Пичи Пурга ёросысь Чеберина Катя Романова.

16 ар талэсь азьло удмурт нылъёс куспын нырысьсэ ортчиз «Чеберина» ӵошатскон. Валамон, быдэс странаез азьпалтыны асьмелы бер вал ни – Россиын «миссъёс» сайказы 8 арлы вазьгес – 1988-тӥын. Но Москваын – дуно кузьымъёс но йыр поромымон контрактъёс. Ижын – одӥг нуналлы данъян.

Пусйымон огез: тузӥ нылъ­ёсты быръёнъя ӵошат­сконъёсмы асьмелэн одӥг гинэ ӧвӧл. Вить пол орт­чылӥз «Чеберина», одӥг пол – «Чеберай». Егитъёс радъязы мукет – нокыӵе пафостэк – ужрадъёсты: «Мисс Удмуртлык» но «Мисс Италмас».

Нялтас вераса, нылъёслы таӵе вожвылъяськонъёс туж кулэ. «Удмурт дунне» газет но куинь пол ортчытъяз ӵошатскон – туспуктэм ыстоно но ачид сярысь пичияк гожтоно. Газет баме вож­маськыса куриськылћзы.

Районъёсын но «Чеберинаос» лачак. Тани арысь аре Пичи Пурга ёросысь нылъёс понна конкурс ортче.

- Ньыль пол бӧрсьысь «Чеберина» радъямы ни. Туэ 11 нылъёс ӵошатсконэ пыриськизы, – вера ёросысь культура юртысь методист Елена Пименова.

Нырысь араз Леналы капчи ӧй вал. Сценарий гожтон, нылъёсты конкурсэ ӧтён сяна, аслыз ик спонсоръёсты но утчано луиз. Но ужамезлэн емышез вуоно араз ик быгыльскиз – коньдоно адямиос тулыс вуэмъя асьсэос «Чеберина» сярысь юалляськыны кутскизы. Куро бере – Лена нош ик уж борды басьтӥськиз. Конкурсэз радъяны коньдонэн пичияк юртто районысь культурая юрт но администрациысь культурая отдел. Нош нылъёслы кузьымъёслы уксёзэс кисьто спонсоръёс. Вожмаськыса кадь юртто. Тани районысь банкъёс но, такси служба но, автошкола но, ужбергатӥсьёс но уг сукъясько. «Чеберинае» пыриськись нылъёслэн киоссы тырмо сяська керттэтъёсын.

- Фен выллем чыры-пыры арбериос но нылъёслы ноку мултэс ӧвӧл, – шуэ Лена Пименова. – Кузьымъёс чотын – ӟеч косметика. Туэ райцентрысь автошкола одӥг ныллы праволы дышетскыны сертификат кузьмаз, мукетъёсызлы но бадӟым скидка сћзизы.

Жюри но Пургалан туж эркын быръемын. Пӧлазы вань эмъясь, егитъёсын ужась специалист, егитъёслэн парламентазы быръем мурт, спонсоръёс.

- Чебер нылъёс шоры учкыны котьку но тунсыко, – шуэ ди-джей МоNIKI, со ик ИжГТУ-ысь студент Никита Москвин. – Нылъёсты адӟон понна конкурсэ визьтэммыса мынӥськом вал. Кылем арын жюрие ӧтизы – районын егитъёслэн парламентазы быръемын, соин, дыр. Пургаос та конкурслы сокем дышемын, возьмало сое. Нош «Чеберинаез» шуак-дуак быдтӥзы ке, калык тае уз вала.

* * *

Нимысьтыз вераны кулэ пурга чеберина сярысь. Туэ коронаез утӥз Улћнь Юри гуртысь Катя Романова. Конкурсэ пыриськон понна Турциын ужась нылаш юри вордскем палъёсаз бертӥз. Куинетӥ арзэ Катя Турциысь курортъёсын аниматор луыса ужа. Нылаш йыр поромымон чебер гинэ ӧвӧл – визьмо но. Ижысь педколледжын со англи кылэз дышетӥз. Отӥяз УдГУ-ысь история факультетэз йылпумъяз. Дышетскон висказ школаын ужаса вуиз. Но огнуналэ улонзэ чутрак воштэмез потӥз – озьы кунгож сьӧры кошкиз.

- «Чеберинае» пыриськыны кемалась ӵектӥзы ни, – шуэ Катя. – Но аслым осконэ пичигес вал. Клубын ужась­ёсмы юрттом шуизы но – пумитъяськыса ӧй выры.

Пичи Пургаын конкурс кӧня ке люкетлэсь кылдӥз. Асэныд но тодматоно, туала манерен удмурт дӥсь но пӧрмытоно. Купальникен гинэ сцена вылэ потыны уг косо. Катялы бон таиз туж тупасал – солярийын пыжыса, сыӵе ненег шоколад куо уд луы. Но нылашлы вормон сотэк но пиштӥз. Сцена вылын ассэ йӧно воземез сяна, дунъясьёслы туж кельшиз кампет бумагалэсь пӧрмытэм удмурт дӥсез. Дэрем но, айшет но, кышет но туж тузӥ адскизы.

Районын вормемез бере Катялы ассэ эскерыны туж тупасал республикаын но. Зэм, малпанзэ быдэстыны уз кылды, дыр. Угось «Чеберай» конкурсэ пыриськыны быгато 15-25 аресъемъёс гинэ. Нош пурга чебериналы 26 тырмиз ни.

