- Юанэд туж интыяз, – малпанзэ кисьтэ И. Пчеловодова. – Мон но та пумысен йырме тӥясько. Малы уг тырмо пиос? Валэктыны луоз, вылды: кырӟан-веран, эктон культура золгес лякиськиз ни кышномуртъёс борды. Вань тазьы шуисьёс но: кырӟан, пе, котьку но матынгес вал нылкышноослы. Мон таин соглаш уг кариськы. Угось вашкала вакытъёсы кырӟаны-эктыны усто удмурт воргоронъёс лачак вал. Ма, тани калык кырӟанъёсамы но кӧня данъяськомы арган кыскась, эктӥсь-верась пиосъёсты! Но Быдӟым ож соослэн лыдзы вылын шӧдӥськытэк ӧз кыльы, со бӧрсьы кырӟан-эктон культура пиосмуртъёсмы борды мур пыӵаса ӧз вутты ни…

Тани «Чипчирганысьтымы» одӥг мыло-кыдо пияшен Коля Анисимовен Кияса ёросэ вуылӥмы. Отысь тодӥмы: вашкала дыръя, пе, киясаослэн сыӵе сям-йылолзы вылэм – арганэн шудӥсь пиосмуртсэс юртысь юртэ юмшатыса нулло, сое котькуд коркан тӧр шоры пукто но аслэсьтыз малпам кырӟанзэ быдэстыны косо вылэм. Нош туала пиослэн фольклор борды кыстӥськемзы туж ик уг поты ни. Туж сюлмаськытэ егитъёс пӧлын арганчиослэн кулэсмемзы. Вить ар талэсь азьло гинэ соосты капчиен шедьтыны луэ вал ай.

- Тодӥськомы: «Чипчирган» ансамбль УдГУ-ын кылдытэмын. Отчы пыриськыны быгато-а палэнысь егитъёс?

- Ансамбльлэн шорсюлмыз – университетысь студентъёс. Но мон пумит уг луиськы, палэнысь но егитъёс вазисько ке. Удмуртлыке вамышто ке – таиз шумпоттэ гинэ.

- Студентъёс пӧлысь кин ке кӧня ке ар ӵоже ветлэ ни ансамбляды, мукетыз али гинэ лыктӥз. Куспазы валамтэос уг кылдыло-а?

- Ми одӥг семья кадь. Нош семья куспын, асьтэос тодӥськоды, валамтэос но кӧтӝожъёс луыны быгато. Но котькуд учырын ми ог-огмес валаны тыршиськомы, малпанъёсмес шараяськомы. Ма, зэм но, «Чипчирганэ» кӧня ке ар ӵоже пыриськисьёсын ужаны капчигес ини, соосты эктыны, кырӟаны дышетонэз ӧвӧл. Нош али вуисьёсын трос ужано луэ. Та ласянь бадӟым юрттэт сётэ хореографмы, удмурт эктонъёсты пуктӥсьмы Валентина Студитских.

- Кыӵеен адӟиськод ансамбльлэсь азьлань сюрессэ?

- Ансамбльмы удмурт калык кырӟанъёслы, эктонъёслы сӥзьыса кылдытэмын бере, та ӧръя ик удысмес валтомы. Ми азьын сылӥсь нырысетӥез ужпум – концертъёсты радъян. Чакламъя, соослэн лыдзы лачак луоз. Толэзьлы быдэ кыӵе ке бадӟым ужрадъёсы ӧтё. Таиз туж шумпотымон.

Тани 4 ар талэсь азьло Кун Думае быръёнъёсы Удмуртиысь  егитъёс шоро-куспогес пыриськизы.

- 30 аресозь нылъёс но пиос пӧлысь куаразэ сётӥз 46,7 процентэз, – вера республикаысьтымы Быръёнъёсъя валтӥсь комиссилэн секретарез Георгий Пчельников. – Нош муниципал быръёнъёсы уката мылкыдтэк мыно. Тани миым Ижысь егитъёс пӧлысь 25,5 процентэз гинэ куаразэс сётӥзы. Оскиськом, вуоно быръёнъёсы нылъёс но пиос ӟечгес мылкыдын вамыштозы.

Егитъёсты вырӟытон борды кутскизы Кизнер ёросын. Татын толэзь талэсь азьло ялӥзы ни «Мон – бырйись» конкурс. Отчы сочинение гожтыса ыстоно. Ужзэс келяны быгато 9-тӥ-11-тӥ классъёсын дышетскисьёс но, 25 аресозь ужась егитъёс но. Но таӵе «вашкала» амал емышъёссэ уггес сёты. «Ровесник» центрысь методист Юлия Монмахова верамъя, конкурсэ ыстэмын 2 сочинение гинэ. Кин тодэ, оло 30-тӥ ноябрёзь кӧня ке ужъёс вуозы ик на. Озьыен, егитъёсты уд гочаты кузьымен но, устозэ сочинениез райгазетын поттыны сӥзёнэн но.

Быръёнъёсын вормисьёс азьло ик тодмо – таӵе кунэрес мылкыдзэс форумъёсын верало егитъёс. Талы мон уг оскиськы. Соин В. Путинлэн верамез кельше. «Рядовой гражданин понна вань, мае бырйыны» шуэ со. Уго вуоно быръёнъёслэн процентъёсын лыдпуссы тодмо ӧвӧл.

Путин оскытэ: Россиысь политикаын шуак воштӥськонъёс уз луэ. Но со вакытэ ик «Огъя Россия» партилэн лидеръёсыз огинтыязы кема уз пуке. Кин тодэ, оло Россиысь калык фронтэ пырисьёс пӧлысь ик потозы мукет азьветлӥсьёс.

