Пичи Пурга ёросысь Чеберина Катя Романова.

16 ар талэсь азьло удмурт нылъёс куспын нырысьсэ ортчиз «Чеберина» ӵошатскон. Валамон, быдэс странаез азьпалтыны асьмелы бер вал ни – Россиын «миссъёс» сайказы 8 арлы вазьгес – 1988-тӥын. Но Москваын – дуно кузьымъёс но йыр поромымон контрактъёс. Ижын – одӥг нуналлы данъян.

Пусйымон огез: тузӥ нылъ­ёсты быръёнъя ӵошат­сконъёсмы асьмелэн одӥг гинэ ӧвӧл. Вить пол орт­чылӥз «Чеберина», одӥг пол – «Чеберай». Егитъёс радъязы мукет – нокыӵе пафостэк – ужрадъёсты: «Мисс Удмуртлык» но «Мисс Италмас».

Нялтас вераса, нылъёслы таӵе вожвылъяськонъёс туж кулэ. «Удмурт дунне» газет но куинь пол ортчытъяз ӵошатскон – туспуктэм ыстоно но ачид сярысь пичияк гожтоно. Газет баме вож­маськыса куриськылћзы.

Районъёсын но «Чеберинаос» лачак. Тани арысь аре Пичи Пурга ёросысь нылъёс понна конкурс ортче.

- Ньыль пол бӧрсьысь «Чеберина» радъямы ни. Туэ 11 нылъёс ӵошатсконэ пыриськизы, – вера ёросысь культура юртысь методист Елена Пименова.

Нырысь араз Леналы капчи ӧй вал. Сценарий гожтон, нылъёсты конкурсэ ӧтён сяна, аслыз ик спонсоръёсты но утчано луиз. Но ужамезлэн емышез вуоно араз ик быгыльскиз – коньдоно адямиос тулыс вуэмъя асьсэос «Чеберина» сярысь юалляськыны кутскизы. Куро бере – Лена нош ик уж борды басьтӥськиз. Конкурсэз радъяны коньдонэн пичияк юртто районысь культурая юрт но администрациысь культурая отдел. Нош нылъёслы кузьымъёслы уксёзэс кисьто спонсоръёс. Вожмаськыса кадь юртто. Тани районысь банкъёс но, такси служба но, автошкола но, ужбергатӥсьёс но уг сукъясько. «Чеберинае» пыриськись нылъёслэн киоссы тырмо сяська керттэтъёсын.

- Фен выллем чыры-пыры арбериос но нылъёслы ноку мултэс ӧвӧл, – шуэ Лена Пименова. – Кузьымъёс чотын – ӟеч косметика. Туэ райцентрысь автошкола одӥг ныллы праволы дышетскыны сертификат кузьмаз, мукетъёсызлы но бадӟым скидка сћзизы.

Жюри но Пургалан туж эркын быръемын. Пӧлазы вань эмъясь, егитъёсын ужась специалист, егитъёслэн парламентазы быръем мурт, спонсоръёс.

- Чебер нылъёс шоры учкыны котьку но тунсыко, – шуэ ди-джей МоNIKI, со ик ИжГТУ-ысь студент Никита Москвин. – Нылъёсты адӟон понна конкурсэ визьтэммыса мынӥськом вал. Кылем арын жюрие ӧтизы – районын егитъёслэн парламентазы быръемын, соин, дыр. Пургаос та конкурслы сокем дышемын, возьмало сое. Нош «Чеберинаез» шуак-дуак быдтӥзы ке, калык тае уз вала.

* * *

Нимысьтыз вераны кулэ пурга чеберина сярысь. Туэ коронаез утӥз Улћнь Юри гуртысь Катя Романова. Конкурсэ пыриськон понна Турциын ужась нылаш юри вордскем палъёсаз бертӥз. Куинетӥ арзэ Катя Турциысь курортъёсын аниматор луыса ужа. Нылаш йыр поромымон чебер гинэ ӧвӧл – визьмо но. Ижысь педколледжын со англи кылэз дышетӥз. Отӥяз УдГУ-ысь история факультетэз йылпумъяз. Дышетскон висказ школаын ужаса вуиз. Но огнуналэ улонзэ чутрак воштэмез потӥз – озьы кунгож сьӧры кошкиз.

- «Чеберинае» пыриськыны кемалась ӵектӥзы ни, – шуэ Катя. – Но аслым осконэ пичигес вал. Клубын ужась­ёсмы юрттом шуизы но – пумитъяськыса ӧй выры.

