Суредаськон – спорт кадь ик

Алнаш ёросысь Азамат гуртын будэм пияшлэн ужъёсаз бадӟым инты басьто пейзажъёс. Творчествояз озьы ик пумиськыло живопись, графика, старт-арт амалъёсъя быдэстэмъёсыз но.

Женя тодаз вае таӵе учырез: 6-тӥ классын суреданы косӥллям кельшоно удыссэс-ужзэс. Соку пияш ассэ суредаськисен син азяз пуктэм. Шуак кылдэм мылкыдыз юнме вылымтэ – школа бере вамыштӥз УдГУ-ысь искусствоосъя но дизайнъя институтэ. Ай дышетскыны пырон азяз тодматскиз Удмуртиысь калык суредасен Семён Виноградовен. Солэн дэмламезъя Женя суредасьёслэн курсъёсазы ветлыны кутскиз. Виноградовлэн верамез али но пель сьӧраз на: «Киярез мерттӥд ке, котькӧня ву кисьта, емышсэ со вазьгес уз сёты». Озьыен, ваньмызлэн аслаз дырыз.

Берло дыре Бикузинлы вазисько, портрет лэсьтыны курыса. Аслыз тужгес но яра тӧдьы бумага вылын сьӧд карандашен суредаськыны. Куддыр соин вырыны мылкыдыз пуксьылэ ке но, карандашез кутоно луэ ик. Суредаськон – спорт кадь ик: весь дасяськемез кулэ каре.

«Чипчирган» – тубат

Суредаськонэн ӵош Же­ня крезьгурен но тунсыкъяськыны кутскиз. Нырысь басьтӥськиз арган борды. Ӝоген кияз вуиз агаезлэн гитараез. Но таин гинэ крезьгур усьтонъёсыз ӧз йылпумъяське. Удмурт кун университетэ пыремез бере «Чипчирган» ансамбле вуиз. Отын удмурт эктон гуръёсты арганэн векчи кыскаса шудыны, кубызлэсь сиоссэ бичаны дышиз.

«Чипчирган» сярысь ке верано, пияшлы со туж кельшем вашкала удмурт крезьгуръёсты утеменыз.

- Быгатӥсь адямилы «Чипчирган» тубат выллем луэ, юрттэ будыны но азинскыны, – шуэ Женя. – Со удмурт егитъёслэн аспӧртэмлыко школазы, отысь пото зэмос азьветлӥсьёс.

Бикузин пыриськиз Петрозаводскын ортчем калыккуспо фестивале. Отын со, арганзэ векчи кыскаса, шудӥз. Та бӧрсьы «Чипчирган» вуылӥз Польшае.

- Соку мон нырысьсэ кунгож сьӧры потай. Мыным отын туж кельшиз. Пумитазы умой. Нырысь малпазы: ми – ӟучъёс, туж паймизы удмуртъёс шуыса тодэмзы бере. Нош 2011-тӥ арын Эстоние вуылыны удалтӥз, – шуэ усточи.

Шунды уг пуксьы на

Ижысь удмурт позыръяськонъёсты егит кырӟасьёс шулдыртыло. Соос пӧлын «Аmiso Wott» группа но. Женя соку «Шумпотон» ансамбльын акустика гитараен шудэ вал. Нош «Аmiso Wott»-лэн ӵапак гитараез вылымтэ. Озьы Бикузин та группалэн оглюкетэз луиз.

- Мынам, школаын дышетскыкум ик, льӧль малпанэ вал – кылдытоно рок-группа. Малпанэ быдэсмиз, шуыны луоз. Ми быдэсъяськом мылкыдэз ӝутӥсь, серемес кырӟанъёсты.

Азьланезлы планъёсыз сярысь пияш вераськыны уг яраты. Озьы ке но мылкыдъёссэ усьтӥз ик:

- УдГУ-эз йылпумъяса, дышетсконме азьланьтэме потэ Европаын. Кылсярысь, Таллинысь художественной академиын. Нош туэ гужем пуэз чильпан бордын выро.

