Эх, пие, макем мон янгыш тон азьын! Нуналлы быдэ вӧсь карисько тонэ. Но оскы: ачим но валатэк, вӧсь карисько!

Мынам ноку тодам уг лыктылы: тыныд вить арес гинэ ай. Ӵукна, уже бере кылемелэсь кышкаса, тонэ зурк-зарк сайкатӥсько. Назьылляськемед потэ шуыса, уг ик малпаськы. Кемагес посӥськиськод ке, шобреттэ вылысьтыд соку ик кыскисько но, мугорыд салкым коркан соку ик «ӟазег куэн» шобыртӥське. Кынмемедлэсь курдаса, тэтчыса ик султӥськод, дӥсьтэ утчаны кутскиськод. Тыбырад вешаны тодам но уг лыкты. Соку ик султыны уг яра, погылляськоно кӧня ке шуыса, эмъясьёслэн алэмзы но кемалась вунэмын ни.

Соку ик мисьтӥськыны уллясько. Ву шапыкъёстэ пазяса кельтӥськод ке, сюлэмам олокытысь вожпотон бугырске. Мучоло чалмыт кутэм но адӟымтэ дыръяд ӵушалтэм интые, кымесад тэшкыльтӥсько но куаретӥсько: чылкытгес луыны ку дышод, ӵӧж?

Кымесысьтыд гордэктэмез бырыса уг вуы на. Оло куалектэменыд, оло дыртытэменым, гадь вылад уськытӥськод чай шапыктэ я ӝуктэ. Мон нош ик урмисько. Тусьты-пуньыдэ ик азьысьтыд ишкалтӥсько. Вылаз ик – «парсь» шуисько.

Озьы, пие, озьы, «мусое», «дуное» шуэм интые, мон тонэ «парсь» карисько. Нылпи садысь ӝыт басьтыкум, тон монэ куддыръя шумпоттыны выриськод ас киыныд кыӵе ке лэсьтэм чачаеныд. Пичи кикыосыд туж чебер лякылыны выриллям машина. Нош мон шораз но уг учкиськы. Секыт ужам бере йыр жон! вазе, одӥг гинэ малпанлы отын интыез вань: табере ведь тае маин ке сюдоно на. Нош тон весь ёртӥськод: чебер-а, атай, лэсьтӥ? Будэтӥськод на: мон сое тыныд кузьмасько, тынэсьтыд машинадэ лэсьтӥ. Кельше-а? Нош мон, пал синмын но шораз учкытэк, кеськисько: пыд улын эн костаськы! Тон, номыр куаретыны дӥсьтытэк, кытчы ке огшаплы ышиськод. Пыд улам, зэмен ик, уд костаськиськы ни. Но тыбырыным шӧдӥсько: ӧс сьӧрысен лушкем учкылӥськод шорам. Тон астэ янгышен шӧдэменыд, ачид но валатэк, ӧс мышкысен уӵеръяськод. Нош мыным йӧтэ: чакла таид выросъёсме. Уката урмисько: мын коть телевизор учкы! Телевизор адямиез воштоз, шунытсэ кузьмалоз кожасько, лэся.

Тынад монэн вераськемед потэ. Кызьы нуналыд ортчиз – мадьыны кутскиськод. Сиськондэ ик вунэтыса. Группаысьтыды ик кыӵе ке нылашлы синмаськи, шуид вал кадь. Юаны вырид: чупаськыны яра ни-а? Валэктонме возьмад. Нош мон, мар вазьыны паймыса, оло, юандэ воксё но пель сьӧртӥм лэзьыса, кеськи: сиськыку уг верасько – гуньдод!

Ӝыт но мон уг юалляськиськы тынэсьтыд номыре. Вӧзад выдӥсько но куаретӥсько: кӧл ни, бучыра. Выжыкыл лыдӟыны гинэ но куддыр ӟигары уг тырмы. Книга лыдӟонъям одӥг-ог ачим умме усисько. Бератаз сайкасько тынад маяллямедлэсь, монэ чупамедлэсь. Возьыт луэ но тэтчыса кошкисько. Нош ик вазисько: кӧл ни, ослоп! Мукет сэреге потыса, ачим кема дыр ӵоже кылӥсько на солань-талань берыкъяськемдэ. Соку но дорад уг мынӥськы. Курдасько: нуныяй ке, зэмос пиосмуртэ тынэсьтыд будэтыны уг быгаты, ныл кадь эркияськись луод. Ачим огпол ке но тонэ рос-прос вешасал ке! Огпол но рос-прос ӟыгыртыны но уг валаськы. Нодтэм мон.

Нош тон, нунал вордӥське ке, весь бордам йӧттӥськыны-няняськыны выриськод. Но мынам шутэтскон нуналъёсы но тонэ алвылам пуктылыны дыры уг тырмы. Аслым юртъер котырын весь кыӵе ке уж шедьтӥсько. Тон нош ик я кортӵог мыным ваёд, я пуме кутыны юрттод. Кияд шырпу пырыку но, тонэ жаляны уг валаськы. «Ачид янгыш» шуисько но тонэ уллясько. Нырдэ кысканы кутскиськод ке, кеськисько на: бӧрдыса утча – тышкало! Кошкиськод. Жугемелэсь курдаса ик, оло, воксё син азьысьтым ышиськод.

Нош туннэ, туннэ мон воксё куашкатӥ тонэ, пие. Эшъёсыныд шудӥськод вал. Ньыльпыдесъяськыса ик машинаяд луо тыриськод. Юлтошъёсыдлы ушъяськиськод: учке ай, кыӵе чебер машина мыным атай басьтӥз. Алдаськод тон соосты. Ӵужапаед кузьмаз со чачаез тыныд. Мынам шудонъёс утчаса ветлыны дыры ик ӧвӧл. Озьы ке но тон эшъёсыд азьын монэ Инмар чот кариськод. Нош мон тонэ соос азьын ултӥясько. Туннэ ачим но валатэк кыли шорад кеськемме: «Кин ньыльпыдесъяськыса шудэ, парсь? Астэ уксё поттыны лэзё ай калготки кесямед понна!»

Озьы шуи но дыбыр-колтыр пыри доре. Газет лыдӟон борды пукси. Кылӥ: тон но сьӧрам. Азям султӥд гинэ – мон лек вази ни: «Мар кулэ?» «Пие» шуыны но ымы ӧз пыры. Нош тон, лекме кылытэк кадь, бордам ӟыгырскид но шуид: «Атай, яратӥсько мон тонэ». Мон тонэ соку но палэнтӥ. Уг ваньмиськы, шуи. Тон нош ик шыпыт кошкид.

Пие, вождэ эн вай мыным. Берыд ышемед бере гинэ валай кадь «яратӥсько» шуэмдэ. Соку гинэ йырам пыризы кадь со мусо кылъёсыд. Но соку но сьӧрад ӧй поты, ӧй суты, ӧй ӟыгырты тонэ. Али гинэ тани дӥсьтӥ вӧзад пуксьыны. Но тон изиськод ни. Тон номыре уд шӧдылӥськы. Нош мынам бам вылтӥм гылӟо синвуосы.

Пие, простить кар шузи атайдэ. Мон весь вунэтӥсько: тыныд вить арес гинэ ай. Тон бадӟым адями ӧвӧл на ваньзэ соку ик шонер но быгатыса лэсьтыны. Асэным ӵошатӥсько, лэся, тонэ. Ачим кадь соку ик луыны кулэ, кожасько: саптаськытэк сиськись, лушкем лыдӟиськыса пукись, ужась. Ачим ваньмызлы соку ик дышысал ке! Аслэсьтым пичи дырме воксё вунэтӥськем ни. Нош тынэсьтыд но шаянгес вал. Тусьты-пуньыез но пильылӥ, атайлэсь уксёзэ но лушкалляй. Мон али ке но янгышъёс лэсьтӥсько на.

Но, пие, кылме сётӥсько: ӵукнаысен монэ уд тодма ни. Тупатско. Одно тупатско! Мон тонэ ноку уг пыкылы ни. Мон яратӥсько тонэ.

Елена Сараматова.

Магазинын вить-куать мурт сылэ. Параска чырткемъяськиз но ӧйтӧд кудзылэсь юаз:

- Мар-о Наталь сомында басьяськиз ай, вань товардэс ӧз быдты-а?

- Толон гинэ вуз вайизы, ваньдылы тырмоз, – коньдон чотанъяз шуиз продавец Валя.

- Али ик нуны сюанлы дасясько ни шат? Кензы, пыд азьзэ адӟытэк, мырдэм ветлэ ни, – йыркуро куаретӥз нылкышно.

