Константин Орлов.

Ижкарысь диджей но клуб промоутер Константин Орлов кӧня ке ар талэсь азьло туж тодмо луиз: шоркарысьтымы электрон крезьгур сценаез азинтон но узырмытон понна нюръяськиз. Тросэз егитъёс солы тау шуыны быгатозы, угось со Петров диджейёс, Андрей Буров но мукет «аксакалъёс» выллем туала крезьгуро Ижкарлэсь туссэ лэсьтӥз. Сыӵе дыръя паймоно, адямилэсь удмурт луэмзэ тодыса. Константин анай кылыныз уг вераськы ке но, шӧдскымон тунсыкъяське удмурт дуннеен. Таин сэрен шугъяськытӥсь малпанъёссэ шараяны мылкыдыз бурдъяськиз – пумиським-вераським.

- Вань огъя тодмомы – электрон крезьгурчи Андрей Корепанов, кудӥз ке нимзэ Андрей Рублёвлы воштӥз. Тазьы ӟечгес кылӥське, пе. Тон уд-а возьдаськиськы удмурт луэмедлэсь?

- Уг, берло дыре выжыосы мыным тунсыкогес но тунсыкогес пото. Вордӥськи мон Ижын, атае Дэри ёросысь Люлиысь, анае Мунчогуртысь. Паймымон интыос! Отын котьку но пилемо… Зэмзэ вераса, удмурт дунне бордаз кыскиз берло вакытэ: 2007-тӥ арын Мускоын удмурт диаспораен пумиським – «Made in udm» ужрад вал со. Соку мон шӧдӥ но валай, макем мыным улонам уг тырмы удмуртэз! Потӥз суредаме удмуртъёслэсь чебер ӵуказе нуналзэс. Удмурт культураез но азинтыны мылкыды кылдӥз, аслым ӧтён но малпай: «Татын асьмеос кузёос!» Кин дорамы ожгар тӥрлыкен вуоз – аракы-кумышкалэсь погралоз (серекъя). Корепанов-Рублёв сярысь ке… Со ассэ ӟуч кожа ук: марлы солы, ӟуч адямилы, удмурт фамилия? Луэ куддыр сыӵе ним сураськон. Кылсярысь, анаелэн уж дураз ужаз Бриджит Вахрушева!

- Ачид кытын ужаськод? Диджей – со сюдӥсь профессия ӧвӧл, дыр.

- Мон инженер. Быдэс улонме техникаен, компьютеръёсын вырисько. Вуз карон лавкаосын машинаос тупатӥсько, али тани Ижкарын нырысетӥзэ почта автоматэз пуктӥм – сыӵе робот, кудӥз мукет городысь посылкаен келям саламдэ возёз, туж капчи но оскымон маке. Диджеинг но крезьгур – со хоббие. Тужгес но яратӥсько техно крезьгурез, берло дыре шудӥсько «солянка» – пӧртэм стильёсты огазеясько.

Кутскимы ми кемалась, 1994-тӥ арын Петров вынъёсын ӵош кариським, «Октябрь» культура юртын нырысетӥ дискотекаос ортчытъям. Со мар ке вылез вал – калык уг но тоды вал ай, мар со сыӵе! Андрей Захаровлэн компьютераз (An-2, тодмо продюсер, али улэ Питерын) нырысетӥ бутлегъёс-ремиксъёс лэсь­тылӥм. Техникаез валанэ туж юрттэ улонын но. Одӥг пол Выль аре Глазове ӧтчазы: шулдыръяськон куспазы крезьгурен шуг-секытъёс кылдӥзы, соку мон ачим езъёсты тупатӥ-паятьтӥ – праздникез ути, шуыны луоз. Олокыӵе но учыръёсты тодэ вайыны луоз. Ижкаре пӧртэм «курутой» диджейёсты вайылӥм: огаз ӝытэ Мускоысь 3 кузя вуизы, ваньзы ик винил пластинкаосын шудо. Али таӵезэ шедьты на – вуж школа! Кинэ но ӧм ӧтчалэ: dj Butch, dj Кислоид, dj Kosinus… Берпуметӥез мынэсьтым уно гинэ пластинкаме басьтžз, сьӧраз Муское нуиз.

«Ю-dance» клуб усь­тӥ­ськем бере отын но ужаса вуттӥ. Резидентъёс луыса шудылӥм. Арт-директормы курылӥз зэмос шоу лэсьтыны: соку мон уй клубе Дэриысь арганчиосты вайи. Син азяды пуктэ: дискотека, шудэ эктон крезьгур, шуак тыл кысэ, шыпыт луэ но – пото куаш-куаш удмурт арганчиос! Зол вал. Калык лӧптӥз.

- Удмурт луэмед шуак потылэ, иське?

- Удмурт луэмлэсь уд пегӟы. Эшъёсы но монэ куддыр мусояса нималлязы «вотяка». Мон ноку вожме ӧй поттылы. Тодӥсько, революцилэсь азьло сыӵе нимын крейсер но вал – «Вотяк». Революция бере нимзэ воштӥзы ни.

- Удмурт «революция» понна мар уг тырмы? Палэнысь синмын мар дэмласалыд?

- Урам нимъёсты вошъяно. Калык валаны кулэ, кытын со улэ, кинъёс пӧлын. Удмурт кыл мед адӟиськоз ульчаын, гожтэмъёсын. Мон вордӥськи совето вакытэ, соку удмурт луыны модно ӧй вал. Удмуртъёс анай кылынызы ас понназы гинэ верасько, озьы ик семьяям но кылиз.

Калык валаны кулэ, кытын со улэ, кинъёс пӧлын. Удмурт кыл мед адӟиськоз урамын, гожтэмъёсын.