Бикузинлы «Грифон» галереяын адӟытон ортчытыны ӵектӥз Александр Старков. Женялэн та нырысетӥ выставкаез. Ужъёсcэ учкыса, валано: пияш «будэм». Синме йӧтэ на соиз но: тросаз суредъёсаз возьматэмын шунды пуксён вакыт. Женялэн верамезъя, со солэн тужгес но яратоно дырыз. Озьы ик синйылтоно, макем Бикузин вордӥськем палъёссэ яратэ!

Адӟытонэз усьтонэ трос адями люкаськиз. Соосты шулдыртӥзы «Чипчирган» ансамбль, «Гаруда» группа, Дарали Лели dj-сетэныз. Люкаськем калык азьын Женя кык суред лэсьтӥз.

Маша Золотарёва.

Адӟытонэз радъяны юрттӥз Москваысь Вооружённой кужымъёслэн музейзы. Иже вуттэмын 90-лэсь ятыр экспонатъёс. Кыӵе гинэ ож тӥрлык кузьмаллямтэ Совето Союзысь компартилэн валтӥсь секретарезлы Леонид Брежневлы, СССР-лэн маршалъёсызлы Климент Ворошиловлы, Дмитрий Устиновлы, Родион Малиновскийлы, Игорь Сергеевлы. Пӧлазы тани Корея Республикалэн йырыз Ким Чен Ирлэн кузь сабляез но. Сое со кузьмаз Совето Союзысь армилэн генералэзлы Василий Петровлы. Экспонатъёс пӧлысь пумитаны луоз на та тодмо адямиослэсь улоназы кутӥськись пӧртэм арбериосты, дано конструкторлы Михаил Калашниковлы кузьмам пыӵалъёсты, пуртъёсты но мукет тӥрлыкъёсты.

- Та адӟытон пыртэмын Россиысь Культурая министерствоен радъяськись проектъёс пӧлы, – вера Удмурт Республикаысь культурая, иворъёсъя но печатья министрлэн воштӥсез Нелли Собина. – Солэн данэз бадӟым – угось ортче Пыӵал тӥрлыкез поттӥсьлы сӥзем аре.

Возьматон кыстӥськоз июнь толэзёзь. Со вие азьланьтӥське мукетыз адӟытон – Бородино бусыын ортчем ожлы 200 ар тырмонлы сӥземез.

Елена Тугашова.

Адӟытонысь «Корка» люкет.

Ижысь Киужъёсъя юртын Шаркан ёросысь усточиослэн возьматонзы усьтӥськиз. Отын кузёясько вурем мунёос но коӵышъёс.

Котькудӥз усточи киужъёсаз тырше чеберлыкез возьматыны, выльзэ малпаны, калыкез паймытыны. Огшоры басма, писпу сул, куар, вай но выжы пӧрмо паймымон чебер но дуно арбериослы. Оглом вераса – выжыкыллы.

- Шаркан музъем вылын быгатӥсь адямиос уло. Соослэн гинэ шаркан шортдэремзы вань. Киужъёссы Париже но вуылэмын. Отысь вормонъёсын бертылэмын. Шаркан усточиослэн мунёоссы шунытэсь, чебересь, мусоесь – пырак асьсэос кадесь. Котькудӥзлэн мунёлэн аслаз сямыз. Соосты учкыса, шӧдӥськод, тани-тани соос улӟозы, вераськыны но шудыны кутскозы, – тазьы дунъяз адӟытонэз история наукаосъя доктор Владимир Владыкин.

Выставкаез учкисьёс эшшо одӥг паймымонзэ пусйизы на: тросэзлэн мунёослэн йырсизы ӵыж-ӵыж горд.

- Шарканын трос горд адямиос уло, соин ик мунёосмы но ӵыж-ӵыжесь, – вера Шарканысь Кибашлыослэн юртэнызы кивалтӥсь Надежда Фёдорова.

