«ПорозМафи»

Берло дыре ӵемгес но ӵемгес чузъяськыны ӧдъяз «ПорозМафи» огинлэн (группалэн) нимыз. Кытысь-марысь кылдӥз со? Кин отчы пыриське, кин солэсь ужзэ бергатэ? Та юанъёсылы валэктон шедьтон вылысь «ПорозМафи» группаысь кинэ но сое «быжтӥз» кырми – юанъёсын ёртӥ.

- Ми вить кузя, – мусо пальпотэ группаысь одӥгез мыло-кыдоез пияш Вова Вахрушев. – Котькудӥзлы нимысьтыз удыс висъямын. Кин кырӟан гур пуктэ, кин кырӟа, кин калыкез шулдыртэ-гочатэ. Диджеймы – Игорь Гуменников. Со вордскемын Шаркан черкогуртын. Нош ми – Дима Софронов, Лилия Кондратьева, Мария Корепанова но мон – вордскемын но будэмын Шаркан ёросысь Пороз гуртын. Ваньмы одӥг школаын дышетскимы, вань ужез дэмен быдэстӥськомы вал: кыӵе ке шулдыръяськон ужрадэ пыриськоно-а, школамылэсь данзэ кыӵе ке олимпиадаын утёно-а – котьку ӵош.

Игорь Гуменников

Вова Вахрушев борды итӥське Игорь Гуменников:

- Мон порозъёс пушкы капчиен пыри. Сцена вылын – нылпи садысен. «ПорозМафи» группаын мон крезьгур понна кыл кутӥсь. Кызьы кыстӥськыны ӧдъяй крезьгур дуннее? 2005-тӥ арын кылдӥз кырӟан гожъянъя компьютер программае, озьы та уже выйи. Нош 2006-тӥ арын Шаркан черкогуртысь культурая юртын ортчиз диджейёс пӧлын ӵошатскон. Мон отын вормисе потӥ. Мылкыды ӝутскиз Ижын но кырӟанъёсме бергатыны-чузъяськытыны. Дышетскыны пыри Удмурт кун университетэ. Отысен тодматски Мишаен, мукет сямен, Omix диджеен. Ӵошеннамы кылдытӥмы «Чип & Дейл» проектмес. Гожъяны кутскимы пӧртэм ремиксъёс. «ПорозМафи» огинмылэн ужаз мыло-кыдо пыриськисько. Туэ гужем ортчем удмурт гуртъёслэн чемпионатазы «ПорозМафи» ваньзэсты азьпалтӥз. Со дырысен митэк уг ортчы ни Ижысь одӥг удмурт ужрад но.

Шумпотӥсько: туала егитъёслэн сюлмазы сюрес шедьтӥм. Азьланяз витё тунсыко ужъёс!

 Наталь

Удмурт кун университетысь студентъёслэсь юаськод ке, кин со Андраш, та

- со ми дорын удмурт кылэз дышетэ;

- со вордскемын Венгриын, нош дышетске Германиын;

- со 5 кылын вераськыны быгатэ;

- солы 26 арес;

- Андраш – тӥнь со пияш, кудӥз 2 метрлэсь ӝужыт;

- солэн туганэз – удмурт нылаш;

- со творческой мурт, дыр – трос вераськыны уг яраты.

Зэм но, вань та веранъёс шонересь. Андраш вордскемын Венгриын, нош дышетске но улэ Германиын. Гётеборг карысь вылӥ дышетсконниын тодон-валан басьтэ. Асьме Удмурт кун университетамы та визьмо пияш 9 толэзь ӵоже ни удмурт кылэз дышетэ. Озьы немец, мадьяр, англи но ӟуч кылъёсыныз артэ удмуртэз но воля ни.

Та сяна, мыным тодмо луиз мукетыз: ӝоген Ижкарын удмурт-немец фестиваль ортчоз, соку ик Андрашлэн 3-тӥ огъяулонниысь выль галереяын удмурт серемтусъёсыныз адӟытон усьтӥськоз. Пияшлэн таӵе быгатонлыкез сярысь тросэз уг но тодо. Бен, ойдолэ соин мургес тодматском.

- Андраш, кызьы тынад кылдӥз комиксъёсты суредан мылкыдыд?

- Мон пичи дырысеным ик комиксъёсты лыдӟыны но суреданы яратӥсько. Огдыре та хоббиелэсь куштӥськылӥ ик, нош 2006-тӥ арысен ваньмон дыръёсам таин вырисько. Али мукет ужъёсын йырин ичигес суредаськисько, угось комиксъёс бордын ужаны трос дыр но юн чидан кулэ.

