Кылбураны Вислава кутскиз Быдӟым ожлэн берпуметӥ аръёсаз. Бызиз егит коммунистлы. Нырысетӥ сборниказ Ленинлы, Сталинлы, выль улонлы сӥзем кылбуръёсыз но вань. Сталин кулэм бӧрсьы гожъяськон ӧрыз чылкак воштӥськиз. Картэныз люкиськиз, коммунистъёслы дурбасьтэмысь дугдӥз, ас мылкыд каремезъя партиысь потӥз. Но диссидент ӧз луы.

Вислава Шимборска оглом 350 кылбур гожтӥз, соосты 12 книгаен поттӥз. Данакез эрико амалэн гожтэмын, яратоно темаосыз: улонысь пичи учыръёс, улонлы синмаськон но аслад кулонэдлы лад-лад дасяськон. Кылбуръёсаз ӵем пумиськыло яратоно эшъёсыз но тодмоосыз, нуналмысь арбериос, ӵем ветлэм интыосыз. Но ностальгия интые Шимборскалэн ужъёсаз кузёяське парадокс.

1996-тӥ арын Шимборскаез Нобель премиен пусйизы. Аслэсьтыз быръёнзэ валэктыса, комитет гожтӥз: Шимборска кылбуръёсаз паймымон усто амалэн мадьыны быгатэ, кызьы история но биология котькуд адямилэн улоназ асьсэды возьмато. Бадӟым премиез сётон кылбурчилэсь азьвыл гань-гань улонзэ шуак-дуак бугыртӥз. Угось Польшаын солэсь нимзэ тросэз тодӥзы Нобель премия сётэмзы бере гинэ. Озьы шведъёс полякъёслы возьматӥзы, кинэ лыдӟоно!

Петыр Палган.

* * *

Кык пол номыр уг луы.

Уз но луы. Со муген, дыр,

вордским ми манӥтэк,

кулом нош амалтэк.

Школа дышетскисьёс пӧлысь

визьтэмъёсыз ке но

луысалмы,

ум кыле кык арлы

толлы, гужемъёслы…

Одӥг нунал уг берытскы кык пол, 

уйёс уг луо, дыр, огвыллемесь,

уг пумисько кык пол со ымдуръёс,

уг луо укшасесь син учкемъёс.

Толон кылӥ мон

тынэсьтыд нимдэ.

Кин ке вераз кылžськымон шара.

Сюлэм кожаз, усьтэм укноетž

усиз горд роза.

Туннэ, куке ми тонэныд ваче,

борддор пала мон берыктӥ йырме.

Роза? Кыӵе со вал?

Сяська-а со? Оло, кӧльы-а вал?

Марлы-о тон, лек, шуэрес даур,

кышкатӥськод монэ токма?

Луэ лобӟын – нош тон татын.

Кошкод – сюлэм буйгатэмын.

Мыньпотыса, ӟыгырскыса

тыршом ни шедьтыны огкыл,

Мед пӧртэммы ке но луоз -

кык чылкыт ву кадь шапыкъёс.

* * *

Бырон – озьы уг яра коӵышен.

Бен мар-о быгатэ со карыны

тырттэм юртын?

Тубоз борддор кузя?

Ӵабыръялоз пуконъёсты.

Юртын номыр но кадь

воштӥськымтэ,

ваньмыз ас интыяз,

озьы ке но висъет ини мукет.

Пеймыт ӝытэ

уг пишто ни тылъёс.

Падӟа вылтӥ тубись

кузь вамышъёс

ӧвӧл ни сыӵеесь.

Тусьты вылэ чорыг понӥсь киос

воксё ни мукетэсь.

Мар ке уг кутскы ни татын 

ас вакытаз кадь.

Мар ке уг мыны ни, кызьы кулэ.

Кин ке но вал юртын,

али нош шӧдтэк шорысь ышемын.

Кема ӧвӧл ни со юртын…

Учке вань шкафъёсты.

Тэтча ӝажы вылтӥ.

Диван улэ пыре.

Тодылытэк – таос кулэ -

пазя котыр кузё кагазъёсты.

Бен мар кыле на карыны 

гуртын огназ кылем коӵышедлы?

Изьыны но витьыны.

Мед гинэ со берытскысал,

мед гинэ нырзэ возьматысал,

бен, валасал соку:

коӵышен озьы уг лу!