Адӟытонлэн мукетыз валтӥсь героез – коӵыш. Соин герӟаськем адӟытон куинь люкетлы люкемын: «Азбар», «Корка», «Уж». Ваньмаз кузёяське коӵыш. Со котькытын ассэ капчи шӧдэ: пукон вылэ но пуксёз, койка вылэ но выдоз, керттӥськись кузё кышнолэн бугореныз но шудыны вуоз. Сое куаретӥсь уз луы.

- Коӵыш юнме шорысь быръемын ӧвӧл, – шуэ Н. Фёдорова. – Пытьыоссэ удмуртъёс вашкала дырысен ини пужыятылӥзы йыркерттэтъёсазы, ӵушконъёсазы, кускерттонъёсазы. Коӵыш – юрт котырез утись, кузёзэ витись но семьялы шуд вайись. Солэн сямыз пӧртэм: шудӥсь, нуныяськись, лекъяськись, уродъяськись.

Любовь Тихонова.

А. Ситникова но Е. Арвин кенешо.

Толэзьлэсь кема Ижын ужаз «Ыж гон пилем» адӟытон. Сое дасяз «Гнездо» огазеяськонлэн кивалтӥсез Елена Арвин. Тросэзлы та усточи мунёос лэсьтылэменыз тодмо. Но берло ньыль арзэ солэн кичӧлтэмезъя Ижысь кибашлыос ыж гонлэсь пӧртэм арбериос лэсьтылыны кутскизы.

Ыж гон пыдвылъёслы-пӧзьыослы, гын сапегъёслы асьмеос дышемын ини. Нош нуны бинялтонъёсты, сумкаосты, кильтыръяськон арбериосты сокем ӵем адӟылэммы ӧвӧл. Елена Арвин верамъя, та творчество дунтэм ӧвӧл. Кибашлыос, магазинысь буёло ыж гон басьтэм сяна, одно ик гуртъёсы потало на – сузямзэ, тугемзэ отысь ваё.

- Соосты сураса, туж ӟеч материал пӧрме. Одӥг ласянь, та узырлыкез ачиз инкуазь киямы сётэ кадь. Мукет ласянь, со туж вашкала но туж туала луэ. Берло дыре адямиослэн бадӟым тунсыксы кылдӥз ыж гонлы, милям но бере кылеммы ӧз поты. Соин ик радъямы мастер-классъёс. Мылкыд карисьёс выставкаямы ик утчаны быгатӥзы та материаллэсь кылзӥськись луэмзэ, – шуэ Елена Арвин.

Куинь ар ини ыж гонэн эшъяське Ижысь кибашлы Анна Ситникова. Солэн мудрон сумкаосызлы, весьёсызлы, сяськаосызлы синмасько ваньзы.

- Ыж гон – шуныт материал, сое мон горд сюен ӵошатӥсько, соос ӵыжы-выжыос выллем. Кызьы соизлэсь котьма лэсьтыны луэ, таиз но киын сыӵе ик кылзӥськись. Солэсь дӥськут, пыдкук сяна, мебель но пӧрмытыны луэ.

Мон али тросгес ужасько кильтыръяськон бордын. Одӥг сяська брошь лэсьтӥсько одӥг нунал. Соос пӧрмытэмын кӧс амалэн. Нимысьтыз пинё-пинё венен. Ыж гонэз бышкылоно. Веньлэн пинё люкетъёсыз сое тугало, со гынме, чурытоме но тӥледлы тупась формалы пӧрме. Таӵе амалэн ик киужлэн ёзъёсыз куспазы герӟасько. Соин ик люкетъёсты вуроно ӧвӧл ни – куспазы тач-тач кырмисько.

