Эх, пие, макем мон янгыш тон азьын! Нуналлы быдэ вӧсь карисько тонэ. Но оскы: ачим но валатэк, вӧсь карисько!

Мынам ноку тодам уг лыктылы: тыныд вить арес гинэ ай. Ӵукна, уже бере кылемелэсь кышкаса, тонэ зурк-зарк сайкатӥсько. Назьылляськемед потэ шуыса, уг ик малпаськы. Кемагес посӥськиськод ке, шобреттэ вылысьтыд соку ик кыскисько но, мугорыд салкым коркан соку ик «ӟазег куэн» шобыртӥське. Кынмемедлэсь курдаса, тэтчыса ик султӥськод, дӥсьтэ утчаны кутскиськод. Тыбырад вешаны тодам но уг лыкты. Соку ик султыны уг яра, погылляськоно кӧня ке шуыса, эмъясьёслэн алэмзы но кемалась вунэмын ни.

Соку ик мисьтӥськыны уллясько. Ву шапыкъёстэ пазяса кельтӥськод ке, сюлэмам олокытысь вожпотон бугырске. Мучоло чалмыт кутэм но адӟымтэ дыръяд ӵушалтэм интые, кымесад тэшкыльтӥсько но куаретӥсько: чылкытгес луыны ку дышод, ӵӧж?

Кымесысьтыд гордэктэмез бырыса уг вуы на. Оло куалектэменыд, оло дыртытэменым, гадь вылад уськытӥськод чай шапыктэ я ӝуктэ. Мон нош ик урмисько. Тусьты-пуньыдэ ик азьысьтыд ишкалтӥсько. Вылаз ик – «парсь» шуисько.

Озьы, пие, озьы, «мусое», «дуное» шуэм интые, мон тонэ «парсь» карисько. Нылпи садысь ӝыт басьтыкум, тон монэ куддыръя шумпоттыны выриськод ас киыныд кыӵе ке лэсьтэм чачаеныд. Пичи кикыосыд туж чебер лякылыны выриллям машина. Нош мон шораз но уг учкиськы. Секыт ужам бере йыр жон! вазе, одӥг гинэ малпанлы отын интыез вань: табере ведь тае маин ке сюдоно на. Нош тон весь ёртӥськод: чебер-а, атай, лэсьтӥ? Будэтӥськод на: мон сое тыныд кузьмасько, тынэсьтыд машинадэ лэсьтӥ. Кельше-а? Нош мон, пал синмын но шораз учкытэк, кеськисько: пыд улын эн костаськы! Тон, номыр куаретыны дӥсьтытэк, кытчы ке огшаплы ышиськод. Пыд улам, зэмен ик, уд костаськиськы ни. Но тыбырыным шӧдӥсько: ӧс сьӧрысен лушкем учкылӥськод шорам. Тон астэ янгышен шӧдэменыд, ачид но валатэк, ӧс мышкысен уӵеръяськод. Нош мыным йӧтэ: чакла таид выросъёсме. Уката урмисько: мын коть телевизор учкы! Телевизор адямиез воштоз, шунытсэ кузьмалоз кожасько, лэся.

Тынад монэн вераськемед потэ. Кызьы нуналыд ортчиз – мадьыны кутскиськод. Сиськондэ ик вунэтыса. Группаысьтыды ик кыӵе ке нылашлы синмаськи, шуид вал кадь. Юаны вырид: чупаськыны яра ни-а? Валэктонме возьмад. Нош мон, мар вазьыны паймыса, оло, юандэ воксё но пель сьӧртӥм лэзьыса, кеськи: сиськыку уг верасько – гуньдод!

Ӝыт но мон уг юалляськиськы тынэсьтыд номыре. Вӧзад выдӥсько но куаретӥсько: кӧл ни, бучыра. Выжыкыл лыдӟыны гинэ но куддыр ӟигары уг тырмы. Книга лыдӟонъям одӥг-ог ачим умме усисько. Бератаз сайкасько тынад маяллямедлэсь, монэ чупамедлэсь. Возьыт луэ но тэтчыса кошкисько. Нош ик вазисько: кӧл ни, ослоп! Мукет сэреге потыса, ачим кема дыр ӵоже кылӥсько на солань-талань берыкъяськемдэ. Соку но дорад уг мынӥськы. Курдасько: нуныяй ке, зэмос пиосмуртэ тынэсьтыд будэтыны уг быгаты, ныл кадь эркияськись луод. Ачим огпол ке но тонэ рос-прос вешасал ке! Огпол но рос-прос ӟыгыртыны но уг валаськы. Нодтэм мон.

Нош тон, нунал вордӥське ке, весь бордам йӧттӥськыны-няняськыны выриськод. Но мынам шутэтскон нуналъёсы но тонэ алвылам пуктылыны дыры уг тырмы. Аслым юртъер котырын весь кыӵе ке уж шедьтӥсько. Тон нош ик я кортӵог мыным ваёд, я пуме кутыны юрттод. Кияд шырпу пырыку но, тонэ жаляны уг валаськы. «Ачид янгыш» шуисько но тонэ уллясько. Нырдэ кысканы кутскиськод ке, кеськисько на: бӧрдыса утча – тышкало! Кошкиськод. Жугемелэсь курдаса ик, оло, воксё син азьысьтым ышиськод.

Нош туннэ, туннэ мон воксё куашкатӥ тонэ, пие. Эшъёсыныд шудӥськод вал. Ньыльпыдесъяськыса ик машинаяд луо тыриськод. Юлтошъёсыдлы ушъяськиськод: учке ай, кыӵе чебер машина мыным атай басьтӥз. Алдаськод тон соосты. Ӵужапаед кузьмаз со чачаез тыныд. Мынам шудонъёс утчаса ветлыны дыры ик ӧвӧл. Озьы ке но тон эшъёсыд азьын монэ Инмар чот кариськод. Нош мон тонэ соос азьын ултӥясько. Туннэ ачим но валатэк кыли шорад кеськемме: «Кин ньыльпыдесъяськыса шудэ, парсь? Астэ уксё поттыны лэзё ай калготки кесямед понна!»

Озьы шуи но дыбыр-колтыр пыри доре. Газет лыдӟон борды пукси. Кылӥ: тон но сьӧрам. Азям султӥд гинэ – мон лек вази ни: «Мар кулэ?» «Пие» шуыны но ымы ӧз пыры. Нош тон, лекме кылытэк кадь, бордам ӟыгырскид но шуид: «Атай, яратӥсько мон тонэ». Мон тонэ соку но палэнтӥ. Уг ваньмиськы, шуи. Тон нош ик шыпыт кошкид.

Пие, вождэ эн вай мыным. Берыд ышемед бере гинэ валай кадь «яратӥсько» шуэмдэ. Соку гинэ йырам пыризы кадь со мусо кылъёсыд. Но соку но сьӧрад ӧй поты, ӧй суты, ӧй ӟыгырты тонэ. Али гинэ тани дӥсьтӥ вӧзад пуксьыны. Но тон изиськод ни. Тон номыре уд шӧдылӥськы. Нош мынам бам вылтӥм гылӟо синвуосы.

Пие, простить кар шузи атайдэ. Мон весь вунэтӥсько: тыныд вить арес гинэ ай. Тон бадӟым адями ӧвӧл на ваньзэ соку ик шонер но быгатыса лэсьтыны. Асэным ӵошатӥсько, лэся, тонэ. Ачим кадь соку ик луыны кулэ, кожасько: саптаськытэк сиськись, лушкем лыдӟиськыса пукись, ужась. Ачим ваньмызлы соку ик дышысал ке! Аслэсьтым пичи дырме воксё вунэтӥськем ни. Нош тынэсьтыд но шаянгес вал. Тусьты-пуньыез но пильылӥ, атайлэсь уксёзэ но лушкалляй. Мон али ке но янгышъёс лэсьтӥсько на.

Но, пие, кылме сётӥсько: ӵукнаысен монэ уд тодма ни. Тупатско. Одно тупатско! Мон тонэ ноку уг пыкылы ни. Мон яратӥсько тонэ.

Елена Сараматова.

Магазинын вить-куать мурт сылэ. Параска чырткемъяськиз но ӧйтӧд кудзылэсь юаз:

- Мар-о Наталь сомында басьяськиз ай, вань товардэс ӧз быдты-а?

- Толон гинэ вуз вайизы, ваньдылы тырмоз, – коньдон чотанъяз шуиз продавец Валя.

- Али ик нуны сюанлы дасясько ни шат? Кензы, пыд азьзэ адӟытэк, мырдэм ветлэ ни, – йыркуро куаретӥз нылкышно.

- Нош тынад йыртышкад йӧтэ, о-о, Парски, Володя Зинадэ кулэ ӧз кары но бускель гуртысь Любаез басьтӥз шуыса, – будэтӥз вуз карись.

- Нош тон кылдэ уд шӧдӥськы чик, – вожез потыса ик, кутскиз танӥськыны Параска. Собере гань-гань куаретӥз: – Уг, воже уг поты, Зинае солэсь устогес карт шедьтоз ай. Со мынам чебер но, визьмо но. Нош со Любазылэн не тус аслам кадь огшорыгес, не мугор боды кадь, сандыкез но, пе, буш вал. Мынамезлэн пирданэз кык машинае но уз тэры.

- Однако пирданэн но кулэ ӧз каре кадь дыдыдэ, – серектӥз бускелез.

- Мыскыллялэ, ойдо, адӟом ай, кин шудо луоз, нош кин бӧрдоз, шӧдтэк ум кыле, дыр, – шуиз параска но укно пала берытскиз. Черодэз вуытозь, со нокинэн но ӧз вераськы ни. Со куспын лавкае Натальлэн бускелез пыриз. Кыллы бырем Нина чан-чан куараеныз кутскиз:

- Умоесь-а, кенакъёс, выль ивор тодэмды потэ-а?

Магазинын сылӥсь кыш-

ноос коӵоос кадь ымзэс усьтӥзы, Ниналэсь верамзэ возьмаса.

- Татчы лыктыкум, Микол Натальёс дорысь «Скорой» кошкиз. Любазы шугектэм.

Параска пельёссэ сак кариз. Ас понназ малпаз: кыӵе усто учыр тупаз ай.

- Параска апай, мар басьтод? – кышномуртлэсь малпанъёссэ куспетӥ кариз вуз карись.

Нылкышно огшап шып сылӥз но, уксётэк лык-тӥськем шуыса, лавкаысь пырс потӥз.

* * *

Параска гушъяса-гушъяса ик нюк улысь ошмес дуре васькиз. Гуртоос татчы гужем ӵем ветло: вулы но, миськем арбериоссэс гылъяны но. Нош толалтэ кожасез ичи. Параска бушатӥз ведра пуктон инты. Дорысьтыз дыртыса потӥз, лымы мычон лопата кутыны йыраз ӧз лыкты. Секыт шуыса, ведраоссэ пачыл-пачыл ӧз тырмыты, корка дорозяз кыдёкегес ик мыноно уго. Но таӵе муг шедьыку, со кык-куинь иськемез но ортчыны дась.

- Параски, толалтэ куазен ошмесэ васькад шат, колонкады кынмиз-а, мар-а? – вазиз пумитаз сюрем кышномурт.

- Кынмем, лэся, – йырзэ ӝутъятэк, шуиз со.

- Ма, милямаз ву бызе, кож вал татчы, – уг дугды бускель урамысь кенак.

- Тӥляд вуэныды чай ческыт уг луы, напез но уг поты, – будэтӥз Параска, пумитаз шедем адямиез ас понназ тышкаськыса: мар ужез, кытысь мон ву вайисько, солэн пельпумъёсыз уг жадё ук, акылес боды.

* * *

Любалэн кӧтыз вандэм кадь вӧсь луэ. Огшаплы лэзе но нош ик кырме, азьвыллэсь но зол шымыртэ. Врач учкиз но кышномуртлы шуиз, вазь на ай, пе, чида. Нош кызьы сыӵе вӧсез чидалод? Кӧй мугоро акушерка, зӧк чиньыоссэ позыръяса ик, Любалы шуэ:

- Нырысьсэ вайисьёс кема курадӟо, ӝытозь уд ворды на.