Диджей сямен дэмласал удмурт трекъёс кылдытъяны: куара сэмплъёс удмурт сямен мед чузъяськозы, кырӟанын удмурт кыл мед улоз. Кӧня ке эскеронъёсы вань ини, утчало на улэп удмурт куара, туртто мар ке концептуальнойзэ-малпаськытӥсьсэ лэсьтыны.

Кӧня ке пол ветлӥ Ижысь удмурт дискотекаосы, «Пепелац» клубын шулдыръяськонэз учки. Номыр но вылез но тунсыкоез ӧвӧл кадь: калык юэ но шулдыръяське-эктэ. Мынам вань мылкыды лэсьтыны зэмос тунсыко сурет: мед пумиськозы улэп крезьгур но электрон экспериментъёс, удмуртэз но ӟучез, шудӥсез но кырӟасез, кылзоноез но учконоез. Утчасько монэн огкадь малпаськисьёсты. Соку мае ке кужмозэ, яркытсэ лэсьтыны пӧрмытысалмы. Али мон ас ымнырме удмурт дуннеын утчасько. Пумиталоз-а со монэ, уз мурта-а? Оскисько ӟечезлы.

* * *

Костя – тунсыко лулчеберет дуннеын улӥсь адями. Вераськон куспамы малпаськи, макем со матын удмурт «шулдыръяськон традицилы»? Уг-а сура удмурт дискотекаез ӟучъёсты удмуртэныз тодматžсь ужрадъёсын? Мукет ласянь, кин шуиз, удмуртъёслы удмуртэз гинэ кулэ шуыса? Мед кыкез ик дунне ог-огезлы усьтэмын луоз: оло, ӵапак солэн экспериментъёсыз юрттозы «кузё но куно» калыкъёслы матынгес луыны. Ӵыдытэк витисько Костялэсь радъям ужрадъёссэ: мед отын арганчиос но роботъёс ӵош бергалозы, нош пульт сьӧрын шудӥсь техно-диджей винилэз вошъян куспаз табанен куноятоз…

Дарали Лели.

«Концентрация» спектакльысь суред.

Ижысь Павел но Инге Зоринъёслэн «Les Partisans»  театрзылы туэ сизьым ар тырмиз.  Солы сӥзьыса, 17-тӥ тулыспалэ  соос Бельгиысь авторлэн Амели Нотомблэн «Серная кислота» романэзъя «Концентрация» спектакль шудӥзы. Сцена вылын пуктыны романлэсь постановказэ дасяз Павел Зорин.

Спектакльын шудӥсьёс – ваньзы ик ужась егитъёс но студентъёс. Быгатэмзэс возьматӥзы соос УдГУ-лэн актовой залаз. Отын омыр ик капчи, эрико, сцена вылысь егитъёс пинал, кужмо адӟиськизы.

Спектакль кутскон азьын мылкыдэз бугыртӥсь луиз. Пуштрес йырсиё пересь кышномурт вазиськиз люкаськемъёслы. Иж тымет дурысь Пастуховлэсь музей юртсэ куашкатонлы-быдтонлы пумит луыны курыса, кинюртэммес люказ со.  Кин ке нырысь малпаз но: вот вуиз татчы. Но та вакчи ужрад творческой ӝытлэн оглюкетэзлы пӧрмиз, постановкалэн огъя малпанэзлы туж матын луиз.

Спектакль возьматон азьын Инге Зорина ивортӥз: егит актёръёс нырысьсэ та спектаклез шудозы. Сюлмаськонэ уськытӥз: пӧрмытозы-а? Но юнме курдаськем. Берло валай: актёръёслэн кызьы шудэмзы  режиссёрлэн быгатонэз, люкам тодон-валанэз бордысь потэ. Учконъя тодэ но ӧз лыкты ни, таосыд сцена вылэ воксё потамтэ на шуыса. Сюлэмез вырœытӥзы, кезьыт залын но кынмыны ӧйлась - пӧсяса пуким, час но ӝыны ӵоже кыстӥськись спектакль огшокчемен ортчиз.

Сценалэн сэрегаз телевизор, со сьӧрын – «телезрительёс». Бадӟым тунсыкен учко концлагере сюремъёслэсь улэм-вылэмзэс. Ачид но пӧлазы пукиськод кадь. Передачаез учкисьёсыз золгес сюлмасько: пытсэт сьӧры шедемъёс пӧлысь кудзэ меда передача пумын быдтозы? Нош кудзэс ке виё одно ик. Асьсэос учкисьёс кесясько: кытчы учко кивалтӥсьёсмы! Та ваньмыз  зэм ӧвӧл! Но спектакльысь геройёс – передача учкисьёс, телешоуысь «зэкъёс» – шедьто кинэ янгыше уськытыны: продюсерез. Нош рос-прос малпаськоно ке, ваньмыз понна ик янгыш учкись. Со югдурез валаса но валатэк улэ, уг чакласькы, мар солы сёто телевизор, Интернет – ваньзэ ньылэ.

Сыӵе малпаськытӥсь пьеса. Со возьматэ туала калыклэсь, культурамылэсь лябзэ, буш луэмзэ.

Лариса Дмитриева.

«Культпросвет» рубрикаысь нырысетӥ нылмурт. Елена Ильина. Малы ӵапак со? Будон, ужан сюресэз ачиз валэктэ. Москваын ужась режиссёр, Сергей Мирошниченколэн «Остров» студияз продюсер, юрттӥсез. Ленатэк уж интыяз сылэ. Тросэз-а гуртысь потэм нылъёс таӵе тыршеменызы тодмо? Лена – паймымон адями. Со – тылси, куддыръя нош – тылпу: тачыр-р! карыса ик ӝуа, ваньзылы югдытэ. Лул кужымез солэн адӟем карымон. Огласянь, тае валэктыны луоз алнаш выжыосыныз, нош мукет ласянь, улон школаеныз. Уно яркыт пумиськылонъёс, адӟылымтэ шаеръёс, тунсыко проектъёс… Лена номырлэсь но уг кышка – шаплы басьтӥське выль уж борды, сузьтӥське выль инвисъёсы.

