь пи будэтӥзы. Никита, пичи дырысеныз артистлэсь улонзэ адӟыса, будӥз. Сцена вылын юморескаос лыдӟиз, эктылӥз.

Табере Никита Москваысь Щепкин нимо вылӥ театр училищеын дышетске. Куинь ар ортчыса, Удмурт театре зэмос артист луыса бертоз. Анай-атаезлэсь мытэм ужзэс азинтоз.

Анна ЕВСЕЕВА.

Та конкурс ортче кык арлы огпол, туэ со ньылетӥзэ луоз ини. Фестивале пырисько шаерысьтымы искусствоосъя нылпи школаосысь усточиос. Таџе ужрад пиналъёс пӧлын театр искусствоез азинтыны, нылпи театр коллективъёсты ог-огенызы тодматыны, эшъяськытыны но быгатонлыкъёссэс волятыны юрттэ.

Культура удысысь ужасьёслэсь тодон-валанзэс будэтонъя центрлэн кивалтӥсезлэн воштӥсез Галина Дресвянская верамъя, фестивале пыриськыны мылкыд каремзэ вераз ини 25 коллектив. Конкурс радъяськоз ньыль номинацияя: драма, крезьгуро, хореографияя спектакльёс но театрлэн куронъёсызъя пуктэм представление. Асьсэды возьматыны вуозы Дэри, Алнаш, Каракулино, Кияса, Яр, Воткинск, Ува, Глазов ёросъёсысь коллективъёс но Ижысь искусствоосъя нылпи школаосысь усточиос.

- Дас крезьгуро спектакль, сизьым представление, вить драма, эктонъёсын куинь постановка но одӥг опера дасязы коллективъёс. Кылсярысь, Ижысь искусствоосъя 2 номеро школа дасяз кык спектакль. Огез сӥземын мультфильмъёслы, мукетыз – Майкл Джексонлэн пичи дырызлы. Тунсыко постановкаен вуозы кыкетӥ фестивальын вормисьёс – Вотка ёросысь Новый посёлокысь егит усточиос. Алнашысь нылпиос возьматозы опера. Нош Ижысь искусствоосъя 13-тӥ школа 56-тӥ гимназиен валче дасязы «Дауръёс пыр» удмурт представление. Пусйыны кулэ, спектакльёс арысь аре золэсьгес луо. Усточиос но соослэн дышетӥсьёссы тема но репертуар асьсэос быръё, – шуэ Галина Михайловна.

Ватсано: тросэз нылпиос нимысьтыз театр студиосы, кружокъёсы уг ветло. Но спектакльёсын, сценкаосын шудыны соослы туж кельше. Куд-огъёсыз татчы нырысьсэ уг лыкто ни. Пӧртэм ёросъёсысь луэм сяна, усточиослэн арлыдзы но пќртэм. Спектакльёсын шудо 8 аресысен 17 аресозь нылъёс-пиос.

Дунъясьёс учкозы шудӥсь-ёслэсь быгатонлыкъёссэс, режиссёрлэсь ужамзэ, крезьгуро оформлениез но артистъёслэсь костюмъёссэс. Вормисьёс пусъемын луозы дипломъёсын.

Галина Семёнова.