Пичи Пургаын конкурс кӧня ке люкетлэсь кылдӥз. Асэныд но тодматоно, туала манерен удмурт дӥсь но пӧрмытоно. Купальникен гинэ сцена вылэ потыны уг косо. Катялы бон таиз туж тупасал – солярийын пыжыса, сыӵе ненег шоколад куо уд луы. Но нылашлы вормон сотэк но пиштӥз. Сцена вылын ассэ йӧно воземез сяна, дунъясьёслы туж кельшиз кампет бумагалэсь пӧрмытэм удмурт дӥсез. Дэрем но, айшет но, кышет но туж тузӥ адскизы.

Районын вормемез бере Катялы ассэ эскерыны туж тупасал республикаын но. Зэм, малпанзэ быдэстыны уз кылды, дыр. Угось «Чеберай» конкурсэ пыриськыны быгато 15-25 аресъемъёс гинэ. Нош пурга чебериналы 26 тырмиз ни.

* * *

Жаляса верано, республикаын конкурс радъясьёс уг вырӟо. Историе ӧжытак выёно ке, «Чеберина» ӵошатсконлы кутскон сётӥз вал радиожурналист Галина Кондратьева. Солэн кужымез тырмиз 5 конкурслы – 2006-тӥ арозь. 2010-тӥ арын та ужез улӟытыны малпазы «Дэмен» но «Удмурт кенеш», озьы конкурслэн нимыз воштӥськиз – «Чеберай» луиз. Вожвылъяськонэз чаклазы кык арлы огпол карыны. «Удмурт кенешлэн» планаз конкурсэз туэ апреле ортчытоно шуыса пусйиллям, нош уж быдэсмытэк кылиз.

2013-тӥ арын фин-угор калыкъёслэн «Звезда Севера» конкурссы Удмуртиын ортчыны кулэ. 2011-тӥ арын шаркан ныл Ксения Воронцова отын вормись луиз.

Иське, отчыозь нош ик так улом? Йыре шукке – лэсьтӥськом, дыр уг окмы – вунэтӥськом. Таӵе «политикаен» йӧно удмурт имидж уд лэсьты. Нош макем бадӟым вормон басьтысалмы, Удмуртилэн туала тусыз «Чеберай» конкурс луысал ке. Татын ик – удмурт кылэз но удмурт сямез утён, шаплы но чебер нылъёсты шараян, егитъёс пӧлы удмуртлыкез вӧлмытон. Сыӵе паймымон шоу «пӧзьысал». Егитъёс – нылъёс но, пиос но – возьмало ук сое! Оло, таяз радэ ӵапак вырӟоно «Шунды» огазеяськонлы?

Удмурт чеберайёс уг возьмало туж дуно кузьымъёс. Тодэ лыктэ, 2006-тӥ арын Надежда Яковлевалы сётӥзы зарезь дуре путёвка – Крыме вуылӥз. 2010-тӥ арын котькудӥзлы дыдылы 2 сюрс манет сётӥзы. Кӧтсэс ӝож ӧз каре Дыдыкай но Мусокай ним басьтэм дыдыослэсь – таосызлы 5 сюрс но 8 сюрс манет сётӥзы. Нош Ксения Воронцоваез 15 сюрс манетэн шумпоттӥзы

Вог Олён.

Тодӥськоды-а тӥ удмурт чеберинаослэсь нимтулъёссэс?

1996-тӥ арын – Наталья Кашина, шаркан ныл.

1998-тӥ арын – Алёна Фёдорова, якшур-бӧдья ныл.

2000-тӥ арын – Елена Дюкина, яр ныл.

2002-тӥ арын – Наталья Петрова, шаркан ныл.

2006-тӥ арын – Надежда Яковлева, пурга ныл.

2010-тӥ аре кутскиз «Чеберай». Вормиз шаркан ныл – Ксения Воронцова. Та тулыс ик уй клубын ортчиз «Мисс «Удмуртлык». Вожвылъяськонын ваньзэс азьпалтӥз алнаш ныл Настя Петрова. Туэ «Италмас» сяська вузан салон но «Юмшан» промогруппа азьланьтӥзы та ӵошатсконэз. «Мисс Италмас» луиз шаркан ныл Лилия Кондратьева.