Лена шуак кылдӥз: сое нокин но ӧз тоды, ачиз котькинэн тодматскиз. Тунсыкъяськон тылӝу кенжытӥз но… кемалы ышиз. Берло тодмо луиз: секыт висиз анаез. Улон шугадӟонъёс пыр потыса, бадӟым вис бере Лена нош ик дорамы берытскиз. Мускоын улӥсь шаплы удмуртъёс борды кариськиз: сое Мускоысь удмурт инкубаторлэн тӧроеныз но ниманы луоз. Утыр «Узы-боры» кинопремьераез но радъязы, Герберез люказы, ортчытъяло пумиськонъёс, кырӟало удмурт калык гуръёс – паймыто фин-угор эшъёссэс. Интернетэз но Лена уг вунэты: ваньзэсты абдратыса, «Чичпотон» сайт понна шаян фотосессия дасям.

- Лена, тон котьмаин вырыны ваньмиськод ук. Интервью сётыны но Интернет пыр вуттӥд. Кыӵе проектэн али выриськод?

- Дасясько документальной кинолы заявка. Татчы гожтӥськод вань малпанъёстэ: мае киноын потэ адӟемед, кызьы потэ сое лэсьтэмед, кӧня дыр кулэ луоз сое дасяны, кӧня уксё, кыӵе аудитория учкоз. Проектам вераме потэ гурт калык сярысь. Соос мон понна туж аспӧртэмлыкоесь но кыдёке адӟисесь. Соос быгато мур малпанэз, быдэс философиез туж огшоры валэктыны но улонын быдэстыны.

Проектам пырозы Удмуртия, Вологда, Псков, Архангельск но Красноярск областьёс. Потэ быдэс Россиез возьматэме.

- «Островын» кӧня арзэ ужаськод ни? Тодӥськод на-а нырысетӥ нуналдэ?

- 3 арлэсь кема ужасько ни. Нырысетӥ нуналаз задание сётӥзы но, Культурая министерствое мынӥ, нырысь йыроми, собере министерствоын кагазъёсы лобӟизы, шорам черекъязы… Бӧрдыса вуи студиямы, шуи: мон «не по адресу» лыктӥ тӥ доры, мынам номыр но уз пӧрмы, угось мон дышетски режиссёрлы, нош та удысэз – продюсерство шуонэз – чик но уг тодӥськы. Но асме киям кутӥ, кык толэзь ортчыса, со министерствоын ик мынэсьтым ужкагазъёсме возьмато ни вал мукет киностудиослы: дышетске «Остров» студилэсь! Каллен-каллен уж дурам проектъёс сётъяны кутскизы, озьы ветлыны кутски командировкаостӥ, куртчыны улон шӧмез, быдэсак оскымон мурт луи но али ини данын.

Мынам должносте нимаське линейной продюсер. Кыӵе ке картинаез нуисько ке, титръёсын нимы – исполнительной продюсер. Мускоын дышетскыкум, гужем каникулъёс дыръя ял карыны ӧй дырты, нырысь практика бере ассистент луыса ужаны мынӥ «Мосфильме». Университетме йылпумъям бере кема гуртам улоно луиз. Муское берытскеме бере быръёнэ ӧй вал ни: кыӵе удыс, кытын – кыӵе ке но «пасе» донгиськоно вал. «Мосфильмысь» эшъёсы шуизы: туж ичи уксёен уж вань. Озьы сюри Мирошниченколэн бурд улаз.

Пичиен, вакчи вамышъёсын будӥ валтӥсь продюсерозь, али ини малпанъёсы вань режиссёр удысме азьланьтыны.

- Режиссёр луон – со ӵапак тыныд тупамон удыс кадь-а? Али удысэдъя уд ужаськы но…

- Кинлэн кыӵе улон сюресэз, дыр. Асьмеос тодӥськом трос учыръёсты, куке тодмо актёръёс улон гурезьтӥзы туж улэ васькыны быгато, юись, калгись луо. Нош режиссёр луон понна туж меӵ тубатэз ортчоно! Та актёръёслэн кадь удыс ӧвӧл – удалтон вылэ чӧлскыны уг луы. Режиссёр туж мур учкыны кулэ улон шоры, быдэсак валаны мудрон адямилэсь кусыпъёссэ. 25-27 арескын туж вазь ай режиссёр луыны. Улон шӧмез валан бергес вуэ. Куд-ог дыръя мынам йырам чилектэ: Инмар мыным туж трос шугадӟонъёс (испытаниос) лэзе, оло, одно ик монэ режиссёрен адӟемез потэ?

- Та шугадӟонъёс – будон вамышъёс – пичи дырысеныд ик тонэ кыдатӥзы, лэся? Палэнын дышетскыны дӥсьтон кулэ.

- Мон тазьы шуысал: удмурт Инмаре туж мыным юрттэ. Куд-ог дыръя ӵош дышетскем эшъёсы но юало: кыӵе сыӵе кылчин-утисед вань тынад?