- Нош тынад йыртышкад йӧтэ, о-о, Парски, Володя Зинадэ кулэ ӧз кары но бускель гуртысь Любаез басьтӥз шуыса, – будэтӥз вуз карись.

- Нош тон кылдэ уд шӧдӥськы чик, – вожез потыса ик, кутскиз танӥськыны Параска. Собере гань-гань куаретӥз: – Уг, воже уг поты, Зинае солэсь устогес карт шедьтоз ай. Со мынам чебер но, визьмо но. Нош со Любазылэн не тус аслам кадь огшорыгес, не мугор боды кадь, сандыкез но, пе, буш вал. Мынамезлэн пирданэз кык машинае но уз тэры.

- Однако пирданэн но кулэ ӧз каре кадь дыдыдэ, – серектӥз бускелез.

- Мыскыллялэ, ойдо, адӟом ай, кин шудо луоз, нош кин бӧрдоз, шӧдтэк ум кыле, дыр, – шуиз параска но укно пала берытскиз. Черодэз вуытозь, со нокинэн но ӧз вераськы ни. Со куспын лавкае Натальлэн бускелез пыриз. Кыллы бырем Нина чан-чан куараеныз кутскиз:

- Умоесь-а, кенакъёс, выль ивор тодэмды потэ-а?

Магазинын сылӥсь кыш-

ноос коӵоос кадь ымзэс усьтӥзы, Ниналэсь верамзэ возьмаса.

- Татчы лыктыкум, Микол Натальёс дорысь «Скорой» кошкиз. Любазы шугектэм.

Параска пельёссэ сак кариз. Ас понназ малпаз: кыӵе усто учыр тупаз ай.

- Параска апай, мар басьтод? – кышномуртлэсь малпанъёссэ куспетӥ кариз вуз карись.

Нылкышно огшап шып сылӥз но, уксётэк лык-тӥськем шуыса, лавкаысь пырс потӥз.

* * *

Параска гушъяса-гушъяса ик нюк улысь ошмес дуре васькиз. Гуртоос татчы гужем ӵем ветло: вулы но, миськем арбериоссэс гылъяны но. Нош толалтэ кожасез ичи. Параска бушатӥз ведра пуктон инты. Дорысьтыз дыртыса потӥз, лымы мычон лопата кутыны йыраз ӧз лыкты. Секыт шуыса, ведраоссэ пачыл-пачыл ӧз тырмыты, корка дорозяз кыдёкегес ик мыноно уго. Но таӵе муг шедьыку, со кык-куинь иськемез но ортчыны дась.

- Параски, толалтэ куазен ошмесэ васькад шат, колонкады кынмиз-а, мар-а? – вазиз пумитаз сюрем кышномурт.

- Кынмем, лэся, – йырзэ ӝутъятэк, шуиз со.

- Ма, милямаз ву бызе, кож вал татчы, – уг дугды бускель урамысь кенак.

- Тӥляд вуэныды чай ческыт уг луы, напез но уг поты, – будэтӥз Параска, пумитаз шедем адямиез ас понназ тышкаськыса: мар ужез, кытысь мон ву вайисько, солэн пельпумъёсыз уг жадё ук, акылес боды.

* * *

Любалэн кӧтыз вандэм кадь вӧсь луэ. Огшаплы лэзе но нош ик кырме, азьвыллэсь но зол шымыртэ. Врач учкиз но кышномуртлы шуиз, вазь на ай, пе, чида. Нош кызьы сыӵе вӧсез чидалод? Кӧй мугоро акушерка, зӧк чиньыоссэ позыръяса ик, Любалы шуэ:

- Нырысьсэ вайисьёс кема курадӟо, ӝытозь уд ворды на.

Выль кенлэн синвуосыз ик потӥзы, нош трактор мугоро акушерка серектӥз гинэ:

- Пиосмурт улэ выдыны гинэ капчи, соку ӧд бӧрды, дыр, табере чида.

Палатаын Любаен ӵош улӥсь нылкышно шуиз:

- Эн кылзы со пересь куткаез, ассэ нокин кышно басьтымтэ но лексэ асьме вылэ кисьтэ. Тон выдыса эн кылльы, кызьы умой, озьы ик кариськы: сылыса-а, ветлыса-а. Кӧтыд ӵемгес но ӵемгес вӧсь луэ ке, озьыен, ӝоген ваёд ни.

Нош ӝытазе кӧй акушеркалы но серем ӧй вал ни, врач но бызьылӥсь луиз. Соос ӧз валалэ, малы Любалэн пиналыз вордӥськыны уг вормы. Нуны укыр бадӟым ӧвӧл, пачкамын ӧвӧл, анайлэн вуосыз кошкизы, нош пиналлэн югыт дуннее потон тодаз ик ӧвӧл. Люба ӧз шӧды ни, кызьы сое операционное нуизы. Врачъёс нунызэ кӧттӥз поттоно кариськизы. Но татын но егит анайлы ӧз удалты, Любалэн вордскымтэ нылыз пушказ кулӥз. Наркозлэсь сайкам кышномуртлы врач вакчияк шуиз:

- 20 ар ужатозям, таӵе учырен пумиськылэме ӧй вал на. Ваньмыз чакламъя мынӥз кадь, нош пӧрмиз тӥни кызьы. Нуныедлэн гогыез чырты котыртӥз кык пол бинялскем, соин ик кеказ, луоз.

Кыӵе кышкыт кылъёс. Соосты валаны Люба ӧз быгаты. Кызьы озьы, укмыс толэзь ӵоже витем нуны кулэ? Малы, кин янгыш, мар табере кароно? Люба быдэс уйзэ бӧрдыса ортчытӥз. Нырысь нунызэ жаляз, собере ассэ, бӧрысь картсэ. Кызьы со Володяезлы вералоз, пиналзы лултэм вордскиз шуыса?

* * *

Люба ньылетӥ нуналзэ кылле ини нылпи ваён юртын. Кӧня улэ ни, сомында ик бӧрдэ. Нунызэс нонтӥсь анайёсты адӟе ке, гадьёсыз тыро, нош сюлэмзэ ныж пуртэн вандо кадь. Нылыз кулэм сяна, кышномуртлэн аслаз но тазалыкез чутыны ӧдъяз. Вир кошконзэ врачъёс нокызьы но дугдытыны уг быгато. Капельница пуктыло, уколъёс бышкало, пичияк умой луэ кадь, собере нош ик вир кошке. Люба нуназезэ кызьы ке чида ай, нош уйин коть чир черекъя. Кызьы укно сьӧрын кезьыт тӧл вузэ, Любалэн лулыз но озьы ик бӧрдэ. Уйвӧтъёсаз пичи нылзэ адӟе, сыӵе мусо, чебер, таза кадь со. Нош кылем уй валантэм вӧтаз. Гуртазы кадь со. Бускель урамысьтызы Параска соос доры тэркы трос шуэн лыктэм но Любаез куно карыны выре. Ме, пе, си, юри тыныд шуыса бичай. Выль кен пыкиськыны выре, шуэз уг яратӥськы, чырс потэ, шуэ. Нош арлыдо кенак вань шузэ корка котыртӥ пазяз но серекъя: э-э, гыдыке, та шу шоры учкыса, эк, шу, шуод ай. Параска кошкиз, нош лымы вылэ пазьгем шу гурыос, вир шапыкъёс кадь пиштыса, кылизы.

Ӵукнаяз врач Любаез учкиз но шуиз, Иже келяно, дыр, тонэ. Тазьы ик виред кошкиз ке, кема ӧвӧл ачид но нуныед сьӧры кошкод. Вань одӥг амал, но соку ноку но пинал вайыны уд быгаты ни. Шутэтскон нуналъёсы чаклалом ай, ӧз ке ортчы, Иже келялом.

Люба бӧрдыса палатаяз пыриз. Эшез солэсь верамзэ чал-чал кылзӥз но шуиз:

- Мон ачим татысь, Кизнерысь, нош быземын Киров улосысь Уржуме. Отын туж тодмо туно улэ, пор песянай, ми палан сое Такъян гинэ шуо. Тон, дораз ветлыса, утча вал. Больница юрттыны уг быгаты бере, оло, солэн пайдаез луоз. Талэсь уродгес уз луы ни.

- Кызьы сокеме мыном? Мынам вамышъяны но ӟигары ӧвӧл. Собере уг оскиськы мон туноослы.

- Ӵуказе кӧснунал, обход ӧвӧл, карттэ машинаен ӧть. Процедураос бере пуксёды но кошкоды, ӝытозь вуоды ук. Татын медаз тодэ. Кузпалыд сьӧраз тыныд дӥськут мед кутоз.