* * *

Жаляса верано, республикаын конкурс радъясьёс уг вырӟо. Историе ӧжытак выёно ке, «Чеберина» ӵошатсконлы кутскон сётӥз вал радиожурналист Галина Кондратьева. Солэн кужымез тырмиз 5 конкурслы – 2006-тӥ арозь. 2010-тӥ арын та ужез улӟытыны малпазы «Дэмен» но «Удмурт кенеш», озьы конкурслэн нимыз воштӥськиз – «Чеберай» луиз. Вожвылъяськонэз чаклазы кык арлы огпол карыны. «Удмурт кенешлэн» планаз конкурсэз туэ апреле ортчытоно шуыса пусйиллям, нош уж быдэсмытэк кылиз.

2013-тӥ арын фин-угор калыкъёслэн «Звезда Севера» конкурссы Удмуртиын ортчыны кулэ. 2011-тӥ арын шаркан ныл Ксения Воронцова отын вормись луиз.

Иське, отчыозь нош ик так улом? Йыре шукке – лэсьтӥськом, дыр уг окмы – вунэтӥськом. Таӵе «политикаен» йӧно удмурт имидж уд лэсьты. Нош макем бадӟым вормон басьтысалмы, Удмуртилэн туала тусыз «Чеберай» конкурс луысал ке. Татын ик – удмурт кылэз но удмурт сямез утён, шаплы но чебер нылъёсты шараян, егитъёс пӧлы удмуртлыкез вӧлмытон. Сыӵе паймымон шоу «пӧзьысал». Егитъёс – нылъёс но, пиос но – возьмало ук сое! Оло, таяз радэ ӵапак вырӟоно «Шунды» огазеяськонлы?

Удмурт чеберайёс уг возьмало туж дуно кузьымъёс. Тодэ лыктэ, 2006-тӥ арын Надежда Яковлевалы сётӥзы зарезь дуре путёвка – Крыме вуылӥз. 2010-тӥ арын котькудӥзлы дыдылы 2 сюрс манет сётӥзы. Кӧтсэс ӝож ӧз каре Дыдыкай но Мусокай ним басьтэм дыдыослэсь – таосызлы 5 сюрс но 8 сюрс манет сётӥзы. Нош Ксения Воронцоваез 15 сюрс манетэн шумпоттӥзы

Вог Олён.

Тодӥськоды-а тӥ удмурт чеберинаослэсь нимтулъёссэс?

1996-тӥ арын – Наталья Кашина, шаркан ныл.

1998-тӥ арын – Алёна Фёдорова, якшур-бӧдья ныл.

2000-тӥ арын – Елена Дюкина, яр ныл.

2002-тӥ арын – Наталья Петрова, шаркан ныл.

2006-тӥ арын – Надежда Яковлева, пурга ныл.

2010-тӥ аре кутскиз «Чеберай». Вормиз шаркан ныл – Ксения Воронцова. Та тулыс ик уй клубын ортчиз «Мисс «Удмуртлык». Вожвылъяськонын ваньзэс азьпалтӥз алнаш ныл Настя Петрова. Туэ «Италмас» сяська вузан салон но «Юмшан» промогруппа азьланьтӥзы та ӵошатсконэз. «Мисс Италмас» луиз шаркан ныл Лилия Кондратьева.

Сю пӧртэм валэктон шедьтыны тыршизы. Туннэ нуналлы юан-валэктонъёс уг кылӥсько ни. Оло, концертъ­ёс, эктон ӝыт ӵем ортчылыны кутскемен, калык соослы дышиз, куддыръя гуртын улӥсьёс отчы, гурак кариськыса, ветло. Эктон ӝытэ пырон понна 150 манет, концертэ шедён понна – сомындагес ик… Лулпушсэ узыр но чебер карем потӥсь муртлы со сокем ик дуно ӧвӧл кадь.

Нош мынам та выллем «адӟытонъёсы» пыдме но лёгеме уг поты. Мыным соос тунсыко ӧвӧл! Жаляса верано, удмурт артистъёсмы чиньыен лыдъямон. Соос но эстрадае выемын. Только асьме эстрадамы, ӟученыз ӵошатыса, 80-тӥ аръёсы кугӟамын. Ӧвӧл асьме артистъёслэн тыро-пыдо дышетӥсьёссы, коньдон утчасьёссы… Удмурт калык кырӟан чебер ке но, мынам, егит адямилэн, сцена вылысь пинал ымныръёсты адӟеме, выль кырӟанъёсты кылэме потэ.

Бен, вань мукет артистъёс – туала диджейёс музэн соос чебер кырӟанъёсты мыддоринтыса «дарманьто». Ми, пе, соосты клублы тупамон кариськом… Таӵеослы мон шуысал: эшъёс, тырмоз лулчеберетэз уродмытыны! Тӥ со кырӟанъёсты ӧд гожтэ, нырысь лэсьтэ мае ке асьтэлэсьсэ…

Вань на эшшо одӥг пумо туала кырӟасьёс. Таосыз мыным туж кельшо! «Сайлент ву гур» сярысь верасько. Концертазы кык пол вуи, но куинетӥзэ уг ни мыны. Мыным тунсыко, куке группалэн аслаз кырӟанъёсыз вань. Одӥг-кык гинэ ӧвӧл, куать-сизьым ке но. Вуизы ке сыӵе вакытъёс, 600 манетме но уг жаля, концертазы билет басьто.

