- «Донды Батыр, солэн пиосыз но Уйпери сярысь кузьмадёс-кырӟанды» кызьы кылдӥз?

- Бен, туж трос ву бызиз ни вашкала выжыосмы дорысен туннэ нуналозь. Уноез вунӥз, ышиз, озьы ик эпосмы но. Луоз на-а мае ке берыктыны? Сюроз на-а эпослэн сӥньыс нюжаез? Шумпотоно, асьме тодосчиос шедьтӥзы сыӵе нюжаосты. Одӥгез – Кузебай Гердлэн «Докъявыл» эпосэз.

Мукетыз – М. Худяковлэн удмурт легендаосъя ӟуч гожтосэз. Со сяна, тодмо Г. Верещагинлэн, Кедра Митрейлэн, М. Ильинлэн, И. Яковлевлэн эпослы матын луись ужъёссы. Татчы ик будэтоно асьме вакытысь тодосчиослэсь В. Владыкинлэсь, Т. Владыкиналэсь, В. Ванюшевлэсь но мукетъёслэсь книгаоссэс. Ваньмыз со монэ бурдъяз-ӝутӥз та бадӟым произведение борды басьтӥськыны.

- Фольклор вылын гожтос тунсыко-а меда туала лыдӟисьлы?

- Мон та сярысь азьвыл но ӧй малпа, али но уг. Мар борды кыске сюлэмы, со сярысь ик гожъясько. Эсьма, ялэм конкурсъёсы но уг пыриськиськы. Отын коньдон премиез ке но луэ. Сюлэм мылкыдэз уксё ворме ке, тод: творчествоедлы пум вуиз.

- «Аргурезь» кырӟанды чузъяськыку, кыӵе малпанъёс йырады бергало?

- Мынам та кырӟанэз огшоры кылзэме уг луы. Пушкы тыре. Тодам вайисько песятайме, мон понна туж дуно адямиез. Уго сое ыштэмен валче кылдӥз та кылбуре. Мур кайгуме герӟай на удмурт крезен, удмурт калыкен…

Шумпотыны кулэ кадь: малпанэ быдэсмиз, удмурт крезь выльысь жингыртэ. Со вакыт ик сюлэмез шугъяськон позыртэ: удмуртъёслэн лыдзы кулэсме, ӟучомиськом…

- Эрик Батуев, пе, 6 арес дыръяз ик кылдытэм нырысь кылбур чуръёссэ. Нош тӥ?

- Мон 6-тӥ классын дышетскыку, Пичи Пурга ёросысь Аксак школаямы вуиз соку гинэ пединститутэз быдтэм егит дышетӥсь Раиса Ивановна Покоева. Со литературно-творческой кружок нуыны кутскиз. Устоосыз ужъёсмы печатласькылӥзы школа бордгазетамы. Нош «кыкетӥ шокчонэ» луиз ини Удмурт пединститутэ вуэме бере – Д. Яшинлэн литературно-творческой кружоказ.

- Дышетӥсьлэн ужез бор­ды выльысь кутскысалды-а?

- 7-тӥ классэз йылпумъяме бере монэ анае Нина Михайловна (пенсие потытозяз, гуртысьтымы школаын дышетӥз) Можгалась педучилищее мыныны косэ вал. Мон пумит луи. «Ачид пиналъёслы визь тырыны улытозяд курадӟид, табере пиедлы сыӵе ик адӟон сӥзиськод-а», – шуи.

Но улон сюрес монэ дышетӥсе ик вуттӥз. Яган-Докъяысь шор ёзо школаез йылпумъяса, документъёсме Казаньысь университетэ лэзи: журналист луэме потӥз. Нош отын, 2-3 ар ужам стажен гинэ кутӥськом, шуизы. Малпай, журналист луыны пӧрмытод, дышетӥсьлэсь ӧнерзэ басьтыса но.

Озьыгес ик луиз. Кӧня ке ар школаын дышетӥсьын ужаме бере мон вуи «Дась лу!» газетлэн редакцияз, школаосъя отделэ.

Табере юанды доры берытско. Туж трос тодмо гожъяськисьёс Можга педучилищеез быдтэмын. Кылсярысь, туж вожъяськыса учкылӥ Г. Ходыревлэн балалайкаен шудэмез шоры. Паймымон суредъёс кылдытъяз Анатолий Леонтьев. Кылбур гожъяны быгатэмзы сярысь уг вераськы ни… Нош быгатонзылы кутскон сётӥз самой со Можга педучилище, кытчы монэ ыстэ вал анае. Со тодэ вал уго мынэсьтым суредаськыны но, арганэн но шудыны кыстӥськемме.

