17 аресъем кылбурчи Ксения Евсеева.

Кылбурчи – со шара мурт. Солэсь нимзэ тодо. Солэсь кылбуръёссэ дунъяло яке сяласа кельто. Удмуртъёс пӧлысь егит кылбурчиос чиньыен лыдъямон.

Яр палъёсысь Ксения Евсеева дышетске ИжГТУ-ын. Солы 17 арес. Алигес ӟуч но удмурт кылбуръёсын «То, вечное» книгаез потӥз. Но ми сое малы ке ум тодӥське, со сярысь кылэммы но ӧвӧл. Кызьы озьы луиз?

- Ксюша, малы тон кылбураськод?

- Мон понна та туж кежег юан. Кылъёс, тылобурдоос кадь, асьсэос дорам лыкто. Нош мон соосты кутӥсько но радэ пуктӥсько. Дас куинь арескысен кылбуръёсам янгышъёс сярысь гожъясько вал. Азьланяз медам янгыша ни шуыса. Нош берло дыре шӧдӥсько, кылбуръёсы кыӵе ке мукетэсь луизы. Мукет кылъёсты кутылӥсько. Бадӟымасько ни-а мар-а! (серекъя)

- Нош ку но кызьы книга поттон сярысь малпанэ вуид?

- Адямилэн улонэз люкетъёслы висъяське. Котькуд пилет одно ик маин ке йылпумъяськыны кулэ. Книга поттыса, пушдуннее лачмыт мед луоз, дас тямыс ареслы мон та улонын мар ке но лэсьтӥ ни шуыса.

- Тодӥсько, тон озьы ик веросъёс гожъяськод.

- Гожъясько! Философие зымыса ик. Эшъёсы ӝӧк вылын сылӥсь улмоез улмоен ке адӟо, мон понна со адями но, солэн адӟонэз но…

- Но та дырозь тросэз матысь эшъёсыд гинэ но ӧз тодылэ, тон кылбурчи шуыса.

- Книга поттон – со мон понна туж бадӟым малпан. Малы со сярысь нокинлы ӧй вера? Пичи дырысеным кышкатъязы угось, кинлы ке малпандэ верад ке, со уз быдэсмы. Соин ик мон малпанме улонэ туж лушкемен пыӵатӥ. Малпасько, кылбуръёсы шедьтозы асьсэ лыдӟисьсэс, дунъясьсэс.

- Ӵемысь нылъёс кылбураны кутско, нырысьсэ яратыкузы. Нош тон понна мар со яратон?

- Яратонэз номырин но ӵошатыны уг луы. Сиськемед потэ ке, мынӥськод гур азь пала. Лыдӟиськемед потэ ке, книга кутӥськод. Нош яратон вуэ ачиз. Юатэк-вератэк, потэ-а яратэмед, уг-а. Адями яратыкуз котьма карыны дась. Яратон – быдӟым кужым! Люкиськон дыръя кужым быре. Туж шумпотысал, улонам нош ик та кужым лыктысал ке…

- Кыӵе кылбурчиосты висъясалыд? Кинлэн кылбуръёсыз тыныд кельшо?

- Котькин ас кельшемезъя быръе. Ярасьтэмъёссэ уродэн вера. Но мон талы пумит. Тыныд уг кельшы ке кылбур, со одно кельшоз мукетызлы. Соин ик кулэ ӧвӧл кинэ ке, мае ке уродэн вераны. Аслым ярась кылбурчиос пӧлысь висъясал Флор Васильевез но Сергей Есенинэз.

- Книгаед потӥз, кылбуръёсыд каллен вӧл-мозы, ваньзэ тае тон ачид лэсьтӥд. Шудлэсь шӧмзэ шӧ-дӥськод-а?

- Мон котьку шудо вал! Но книга понна гинэ ӧвӧл… Вӧзам – семьяе. Сотэк мон – нокин. Семьятэк мон – бурдтэк тылобурдо.

Вераськиз Лукерья Шихова.

То, вечное

То, вечное храню в своей душе,

Что бог принёс в дары мне при рождении.

Что было предками завещано Земле

И мне передано во хранение.

То, вечное храню в своей душе,

Что с материнским молоком впиталось в сердце,

Что было выжжено на мировом костре

Страданий, лжи молотом враждебным.

То, вечное храню в своей душе…

Любовь, добро, молчание во спасение,

Надежду, веру, совесть и вполне

Достоинство Земли и уважение.

То, вечное храню в своей душе.