Выль кенлэн синвуосыз ик потӥзы, нош трактор мугоро акушерка серектӥз гинэ:

- Пиосмурт улэ выдыны гинэ капчи, соку ӧд бӧрды, дыр, табере чида.

Палатаын Любаен ӵош улӥсь нылкышно шуиз:

- Эн кылзы со пересь куткаез, ассэ нокин кышно басьтымтэ но лексэ асьме вылэ кисьтэ. Тон выдыса эн кылльы, кызьы умой, озьы ик кариськы: сылыса-а, ветлыса-а. Кӧтыд ӵемгес но ӵемгес вӧсь луэ ке, озьыен, ӝоген ваёд ни.

Нош ӝытазе кӧй акушеркалы но серем ӧй вал ни, врач но бызьылӥсь луиз. Соос ӧз валалэ, малы Любалэн пиналыз вордӥськыны уг вормы. Нуны укыр бадӟым ӧвӧл, пачкамын ӧвӧл, анайлэн вуосыз кошкизы, нош пиналлэн югыт дуннее потон тодаз ик ӧвӧл. Люба ӧз шӧды ни, кызьы сое операционное нуизы. Врачъёс нунызэ кӧттӥз поттоно кариськизы. Но татын но егит анайлы ӧз удалты, Любалэн вордскымтэ нылыз пушказ кулӥз. Наркозлэсь сайкам кышномуртлы врач вакчияк шуиз:

- 20 ар ужатозям, таӵе учырен пумиськылэме ӧй вал на. Ваньмыз чакламъя мынӥз кадь, нош пӧрмиз тӥни кызьы. Нуныедлэн гогыез чырты котыртӥз кык пол бинялскем, соин ик кеказ, луоз.

Кыӵе кышкыт кылъёс. Соосты валаны Люба ӧз быгаты. Кызьы озьы, укмыс толэзь ӵоже витем нуны кулэ? Малы, кин янгыш, мар табере кароно? Люба быдэс уйзэ бӧрдыса ортчытӥз. Нырысь нунызэ жаляз, собере ассэ, бӧрысь картсэ. Кызьы со Володяезлы вералоз, пиналзы лултэм вордскиз шуыса?

* * *

Люба ньылетӥ нуналзэ кылле ини нылпи ваён юртын. Кӧня улэ ни, сомында ик бӧрдэ. Нунызэс нонтӥсь анайёсты адӟе ке, гадьёсыз тыро, нош сюлэмзэ ныж пуртэн вандо кадь. Нылыз кулэм сяна, кышномуртлэн аслаз но тазалыкез чутыны ӧдъяз. Вир кошконзэ врачъёс нокызьы но дугдытыны уг быгато. Капельница пуктыло, уколъёс бышкало, пичияк умой луэ кадь, собере нош ик вир кошке. Люба нуназезэ кызьы ке чида ай, нош уйин коть чир черекъя. Кызьы укно сьӧрын кезьыт тӧл вузэ, Любалэн лулыз но озьы ик бӧрдэ. Уйвӧтъёсаз пичи нылзэ адӟе, сыӵе мусо, чебер, таза кадь со. Нош кылем уй валантэм вӧтаз. Гуртазы кадь со. Бускель урамысьтызы Параска соос доры тэркы трос шуэн лыктэм но Любаез куно карыны выре. Ме, пе, си, юри тыныд шуыса бичай. Выль кен пыкиськыны выре, шуэз уг яратӥськы, чырс потэ, шуэ. Нош арлыдо кенак вань шузэ корка котыртӥ пазяз но серекъя: э-э, гыдыке, та шу шоры учкыса, эк, шу, шуод ай. Параска кошкиз, нош лымы вылэ пазьгем шу гурыос, вир шапыкъёс кадь пиштыса, кылизы.

Ӵукнаяз врач Любаез учкиз но шуиз, Иже келяно, дыр, тонэ. Тазьы ик виред кошкиз ке, кема ӧвӧл ачид но нуныед сьӧры кошкод. Вань одӥг амал, но соку ноку но пинал вайыны уд быгаты ни. Шутэтскон нуналъёсы чаклалом ай, ӧз ке ортчы, Иже келялом.

Люба бӧрдыса палатаяз пыриз. Эшез солэсь верамзэ чал-чал кылзӥз но шуиз:

- Мон ачим татысь, Кизнерысь, нош быземын Киров улосысь Уржуме. Отын туж тодмо туно улэ, пор песянай, ми палан сое Такъян гинэ шуо. Тон, дораз ветлыса, утча вал. Больница юрттыны уг быгаты бере, оло, солэн пайдаез луоз. Талэсь уродгес уз луы ни.

- Кызьы сокеме мыном? Мынам вамышъяны но ӟигары ӧвӧл. Собере уг оскиськы мон туноослы.

- Ӵуказе кӧснунал, обход ӧвӧл, карттэ машинаен ӧть. Процедураос бере пуксёды но кошкоды, ӝытозь вуоды ук. Татын медаз тодэ. Кузпалыд сьӧраз тыныд дӥськут мед кутоз.

* * *

Володя пумит ӧз луы. Укмыс час котырын соос сюрес вылын вал ини. Кыксы ик шып мынӥзы. Люба ӧз тоды, мар сярысь вераськыны, нош картэз ӧз вала кудлань вазьыны, кышноез медаз ӝожомы шуыса. Озьы ик ортчизы кузь сюресэз.

Кулэ коркаез шедьтыса, Люба туно доры пыриз. Арлыдо кышномурт гур азяз берга вал. Сьӧрлось кунолы со чик ӧз паймы кадь.

- Лыктӥд бере, чаль татӥгес, мар ӧс дорын сылӥськод. Ойдо чай юом. Мон туннэ шуэн перог пыжи. Анае шунянь туж яратэ вал. Война вылтӥ уго сиён туж ик ӧй вал. Мемей нюлэскы ветлоз но та горд емышъёсты бичалоз, собере я шу кисаль пќзьтоз, я шуэн пыжиськоз. Солэсь но ческыт сиён ӧй вал кадь, – тодаз вае туно.

Люба ӟигартэк лэзиськиз пукон вылэ. Нош Такъян апай со шоры уг ик учкы. Чай лэзён куспаз шуэ:

- Нылыдлы Такъян ним пон, ява, чукыныны но эн вунэты.

Любаез чабкизы кадь. Кыӵе туно со, уг ке адӟы, нуныез али гинэ кулӥз шуыса. Кышномурт ымзэ усьтӥз ни вал. Туно куспетӥ кариз:

- Сюресэд кузь, чайдэ ю но мынэ бертэ.

- Мон татчы чай юыны ӧй лыкты, – ӝожомиз Люба.

Такъян выль кен шоры кема учкиз, Любаез со синъёс сӥсъязы кадь. Собере туно ӝӧк вылысь шунянез басьтӥз но шуиз:

- Тани та пыжиськемез машинае пуксемед бере ик си, огкутскемен копаксэ…

* * *

Параскалэн мылкыд тулыс нунал кадь. Капказьзэ мычыны потӥз но, бускелез Орина шуэ:

- Параски, кылӥд-а, Микол Володяослэн нунызы арам луэм, лултэм, пе, вордскем.

- Чик уг паймиськы, муртлэн синвуэз сьӧлыктэм пинал вылэ усиз, луоз. Володялы луыса Зинуке кӧня бӧрдӥз. Табере ачиз мед вузоз. Со гинэ мар, кышноез нуныез сьӧры кошкоз ай, адӟод, – вазиз кышномурт.

- Остэ, Параска, мар сыӵе вераськиськод?

- Мае тодско, сое ик верасько. Малы, кожаськод, мон тол куазен ошмесэ васькай. Как тодӥ, Любаез роддоме нуизы шуыса, соку ик вулы васькай. Ведраме тырмытӥ, доре вайи но тунгонай, Миколъёслэн выль кензы вордыны медаз вормы шуыса. Нош собере, кык нунал ортчыса, кыл вераса, вузэ кисьтӥ. Кызьы ошмесысь ву бызе, озьы ик Любазылэн вирез мед кошкоз шуыса, – верамзэ валатэк-а, ушъяськемез потыса-а, шуиз со.

Орина номыр ӧз куареты, вылысьтыз вылаз кирос тырыса, азбараз пыриз. Нош Параска, нокыӵе кариськытэк, капказьзэ мычиз.

* * *

Люба шуэн пыжиськемез кияз кема бергатӥз. Мар кароно: куштоно яке сиёно?

- Пӧраськемез яратӥсь-код ук, си, нуназе ортчиз ини, тон ке сютэм ай. Бурмон понна сиськыны кулэ, учкы ай, кыӵе начармид ини, – сюлмаськиз Володя.

Люба куаш куртчиз шунянез. Ческыт ик вылэм, яке кӧтыз сыӵе сюмаз-а? Сиськемез бере кышномуртлэн иземез потыны кутскиз. Сюрессы кузь бере, гань-гань кариськиз. Но час ортчыса, кӧтыз чутыръяны кутскиз. Нырысь каллен, собере золгес но золгес. Кышномурт, нуны вайыкуз кадь, курадӟыны ӧдъяз. Огшап озьы мынӥзы ик ай, собере Люба ӧз ни чида, машина трос ӝуштыны кутскиз. Картэз сюрес урдсы дугдӥз. Люба машинаысь гыж потӥз ини. Вӧсьлы чидатэк, нылкышно лымыын погылляськиз, собере ӧсконэз пӧсьтӥз. Картэз, мар карыны валатэк, Люба котыртӥ берга:

- Мон но мон ини, врачъёслы оскытэк, тонэ олокытчы нуи, малы кылзӥськи? Мар каром, татчы кулӥд ке, тонтэк мон но уг улы! Кытысь-марысь со туноез тодӥд, эмъян интые ведназ, дыр, – кузпалзэ ӝутонъяз кесяськиз Володя.

Нош Любалэн вераськыны ӟигарыз ӧй вал ни, ымдуръёсыз лызэсь, ачиз кӧдэктэмын, кымесаз пӧсям вуэз быльырамын. Пиосмурт сое машиналэн бер пуконаз выдтӥз. Больницаозь Володя лобаса мынӥз. Люба синъёссэ ӧз усья, одӥг-ог лулӟылӥз гинэ. Озьыен, улэп, кышноезлэсь шокамзэ кылзыса, ширтӥз Володя. Нылпи ваён юртын висисьсэс ыштӥзы ни вал. Картэз Любаез, ки йылаз ӝутыса, пыртӥз, нош машинаысь сидение вылэ вир пытьы кылиз. Врач урмыса кесяськиз пиосмурт шоры. Любаез со нырысь кулэмын малпаз, собере йырсазьзэ ыштэм кожаз, нош егит нылкышно изе вал.

…Кык час ортчыса, выль кен сайказ. Соку гинэ гань-гань шокчизы эмъясьёс но, Володя но, палатаын Любаен ӵош кыллись но, сое туно доры ыстэм нылкышно но.

…Нош ар ортчыса, Микол Натальлэн корказ нуны бӧрдэм куара кылӥськиз. Люба нылызлы Такъян ним понӥз. Нуны сюанэ соос вань бӧляксэс ӧтизы. Узыр ӝӧк вылын шуэн пыжиськем но вал.

Галина Савина.

Ашальчи Оки нимо премилэн лауреатъёсыз Р. Лаптева но Е. Лекомцева.

Нырысетӥ удмурт нылкышно кылбурчиез данъяса, 1994-тӥ арын «Удмурт кенеш» огазеяськон радъяз Ашальчи Оки нимо национальной премия сётонэз. Удмурт нылкышно кенешлэн 8-тӥ конференциез ортче ӵапак кылбурчилэн вордӥськем нуналаз. 27 лауреат пӧлы эшшо кык мурт пыриз.