4-тӥ классме йылпумъяса, папаеным Ижкаре, усточиослэн школа-интернатазы, мынӥ: соку со вал туж тодмо инты. Одӥг арня ортчыса, папае нош ик вуиз, но номыр сыӵезэ ӧз вера кадь. Берло ини тодӥ, со озьы монэ берен басьтыны лыктэм вылэм, но кылыз, лэся, пырымтэ вераны. Нош мамае витем: яратоно салатъёсме дасям, торт басьтэм… Папае бертыса корка пырем но, со ай оскымтэ: кытчы ке машинае оло педло кыли кожам. Куке ини 10 минут ортчем, мамаелэн пуньыез но, пе, жон куалекъя, синвуосыз но пальккасько тусьты борды. Озьы ик со ӝытэ одӥг кыл но вераллямтэ ог-огзылы яратоно мамае но папае… Тӥни озьы ортчизы интернат дыръёсы – туж мӧзмыса но йырвизь басьтыса. Собере быдтӥ крезьгуръя училищеез, мукет сюрес ӧй вал уго интернат бере, но таиз ласянь улон мыным тужгес но ӟеч палыныз берытскиз. Татын трос фольклор кырӟанъёс бичай. Научно-исследовательской институтын соку ик шараязы: мон алнаш палъёсысьтымы 13-тӥ даурысь кырӟанъёсты вайиськем. «Куинь нотаен ангемитоника» шуонлы тупась кырӟанъёс. Та бере одӥг сюрес гинэ кылиз кадь – В. Владыкин тодосчи доры этнографияя кафедрае, исторической факультетэ. Пыри туж капчи: мае тодӥсько, сое юало! Но ар куспын мон татын сценалэсь, кырӟанлэсь туж зол мӧзмыны кутски. Неолит, палеолит, Дарвинлэн наукаез – воксё адӟонтэм луизы. Та вакытэ ветлӥ «Удмуртия» ГТРК-ысь телевизионной курсъёсы. Татын мон выль удыслы синмаськи. Куке юан кылдӥз, мар сярысь диплом ужез – киноез – лэсьтоно, йырам мукет малпан ӧй вал – фольклор гинэ! Уже пӧрмиз, фин-угор фестивальёсын вормонъёс вайиз, таин валче ик пери кадь пыри Мускоысь университетэ. Киное туж паймытӥз комиссиез. Нокин соку ӧз оскы, ваньзы малпазы: ветлоз Муское, вань «чеберлыксэ» адӟоз но берытскоз али.

- Удмурт кино но театр удысэ ужаны ӧд кыльы. Со сярысь кыӵе малпанъёсыд?

- Ми интернатын ӟуч школаын дышетскимы, пӧртэм ужрадъёсын солэсь данзэ утимы. Тау шуэм чотын огпол милемлы бырйыны сётӥзы: кино яке театр. Мон вал староста, шуи: одно ик Удмурт театр! Ветлӥм кыӵе ке комедие: туж ик ӧз кельшы, малы ке шуоно мон будэмын В. Загуляева, Г. Бекманов, Г. Соловьёв актёръёсын шудэм спектакльёс вылын. Толэзь ортчыса, тодӥ ини, школаямы сёто вылэм «Титаник» киное билет – соку гинэ потэмын, билетъёс туж дуноесь… Классмылэсь сюриз, ачим но асме тышкаськи. Азьло кадь ӧй вал ни Удмурт театр. Куд-ог постановкаосты мон учкылӥ вить пол, со вал, дыр, 80-тӥ -90-тӥ аръёсы. Мынам вал лемлет малпанэ: «зарни» басьтыны – Загуляева кадь луыса, «азвесь» – Серебренникова кадь луыса (кыкназы но Валентинаос). Али уг тодӥськы, кыӵе югдур, но одно ик ветлэме потэ яратоно Удмурт театрам.

Телевидениын ужан понна журналист луыны кулэ. Али ВГТРК-лэн котькуд улосын филиалъёсыз ужало. Соос иворъёс пӧлы зӥбиськемын. Нокыӵе но авторской программа уд быгаты лэсьтыны…

Удмурт кино сярысь ке… Тани «Узы-боры» пумысен мынам одӥг малпанэ: самодеятельность, отын уг тырмы профессионализм. Со понна ик уг дыртӥськы та удысэ выжыны, та тужгес но бадӟым кыл кутон уж – кино лэсьтон.

- Кызьы удмурт кинематографиез азинтоно?

- Удмурт кинематография мед луоз шуыса, удмурт Инмармылэсь куриськоно (со уго асьмелы, удмуртъёслы, котьку юрттэ. Мон пичи дырысеным ик малпасько вал: Христослы оскисьёс черке трос ветло, ваньмызлы Христос инты но дыр уз шедьты. Нош асьме Инмармы – со лякытгес, со асьмелэн эркиясьмы). Озьыен, Инмармылэсь одӥгзэ гинэ куроно: мед луозы та удысэз валасьёс, вылӥ дышетскемен удмурт ужчиос, огкылын вераса, профессионалъёс. Кино – со, кызьы шуиз Михаил Ромм, «грубый вид искусства». Татын, жаляса верано, мукет катъёс ужало. Шуом, таӵе опыт вань, лэсьтэмын Лев Кулешовен. Актёр Черкасов – крупной план. Сое монтировать каро быдэс тусьты сиёнэн, собере гробысь кулэм адямиен но пичи чебер нылэн. Нырысетӥ кадрысь учкись адӟе сюмам синъёсты, кыкетӥысьтыз – синвуэн тырмем синъёсты, куинетӥысьтыз – шумпотэм синъёсты. Туж троссэ киноын валтэ монтаж. Соин ик киноез лэсьтӥсь тодыны кулэ: кино бордын ужан быдэсак профессионализм бордын возиське. Улонэ туж мур синъёсын но сюлэмын учкись адями гинэ сое валтыны быгатоз.

- Берен Удмурт шаере берытскысалыд-а?

- Иже бертаме бере туж мӧзмисько, бӧрдӥсько. Куддыр туж потэ кадь бертэме – интыяз ваньзэ пуктэме, но асме киям возисько: йырвизьмыд удмурт ке – одно ик-а ас шаерад ужано? Юан пуктӥсько аслым. Но соку ик валасько: борддорлэн мукет палаз но луыны луэ удмурт сюлэмо адями. Инмар ке сётэ та сюресэз – солы оскиськоно… Монэ котьку валтэ кадь со бадӟым удмурт Инмар кужым. Куке-соку пельтӥм но кыске!