Юано кариськи мукет муртъёслэсь малпанзэс но.

Вика Самарина, Удмурт кун университетысь студентка:

- Удмурт дискотекаосы но концертъёсы шер ветлӥсько. Мыным кельше кафеосын пукыны, кинотеатрын яке дорын тунсыко кино учкыны. Удмурт кырӟасьёс пӧлысь нимысьтыз висъясал Любовь Быковаез, «Малпанэз». Яратӥсько, удмурт дискотекаосын дӥсь адӟытон луэ ке.

Наташа Михайлова, гуртаз пукись:

- Концертъёс-дискотекаос мон понна али «пытсамын». Пичи пиналэн пукисько. Студент вакытам удмурт дискотекаосты палэнэ ӧй карылы, котькудаз вуылӥ. Удмурт дискотекаос мыным кыӵе ке «светской ужрадъёс» кадь пото вал: отын вань аслаз кизилиосыз, тусовщикъёсыз… Шумпоттэ соиз но – удмурт кылмы пушъе таӵе ужрадъёсын ӵош.

Надежда Имполитова.

«Кебит возьмась awards» антипремия котыр трос ӵашетонъёс пуромо.

Кылем арняе Интернетын нош ик пуромизы пӧсь эчешонъёс. Тылскеме пу тырыны шӧтазы удмурт культуралэн «буръёсыз но паллянъёсыз» – бюджет чотын тыршисьёс но эрико менеджеръёс.

Кун заказъя ужась­­ёс сэлф-мэйд промоутеръ­ёсты дан поттонэн но асьсэды пиарить каронэн пыкыло, тӥ, пе, критикаен саптась­коды. Соосызлэн пумит веран кылзы шеде: тӥ­лесьтыд уждэс нокин уг адӟы – малпан кылдэ ужамъяськиськоды гинэ.

Тыш сииз тодмо продюсер, режиссёр Павел Поздеев но.

Павел Поздеев, «Шуо-шоу» супыльтон вотэс бамлэн кылдытӥсез но бурдъясез проектсэ технология понна гинэ кылдытӥз вал, шуыны луоз: ӧнерчи сямен со ӟеч валаз, одно ик кулэ «ӵуж» газет. Котькудӥз медийной вӧлмытлык (пространство) кулэ каре пӧртэм иворъёсты, кыл вӧлдонъёсты но – озьы огинэ бичаны луэ калык мылкыдъёсты.

90-тӥ аръёс бере удмурт дуннеез выльысен – сузьетэн-сузьетэн – бичано луиз. Ортчеменыз герӟасез ышемын вал. Поздеев вань кужымзэ сётӥз со дуннеез пыд вылаз пуктыны, выль институтъёс кылдытон бордын ужаз. Котькудаз быдэслыко обществоын сямен огъя медийной ивор-дунне, огкадь гажамон муртъёсын чур, огкадь урод геройёсын чур, премиос, богема но «ӵуж» таблоид суреданы выриз.

Та институтъёстэк ка­-

лыклэн улонэз палду­рес кыле. Соостэк иден­тичность вань калыклы уг ни тупа, огъя уг ни луы, котькудӥз адями нимаз-нимаз улэ, малпаське – «калык» валатон но уг ни ужа.

Удмурт кизилиослэн публичной улонзы сярысь вераськон тросэзлы ӧз яра. Куд-огез шара тушмонъяськиз. Озьы ке но, мае удалтӥз «Шуо-шоу» сайтлы луыса лэсьтыны?

- Удмурт дэменлыкез син азе пуктыны, «лыдъяны-чотаны»;

- висъяны солэсь тупась мылкыдъёссэ;

- пӧлысьтызы висъяны элитаез (син азьын улӥсь муртъёсты);

- критика но дунъет сётон сям пыӵатыны

Туж ӵем «Шуо-шоу» укыр интеллигентной выриз, «юнме» постколо­ниализм сярысь ужрадъ­ёслы рецензиосты пе­чат­лаз. Сыӵе дыръя OpenSpace лулчеберет бамлы укшаз, тусызъя Lifenews ленталы укшагес ке но.

Тужгес но огшорыез но капчиез вамыш – ассэ ик Поздеевез ас тӥрлыкеныз «ӵогъялтыны». Сьӧдманы. Озьы ик луиз. Тунсыко соиз, Павел талы дась вал, лэся: ноку но ӧз ваты улонысьтыз идеальной луисьтэм фактъёсты, сямъёссэ, шуом, удмурт кылын урод вераськемзэ. Таиз понна сое капчиен возьытэ уськытыны луэ. Та бордын ик кужымез – ватыса уг улы.

Поздеев туннэ – удмурт дуннелэн огез валтӥсь муртэз. Зэм, таин сэрен нокин отӥ уг кары удмурт движенилэсь азьмынӥсьёссэ но, дано тодосчиосмес но, артистъёсмес-крезь­гурчиосмес но. Со вал­тӥсь фигура, угось калыкез люкан-герӟан меха­низмъ­ёсты вырӟытыны быгатӥз. Озьыен, тыршиз тазалыко обществоез утён бордын – кытын соос ик кизилиос луо!