А. Оки премиез сётонъя комиссилы (отчы пыре 11 адями) ужаны капчи ӧй вал. Угось лауреат ним басьтон понна вожвылъяськиз укмыс адями. Тамында ноку ќй вал на. Ваньзы ик нылкышноос быгатӥсесь, даноесь, ас удыссыя но, удмуртлыкез азинтонъя но синмаськымонэсь.

Комиссилэн ёзчиосыз тужгес трос куара сётӥзы Екатерина Лекомцева но Римма Лаптева понна. «Удмурт кенешлэн» исполкомез сыӵе быръёнэз умоен лыдъяз.

Та нылкышноос вор­дžськемын Кез ёросын. Римма Лаптева (Игнатьева) Удмуртиысь дано журналист, прозаик. Удмурт кун университетэз йылпумъяса, дышетӥсьын ужаз, собере Дышетӥсьёслэсь тодон-валанзэс будэтонъя институтын методист вал. Но гожъяськон мылкыдыз вормиз, ужаз «Инвожо» журналын но «Советской Удмуртия» газетын, али дораз гожъяське.

Газетын ужакуз, Римма Серафимовна трос саклык висъялляз социальной ужпумъёслы, семья улонлы, огназы кылемъёс понна «Тодматскон сэрег» кылдытӥз. Шуге-леке сюремъёс, инвалидъёс понна Лаптевалэн улон шоры сайкыт синмын учконэз, гожъяськон борды ӝабыр-ӝабыр басьтӥськемез котыр ласянь адӟем карымон.

Екатерина Лекомцева но ӧжыт уг лэсьты удмурт калыкез данэ поттон понна. Выльдӥськон вакытъёс кутскем бере ас кужыменыз басьтӥськиз крестьян хозяйство кылдытон борды. Гыбдась уж гомак пушйиз. Та дыре Кезэн артэ интыяськем Сосновый Бор гурт шаерамы гинэ ӧвӧл, кунгож сьӧрын но ӟеч тодмо. Туризмъя «Живица» куноян азбар быдэсак удмурт шӧмын пыӵамын. Вашкала культураен, сям-йылолъёсын, пӧртэм адӟытонъёсын тодматскем сяна, мылкыд карисьёс асьсэос но гурт улонлэн шӧмаз выйыны быгато.

Свердловск улосысь «Эгес» огазеяськонлэн ёзчиез, удмурт кылъя дышетӥсь Зинаида Кадрова; Яр ёросысь спортъя школаысь тренер-дышетӥсь Юлия Рудина; Пичи Пурга гимназиысь историяя дышетӥсь Римма Владимирова; та ёросысь ик Вуж Мӧнья школаысь удмурт кылъя дышетӥсь Екатерина Гагарина ӵектэмын «Удмурт кенешлэн» Данъян книгаяз пыртыны.

Лия Малых.

Ӵем шокаса, дӥнямы пыриз Валя эше. Кыл радлыксэ шедьтытэк, киосыныз ӧс шоры возьматэ:

- Отын, тӥни отын… выж пумын, атаед «Хондаяз» нелькиськем.

Шундыё куазен йыр вадьсам ӵашйиз кадь. Эмъясьёс часталы лэзизы, анаен палатае пырим. Атай шӧдӥз, лэся, лыктэммес. Аслад бере, аслад ини. Берпум кужымзэ люкаса, дыр, милемыз бордаз ӝиптӥз. Анайлы мар ке вера, валаны уг луы. «Нюра» кылыз гинэ висъяське. Бӧрысь киосыз туж каллен бӧз вылэ усизы. Мынам вирсэре чигиз кадь, бӧрдонэ пӧсьтӥз: «Атае, дуно атае! Сылыты на вал сэргын. Уг йӧнтэма ни. Ачид гинэ бурмы». Матысь адямие та кылъёсме ӧз ни кылы, шокамысь дугдӥз.

Улон ас ӧртӥз мынэ. Нуналъёс ортчо минутлы быдэ сюлмаськонэн: тазэ кызьы, созэ кытысь. Атайлэн тусбуез син азьысь уг кошкы. Оло, визь-кенеш дэмлалоз кожаса, калык пӧлын шара вераськыны ӧдъяй. Ачим но ӧй шӧды саташыны кутскемме. Валя саестӥм кыскем бере валатскисько вал. Нош анай? Солэн куэз ик ӵужалэс луиз. Бӧрдыса, лэся, синкабакъёсыз пыктылӥзы. Урод-а, ӟеч-а – аслаз картэз вал ук. Малпанъёсаз выйыса, калыкен вераськемысь дугдӥз. Куд-огез сое сонгро, кылӥсьтэм кожазы, дыр. Вож бадяр кадь мугорыз лабрес беризьлы укшаны ӧдъяз.

Огпол ужысь бертӥ, дышетскем бере выж миськисько на. Атай ӧвӧлэн коньдонэн секыт луиз. Ӝытъёсы со таксовать карылӥз на. Ӧвӧлтэмлэсь, пе, пичи ке но вань медло. Дӥсьме куштӥ, кылӥсько: тодмотэм пиосмурт куара. Соку ик йырам уродэсь малпанъёс кугӟазы. Анай шат, кайгузэ вормытэк, вина вылэ чӧлске? Кухняын шуэрскем мылкыды басыломиз. Кыӵе ке воргоронэн чай юо вылэм. Озьы ке но со ведь ӵыжы-выжы ӧвӧл, урамысь адями. Кӧялоз-вӧялоз – анаез пыдйылчи кельтоз.

- Тодматскы, Галие, – анай пиосмурт шоры возьматӥз. – Павел Шемякин. Шайвылысен дорозь машинаен вайиз. Анаез, пе, отын.

Павол шӧдӥз, лэся, кырыж учкылэмме, кошкыны дыртӥз. Вождэс, пе, эн вае, кулэ ке луи – вазиське.

Нырысетӥ пумиськем уг вуны, лэся. Мукет дыръя но Павол ми дорын чай юылыны кутскиз. Азиатъёс сямен, чашаяз пелляса, сультыртэ. Базарысь бертыкум, сумкаосме, пе, вайыны юрттӥз, шуэ анай. Ой-ой, таос чалыш сюрес вылэ уг кожо меда? Атаен люкиськеммы ньыль толэзь луиз, соос ке туганъясько ини. Анайме ыштэме ӧз поты. Ӟазеглэн бурд улаз ведь тютюлы кышкыт ӧвӧл. Со кылыныз тышкаське ке но, сюлмыныз яратэ.

Жолоб ву шапыкен ке но вия, быдэс вышкыез тырмытэ. Мон но пинал визьмыным анайме нодъяны ӧдъяй. Быдьто улонлэсь бергамзэ валасько. Талэн, пӧй, кеньырез кисьтӥськем. Огазе бичаса, кудызэ тырмытоно. Индылыкум анай пал кыл но ӧз поттылы. Урокын пукись пинал музэн вань кылъёсме сак кылзӥз. Бӧрысь ини лулӟыса шуиз:

- Нылы, тынад шудэд азьпалан на. Нош мынамез бус пӧлы кадь сылмиз. Атайдэ уд берыкты, нош улон сярысь малпаськоно.

Анае синмаськем. Та, шундые, йырсазьыз поромем! Нош Павол шуныт интыез утчась ӧвӧл меда? Ато «оп-шлёп» – ул дэрем коже кылёд.

Югдурез тодон понна Валя эшеным Паволлэн улон дӥняз мынӥм. Одӥг мурт – одӥг дун, кык мурт – кык дун. Ӵошен юан-веран дӥсьтоно. Сюлэм уг чида: кыӵе, мар адями со? Жингыртӥськом. Кортэн дурем ӧс, шильк-шальк вазьыса, усьтӥськиз. Янак куспын сылэ кильтро апай. Таӵе кышномуртъёсты художниклэн выжыкыл суредысьтыз гинэ пумиталод. Ай-ай, огдыре ведь кык ымын чупано кадь.

- Павел Шемякин татын-а улэ? – чырмыт сямыныз Валя пулемётысь кадь тачыртӥз.

Чеберина йырысен пыдозямы учкиз но йырзэ мыкыртӥз:

- Татын.

- Тӥ кин луиськоды? – эше ялан аслэсьтыз вандэ.

- Кышноез.

Ми бакомимы. Нош кильтро апай ӧссэ ворсаз.

Шундыё куазь пилемен шобырскиз кадь. Анайме жаляменым лек потэмме вормыны уг быгатӥськы. Мискине оске, дыр, пиосмуртлэн пӧяськемезлы. Со ке…

Бертӥ. Соос нош ик артэ, дыдыкъёс сямен гурласа пуко. Ӧй ни чида, быректэм ву кадь логыртӥсь мылкыдме палькки. Кытысь ыме тэронтэм кылъёс шедьтӥ, ваньзэ кырӟанэз музэн чирдӥ. Анае но, Павол но буйгатыны кутскизы. Мон аслэсьтымзэ ӵогисько:

- Кош ми дорысь. Азьыдлэсь берыд чебер.

«Сурым» ӝутэмелэсь пиосмуртлэн пельёсыз урмизы, дыр. Со кошкыны ӧдъя, анай уг лэзьы. Мон кужмысь ӧс сьӧры донгасько.

- Кышноез вань вылтӥ милемыз алдаса возе, – тыбыраз нушкытӥ.

Анайлы «концертэ» ӧз кельшы, бамам сачкытӥз.

- Вот таиз мултэс, – шуиз Павол но кошкиз.

- Эх, нылы, шузие, – анай катьтэммыса диван вылэ кымин пограз.

Солэн викышъямезлы сюлэм уг чида, жаль но потэ, отын ик синазькыль карисько. Малы атаез вунэтэ?

Арня пала Павол дӥнямы ӧз вуылы. Оло кышноеныз тупатскиз, оло жоб кылъёсы сюлмаз йӧтӥзы. Тодӥсь ӧй вал. Нош анайлэн тазалыкез лябӟыны кутскиз. Больницае выдытэк ӧйлась.

Оген мурт куштэм пуны сямен мӧзме. Малпанъёсы выйыса, огпалмыны кема ӧвӧл. Сюлмы чутрак луэмен, ветлоно кариськи шайвылэ. Далай ӧй вуылы ни. Атайлэн вырйыл дораз лыктӥсько но, кыӵе ке пиосмурт лаптӥськыса пуке. Йырыз ошемын, сяськаез сюе месэмын. Кышномурт ке луысал, азьвыл дусымез шуыса малпасал. Татын ведь атае сямен ик картуз нуллӥсь. Паволэз тодмаса, абдрай, ымы ик усьтӥськиз. Мар муген, пӧй, татын.

- Анаед кыӵе? – юаз, шорам учкытэк.

Шайвылын даллашон – кулэм муртъёсты сантэман. Атайме яратӥ бере, асме сабыр возьыны тырши.

- Больницаын, – мылы потытэк вази.

- Кудаз?

- Созэ, Пал Палыч, тыныд тодытэк но яралоз.

Павол ӧз ни юа-вера, шорам учкытэк ик, кошкиз.

Утчась мурт шедьтэ, шуо. Озьы ик вань, лэся. Анае доры больницае мынӥсько но, со Паволэн артэ пуке. Мар сярысь верасько вал, ӧйтӧд. Монэ адӟыса, кыксы ик ӵыжектӥзы. Гырезь картошкаен гуньдэм скал кадь шорам быльк-быльк учко. Витьымтэ пумиськон – юмоке вуон. Саламъёсын тырмытэм пакетме анаелэн алвылаз понӥ но кошки. Йыры курен ымам амбар тунгон ошизы кадь. Кӧтӝожме вормытэк, Валя дӥне мынӥ. Урод ке но, ӟеч ке но, эштэк улон мӧзмыт. Ми соин одӥг выжыысь потэм писпу кадесь.

- Ойдо, Галя, песяен кенешом, – уртчем мылкыдзэ уг ваты эше. – Со милям «дом советов». Шӧгзэ но кузьытсэ тырмыт оскалтэмын.

Песяй милемын кенешыны пумит ӧз луы. Пукселэ ӝӧк сьӧры, шуэ, чаен ке но алдало.