Малы ке тодэ ваёнъёс одӥг: 10 арескам – Ижкарысь троллейбус-трамвай, 20 арескам – Мускоысь метро, 30 арескам… одно ик выльзэ малпасько аслым шедьтыны Нью-Йоркысь! Мон серекъясько озьы, улонам ваньмыз ини интыяз пуксиз кадь.

Дарали Лели

«Парни-электроники – молодцы!» – та веран пель сьӧрын ӵем  чузъяськем вал ини. Нош мар понна соос ӟечокъёс? Тае егитъёс умой тодо, дыр: Электроникъёс – удмурт эктон хитъёсты, уно ремиксъёсты кылдытӥсьёс. Клубын эктоно гуръёссы 40 пала люкаськемын ни! Нош кылем толэзе пияшъёс поттӥзы нырысетӥ дисксэс. Бичетын 16 кырӟан, ваньмыз со – тодмо удмурт кырӟасьёслэн выльдэм гуръёссы, соос пӧлын: Анна Плотникова, «Малпан» группа, Надежда Уткина, Валентина Пудова, Анна Прокопьева, Брангуртысь песянайёс…

- Пиос, мар тӥляд вылез? Кызьы Выль арлы дасяськиськоды?

Влад: – Али гожъяськом толалтэлы шулдыр трекъёс. «Малпан» группаез ӧтчамы, кык кырӟанзэс гожтӥмы: «Выль ар» но «Соку но вал». Мон малпамъя, удмуртъёсын макем тросгес ужаськод, сокем уногес соослэн асьсэлэн но ужамзы потэ, мылкыдзы ӝутске.

Лёша: – Милесьтым мылкыд басьто, дыр.

Влад: – Вань на выль ужмы тодмо удмурт диджеен Анатолий Эркишевен. Со гур малпаз, милемыз аранжировка гожтыны куриз. Одно ик Эркишевлэсь вуж гуръёссэ но тупатъялом ай, соос милемлы туж кельшо.

- Зэм-а со, удмурт дискотекаосты радъясь Паша Поздеев тӥледыз котькуд позыръяськонлы выль кырӟан гожтыны косэ?

Влад: – Поздеев озьы ик шуэ: выль хит ӧз ке луы, сцена вылэ уг лэзьы!  Ма, асьмеос но акыльтӥськом вужзэ шудыны.

Лёша: – Ми котькуд выль хитмес радио пыр эскериськом. «Мынам Удмуртие» пыр чузъяськись «Эктоника» уй эфир милемлы валаны луонлык сётэ: пӧрмиз-а гурмы, ӧзгес-а. Калык тросгес кылзоз-кылзоз, собере дышоз – озьы сое клубе но поттыны яра ни.

- Нош усьтэ ай секреттэс, кызьы лэсьтыны кулэ 100% эктон хит-ремикс?

Лёша: – Кырӟан гур нырысь ик ачиз шулдыр, капчи мылкыдо луыны кулэ. Валтӥсь ужпум ӧвӧл ини – выль-а со, вуж-а, туала кырӟан яке радиохорлэн фондысьтыз.

- Кылсярысь, Ольга Зориналэн «Шур бызе» кырӟанэз. Зэмзэ вераса, та пань-пань удмурт попса ук.

Лёша: - Та кырӟанэз, кызьы ке вуж гуръёс пӧлын бугыръяськыса, шедьтӥм. Алигес Глазовын мон Ольга Зоринаен ӵош тупай, верай, ремикс лэсьтӥм шуыса. Шумпотӥз кадь.

Влад: – Тужгес но яратоно кырӟасьмы Анна Плотникова, конешно. Со бордысен ваньмыз кутскиз – удмурт гуръёс борды басьтӥським. А. Плотникова «пӧраммес» кылзэ но, аслэсьтыз мылкыдзэ но шараяны уг кепыра.

Лёша: – Надежда Уткина но милемыз капчи мылкыдын пумита.

Влад: – Киямы туж трос акапеллаос, гожтэм куараос. В. Пудова, Г. Бекманов черодзэс возьмало. Бадӟым папкаын кыллё ужъёсмы, каллен лэсьтӥськом.

- Мынам тодэмея, тӥ ӟуч проектысен ужаны кутскиды, но берло дыре тросгес лэсьтӥськоды удмуртсэ. Маин та герӟаськемын? «Мынам Удмуртие» телеканалын удмурт эшъёсты трос?

Влад: – Ӟучсэ чылкак ӧм куштэ. Али вань выль проектмы Мускоысь Double djs эшъёсынымы. Соос правоос басьтӥзы «Стиляги» киноысь гуръёслы ремиксъёс дасяны.

Лёша: – Удмурт ужъёсмес Паша Поздеевлы оским. Со ачиз ик нырысетӥ вамышлы лӧпкытӥз. Нош табере палэнэ султӥз но, ужаммес эскерыса, сылэ кадь.

Влад: – Жаль, конешно, милемыз «Дунне Адями» премие номинировать ӧз каре шуыса. «Silent Woo Goore» группа интые Италиын ортчись «Liet International» ӵошатсконэ но ӧм сюре шуыса… Ми Удмуртилы нырысетӥ инты вайысалмы!

- Удмурт позыръяськонъёс сярысь огъя малпанды аръёс куспын ӧз воштӥськы-а?

Влад: – Али зарни кылъёс верало, дыр. Тани кутским ми Поздеевен споръяськыны. Со шуиз: «Попса лэсьтэ! Таиз люкетэз малы укыр чурыт?  Татын нош малы арган куара шуак потэ?» Мон ӧй чида: «Тӥледлы коть Мадонна удмурт кылын мед кырӟалоз – уз кельшы!»