Тросэз удмурт егитъёс Ижысь БВИ (Бар Весёлых Историй) клубе лыктӥзы. Татын уго юри радъямын вал Barry Fashion Night ужрад. Удмуртиысь тужгес тодмо вить модельеръёс возьматӥзы ас коллекциоссэс. Нош бичаз соосты тодмо удмурт диджей, блоггер но озьы ик аспӧртэмлыко модельер Дарали Лели.

Тулыс мылкыд пыӵатӥз «LA GLACE» модая театр. Ӝужыт ӟызы нылъёс кузь гужем дэремъёсын подиум кузя капчи вамышъязы, пыдчиньыоссы гинэ выж борды йӧтскылӥзы. Нылъёслэн йырсиосазы но, дэремъёсазы но бурмизы кадь яркыт сяськаос. Оло выжыкылысь вунылъёс, оло бубылиос поръязы уй клубын – возьматонлы кутскон понэмын вал.

Люкаськем калыкез паймытӥз Александра Телицына. Вань мукет модельеръёслэсь со висъяськиз сьӧд-тӧдьы буёло коллекциеныз. Подиум вылэ ӝужыт беро катаосын нылъёс сяна, потӥзы на синмаськымон пиос но.

Собере мальдӥз али гинэ усьтӥськись удмурт модельер Оля Вужер Смирнова. Сарафанъёс, дэремъёс, юбкаос но кофтаос – ваньмыз туж «практичной». Яркытэныз но удмурт шӧмо кускерттонъёсын, чыртывесьёсыныз, пужыосыныз та дӥсь удмуртъёсты туж синмаськытӥз. Учкисьёс азе потон азьын ик асьсэос модельёс-нылъёс созэ яке тазэ дэремез басьтоно кариськизы ни. Олялэн коллекциез туж нуллымон.

Собере возьматскизы Полина Кубисталэн модельёсыз. Буёло герӟетъёслэсь квадратъёс – та Полиналэн пусэз луиз ни. Таяз возьматонын соос пичиесь но бадӟымесь дӥсьлэн азяз, бераз, урдсаз чебермаса вурылэмын вал. Учкыку ик валамон луиз, Кубисталэн таиз но коллекциез ӝоген шедьтоз аслэсьтыз нуллӥсьёссэ.

Берпуметӥез коллекция – «Vintage electroclash» – лэсьтэмын асэныз Дарали Лелиен. Вашкала удмурт дэремъёс, уксётӥрлык но африкан угыос. Аспӧртэмлыко удмурт декаданс. Надежда Уткиналэн «Глазовский вотяк» кырӟанэз туж тупаз коллекцилэн кутсконэзлы. Пӧрмиз аспӧртэмлыко пичи но мур пуштросъем спектакль. Вашкала удмурт сямез тӥяло туала дӥсьтӥсь егитъёс. Модельёслэн кый кадь куасалляськись мугоръёссы но эктыны кыскись крезьгур – Даралилэн диджей луыса крезьгурез валамез вылӥ дунъямын вал.

Оглом чаклано ке, коллекциос ог-огзылэсь туж висъяськизы. Модельёслэн сцена вылын асьсэды воземзы но быръем крезьгур – та но коллекциослы аспӧртэм шӧм пыӵатӥз.

Та уй бере лулме пачылмытэ шумпотон: удмуртъёслэн вань асьсэ аспӧртэмлыко но туала модельеръёссы! Но оскон: модаен герӟаськем ӝытъёс шедьтозы ас ӧрзэс, пырозы удмурт егитъёслэн улон радазы. Озьы ук, Дарали?

Лукерья Шихова.

Кыӵе нылмуртлэн чебер, синъёсты мальдытӥсь пӧрмытскемез уз поты? Нош 8-тӥ Март азьын мылкыд уката но тулкымъяськыны кутске. Соиз тузӥ дӥсяськем апай шоры учкиськод, мукетсэ синъёсыныд сӥсъяськод: мыным но таӵе дэрем кулэ вал, оло, сыӵе ик туфли пыдам понӥ ке, мон но йӧно адӟисько…

Пӧртэм журналъёсын сомында «модной» визь-ке-нешъёс, пӧлазы йыромыны кема ӧвӧл. Собере соиз но вань: котькуд дӥсь мугоръя но уг тупа, сюлэмъя но уг луы. Мон, кылсярысь, тодӥсько: кузь юбкаос туннэ, вакчиосыныз ӵошатыса, тузӥгес лыдъясько. Дӥсяд на ке шортлэсь керттэм яке кулэсь вурем жилет – модель кадь луод. Но журналъёсты ворсасько но соку ик валасько: ураме озьы пӧрмыса потыны уг дӥсьты. Малпасько, тросэзлэн таӵе мылкыдзы луэ. Угось ваньмызлэн ик котырысь адямиосты мальдытэмез уг поты, нырысь ик со ассэ йӧно, мусо шӧдэмез потэ.