Нош сумкаосты, выж лёгетъёсты, изьыосты кот амалэн лэсьтоно. Шуом, сумкалы кулэ луоз ыж гон, буёло шорт. Выж вылэ валёно ву пыӵасьтэм материал яке клеёнка. Со вылэ вӧлдоно ыж гонэз. Майталэз векчи пыргытоно но пӧсь вуын сылмытоно. Собере ыж гонэз со вуэн солань-талань маялляно. Ыж гон огез борды мукетыз мед кырмиськоз. Озьы кӧня ке полэс тыроно, нырысь огшорызэ, бќрысь буёлозэ, нош ик майтал вуэн маялляно. Тӥледлы 2 сантиметр зӧкталаем «басма» кулэ ке, ыж гон «шобретты» 4 сантиметрлэсь векчи медаз луы. Ваньзэ шонер лэсьтӥды ке, куашкасьтэм но огъя суредо басма кылдоз. Солэсь вузэ пызьыртоно но, сумка лэсьтӥськоды ке, сумка кадь ик карыса, куасьтоно. Уд дыртӥське ке, ӵушконэн ӵушылыса, сое кык-куинь нунал возёно. Ӝоггес кулэ ке, зол-зол пызьыртыса, шуныт интые пуктоно. Куасьмем сумкаез кин ке пужъятэ, кин ке турлы бирдыос вурӟылэ. Мон ыж гонлэсь лэсьтэм сяськаосме ик бордаз юнматӥсько яке вылӥын верам веньёсын ик сумкае, векчи-векчи бышкыса, пужы пуктӥсько, – шуэ Анна Ситникова.

Егит усточи одӥг сумказэ кык-куинь нунал куспын вуттэ. Киыз уго волямын ини. Ыж гон борды кутскыкуз, со тодэ: мар лэсьтоз, кыӵе буёлъёсты кутоз, буртчин сӥньысъёсын яке лентаосын гындоз.

- Тулыс вуэ, соин ик киужъёсам яркыт буёлъёс, сяськаос трос. Коньдон понна уг, аслэсьтым мылкыдме ӝутон вылысь тазьы вырисько. Собере мон нылмурт ук, соин ик мукетъёсызлэсь висъяськыны, кильтрогес луыны тыршисько. Уго таӵе сумкаосты, шляпаосты, весьёсты магазинысь уд басьты.

Галина Семёнова.

Ижысь Кузебай Герд нимо гимназиысь покчи кибашлыос.

Куатетӥ арзэ ини Ижысь Нылпи киужъёсъя юртын усточиослэн адӟытонзы радъяське. Туэ со кыстӥськоз 25-тӥ мартозь. Адӟытон «Удмурт шӧмын, удмурт сямын» нимаське. Татын озьы ик ортчыло шаертодонъя урокъёс, мастер-классъёс но удмуртлыклы сӥзем музон ужрадъёс.

Адӟытонэ пӧртэм ёросъёсысь 300-лэсь уно ужъёссэс вуттӥллям мӧйыос но нылпиос. Маиз но отын ӧвӧл: ӵушконъёс, ӝӧккышетъёс, кутъёс, мунёос, шкатулкаос, вазаос, выж лёгетъёс, суредъёс…

- Котькуд ар ад­ӟытонмы пӧртэм луэ, – вера выставкаез радъясь Нина Тарасова. – Туэ трос саклык висъямы куэм арбериослы. Кылсярысь, Пичи Пурга ёросысь Вуж Мӧнья гуртысь Юлия Фомина туж чебересь куэм ужъёссэ вуттэм.

Ужрадэ мыло-кыдо пырисько Кузебай Герд нимо гимназиысь покчи классъёсын дышетскисьёс но. Соос куэм дэремъёсын дӥсяллям мунёоссэс. 2-тӥ классысь Настя Фёдорова, Маша Наймушина но Саша Березин ужъёссэс нималлям «Пукон корка» но «Куно пумитан». Пиос, пе, мунёосын уг шудо, нош Саша сыӵе паймымон мунё вурем, солы куэм басмалэсь дӥськут дасям. Учкисьёслы тужгес но кельшиз 5-тӥ классысь Даша Корепановалэн «Пирдан дасян» проектэз. Та уженыз нылаш республикаын нырысетӥ инты басьтӥз ни вал.