- Нош кызьы соос кылдо?

- Суредасько мон котьку кагаз вылэ огшоры карандашен яке ручкаен, собере компьютере пыртӥсько но отын юри программа пыр кылъёс ватсасько. Кылъёсты кутӥсько дась веросъёсысь – таоссэ яке ачим ик гожтӥсько, яке кинлэсь ке дасьсэ кутӥсько. Берлозэ тани Америкаысь пияш гожтӥз но мыным соя комикс суреданы дэмлаз. Сыӵе аспӧртэм огъя ужмы пӧрме.

- Та дыр ӵоже вань ни, дыр, аслад яратоно комиксъёсыд?

- Мынам трос яратоно комиксъёсы, мон соосты котькуд нунал учкисько, лыдӟисько. Тужгес кельшымонъёсыз со Alan Moore «Watchmen», Hiyao Mayazaki «Navsicaӓ». Та фантастика комиксъёс, соин ик аслам суредам серемтусъёсы но фантастика шӧмо. Огшоры улонысь серем комиксъёс мыным уг ярало, ачим но сыӵеоссэ уггес суредаськы.

- Кыӵе кылъёсын комиксъёсыд вань?

- Оглом учконо ке, Германиын ӧвӧл комикс культура, со трос Англиын но Япониын. Озьы ке но мон ӵемысь суредасько немец но англи кылын. Соосме – http://www.drunkduck.com/user/Lemniskate/ сайтысь адӟыны луэ. Ӧжытсэ мадьяр но удмурт кылэ берыктӥ ни. Но соос пумозяз вуттэмын ӧвӧл на. Малы ке шуоно удмурт кылэз сокем ӟеч уг тодӥськы. Озьы ик комиксъёсы тросэз кузесь, соин ик азьыз берыктэмын ке но, пумыз кылемын на. Тани огез 45 бамъем комиксэ но ӝыныё-урдсо кельтэмын ай. Та ужын юрттӥське туганэ но удмурт кылъя дышетӥсе. Мон понна та берыктон уж аспӧртэмлыко практика. Нырысь комиксъёсылэсь сюжетсэс соослы валэктӥсько, собере ӵош берыктӥськом. Озьы удмурт кылы юнма. Комиксъёсылы удмурт нимъёс но сётӥськом, кылсярысь, «Кылдысин», «Пӧялляськон тысь», «Трансформеръёс – кык товарищъёс».

- Удмурт шаерамы удмурт комиксъёс ӧй вал на. Уг поты-а удмуртъёсты та ужлы дышетэмед?

- Со туж секыт уж, малы ке шуоно комикс лэсьтон укыр шуг. Удмурт кылын со, валамон, чик но радъямын ӧвӧл. Кыӵе пайда сётыны мон быгатӥсько та дырлы? Мылкыд карисьёслы комиксъёслэн философизыя лекциос лыдӟыны. Татын угось комиксъёсты валаны, шонер лыдӟыны гинэ но дышетскем кулэ. Кин ке малпа, комикс – со огшоры серемес суредъёс, но со чик но озьы ӧвӧл. Зэмос комиксын серекъян гинэ уг луы, со пыр дунне адӟон возьматэмын. Тани мон со пыр улон шоры учконме усьтӥсько. Вераны тыршисько, дуннеын одӥг гинэ зэмлык ӧвӧл шуыса. Соингес ик мынам комиксъёсы бадӟымъёслы гинэ валамонэсь.

- Нош удмурт веросъёсъя комикс суредамед ӧз потылы-а?

- Жаляса верано, али мон 30-тӥ-70-тӥ аръёсысь литератураен гинэ тодмо ай, нош отын номыр фантастическоез но комикслы тупамонэз ӧвӧл. Туж потэ вал туала удмурт литератураез чаклам, оло, отысь мар ке ярамонэз сюрысал. Но вань на малпанэ «Дорвыжыез» комикс выллем суреданы.

- Удмурт-немец фестиваль улсын ортчоз серемтусъёсыныд  адӟытонэд? Кыӵе мылкыдыд?

- Зэмзэ ке, таӵе шара адӟытонэ нырысьсэ ортчоз ай. Но мон уг кышкаськы. Учком ни, кыӵе малпанъёссы кылдозы учкисьёслэн.

Табере «кин со Андраш?» юанлы, тросэз таӵе валэктон но сётозы ни:

- со нырысетӥ удмурт комикс суредась.

Шумпотонэн ӵош кӧт но ӝож. Асьмелэн котьку озьы: кыӵе ке выль удысэз удмурт кылэ берыкто палэнысь вуэмъёс, итӥськыны быгатомы-а асьмеос соос борды?