И буду я хранить, дотоле сердце

Не перестанет биться, жить во мне.

И не заглохнет зов души, так жаждущий спасения.

Тон лоб

Нош сӥзьыл нунал.

Тон дорам ӧй вал.

Ноку, дыр, уд лык дорам…

Зор кисьтӥз ӝытпал. Тон дорам ӧй вал.

Зор шапык ваське синмам…

Тон лоб, тон лоб,

Но монэ тон ӝог гинэ, дыр, вунэтод…

Тонтэк уг быгат улыны…

Быдтод, быдтод,

Тон монэ куке, дыр, гу доры вуттод…

Тонтэк уг быгат чиданы…

Жингыртӥ дорад – тон ӧвӧл гуртад…

Дуннеын огнам кыли…

Нош мынӥ гуртад – тон Соин огнад!

Инмаре! Мар-о! Быри!

Вордскем гуртэ

Вордскем гуртэ. Тодмо сюрес.

Кудлань тон мынӥськод?

Веськрес беризь. Кезьыт  ошмес.

Ваньзэ тон валаськод:

Малпанъёсме, куректонме,

Бӧрдӥсь сюлэм крезез,

Адямилэсь вань улонзэ,

Пӧзись адӟон шурез.

Пичи Пурга ёросысь Байситово (Пуро) школаысь покчиосын ужась дышетӥсьлэн Екатерина Макаровалэн улоназ шудоесь тупанъёс луизы. 2006-тӥ арын, 30 аресэз азьын, «Шӧдон» книгаез потӥз. Нижний Тагилэ Россиысь егит гожъясьёслэн семинаразы ветлэмзы бӧрсьы Люза Бадретдиноваен кыкназылэсь но бичетсэс «Удмуртия» издательствоын печатланы дэмламын вал уго. Вить ар ортчыса, Эстония Е. Макароваез литература удысысь премиен шумпоттӥз. Сое басьтӥз, «Ӵыжы-выжы луись калыкъёслэн программазыя» конкурсэ пыриськыса. (Пусъём: солэсь азьвыл та коньдон премиез утӥзы С. Матвеев, М. Атаманов, У. Бадретдинов но Л. Бадретдинова.)

Екатерина Макарова вордӥськемын Азьдагалэн (Драконлэн) араз. Соин ик оске: таиз ар удалтон, азинскон вайыны кулэ. Сое кылбурчиез сямен шӧдон-усьтон вылысь вераськом асэныз.

- Гожъямъёсад пӧртэм кылбурчиослэн куараоссы шуккиськыло кадь. «Марлы кулэ мыным вӧлдэт, куке вань на инбам», – шуиськод. Нош М. Цветаева: «Если душа родилась крылатой, что мне хоромы, что мне хаты…» Тынад: «Бӧрдэ, викышъя кылбуре, жаля, дыр, жуммем улонме. Пото ай кыре но буре…» М. Федотовлэн: «Ӵукна гордэктӥз ке инвис, пото мон кыре но буре. Вапум, нылпидэ тон эн ви. Эн кушты монэ, Инмаре…» Валасько: кылбурчи юромо кинлэсь ке уг асэсты. Со куараос асэрказы, адскисьтэм тӧл бурдъёс сямен, котькуд поэт доры куриськыло. Озьы ке но ог-огедлэсь адӟем карон но луэ. Тани тон кинлы нырысь ик синмаськид?

- С. Есенинлы. Школаын дышетскыкум, Ф. Васильевез трос лыдӟылӥ но солэсь мазэ ке «лушкай», дыр. Педучилищеын дыръям М. Федотовлэн дуннеяз выйи… Куке П. Захаров меӵак шуиз вал: та чурдэ Федотовлэсь, пе, лушкамед. «Нош куазед весь зоре но зоре…» сярысь озьы вераз. Ачид но шӧдытэк, кинлэн ке куараезъя кариськиськод ке но, малпасько, котькуд кылбурчи ассэ гожъя. Зэмзэ ке, та дырозь но дуннеез усьтӥзы ни, но со аслыз ачиз ваньзэ выльысь усьтэ, нырысьсэ.

- Калыкын асьмелэн тазьы дунъяны дышемын: кылъёсыдъя кырӟанъёс вань ке, тон зэмос кылбурчи. Зэмзэ ке, гожъякуд уд малпаськы, та бордысь кырӟан мед пӧрмоз шуыса. Кылбургур гинэ сьӧраз валтэ кадь. Озьы ук?