- Адӟытонэ тросэз нылпиос пыриськыны мылкыд каризы вал, – вера гимназиысь киужъёсъя кружокен кивалтӥсь Лилия Байкова. – Но ваньзы лыктыны ӧз быгатэ. Мунёосмы удмурт шӧмоесь мед луозы шуыса, кутӥськомы куэм басмаосты. Соослэсь нылпиос чалма, кышет, айшет но дэрем вуро. Котькуд мунёлэн аслаз сямыз, аслаз дӥсез. Покчиос соосты, вань сюлэмшунытсэс поныса, лэсьто.

Ижысь 59 номеро школаысь дасо пала пияшъёс адӟытонэ тунсыкоесь киужъёссэс вайиллям.

- Пиос олокыӵе но арбериос лэсьтыны даурто, – шуэ пуэз вќлонъя кружокен кивалтӥсьсы Олег Иванов. – Туж шаплыесь соос. Ог-огзылэсь адӟем карыса, мукетъёсыз но ми доры кыстӥсько. Озьы пиёкъёс ӟеч ужлы дышо, ульчаетӥ токма уг ветло.

Кыдёкысен ик пишто борддоре ошем ӵушконъёс. Соосты пужъятэм Ижысь 14 аресъем Аня Юмшанова. Эгра ёросысь Зура школа-интернатысь нылпиослэн ужъёссы но паймымонэсь.

Устоосыз пӧлысь устоосыз киужъёс выставка пумын пусъемын луозы кузьымъёсын но дипломъёсын.

Любовь Тихонова.

Яратӥсьёслэн нуналзы азьын Ижын усьтӥськизы уно сюрс розаос, тюльпанъёс, гербераос, гиацинтъёс но мукет турлы сяськаос. Туэ 14-тӥ ползэ шоркарын радъяське «Удмуртиысь сяськаос» адӟытон.

Таӵе паймымон кузьым дасязы городын улӥсьёслы но куноослы шаерысьтымы сяська будэтӥсь огазеяськонъёс. Ӟырт кезьытысь небыт тулысэ вуиськод кадь! Сяська зынъёс йырез поромыто, соослэн горд, ӵуж, лыз, вож кисьтаськись буёлъёссы синъёсты палёмыто.

Мар но малпаллямтэ дизайнеръёс! Сад-бакчаоссэс шулдыртон амалъёс шедьтозы татысь мӧйыос, нылпиосты паймытозы пӧртэм мунёос, шулдыр паровоз, ангелъёслэн корказы но трос мукетыз.

Адӟытонэз усьтыса, «Удмуртиысь сяськаос» огазеяськонлэн кивалтӥсез Марат Аухадеев вераз:

- Шаерысьтымы предприятиос ог дасо ар талэсь азьло 1 но ӝыны миллион пала сяська уд будэто вал. Туэ та лыдпусэз 15 миллионозь вуттӥм ни. Арлы быдэ будэтӥськом сяськаосмылэсь ӟечлыксэс. Туннэ соос чик но уродэсь ӧвӧл Голландиысь но мукет азьысь ваем будосъёслэсь.

Марат Габдулхаевичен соглаш кариськиз Кун Кенешлэн Тӧроез Юрий Питкевич. Шуиз, со котьку но басьтэ Удмуртиын будэтэм сяська тугокоосты гинэ. Асьмелэнъёсыз ческыт зыноесьгес, мусоесьгес, сюлэмез шумпоттӥсесьгес.

Ижлэн йырыз Александр Ушаков тау кариз сяська будэтӥсьёслы тулысысен бер сӥзьылозь городысь урамъёсты шулдыртэмзы понна.

- Тӥледлы луыса шоркарамы улӥсьёс дышизы ни чеберлы, – пусйиз со. – Асьсэос но тыршо городмес шулдыртон понна, мыло-кыдо пырисько «Ижевск – сяськаясь город» конкурсэ.