- Ой, нылъёсы, узы-боры бичан кудыосы, – верамме кылзыса, пыдлось лулӟиз песяй. – Дыдык тылыосыныз чебер, адями – визьмыныз. Берпум шокчытозяд сабыр ул, мукетызлы урод эн лэсьты. Бен, котькинлэн янгышез луэ. Мыным мешок – тыныд пуйы. Сыӵе сям – беда! Пинал мылкыд – тӧл пельтэм кадь. Аслыз но инты уг шедьты, мукетызлы но люкетэ. Нош оген номыр лэсьтыны уд йӧндыры. Пурысьтам «кудые» тазьы малпа: адямиез канжатод, ачид со канавае усёд. Йыр сётэмын малпаськыны, сюлэм – чиданлы. Нош анаез ултӥян – вань «сьӧд черъёс» пӧлысь тужгес кырсез.

Песяйлэн кылъёсызлэсь мугоры юзыр-кезьыр луиз. Синучконысь адӟыса кадь, лушкем мылкыдме шарае поттӥз. Бен, анайлы юрттоно. Адями дунне вылын одӥг пол улэ. Ӟеч мылкыд – ӝыны шуд, умой тазалык – даурлы.

Анаез больницаысь Павол таксиен вайиз. Сюреслы коньдонзэ жалямтэ, лэся. Пыриськись уго вӧй вылтӥ кадь гылыт мынэ. Созэ но, тазэ но лэсьтыны дась, аслыз гинэ умой медло.

- Я, Нюра, эн висьы, юнматскы, – со-та куртчемез бере Павол ӝӧк сьӧрысь потӥз. – Галя, туж курисько, анайдэ чакла. Ӟеч луэ. Нош мон шонерак милицие кошки.

- Милицие? – могак луи. – Малы?

Катьтэммыса пуконэ ланьырски. Кытын пиртэш интымы? Табере ми вылэ ик чагиськыны? Сьӧлыктэм муртъёсыз янгыше уськытыны? Вот адями!

- Венез мешоке уд ваты, – тэркы миськонзэ куспетӥ кариз анай. – Шара вера, Павлович. Гадьысьтыд секыт издэ палэнты.

Уроксэ дышетымтэ пинал сямен, пиосмурт, йырзэ ошыса, сылӥз. Пал пыд вылысьтыз мукетаз лёгиськыса, Павол мадёнзэ котыръяса кутскиз.

- Котькинлэн пинал дырыз огпол луэ, нош егит дыр – синмаськон вакыт. Мон но бырйиськи: соиз но мусо, таиз но йӧно. Нош кышнолы кильтроез сюриз. Ох, кыӵе янгышай! Атаез одӥг предприятилэн кивалтӥсез вал. Соин, лэся, нырме отчы чуртнано кожай. Вӧлмыт улонэз утчай, дыр. Союз куашкам бере атайзэ ужысь палэнтӥзы. Нош мынам улон-вылонэ чутыны кутскиз. Эмеспи ке луид, кузё кариськы, шуо, биньгозыдэ юн возь. Ӧз луы биньгозыез герӟаме. Кузёяськиз кышное, мон пыдберзэ чаклась вал. Шонерак вераса, ыстон-косон. Куке кышноед ултӥя, пеймыт уйин нюлэскы йыромиськод кадь. Ваньмыз умой, нош гадь пушкын – секыт из. Умойтэм сямзэ синмаз ик верай: со ке «хи-хи» но «ха-ха». Озьы бере, мон гижы улэ паньгатон. Со керетон бере ик вожпотэмен руль сьӧры пукси. Сюресэз ӧй чакла. Светофор пиртэш толэзь кадь адӟиськиз. Уйшоре ачим но ӧй вала «Хондаез» пальккемме. Нош отын тӥляд атайды вылэм. Таӵе учыр монэ капканэ кадь шымыртӥз. «Газикез» гаражысь ӧй ни потта: куажгамын, пӧй. Ворттылӥ эшелэн автоеныз.

Эх, тодысал ке кытчы усёнме, куро вальысал. Бадӟым кайгуэн улыны мыным сьӧлык. Тӥ азьын но мон синазькыль адями.

Павол, мышсэ учкытэк, кошкиз.

Ӝыны ар ортчиз-а, ӧз-а, витьымтэ куно нош ик ми дорын. Меӵак учке, синъёссэ уг ни ваты. Ӵыжы-выжыез пумитаку выллем, анайлэн но мылкыд лӧптэмын. Нокыӵе кайгуэз адӟымтэ, кожалод.

- Куинь арлы условно сётӥзы, – ӵыжектыса нёртӥз Павол.

Тӥни мар вылэм. Чидалом ини, котькин ас даурзэ ачизъя улэ. Анайлы ке умой, мыным но шумпотон. Со ик ӧвӧл меда чиньыйыл быдӟа шуд?

Нош музон пиосмурт атае кадь уз луы ни.

Виталий Агбаев.

Мар кулэ ӝӧк вылэ пуктыны, ваньзэ адями рад октӥськи: колбаса, торт, шампанской но мукет чыры-пыры сиёнъёс. Коля райцентрын улэ. Нош мон – городын. Кыкнамылэн но семьяосмы ӧвӧл на. Бон туж казакесь но уд шуы ни милемыз. Но мар карод? Кузмес-палмес огмы но татчыозь шедьтыны ӧм быгатэ на ке.

Ми Коляен ӵош дышетским. Куать арзэ одӥг комнатаын улӥм. Яратӥськом вал ӵошен мунчое ветлыны. Уката ик солэн анаез доры кунояны ке мынӥськом. Эх, сётӥськом ук веникен! Толалтэзэ, пӧсьлы чидатэк, лымыын погылляськиськом, гужемзэ Коляослэн бакча бертӥзы ик визылась шуре тэтчиськом. Вуэз адӟылымтэ ӵӧжъёс сямен выриськом. Дышетсконмес йылпумъяса, эшеным люкиським. Институт бере Коляез райцентре ужаны келязы, монэ – дышетскон интыям ик кельтӥзы.

Коляен ми ноку юонэн но кысконэн ӧм эшъяське. Нылъёс котыртӥ но ӧм гожеръялэ. Ӝытъёсы библиотекаын лыдӟиськыса пукылӥм, киное ветлылӥм. Ваньмон дыръямы пӧртэм кружокъёсы но секциосы гожтӥськылӥм.

Райцентрозь мынонэ кыдёкын. Куазь но тӧло-жобо, пелляське. Уйлы кыльыны уд дӥсьты. Соин ик сюрес вылэ вазь потоно кариськи. Машинае ӵыжак-выль. Коля сое ӧз на адӟы. Паймоз, дыр. Ачим но сое басьтыны быгатэмелы шумпотӥсько. Мынонъям куазь эшшо но золгес пелляськыны ӧдъяз. Музъем вылэ пумен ӝомал лэзькиз. Куазь урод ке но, мылкыд умой, ӝоген эшеным адӟисько. Ширтон сяменым машинае тыпак гинэ гуньдӥз.

Ӧсэз усьтыны ик уг луы, сокем зол пелляське. Кытчы меда вуи ни шуыса, тодэме потэ. Мырдэм но кызьы кабинаысь потӥ. Тӧл пыд йылысь погыртыны турттэ, ява, сыӵе кужмо. Сюрес урдсы кошкиськем. Мылкыды быриз. Кытчы-мар кариськод на таӵе куазен? Берен шуныт азе, кабинаям пукси. Озьы но, тазьы но выри, машинаелэн интыысьтыз вырӟемез ик уг поты. Асме ачим буйгатӥсько: тани куазь басылскоз, эше доры одно ик вуо… Озьы пуконъям шуныт азе каньсыраськем, умме усиськем.

Ӟабыльтэм куараосты кылыса, сайкай. Нылокъёс кит-кит серекъяло. Берме учкисько но, сьӧрам кык кузя чебересь дыдыос пуко. Кылы-ымы кыстӥськиз, ку-мар албастыос машинае пуксьыны вуиллям?! Мар шуыны ик уг валаськы ни. Мугоры кезьыт вуэн пылатэм кадь луиз. Кышканы кутски: та ишан ӧвӧл-а? Мар, пе, шуэрскид, ойдо, ми тынэсьтыд машинадэ поттыны юрттом. Сыӵе дыръя пумит луод на шат? Донгазы, донгазы но машинаме интыысьтыз вырӟытыны быгатӥзы.

Тӧл интыяз пуксем, азьло кадь уг шузияськы ни. Вот ведь, малпасько, еж мугоро нылокъёс машинаме сюрес вылэ поттыны быгатӥзы. Тау шуыса, кошкыны медӥсько ни вал. Сьӧрам калъяськизы: милемлы но, пе, Выль ар пумитаны райцентрозь вуоно. Ярам, оген мӧзмыт луоз шуыса, соглаш кариськи. Пайми, сюрес вылын сылонъям дыр ортчем гинэ: дас одӥге, пе, мынэ ини. Нылашъёслы шулдыр, лэся, кырӟаса но серекъяса мыно. Капчиямзы но ӧжытак шӧдӥське. Магазин доры вуим. Я, табере ваське, шуисько, тӥледлы мукет азе, мыным музон интые мыноно. Дугды ай, дугды, ишь, тон милемыз татчыозь ваемед понна ми тыныд ӟеч лэсьтыны кулэ. Маин, пе, такем кыдёке вуысалмы. Сумкаысьтызы ӟенеликсэс но сиён-юонзэс поттӥзы. Ми, пе, тонэ озьы гинэ ум лэзе ай. Выль ар понна татын ик, пе, пичи лэзём. Вот, малпасько, пинал мылкыд ке пинал мылкыд: ялан хи-хи но ха-ха соослы. Уг юы шуыса пыкъяськемысьтым, шаплыез нылаш пельме куасалтӥз но, тани тазьы кулэ шуыса, курыт мае ке ымам кисьтӥз. Сыӵе кымаськыса сектаськемез Пурга палъёслэсь гинэ адӟеме вань. Оп шуыны но ӧй вуы, мукет палтӥз нош озьы ик кымась луиз. Курыт марлэсь ке вукекъяськыны кутски. Йыры соку ик берганы шӧтаз. Мар дауртӥськоды, мон курытсэ чик уг юиськы, воже потыса кесяськисько нылокъёс шоры. Огдырлы синъёсы адӟемысь дугдӥзы. Кызьы машина рулез валтӥсько, ачим но уг валаськы. Тодӥсько на Колялэн коркаез доры вуыса машинаме мырдэм но кызьы капка азяз пуктэмме. Сьӧрам ик юг-юг ӝуась фараосын музон машина вуиз: тӥ, пе, туж ӝог ворттылӥськоды. Кенерез мырӟыса кельтӥды. Озьы адямиез но  вӧсь карыны быгатоды. Погонэн адямиос уксёме куро. Мазэ-созэ валатэк, мон интыям лэйкаса сылӥсько, шоразы ваземе но уг луы, кылы быгыльмемын. Соку одӥгез пияш, ӟечкын уд ке валаськы шуыса, монэ зуч гинэ небыт лымые донгиз но кисыысьтым утчаськыны кутскиз. Пыкъяськыны выри ке но, бугай кадь со, ӧй вормы пияшез. Кисыям мар вал, ваньзэ – уксёме но, машина нуллон правоме но – басьтыса, кошкиз. Ак но, бак но шуыны ӧй вуы ни. Та нуналъёсы гинэ басьтэм правоме минут куспын ыштӥ шуыса, сюлэмы шорияк пилиськыны дась. Нылокъёсы кит-кит серекъяло. Ярам коть, лымыысь ӝутӥзы.

Колялэн коркаез ӵогамын. Сыӵе дыръя мурт дуннеын кытчы мынод, мар  карод? Вылаз ик, эше телефонзэ но уг басьты. Ярам, нош ик шаплы нылаш мыным юрттӥз. Почта ящикысь бумагаез поттӥз. Коля гожтэм: «Тодӥсько, ӝоген тон вуыны кулэ. Куазь пелляськемен, лэся, телефондэ ноку ӧд басьты. Больницае секыт висисез вайиллям. Монэ отчы ӧтизы. Солы операция лэсьтоно луоз, дыр. Озьыен, Выль арез мон дорын, больницаын, пумитано луомы. Пӧсь чай юим ке, яралоз асьмелы. Вождэ эн вай, ужмы сыӵе. Витисько».