Лёша: – Тыршиськом огкыл шедьтыны: кытын ке небытгес, крезьгурогес, кытын ке чурытгес, эктоно кадь люкет пыртӥськом. Нуназе эфире «Шулдыр ӝыт» выллем ремиксэз уд пукты, со пелез кесе. Дискамы но тыршимы пӧртэмзэ пыртыны: 50% x 50%.

- Дисклы дунъет сётӥсьёс вань-а ини?

Лёша: – Трос ӟечсэ верало. «Эктоника» эфирын дискмес 13 аресъем пияш утӥз. Туж, пе, кельше: Интернетын но, пе, сак учкисько, мар вылез потӥз. Витиськом тӥлесьтыд но, «Дартэз» лыдӟисьёс, малпанъёстэс!

Влад: – Глазовын концертысен одӥг кышномурт вузаськисьлэсь юаз: «Электроникъёсты вань-а?» Шумпотӥськом, милемды тодмало ини шуыса.

- Асьтэлы удмурт ним понэмды ноку уг поты вал-а?

Влад: – Ми ас ниммылы дышим ини. Нырысь висъяммы потэ на вал, но кызьы? Кылсярысь, «Сяськаос» ним поныны турттӥськом вал…

Лёша: – Со серекъяса гинэ вал.

Влад: – «Электроники» бренд – со 90-тӥ аръёсысь гуръёслы ремиксъёс кылдытэменымы герӟаськемын. Соос милемыз популярной каризы. Диджей бамын (www.promodj.ru) ньылетӥ арзэ 60-эз ӟечез пӧлын Ирина Аллегровалэн «Угонщица» кырӟанэзлы ремиксмы возиське.

- Ӟуч фанатъёсты удмурт ремиксъёсты уг-а серекъяло?

Влад: - Удмуртиын сыӵегес культура. Татарстанын ик огшоры дискотекаын бигер кырӟан пукты – нокыӵе уз кариське. Асьмелэн клубын шудӥд ке, кымесад ӟенеликен но шуккыны бы-гатозы.

- Ӟуч проектъёстэс нуыны кин юрттэ?

Влад: - Полина Губайдуллина. Со «Адам» радиоын ужа, радиоез азинтон отделэн кивалтэ. Соин «Стереотанцы» дискотекаос радъяськом. Ёросъёсы  но мукет республикаосы потаськом «В ритме 90-х» проектэн. Можга, Глазов, Сарапул, Татарстан…

- Электроникъёс – дунтэм диджейёс ӧвӧл…

Влад: – Ми – дуно диджейёс. Угось Поздеев монополия кылдытӥз. Соин ик нокытчы ум пегӟиське, ӵош ужаськом. Д. Загребин доры ӧм кошке.

Лёша: – Загребин, милемлы коньдон кулэ!

Влад: – Куарусён толэзе эшшо диск поттыны турттӥськом. Со понна авторской право басьтыны тыршиськом. «Мынам Удмуртие» телекомпаниысь куарая режиссёр Леонид Гусев юрттӥське.

- Пиос, кытысь тӥ мылкыд, бурдъяськон шедьтӥськоды? Крезьгур ошмесъёс ласянь но…

Лёша: - Позитив но дарт мылкыд нырысь ик сётэ швед но немец крезьгур. Шумпотыса Берлинэ лобасалмы, яратоно продюсеръёсынымы адӟиськысалмы.

- Егит удмурт диджейёслы мар сӥзьысалды?

Влад: – Ӵектӥськомы милям mp3 но wav школаямы гожтӥськыны! Ми монополистъёс, но кык аръёс ортчыса, выль нимъёс кылдозы ни, дыр.

Лёша: – Сокем ик умой ӧвӧл со – конкуренция уг тырмы.

Влад: – Соин ик ми малпам, кинлэн ке тунсыко трекъёсыз вань ке, милемлы мед келялозы! Егитъёсын ужалом.

Лёша: - Удмуртэз уксё понна ум лэсьтӥське. Таиз понна милемлы возьыт ӧвӧл!

Дарали Лели

Павел Зорин дышетскемезъя архитектор, йылпумъяз Ижысь техникая кун университетэз. Кивалтэ Ижысь радиозаводысь архитекторъёслэн-конструкторъёслэн бюроенызы. Мар татын сы

Мар ватонэз: Павел шоры учкыса, тӧдьы вожъяськон мылкыд кылдэ. Кызьы тазьы улыны быгатоно: ӟеч ужын кивалтӥсь но луоно, астэ творчестволы но сётоно, кунгожсьӧръёслы но матысь эш кариськоно?

- Тусыдъя удмуртлы тупаськод кадь, нош улонын берганы быгатэмедъя – уд. Кытысь, кыӵе выжыысь тон?

- Анае но, атае но удмуртъёс – Шаркан палъёсысь. Пичи дыръям ӵем вуылӥ отын улӥсь бабуше доры. Но али ке но кӧты пӧсь: удмурт кыллы монэ чик ӧз дышетэ. Кыӵе кулэ луысал со творчествоям. Ма, отын гинэ ӧвӧл – улонэз-дуннеез валаны тыршонам но. Тазьы малпаса пуконлэн мар толыкез? Гожтӥськи удмурт кылэз дышетонъя курсъёсы – ай туж шумпотыса ветлӥсько Эшъяськон юртэ.

- Туала литератураез гажасьёс тонэ тодо Глеб Павлоид нимтулын. Таизлы уг паймиськы – тросэз асьсэлы псевдоним малпало. Тунсыкъяськытэ  тани ма: произведениостэ Инге кышноеныд ӵош гожъяськод, шуиськод. Кызьы озьы? Одӥг бамзэ тон, мукетсэ Инге?