Арлы быдэ таӵе адӟытонэ ог 40 сюрс адями вуылэ.

Элина Кумачёва.

Можгаысь киужъёсъя центрен кивалтӥсь Елена Степанова.

Выль арлы ӟеч кузьым дасяз Удмуртиысь киужъёсъя центр. Алигес татын усьтӥськиз куинь ёросъёсты огазеясь адӟытон. Воткинск, Можга но Вавож районъёсысь кибашлыослэн юртазы тыршисьёс чебер, тунсыко но турлы ужъёссэс татчы вуттӥзы.

Вашкала дырысен удмуртъёс кибашлы луэменызы паймытъязы. Пересьёсмы усто вӧлӥзы-гыркйизы пуэз, улӟытӥзы горд сюез, куиськизы, черсӥськизы. Асьсэлэсь тодон-валанъёссэс выжыысь выжые кельтылӥзы. Табере, вашкалазэ тодэ вайыса но утьыса, егит усточиос туала киужъёс малпало-лэсьто ини.

Кылсярысь, Воткинск ёросысь кибашлы Светлана Яхьяева вакчи дыр куспын дышиз вольыт куиськыны. Солэсь турлы пужыё ӵушконъёссэ, ныпъетъёссэ, сумкаоссэ но выж лёгетъёссэ тросэз тодмало ини. Вавож ёросысь киужъёсъя юртысь Ирина Мышкина вуттӥз куэм ковёръёссэ. «Азвесь кизили», «Палэзь ӟуски», «Беризь» гобеленъёсын суредэз но буёлъёсыз туж умой пӧлэстӥсько, ог-огенызы «шудо».

Республикаысьтымы киужъёсъя центрлэн кивалтӥсез Рафхат Каримов пусйиз, таӵе адӟытонъёс туж шер луо. Соин ик уката но шумпотоно, куинь ёросъёсысь усточиос асьсэлэсь киужъёссэс огдыре но артэ возьматыны быгато шуыса. Нимысьтыз пусъёно вавожъёсты. Ёросысь кибашлыослэн юртсы усьтӥськиз 2009-тӥ арын гинэ. Озьы ке но вераны луэ ини, соос шонер сюрестӥ мыно, мылысь-кыдысь тыршо но ужамзылэн емышез адске ини, шуиз Рафхат Мухаметович.

Тунсыко ужъёс вуттӥлям можгаос. Татысь киужъёсъя юрт усьтэмын ини 1993-тӥ арын. Туннэ нуналлы отын ужа 7 усточи. Киужъёсъя центрлэн кивалтӥсез Елена Степанова верамъя, та адӟытонэ вуттӥзы тужгес чебересь арбериоссэс.

- Котькуд кибашлы сярысь трос вераны луоз, ваньзы соос  туж устоесь. Тани Вероника Баженовамы басма юдэсъёслэсь шобретъёс вуре, кызьпу туйлэсь суредъёс лэсьтэ. Соос ӝажы вылын уг кыллё, юасьёс-басьтӥсьёс трос, калыклы кельшо. Наталья Зайцева Удмуртиысь культура удысысь дано ужась. Пуэз чеберъя-буя, шкатулкаос, черсъёс лэсьтэ. Буёлъёсты аспӧртэм огазея но, паймымон тусо арбериос пӧрмо. Озьы ик Наталья Васильевна нырысьсэ, дыр, ӟуч мунёослы удмурт дэрем дӥсяз – пу матронъёсты удмурт пужыосын буяз. Куролэсь кудыос, тусьты-пуньы, кильтыръяськон арбериос лэсьтэ Зоя Щепина. Ёросын но шаерамы ортчылӥсь адӟытонъёсы пыриськиськом, вуоно гужем дасяськиськом Елабугае. Отын ортчоз Спасской выставка, асьсэлэсь ужъёссэс вуттозы Россиысь усточиос, – шуиз Елена Степанова.