* * *

Володя пумит ӧз луы. Укмыс час котырын соос сюрес вылын вал ини. Кыксы ик шып мынӥзы. Люба ӧз тоды, мар сярысь вераськыны, нош картэз ӧз вала кудлань вазьыны, кышноез медаз ӝожомы шуыса. Озьы ик ортчизы кузь сюресэз.

Кулэ коркаез шедьтыса, Люба туно доры пыриз. Арлыдо кышномурт гур азяз берга вал. Сьӧрлось кунолы со чик ӧз паймы кадь.

- Лыктӥд бере, чаль татӥгес, мар ӧс дорын сылӥськод. Ойдо чай юом. Мон туннэ шуэн перог пыжи. Анае шунянь туж яратэ вал. Война вылтӥ уго сиён туж ик ӧй вал. Мемей нюлэскы ветлоз но та горд емышъёсты бичалоз, собере я шу кисаль пќзьтоз, я шуэн пыжиськоз. Солэсь но ческыт сиён ӧй вал кадь, – тодаз вае туно.

Люба ӟигартэк лэзиськиз пукон вылэ. Нош Такъян апай со шоры уг ик учкы. Чай лэзён куспаз шуэ:

- Нылыдлы Такъян ним пон, ява, чукыныны но эн вунэты.

Любаез чабкизы кадь. Кыӵе туно со, уг ке адӟы, нуныез али гинэ кулӥз шуыса. Кышномурт ымзэ усьтӥз ни вал. Туно куспетӥ кариз:

- Сюресэд кузь, чайдэ ю но мынэ бертэ.

- Мон татчы чай юыны ӧй лыкты, – ӝожомиз Люба.

Такъян выль кен шоры кема учкиз, Любаез со синъёс сӥсъязы кадь. Собере туно ӝӧк вылысь шунянез басьтӥз но шуиз:

- Тани та пыжиськемез машинае пуксемед бере ик си, огкутскемен копаксэ…

* * *

Параскалэн мылкыд тулыс нунал кадь. Капказьзэ мычыны потӥз но, бускелез Орина шуэ:

- Параски, кылӥд-а, Микол Володяослэн нунызы арам луэм, лултэм, пе, вордскем.

- Чик уг паймиськы, муртлэн синвуэз сьӧлыктэм пинал вылэ усиз, луоз. Володялы луыса Зинуке кӧня бӧрдӥз. Табере ачиз мед вузоз. Со гинэ мар, кышноез нуныез сьӧры кошкоз ай, адӟод, – вазиз кышномурт.

- Остэ, Параска, мар сыӵе вераськиськод?

- Мае тодско, сое ик верасько. Малы, кожаськод, мон тол куазен ошмесэ васькай. Как тодӥ, Любаез роддоме нуизы шуыса, соку ик вулы васькай. Ведраме тырмытӥ, доре вайи но тунгонай, Миколъёслэн выль кензы вордыны медаз вормы шуыса. Нош собере, кык нунал ортчыса, кыл вераса, вузэ кисьтӥ. Кызьы ошмесысь ву бызе, озьы ик Любазылэн вирез мед кошкоз шуыса, – верамзэ валатэк-а, ушъяськемез потыса-а, шуиз со.

Орина номыр ӧз куареты, вылысьтыз вылаз кирос тырыса, азбараз пыриз. Нош Параска, нокыӵе кариськытэк, капказьзэ мычиз.

* * *

Люба шуэн пыжиськемез кияз кема бергатӥз. Мар кароно: куштоно яке сиёно?

- Пӧраськемез яратӥсь-код ук, си, нуназе ортчиз ини, тон ке сютэм ай. Бурмон понна сиськыны кулэ, учкы ай, кыӵе начармид ини, – сюлмаськиз Володя.

Люба куаш куртчиз шунянез. Ческыт ик вылэм, яке кӧтыз сыӵе сюмаз-а? Сиськемез бере кышномуртлэн иземез потыны кутскиз. Сюрессы кузь бере, гань-гань кариськиз. Но час ортчыса, кӧтыз чутыръяны кутскиз. Нырысь каллен, собере золгес но золгес. Кышномурт, нуны вайыкуз кадь, курадӟыны ӧдъяз. Огшап озьы мынӥзы ик ай, собере Люба ӧз ни чида, машина трос ӝуштыны кутскиз. Картэз сюрес урдсы дугдӥз. Люба машинаысь гыж потӥз ини. Вӧсьлы чидатэк, нылкышно лымыын погылляськиз, собере ӧсконэз пӧсьтӥз. Картэз, мар карыны валатэк, Люба котыртӥ берга:

- Мон но мон ини, врачъёслы оскытэк, тонэ олокытчы нуи, малы кылзӥськи? Мар каром, татчы кулӥд ке, тонтэк мон но уг улы! Кытысь-марысь со туноез тодӥд, эмъян интые ведназ, дыр, – кузпалзэ ӝутонъяз кесяськиз Володя.

Нош Любалэн вераськыны ӟигарыз ӧй вал ни, ымдуръёсыз лызэсь, ачиз кӧдэктэмын, кымесаз пӧсям вуэз быльырамын. Пиосмурт сое машиналэн бер пуконаз выдтӥз. Больницаозь Володя лобаса мынӥз. Люба синъёссэ ӧз усья, одӥг-ог лулӟылӥз гинэ. Озьыен, улэп, кышноезлэсь шокамзэ кылзыса, ширтӥз Володя. Нылпи ваён юртын висисьсэс ыштӥзы ни вал. Картэз Любаез, ки йылаз ӝутыса, пыртӥз, нош машинаысь сидение вылэ вир пытьы кылиз. Врач урмыса кесяськиз пиосмурт шоры. Любаез со нырысь кулэмын малпаз, собере йырсазьзэ ыштэм кожаз, нош егит нылкышно изе вал.

…Кык час ортчыса, выль кен сайказ. Соку гинэ гань-гань шокчизы эмъясьёс но, Володя но, палатаын Любаен ӵош кыллись но, сое туно доры ыстэм нылкышно но.

…Нош ар ортчыса, Микол Натальлэн корказ нуны бӧрдэм куара кылӥськиз. Люба нылызлы Такъян ним понӥз. Нуны сюанэ соос вань бӧляксэс ӧтизы. Узыр ӝӧк вылын шуэн пыжиськем но вал.

Галина Савина.

«Йыромем йыртэмась» – Трониналэн кыкетӥ кылбур бичетэз ни, нырысетӥез – «Кытын мынам ошмесэ?» (2007) – будӥсь муртлэсь малпанъёссэ-утчанъёссэ ӟеч возьматэ.

Кыкетӥ бичетын лирической героиня эрико – соин со быгатэ улонын вамыш лэсьтыны, быгатэ йыромыны но йыртэманы. Со матын асьмелы – общагаын бускель комнатаысь тодмо нылашка кадь. Кылбуръёсын шӧдӥське огшоры улон, быт, лирической героиня отын яратэ, вожа, курадӟе но мӧзме…

Бен, со нырысь ик нылмурт. Городын сьӧд очкиен, ӝужыт каблуко туфлиен, гуртын гын сапеген, сюан ке шудоно – одно ик удмурт дћськутэн – айшонэн, чыртывесен, камалиен.

Мон – апельсин.

Гурт кузя

гын сапег дӥсяса

вамышъясь апельсин…

Городын, каблукен

пыдкутчан золтыса,

луисько огшоры

Олокин…

Пызьыртэм

апельсин…

Бадӟым карез но гуртэз ваче пумит пуктон кутске ни Ашальчи Окилэн кылбуръёсысеныз, малы ке шуоно гуртысь потэм муртлэн со ноку но ортчонтэм мӧзмонэз.

Яратонын но со татысь, музъем вылысь, мурт. Эрико – но со понна сьӧлыко. Вань лулыныз но мугорыныз яратӥсь кышномурт.

Зундэсэд чиньыдэ пӧсятэ,

Ымдурыд мугорме ӝуатэ,

Инмарлэсь ватӥським акшанэ…

Оло шуд тон, оло бӧрдонэ.

Лирической героиня быгатыса шудэ нылкышно-стерва образэн, но со тодэ: кулэ ке, луоз мукет – небыт, мусо кышно но яратӥсь анай.

Эн курда!

Мон кышно луо туж ӟеч.

Пыжо тыныд шаньга но перепеч.

Шуныт, ӟырдыт луоз валесамы,

Вордӥськозы чебер

нылпиосмы.

Эн курла!

Али гинэ сюрслы

пазьгиськисько,

Курадӟисько,

шузимисько,

лычсузисько…

Дырыз вуиз ке -

пырдэмысь дугдо.