Ӵемысь кылоно: мон улонысьтым номырзэ но ӧй воштысал. Нош мон воштысал: вань быгатонлыкъёсме шараян понна одно ик Можга педучилищеын дышетскысал… Нош отӥыз, кызьы радъяськиз, озьы ик мед мынысал.

- Татчыозь ортчем сюрестэс «лӧдылӥськоды». Поэт яке прозаик тӥ?

- Выльдӥськон кутскем бере вань суй-пыды юскиськиз. Дунне ик йыринчуказ кадь. Со мылкыд кисьтӥськиз кылбуре но. Эсьма, книгаме но «Йырчукин» нимай. Уго югытэз луиз сьӧд, сьӧдэз – тӧдьы! Кытчы кыстӥським азьвыл, со урод вылэм, аламаез – умой! В. Маяковскиез курланы кутскизы. Нош со мынам яратоно кылбурчие. Иське, зэмос кылбурчи вылымтэ со. Нош мон кельшем кылбуръёссэ наизусть дышетылӥ, солэн чуръёсыз шуг-секытэз вормыны бурдъяллязы: «Светить всегда, светить везде – вот лозунг мой и солнца!» Ленин но «самый человечный человек» вал, табере – сьӧсь, лек, урод адями, пе, со…

Книга поттон – гогы чигтон та дыре… Кун уксё уг висъя, шуыны луоз. Зӧк кисыослы книга кулэ ӧвӧл. Таӵе югдуре сялӟиськы вал, куштӥськы гожъяськонлэсь, но мар ке возе. Возе Оскон. Оскиськод: весь тазьы уз луы. Адями сюлэм сюмалоз лулчебереттэк. Выльысь солы кулэ луоз кылбур, верос…

Поэт яке прозаик мон? Таизлы валэктон лыдӟись сётоз ини. Но мон аксым (кќттырмостэм). Котькыӵе жанрын кужымме утчаме потэ. Кыӵе удысын ӟечгес пӧрмыто? Улон-критик дунъялоз ни.

- Малпанды вал-а куке, гуртэ улыны берытскоды шуыса?

- Гуртэ берытскон сярысь ӧй малпалля. Сад-бакчаям уло кожай. Отын но ук инкуазьлы матын. Но кытын пичи дыр ортчиз, отчы сюлэм золгес кыске вылэм. Татын гольык пыд ӵош бызьылэм эшъёсы, книгаысьтым геройёсы уло. Инкуазьмы чылкак сӧремын ӧвӧл на. Гуртмы нюлэсэн ӟыгыртэмын. Губиен, пушмульыен узыр. Возь бамалъёс бусьтыр утялто борыен…

- Галина Романова кылбурчи сямен «ӝужыт-ӝужыт гурезе» шуыны мае быгатӥськоды?

- Али гожъяськисьлы туж ӧжыт саклык висъяське. Солэн сӥ-данэз ӧвӧл ни. Уд ӵошаты кылем даурысь 60-80-тӥ аръёсын, куке Е. Евтушенкоез, А. Вознесенскиез, Р. Казаковаез, Б. Ахмадуллинаез кылзыны бадӟымесь стадионъёсы люкаськылӥзы. Мон со вакытлэсь быжзэ гинэ адӟи на. Но шумпотыса вераны быгатӥсько: кылзыны удалтӥз В. Высоцкиез но А. Вознесенскиез. Со пумиськонъёс ноку вунонтэмесь мон понна.

Табере кылбурчи но, чуръёсыз но нокинлы кулэ ӧвӧл ни кадь. Озьы ке но зэмос гожъяськись туж чидась сюлэмо, нокыӵе шуг-секытъёс шоры уг учкы, ручкаез борды кырмиськемын. Мон но сыӵеос пӧлысь ик, дыр.

Нош ӝужыт-ӝужыт гурезь сярысь ке, мон отчы ӧй тубы на кадь, ялан ӝутскыны курадӟисько.

- Мар курадӟытэ, лул-сюлэмдэс пыжытэ? Мар шумпоттэ?

- Трос мар но со шугъяськытэ: ӟучомеммы но, удмуртлыклэн быремез но. Чебер, визьмо нылъёсмылэн кунгож сьӧры кошкемзы, гуртысь казакпиослэн вина бургые усемзы.