- Озьы, но крезьгурчиос мазэ ке шедьто, сюлэм гурзыя тупасьсэ. Тодэмея, «монэн ӵош» кырӟанъёс гожтӥзы ни Пантелей Кузнецов, Пётр Симонов, Виктор Крестьянинов. Нырысь ик Эдуард Уразов «Ой, уе, тани нош пумиським…» шуыса гожтэмме синйылтэм. Нош Пуро клубамы ужась Юрий Волков мынам кылъёсыя даслэсь уно кырӟан пӧрмытӥз, мон бордысен умой-умой крезьгураны кутскиз. Али но книгаысьтым утчаське на.

- Книгадэ пӧськытозы ни. Клубын ужасьёс тонэ кыскало кадь, нылпиослы но мед гожъялод шуыса. Тани школаын но ялан мырӟыло, творчествоен герӟаськем конкурсъёсы пыриськыны ӧтё. Нош тон ӵемысь пыкиськиськод: уг, уг, уг…

- Куремзыя-косэмзыя гожъяськыны мон уг быгатӥськы. Кылбуръёсме сюлэмам кема веттаса возисько. Соин ик ӝыныё кылбуръёсы трос. Одӥг кылыз коть уг кельшы ке, уг поттӥськы калыке. Гожтэм кыл даурлы ас нимыд борды лякиськыса кыле ук. Ӵыжектоно медам луы. Нырысь-валысь трос печатласьки вал. Мае гинэ редакциосы ӧй лэзьылы – поттылӥзы.

- Малы ке шуоно 1990-тӥ аръёсы ик творчестводэ тазьы дунъяны луэ ни вал: тынад котькуд кылыд юн-юн ас интыяз пуке, отысь номырзэ уд вошты, мылкыдыд но, малпанэд но, крезьгуред но – ваньмыз одӥг уробое кыткиськемын.

- Пётр Захаровлэсь кылъёссэ вераськоды. Но мон понна вылтуслэн вальк-вальк луэмез нырысь интыын ӧвӧл. Поэзия мон понна – лул пушме усьтон. Та вакытэ адямилэсь дуннезэ пушласянь, психология ласянь эскерисько. Сыӵе литератураез лыдӟисько. Дейл Карнеги, Наполеон Хилл асэным ужаны, психоанализ лэсьтыны луонлык сёто.

Профессионалъёс тани гожъясько шильк-шальк рифмаосын, ваньмыз интыяз кадь, но мыным со кылын шудон кадь потэ.

- Кылын шудонъёс ик ӵапак нылпиослы кельшо. Со ик кылшӧдонэз улӟытэ. Таиз ласянь нылыд понна уд тыршиськы-а? Уд гожъяськы-а солы?

- Уг. Школа куремъя одӥг-кык маи ке вал, но вунэтӥ ни. Мон сямен, нылпи кылбурчи луоно ке, Корней Чуковский кадь мед луод.

- Туж бадӟым курон пуктӥськод… Оло, та поэтэз берыктыса утчано? Но, тодэмея, умой берыкъясьёс вал ни – Аркадий Клабуков бордысен.

Зэмос кылбуран понна нимысьтыз дыр кулэ-а? Кызьы малпаськод?

- Дыр но, инты но кулэ. Али пичи улон сэрегамы ми куинь кузя: ачим, нылы но мамае. Ксюшае уйсы, изьыны уг вала, нош ачим – тюрагай, вазь шӧдӥсько. Соосъя кариськытэк уг луы.

- Тани огаз кылбурад – «Ма со чылкак ук шунды тусо, Шундыныл, дыр, со – айиз тусъем!» – шуэмын. Тулыслэсь вордскемзэ вераса, сое ас вылад выжтӥд кадь, аслыд шудо луыны юрттӥд… Кылбурчиос котьку озьы, мыным потэ, азьпала учко, азьланьзэ шӧдонэн уло. Ӧвӧлзэ вань карыса гожъяменызы сое зэмато но. Нош… «Та вужер – мугоры – синпӧет, улонлы мон ӧвӧл сӥземын». «Эх! Лӧптэ ук, лӧптэ быронэ». Таӵе кышкыт чуръёслэсь палэнсконо шуыса ачид но валад ни кадь?