Больницае мынон сюрес вылэ потӥмы. Нылокъёсы нош сьӧрам калъяськизы. Мынэсьтым кылемзы уг поты ни, лэся. Со вискын йырам, арганме но сиён-юонме сьӧрам кутоно вал шуыса, малпан чилектӥз. Верамын – лэсьтэмын. Арган пельпум вылам, сиён-юонэн пакетэ нылъёс киын. Мыд-мыд палтӥм кунултыса, мур лымыетӥ гуштылыса, больница азбаре пырим. Нылокъёс лӧпкытъяло: ойдолэ, пе, для смелости пичи эшшо ӟузёме на, озьы шулдыргес луоз. Мынам ымам но понэме уг луы ни,  нош соос вылысьтыз вылаз ог-огзэс сектало. Кинъёс-маръёс тӥ шуыса юамысьтым, ымам эшшо одӥг чарка кисьтӥзы на.

Больницае пыремме умой-умой уг ни тодӥськы. Нош арганэз куаш-куаш кыскаса яратоно «Келялод-а, уд-а» кырӟанэз нёжъяме син азям на. Кыӵе мылкыдын пумитаз монэ Коля, ӧйтӧд. Уйшоре, 12 час шуккыку, ми ординаторскойын пукиськом ни вал. Нылокъёсы Колялэсь но йырзэ берыктӥллям.

Огвакытэ сазьтӥськем кадь луылӥ. Адӟисько, нош синъёсылы нокызьы уг оскиськы: тӧдьы халатэн дӥсяськем эше висисьёсыныз ӵош тапыр гинэ эктэ. Кин кунул бодыен, кин биньылэм суй-пыдъёсын пичи гинэ ёлка котыртӥ тэтча. Выж ик, ява, зурка. Йырыз бинтэн бинем пияш резь-куаж арганме кыска. Бӧрсяз нылкышноос кырӟало.

Йыры бергамен, быдэс дунне котыръяське, йыркобы пилиськыны турттэ. Тани-тани солы пум вуоз. Палзэ синме каллен усьтӥ. Адӟисько: одӥгез нылоке Лымы ныллы пӧрмытскем. Йыраз гирляндаос но чилясь бумагаос тырем. Ма, кельше со Лымы ныллы, йырсиез мертчан кадь пиштэ. Шаплыез, горд басмаен биниськыса, Тол бабай сямен кияз боды кутэм. Ымныраз, туш интые, вата лякем. Кисыысьтыз кампетсэ, лэся, сётъяса, ветлэ. Кияз маке быдӟа ӟенеликез. Кампетэз вӧзы ваньмызлы курытсэ удэ. Нокин уг пумитъяськы, ваньмыз юо. Соку ас поннам малпай: Выль ар ук, мед ойдо шулдыръяськозы.

Висисьёс ӵукнаозь кин выж шорын, кин койка вылын кыллё ни вал. Коля син азьысь ышиз. Лымы ныл сое шузимытӥз, луоз. Укыргес котыраз берга вал.

Нырысетӥ январе висисьёс лумбыт супыр-супыр изизы. Нош ми, Коля, мон но кык нылокъёс, арганмес мешоке поныса, больница котырысь тыпыр-тапыр пегӟимы. ӧтьымтэ кунооссэ Колялэн уг поты вал дораз пыртэмез. Но кытчы кылёзы на соос? Эше дорын нылокъёс воксё кузёос луизы: сиён пӧрало, ӝӧк вылэ пуктӥсько. Кыӵе-мар окты-калтыосты татчы шедьтӥд шуыса, эше монэ пыкылэ. Тонтэк но, пе, монэ тодматӥсьёс татын тырмо. Учкы ай со тордосъёсыд шоры, адямилэсь возьыт ук. Ошъёс сямен юо, пиосъёс кадь пурккето. Ну соостэ берен сьӧрад. ӧжыт-а вал асьмемыз учкисьёс?

Тӥни озьы, ми, юонэн но нылъёсын поромымтэ муртъёс, му пыр виямон юмоке усимы. Коля врач, ачим тани-тани йӧнатон удысысь кандидат луо. Анай-атае интеллигентъёс. Мынам соослэсь ноку юэмзэс адӟеме ӧвӧл. Сузэр-вынъёсы но кудӟытӥсеныз уг кушласько.

Выль ар уе озьы дауртэммы понна зол гинэ йӧтӥз милемлы. Коляез больницаысьтыз уллян калэ вуизы. Ярам, ӟеч хирург шуыса, райцентрын солы трос дурбасьтӥсьёс шедиллям. Нош монэ мукет уже выжтӥзы. Тӥни озьы, ява, егит нылъёс йырмес суразы.

Одӥгез али ке но улыны маза уг сёты, дорамы ветлэ. Пиналме вайи ке, анай-атаед доры утьыны ваё, шуэ. Нош мынам со сяна но йыр висёнэ тырмыт: Коля эшеным кусыпме тупатоно вал. Кинэн вуоно Выль арез пумиталом?

Любовь Тихонова.

Суредаз Владимир Беломорских.

Таяз учыре милемлы лобась тэркыосын – асьме доры оломар дуннеысь вуылӥсьёсын – кусып тупатэмез сярысь мадьыны кутскиз.

- Ӵем гинэ дорам лэзькыло, – нокыӵе кариськытэк, лад-лад пӧллиськиз со. – Асьмелэн улэм-вылэменымы, сямъёсынымы, йылолъёсынымы тунсыкъясько. Ма сиеммес, кызьы пӧраммес гинэ но юаллясько. Одӥг пол няньме но куризы, лабораториямы эскером, пе. Пыжем картофкаме сётӥ на – ойдо мед турскозы.

-  Нош кыӵеесь соос, палэнысь лыктэмъёс? – ми но тунсыкъяськем кариськом.

-  Асьме кадесь ик, кык пыдоесь, – кыллы кисыяз ӧз пыр Парифон. – Йыръёссы бадӟымесьгес, нош синъёссы педпала мычиськылэмын, лёгъёс йылын выллемесь, котырак адӟо. Ымныр кузы сыномыны кутскем ыргон тусъем, вож. Нырзы, ымзы но пӧртэмесь – оло обезьян тусъемесь, оло пуны выллемесь шуоно. Ангесъёссы ӧвӧл, со интыын – ым. Асьсэос скафандр пушкын, киоссэс гинэ но кыре уг поттыло. Сиёнъёсме сётыкум но, киязы ӧз кутэ, пинцет выллем кисэн басьтӥзы.

- Кӧня кузя соос? – нош ик юаськом.

- Тодыны уг луы. Корабльзы котырын вужеръёссы кык-куинь но адӟиськыло, нош дорам одӥгез гинэ ветлэ. Огпол – огез, мукетъят – мукетыз. Корабльзэс ке верано, укыр тумошо созы: кык ваче пумит кымалтэм бадӟым тэркыос выллем. Лоба дак – пуля но пуля.

- Ми малы ум адӟылӥське сое? Пуксьылэм бервылзэ гинэ но синйылтэммы ӧвӧл, – могӟытыны выриськом мадисьмес.

- Уд но адӟылэ, – оло азьвыл ик солэн ма вераны дасямын, оло али малпаса вуттэ. – Соос сайкыт, чебер куазен ноку уг лобало, одно жобаку-пелляськыку яке лек зорыку-гудыръяку гинэ вуыло. Соку но матэ уг пуксьыло, палэнэгес карисько.

-  Нош кызьы тон соосты валаськод, кыӵе кылын вераськиськоды?

-  Асьме сямен ик, удмурт кылын. Музъем вылын вань улӥсьёслэн кылынызы вераськыны быгато соос. Со сяна, эшшо одӥг быгатонлыксы вань на, – кисьтэ но кисьтэ Парифон, – адскисьтэм кариськыны быгато. Татын ик луозы, нош асьмеос ум адӟе. Оло, али но вӧзамы сылӥсез вань.

Ми амалтэк котырак учким. Собере юам:

- Сьӧразы уг чорто-а тонэ, нуэмзылэсь уд кышкаськы-а?

-  Малы кышкалом? Нуысалзы ке, мынысал. Коть сьӧр дуннеосты адӟысал. Только соос асьсэлэн планетаязы ӵем ум бертылӥське, шуо, Толэзьын, пе, улӥськом. Музъем вылысен адсконтэм палаз, пе, научной базаосмы но, улон интымы но ладъямын. Асьмеды серекъяло: Музъемды котыртӥ гинэ, пе, лобаны йыринтӥськоды, Толэзёзь но сокудняла вутскыны выриськоды. Нош ми, пе, кӧня ке час куспын татчы вуиськом.

Мадёнзэ йылпумъяса, дорысьтымы Парифон атас кадь бурдъяськыса кошкиз. Ма, кылыд лычсузьымон пӧялляськыны быгаты али! Котьку сыӵе луонлык кылдэ-а, ма. Такем удалтэмлы шумпотэменыз вылтырыз ик няськаз, луоз, уть, кыӵе йӧно, шаплы, йырзэ сюдэм ужпи кадь вылэ урдыса, вамышъя. Кожалод, туж бадӟым ужпумез пумаз-йылаз вуттӥз. Созэ гинэ ми нокызьы ум ятвылтӥське: оскиськомы кожаса-а сокем эрекчаське, хоббиез-а со? Котьма ке но ми серекъяськом:

-  Туннэ соидлы сиён но йӧскадь кошкоз ини.

Мон ас поннам малпасько: «Кызьы ай меда тае дышетоно, кызьы алдаськемысь дугдытоно? Вераса, алыса гинэ иназ уг мын бере, мукет амал утчано».

Малпаськонъям кабзэ ас вактам усем кадь луиськем, ужме но вунэтӥськем. Эшъёсылэсь шорам доллы пуктӥськемзэс шӧдыса гинэ, сазяк кариськи. Но отчыозь йырам туж йӧн малпан вордӥськиз вал ини: сое ассэ буш коскые пуктылоно, лобась тэркы сярысь туннэ мадемзэ ас вылаз кымалтоно.

Эшшо маке-маке чыры-пырызэ поннам бергатыса ,малпанме одӥгезлы матысь эшелы поттылӥ.

-  О, туж усто! – лӧптӥз со. – Одно кутчано! Мукетъят, оло, кылзэ-ымзэ кортнасагес возёз.

Парифон – скал вордон фермаысь возьмаськись. Дораз «куное» мыныны йӧспӧртэм дӥсь ладъям. Йырамы мотоциклэн ворттылон шлем бырттӥм. Со вылтӥ полиэтилен плёнка кесэгез золтӥм, пумъёссэ, чырты котырамы шымыръяса, дӥсь уламы пачкатӥм. Нош выламы – капчи курткаос.

Фермае уйшор котырын вуим. Парифонэз возьмаськон интыысьтыз, шонергес вераса, изён висъетысьтыз поттон понна гид доры дугдытэм тракторлэсь пускачсэ заводим. Кӧня ке тачыртэммы бере гидэ пыран ӧс пала кариськи. Витёно муртмы кема ӧз улы, потӥз. Вушйылыса но синъёссэ посыса, пеймытэ пуктӥськиз. Со вакыт ми сое кыкналасянь кунултӥм.

-  Тонэ нуыны лыктӥм, – куараме воштыны тыршыса, вази.

-  Кытчы? – номырзэ уг ятвылты иземысь ӝыныё ӝутскем адями. Вылаз ик, ӟамыртэмын.

-  Уд адӟиськы-а, кинъёс ми? – вазисько пумитаз. Со милемды али гинэ адӟиз кадь.

- Милям планетаямы лобӟом, корабльмы со куро люкъёс сьӧрын, – отӥе валтыны кутским. – Учёнойёсмы одно одӥг адямиез вайыны куризы, ӟеч-ӟеч учком, эскером, пе, сое.