Куке но шуэмын вал: чеберлык дуннеез утёз. Нош кытын со туэ? Телевизорын одӥг виылӥськон, ӟыгыръяськон, дэймытон. Совето вакытысь ӟеч фильмъёсты возьмато уйшор бере яке вазь ӵукна. Кин соосты учке?

Пиналъёслэн тазалыксы ляб. Огласянь – али нылпиос трос вордско кадь, нош мукет ласянь – армие таза пиосты шедьтыны шуг. Выльысь ож пуромиз ке, кин асьмемыз, Россимес, утёз на?

Шумпотонъёс пӧлы пыртоно, дыр, гуртамы газ, ву кыскемез. Литературной студиям ветлэм Маша Золотарёва Г. Ходырев нимо премия утӥз. Вордӥськиз нуноке, куинь полэс песятай луи.

- Вань-а малпанды, та дунне вылын шонер улӥськоды шуыса? Яке ялан асэныды нюръяськиськоды?

- Улонэдлэсь данак аръёссэ та удыслы сётӥд бере, солэсь куштӥськыны уг лу ни вылэм. Со бурмонтэм висён кадь. Соин ик выльысь ӝутӥсько сэрпалтэм ручкаме, выльысь маке но выльзэ кылдытыны курадӟисько. Оскисько, куке но чуръёсы лыдӟись доры вуозы.

Вераськиз Любовь Тихонова.

Аръёсы

Ой, кытчы-о та аръёсы дырто?

Ой, кытчы-о соос лобо, вортто?

Кыткем валъёс выллем ик тапырто,

Дагаоссы лымы комок зӥрто.

Оло, сюан юмша-а урамтӥ?

Гырлы куара пелез онгромытӥз.

Оло, лек тӧл шулам-а кылӥське?

Оло, егит дыры-а берытске?..

Оло, куке адӟем чебер вӧтэ

Монэ пичи муртэ кадь ӟыгыртэ.

Оло, нырысь ӟырдыт яратонэ

Мыным шуэ: «Яратӥсько тонэ…»

Оло, нэнэ-а сайкатэ монэ?

Либыт нёжтэ: «Я султы ни, пие!

Уть ай, ӵукна шунды сукыриен

Пумитаса вите ини тонэ…»

Аръёс, аръёс!.. Кытчы соос дырто?

Ой, кытчы-о меда лобо, вортто?

Кыткем валъёс выллем ик тапырто,

Дагаоссы лымы комок зӥрто…

Мылкыд

Мылкыдлы но кулэ, дыр, сермет,

Мед соин йырвизьмы кивалтоз.

Медаз лу паллянэ кожамед,

Мед шонер гинэ котьку ветлод.

Мед пусъем нӧкыё сюрестӥ

Мынонэд каньылэн йылсаськоз.

Уд ни калгы сюл-кал палэнтӥ,

Ӟигарыд ӟеч ужлы шыръяськоз…

Лэсьтэмын но луоз соку трос,

Гурезез капчиен берыктод…

Нош кызьы-о, мылкыд ке куре,

Серметэн тон сое кортналод!

Ай толэс ужпиед но выре

Кыткетысь мозмыны – ӵыжаське.

Кучерлэсь кылзытэк, ӟуз вирен

Юскиське но пегӟе эрике…

Алексей Арзамазовен, литератураысь тодмо критикен но тодосчиен, туала литератураез эскерон-пертчон понна Ижысь одӥгаз кафеын пумиським. Таӵе адямилы «культурной» инты гинэ тупалоз кадь потӥз, таин сэрен нырысетӥ юанэ вордӥськиз:

- Алексей Андреевич, тӥ ӵем гинэ тодмо муртъёслэсь интервью басьтӥськоды. Удмуртъёслэсь таӵе интыын пумиськемзэс шер адӟылод кадь, озьы-а со?

- Зэмзэ, удмуртъёс ӧвӧл дышемын кафе-ресторанъёсы ветлыны. Интеллигенциысь муртъёсмы йӧно, узыр адскыны «уг дӥсьто». Мон малпасько, соос али ке но кар улон радъя быдэсак уг на уло. Котырам матысь удмурт тодмоосы трос ӧвӧл. Куддыр потэ, адямиослы уг тырмы дунне шоры паськыт учкон, малпанъёсты вошъяны быгатон. Соос шугенгес туала улонэз валало.

- Нош туала литература возьматэ-а таӵе проблемаосты?