Эн курда: ми луом артэ шудо!

Туала арын кылдӥз ни кыӵе ке мӧзмон идеальной кышномуртлэсь – кышнолэсь но анайлэсь, туала кышномурт пиосмуртэз кышкатэ гинэ. Нош кышномурт сю пӧртэм луыны быгатэ. Солэсь кышкано ӧвӧл, кулэ сакгес кариськыны но валаны гинэ. Кужмо но ӟырдыт ке но нылмурт, со возьма ки вылын нуллэмез, яратэмез.

Ольга Трониналэн кылбуръёсыз вакчиесь – со юрттэ капчигес шӧдыны-валаны кылбурчилэсь малпанзэ, син азе пуктыны кылбурысь суредэз – со ик возьматэ кылбурчилэсь будэмзэ.

Возьмаськом кылбурчилэсь кылчеберлык ласянь азинскемзэ, выль образъёс утчамзэ, выль кылтӥрлык кутэмзэ но озьы ик филологической бусыын эрико луэмзэ. Туж умой реальной улонлэсь абстрагироваться кариськыны но выль образ кылдытыны. Та ласянь Виктор Шибанов бичетлэн азькылаз дунъяз Ольгалэсь «Суреда монэ…» кылбурзэ. Та кылбур лыдӟисез малпаськыны косэ но ноку но луымтэ учырез йырвизьмад кылдытыны куре.

Суреда монэ 

Чиньыосын… 

Омыр вылэ. 

Мугорылэсь котькуд палзэ, 

Котькуд шексэ 

Эн вунэты возьматыны. 

Нош суредэд тӧлӟем бере, 

Эн куректы - шедьтод зэмлыкозэ.

Лариса Дмитриева.

Маша Баталова.

Удмуртъёслэн гинэ ӧвӧл, дуннеысь мукет калыкъёс пӧлын но паськыт вӧлмемын вуэн герӟаськем йылолъёс. Соин но, вылды, ву кылсуредэн герӟаськем темаос паськыт вӧлмемын фольклорын но, литератураын но, тужгес ик кылбуретын.

Кылсярысь, Ольга Ведровалэн «Мон утчасько тонэ» кылбур бичетэныз тодматскыса, ми чакламы, солэн тросаз кылбуръёсаз вуэн герӟаськем образъёс пумисько шуыса.

Бичетэ пыртэмын 68 кылбур. Соос пӧлысь 39 кылбурын вань вуэн герӟаськем кылсуредъёс. Вулэн образэз возьматэмын 38 кылэн. Соос пӧлын 26 существительной, 11 глагол, 1 прилагательной. Тужгес трос пол пумиське «ву» кыл (13 пол), «бус» (10 пол), «зор» (8 пол), «синкыли» (7 пол), «шур» (6 пол).

Эскером кӧнязэ ке та кылсуредъёс пӧлысь.

«Ву» кыл трос пол кутӥське. «Утчасько асме вуысь», – шуэ кылбурчи. Кызьы пусъе Л. Фёдорова «Удмурт нылкышно кылбуретлэн тулкымъёсыз» книгаяз, ву луэ лирической героинялэн улон интыез, аслаз ӧрез. Вуэн герӟаськыса, лирической героиня тодэ пеймыт кужымъёслэсь кылзэс, соин ик со быгатэ яратоно муртсэ аслыз карыны. «Ву» кыл озьы ик кутӥське на «вуныл», «вумурт», «вутурын», «вукарнан», «вукырем», «вуюись», «тудву», «сурсву», «лысву» кушето кылъёслэн оглюкетсы луыса но. Кызьы шуэ ачиз Ольга Ведрова, ву – со чылкыт, со весь бызе, уродзэ сьӧраз нуэ. Но со дыре ик кышкытлыкез но вань: со ас сьӧраз кыскыны быгатэ. Соин но, дыр, ву сярысь вераськон мыныку, кылбурчи ӵемгес кезьыт но пеймыт эпитетъёсыз кутэ.

Бус мае ке ватонэз, ыштонэз возьматэ, кылсярысь, «Нап бус пӧлысь уг адӟиськы сюрес», «Кин тодэ – осконэ ышоз бус пӧлы» – гожтэ Ольга Ведрова. Ваньмаз сямен кылбуръёсын «бус» кыллы эпитет быръемын «пурысь». Асьмеос тодӥськом, та буёл секыт мылкыдэз, мӧзмонэз возьматэ шуыса. Но соин ӵош ик кылбурчилэн умоезлы оскон мылкыдыз но вордске, малы ке шуоно со адӟе нап бус сьӧрысь шундыез.

Зор ваньзэ миське. «Сьӧлыко улонме мед гылтоз», – шуэ лирической героиня. Зор – кезьыт, мугорез бышкись ке но, со зорлэсь уг ватскы, уг пегӟы. Зор уг кышкаты лирической героиняез гуртаз бертон сюрес вылэ потонлэсь. Озьыен, зор – со инкуазез но, лулэз но чылкытатӥсь, сьӧлыкъёсты гылтӥсь кылсуред.

Вулэн эшшо одӥг пӧртэмлыкез – синкыли. Автор та кылэз одӥг пол «синву» шуэ. Ваньмаз та кылэн герӟаськем кылбуръёсын лирической героиня синвузэ кисьтэ яратонэн сэрен. Вераны кулэ, та кылбуръёсын синвуосыз поттэ шудтэм яратон но, шудоез но. «Сутӥсь пӧсь синкыли воштӥз яратонме», «малпам шудлэсь но чылкытгес синкылиме» – та выллем эпитетъёсын возьматэ лирической героинялэсь мылкыдъёссэ Ольга Ведрова. Эшшо одӥг тунсыко эпитет шедьтэм кылбурчи «синкыли» кыллы. «Горькие слёзы» удмурт кылын котьку сямен «курыт синкыли» шуэмын. Нош одӥгаз кылбураз Ольга Ведрова ас сяменыз шуэм – «кузял синкыли».

Котькуд поэтлэн кылбуръёсыз пӧлысь одно ик шедьтод шур сярысьсэ. Кылсярысь, Николай Байтеряковлэн со Варзи, Флор Васильевлэн Мой, Степан Широбоковлэн Чупчи. Ольга Ведрова шурезлы ним уг сёты, нимысьтыз кыӵе ке шурлы но уг вазиськы. Кызьы верам ини, «Мон утчасько тонэ» кылбур бичетысь лирической герой ассэ вуын туж умой шӧдэ, соин ик шур – со сыӵе инты, кытчы котькыӵе шуг-секытъёслэсь пегӟыны луэ. «Мон шур дуре лобӟо, вуын уло», «лобӟоз лулы шур вадесы», «шурысь ӧтисько вужерме» – гожтэ кылбурчи.

Озьы ик ӵем кутэмын вуэн герӟаськем «ярдур», «уяны», «шапык», «чылкыт» кылъёс.

* * *

Маин валэктыны луоно меда Ольга Ведровалэн кылбуръёсаз вуэн герӟаськем кылсуредъёслэсь тросэн пумиськемзэс?

Милям малпаммыя, нырысь ик шӧдӥське, дыр, солэн инкуазьлы туж матын луэмез. Нырысетӥ кылбур гожтон дырзэ тодаз вайыса, «Мон утчасько тонэ» книгаезлэн азькылаз Ольга Ведрова шуэ: «Со вал бер ӝыт, куке пушкын кузёяськись кужым инкуазьлэн сураськем кужыменыз ваче вуэ, куке кылдэ валантэм мылкыд. Но… шӧдтэк шорысь гудыри ортчиз. Но со мыным кыӵе ке валантэмгес кылиз. Оло нош со ик гожъяськыны мылкыд сётӥсе вал, уг тодӥськы. Нырысетӥез кылбуре но ӵапак соку кылдӥз». Адӟиськом, кылбурчи понна инкуазь но кылбур дунне туж матын шуыса. Гудыри (зор) бере кылдэм нырысетӥ кылбур чуръёсыз быдэс творчествоезлы, оло, инъет луизы.

Мукет тодэ ваёнъёсаз Ольга Ведрова вераз: Шор Постол школаын дышетскыкуз ай, быдэ вуон вакытаз кылбур чуръёсыз кылдылон дыръя, солэн эшъёсыз пӧлысь кошкемез, огназ кариськемез потылӥз. Нош школа вӧзын ик шур бызе вал бере, аслэсьтыз мылкыдъёссэ кисьтыны нылаш кошкылӥз шур дуре. «Ӵапак шур дуртӥ ветлон дыръям, италмас сяськаос пӧлын кылдылӥзы нырысетӥ чуръёсы, кудзэ, оло, нокинлы но возьматэме но ӧз потылы. Шур монэ буйгатылӥз, аслым но валантэм мылкыдъёсы кылбур чуръёсы кисьтӥськылӥзы», – шуэ Ольга Ведрова.