- Зэм но, мыным верасьёс вал: «Озьы эн гожъяськы. Учкы, со сюрес Миша Федотовез кытчы вуттӥз». Мон асме ачим вормыны, бурмытыны тырши. Со «вӧсь» дорысь палэнски. «Кудӟи но ни, мар ватонэз, кудӟи аслам шудбуреным…» «Вуиз пушъён, вуиз сяськаяськон дыр…» Кырсьсэ, секытсэ али сюлэмы палэнтэ ини. Юнме шорысь ӧвӧл, дыр: Люза Бадретдиновалэн шунытэсь, чылкытэсь чуръёсыз матын луизы. Нылы вордскем бӧрсьы югыт си монэ табере валтэ.

- «Шыпыт», но куддыръя «кесяськись» лирикадэ сцена вылысен лыдӟысал-а?

- Ӧйтӧд, мон мукетъёслэсь кылзысал кадь, мылкыды ик лопырске. Нош аслам озьы лыдӟыны уг тупало, дыр. Азьлогес ай кылбуръёсме калык син азе поттыны ик кепырасько вал. Ас пушкам гинэ возьылӥ. Наизусть тодӥсько вал.

- Книгадэ но, оло, ватыса возид, оломалэсь возьдаськыса… Мон сое выльысь кутскыса лыдӟи, азьвыл усьтӥськымтэзэ валаны тыршыса. Пӧртэм мылкыдъёслэн вес чашаос вылын кадь нюръяськемзы. Кин вормоз? Ӵемысь усем мылкыдъёс секытгес кыско, книгаедлэн пумаз но, йылаз но сӥзьыл куазьёс вормыло. Вераны но шедьтӥськод ук! «Та улэп музъемлэн кисальӟем мугорыз…» «Та сӥзьылэд, пе, чылкак визьтэммем, йырсиоссэ оген-оген ишка…»

Поэзия «мур вуосты яратэ». Отысь утчаськонын оген кышкыт, зэмзэ. Соин ик кужмо эшъёстэ, дышетӥсьёстэ тодэ ваёно луэ. Кин со юрттӥсьёсыд?

- Нырысь ик, шуысал, Надежда Демьянова, Аксакшур школаямы 5-тӥ классын дыръям ужаны лыктэм дышетӥсьмы. Со кылбур пӧрмытон амалъёс ласянь нырысь тодонъёс сётӥз. Нош отӥяз кылтӥрлыкме волятыны юрттӥз ёросысьтымы «Пурга гуръёс» литобъединение. Можга педучилищеын Татьяна Иванова дышетӥсьмы лул-сюлэмме шӧдыны-валаны тырше вал. Но тужгес трос сётӥз, шуысал, Удмурт кун университет. Татын поэзиез валанэ мургес луиз, солэн лушкем ватосъёсыз усьтӥськизы. Диплом уженым кивалтӥсен Василий Ванюшевен ӵош поттӥм «Кыл но кылбурет» студентъёслы пособие.

- Дунъясьёсыд трос ӧй вал на, но котькудӥз ик «гадь пушкам кайгуэ» шуэмъёстэ валаны тыршылӥзы. Кытысь, мар бордысь со потэ? Ачид кызьы шуысалыд?

- Шуысал: сыӵе шӧдонэн вордскиськем.

- Мукет сямен но валэктыны луоно. Мылкыдлэн кыстаськемез, пуш куаралэн кесяськемез – со 1990-тӥ-2000-тӥ аръёсысь курадӟонъёсын, огъя депрессиен герӟаське. «Бурдо лу, Катерина!» шуыса сӥзёназ В. Ванюшев но сое пусъе: мылкыд зӥбиськыса улэмлэн огез бадӟым мугез – «быдэс улонмы берло аръёсы йырчукин кымалтӥськиз». Озьыен, Екатерина Макарова – ас вакытэзлэн вордэм нылыз, шуыны луэ. Выльдӥськон кутскиз – тынад ӵапак еж вакытэд – 15 арес но ӧй вал. Соин ик паймыны кулэ-а таӵе ӝожтӥськонэдлы: «Та дас тямыс но аресам – я кин оскоз – сыӵе жади…»

Катерина, улонад югыт ӧсъёс но усьтӥськизы ни. Но малы ке далайгес ини уд печатласькиськы, чалмид…

- Мон али аслым мукет адями кадь потӥсько. Поэт луэмелэсь палэнски. Но…

Отын улэ со, мон пушкын,

Кытын пеймыт,

ӝокыт но зын.

Кытын ваньмыз

сыӵе юрӟым -

Юг кылбурчи

нӧд четлыкын.