Вавож, Можга но Воткинск ёросъёсысь кибашлыослэн адӟытонзы ужалоз 15-тӥ январёзь.

Галина Семёнова.

Туспуктӥз Владимир Беломорских.

А. Ядыгарова.

Удмурт Республикаысь киужъёсъя центрлы туэ 20 ар тырмиз. Юбилеен валче татысь усточиос бадӟым адӟытон радъязы.

Та ужрадэз усьтыны шуд усиз Удмурт кун университетысь «Чипчирган» ансамбльлы. Кырӟасьёс шуныт мылкыдзэс кузьмазы. Киужъёсъя центрлэн кивалтӥсез Рафхат Каримов люкаськемъёслы тау кариз, вакчияк вераз татын тыршисьёс сярысь. Трос шуныт кылъёс, таукаронъёс чузъяськизы. Тодазы вайизы та юртлэн кылдэмез сярысь, кыӵе шуг-секытъёсты вормоно луиз ужасьёслы.

Юбилей бордаз люказ национальной политика, история, культура но мукет удысъёсысь адямиосты. Соосты огазея удмурт культураез азинтон мылкыд.

Адӟытон узыр паймымон киужъёсын: куэм дэремъёс, ӝӧккышетъёс, миндэръёс, мунёос, пулэсь но туйлэсь пӧрмытэм сарваос но пичи сандыкъёс ӝик-ӝик  интыяськиллям. Выставкае вуэмъёс, котькуд киуж доры дугдыса, кема учкыса сыло.

Киужъёсъя центрлэн кивалтӥсезлэн воштӥсез Ольга Пислегова шуэ:

- Таӵе адӟытон кылдытон вылысь милям усточиосмы ар ӵоже мылысь-кыдысь тыршизы. Выставкаез озьы ик 20 ар ӵоже кылдытэм турлы-турлы киужъёс узырмыто на. Арбериос пӧртэм амалэн быдэстэмын: куэмын, чильпамын, туйлэсь, куролэсь но пулэсь лэсьтэмын. Котькудӥз киуж возьматэ усточиосмылэсь кибашлы луэмзэс.

Альбина Ядыгаровалэн нимыз, Удмуртиын но Россиын сяна, кунгож сьӧрын но тодмо ини. Куэм киужъёсыз паймыто узыр пужыосынызы. Усточилэн дышетскисьёсыз но усто мастеръёс луэмын ини:

- Мон татын 18 ар пала ужасько ини, соин ик центрмылэн азинскемез син азям ортчиз. Удмурт куиськон бырон калэ вуэ вал ни, туэ тани со йыг-йыг пыд вылаз султӥз. Сое возьмато трос выставкаос, али радъям адӟытон но. Таяз возьматэмын туала интерьер. Котькуд киуже – импровизация. Куиськон станок сьӧры капчи мылкыдын пуксьыны турттӥсько, сотэк киуж сокем усто уз пӧрмы.

Мукетыз кибашлы – Любовь Бывальцева – 3 ар ӵоже пуэз суреда. Ужъёсаз воршуд, нюлэскузё но удмурт мифологиысь мукет образъёс лэсьтэмын:

- Учкисьёс тодматскыны быгатозы вить суредъёсыным. Панно вылысь сюжет сярысь верано ке, со пӧртэм сямен кылдыны быгатэ: яке калык мадёсэз, выжыкылэз лыдӟыса, син шорад суред пуксе, яке мукет учыръёс мылкыдэз бурдъяны быгато. Пуэн огкыл шедьтыны кулэ. Со ассэ керӟег возе: мыдлань интыын чигиське ке, соку малпам суредэз ӝогак воштоно луэ.

Удмурт йылолъёсты, сямъёсты, культураез утён но азинтон вылысь ик 1991-тӥ арын кылдытэмын вал та центр. Азяз пуктэм ужпумез кибашлыослэн юртсы туннэ но ӟеч быдэстэ.

Ангелина Снигирёва.