Луша Шихова.

Эмъясьёс верамъя, та ваньмыз нуналлэн вакчияменыз, мӧзмыт куазен, урамысь пурысь буёлъёсын герӟаськемын. Шунды ӧжытгес пиштэ, мугорын, пе, мелатонин гормон кулэсме, таин валче кылдэ депрессия. Вылаз ик, сӥзьыл арлэн пумаз вуэ. Соин но, лэся, йырдэ тӥяны ӧдъяськод: мае лэсьтыны вуттӥд, мар вуоно арлы кылёз. Куд-огез таӵе дыръя ассэ ачиз курадӟытыны кутске: улон ортче, нош мон номыр умойзэ лэсьтыны ӧй вутты на. Таӵе малпанъёс но куддыр депрессие вутто. Тунсыко: депрессия, пе, ӵемгес йыгаське кышномуртъёс доры.

Но куд-огезлы секыт мылкыд тодмо ик ӧвӧл. Соос шуо: со малпам маке, азьтэмъяськонлы муг. Нош мар меда со сярысь верало кунгож сьӧрын? Тае тодон понна пӧртэм кунъёсысь эшъёсылы вазиськи.

Вилда, Швеция:

- Сӥзьыл депрессия мыным тодмо. Эмъясьёс сыӵе дыръя ӵекто ӵемгес поръяны, малы ке шуоно сӥзьыл мугормылы уг тырмо шунды сиос. Соослэсь но угось асьмеос витаминъёс басьтӥськом. Поръяны дыр уг шедьы ке, тросгес сиёно кулэ емышъёс. Кӧлыны одӥг часлы ке но вазьгес выдоно.

Бабис, Греция:

- Грециын депрессиез «сӥзьылэн» уг герӟало, малы ке шуоно шуркынмонозь куазьмы пӧсь возиське. Сӥзьыл шунды шорын пыжиськом, вуэ пыраськом. Гужеммы кема возиське бере, депрессия уг кылды ни.

Асуза, Япония:

- Милемлы та мылкыд тодмо. Но депрессимы сӥзьыл уг ортчы, со ми доры куартолэзе вуэ. Тулыс мугор лябӟе, кужым быре, жадиськомы. Сыӵе вакытэ кемагес кӧлӥськом, тыршиськом ӵемгес походъёсы, инкуазе потаны.

Том, Англия:

- Сӥзьыл депрессия дыръя ми, асьмеос но валатэк, тросгес сиськиськом, изиськом. Сыӵе дыръёсы мон эшъёсылэсь, матысь адямиосылэсь палэнтӥськыны тыршисько, малы ке шуоно кыӵе ке верамъёссы утыр ик вожме потто. Сӥзьыл депрессия дыръя ми дорын «лыз толалтэ» диагноз пукто. Эмъясьёс кӧня ке нуналлы ужлэсь яке дышетсконлэсь палэнтыны но быгато.

Алиса, Австралия:

- Депрессия ке шуиськом, урамын одно ик сӥзьыл луыны кулэ?! Со котьку кутскыны быгатэ. Мылкыд ӧвӧл, ужъёс уг пӧрмо. Озьы ик усиськод со депрессия шуонэ. Ярам ай, со кема уг кыстӥськы.

Лена Рябина,

Удмурт кун университетын дышетскись.

- Марий Эл Республикаын удмурт кылэз дышето одӥг интыын гинэ – Карлыганын, – вераз Марина Романова. – Угось отын улӥсьёс пӧлысь уноез – удмуртъёс. Милям школаямы пиналъёс дышето пор, бигер, удмурт кылъёсты – кин кудзэ быръёз. Удмурт кылъя урокъёс нуисько арняяз кык пол – 9-тӥ классозь гинэ. Соин ик мылкыдмы кылдӥз удмурт кылын гожъяськонлы сӥзем кружок усьтыны.

«Пӧртмаськись тылы» кружоке пыриськись егитъёс, анай кылын чебер вераськыны дышетскем сяна, пӧртэм жанръёсын тодматскозы, соосъя ужъёссэс пӧралозы. Кызьы пусйиз М. Романова, тужгес но усто гожъямъёсмес, пе, ыстомы Удмуртиын улӥсь эшъёсмылы – «Ӟечбур!» но «Удмурт дунне» газетъёсы. Удмурт изданиосысь печатлам ужъёссэс адӟыса, нылъёслэн но пиослэн удмуртлык борды кыстӥськон мылкыдзы эшшо будоз.

Микта Орина.