«Кызьы асьтэос малпаськоды, кытысь меда кылбуръёсады вуэн герӟаськем кылсуредъёс» юанмылы кылбурчи шуиз: «Гороскопея мон Чорыг. Оло, соин но сыӵе кылбуръёсы пӧрмо. Но нимысьтыз та сярысь ноку ӧй малпалля».

Ӝоген Ольга Ведровалэн лыдӟисьёс кие вуоз мукетыз кылбур бичетэз. «Усьты ќстэ» бичетысь но, оскоды оло уд, тӥ пумиталоды вумуртэз но, шурез но, бусэз но, зорез но.

Маша Баталова.

Татьяна Душенкова.

Дас ньылетӥ южтолэзе «Удмурт дунне» газетлэн «Ингож» ватсэтаз потӥз В. Пантелеевалэн «Удмурт драматургилэн вуж но выль висёнъёсыз» статьяез. Автор кӧтӝожзэ вера туала драматургилэн азинскон сюресэз сярысь, пӧртэм шекъёсты син азе поттэ. Сюлэм вӧсь луыса лыдӟи та ужез.

Нош алигес ачим шеди жюрие, дунъяй студентъёслэсь ужъёссэс. В. Пантелеевалэн кадь малпанъёсы вуи.

18-тӥ оштолэзе Ижкарын ортчиз туала филологилэн лэчыт ужпумъёсызлы сӥзем конференция. Отчы люкаськизы пӧртэм кунъёсысь но Россилэн улосъёсысьтыз студентъёс: Польшаысь, Марий Элысь, Мордовиысь, Татарстанысь, Комиысь, Карелиысь но асьме удмурт пиналъёс. Мыным шуд усиз одӥгаз литературая секциын пукыны. Шумпоттӥз огез: егитъёс кыстӥсько наукае, но жаляса верано, соосты валтӥсез-валэктӥсез ӧжыт.

Нырысетӥ но куинетӥ инты сётӥмы школаын дышетскись нылъёслы – Баталова Машалы (Дэри ёросысь Шор Постол школа) но Бусыгина Любалы (Шаркан ёросысь Ляльшур школа), нош кыкетӥ инты басьтӥз Марий Эл шаерысь Иванова Ирина. Асьме студентъёс вормисьёс пӧлы, жаляса верано, ӧз пыре. Ма сярысь вера кылдэм югдур? Школаын дышетӥсьёс ужало, будэто визьмо пиналъёсты, нош вузъёсын соос ышыге кылё, азьлане вамыш уг лэсьто.

Соин ик паймоно-а, асьме удмурт литературоведенимы воксё бырон калэ вуэмын шуыса. Ӧвӧл кивоштӥсьёс, ӧвӧл гожъяськисьёс, ӝожтӥськиськом ми. Но быгатӥсь пиналъёс тани вань ук, соослы юрттоно будыны, пыд вылазы султыны.

Студентъёс чик но уг валало, кызьы текстлы анализ лэсьтоно. Темаоссы но туж вашкалаесь. Нош ӝутэм ужпумъёссы шоры туала синмын учкысалзы ке, туж тунсыко луысал. Но уг тырмы тодонзы яке дӥсьтонзы.

Педагогикаын вань азьпалтыса дышетонъя методика: нылпилы капчигес мед сётӥськоз шуыса, программаысь выль материалэз, дышетскон сямен азьпалтысагес пичиен-пичиен сётоно. Нош асьмелэн, шуом Удмурт кун университетын, ма пӧрме? Текстлы лингвистической анализ сёт ай, студентъёслэн йырсизы ик пештырске: укыр валантэм, шуг кылъёсын валэктӥськоды, мукет дышетӥсьёс темаоссэс милемлы кушаса сёто. Иське, аслад йырыныд малпаськоно, утчаськоно ӧвӧл? Таӵе капчи дышетон-дышетсконлэсь емышъёссэ адӟиськом ни.

Озьы ик студентъёс но кулэ каро будэтонэз, тужгес ик удмуртъёсыз. Нырысь вамыш лэсьтыкузы, ушъяногес, мылкыдзы мед ӝутскоз шуыса. Тодматоно туала тунсыко ужъёсын, дышетоно лыдӟыны специальностьсыя журналъёсты (одно ик дэмласал «Вопросы литературы», «Новое литературное обозрение», «Вопросы филологии», куддыръя учкылыны «Иностранная литератураез» но мукет) но монографиосты. Дышетоно гожъяны доклад, статья, курсовой но дипломной ужъёсты.

Зэм, туала компьютер технологиосты студентъёс умой тодо ни. Капчиен лэсьто презентациос, ӝог гинэ шедьто кулэ луись информациез но мукет. Нош асьсэлэн лыдӟиськемзы но малпаськемзы уг пот ни. Сое адӟиськод, куке зачётэ ваё Интернетысь кыскем рефератъёсты. Егитъёслы словарьёс но, справочникъёс но, монографиос но кулэ ӧвӧл ни. Угось соосты шедьтоно ай, усьтоно, лыдӟоно, нош собере кулэзэ гожтыса кельтоно.

* * *

Пусйыны кулэ одно ик умойзэ но. Туж тунсыко ужез вал Китов Евгенийлэн (УдГУ-ысь 2-тӥ курс). Докладзэ сӥзем фэнтези жанрлы. Со туж шумпотымон, угось та дырозь нокин но та темалы саклык ӧз висъялля на. Татчыозь эскеремын утопия/антиутопия тема гинэ, та жанр пушйиз кылем даурлэн 20-тӥ-30-тӥ аръёсаз. Жаляса верано, туала удмурт литератураысь текстъёсты Евгений эскерымтэ, учкем Г. Верещагинлэсь кык фольклорной вероссэ гинэ. Соиз но зэм, ваньмызлэн жанръёслэн выжыоссы фольклорын. Нош фэнтези произведениосты луоз шедьтыны «Инвожо» журналысь. Та пумысен одно ик эскероно, мон малпамея, Н. Бехматовлэсь (псевдонимез Вольэг Иники) книгаоссэ: «Гордое племя», «Юсьёс но куӵъёс» но «Песни огненной реки». Умойгес висъяно литературной валатонъёсты: фантазм, фантастика, фэнтези, сказочной яке сакральной фантастика но мукет.

Верай ини, чылкак паймытӥзы но туж шумпоттӥзы школаын дышетскись нылъёс – Баталова Маша но Бусыгина Люба. Шӧдӥське, дышетӥсьёссы трос ужамын шуыса. О. Ведровалэн поэзиез сярысь анализэз адӟеме-кылзэме ӧй вал на. Сое эскериз М. Баталова. Л. Бусыгина возьматӥз этнофутуризмлэсь троссэ тодметъёссэ, эшшо ке ӵошатӥз удмурт О. Четкарёвлэсь но ӟуч Ю. Мамлеевлэсь произведениоссэс.

Агафонова Еленалэн (3-тӥ курс) темаез туннэ нуналлы тупамон вал – Бурангуртысь песянайёс сярысь, но жаляса верано, ӧз тырмы теориез. Баталова Светлана (4-тӥ курс) коми кышномурт поэзиез эскериз. Малпанъёсыз но, анализэз но тунсыко потӥзы.

Огъя вераса, литературая темаос туж начаресь, традиционноесь вал. Марзэ отысь сюпсьыны быгато на? Соос мӧзмыт, бездыт адӟисько ни. Нош учкы со темаос шоры мукет синмын, берыкты кӧня ке – туж тунсыко луоз. Собере пӧртэм удысъёсты, наукаосты огазеяны луэ на. Оскиськом, дышетӥсьёс, дышетскисьёс, студентъёс, соослэн научной кивалтӥсьёссы дэмланъёсты санэ басьтозы, вуоно арын докладъёссы тунсыкоесь, муресь луозы

Татьяна Душенкова.

А. Никонова библиотекарь (сылӥсез) лыдӟиськисьёсын.

Алнаш ёросын ваньмыз-ӧвӧлэз 19 гурт библиотека. Туймыйыл гуртысез алигес пусйиз 60 аръем юбилейзэ.

Туймыйылын 2 библиотека: одӥгез – школа бордын, музонэз клубын. Озьы ке но огез но буш уг улы. Гуртын ваньмыз-ӧвӧлэз 870 улӥсез. Лыдӟиськисьёссы понна библиотекарьёс вожмасько, ява. Калыкез бордазы кыскон, книгаос котыре бинён вылысь олокыӵе но ужрадъёс радъяло. Озьы ёрос ӵошатсконын Туймыйыл гурт библиотека туэ нырысетӥ интые потӥз.