Мыноз соку ас кузёез доры,

Мынэмез ке но уз поты,

каллен гинэ

куатаськем пыд вылъёсаз пуксёз.

И нокыӵе чиетонъёс,

тэтчанъёс уз луэ азьланяз.

Поляк кылысь берыктӥз Лада Перевощикова.

Зэмзэ но, та кылбурчиез мургес тодыса, 20-тӥ даурысь поэтъёслэсь курадӟонъёссэс ас лул-сюлэмыз пыр поттӥз, со вакытлэсь яраоссэ ас куэныз шӧдӥз кадь – та сярысь вера «Дом Цветаевой в Елабуге» кылбурез но. М. Зиминалэн шыпыт но сюлэме пыӵась, мур визылъёсыныз малпаськонэ выйытӥсь лирикаез тетрадьысь тетраде выжылӥз, куд-ог чуръёсыз йырамы «печатласькыса» кылизы.

Прости мне дерзкие мечты,

Мои нелепые желанья,

Несовременность простоты,

Несвоевременность признанья…

Маргарита Зиминаез улон ӧз эркия. Соин ик ачиз но шуэ: «Гожъясько соку гинэ, куке улон маке ласянь укыр вӧсь карымон шукке..» Жугизы сое критикъёс но – интим понна, пыдлось лушкем малпанъёссэ лыдӟись азе шараяны дӥсьтэмысьтыз. Удмурт пединститутын дышетскыкуз, егитъёслэн творческой семинаразы «граждан поэзия понна» огез нюръяськись сое пыкылэм бере таӵе чуръёсыз кылдӥзы:

Нош приговор таӵе: «Укыр… аслыз,

Ас дневниказ гинэ – газет баме уз мын.

Гожъямъёсыз – соиз, таиз – ваньмыз

Зэмос улон-вылонлэсь кыдёкын.

Дыр вуиз – М. Зиминалэн «сокем адямилыко, сюлэмез эмъясь чуръёсыз» сайкыт тулыс омыр кадь кулэ луизы. Олег Поскрёбышевлэн, Анатолий Демьяновлэн, Дора Черашняялэн ас дыраз дунъямзы нылкышно кылбурчилы «авария луонлэсь, лул-сюлэм пыргонлэсь» утиськыны юрттӥз.

М. Зимина, беромыса ке но, кылбур книгаоссэ поттӥз: «О несуетном поговорим…» (1993), «Лирика» (1999), «Эти вечные темы» (2005). Москваын «Поэзия», «Исповедь» альманахъёсын печатласькиз, асьме дорын – пӧртэм огъя бичетъёсын.

Со туж гажано адями луэ Камбаркаын. Татын уго 1976-тӥ арысен школаын ӟуч кыллы но литературалы дышетӥз, ёросын литобъединениез радъяз-нуиз. Маргарита Георгиевна Россиысь профессионал литераторъёслэн огазеяськоназы пыремын.

Нош вордскиз Маргарита Зимина Можга карын, ож гудыриос чалмем бере. Та толэзе со пусъе 65 аресъем юбилейзэ.

Татьяна Чернова.

* * *

Кылбуран сярысь малпай но,

Шуизы: «Малы кулэ со?

Чидано, палэнтоно.

Музады бен жаль потэ ик,

Но кӧттыр улод ӝукен ик.

Кылбуртэк улны луэ на,

Нош ӝуктэк – кыӵе улон?»

Кылбураны малпаськи но,

Шуизы: «Малы кулэ со?

Кельтоно берло дырлы.

Нош али мисьтаськоно вал,

Чулкаез но вурӟоно вал,

Магазинэ вутсконо на,

Кӧтэз кулэ кышъяны».

Лӧптыса, бурдтэк лобай мон,

Кылбурен улӥ-гомай но…

Шуизы нош: «Сыл ай, сыл!

Визь тыныд куке пыроз-а?

Улонмы – быдэсак проза.

Бен, татын уг буды роза -

Сёт инты картошкалы».

Зэм ик, зэм но, йыр бушен но

Вуиськом али шуге но.

Мар уг луы улонын…

Поэт гинэ луоно ке,

Дискотекаын нылыд ке,

Картэд огназ киноын ке -

Кин миськоз тусьты-пуньы?