Парифон шуэрскиз, мозмытскыны выре. Но ми сое зол возиськом, азьлань валтӥськом. Со пыдъёсыныз мыр-мыр пыкиськыны ӧдъяз. Озьы но кужмысь золтӥськом. Нуэммыя бӧтьыраськом:

- Учёнойёсмылэн туж тодэмзы потэ музъем вылын улӥсь адямиослэсь анатомизэс, кырылыса вань пуштроссэ учкозы-пертчозы.

Валтоно адямимылэн пыкиськыны кужымез быриз, шӧдске, пыдъёсыз нюж кыстӥськыны ӧдъязы. Маке вераны турттыса, ымзэ усья, нош куараез уг пот. Куке-соку гинэ кылӥм:

- У-у-уг… мы-ыны!

- Кызьы уд мын, алигес ачид ӵектӥськид, мынысал, шуид. Ми ведь ваньзэ кылӥськом-адӟиськом, – весь кыскиськом сое. Пумен буйгатӥськом. – Тон эн кышка, кырылэм бервылъёссэс вурозы, живо-два бурмытозы но тонэ берен татчы ваём.

Адямимы шӧйӟектэм кадь луиз. Мултэссэ куасалтыны шедьтӥм кадь, со виын Парифонмы кион кадь вузыны, шуш бурсыны кутскиз – киосмы амалтэк бордысьтыз мозмизы. Нош сомы, тыро мешок музэн, музъем вылэ вуӵ! усиз. Ӧм йӧтскылэ ни бордаз, шыпытак гинэ куро люкъёс сьӧры вамыштӥм. Отысен лушкем чакласьком: ма луоз соин? Парифон кыллиз-кыллиз но каньылля ӝутскиз, котырак эскериськиз, собере лобатӥз ук ферма пала!

Со учыр бере дыр трос гинэ ортчиз ини, нош алдаськисьмылэсь супыльтэмзэ кылыны ӧйлась на. Мукет планетае нуыны выреммес но чик уг поттылы.

Константин Емельянов.

Кузебай Гердлы сӥзем лыдӟонъёсын йылпумъяськоз шаерысьтымы дано усточилэн Зоя Лебедевалэн но тодмо продюсерлэн Александр Юминовлэн «Актуальная этнография» адӟытонзы. Отын тодматскыны луоз киын лэсьтэм тунсыко арбериосын, кылзыны луоз удмурт калык кырӟанъёсты. Та ужрад ортче «Удмуртлык» группае пырисьёслэн кичӧлтэмзыя. «Грифон» галереяе пырыны луоз дунтэк.

Елена Тугашова. 

- Тодӥсько ини. Ӵапак со сярысь малпаса пукисько вал.

- Таре ма каром?

- Ма карод – таиныз но огъя кыл утчано, шедьтоно луоз, кызьы ке ик асьме пала берыктыны тыршоно.

Огшаплы чалмылэмез бере Гондырев азьланьтӥз:

- Давай нырысь-валысь тазьы лэсьтом: тон шоркаре ветлод, тодод, кыӵе-мар адями со, маин тунсыкъяське, ваньмон дырзэ кызьы ортчытъяны яратэ. Валаськод, дыр, аслэсьтыз эн юалляськы – ӟеч тодмоосызлэсь.

- Валамон. Ку мыноно?

- Быдэтскы но ӵуказе ик пот.

- Ярам.

Ыстэм мурт отын кык нунал улӥз. Берытскыса ивортӥз:

- Выль кивалтӥсьмы бубизъя удмурт выжыысь, но асьме сямен уг вераськы. Ньыльдон сизьым аресъем. Кышноез бигер, кык нылпиоссы…

- Соиз ӧвӧл кулэ, – юрттӥсьсэ Гондырев куспетӥ кариз. – Сямъёссэ вера, кызьы шутэтскыны яратэмзэ.

- Сямыз зӥбыт. Вина уг юы.

- Воксё-а?

- Туж ӧжыт дыръя чиндысэн мактал гинэ веръялля, пе. Мурт кышноос, егит нылъёс котыртӥ гожеръямзэ адӟылэмзы ӧвӧл. Ваньмон дыръяз чорыганы яратэ. Ву дурын визнанэн уй-нунал но пукыны дась, пе.

- Ага, туж умой, – шумпотӥз Гондырев. – Озьыен, огъя кыл шедьтом, дыр.

Гондырев ӝоген ачиз шоркаре лобатӥз. Выль кивалтӥсеныз тодматскиз, маке-маке кенешем, юам-верам кариз но кошкон азяз ымнырзэ кепырась, дӥсьтӥсьтэм тус карыса, юаз:

- Чорыганы уд яратӥське-а?

- Чорыганы? – соизлэн синъёсыз ик чилектӥзы. – Малы ке-а?

- Туэ милям чорыг ӟеч шеде. Али пая зыгатэ.

- О! – шумпотӥз кивалтӥсь.

- Оло, пӧй, ветлысалды? Дыр шедьтоды ке.

- Ветлыны урод ӧй луысал, тӥ палан чорыгалляме ӧвӧл на.

- Иське, ку быгатоды?

- Вуоно шутэтскон нуналъёсы ик пӧрмоз, дыр, кӧснуналэ.

- Яралоз. Озьыен, ми витём, дасяськом, – лӧптӥз Гондырев.

- Мар дасяськонэз?

- Паялы одно пӧет дасяно ук.

- Соиз озьы, – пальышаз кивалтӥсь.

Пӧйшурасьёслэн но чорыгасьёслэн ёросысь йырзы городысь бурдъяськыса бертӥз. «Сё, – шумпотэменыз киоссэ посэ, – мед гинэ лыктоз, одно кылмы тупалоз, таиз но монэ бурд улаз кутоз. Озьы бере, улонэ азьланяз но майбыр, шулдыр ӧръяськоз».

Гондыревлэн табере вань ужез, вань сюлмаськонэз – куно пумитаны дасяськон. Котькуд ласянь малпаське со сярысь, ваньзэ лыдъя-чота, эскере-чакла. Матысь адямиоссэ люкаса, бератаз шуиз:

- Франциын дасям коньяк шедьтоно.

- Уг ю, лэся, – кин ке куаразэ поттӥз.

- Сьӧраз келялом салам. Ачиз ке ӧз ю, дораз лыктэм-пыремъёсты куноятоз. Со сяна, сӥль дасяно. Одӥгзэ койыкез яке кыр парсез ыбоно.

- Пӧйшурантэм дыре-а? – нош ик кыл висказ чуртнаськизы.

- Мар асьмелы пӧйшурантэм дыр? Кин-о татын кузё? Асьмеос, лэся, ук. Нош самой кулэез – лыктон азяз кык-куинь ведра пая калтоно. Одӥг ведра шальк-шальк чеберъёссэ нимаз быръёно. Соосты визнакуз куриказ дэмӟытъялом. Аквалангистъёслэн кружокысьтызы одӥгеныз адямиен вераськи ини.

- Компартилэн азьло секретарьёсызлы музэн-а? – валатскизы кылзӥсьёсыз.

- Бен, – меӵак вераз Гондырев. – Сотэк адямилэсь мылкыдзэ уд веськаты. Асьме дорысь ӟеч малпанъёсын мед кошкоз.

Ваньзы мынектӥзы.

Дыр ӝог ортче, кивалтӥсьлэн лыктон нуналыз но вуиз. Сое огшоры – нокыӵе данъёстэк, чеберъяськонъёстэк – пумитазы. Бӧрысь, кошкыкуз, пе, сӥё-данэн, кузьымъёсын келялом. Кунозылэн куремезъя пумен сое шур дуре нуизы.

- Татын шедьыны кулэ, пӧетлы пӧзьтэм сезьы пазямы, – шуиз Гондырев.

- Калтыртӥсьёс, люкетӥсьёс медаз луэ вылэм, – котырак эскериськиз куно. – Огнам, шып пукыны яратӥсько.

- Кин татӥ ветлоз? Ми но палэнын, тӥни отысь кожын, нуназе азелы чорыг лым пӧзьтом, – возьматӥз Гондырев.

Куно интыяськиз. Визнанзэ чӧлтӥз но соку ик кикурлэсь паськыт паяез ӝутӥз. «О!» – чылкак паймиз городысь лыктэм мурт. Шумпотэменыз визнанзэ выльысь чаляк чӧлтыны дыртӥз. Таяз учыре но собыдӟаез ик сюриз. Кыкез бӧрсьы – куинетӥез. Поттылэ но поттылэ. Визнанзэ куштыса, кема уг возьма – пукы тюак вые. Олома куспын ӝыны ведралэсь уно одӥг кадесь ыльыс, чебер паяосты кыскиз. Лыктэм адямилэн мылкыдыз воксё лӧптӥз, улытозяз, оло, такем удалтылэмез ӧй вал на. Усто инты бырйыны быгатэмез понна пӧйшурасьёслэн но чорыгасьёслэн ёрос кивалтӥсьсылы кызьы тау карыны ик уг вала. Нош Гондырев сое лушкем чакласа улэ, понназ серекъя: «Ми дорын пая ӟеч ведь зыгатэ? Шумпотэменыд ымыд куака тэрымон усьтӥськемын кадь».

Соиз зэмзэ сокем лӧптэмын – мукет малпаськыны тодаз но уг лыкты. Ассэ ик вунэтӥз кадь со, котырысьтыз улослэсь, инкуазьлэсь чеберзэ, шулдырзэ но уг анла ни, акылес нымы-кибыосты но уг шӧдылы – визнанзэ гинэ ӝоггес чӧлтыны дыртэ. Тазьы дыртӥд-вуттӥд выронъяз огполаз чабкиськиз: «Э, курикам нумыр но ӧй быртты ук!» Визнанзэ ӝотак берлань ӝутӥз. Сиез кӧня ке сётскиз но кытчы ке дэмӟиз. Кыске, кыске – курик уг мозмы. Нош сиез зугыр выре. Шӧдӥське, отын луло маке. Соиз гинэ валантэм: малы со уллань но, выллань но уг кариськы, интыяз возиське? Чорыгась визнанзэ кужмогес золтӥз. Соку гинэ соиз каньылля ӝутскыны ӧдъяз. Куриказ азьлолэсь но бадӟым чорыг сюриз кожаса, сачоксэ кутэ вал ини – со вакыт, чорыг интые, ву вылэ адями ки мычиськиз. Собере кыкетӥез. Чорыгась копак шулӟектӥз, визнанэз ик киысьтыз усиз. Шӧгектэм кадь луэменыз вырӟыса но ӧз быдты – вуысь акваланген адями ӝутскиз. Визнан курик солэн кияз капырскем вылэм.

- К-кин-о тон? – дэймем чорыгась куаразэ мырдэм поттӥз.

- Аквалангист, – йырысьтыз масказэ басьтыса, вазиз соиз. Киысьтыз бышкалскем курикез мозмытыны выронъяз будэтӥз: – Умойтэме сюрыны шедьтӥ.

Визнан курик, небыт интыяз кемдыса, пырак шакасозяз мертчиськем. Аквалангистлэн сое нокызьы поттэмез уг луы.

«Таид ву улысен но куриклэсь мозмытскыны вырем уга, – ятвылтӥз чорыгась. – Тӥни малы визнан си ӟугыраса улӥз». Аквалангистэз ӧтиз:

- Ярдуре пот, татысен басьтом.

Соиз кылзӥськиз. Озьы но тазьы курикез ишкалтӥзы. Вуысь потэм мурт берлань зымыны дасяське вал ини – визнась сое алӥз:

- Кытчы тон – азоз киыд. Мынам аптечкае вань, бинём.

Со чаляк автомашинаез доры бызиз, нош аквалангист бышкалскылэм кизэ каньылэн гинэ уллань-выллань сэзъяса сылэ. Адӟиське, висе, кужектэ соиз.

Биньылэмзы бере мискиньлэн киыз буйгаз, шӧдске, чорыгась вӧзы вӧт-вӧт пуксиз.

- Табере чорыгъёсты кышкатӥд, дыр, ай тон, – пыкылытэк-маратэк гинэ вазиз городысь лыктэм адями.