Татын уго книга бордын гинэ уг пуко. Библиотекаын ужасьёс Анна Никонова но Лилия Лебедева кык клуб кылдытӥзы – «Майбыр» но «Туймыйыл тугоко».

Нырысетӥяз тазалыкез юнматонэн выро. Отчы ветлӥсьёс туннэ ог кызь кузя люкасько. Ваньзыгес ик 45 ареслэсь ортчемъёс. Ог-огзылы визь-кенешен юрттэм, вераськем сяна, пӧлазы одно ик ӧте я массаж лэсьтӥсез, я педиатрез. Таосты пӧртэм темаосъя лекция лыдӟыны, малы но солы дышетыны куро. Но весь юртъер пушкын уд пукы ук. Гимнастика лэсьтэмзы бере толалтэ куас вылэ султо, кезьыт вуэн пыласько, шуныт куазь вуэмен, инкуазе потало. Иже но «майбыръёс» вуыло спектакль я концерт учкыны. Автобус асьсэос ик шедьто, бензинлы дун тыро но ширто. Гуртысь ужез ужаса ноку уд быдты, шутэтскыны но кулэ, шуо нылкышноос.

«Туймыйыл тугоко» кылбурчиосты огазея. Котырес ӝӧк сьӧры толэзьлы кык пол люкаськыло, выль ужъёсынызы тодмато.

Азьланяз библиотекаязы тэшкылиосты но кызьы ке кыткыны медо. Пичиысен, пе, книгаез яратон мылкыд пыӵатоно.

- Зэм, егитъёс пӧлын лыдӟиськисьёс ӧжытгес, – лулӟе Анна Никонова. – Соосыз но детектив кадьёстыгес гинэ басьяло. Нош классика вужере кыле. Тазэ уногес лыдӟо арлыдоос. Соос историен но тунсыкъясько. Дасо ар талэсь азьло гинэ мӧйыосты библиотекаысь шер пумиталод вал. Весь ӧз ваньмылэ юртъер котырысьтызы. Туннэ ужзэс капчиятӥз ни техника. Мисьтаськыны гинэ но машиналы оскемын уго. Кин но со серектэ: пересьёс быризы ке, библиотекае пырась уз луы ни. Но мон юн оскисько: библиотека уз быры, гуртысь вань юртъеръёсы Интернет ке но вуиз. Книгаез кие кутыса, котькуд бамзэ берыкъяса лыдӟонлэн аслаз номырин воштонтэм шӧмыз уго. Матысь эшен кадь, ваче син вераськыса, пукиськод.

Библиотекалэн фондаз туннэ 4 сюрс 357 книга. Та пӧлысь 430-эз – удмурт изданиос. Но Никоноваен Лебедева таин гинэ уг буйгало. Библиотекалэн юбилеезлы кузьмам уксёен но книгаос басьтӥзы. Соин гурт калык удмурт книга-газетъёсты уг лыдӟы, шуыны уг луы. Удмурт газет-журналъёс понна вожмасько но. Дорысьтызы но куд-огез подшивкае аслэсьтыззэ вае. Собере, дэмен люкаськыса, пуштросэз пумысен но кенешо. Лыдӟиськисьёс асьсэос но шуо ук: ми татын бадӟым семьяын кадь. Библиотекамы ӧз луы ке, кытын огазе люкаськомы на.

Елена Фёдорова.

Удмурт шаер вордӥз монэ,

Удмурт шӧмзэ кузьмаз нэнэ.

Дуно мыным аслам гуртэ,

Дуно анай-атай юртэ.

Пыдлось пересь выжыосме

Песяй возьма, дыр, утемме.

Ӝоген тани киысь кие

Выжы сётоз вордэм пие.

Будо пичи нуныкайёс,

Герӟет выжы пушъе.

Уз быр калык, чылкыт со, дун,

Муре лэзем выжы туж юн.

* * *

Мон шудо -

Мон улыны вордӥськемын.

Калык сямен вамышъясько

Ӵуж шундыё инбам улын.

Мон шудо -

Быдэ вуиз вордэм пие.

Соин артэ мон мынӥсько,

Сюлмо анай кадь адскисько.

Мон шудо -

Анай-атай вӧзын будӥ,

Тыро-пыдо семья пушкын,

Узыр агай-сузэръёсын.

Мон шудо -

Чеберлыкез мон шӧдӥсько.

Сяськаосын вераськыкум,

Инкуазь нылмурт кадь потӥсько.

Мон шудо -

Удмурт выжы мон луисько,

Та дуннеын мон шокасько.

Соин, соин ик мон шудо.

* * *

Тон ке кужмо,

Тон вӧзын мон адско, дыр, йӧно.

Тон ке визьмо -

Тон азьын мон сабыр нылкышно.

Тон ке дӥсьтӥсь -

Тонэн ӵош дӥсьтыса мынӥсько.

Тон ке монэ яратӥсь -

Гомась сюлэмме тон кие сётӥсько,

Тон кие!

* * *

Пияла еза ке -

Со одно ик куке но соку пилиське.

Семья кусып тэшка ке -

Уд ляк ни сое – сӧриське.

* * *

Мон шунды кадь,

Пӧсь тылӝу кадь,

Йӧтӥськи ке – сутӥськод.

Мон сяська кадь,

Мак сяська кадь,

Тӧл пельтӥз ке – куашкало.

Мон узы кадь,

Горд эмезь кадь,

Шорам учкод – ӵыжекто.

* * *

Юри тыныд шуыса

Чильпало кышет.

Дуръёсаз тугъёс вуро -

Тугъёсаз весьёс тыро.

Юри тыныд шуыса,

Йыркерттэт кертто.

Мед со тонэ шумпоттоз,

Сюлэмдэ шунтоз.

Юри тыныд шуыса

Льӧль дэрем вуро.

Сӧзулъёссэ ӝуткаса,

Лентаос тыро.

Юри тыныд шуыса

Кускерттон пуно.

Вуюись удмурт пужы

Мон отчы шукко.

Юри тыныд шуыса

Кылбурме гожто.

Бушам-тырттэм сюлэмад

Тылгизьы кушто.

* * *

Лымы вылэ нимдэ мон гожъясько.

Нимыд вӧзы тустэ суредасько.

Ӧчкарыса каллен гинэ

Усись лымы ваньзэ соге.

Пӧсь мылкыдме лымы вылэ

Быдэс нунал ни кисьтӥсько.

Юнме гинэ курадӟисько,

Лымы улэ ваньмыз кыле.

* * *

Кут монэ,

Уй монэ,

Пеймыт уй.

Веша, чупа пеймыт ышыгад.

Собере мон тонэ уйыло,

Ымдурдэ, бамъёстэ

куртчыло.

Ӟыгырто но уг сёт ӵукналы,

Мед луоз та шудмы

Весяклы асьмелы.

* * *

Уг лу лэземе но,

Уг лу воземе но,

Уг луы тонэн кузё луэме.

Уг лу сётэме но,

Уг лу басьтэме но,

Уг луы тонэн ванё луэме.

Уг лу лушкаме но,

Уг лу ватэме но,

Уг луы тонэн эксэйяськеме.

Уг луы,

Уг луы тонэн номыр кареме,

Сюрестэ ас палам

кожытэме.

Ӵукна Инна куать часэ султэ. Изёнэд тырме-а, уг-а, нокин уз юа, тонэ уйин пукыны ӧз косэ ук, уждун тямыс час понна тыро. Назьылскыса укно пала кариськиз но – синъёсыз нош ик со тыл шоры мертчизы. Вот зол – адямиос мынэсьтым бер выдыса, вазьгес султо, а мон эшшо асме жалямъяськисько…

Нунал котьку сямен ик огшоры ортчиз. Солы, зэмзэ ке, кемалась уж дуре ветлон акыльтӥз ни, эсьма, дораз суредаськыса пукысал – со дизайн бюроын ужа. Дорын умой, уката ик бер ӝыт, уйин – нокин уг люкеты. Тӥни вадьсысьтыз бускельлы но сыӵе улон кельше, шӧдске.