Асьтэос шӧдӥськоды, луоз, инкуазе шутэтскыны потыкумы, зарезь дуре дасяськыкумы, чик кепыратэк дӥсяськомы тӧлъя лопыръяськись сарафанъёсмес. Озьы ик мыло-кыдо пӧрмиськомы юбка-брюкиен яке йырамы понӥськомы куролэсь шляпа, сотэк таос шкафъёсамы тузонӟыса кыллё вал. Мар пӧрме? Отын, кытын асьмемыз нокин уг тоды, дӥсяськиськомы эрико, мылкыдмы куремъя. Озьы ик луыны кулэ! Та возьматэ асьмелы оскись луэммес.

Мон ӵемысь вуылӥсько Россиысь пӧртэм городъёсы. Но отын улӥсьёс понна Удмуртия кунгожсьӧр кадь потэ ини. Соос паймо, шаерамы манетъёс бергало на шуыса. Нош мон шӧдӥсько: палэнын аспӧртэмлыко луэмме возьматэме потыны ӧдъя. Мон мукет культураен адями, улон шоры мукет сяменгес учкисько. Соин ик дӥсяськисько но соослэсь мукетгес – талэсь уг возьдаськиськы…

Малы мон тае ваньзэ гожтӥсько? Шуэме потэ: тросэз укыр мултэс уйисько мода сьӧры, выль потэм дӥсь басьтыны быгатымтэзы дыръя керӟегъясько. Юнме ӧвӧл шат со? Дӥсяське озьы, кызьы сюлэмды, мугорды куре – тазьы мон верало. Но… ватсало на: мерталэ-эскере со дӥсьёсты но, кудъёсыз кельшизы мукетъёсыз вылысь, журналъёсысь. Котькытын эсэпез луыны кулэ.

Дина Дэрем.

Вужерлэн коллекциысьтыз дӥсьёс

«Пепелац» клубын бадӟым куашетонэн ортчиз Ольга Смирновалэн удмурт мода адӟытонэз. Нылъёслы но пиослы вурем дӥсь куренялэс буёлъёсын, этно-пужыё шӧмын герӟамын. Ольга – чебер востэм нылаш: юнме гинэ аслыз Вужер ним ӧз бырйы.

- Уг яратӥськы син азьын луыны, – валэктэ сямзэ. – Мукет ласянь, вужертэк улыны уг луы. Ваньмызлэн вужерез вань.

Оля удмурт егитъёслэн дуннеязы но вужер кадь гинэ пыриз. Нырысетӥ ужзэ адӟимы туэ 17-тӥ мартэ «Узы-боры» кинолэн премьераяз. Соку со удмурт нылашъёсты сыназ-буяз, чебермаз. Паймод но бырод: таосыд сокем синмальдымонэсь луиллям! Киноын шудэм кизилиослы таӵе эш тужгес но кулэ. Со ик стилист, со ик парикмахер, вуриськись но.

- Дышетскемея мон инкуазь дизайнер, Кам институтэз горд дипломен быдэстӥ. Дышетскыкум ик пинал вайи, академ но ӧй басья. Туж секыт вал ке но, быгатӥ ик. Котьку но потэ вал дӥсь дизайнэн выреме, но, калык люкаськымтэен, группа ӧз кылдытэ. Ачим вордӥськи Алнашын, школаысен ик трос вуриськи. Яратӥсько суредаськыны, «Вужер» логотипме но ачим дасяй. Сое адями силуэт шуыса но валаны луэ, «арт» гожтэмез но вань. Отын ик удмурт дэрем, айшон, кисточкаос, сюрес, тылобурдоез адӟиське…

Удмурт ужрадъёсы Оляез Алнашысь чеберай Настя Италмас ӧтиз. Настялы со удмурт дэралэсь тузӥ вакчи дэрем вурем. Олялэн малпанъёсыз пумен аслаз коллекциез дорозь вуизы.

Ачим но одӥгзэ дэремзэ басьтытэк ӧй чида. Оля сое гладить карон дуско вылэ интыяз, логотипсэ лякиз. Со куспын мыло-кыдо юанъёслы валэктонъёс сётъяз… Со вискын кытысь-марысь 4 аресъем Андрей пиез дэрем дорозь вутскиз: вылаз чагыр мелокен зырӟиз!.. Оля ӵыж-ӵыж гордэктӥз ук! Ох, вужер ке вужер сямо ик та Оля, малпай мон: макем востэм!