Поздеев чик но батыр типлы уг тупа. 19-тӥ даурысь литератор-романтикъёслы но, кыл­чиослы но, 20-тӥ даурысь политикъёслы но, прагматик-кивал­тӥсьёслы но со уг укша. Биографиез геройлы уг тупа: кун вормонъёсыз но, шукырес карьераез но ӧвӧл. Паймоно кадь: яркыт но йӧспӧртэм луыса но харизма шуонэз но ӧвӧл.

Кельтэм пытьыосыз но вормонъёсыз кык-куинь зӥбем ляб палъёсыз вылэ инъяськемын: татын ик гань-гань кариськыны быгатонтэмлык, кепыран, пуш «пычей портон». Вормонъёсыз капчиен уг сётско.

Сямызъя со асьмеос кадь ик. Поздеев – огшоры адями. Озьы ке но мукетъёсызлэсь чутрак висъяське. Ми дышемын лидеръёслэн «ымазы учкыны», соос азьын кӧня ке возьдаськыны, соосты вылӥегес пуктыны. Пашалэн нокыӵе «сверхчеловек» пусъёсыз уг шӧдӥсько. Поздеев – бадӟым ремесленник. Кутске но лэсьтэ.

Кытысь меда бугырске критикалы но личной улонэ мерскемлы пумит сокем чурыт реакция?

Удмурт сообщество ассэ Европаысь выллем мер сямен уг на шӧды – со бадӟым община, веме. Ваньзы ог-огзылы кызьы ке ӵыжы-выжы, тодмо, бускель луо. Соин ик огъя риторика – профессионализм, дан, гажан – общинаын кадь ик сётӥське. Шуом, кин ке кинлы ке уг ке оскы профессионал луэмезлы, вемелэн вожез потэ ини. Общиналэн улон радэз «сураське».

Поздеев котьма ке но удмурт калыкез нация синмын адӟе – вемеен но, огшоры тусовкаен но уг. Удмуртъёс зэмос нация мед луозы шуыса, кулэ ӵапак со институт радлык. Нация пушкын трос вемеос уло-ужало, Поздеев соосты мукет стандартъёсъя ужатыны турттэ. Тӧр шоры пуксё критичность, про­фес­сио­нализм но нимаз ужаны быгатон.

Тужгес секытэз Поздеев понна али – веме-общинаез мер-обществое выжтэм бере выль механизмъёслы курбон луыны сётсконо ӧвӧл. Эсьмаса, пырпотоз. Со уг но ваты кадь, кытчы но марлы вутскемзэ. Таиз тужгес но синмаськымон но абдрамон.

Артём Малых.

Якшур-Бӧдья гимназиысь Марина Пантелеева.

Якшур-Бӧдьяысь шор ёзо школае конференцие люкаськылӥзы ёросысь бадӟым классъёсын дышетскисьёс. Отын соос пӧртэм ужпумъёсты эскеризы, одӥгез сӥземын вал удмурт кыллэн азинскемезлы.

Арлы быдэ таӵе ужрадэз радъяны тырше ёросысь удмурт кылъя но литературая дышетӥсьёслэн огазеяськонэнызы кивалтӥсь Людмила Обухова. Таяз учыре пиналъёс доры вуылӥзы Удмурт кун университетысь дышетӥсь Нина Сергеева, студентъёс Елена Рябина, Надежда Никитина но Лукерья Шихова. Егитъёс тодматӥзы студентъёслэн улонэнызы, валэктӥзы удмурт кыллэсь кулэлыксэ. Пусйизы: удмурт луэмзы юрттэ соослы кунгож сьӧры вуылыны.

Нина Александровна пыр-поч мадиз, кыӵе ужъёссы луыны кулэ туала абитуриентъёслэн. Реферат гожтӥсьёс, Интернетын гинэ бугыръяськыса, пе, трос уз паймытэ ни. Ас эскеронъёсты, улэп примеръёсты уже пыртоно.

Университетын дышетскисьёс буш киын лыктӥллямтэ – УдГУ-ысь удмурт факультетэ пырыны мылкыд карисьёслы сертификат кузьмазы. Со юрттоз люкам баллъёссы борды эшшо кӧня ке балл ватсаны.

Пиналъёс но буш лыктӥллямтэ – рефератъёссэс лыдӟизы. Ӵошкыт школаысь Василий Козырев «Ванькагуртысь Ашальчи кылбура» ужзэ быдэсак анаезлэн творчествоезлы сӥзиз. Якшур-Бӧдья гимназиысь Марина Пантелеева эскериз Егор Загребинлэсь веросъёссэ. Та школаысь ик Ольга Вахрушева «Валентина Широбокова – дано адями» ужзэ лыдӟиз. Кекоранысь Анастасия Загребина «Катанчи усьтӥське» ужаз тодматӥз ёросысьтызы тодмо удмурт артистъёсын.

Мукет пиналъёс но куноосты ас ужъёсынызы паймытӥзы. Озьы ке но нырысетӥ инты сётэмын вал Марина Пантелеевалы, кыкетӥ но куинетӥ интые потӥзы Анастасия Загребина но Ольга Вахрушева. Ваньзы та нылъёс гимназиын дышетско, кивалтӥсьсы Любовь Широбокова.

Вера Вахрушева.