О, таосыд ужысь вазь берытско, шӧдске – тылзы кытӥ-мар ӝуатэмын ни. Тунсыко, кин отын всё-таки улэ меда: кышномурт-а, пиосмурт-а? Яке бадӟым семья? Коть вужерзэс адӟоно вал. Ӝыт ӵоже кышномурт кӧня ке пол укно дуре вуылӥз. Быдэс коркась укноосын тылъёс пишто, но тазэ укноез со соку ик висъяз. И мар отын паймымонэз, паймиз со аслыз ачиз, мынам но тылы ӝуа ук. Но оломаиз оломар, укно сое выльысь дораз кыскиз кадь. Та уй но уйшор бере изьыны выдыны дасяськыкуз, Инна эшшо огпол вадес корка пала учкиз. Ӵуказеяз нош ик солэсь вазь сайкаллям. Хм… Иське, отын уло огшоры заводын ужасьёс – огез сменаысь бер вуэ, мукетыз вазь кошке, вот и ӝуа ялан тылзы. Оло нош воксё юисьёс. Мар соослы – ӟамырто но изё, ӟамырто но изё – кудӟемъёс югытлэсь уг керпото.

Но куинетӥ ӝытаз но тыл кысымтэысь, кышномурт тулкымъяськыны кутскиз. Жаг поттыкуз, со аслаз подъездысьтыз арлыдо кышномуртлэсь юано кариськиз: тӥ уд тодӥське-а, вадьсысь коркан кыӵе ке учёнойёс яке гожъяськисьёс уг уло-а?

- Ма, отын чисто пересьёс кадь, азьло, пуныен калгыны потакузы, ваньзэс тодоно-кароно вал, а со коркан не пунызы, не коӵышсы ӧвӧл, шӧдске, адӟылыны уг луы.

- О, табере ваньмыз валамон! – чилектӥз кышномуртлэн йыраз. – Иське, отысь кин ке кулӥз!

- Малы? – куалектӥз бускелез.

- Малы ке шуоно тылзы куинь нунал уг кысылӥськы ни. Ми но, песянаймы коросын кылльытозь, ялан тылын кӧлам.

- Мар но уг луы, оло, озьы но. Куинетӥ нунал ке, иське, ӵуказе ватозы ин.

- Ф-фу, – лулскиз Инна.

…Туннэ Инна ужысь капчи мылкыдын берытскиз, уждун вӧзы премия сётӥзы, ушъязы. Табере кӧня ке уй гань-гань шутэтскыны луоно. Но дышем вылысь изет озьы гинэ уг вуы. Сыӵе дыръя пыдъёсыз сое нырысь холодильник дуре нуо. Кухняяз пырыса, тылзэ ӝуатӥз но, син шораз нош ик мертчиз со пиштžсь укно. Сюлэмзэ соку ик кышкан басьтӥз: кулэм муртэ татчыозь ватысалзы ни, иське, шӧй огназ кылле! Пересьлэн нылпиосыз ӧвӧл-ло, табере зын потытозь, сое нокин уз шедьты… Кӧшкемаса Инна рос-прос кӧлыны ӧз быгаты ни. Ярам, коть ӵуказелы со ӟеч ужамез понна отгулэ куриськиз. Нуназепал сайкаса, со милицие жингыртыны дасяськиз, но маке дугдытӥз ик – мар со соослы шуоз, шӧез ас синмыныз ӧз адӟы ук. Ӧвӧл, нырысь со квартирае ветлоно, бускельёссэс ӝутоно. Инна, вылаз пальтозэ гинэ куштыса, ури-бери вадьсысь корка потӥз, куинетӥ этажозь тубиз. Ӧсэ жингыртэ-жингыртэ, вазись-усьтӥсь ӧвӧл. Ма, кин усьтоз, улэпез ке ӧвӧл. Бускельёсыз доры йыгаське, уг усьто. А шуизы вал, пересьёс уло, мар-о, ваньмыз кытын ке вахтаын ужало-а, мар-а? Нылмурт, вожез потыса, пӧртмаськись квартиралэсь ӧссэ эшшо йыганы ӧдъяз. Ӵап со вакыт пагӟаетӥ тубись луиз.

- Кинэ сокем утчаськоды? – гань-гань юаз ӧжытак пурысьтаны кутскем йӧно воргорон.

- Татын шӧй… Ӧте, пожалуйста, милициез, мон кӧланы кышкасько – татын со ньылетӥ нуналзэ кылле ни.

- Малы татын шӧй луыны кулэ?

- Малы ке шуоно татын ньыль нунал кысылытэк тыл ӝуа ни…

- А-а, валай, – мыньпотӥз воргорон, кисыысьтыз усьтонъёссэ поттыса. – Мон командировкае дыртыса кошкыкум, кысыны вунэтӥ, луоз.

Инна нырысь жќл-жќл луиз, собере, вожез потыса, юаз:

- Нош табере… кысоды-а?

- Куное пырыны пумит ӧд ке луэ, одно ик кысо, – синзэ кырмыштӥз корка кузё.

Зинаида Рябинина.

Мон тубисько ӝужыт гурезь йылэ. Юнгес ӝиптӥськыса изъёс борды, нюжтӥськисько выллань.

Мон тубисько.

Шимес тӧл вузэ, пыртӥм сӥсъя, сэрпалтыны медэ.

Мон тубисько… Азьлань… Эшшо…

Йыр вадьсытӥм сьӧсь кырныжъёс бергало. Кеж-куаж вазе. Уз, соосъя уз луы!

Азьла-ань! Эш-шо… Мон тубисько…

Синкыли, пӧсям ву, огинэ луыса, суто бамъёсме.

Мон тубисько…

Киосы куалекъяса нош но нош ӝабырско пыргись, лыозь бышкись, вандӥсь изъёс борды. Сьӧд луо-пень сураське вирен…

Эш-шо! Эш-шо! Мон тубисько!

Ыштӥ дырме… Ӧвӧл сюлмы, ӧвӧл лулы… Ваньмыз одӥг – мон тубисько!

Азьлань гинэ, азьлань! Мон ту-убисько! Тани-тани вуо, эш-шо!

…Берпум вырйыл. Вань пушкыным зуркалскисько – эш-ш-шо!!! Ы-ы-ых!..

Кыӵе шыпыт…

Усьтӥ мон синъёсме. Пальпотэ шунды. Нош инбам: кыӵе со чылкыт! Султӥ. Татысен, гурезь йылысен, учкисько котыр. Пыдэстэм чагыр ин чильпыра шунды сиос пыр. Ыркыт тӧл веша йырсиосме.

Кыӵе капчи мыным!

Кыӵе бадӟым эрик!

Гурезь омыр сокем юзмыт, сокем ческыт!

Ваньмыз азьлоез – ӧй вал! Тани со, кема-кема утчам Эрике! Эге-ге-е-е!!!

Вай ӟыгырто мон тонэ, сюлэм бордам ӝипто, гадь тырам пыраклы шокчо…

Бен, мон шедьтӥ тонэ, шедьтӥ…

Тырмиз кужмы. Кылӥсь-коды-а? Тырмиз! Тырмиз…

Мон веръяй Эрик омырез. Табере со мон пушкын. Котькулы но. Мар кулэ на? Номыр но… Номыр но?!

Эй, кезьыт изъёс, кутэ монэ! Кутэ монэ!..

Курон

Тузонӟем сюрес урдсы пукси. Шуак пумиськи тӧдьы сяськалэн синмыныз. Бусаськем синчебереныз шорам ӝожмыт учкиз:

- Секыт татын, ишкалты монэ. Ишкалты выжыеным ик. Курисько тонэ. Соку мон вылӥе, инэ лобӟо. Ачим лобӟо, тон ишкалты гинэ. Мыно бурдоос сьӧры, музъемез котырто. Тон ишкалты гинэ, тыныд секыт ӧвӧл ук… Кулэ ке, басьты сяськаме.

- Но соку тынад номырид уз кыльы ни…

- Лулы-модосэ кылёз, со кыдёке-кыдёке лобоз. Ишкалты гинэ, иш-кал-ты!

Мон ишкалтӥ. Нош со ӧз лобӟы. Куасьмем маке кылле табере, книга вискам пачкаса.

Быръён

Возь. Турлы-турлы чебер сяськаос пушъё. Кыдёке мальдо чибори йыръёссы. Турын-куар пӧлы ватӥськыса, будэ сизьйыр.

Возь вылэ ветло адямиос, сяськаосты бичало. Кашамер тусо керттэтъёсты доразы нуо. Сизьйыр ишкалтэмзылэсь кышка, нап турын пӧлысь уг мычиськы. Шунды доры уг кыстӥськы. Кӧсэктэ, куасьмыны ӧдъя. Озьы но куалекъя: кытӥ гинэ медаз ишкалтэ вал.