Дарали Лели

Алигес Твиэкспедицие пырисьёс басьтӥськизы тунсыко проект борды: Ижысь сиськон интыосты удмурт шӧмо карыны малпазы. Та движениысь блоггеръёслэн S-deBugrua тви-министрзы ивортӥз: та нуналлы кенешемын ни Ижысь кык ресторан возисьёсын. Соос дурвайизы блоггеръёслэн малпанзылы: соглаш кариськизы ресторан но кафе пушказы удмурт кылъёсын вазиськонъёс ошылыны. Кылсярысь, «Ӟечесь-буресь!», «Ческыт мед кошкоз!», «Гажаса ӧтиськом», «Ӟеч луэ!» но мукет. Та гинэ мар! Твиэкспедицие пырисьёс ивортӥзы: борддоръёсын ошылэм плакатъёс сяна, ресторанъёсысь но кафеосысь официантъёс удмурт кылын но пичи ке но вераськыны дышетскозы.

Микта Орина.

А. Трефилов, К. Волков

Удмурт крезьгурен тунсыкъяськисьёс, тужгес ик классикаез яратӥсьёс, «Ингур» капелла сярысь трос кылылэмын. Солэн лулчеберетъя кивалтӥсез – Валерий Митрофанов. Кемалась ик ӧвӧл хорын кырӟасьёс пӧлысь ньылез пияшъёс воректӥзы удмурт ужрадъёсын: «Мынам Удмуртие» телерадиокомпанилэн юбилеезлы сӥзем ӝытын, Светлана Белых дорын куноын радиоэфирын, но Ижысь «Fashion» клубын удмурт позыръяськонын. Артём Трефилов но Костя Волков егитъёслы тодмо «RichGray» группаын шудэменызы. Эшшо кык эшенызы тодматыны курим. Артём Трефилов маде:

В. Тимофеев

- Осконэн герӟаськем крезьгур кырӟаськом ньыль кузя: нырысетӥ тенор – Костя, кыкетӥ тенор – мон, баритон – Максим, бас – Влад. Квинтетэн но (вить муртлэсь ансамбль) потамы ни, али 4 кузя кылим. Капеллаын кырӟаны шер пӧрмиськом, нош крезьгуръя училищеын, жаляса верано, «ансамбль» предметмы ӧвӧл.

Ӟуч но англи кылъёсын кырӟанъёсмы вань… Кунгожсьӧр кырӟасьёслэсь репертуарзэс эскериськом. Кудзэ ке «Ингурлэсь» кутӥськом, мукетсэ асьмеос шедьтӥськом. Кылсярысь, Америкаын вань сыӵе квартет – «Loch Lomond», соослэн гуръёссы туж кельшо.

М. Жигалов

Гужем пумын та пиос бадӟым вормон утӥзы – Ленинград улосысь Ткач городысь «Поющий мир» ӵошатсконын «духовной крезьгур» номинациын нырысетӥ инты басьтӥзы. Олокытчы но вутске шуыса, малпалод шат, лапеггес, востэм но лякыт Владислав Тимофеев шоры учкыса? Пияш пичиысен ик Ижысь школа-интернатын дышетске, группаысьтызы мукет пиос кадь ик, дышетсконзэ Ижысь крезьгуръя училищеын азьланьтэ.

- Атаелэн крезьгурчи луэмез потэ вал, но ӧз пӧрмы, – вера Влад. Та пияш вордӥськемын Пичи Пурга ёросысь Пуро-Можга гуртын, атаез фермер, скалъёс вордэ. Мар бен, атаезлэн быдэсмымтэ малпанэз, оло, умойлы: пиезлы дышетскыны луонлык кельтӥз.

Баритон куараен кырӟась Максим Жигалов Сарапул ёросысь: ӟуч ке но, удмурт дискотекаын кырӟаны пумит ӧвӧл. Эшшо ик позыръяськонын улэпкын кырӟаны – тунсыко ук со!

Вераськиз Наталь.