- Ӧвӧл татын чорыгез, – шуиз соиз.

- Кызьы ӧвӧл? Нош тани таос? – паяосыз шоры возьматӥз куно.

Визнасьлэсь ӟеч мылкыдо, муртъёсты гажась сямо луэмзэ шӧдыса, аквалангист ваньзэ шарае поттоно кариськиз:

- Мон соосты курикады дэмӟытъяй.

- Тон?! Малы?

- Гондырев озьы косӥз.

Лыктэм адями вераны луонтэм паймиз. Аквалангист шоры оскытэк учке.

- Уд оскиське-а? – пальышаз соиз. – Возьмато ай тани.

Со масказэ чаляк йыраз бырттӥз но вуэ зымиз. Кема ик ӧз пыра – сеткаен чорыг поттӥз. Ӵапак визнанэн кутылэмъёс кадесь.

- Тамындаез кылиз на вал – визнандэс малпамтэ шорысь ӝутэменыды пӧяськыны шеди.

- Нош мон бадӟым пая сюриз кожай вал, – лыктэм куно пальпотэм тус кариськылӥз но выльысь кунэрскиз: – Малы кулэ вал таӵе пӧртмаськон?

- Гондыревлэн пыриськемез, тӥледды ас палаз берыктэмез потӥз. Со гинэ ӧвӧл ай, мылкыддэс ӝутон-бурдъян, ас сярысьтыз ӟеч малпанъёс кылдытон вылысь тӥледлы выль сӥль но дасяз – алигес койыкез ыбизы.

- Гужем куазен-а?

- А мар солы гужем яке тол – татын ачиз кузё. Весяк озьы дауртыса улэ, таӵе амалэн вань кивалтӥсьёслэсь йырзэс берыктэ, соосын огъя кыл чаль шедьтэ. Соин ик оскем ужзэ йӧнала уг ке но быдэсъя, законъёсты тӥя ке но, ужысьтыз туздырыны нокинлэн киыз уг ӝутскы.

Шоркарысь лыктэм кивалтӥсь аквалангистлэсь мадемзэ кылзӥз, кылзӥз но, пал кыл вератэк, вань чорыгзэ шуре кисьтӥз. Ачиз сэрытак визнан котырзэ октӥз, машинаяз пуксиз но, берзэ учкылытэк, шур дурысь кӧчиз. Визнам интыяз, ву вылын, лулзы потыны вуэм паяос гинэ, шунды шорын чиляса, кылизы.

Константин Емельянов.

Хоспислэн парказ сое витё ни. Пумитаз, инвалид коляскаез донгыса, медсестра вамышъя. Коляскаын – Геннадийлэн кышноез. Азьвыл кадь ик – йыраз кышетэн, вылаз сяська пужыё помазей халат, пыдес вылаз плед. Отысь мычиськемын тапочки йылъёс – таосыз котьку вылесь, лэся. Ма, озьы луоз – Марина дас ар коляскаын пуке ни.

- Чырткем, – Маринаезлэсь бамзэ чупаны мыкырскиз со.

- Умой, – ымнырзэ палэнтӥз таиз.

- Тани – салам, – емышъёсын сумкаез шоры возьматӥз Гена. Мариналэсь яратоно сиёнъёссэ тодэ со. Бадӟым сузьетэн кык пӧлы быдӟа горд виноград. Пичи картофка выллем киви. Краснодарысь улмопуосты адӟылымтэ чилясь вож «Семиринка».

- Кӧня пол верай ни: номыр кулэ ӧвӧл, – пыриськыны вырись картсэ пыже Марина. – Милемыз умой сюдо. Тон ведь тодӥськод. Туннэ сюлмаськон мукет – хосписын воземзы понна тыриськонэз будэтозы. Кык толэзь ортчыса.

- Конечно, конечно. Мон туннэ ик главврач доры пырало, – кышноезлэн кузяз мынэ Гена.

- Тон таки со конструкторской бюрояд на-а? – лек учке шораз Марина.

- Озьы. Кытчы мыном на. Сё же арлыд вань ни. Ужысь уже пуаса, ветлод на шат, – нош ик ассэ  шонере поттыны выре таиз.

- Ачид тодӥськод, ачид ик уксё но утчано луод. Так но ӝыны уждунэд хоспислы кошке, – нукыртэ но нукыртэ нылкышно.

Мариналэн бызгетэмезлы пумит Геннадий куаразэ уг будэты. Кык арнялы  огпол таӵе ӟукыртэм чидамон. Гена ачиз янгыш.

* * *

Дас ар талэсь азьло соос аварие шедизы. Выль тӧдьы «Ладаеныз» Гена кыӵе ке гурт пыртӥ ширтӥз. Бадӟым сюрес дурын пуныеныз ӵош сылӥз пиёк. Сое воргорон ӧз адӟы. Маке муген шузи пуны сюреслэн мукет палаз бызиз. Сьӧраз – пияш. Куалектэм Марина машина рулез ас палаз кыскиз. Гена марзэ-созэ валаса ӧз вуы…

Сазьтӥськиз. Йырзэ ӝутӥз. Кымесыз кот. Ӵушалтӥз – вир. Вӧзысьтыз Маринаез ланьырскемын, пукон вылысь васькемын. Оло шока, оло уг. Бекмыльскем машина котыртӥ адямиос бызьыло. Сиренаеныз жиетыса, вуиз «скорой». Генаез машинаысь поттӥзы. Пыд вылаз султыны со ӧз быгаты. Пул пызен тырмытэм мешок кадь кисмыляк ланьырскиз. Маринаез машинаысь мозмытыку, калык мур шокчиз. Нылкышнолэн пыдъёсыз номырлы ярантэм кадь тӥяськемын. Лы, сӥль, вир…

Больницаын кык арня костаськемез бере Геннадиез дораз лэзизы. Марина сайказ, кык толэзь улыса. Врачъёс со куспын пыдъёссэ гипсэ бичазы. Геналы номыр ӟечсэ ӧз сӥзе. Комаысь потӥз ке – улоз. Пыдъёсыз вылэ уз султы – отын лы пыры.

Кулонлэн кискачысьтыз мозмытскем Марина улэп кылемезлы ӧз шумпоты. Часъёсын-часъёсын со вӧлдэтысь гожъёсты лыдъяз. Дораз эскерыны ветлӥсь картэз пумитэ йырзэ но ӧз берыкъя. Нуналмысь пырамезлы уродъяськиз. Огпол гинэ быдэс ведра лексэ кисьтӥз:

- Адӟемпотостэм. Инвалид карид. Мыным 35 арес. Егит, таза кышномурт вал. Психолог, кандидат. Нош табере? Улэп шӧй.

Гена тазэ но чидаз. Сиён-юонэн тырмытэм сумкаосын, кузьымъёсын ветлӥз больницаысь эмъясьёс доры. ӝыны ар ортчыса, Маринаез лэзёно кариськизы. Таиз мыр-мыр пумитъяськиз:

- Со 44 квадрат метрад уг берты. Витетӥ этаж. Мон отын  КУ-ЛО, – берло кылзэ висъяса, куаразэ будэтыса, вераз.

Геннадий кышноезлэсь мылкыдзэ бералтыны ӧз быгаты. Тодмоосыз пыр утчаськиз-юалляськиз. Тодӥз: город сьӧрысь огзэ нылпи лагерез хоспислы пӧрмытӥллям. Отын векало кулонзэс возьмасьёс. Тросгес – ракен висисьёс. Но вань нимаз отделенизы. Татчы интыяны луэ мукет висисьёсты но. Но улэм-вылэмзы понна дун тыроно.

Та сярысь Гена лякытэнгес вераны выриз Мариналы. Возьмамтэ шорысь нылкышно таӵе югдурлы шумпотӥз. Мыно, шуиз. Озьы Марина дас ар татын ни.

* * *

Туннэ кемалы татчы чукай, главврач доры вамышъянъяз малпаське Гена. Йыгаськиз:

- ӟечбуресь, Владимир Константинович.

- Пыр, Геннадий Михайлович.

- Марина вераз… – мадёнзэ мытӥз таиз.

- Ачид валаськод, – буйгатӥз главврач. – Мариночкалы ми дорын кельше. Чылкыт омыр но персонал солы тупало. Со трослы буйгаз ни, тазалыкез но ӟеч. Зэм, Илизаровлэн аппаратэныз эмъянлы тӥ трос коньдон кисьтӥды. Жаль, толыкез ӧз луы. Марина Максимовна пыд вылаз султыны уг дӥсьты…

Веранэз талэн кузь, однако, пушказ пумитъяськонэз сайказ Геналэн. Главврачлэн одаезлы пум поныса, ӝотрак юаз:

- Тыриськон кӧня луоз?

- Толэзяз 15 сюрс манет. Валасько, тӥледлы секыт луоз. Но тӥ таза, Марина сӧсыр, – нош ик кырӟанзэ мытӥз Константиныч.

- Вормо, – оскытӥз Геннадий.

Воргоронъёс ӝӧк вамен ог-огзылэсь кизэс кырмизы. Таин кыкназэс но жуммытӥсь вераськон йылпумъяськиз.

Табере Маринаен люкиськоно на. Корпуслэн корказяз сӥзьыл омырен шокась нылкышноез Геннадий пыр сӥсъяса учкиз. Аръёс тае уг вошто, малпаз со. Кисыриосыз уг люкасько, куэз вольыт, ӧжыт кӧсыт ке но. Азьвыл сямен буяськиз, сынаськиз ке – мунё кадь луоз. Не уг куайы. Паймоно кадь. Пукись яке кыллись муртъёслэн берпалзы зӧкомыны ӧдъя, шуо.

- Ми кенешим. Ваньмыз азьвыл сямен ик луоз. Мар ваёно мукетъят? – нош ик пыриське воргорон.

- Тодӥськод, номыр но, – мылкыдыз капчигес ӧз луы Мариналэн.

- ӟеч, – кышноезлэсь бамзэ чупыштыны мыкырскиз Гена.

- Юнме, – ымнырзэ мукет пала кариз таиз.

* * *

Паркысь пурысь бус пӧлы вамыштӥз Геннадий. Тыбырзэ сӥсъяз Марина. Пурысь чибинь кадь, малпаз со картэз сярысь. Плащез но, костюмез но уг воштӥсько. Берло дас арзэ одӥг дӥсен ветлэ. Пыдкутчанэз кызьы ымзэ уг усьты на. Пӧрмостэм. Машиназэ но воштыны уг быгаты бере. Аварие шедем «Ладазэ» кытын ке тупатъяллям, лэся. Весь соиныз ик тарккетыса ветлэ.

Геннадийлэн мышкыз ышем бере нылкышно коляскаысь султӥз. Всё, туннэлы спектакль йылпумъяськиз. Марина берло вить арзэ пыд йылаз бызьылэ ни. Илизаровлэн аппаратэз юрттӥз. Табере Марина Максимовна главврачлэн огез юрттӥсез луэ. Соослэн кусыпъёссы огшорыесь гинэ ӧвӧл. Владимир Константинович пумтэм синмаськемын солы. Мариналы ньыльдон витез тырмиз. Солэн ӵапак узы-боры дырыз. Генаез со так пӧя. Хосписэ толэзьлы быдэ келям уксё люкаське нылкышнолэн счётаз. ӝоген Мариналы операцилы тырмоз со. Кышномурт гожтӥськиз ӟеч пластической хирург доры. Волятоз ымнырзэ но, чыртызэ но. Кин тодэ, оло, гадьёссэ, кӧтсэ чебергес кароз. Пыдъёсысьтыз операция бервыллэсь вурысъёссэ но ватыны быгатоз. Соку та нюлэс кушын ӝокаса уз улы. Сое выль улон вите. Владимир Константинычтэк. Тазэ но со уг яраты.