Сэп гурт котыр ласянь синмаськымон: татын улӥсьёс кырӟаса-вераса куно пумитало, ӝӧк выл тыр сиён-юон пукто. Эсьмаса, куазь та нуналэ небыт, шундыё кариськиз. Шаерысьтымы удмурт егитъёслэн «Шунды» огазеяськонэнызы кивалтӥсь Ольга Тронина гурт калыкезлы но вань люкаськемъёслы кылбур чуръёссэ лыдӟиз.

Оля – егит кылбурчи. Та вакытэ дышетске Удмурт кун университетысь удмурт филология факультеысь витетӥ курсын. Туннэ нуналлы кык кылбур бичетэз потэмын. 2007-тӥ арын лыдӟисьёс кие вуиз «Кытын мынам ошмесэ?» сборникез, нош 2011-тӥ арын – «Йыромем йыртэмась».

Егит кивалтӥсь Ольга Тронина одӥг интыяз пуконэз уг тоды. Кемалась ик ӧвӧл вуиз Москваын ортчем ужрадысь.

Оля бере сцена вылэ потӥз фин-угор дуннеысь тужгес но чебер нылаш Ксения Воронцова. Ксюша бере рэп лыдӟеменыз паймытӥз Лёша Софронов. Соос бере сцена вылэ потазы на Дима Софронов, Таня Титова, эктонъя «Модус» группаысь веськрес нылъёс, Ваня Белослудцев. Юля Керенская «Уйвӧт» группаеныз тодматћз.

Тужгес шуныт кичабонъёсын пумитазы «Зарни перепеч» премилэсь вормисьсэ – Николай Анисимовез. Ымзэ усьтыса но уг вуы, зал пуштэ кичабонъёсын! Со вӧзын чебер адскизы на Ксения но Дарья Воронцоваос.

Ужрад пӧрмиз кадь! Олямы доры кузь черод люкаськиз – ваньмызлэн ӟечкыламзы потӥз аспал эшсэс. Калык пӧлын шыпытак сылэ егит кылбурчилэн анаез Алевтина Леонидовна, кияз ӵуж сяська но нылызлэн кылбур бичетэз. Оляе будэ… Кылбуръёсыз небытэсьгес, лякытэсьгес луо. Егит кылбурчилэсь лулпушсэ анайлэсь ӟечгес кин шӧдоз!

Ирина Зангарик.

«Первакъёс».

Студентэ пыртымтэ мурт зэмос студент уг луы – таӵе веран вӧлмемын котькуд дышетсконниын.

Тани Удмурт кун университетысь удмурт филология факультетысь «первакъёс» но студентэ пырон ужрад ортчытӥзы: «Берёзовая роща» лагерьын асьсэды но возьматӥзы, ог-огзылэсь трос тунсыкозэ но тодӥзы.

«Первакъёслы» азьветлӥ-се юнматӥзы бадӟым курсъёсысь студентъёсты. «Пичиосты» соос шуныт бурд улазы пыртӥзы: эсьмаса, кырӟаса-вешаса пумитазы. Студентэ пыртоно муртъёслэсь ньыль команда кылдӥз. Ӵошатсконъёсын соос адӟытӥзы ог-огзэс валаны быгатэмзэс, юрттыны дась луэмзэс – бызьылӥзы, тэтчазы, куронъёсты быдэсъязы. Ӝытазе «первакъёс» концерт возьматӥзы. Татын адӟиськиз ни егитъёслэн кырӟаны-вераны, сцена вылын асьсэды возьыны быгатэмзы. Еж арлыдзы шоры учкытэк, «первакъёс» зэмос артистъёс кадь шулдыръяськизы. Дышетӥсьёс ӧз чидалэ: соос шоры учкыса басьтэм шуныт мылкыдзы ӧръяськиз капчи ӟечкыланъёсы но синпель кузьымъёсы – студентэ пыртэм котькуд мурт пусъемын вал удмурт филология факультетлэн пусэныз чебертэм яркыт футболкаен.

Анна Загумёнова.

Дышетӥсь Александра Герасимова но реставратор Татьяна Москвина куноосынызы.

Кемалась ик ӧвӧл Пичи Пурга черкогуртысь гимназиын ортчиз вунонтэм пумиськон.

5-тӥ-9-тӥ классъёсын дышетскисьёс доры куное вуылӥзы удмурт егитъёслы сӥзем «Узы-боры» фильмез пуктӥсьёс – продюсер Пётр Палган но сценарист Дарали Лели. Соосын тодматскон лулысь-сюлмысь ортчиз. Соос мадизы пӧртэм тунсыко учыръёссы, удмурт культуралэн но анай кылмылэн аспӧртэмлыко, номырин воштонтэм луэмзы сярысь. Милям, куноосын тодматсконэ вуэмъёслэн, йыръёсмы ик вылэ золскизы, Дарали но Палган кадь визьмо егитъёс шоры учкыса: тӥни кинлэсь адӟем кароно!