Городын вордскем удмуртъёс мукетэсь. Удмурт луэмзэс валало ке но, карын сое возьматыны уг быгато. Соос туалаесь, тунсыкоесь, яркытэсь – удмурт калыклэн улоназ пырыны уг дырто. Уг но быгато, дыр. Мурт каре-а соосты удмуртлык? Вераськоно кариськи куинь эшеным – ваньзы соос туала андеграунд культуралэн шорсюлэмаз уло. Куддыр соосты исаса нимаме потэ: удмурт хипстеръёс. Но удмурт хипстер луон – со ӧвӧл-а парадокс? Дунне мода сьӧры уйиськыса, кызьы утёд удмурт выжыдэ-сямдэ?

Миша Булычев (http://vkontakte.ru/club6086221), «Swimming cars»  британ шӧмо инди-рок группалэн бас-гитаристэз. Нырысьсэ тодмасткимы, dj барын шудыкум, соку Миша куриз фин-угор кырӟан пуктыны. Отысен тодмо луиз, та визьмо пияш удмурт шуыса. Ӧй чида, группазэ аслам вордӥськем нуналам шудыны ӧтьытэк. Таяз гужем соосты адӟыны луиз «Теория относительности» но «Открытый город» фестивальёсын.

- Нимы мынам Булычев Михаил Александрович. Вордӥськи Ижын 1992-тӥ арын 14-тӥ апреле. Пичи дыръям суредаськыны яратӥ, ӵемысь укное долкалляй но малпаськылӥ, чылкак телевизор азьын пукись песятай кадь… Берлогес кутски футбол клубын шудыны, выри капчи атлетикаен, волейболъя но баскетболъя ӵошатсконъёсы пыриськылӥ. Бас-гитара классъя дышетскыны пыри. Кӧня ке шудӥ «Водоворот» коллективын. Собере эшъёсыным группамес люкам. Удмурт «тусовка» сярысь номыр но уг тодӥськы кадь, но соосын кӧня ке тодматски соцсетьёс но удмурт сайтъёс пыр. Выжыея удмурт луисько ке но, удмурт кылэз урод тодӥсько – Ижевскын вордӥськи ук. Гужем гинэ пичигес дыръям ай улӥ гуртын: Кильмезьын но Сюмсиын. Отын туж умой вал… «Sweet home Alabama». Кемалась ни отчы ветлэме.

Денис Тубыловен тросэз тодматскизы, дыр, «Шундыкар» лагерьысен. Нош мыным удалтӥз соин Ижысь эшъёсы пыр тодматскыны. Капчи мылкыдо, мар веранэз! BMX спортэн выре вылэм!

- BMX (англ. bicycle motocross – лыдӟиське «бээмикс») – со нимысьтыз кылдытэм велосипедэн ворттылонъя спорт. 5-тӥ яке 6-тӥ классысен ворттылӥсько ини. Начальной классъёсын К. Герд гимназиын дышетски, собере 56 номеро гимназие выжи. Удмурт классэ мынӥ ачим мылкыд каремъя. Малы BMX? Гужем ворттылӥсько ӵукнаысен ӝытозь. Ма, эшъёсы но – ваньзы!  Великеным чик ӧй люкиськылысал, соин ворттылонъя кыӵе ке выль амалъёс дышетысал. Маке дауртонъяд куддыр усиськод – вӧсь. Эх, ворттылонъёс, трюкъёс, тодматсконъёс. Адреналин!

 Яна Чупина - егит журналист, промоутер, альтернатив группаослы концертъёс, дискотекаос радъясь. Эшшо со Трокай Борисовлэн… матысь ӵыжы-выжыез.

- Удмуртъёсын мон эшъяськи туэ тулыс гинэ, фин-угор студентъёс понна ортчись IFUSCO конференцие пыриськыса. Мар мыным матынгес – Трокай Борисов яке хипстеръёс? Нырысетӥез мыным тодмо, нош кыкетӥ кылэз мон уг валаськы. Кин со хипстер? Егит адями, кин «яблок» культураез гажа – айпод, айфон, мак? Пужейёс, ыгыос, треугольникъёс?

Мон будӥ, андеграунд культуралэсь дышетскыса. Асме рокер но, панк но ниманы быгатӥсько. Оло нош уг – пичи дыръям удмурт «Чеберинае» пыриськылӥ, удмурт кырӟанъёс кырӟалляй. Анаелы-атаелы тау – дорын удмурт кылын вераськиськом.

ДАРАЛИ ЛЕЛИ.

Нылмуртлэн чеберез йырсиез бордын, шуиллям калыкын. УдГУ-ысь удмурт филология факультетын 4-т

Йырси пуныны нокин нимысьтыз ӧз дышеты: пунӥсько ас быгатэмея, ас тодэмея, ас шӧдонэя, шуэ Лиля.