Странамылэн тужгес но дано сцена вылаз – Кремль дворецысь концерт залын – та нуналъёсы кыр

Соос пыриськизы Приволжск федерал округысь искусстволы сӥзем нырысьсэ ортчем фестивале. Со ӧсъёссэ вӧлъяз округе пырись улосъёсты культуразы ласянь огазеян, со вие ик котькуд шаерлэсь аспӧртэмлыко луэмзэ возьматон понна.

Удмурт артистъёсмы кӧня ке кырӟанъёссэс быдэстыса вуттӥзы гинэ, залын пукисьёс ӵаш! поттыса киоссэс чабыны кутскизы. Нялтас вераса, учкисьёслэн лыдзы ичи ик ӧй вал – 7 сюрс муртлэсь ятыр. Озьы асьме артистъёс ваньзылэсь йырзэс поромытӥзы, нош «Малпанысь» егит нылъёслы залысь вань егит пиос синмаськизы!

Вератэк кельтоно ӧвӧл: ӵуказе Москваын усьтӥське мукетыз дано ужрад – Фин-угор калыкъёслы сӥзем арня. Мусколэн пӧртэм интыосаз чакламын уно ужрадъёс. Кызьы ивортӥз та ужрадлэн одӥгез кичӧлтӥсез Анастасия Чушъялова, Фин-угор калыкъёслы сӥзем арня ортчоз бадӟым событиосты пусъён улсын. Кылсярысь, Трокай Борисовлэн вордӥськемез дырысен 120 ар тырмонэз, Коми Республикалы 90 ар тырмонэз данъян. Нимысьтыз сэрег висъяськоз Финляндилы. Угось солэн шоркарез – Хельсинки – вуоно арын ялэмын луоз дуннеысь дизайнлэн шорсюлмыныз. Та сярысь ивортозы Суомиысь вуэм куноос. Москваын улӥсь фин-угоръёс сяна, ужрадэ котьку сямен ик пыриськозы Марий Элысь, Комиысь, Удмуртиысь, Мордовиысь куноос.

Мускоысь Лелёк.

Октябрь толэзьлэн валт

Удмурт шаер но палэнэ ӧз кыльы та дано изобретателез тодэ ваёнлэсь. Ижысь Набережнойысь ошмес син дорын усьтэмын Джобсэз ватэм интылэн… филиалэз.

Та ужрадэз ӝутӥсь-ортчытӥсь – шаерысьтымы тодмо суредась, «Известия Удмуртской Республики» газетлэн редакторез Энвиль Касимов. Со борды итӥськизы Ижысь 200 адямиос, пӧлазы шоркармылэн сити-менеджерез Денис Агашин но.

Стив Джобсэз улэп дыръяз «Дано удмурт» нимын пусйыса ӧм вуттэ, малы бен та ужез али быдэстонтэм, мылкыдзэ усьтӥз Э. Касимов.

Стив Джобсэз тодэ вайыны лыктӥсьёслы косэмын вал сьӧразы улмо кутыны. Угось Apple компанилэн пусэз – куртчем яблок. Табере Иж тымет котырысь ошмес син нуллоз Джобслэсь нимзэ. Со сяна, Джобс пусъемын «Дано удмурт» нимын. Та ним сётэмын ни космосэз усьтӥсьлы Юрий Гагаринлы, «Сьӧд квадрат» суредлэн авторезлы Казимир Малевичлы, крезьгуръя критиклы Артемий Троицкийлы, тодмо режиссёрлы Эмир Кустурицалы но мукетъёсызлы.

Интернетын пукисьёс таӵе ужрадэз пӧртэм мылкыдын пумитазы.

Glamura:

- Улонысь кошкем муртэз серекъян, мар веранэз – зэмос стёб выллем луэ таӵе ужрад. «Дано удмурт» нимез удмуртъёслы гинэ сётъяно. Джобсэз Нобель премиен пусъёно вал.

vin_rain:

- Джобс кулэм пумысен сюлмы ик бугырскиз. Дуннелы со кузьмаз ук ӟеч гаджетъёс – iphone, ilad, ipod.

Iphone:

- Стив кошкемен валче, малпасько, компьютер технологиосты кылдытон табере 70 арлы ӝегалоз.

Batman:

- Джобсэз тодэ ваёнъёс ортчизы дуннелэн пӧртэм сэрегъёсаз. Питерысь егитъёс, кылсярысь, урамъёстӥ мынӥсь-ветлӥсьёслы сётъязы улмоос. Ма, ярам: удмуртъёс но палэнэ ӧз кыле дуннеысь учыръёслэсь.