Тӧдьы «Ладаез» доры вуыкуз, Геннадийлэн пельпумъёсыз шонерскизы. Вылысьтыз вужмем курень плащсэ со ӝогак куштӥз. Табере ӝыны час чидано на та вуж машинаяз пукыны. Город пумысь стоянкаын сое возьма выль «Тойота». Кык арнялы огпол Геналы, царевна-бакалы сямен, вуж костюмаз тэрытӥськоно луэ. Ярам, уг куайы. Тазэ со чакла. Тренажёр залын быгытъёссэ золъя. Бассейнын иськемъёс люка.

Кӧня ке ар талэсь азьло Геннадийлэн огез изобретениез туж пайдаё луиз. Городысь бадӟым предприятиын выль технологиосъя пружина дасяны кутскизы. Табере та технологиез пыӵато мукет заводъёсын но. Нош Геналэн патентэз понна манетъёс, ма, долларъёс-евроос люкасько.

44 квадрат метръем патераз со уг ни века. Выль юртэ басьтӥз бадӟым квартира. Вошъя машинаоссэ. Дӥськут но быръе дунозэ гинэ. Шораз синмаськыса учкись нылкышноос пумтэм. Гена долкаса уг улы, мултэс уг калгы ке но. Вань солэн сюлэмызъя тупась нылмуртэз. Таиз кемалась вӧта бызён, нылпи ваён сярысь. Но люкетэ одӥг муг – Марина. Кыкетӥ ползэ Гена сое вӧсь уз ни кары.

Алёна Ионина.

Огкутскемен школаысь вань пиналъёс сярысь уд мадьы: соос татын кык сю пала. Нош куинез сярысь, оло, вераны быгатом ик. Дышетско соос одӥг классын. Уло школалэсь вить иськемысь пичи Кечгуртын. Асьсэлэн школазы ӧвӧлысь сӥзьылзэ но тулыссэ нуналлы быдэ пыдын доразы бертылоно луо. Нош толалтэзэ интернатын уло. Лэзьысалзы ке, кезьыт нуналъёсы но бертылысалзы, вылды. Гуртысь пиналъёслы вить иськем сюрес-а ма? Куке соос шудыса-бызьылыса кызьзэ но ортчо ке. Озьы но ай жадемзэс уг шӧдо. Ӝыт пал гинэ, кызьы но озьы сиськыса но доре сётэм ужзэс лэсьтыса, валес вылазы вуо но соку ик кулэм кадь умме усё ни…

Озьыен, асьме азьын куинь витетӥ классын дышетскисьёс: одӥг пи но кык нылъёс. Бальӟо Васи – тазьы нимало пияшез, фамилиезъя – Зирдамов. Со суд, бабылес йырсиё (пырак алигес вордскем ыжпилэн кадь), питырес ымныро, кӧйгес пияш. Нылъёс, лапеггес луэменыз, вылды, сое исам каро, олокызьы но серекъяны выро. Васи кӧёк ке но, пуксетэз чик ӧвӧл, урокын но юла кадь берга. Контрольной уж луэ ке, мышказ пукись Борисов Колилэн я азяз пукись Бочкарёва Надилэн тетрадьёсазы учке. Удалтӥз солы: кык визьпогъёс вискы учыраз. Аслаз задачаез уг пӧрмы ке, кудзылэсь ке но «нюлыштыны» виссэ шедьтэ. Дышетӥсьёс адӟытэк уг уло Василэсь «лушкаськемзэ». Соин ик отметкаосыз улӥынгес луо. Василэн верамезъя, со нырысь пал аслэсьтыз правозэ качатьтыны выриз ик вал, но проваличкиз.

Валя Пискунова но Маша Волкова кыксы но «ньыльлы» но «витьлы» дышетско. Соос мукет пиналъёслы адӟем карымонэсь, туспуктэмъёссы школаысь данъян пул вылэ ошемын. Вали горд йырсиё, ымныраз тулыс пужы наш-наш киземын. Сямыз востэм, лушкем, малпанъёссэ ваньмыз азьын уз шарая. Машилэн ымнырыз миськем сяртчы кадь чылкыт, йырсиез чиганлэн выллем сьӧд-сьӧд. Малпанэз йыраз ӝамдэлы но уг ӝегалля – ури-бери кыре потэ. Сыӵеос сярысь калыкын верало: мар ке йыраз, со ик кыл вылаз…

Со но та вераськыса, нылъёс кыштыр вамышъяло гурт палазы. Мышказы Васи. Солы кӧня ке мынэмез бере мӧзмыт луиз, лэся. Пыд улысьтыз кускылиез ӝутӥз но Валя шоры лэзиз (тодэ ук: со либыт, пунэмзэ уз берыкты) но йӧттӥз эшсэ. Маша чалмыт ӧз улы, усем кускылиез ӝутӥз но пияш шоры лэзиз. Васи лапырскиз – кускыли йыр йылтӥз лобӟиз. Маша выльысь лэзён понна эшшо мар ке утчаны кутскиз. Со вискын Васи, нылъёслэн азьпалазы потыса, бызьыса кошкиз. Нырысь пал мышсэ учкылӥз ик, бӧрысь, уйись ӧвӧлысь, буйгаз, лэся. Нош тани меӵ Бырдам нюктӥ васькыкуз, сое шӧдтэк шорысь туж зол донгись луиз. Васи кымин усиз… Нылъёс, гурак серектыса, вӧзтӥз бызьыса ортчизы.

Ог ӝыны иськем мынэмзы бере Валя, мышсэ учкылыса, шугъяськыны ӧдъяз:

- Васямы весь уг адскы на. Татчыозь со нюкысь потыны кулэ ни вал. Вӧсь ӧз луы меда? Укыр зол донгид кадь…

- Султоз ай, мар луоз солы, – меӵкытӥз Маша. – Ӝамдэ кыллиз ке но, толалтэ ӧвӧл – уз кынмы.

- Котьмар ке но мон сое чакланы ветло ик ай.

Лулыз шӧдӥз, Васиен мар ке но умойтэм шуыса. Озьы ке ӧй луысал, пияш соосты кемалась сутысал ни. Нош со ӧвӧл но ӧвӧл. Маша Валяез дугдытыны турттэ вал, но эшез ӧз кылзы. Валяез кызьы ке но вӧсьгес бышкалтон понна кеськиз:

- Мын, мын, ойдо! Оло, туган кутоз! Ато шорад пал синмыныз но уг учкы!..

Валя та курыт верамез кылымтэ улсы кариськиз. Сыӵе-сыӵе серем каре матысь эшез. Эшшо ке ӵош пуко. Ма бен, Валя шӧдытэк уг улы, Маша ассэ гинэ яратэ шуыса.

Таӵе тур-пар малпан бугорзэ сэрттонъяз Валя Бырдам нюке вуэмзэ ик ӧз шӧды. Шугъяськыса учке Васиез. Зэмзэ ик-а со нюкын на? Оло, кемалась султэмын-кошкемын ни! Нош кытчы? Синйылтытэк ӧм кыльысалмы ук! Татын нюк кузя гинэ писпуос будо. Отӥяз – бусы! Нёшто кытчы ке ватскиз но шоккетэ?

Валялэн сюлмыз юнме шугъяськымтэ, Васи, кызьы нырыныз нюк уллань сапкиськиз, озьы ик вырӟылытэк кылле. Валя пияш доры бызьыса васькиз. Куалектытӥз музъем вылысь вир но… Со кымин кыллись Васиез берыктӥз но шимес суредэз адӟиз: Василэн синмыз кынемын, ымнырыз кӧдэктэмын. Нош мылазьыз вирен орсмемын. Мар озьы мертчем? Валялэн син шораз музысь чигем йылсо улвай йӧтӥз. Ӵапак тупаны но кулэ ук! Шока на-а коть? Вир шоры учкытэк, пельзэ Василэн гадь бордаз лякиз. Сюлмыз, каллен ке но, жугиське на…

Валя Васиез пельпумтӥз сэзъяз, кык киыныз ик бамъёсаз чабкылӥз.

- Васи, Васи, султы! – тэльмыриз со.

Васи, синзэ каллен усьтыса, Валя шоры учкиз:

- Кытын мон? Малы татын кыллисько?

Валя, валэктэм интые, шумпотэмзэ вераны ӧдъяз:

-Ой, сайкиськиз!.. Ой, улэп!.. Кыӵе умой!.. Ма, тон Бырдам нюкын… Я, пуксьы ай… Адӟиськод-а? – пал киыныз эшсэ усемлэсь возьыса, мукет киыныз виресь улвай шоры возьматэ: – Тӥни со ваен сэрен тон йырсазьдэ ыштэмед… Ма, ми но вань ни… Кулэ-а вал сыӵе кордым шоккетыны? Тон, Васи, простить кар милемыз… Пожалуйста!

Валя янгышез ас вылаз кыскыны кутскиз. Ма, собере соос Машаен ӵошен вал ук. Валя ӧз алы Машаез. Озьыен, со но янгыш татын. Нош мукет ласянь учконо ке, кин тодӥз, Васиен шудтэм учыр луоз шуыса?

- Васи, гадьыд туж-а висе?.. Гуртэ бертыны быгатод-а?.. Ойдо ай утчалом султыса… Сумкадэ мон нуо. Кунулскы бордам. Эн кышка, мон кужмо. Табере каллен вамыштом…

Василы вӧсь ик, лэся: ымнырыз кисырске ке но, кужмысь пальпотыны турттэ, нылмурт азьын вӧсь луэмзэ шараямез уг поты. Ма, со пиосмурт ук! Нош воргоронлы атаез верамъя юн, кужмо луоно, астэ армилы дасяно.

Секыт вал меӵ нюкысь потон. Ӵошкыт азетӥ мынон капчиязгес. Кӧня ке метр вамышъямзы бере шутэтскыны ожо вылэ пуксизы.

Со вакытэ гуртаз вуэм Маша сюрес пала огпол, кык пол учке – уг, уг адско бертӥсь эшъёсыз.

- Маке но умойтэм та! – шугъяськыны ӧдъяз со. – Оло, зэмзэ но Васиен мар ке луиз?

Ӵемысь пиос асьсэос янгыш: я йырситӥ кыско, я, пыдзэс пуктыса, канжато… Ӧжыт-а сыӵе учыръёс? Кызьы усиськом, озьы ик султӥськом!

- Нош кытын таос? – Маша выльысь укное мертчиськиз. – Сюрес одӥг, мукет азьтӥ бертыны кулэ ӧвӧл. Куазь ӝытлань кариське ни. Ӝоген пеймыт луоз. Сӥзьыл нунал пислэг вамыш кузьда сяна ӧвӧл. Тазьы шугъяськыса улытозь, пумитазы пото ай – возьмаськон но уйиськон кадь секытэз номыр ӧвӧл…

Маша гурт сьӧры потыку, шунды инвис сьӧры ватӥське ни вал. Кӧня метр вамышъяса вуттӥз нылаш? Ӝыны иськем шат? Тӥни соку гинэ вырйылысь матэктӥсь эшъёссэ синйылтӥз. Сюлмыз ганяк луиз. Иське, юнме шугъяськем. Но маке соос укыр каллен лыкто. Возьмаса улытозь, пумитазы ик вамышто ай, малпаз нылмурт.

Эшъёсыз доры матэктыса, Маша адӟиз: Валя Васиез кунултыса азьлань кыске, пельпумъёсаз сумкаос шонасько. Кыксылэн ик йырсиоссы котмемын-пӧсямын. Жадем синъёссы кыниськыны туртто…

Машаез адӟыса, соос паймизы. Ӧз возьмалэ уго, гуртаз бертэм Маша шуныт коркасьтыз ӝытлань соослы луыса потоз на шуыса. Мар луиз соин? Нёшто мукет адями сярысь сюлмаськон кидыс со пушкын улӟиз? Осконтэм! Но Маша лыктӥз. Лыктӥз бере, ӧпкелёнэз пӧсьтӥз, луоз.

Шӧдтэк шорысь Васиен Валя азе Маша пыдес вылаз уськытскиз но ӝожмыт куараен сюлворыны кутскиз:

- Васи, Васи, мон янгыш!.. Простить кар!.. Мон тыныд урод лэсьтыны ӧй малпа вал… Шорам кускылиен лэземедлы пунэмзэ берыктэме потӥз. Вождэ эн вай.