Ми но куноосмес паймытоно кариськимы. Соосты тодматӥмы черкогуртысьтымы усточиен Татьяна Москвинаен. Со быдэс улонзэ сӥзиз вашкала костюмъёсты улӟытонлы. Ӵапак солэн кичӧлтэмезъя ик черкогуртын усьтӥськиз удмурт дэремъёслы сӥзем музей. Пётр Палганлы но Дарали Лелилы отын туж кельшиз. Татьяна Никитична угось тупен-тупен мадиз соиз я таиз дэремлэн кылдэмез сярысь. Кин тодэ, оло, музейын тодон-валан басьтэмзы Палганлы но Даралилы юрттоз выль кино пуктыны…

Туала егитъёс пӧлын, зэмзэ вераса, удмурт культуралэн данэз лябӟе. Но ми ас выламы шӧдӥмы: таӵе тунсыко адямиосын пумиськонъёс анай кылмес гажан мылкыдмес эшшо но муромыто. Эшъёсыным ӵош огъя малпанэ вуимы: удмурт кылмес дышетонэз паськытатоно – школаын ортчись урокъёс пыр гинэ ӧвӧл, котыр калык пыр. Шумпотӥськомы, удмурт кылъя но литературая басьтэм тодон-валанмес уж вылын эскеримы: Палганэн но Даралиен удмурт кылын лабыртӥмы. Тау кареммы потэ удмурт кылъя но литературая дышетӥсьмылы Александра Герасимовалы такем тунсыко куноосын пумиськон радъяны быгатэмез понна.

Анастасия Петрова.

Удмурт трип-хоп: выль крезьгуро проект. Чупай Эли огазеяськиз Питерысь усточиосын.

«Юмшан57» огазеяськон кичќлтэм улсын алигес ортчиз «Эли-party» позыръяськон.

Ужрадлэн валтӥсь малпанэз луиз тулыс мылкыд но чупаськон. Ӝытэз угось шулдыртӥз крезьгуро выль проект – «Чупай Эли» трип-хоп группа: удмурт кырӟась Эльвира Панченко но солэн Питерысь крезьгурась эшъёсыз. Соос быдэстӥзы мукет кылъёсысь берыктэм, озьы ик Элялэн кылбуръёсызъя гожтэм кырӟанъёсты. Озьы ик чузъяськиз «Malpan XXL» проект (сое выльысь улӟытӥзы удмурт кырӟасен Светлана Ручкинаен ӵош) но Лаврентий LoveRepublic егит рэперен ӵош кылдытэм удмурто-ӟучо эксперимент. Кыӵе мылкыд кельтӥз «чупаськон» ӝыт?

Анастасия Орлова:

- Кемаласьгес вал ни тазьы сюлмысь эктэме-позыръяськеме. Пусъеме потэ Чупай Элилэсь кырӟамзэ: куараез туж чебер, жингрес, кырӟанъёсыз сюлме пыӵамонэсь. Со кырӟаку, тросэз эктӥзы каллен эктонъёс, парен. Мӧзмыт, сюлэме пыӵась кырӟанъёс бере калык медаз ӝожомы шуыса, творчествоя «ПорозМафи» огазеяськон пӧртэм ӵошатсконъёс радъяз, серемес учыръёс возьматӥз. Ӟечокъёс-диджейёс – Dj G.I.M. но Электроникъёс – быгато калыкез эктон тулкыме пыртыны. Тодо, ку но кыӵе крезьгур лэзьыны.

Сергей Ёлкин:

- Тужгес но яраз «чупаськон» конкурс! Тулысэн герӟаськем таӵе ӵошатсконъёсын нылъёсын тодматскиськод, выль эшъёс шедьтӥськод, нош ӵапак шулдыръяськонъёс юртто соосын огъя кыл шедьтыны. Крезьгур ласянь… Зэмзэ вераса, тросэз кырӟанъёс мыным акыльтӥзы ини.

Надежда Сапожникова:

- Позыръяськон кельшиз, тематикаез но тунсыко вал. Сюлмам пыӵаз «туж нежно» веран, со ӵем чузъяськиз. Элялэн кырӟанъёсыз сыӵеесь ик ненегесь – ачиз Эля кадь: шӧдӥське, сюлмысьтыз кырӟа.

Григорий Григорьев:

- Мон малпасько, кулэ та порма ӝытъёс ортчытъяны. Но маиз ке но уг тырмы кадь потӥз. Ӧй вала на: маиз меда? Вуоно позыръяськонэ одно мыно: мыным табере тунсыко, маин паймытоз Вероника Ваулина! Куартолэзе ортчытыны чаклам удмурт ӝыт ӵапак солы сӥземын луоз.

Елена Дёмина:

- Мон нырысьсэ кылӥ «Чупай Элилэсь» кырӟанъёссэ. Элялэн туж жингрес куараез, ачиз но синмаськымон. Но кырӟанъёсыз мӧзмытэсьгес – оло, кырӟасьлэн аслаз сыӵе мылкыдыз?.. Эктон ӝытын кырӟанъёс «ритмичнойгес» мед луозы вылэм…

Маша Золотарёва.

«Ӝуась пальмаос» сёрф-панк группа.

Куд-огез шуэ: Иж – со куштӥськем провинция! Но талантъёс татын но вань. Кылсярысь, Palms on fire группа Калифорниын тодмо луиз ини, нош 15 аресъем модель Настя Иванова Миланысь подиумъёсын Гуччи но Прада коллекциосты возьматъя.

Огназы уг пуко

«Ӝуась пальмаос» сёрф-панк группа Ижын нокинлы тодмо ӧй вал. Шуак гомӟизы кылем арын гинэ – соос сярысь «Лукэтми» сайт гожтӥз: пляжлы тупась ненег кырӟанъёсты быдэсъя но классика рок крезьгур сямъёсты уте.