- Тросэз малпало, одӥг произведениез гожтонын кык адямилы инты уг тырмы шуыса. Отын, пе, одӥг муртлэн дуннеез гинэ луыны кулэ. Туала улонын паськыт вӧлмемын висъяськон. Шуом, кышнолэн аслаз улонэз, картлэн – аслаз. Одӥг ужез ӵош быдэсъясь кузпалъёс шоры но уноез кырыж учко: нош кытын ог-огедлэсь шутэтскон, ог-огедлэсь эрико луон? Вӧзысьтыд тугандэ, кузпалдэ творчество дуннеяд лэзён – таиз ини воксё кӧшкемыт маке, чабкисько таӵеос. Но мон малпамъя, одӥг ужез быдэстон семьяез туж юнматэ. «Les Partisans» театрамы шудӥсь егитъёслы мон весь шуисько: вае сьӧрады туганъёстэс, кузпалъёстэс – кусыпъёсты эшшо юнмалозы. Глеб Павлоид псевдониме сярысь ке верано, мыным кельше Глеб ним – со туж кужмо кадь йӧтэ, Глеб Жеглов киногерой кадь. Нош Павлоид – малпам кыл.

Произведениосамы ми Ингеен возьматӥськомы туала улонэз. Ваньзэ – мар сюлмаськытэ туала адямиез, мар борды чукало синъёс, мар пумысен висё сюлэмъёс. Котькуд тема пумысен Ингеен мур-мур кенешиськом, собере мон гожъяськон борды басьтӥськисько. Мае пӧрмытӥ, Инге эскере, тупатъя, собере мон солэсь гожтэмзэ чакласько. Озьы ик ужаськомы. Тани «Путешествие в Кыргызстан» сериысь веросъёсмес вить ар ӵоже гожтӥмы. Со уно премиосын пусъемын. «Исламский прорыв» конкурсын финалистъёс радэ потӥмы «Шахидка» веросэнымы. «Аркаим» повестьмес пусйизы «Золотое перо России» конкурсын.

Алигес Удмурт театр ялӥз пьесаослы конкурс сярысь. Ми но Ингеен отчы пыриськоно кариськимы. Ыстӥмы «Территория» нимаськись пьесамес. Сое удмурт  кылэ но ӝоген берыктомы. Кин тодэ, оло, ӵапак сое пуктозы бадӟым сцена вылын…

- Кызьы, ма пумысен кылдӥз «Les Partisans» театр? Малы одно ӟуч-француз?

- Нырысь ик вераны кулэ, «Les Partisans» кыл возьматэ эшъёс, соратникъёс шуэмез. Та театре пыриськемелы кутскон сётӥз Инге. Со дышетскиз Удмурт кун университетысь кунгожсьӧр кылъёсты дышетонъя факультетын. Ваньмон дыраз пыриськиз факультет бордын кылдытэм театре. Соос француз кылын постановкаос пуктылӥзы. Инге пыр ик мон но кыстӥськи та театр борды. Соку театрын уг тырмо вал пиос. Нылъёс, асьсэлы мыйык суредаса, пиосмурт рольёсты шудылӥзы. Тыро-пыдо режиссёрзы но ӧй вал. Али «Les Partisans» театр рос-прос луиз ини: отчы пырисько пӧртэм интыосын дышетскись, пӧртэм огазеяськонъёсын тыршись 20 пала егитъёс. Пуктӥськомы ӟуч но француз кылъёсын спектакльёс.

- Ваньзы француз кылэз тодо шат?

- Пӧлысьтызы куинез-ньылез гинэ француз кылэз дышетэмын. Кылемъёсыз спектакльын, пал кыл но поттылытэк, шудо. Тунсыко: ӵапак та артистъёсмес ик пусъё пӧртэм фестивальёсын-конкурсъёсын. Мон малпасько, сцена вылын шудыны быгатонлык Инмарен сётэмын ке, шып улыса но, самой ӟеч артист луод. «Les Partisans» театренымы арлы быдэ пыриськиськом Франциын ортчись фестивальёсы. Тани та нуналъёсы но мон Ингеен отчы кошкисько – Уньё городын пуктомы «Ипполит, или Собачья жизнь» спектакльмес. Французъёсын огкылэ вуимы ни: со отын 20 пол возьматэмын луоз. Кин тодэ, оло, Ижкарын, Удмурт театрлэн сцена вылаз но, «Ипполитмес» пуктыны пӧрмытомы. Солэн туж тунсыко сюжетэз. Пунылэн адями луэмез потэм. Малпанэз быдэсмем. Соку ик солэн йыр вылаз куашкаллям маке мында ужпумъёс, бизнес, улонын берган-утчаськон. Нош со малпаз вал, адями луиз ке, вань мылкыдзэ творчестволы сётоз, суредъёс-кылбуръёс гожъяса, пукоз шуыса.

- Маин висъяське асьмелэн но французъёслэн, шуом, сценаез валамзы-шӧдэмзы?

- Отын туж зол радъямын культурая политиказы. Котькуд городын – пичи-а, бадӟым-а со – ортчыло пӧртэм нимо-дано ужрадъёс. Отчы калык мыло-кыдо ветлэ, быдэс семьяен. Соослэн культураез шӧдонзы туж вылӥын: тодо, ку артистъёслы чабоно, нош ку шыпыт пуконо. Синйылтӥ: соослы Голливудысь ваем киноос нокыӵе кадь ик уг пото, соослы кельше арт-хаус (вылӥ чеберлыко фильм). Француз театръёсысь уд пумита одӥг интыын ужась труппаез. Артистъёс шудыны быгато пӧртэм театръёсын, пӧртэм коллективъёсын. Соос быдэс арлы план лэсьто, ар куспын кытын гинэ уг шудо. Асьмелы тупа Франциысь одӥг театр гинэ – «Комеди францесс». Солэн аслаз репертуарез, артистъёсыз.