Тани толон гинэ Путин ортчытӥз Россиысь гурт интеллигенцилэсь форумзэ. Районъёсы мынӥсь егит специалистъёслы саклык одно ик луоз. Со пумысен Путин вераз ни вал партилэн съездаз но. Районэ выжись егит врачъёслы 1 миллион манет тыр юрттэт чакламын. Нош гуртысь дышетӥсьёслы – 8-8,5 процентэн ипотека.

Мон врач но, дышетӥсь но ӧвӧл. Озьы ке но куарае жаль уг поты. Бырйыны мыно одно ик.

Бырйиськись Олён

Алина Антонова:

- Котькинлы тодмо: городэ кошкемзы бере егитъёслэн гуртэ бертэмзы уг поты ни. Малы? Отын уж ӧвӧл яке эшъёс ваньмыз городэ кылемын… Городэ кошкемъёс чылкак мукет улонлы дышыса вутто ни: клубъёстӥ, кафеостӥ ветлыны, нош гуртын сыӵезэ кытысь шедьтод? Одӥг кылын вераса, отын мӧзмыт… Мон одӥг эшея тодӥсько: кылем арын дышетсконзэ быдтӥз но гуртэ бертӥз, интыяськиз вӧй поттон заводэ. Но гуртын улыны уг чида ни, мӧзмыт, шуэ, эшъёс ӧвӧл. Кызьы егитъёсты гуртэ кыскыны – паймисько. Коть переселениея реформа ортчыты ни…

Пётр Палган:

- Гуртлэн азьлань улонэз вань. Мон малпамъя, со тужгес но ӟеч улыны кутскоз, 10-15 ар ортчыса. Нырысь ик, гуртын ужбергатонэз усьтыны луонлыкъёс кылдытоно, угось туала вакытэ гуртын производство сюбег радъяське, емыш, ю нянь поттон вылэ гинэ пыкъяське. Мед луозы гуртын пӧртэм техникаез тупатон интыос но, йырси ӵышкон юрт но, коркапуштӥрлык лэсьтон но, кортлэсь капкаос-кенеръёс дасясь кебитъёс но. Вань та вузэз гурт понна город радъя-поттэ ук.  Одно ик кулэ переработка удыс, соку эштосъёсысь сиён-юон городысь магазинэ меӵак сюрыны быгатысал.

Со сяна, гуртэз азинтыны туж но туж юрттысалзы экология инвестициос – ву чылкытатон станциосты, гумыосты пуктон. Со вие гуртын ӝутыны луоно агротуризмез но. Пусйытэк кельтоно ӧвӧл тазэ: калык культуразэс ӝутытэк, Европаын кадь ӟеч, азинлыко улонэ вуыны удмурт гуртъёслы туж секыт луоз. Кытын удмурт кыл но лулчеберет быре, отын ваньмыз куашканы кутске: калык азьтэмъяськыны, курытсэ юыны кутске, солы номыр кулэ уг луы ни, номырин уг тунсыкъяськы ни. Соин ик туж бадӟым оскон гуртысь удмурт интеллигенцилы. Али ик чакланы быгатӥськомы ни ук: кыӵе гуртъёсын уло зэмос удмуртъёс, отын хозяйствозы но йӧн-йӧн сылэ, калык но тыршыса ужа, тодон-валанзэ но будэтыны вуттэ, лулчеберетэз но вала. Ватсаны кулэ на: нылпиоссэс но оломаин но тунсыкъяськыны, ужез яратыны дышето.

Эльвира Панченко:

- Оскисько, гурт котьку но улоз. Солы улонамы котьку но инты шедёз. Егит адямиос али уггес валало гуртлы саклык висъяны, но бӧрысьгес шӧдозы солэсь кулэлыксэ но, номырин воштонтэм луэмзэ но. Эшъёсы пӧлын ичи ӧвӧл таӵеосыз но:  шумпотыса гуртъёсазы бертысалзы, но отын уж ӧвӧлэн соос татчы ик кылё. Ачим но куддыр малпаськылӥсько гуртэ выжыяськон сярысь, малы ке шуоно мон тодэмъя, егитъёслы азинскыны али отын трос луонлыкъёс усьтӥсько ни.

Анастасия Яковлева:

- Пинал калык нырысь ик гуртын уж шедьтыны уг быгаты. Уксё уг тыро, тыро ке но, туж пичи. Тодмо ук: егит калыклэн ӟеч улэмез потэ. Пиналъёс кошко, нош ачиз гурт номыр но уг кары егитъёсты кельтон понна… Азьло вакытъёсы егит калык, городын дышетскыса, берен гуртэ берытске вал, ӝутылӥзы колхоззэс, быдэс гуртэз, адямиослэсь куашкам мылкыдзэс. Тае адӟыны луоз удмурт произведениосысь . Нош али сыӵе ӧвӧл ни.

Мон та вань верам кылъёсын соглаш луисько, малы ке шуоно ачим гуртысь потэм пияш. Валасько солэсь кытчы питырамзэ. Гуртын туала калыклы туж шуг аслэсьтыз быгатонлыкъёссэ возьматыны: кулэ коммуникация, Интернет, вылӥ ӟечлыкен телевидение, дуннеын ортчись учыръёс сярысь ивор. Но тае ваньзэ дась лэсьтыса сётон егитъёслы укыргес уз луы-а меда? Оло, соослы асьсэлы басьтӥськоно гуртын пӧртэм удысъёсты ӝутон борды? Кудӟытӥсьсэ юыса, ужтэк калтыртыса, ветлыны дыр чик но ӧвӧл. Гурт – гырымтэ бусы кадь. Та улонысь аслэсьтыд интыдэ шедьтыны луонлыкъёс отын лачак. Котьку сямен ик: мылкыд гинэ медло.

Санко-Батыр.

Можга ёрос,

Быдӟымсурд гурт