Егитъёсты нырысьсэ­ син­йылтӥз The Drums коллективысь Якоб Грэхем. Таид пиналъёсты Интернет пыр кылӥз. Соку ик дэмлам аслаз Holiday Records лэйблаз альбом гожтыны. Татын ик потӥз кыкетӥез альбом. Берлояз пластинкаын пиналъёс санэ басьто Beach Boys выллем саундэз но 80-тӥ аръёсысь тви-поп шӧмез. Таӵе крезьгур берло дыре критикъёслы синмаськымон йӧтэ.

Алигес егит рокеръёс выль вормонэнызы паймытӥзы: поттӥзы выль «Call me» кырӟанъёсын бичет. «Жингырты мыным, пукисько огнам!» кылъёсты солисткаен ӵош нёръя ачиз Ромен Герре. Тодмо француз ужаз ини таӵе дано крезьгурчиосын: LSD Soundsystem, Ladytron. Паймод но бырод шаплы «пальмаослы»!

Бен, соослэн крезьгуразы туннэ нокызьы но уг тэро удмурт но, ӟуч но крезьгур сямъёс. Но со понна соосты быдэс дунне вала. Жаль, уг будо ненег пальмаос удмурт музъем вылын. Эх!

Брангурт песянайёслэн «нылзы»

Анастасия Иванова.

Анастасия Иванова – Ижысь огшоры школаын дышетскись. Ӝужыт, горд йырсиё, тӧдьы куо. Одӥг пол сое модая агентство синйылтӥз. «Леонардо» журнал, нылашлы «удмурт» шӧм ватсаса, Пичи Пургалась брангурт песянайёсын ӵош фотосессия кариз. Со дырысен ик ваньмыз берганы кутскиз! Табере нылашез ӧтчало Париже, Миланэ но Таиландэ. Школаын дышетскем интые, со ӝужыт каблукъёсын дефиле ветлэ но фотовспышка азьын «ымныръёс пуктылэ»: Кира Пластинина но «Блюмарин», Вивьен Вествуд но Гуччи, Луи Виттон но Прада…

Огез гинэ жаль: Настя удмурт ӧвӧл. Но Удмуртиысь эшъёссэ со уг вунэты, удмурт культуралэсь но уг мурта. Ваньмон дыръяз мыло-кыдо пыриське пӧртэм ужрадъёсы. Алигес школаязы калык йылолъёслы сӥзем ӝыт ортчиз. Отын Настя мылкыд кариз удмурт сямъёсын тодматыны. Удмурт дэрем дӥсяса, эшъёсыныз ӵош жингрес кырӟаз «Лымы тӧдьы, лымы тӧдьы». Та борды итӥське кадь тодмо Голливуд рэп кырӟан: «Гуччи, Гуччи, Луи, Луи, Фенди, Фенди, Прада…» Мед ни удалтоз тыныд, Удмурт шаерысь модель!

Дарали Лели.

Константин Орлов.

Ижкарысь диджей но клуб промоутер Константин Орлов кӧня ке ар талэсь азьло туж тодмо луиз: шоркарысьтымы электрон крезьгур сценаез азинтон но узырмытон понна нюръяськиз. Тросэз егитъёс солы тау шуыны быгатозы, угось со Петров диджейёс, Андрей Буров но мукет «аксакалъёс» выллем туала крезьгуро Ижкарлэсь туссэ лэсьтӥз. Сыӵе дыръя паймоно, адямилэсь удмурт луэмзэ тодыса. Константин анай кылыныз уг вераськы ке но, шӧдскымон тунсыкъяське удмурт дуннеен. Таин сэрен шугъяськытӥсь малпанъёссэ шараяны мылкыдыз бурдъяськиз – пумиським-вераським.

- Вань огъя тодмомы – электрон крезьгурчи Андрей Корепанов, кудӥз ке нимзэ Андрей Рублёвлы воштӥз. Тазьы ӟечгес кылӥське, пе. Тон уд-а возьдаськиськы удмурт луэмедлэсь?

- Уг, берло дыре выжыосы мыным тунсыкогес но тунсыкогес пото. Вордӥськи мон Ижын, атае Дэри ёросысь Люлиысь, анае Мунчогуртысь. Паймымон интыос! Отын котьку но пилемо… Зэмзэ вераса, удмурт дунне бордаз кыскиз берло вакытэ: 2007-тӥ арын Мускоын удмурт диаспораен пумиським – «Made in udm» ужрад вал со. Соку мон шӧдӥ но валай, макем мыным улонам уг тырмы удмуртэз! Потӥз суредаме удмуртъёслэсь чебер ӵуказе нуналзэс. Удмурт культураез но азинтыны мылкыды кылдӥз, аслым ӧтён но малпай: «Татын асьмеос кузёос!» Кин дорамы ожгар тӥрлыкен вуоз – аракы-кумышкалэсь погралоз (серекъя). Корепанов-Рублёв сярысь ке… Со ассэ ӟуч кожа ук: марлы солы, ӟуч адямилы, удмурт фамилия? Луэ куддыр сыӵе ним сураськон. Кылсярысь, анаелэн уж дураз ужаз Бриджит Вахрушева!

- Ачид кытын ужаськод? Диджей – со сюдӥсь профессия ӧвӧл, дыр.