Пичи дыръям котькуд ӵукна мама вазь ик сайкатэ вал пунӥськыны. Ми семьяын кык нылъёс, кыкнамылэн ик кузь йырсимы вал, ма, али но бен кузь. Ноку но лусьтыр-ласьтыр ӧм ветлэ, мама йырсимес ялан пӧртэм-пӧртэм яркыт бантикъёсын октылӥз-калтылӥз. Отысь ик, дыр, йырси пунэтъёсты яратонэ но кылдӥз. 5-тӥ-6-тӥ классъёсын мон йырсиме чебер пуныны ачим дыши ини. Только ноку но ӧй малпа вал парикмахер луыны. Университетысь эшъёсылэн индылэмзыя гинэ та удысэ вамыштӥ. Анай-атайёсы но быгатонлыкме санэ басьтӥзы, дышетскыны коньдон сётӥзы.

Мон ӧй шуысал, йырси пунон-пуктон табыш сётэ шуыса. Со мынам хоббие, соин мон ваньмон дыръям гинэ вырисько. Пичи-пичи коньдон поттыны быгатӥсько ке, талы шумпотӥсько. Студентлы угось туж иназ луэ палэнысь вуись уксё: доре но бертылыны тыр-ме, ческытгес сиськыны но. Мон ведь нылмурт – пельугы но, йырси тэчон но басьтэме потэ.

Берло дыре ӵем гинэ вазисько, ӵышкыны, буяны но, пуныны курыса. Дыры вань ке, ваньзылы тыршисько юрттыны. Мынам клиентъёсы но вань ини: кызьы городын, озьы ик гуртын но.

Нош вуриськыны чик но уг яратӥськы! Дась вурем дӥсез возьматыны – мукет ужпум. Макияж лэсьтыны дышетскеме туж потэ. Мынам ваньмыз ай азьпалан!

 Луша Шихова.

Кезьыт тол зарни с

Тодам лыктӥз куарусёнэ ортчем «La Oudmurt Party». Татын аслэсьтыз «Дорам луо» коллекцизэ возьматӥз Дина Dэrэm. Соку тросэз паймизы та нылашлы. Дина, модельёсыныз ӵош коллекцизэ возьматэм сяна, пумаз эктыса лэзиз на. Сӥзьыл тусо дӥсен апокъёс куаръёс выллем бергазы. Таӵе капчи но шулдыр возьматонэз удмурт дунне ӧз адӟылы на вал.

Та вал нырысетӥез, маин Дина Перевозчикова монэ паймытӥз. Тодматскеммы бере али дырозь мон солы абдрамысь уг дугдӥськы. Малы?

Нырысетӥ вамышъёс

- Мон будэмын театрын. Анай-атае – артистъёс. Анае Удмурт театрын шудэ, атае – Мунё театрын, – шуэ Дина. – Пичи дырысеным дышемын отчы-татчы бызьылонлы, дыртонлы, репетициослы но сценалы. Сцена ик быдтӥз возьдаськонме. Мон уг кышкаськы шорам учкисьёслэсь. Котькӧня соос мед луозы, мон уг гордэктӥськы. Сцена но эктон – мынам улонэ, мынам шоканэ.

Школаын дышетскон аръёсам мон гожъяськыны кутски. Шумпотӥ печатласькись ужъёсылы. Озьы, статьяос люкаськемен, портфолиое зӧкомиз. Оло, та ик кыскиз монэ УдГУ-ысь журналистикая факультетэ.

Студент дыръям но ӧй дырты сценалэсь палэнскыны. Та аръёсы ик ас бордаз юнгес но юнгес кыскыны ӧдъяз дӥсь вурон. Солы паймонэз ӧвӧл, угось сцена но киуж ог-огенызы люконтэм герӟаськемын: сцена вылэ потон понна вылад тупась дӥсь луыны кулэ. Озьы ужрадъёс азьын мон быдэс факультетмес «дӥсялляй». Мукет факультетъёслы но юрттӥськылӥ.

Соку ик вуриськыса коньдон поттыны кутски. Я машиналы чехолъёс вурылӥ, я официантъёслы дӥсь.