Таяз ужрадэ пыриськиз Россиысь 13 улосысь 75 предприятие. 2 сюрс 700 квадрат метр площадьын экспонатъёссэс возьмато Москва но Санкт-Петербург городъёс, Калуга, Киров, Новосибирск, Самара, Свердловск, Саратов, Пермь улосъёс, Башкортостан, Татарстан, Чувашия но Удмуртия. Адӟытон возьматэ пӧртэм вузъёсты: электрокужым поттонын, шуныт сётонын выль утчанъёсты, тыл техникаез, шунытэз, энергиез, чагыр эстӥськонэз, вуэз шыръян но эскерон приборъёсты. Тани Ижевскысь «Акватория тепла» компания, предприятиослы сяна, калыклы но трос тӥрлык дэмла: ву кыскон насосъёс, фонтанъёс,  мунчо гуръёс, газэз эскерон счётчикъёс но мукетсэ.

Россиысь вузъёсын сяна, отын тодматскыны луиз кунгож сьӧрысь странаослэн азинсконъёсынызы.

Ужрад ортчыку, озьы ик радъямын вал та удыслы сӥзем пӧртэм пумо семинаръёс.

Выставкаез радъясь комитетэн кивалтӥсь, Правительстволэн Тӧроезлэн воштӥсез Ильдар Бикбулатов адӟытонлы вылӥ дунъет сётӥз.

- Электрокужымез поттонын но сое шыръяса кутонын арысь аре выль амалъёс кылдо, татысь адӟиськод: та удыслэн туж трос на ай азинскон сюресъёсыз, – пусйиз со.

Иван Аркашев.

- Емыш бичан дыр – со мон понна сӥзьыллэсь кузьымъёссэ октон вакыт  гинэ ӧвӧл, та адӟытонэным мон уно аръёс ӵоже ужамелы аспӧртэмлыко йылпумъянъёс лэсьтӥсько, – пусйиз автор.

Любовь Грачёва горд сюез кызё арлэсь кема нырке ни. Сюен сяна, усточи быгатыса ужа мукет материалъёсын. Озьы кылдо фаянслэсь, фарфорлэсь,  шамотлэсь, сылал ыльняньлэсь арбериосыз.

Адӟытонын огазе луизы пӧртэм мылкыдъёсъя кылдэм ужъёс. Татын тӧлъя шонасько ненегесь сяськаос, соос вылын пуко нымы-кибыос. Выставкае вуэмъёс Ижлэн урамъёстӥз ортчо, палэзьпуос пӧлтӥ ветло, зарезь дурын пуко кадь. Автор туж тыршыса возьматэ пӧртэм чыры-пырыосты – валлэн изнэсаз пунэмын сяськаос, нош малпаськись тусо коӵышлэн шляпаез векчи сяськаосын чебермамын.

Грачёвалэн ужъёсыз огвакытэ туж зэмлыко но выжыкылысь выллем адӟисько. Тунсыко соослэн нимъёссы  но – «Тӧдьысяська но куалялюльы», «Сӥзьыл вордӥськон», «Кенер вылысь палэзь».

Учкисьёсты паймытиз Грачёвалэн горд сюйлэсь суредъёс шоры выль сямен учкемез – соос  рамкаосазы уг тэро кадь. Одӥгысьтыз ваське тубат, мукетысьтыз мычиське ӝуатэм фонарь, суредлэн сьӧраз пальккисько зарезь тулкымъёс.

«Емыш бичан дыр» адӟытон усьтӥськиз «Палэзян» фестиваль ортчем улсын. Ужрадэз шулдыртӥзы вуэм куноос – Финляндиысь «KEIKU» но «RUMДKKД» фолк-группаос,  Мордваысь «Морденс» арт-фолк группа. Соос вакчияк концерт возьматизы.

Вань мылкыд карисьёс адӟытонэн тодматскыны быгатозы на матысь 2 арня ӵоже.

Наталья Образцова.