Асьме дорын чылкак мукет югдур. Культурая ужрадъёслэн лыдзы туж ичи, ӟеч театръёс одӥг-кык. Учкисьёс но сцена вылын шудӥсь артистъёс куспын зэмос контакт ӵемысь уг кылды. Но «Les Partisans» театрмылэн аслаз аудиториез ини. Тани та нуналъёсы Ижын радъяське «Культурный альянс» проект. Пермь городэн огкыл гожтэмын культурая ужрадъёс ортчытон ласянь. Малпанэ вордскиз: Ижын кылдытоно туала сценалы сӥзем площадка. Шоркарамы ужзэс радъяло пӧртэм театр коллективъёс (мон али верасько любительской театръёс сярысь), нош ог-огзылэсь улонзэс чик уг тодо. Малпано ке, кӧня пайда басьтыны быгатысалзы соос, ог-огенызы пумиськылыса, ог-огзылэсь дышетскыса. Шуом, профессионалъёсты ӧтьыса но мастер-классъёс радъяса. Озьы пӧрмысал кыӵе ке синтез: артистэ, режиссёре дышетскемъёс но сцена вылын ас мылкыд каремзыя шудӥсьёс куспын. Тодмо режиссёр В. Мейерхольд куке-соку шуиз вал: театрлэн азьланез артистэ дышетскымтэ адямиос бордын. Соин ик, малпасько, огъя площадка туж кулэ.

- Малпан кылдэ: нимысьтыз дышетскымтэ мурт сцена вылын ӟечгес шудэ?

- Тае тазьы валэктыны луоз. Дышетскем муртлэн сознаниез форматировать каремын ни, сцена улонлы тупатэмын. Та удысъя со тодон-валан люкамын бере, тодэ, кыӵе ролез кызьы шудыны. Соин, лэся, кыӵе ке шаблон кылдэ. Нош дышетскымтэ муртлэн йырвизьыз эрико, со нокыӵе рамкаосъя тупатскыны уг тыршы, шудэ озьы, кызьы шӧдэ. Мон тодэмъя, режиссёре дышетскемын ӧвӧл Марк Захаров но Марк Розовский – нош кыӵе усто фильмъёс пуктыны пӧрмытӥзы. Тунсыко: ӵапак дилетантъёс ик театрлэн реформаторъёсыз вал.

Ижлэн театр улонэз, меӵак вераса, нафталин зыно. Уг тырмо туала улонэз возьматыны быгатӥсь режиссёръёс, сое шудыны быгатӥсь артистъёс. Тани Москваын вань «Док» театр. Сценаез вылын возьматӥсько туала улонысь суредъёс: туала кылъёсын-учыръёсын, кытӥ-отӥ шуш кылъёс пыр но. Мар карод, улонлэн сыӵе  куронэз. «Док» театрлэн учкисьёсыз – егитъёс. Шоркарамы но таӵезэ кылдытоно вал. Но мукет ласянь, мон быдэсак соглаш кариськыны уг быгатӥськы «докъёслэн» амалъёсынызы. Мон лыдъямъя, туала театр пушказ кылдытыны кулэ синтез: вашкалазэ туалаен пӧлэстон. Таӵе амалэз ик кутӥмы радиозаводамы но: милемыз дасяны куризы заводысь ветеранъёслы сӥзем фильм. Кызьы сое радъяно – азьло вакытъёсты но возьматоно, егитъёслы но тунсыко мед потоз? Малпаськыса, пӧртэм амалъёсын аспӧртэмлыко герӟет кылдытӥмы – вашкалазэ туннэен огазеяны быгатӥмы. Учкымон пӧрмиз.

- Кыӵе шӧдонэд-учконэд удмурт сцена, удмурт артистъёс пумысен?

- Ӟуч-француз театрамы пыриськем пияш, али Санкт-Петербургын режиссёрлы дышетске, вуылӥз Москвае. Юри – Щепкин нимо театрын дышетскись удмурт егитъёслэсь шудэмзэс учкыны. Солы сокем кельшем сцена вылын асьсэды воземзы, ӝутскем мылкыдын мыным жингыртэ: такем сюлмысь шудӥсьёсты, пе, ӧй адӟылы на вал…

Азьвыл малпасько вал: удмурт нылъёс но пиос укыр востэмесь. Та малпанэ воштӥськиз УдГУ-ын ортчись «Огни большого города» фестиваль бере. Со улсын мон студентъёсты дышетӥ асьсэды сцена вылын возьыны, постановкаосын шудыны. Отчы пыриськизы удмурт филология факультетысь егитъёс но. Соос мынам сюлмам соку ик лякиськизы! Соос зӥбытэсь ке но, усьтӥськыны быгатонлыксы, пуш дуннезы ласянь – котьку мыло-кыдоесь. Тунсыко: удмурт выжыысь луисько бере, ачим но пушкысьтым шедьтылӥсько дӥсьтӥсьтэм луэмме. Но та уг люкеты ук мыным усьтӥськыны, азинскыны.

- Кызьы дунъяськод удмурт егитъёслэсь туала улон сьӧры уйиськемзэс, туала сям-йылолъёсъя тупатӥськемзэс?

- Мыным туж кельше удмурт инди-рок шудӥсь Silent Woo Goore группа. Малпасько, та егитъёс шонер сюрес кузя мыно, творчествозэс туала егитъёслэн куронъёссыя радъяло. Со дыре ик мынам пушкам удмуртъёс понна кышкан мылкыд кылдэ: востэм сямзэс быдтыса, туала культураысь сямъёс сьӧры уйиськыса, уз ыштэ-а меда зэмос удмурт выжызэс? Глобализация монэ, котьма ке но, кышкатэ.   Мынам таӵе малпанэ: егитъёс мед утчаськозы, мед кылдытъялозы выльзэ-тунсыкозэ, но ноку медаз ыштэ удмурт аспӧртэмлыксэс.

ЛОЛИТА ИФ.