Егит анай но Мира

- 2009-тӥ арын дышетсконме йылпумъяй. Табере мон анай. Нылылы одӥг но ӝыны арес. Тросэз малпало, пинал вордэмзы бере кышноос гуртазы пукыны кулэ шуыса. Нош мон озьы уг малпаськы. Доразы пукисьёс туж мӧзмытэсь йӧто. Соос ӵем дыръя асьсэды чакламысь дугдо, со бордысен ик, вылды, керетонъёс, улонлы ӝожтӥськонъёс кылдо. Мон воксё мукет!

Нылпие вордскем бере но мон выль коллекциос кылдытонме ӧй кушты. Анай киосын вурем дӥсь нылме эшшо но шунтэ кадь йӧтэ. Вань на таӵезэ но верасьёс: пичи нуныос, пе, киужен вырыны люкето. Со чик но озьы ӧвӧл! Маин мон тунсыкъяськи, со озьы ик кылиз. Бен, эктонлэсь гинэ куштӥськоно луиз, но Мира будӥз ке, мон отчы одно берытско. Эшшо мон яратӥсько котькыӵе ужрадъёсы вуылыны. Нуныеным ӵош со йылолме азьланьтӥсько. Туннэ нуналлы Мирае монэн ӵош олокӧня пол вуылӥз ни Муское, Пскове, Питере. Мон кадь ик, со но котыр улонэн пичи дырысеныз тодмо мед луоз. Кышкано ӧвӧл, малпасько, нуныен кытчы ке палэнэ потамлэсь, шутэтскемлэсь.

Выль ним

- Кызьы мон луи Дина Dэrэm?

Вуриськыны кутскеме бере, тужгес но коллекциме кылдытэм бӧрсьы, аслым кыӵе ке ним малпано луиз. Тӥни озьы ик кылдӥз Дэрем нимы. Огшоры. Со ӵапак удмурт луэмме но, мукетъёсызлэсь висъяськемме  но возьматэ. Ма, мукет сямен луыны но ӧй быгатысал: анай-атае угось чылкыт удмуртъёс. Монэ гинэ малы ке рос-прос дышетӥллямтэ анай кылыным вольыт вераськыны. Но мон котьку но данъясько удмурт кылэн, туж яратӥсько сое. Калыкез лыдъян-чотанын но мон асме удмурт гожтӥ. Со мынам пичи вормонэ. Азьланяз одно ик чылк-чылк удмурт кылын вераськыны пӧрмыто.

Эрико малпанъёс

- Нырысетӥ коллекцие – со гужем дӥсь. Нимаське «Пилемъёсын сюрес кузя». Та коллекциысь дэремъёс, дӥсьёс туж капчиесь, югытэсь.

Кыкетӥез – «Дорам луо» – сӥзьыл дӥсьёс. Татчы пыртэмын ас киын керттэм шуныт кофтаос, жилетъёс. Буёлзы нясь-нясь, ненег, коркась шунытэз возьмато кадь. Та коллекциеным мон Ижысь Fashion клубын сцена вылэ потай. Ужрад йылпумъяськыку, нылъёсын мыло-кыдо эктӥм на.

Куинетӥзэ коллекциме малпасько тулыслы сӥзьыны. Малпанъёсы али ик лачак ни – сое кыӵе ке пӧйшур тусо кареме потэ. Озьы тӥни пиналме утён вискам мон сыӵе мылкыдъёсын улӥсько. Коллекциосме вакчи дыр куспын уйёсы кылдытӥсько. Мукет сямен уг луы. Соин кык часлэсь азьло изьыны уг выдӥськы. Дыши ни.

Озьы ик яратӥсько пичи нуныослы вуриськыны-керттӥськыны. Яратӥсько паймытыны! Ӵыжы-выжыосылэн но эшъёсылэн нуныоссы мынам киыным лэсьтэм дӥсьёс нулло. Со сыӵе мусо адӟиське!

Тросэз юало, дӥсь кылдытонын кинлэсь адӟем кариськод. Нокинлэсь но. Мон малпамъя, кин ке вылэ пыкъяськон – со ас малпанъёстэ ыштон. Соин ик вурисько сое, мар йырам лыктэ, мае аслым нуллыны каньыл луоз. Та бордысь ик мукетыз аспӧртэмлыке – уг яратӥськы кин ке куремъя дӥсь вурыны. Кинлэсь ке кылзӥськонъям, эрико малпанъёсме со дӥсе пыртыны уг быгатӥськы угось. Одӥгзэ али ик тодӥсько ни: сцена, эктон, вуриськон, гожъяськон но семья – ваньмыз улонам ас интызэ шедьтоз, огазеяськоз.

Луша Шихова.