* * *

Тон шуиськод: «Я, васькы ни музъем вылэ,

Инсьӧръёсыд мыным ӧвӧл кулэ».

Бен, мон понна музъем но вань,

Но ас бордаз кыске инбам.

Вӧзам ке тон, синъёсыныд,

Куараеныд но шунтӥськод.

Нош мар каром, вылысь кизилие

Монэ ялан ӧте ке та вие?

* * *

Поэзия – Золушка, чын.

Политикъёс – нош вал вылын.

Нош лирика – ышыгын,

Ӧвӧл ни кулэ кунмылы.

Пӧсьгес но пӧсьгес – дебатъёс,

Лекгес но лекгес – улон…

Золушкаос кышъетъёс

Дэремазы пуктыло.

Улэп на-а фея, кытын?

Жаля-а куанер нылмуртэз?

Ӧвӧл ни… Чилясь паркетын

Уг тэтча хрусталь катаез.

* * *

Вождэ эн вай дӥсьтонэлы,

Ӧвӧлтэмзэ вань каремлы,

Огшорыгес адскемелы но

Туалалы тупамтэлы,

Векчи пунэм йырсиелы,

Выжыкылысь тӧлпоослы,

Уйвӧтысьтым пияшелы но

Тынад кадесь синъёсызлы.

Вождэ эн вай дӥсьтонэлы!

Яратӥсько азьвыл сямен ик…

Алдаськытӥсь жалясь кылыд -

Тон яратӥд, кожай, зэмен ик.

* * *

Нош ик уй – шобыртэ ни асьмеды.

Нош ик, нош солэн сьӧд вотэсаз,

Вань кӧтӝожъёсыз вунэтыса,

Мугорлы сётске пӧсь мылкыдмы.

Я бен мед, та алдаськон эсэп ке но…

Сёт мыным, мае быгатӥськод…

Нош ӵукна кытчы-о кариськод?

Та уйёс – синпӧето суред гинэ.

Ма гинэ уд малпаськы – зэма,

Куар кадь лякиське ку бордамы.

Нош али – уй ӟырдамын.

Яраты монэ.

Яраты. Ай ӟардытозь кема.

* * *

Секытгес кошкыны ни дорысь,

Поездъёс но уг витё, уг ӧтё.

Нош луиз ке озьы – кошкемысь

Возьмалоз сюресам мур гутё?

Ой, кыӵе яратӥ вал куке

Вокзалэз но, огыр-бугырез но.

Рельсаос но шпалъёс кытын ке -

Лобӟыса ик нуиз выль сюрес.

Нош али – малы на сьӧр кунъёс?

Думемын кадь, уг ӝутскы пыды.

Бен отын возьмало шат – кинъёс?

Ӝуамын ке сӧсыр мылкыды…

Ӟуч кылысь берыктӥз Татьяна Чернова.

Одӥг пи нуналлы быдэ вӧзаз пукылэм, мадьылэм, макем чебер та дунне. Эшъёс луиллям. Огпол ныл эшезлы тазьы верам:

- Та дуннеез адӟысал ке, тыныд бызьысал.

Огнуналэ почта нуллӥсь сукыр ныллы гожтэт ваем: кин ке тодмотэм мурт солы синъёс кузьма, операция понна дун но тыре, пе. Ныл шумпотыса соглаш кариськем. Син вылысьтыз бинетэз басьтэмзы бере анай-атайзэ, сузэр-вынъёссэ, быдэс дуннеез адӟем: операция удалтэм.

Дораз бертэм бере эшеныз адӟиськыны мынэм.

Пи солэсь юам:

- Табере быдэс дуннеез адӟиськод ни ке, бызёд-а мыным?

Ныл, пи шоры учкыса, солэсь сукыр луэмзэ адӟем. Кынем синкабакъёсызлы абдрам. Быдэс улонзэ таин тазьы улоно луоз шуыса, чик кельшымтэ, пилы «уг» шуэм. Эшъяськонзылы но пум вуиз шуыса ивортэм. Ныллэн улонэз табере чылкак воштӥськем. Пи чусак гинэ синвуаськем, кӧня ке нунал ортчыса, ныллы гожтэм: «Умой утьы синдэ, тынад луэмзылэсь азьло мынам синъёсы вал со».

Робби Лоу гожтэмъя, 

мадьяр кылысь берыктӥз

Анастасия Demeter-Петрова