- Туала литературалэн аслаз шуг-секытъёсыз. Огъя вераса, валамон кадь валтӥсез: уг тырмо инъет кылдытӥсь муртъёс, сыӵе гожъяськисьёс, кудъёсыз быгатысалзы «нацилэн совестез» луыны. Таӵе эсэплан удмурт литератураын гинэ уг кылды – оглом ӟуч литератураез но суреда. Шоркарысь гожъяськон улонэз учконо ке, литература туннэ лэсьтӥське, «GQ» журналлэн верамезъя, Мускоысь «путинской гламурын» бергасьёслэн синмынызы.

Али лыдӟись но ӧвӧл – зэмос, визьмо лыдӟись, кудӥз понна книга гожъям потэ. Лыдӟиськон – бадӟым уж, капчи уд шуы сое. Выль лыдӟись котькытчы вутске ке но, дуннее золгес интегрировать каремын ке но, пумен «мур копаны» уг ни быгаты, быдэсак выйыны, лыдӟиськонэ зымыны луонлыксэ ыштэ. Со понна ик ышемын «бадӟым роман» категория. Западын романъёсын азьлань пото Орхан Памук, Мишель Уэльбек…

- Удмурт роман гожтоно ке – мар сярысь луысал со?

- Та юанлы, ортчем сюресме учкыса, валэктон утчасал. Мон вордӥськи Нижний Новгородын, выжыосам удмуртъёс вань. Пинал йырын максималист мылкыдъёслы луыса Ижкаре дышетскыны вуи – со дырысен 11 ар ортчиз ни. Та куспын тросэз воштӥськиз, троссэ выль синмын адӟи. Туала удмурт роман борды, мон малпамъя, кыкналасянь басьтӥськоно:

1. Автор сямен тон шара луыны кулэ.

2. Ӟечсэ адӟыса возьматыны быгатоно.

Туннэ улонамы сотэк но трос уродэз, кырсез, мылкыдэз саптасез – литература пыр одно ик вӧлмытоно чеберзэ, бурдъясьсэ.

- Мылкыдэз саптасьсэ улонысь синйылтӥськоды-а?

- Проблема котьку одӥг, удмурт югдурез ик басьтоно ке: ум быгатӥське ӵош пуксьыны-вераськыны, огъя ужаны. Мае луэ дэмен лэсьтыны – уг лэсьтӥськы, ог-огмылы юрттэт ӧвӧл, со понна утчаськом ляб палъёсты, соос шоры юромо чиньыен возьматӥськом. Та интеллигенция пӧлын тужгес но зол шӧдӥське. Кин ке зэмзэ ик ужа, кин ке шузияське гинэ, тэк дырзэ быдтэ.

- Критик синмын – мае али лыдӟиськоды удмурт литератураысь?

- Берпуметӥез, мар борды басьтӥськи – Филипп Кедровлэн кылбуръёсыз. Историяя, кылъя но литературая Удмурт институтын ужасько бере, трос бугыръяськисько азьвыл удмурт гожъяськисьёслэн ужъёссы пӧлын. Ӵошатыны луэ вужзэ но туалазэ: оло, азинскон ӧвӧл шуыса, асьмеос ик янгыш – ачиз общество азьлань вамыштыны уг сёты. Огъясь-герӟась кужыммы ӧвӧл, ваньмыз нимаз-нимаз улэ-шока: «Удмурт кенеш», журнал-газетъёс, телевидение, театр, мукетыз… Тани институтысь егит тодосчиосты ик учконо ке – макем тунсыко эскеронъёсын соос выро! Таиз сярысь ӧжытэз тодэ.

- Тӥ асьтэос ӵем уд потаське калыке, удмурт ужрадъёсы…

- Уг ӧтчало. Кыӵе ке юромо дистанция ум возиське. Мукет ласянь учконо ке, наука – со сыӵе бусы, кудӥз шыпыт гыриське. Тодосчиос улонлэсь кӧня ке палэнын, ворсаськемын. Общественникъёс тунсыкъяськыны кулэ – нырысь ик соос мед кыстӥськозы. Берло дыре сыӵе но югдур кылдэмын: кин ке сярысь трос верасько тыбыр сьӧраз, улэм-вылэмзэ сэртто-пертчо – нош со адямиен асэныз меӵак юалляськыны уг валало.

- Тӥ берло дыре трос ас проектъёсыныды выриды, палэнскиды. Нош удмурт литературая научной ужды маин герӟаськемын вал?