- Мон инженер. Быдэс улонме техникаен, компьютеръёсын вырисько. Вуз карон лавкаосын машинаос тупатӥсько, али тани Ижкарын нырысетӥзэ почта автоматэз пуктӥм – сыӵе робот, кудӥз мукет городысь посылкаен келям саламдэ возёз, туж капчи но оскымон маке. Диджеинг но крезьгур – со хоббие. Тужгес но яратӥсько техно крезьгурез, берло дыре шудӥсько «солянка» – пӧртэм стильёсты огазеясько.

Кутскимы ми кемалась, 1994-тӥ арын Петров вынъёсын ӵош кариським, «Октябрь» культура юртын нырысетӥ дискотекаос ортчытъям. Со мар ке вылез вал – калык уг но тоды вал ай, мар со сыӵе! Андрей Захаровлэн компьютераз (An-2, тодмо продюсер, али улэ Питерын) нырысетӥ бутлегъёс-ремиксъёс лэсь­тылӥм. Техникаез валанэ туж юрттэ улонын но. Одӥг пол Выль аре Глазове ӧтчазы: шулдыръяськон куспазы крезьгурен шуг-секытъёс кылдӥзы, соку мон ачим езъёсты тупатӥ-паятьтӥ – праздникез ути, шуыны луоз. Олокыӵе но учыръёсты тодэ вайыны луоз. Ижкаре пӧртэм «курутой» диджейёсты вайылӥм: огаз ӝытэ Мускоысь 3 кузя вуизы, ваньзы ик винил пластинкаосын шудо. Али таӵезэ шедьты на – вуж школа! Кинэ но ӧм ӧтчалэ: dj Butch, dj Кислоид, dj Kosinus… Берпуметӥез мынэсьтым уно гинэ пластинкаме басьтžз, сьӧраз Муское нуиз.

«Ю-dance» клуб усь­тӥ­ськем бере отын но ужаса вуттӥ. Резидентъёс луыса шудылӥм. Арт-директормы курылӥз зэмос шоу лэсьтыны: соку мон уй клубе Дэриысь арганчиосты вайи. Син азяды пуктэ: дискотека, шудэ эктон крезьгур, шуак тыл кысэ, шыпыт луэ но – пото куаш-куаш удмурт арганчиос! Зол вал. Калык лӧптӥз.

- Удмурт луэмед шуак потылэ, иське?

- Удмурт луэмлэсь уд пегӟы. Эшъёсы но монэ куддыр мусояса нималлязы «вотяка». Мон ноку вожме ӧй поттылы. Тодӥсько, революцилэсь азьло сыӵе нимын крейсер но вал – «Вотяк». Революция бере нимзэ воштӥзы ни.

- Удмурт «революция» понна мар уг тырмы? Палэнысь синмын мар дэмласалыд?

- Урам нимъёсты вошъяно. Калык валаны кулэ, кытын со улэ, кинъёс пӧлын. Удмурт кыл мед адӟиськоз ульчаын, гожтэмъёсын. Мон вордӥськи совето вакытэ, соку удмурт луыны модно ӧй вал. Удмуртъёс анай кылынызы ас понназы гинэ верасько, озьы ик семьяям но кылиз.

Калык валаны кулэ, кытын со улэ, кинъёс пӧлын. Удмурт кыл мед адӟиськоз урамын, гожтэмъёсын.

Диджей сямен дэмласал удмурт трекъёс кылдытъяны: куара сэмплъёс удмурт сямен мед чузъяськозы, кырӟанын удмурт кыл мед улоз. Кӧня ке эскеронъёсы вань ини, утчало на улэп удмурт куара, туртто мар ке концептуальнойзэ-малпаськытӥсьсэ лэсьтыны.

Кӧня ке пол ветлӥ Ижысь удмурт дискотекаосы, «Пепелац» клубын шулдыръяськонэз учки. Номыр но вылез но тунсыкоез ӧвӧл кадь: калык юэ но шулдыръяське-эктэ. Мынам вань мылкыды лэсьтыны зэмос тунсыко сурет: мед пумиськозы улэп крезьгур но электрон экспериментъёс, удмуртэз но ӟучез, шудӥсез но кырӟасез, кылзоноез но учконоез. Утчасько монэн огкадь малпаськисьёсты. Соку мае ке кужмозэ, яркытсэ лэсьтыны пӧрмытысалмы. Али мон ас ымнырме удмурт дуннеын утчасько. Пумиталоз-а со монэ, уз мурта-а? Оскисько ӟечезлы.

* * *

Костя – тунсыко лулчеберет дуннеын улӥсь адями. Вераськон куспамы малпаськи, макем со матын удмурт «шулдыръяськон традицилы»? Уг-а сура удмурт дискотекаез ӟучъёсты удмуртэныз тодматžсь ужрадъёсын? Мукет ласянь, кин шуиз, удмуртъёслы удмуртэз гинэ кулэ шуыса? Мед кыкез ик дунне ог-огезлы усьтэмын луоз: оло, ӵапак солэн экспериментъёсыз юрттозы «кузё но куно» калыкъёслы матынгес луыны. Ӵыдытэк витисько Костялэсь радъям ужрадъёссэ: мед отын арганчиос но роботъёс ӵош бергалозы, нош пульт сьӧрын шудӥсь техно-диджей винилэз вошъян куспаз табанен куноятоз…

Дарали Лели.