Озьы, мон сямен, одӥг мурт пушкын ик пӧртэм макеос вань, кырсез-курез но, чылкытэз но. Кытын улӥськод, соя ик воштӥськиськод. Таиз – быдэстымтэ кылбуръёсы пӧлысь. Трос мынам соос, сюлэмам ӝужаны курадӟо. Гожъяськонам, зэм но, бадӟым вис луиз. Выльысь кылбураны кутски на ке, чуръёсы выль сямен ӧръяськозы кадь потэ. Трос маке шоры мукет сяменгес учкисько ни. Сямы но кӧня ке воштӥськиз. Кытӥяз, шып улэм интые, пырак верано кожасько. Улон югдур адямиез воштэ.

- Яратон сярысь кылбуръёсыд ӧжыт.

- Мон доры синмаськон ӵем уг кожалля.

- Та вакытэ мед луысал-а пыкъетэд? Кыӵе со, пиосмурт идеалэд?

- Нырысь ик – сюлмаськись. Со сяна, тунсыко адями мед луоз.

- Тазьы шуэме потэ. Тон – пукись ты вылысь вукарнан кадь. Со тыэз ӧжытак зуркатыны кулэ вылэм. Возъетэн пытсаськем дуннеяд пыремлэсь кышкаськод-а? Туж векчи бурдъёсыд – шӧдонэд – оло, ӵапак сое возьмало?

Татьяна Чернова

Мон сыӵе, кыӵе вань…

* * *

Мар уже мынам, мар супыльто

Мон сярысь сьӧлыко кышноос.

Зулёзы-голёзы ни ойдо,

Ӧз ке шере, кылзы ныжомоз.

Мар мыным, изъёссэс ке потто,

Таӵ! лэзё ке восьмем тыбырам.

Мон уси ке но, нош ик султо,

Мон уг кары асме серекъян.

Каршемзы но мар ке шат мыным,

Адӟиськод ук тани – улӥсько.

Мар мыным со ваньмыз,

мар мыным!..

Валаськод ик-а бен кожаськод?

* * *

Урод кыл вӧлдӥсьлы

Мон сыӵе, кыӵе вань,

Уд но ватса, уд но кушты:

Мон – Инмар но мон – Шайтан,

Адями – нимы, валад, дыр.

Нош астэ тон лыдъяськод, пе,

Инмарен гинэ, бырид.

Жалясько, монэн сэрен ке

Шайтанэн огъя луид.

* * *

Я малэсь весь мӧзме сюлэм,

Малы кесяськыса бӧрдэ?

Сӧсыр тылобурдо выллем,

Малпа на ин сярысь юнме.

Куддыр буйгатӥсько асме:

Тани шудбур ваёз тулыс.

Тулыс нош лулскисько гинэ:

Эшшо огез аред ортчиз.

Я ку бен, ку кылбуръёсам

Уз кылӥське ни ӝож гуръёс?

Мӧзме, бӧрдэ сӧсыр сюлэм,

Бурдо сямен лобо аръёс…

* * *

Кытчы меда, кытчы ыштӥ

Со синъёсты,

со синъёсты?

Йырвизь ыштӥз но – вунэтӥз,

Сюлэм утча со синъёсты.

Со синъёслэсь мӧзме ӟардон,

Вӧта толэзь

со синъёсты,

Льӧмпу валлян возьмаз, толон,

Туннэ возьма со синъёсты.

Со синъёстэк

куасьме узьым,

Льӧмпу сяська пуртэсаське.

Со синъёсын кӧня кужым! -

Кайгу катьтэм пыдесъяське.

Со синъёсын

улэ шудбур,

Бурме сюлэм – учкемзылэсь,

Ортче висён, ортче йыркур,

Мӧзмон кышка со синъёслэсь.

Нош мон ыштӥ, кытчы ыштӥ

Со синъёсты,

со синъёсты?

Йырвизь ыштӥз но – вунэтӥз,

Сюлэм утча

со синъёсты…

* * *

Вордӥськон… Выль дунне…

Нырысетӥ вамыш…

Кылдэмез туж ненег,

Возьмасез нош – кырныж…

Яратон, люкиськон -

Улонлэн вирсэрыз…

Утчаськон но ыштон -

Адӟонлэн ымнырыз…

Куректон, шумпотон -

Сузэро-апайёс…

Сьӧлыкан, вӧсяськон -

Кык эшъёс-агайёс…

Мӧйымон… Пересьмон…

Берпуметӥ вамыш…

Выль дунне… Вордӥськон…

Выль улон… Выль кырныж…