Ветлэ адями, чебер сяськаосты ишка, тугоко пунэ, турын пӧлысь гужам сизьйырез пуньырӟытыса кошке…

Мӧзмон

Нуналлы быдэ тыныд розаос кузьмазы. Бадӟым льӧль сяська керттэтъёс пыд азяд выдылӥзы. Розаос, розаос… Кузь буртчин дэремад но, йырсияд но ворекъязы эксэй сяськаос… Котькуд вордскись нунал чагыр бӧзэн шобырскыку, тон азьын выль но выль розаос йырзэс мыкыръязы.

Нош тыныд секыт вал. Мӧзмись синъёсын котыр учкылӥд.

Малпазы: талы ӧжыт на. Соку турлы-турлы розаос котыр садъёсын, поръяно сюресъёсыд вылын пушйизы. Ваньмыз тон понна, ваньмыз тыныд – уно сюрс льӧль сюлэмъёс!

Нош тон чильпад аслэсьтыд дуннедэ. Отын, небыт возь вылын, ненег турын-куар пӧлын, мусо йырыныз выретыса, тӧдьы сяська будӥз, пичи ӵуж синмыныз бадӟым шундылэн пыдэстэм синъёсаз выйылӥз. Малпалляд: о, кыӵе шудо со Сяська!

Котырад льӧльмыт-горд йыръёссэс мыкыръязы Розаос, Розаос, Розаос…

Елена Панфилова.

Агаезлэн тазьы ваземез пӧсьвуаз Воваез. Кымесаз быльырам вуос ик тэтчазы. Анайдэ но озьы ик выйытод-а, пе. Та лек, сюлэмез вандӥсь кылъёс сазёмытӥзы сизьым аресъем пияшез. Агаез вазиз но кошкиз, нош сутӥсь кылъёсыз йырзэ ик пильыны кутскизы. Вова соку гинэ тодаз вайиз, лэся: со сад-бакчаын, вуэн тросаз тырмытэм бекче вӧзын.

Мар со татын каре? Ку вуиз татчы? Улонэзлэсь берло чассэ тодаз вайыны турттыса кадь, йырзэ сэзъялтӥз но соку гинэ адӟиз: кияз юн кырмемын писэйпи. Шораз учкиз но, соиз уг вырӟылы ни. Комокез пызьыртӥд ке, быдэс ведра ву потоз кадь – сокем котмемын. Жуммытэм, курадӟытэм тусыз шоры учкыса, сюлэмыд ик вырӟоз. Соин но, лэся, Вовалэн киосыз ӝуаны ӧдъязы. Писэйпизэ музэ куштэмзэ ик ӧз вала. Аслэсьтыз киоссэ соку вуэ донгиз. Эх, посэ ук посэ! Тэкитэн наштаськемын кожалод. Пелляса но утча – ялан ӝуало. Синвуосыз но пызьырало ни. Киоссэ пельпумозяз ик салкым вуэ нош донге. Ачиз но быдэс мисьтӥськиз ни. Та ик быдэс сазёмытӥз кадь экеез.

Вова мырдэм тодаз вайиз сад-бакчаяз вуэмзэ. Школаысь бертыкуз, коркась ӧс вӧлак пась вал. Ма, урамын туж ӝокыт ук. Анаез юртъерзэ тӧлатыны малпам, лэся. Нош бускель коӵыш сое гинэ возьмам кадь – корка пырем ни. Пизэ но сьӧраз валтэм на. Ӝужыт капка но капка ӧвӧл соослы! Кепыранзы но ӧвӧл, лэся. Мурт ӝӧк вылэ тубыса вуттӥллям ни. Йӧлвылэн тэркые гинэ нырзэс донгаса, кӧтсы тырымтэ. Вовалэсь яратоно чорыгзэ но йырйиллям. Мумиз шумпоттыны медэ вал ай: дышетсконысь бертыкуд, пе, ӝӧк вылын возьмалоз пыжем чорыг. Ачиз уже кошкем, сиёнзэ ӵоксаны вунэтэм. Ма, тодаз но ӧз лыктылы, дыр, ӧтьымтэ куноос вуозы шуыса.

Ваньзэ тае адӟыса, Вова малы ке вожомиз. Сотэк но мылкыдыз ӧй вал. Школаын эшъёсыныз жугиськиз уго. Мирошка шуыса исамзы ӧз кельшы но, ачиз но исаськыны кутскиз. Юлтошъёсыз кузь кылыз понна кизэс лэзьяны ӧдъязы. Жугиськон пуромиз. Пунэмзэ сётоно ӧвӧл шуыса визьмам Вова кӧтӝожзэ мурт писэйёс вылэ уськытӥз. Уката солэсь вожзэ поттӥз пичиез коӵыш. Мӧйыез визьмогес ни, лэся, – кузёлэсь пыремзэ синйылтыса, соку ик тэтчиз. Нош пичиез нокыӵе ик ӧз кариськы. Ноку сюдымтэ кадь ялан йырйиське.

Вова сое кутӥз но выж вылэ куштӥз. Соиз, пегӟем интые, шораз мяугетӥз на. Вова уката урмиз. Писэйпиез сильсьӧртӥз кутӥз но чабкиз. Быжо но пунэмзэ берыктӥз – Вовалэн суяз гижыоссэ мертчытžз. Пияш ачиз но ӧз вала ни сад-бакчае дыртэмзэ, «тонэ выйыто» шуэмзэ. Верам гинэ ӧвӧл – писэйпиез вуэ донгиз. Соиз потыны выриз ке но, кужым пичигес вылэм, лэся. Пияшез ӵабъямез но ӧз юртты ни. Отӥяз воксё но ӟигарыз быриз, нюръяськемысь дуг-дӥз. Нош Вовалы маке шат! Одӥг юдэс сиён понна гинэ вожомемзэ буйгатыны выре. Мучолоез гыллям сямен, писэйпизэ солань-талань вуын сэзъя. Ӵапак сыӵе дыръя ик адӟиз сое агаез но «лул быдтӥсь» шуиз.

- Ӧвӧл, мон лул быдтӥсь ӧвӧл! – быдэс гурт тыр кылымон кесясько Вовалэн куалекъясь ымдуръёсыз.

Ачиз но быдэсак дыгыр-р-р куалекъя ни. Музын костаськись писэйпизэ но мырдэм кутӥз. Киосыз пичи комокез вормымтэен, сое бордаз ӝиптӥз но эх маялля ук, эх маялля. Чупаса но утча. Пушказ лул шокчыны выре кожалод. Сэзъя – сайка ни, сайка, шуэ кадь. Нош писэйпилэн одӥг гонэз но уг вырӟы. Чорыгесь нырыз но уг зынъяськы. Котмем йырыз я сопала, я тапалы кыньыр-куаньыр усе. Кузесь гижыоссэ но уг потта ни. Я, коть ӵабышты! Али Вовалэн ненег киосаз лэчыт гижыостэ мертчытӥд ке, пияш шумпотыса эктыны ик кутскоз. Ӵабышты!

Но писэйпи тэльмыремзэ но, чупамзэ но экелэсь ӧз шӧдылы ни.

Нялтас вераса, Вова быдэс уйзэ писэйпиеныз ӟыгырскыса потӥз. Ялан сипыртӥз: лул быдтӥсь ӧвӧл мон. Мон нокинэ ноку уг быдты! Янгышен тазьы пӧрмиз. Ваньзэ выльысь берыктыны луысал ке, мон ачим вуэ тэтчысал ни. Аслэсьтым чиньыме но куртчысал.

Быдэс арнязэ Вова аслыз кытчы пырон инты ӧз шедьтылы. Матрас улаз ватэм писэйпизэ поттоз но выльысь сое ӟыгыртоз, простить карыны куроз. Сюлэмызлэсь одӥг юдэссэ солы кузьмам кожалод. Ялан маялля, чупа. Синвуоссэ но уг вормы.

Нош огполаз школаысь бертэмез бере матрас улаз пыриз но – отын нокинэз ӧвӧл. Анаез шӧез нюке куштэм. Вова сое утчаны выриз на. Ӧз шедьты. Оло сютэм куакаос нуиллям, олошай. Но туннэ ке но Вовалэн писэйпиен ӵабъям суйёсыз кужекъяло на. Пытьыез но кыльымтэ ке но. Мурт писэйёсты со лушкем сюдылэ. Сӥль юдэссэ, ачиз сиытэк, портфеляз понэ но, школае вуытозяз, урамысь коӵышъёслы люкылэ. Дораз но олокӧнязэ, фермаысь шедьтыса, вайиз ни. Анаезлэсь тышкаськемзэ пеляз ик уг поны. Ассэ буйгатэ но куддыр: лул кузьмась мон, мон ке ӧй луысал, таос кемалась сютэм кулысалзы ни.

Елена Сараматова.