- Кандидат ужме быдэстӥ 2010-тӥ арын март толэзе. Эскери Пётр Захаровлэсь кылбуретсэ, уже нимаськиз «Феномен визуального в удмуртской поэзии». Та темаме али но азьланьтӥсько. Дасясько поэзилэн кылызлэн кылдэмез сярысь книгаме – 1910-тӥ-1920-тӥ аръёсысен кутскыса, туннэ нуналозь. Удмурт кылбурет 20-тӥ даурлэн кутсконаз вордӥськиз, куке пуксиз литературной кыллэн тусыз. Соку писательёс тыршизы калык, фольклор кыллэсь пегӟыны – выль инвисъёсы сузьтӥськизы. Тимашев, Эрик, Еремеев, Майоров, Герд – котькудӥзлэн кылзы туж аспӧртэм.

- Куддыр малпан кылдэ, удмурт культура али ке но ӧз на вормы со шуг-секытъёсты, кудъёссэ сэрттыны турттӥзы К. Герд но Т. Борисов.

- Вань уно гинэ валантэм, мылкыдэз куашкатӥсь тодэ ваёнъёсы. «Инвожо» журналын ужакум, П. Захаровен ӵем потамы гуртъёсы, гожтӥськон радъям, визьнодан уж нуим. Асьсэос ик дышетӥсьёс таӵеезлы дась ӧвӧл.

- Газетмы ӵапак та ужпумъёс борды басьтӥськыны турттэ – пичиен-пичиен, вамыш бӧрсьы вамыш, бадӟым литератураен тодматыны, лулчеберет дуннеез калыке вӧлмытыны. Кызьы малпаськоды, газет та ужез вормоз-а?

- Литература понна ми усьтӥм удмурт Пен-клуб, литератураен герӟам журналмес. Газет сярысь ке, историын трос гинэ литературной газет потамын. Ачиз газет капчи формаосты, яркыт чуръёсты яратэ. Но со калыкез огазеяны, кенешыны луонлык сётыны кулэ: удмуртъёс али ортчись ужрадъёс сярысь лыдӟо, малпанзэс шараяло. Сӥзьысал тӥледлы: газетты котькинлы усьтэмын медло, котькин ас мылкыдыныз тодматыны мед быгатоз – но мед сое валалозы.

- Удмурт кылэз луэ-а дышетыны литература пыр? Тӥ асьтэос туж вольыт вераськиськоды ни! Трос лыдӟиськиды, вылды.

- Литература кыл дуннеез узырмытэ. Но реалист луыны кулэ: быдэс дуннеын али лыдӟиськон кулэсме. Мон удмуртсэ филолог кадь лыдӟисько: кабъёсты, кыл шыкысэз эскерисько.

- Капчизэ уд лыдӟиське шат? Шуом, Алнашозь мыныкуд, электричкае пуксьыса, лыдӟид.

- Та пумысен монэ паймытӥз вал тодосчи Татьяна Зайцева: калыкын, пе, тужгес но ярато капчи кыло беллетристъёсты, соос пӧлын – Николай Никифоров, тужгес лыдӟымон автор, Мадьяров, Ар-Серги. Берпуметӥезлэн прозаез сярысь верано ке, тросэз сое шумпотыса лыдӟо. Ар-Серги совето вакытысь гожъясьёс пӧлысь ӧвӧл ни. Со дӥсьтӥсь адями. Гожъяськыса гинэ няньлы уксё поттэ.

- Тӥ туала дунне литератураез яратӥськоды. Мае синйылтӥды берло? Мае дэмлалоды удмурт лыдӟисьлы?

- Одӥг шокчемен лыдӟи М. Уэльбеклэсь вань романъёссэ. Одӥгез яратоноез – Милан Кундера, Варгас Льоса. Латиноамерикан литература али туж зол азинске. Малпасько, удмуртъёслы матын луысал турок Орхан Памук, кылъёсмы кельшо – кыксы ик агглютинативноесь. Удмуртъёслы дэмласал сое лыдӟыны, мар йырсазез берыктоз – чылкак мукетсэ. Мукет улон ӧр, мукет гожъяськон сямъёс. Уэльбек ик тросэзлэсь «йырзэ пуштытоз». Малпасько, умой мынысал азиат литература. Ӧжытгес интеллектуал шудонъёс, но огкадь дунне шоры учкон. Япон автор Юкио Мисима. Ӟуч классика пӧлысь «маст рид» – Иличевский, Улицкая, Петрушевская. Секыт вераны. Книга шуак вуыны кулэ: адӟид – басьтӥд – лыдӟид. Литературалы дышетыны уг луы ук. Со одӥг частной улонэз суреда. Соглаш луо таӵе кылъёсын но: «Возьматы мыным библиотекадэ но мон верало тыныд, кин тон».

Вераськиз Дарали Лели