Ваня Белослудцев.

Ижын ортчем «Дарт» дискотекае лыктэм адямиосты аслаз кырӟанъёсыныз паймытӥз егит бард – Ваня Белослудцев. Тросэз синмаськизы солэн жингырес куараезлы, чебер кырӟанъёсызлэн шулдыр крезьгурзылы. Кез ёросысь Александрово гуртысь 17 аресъем пияш яркыт кизилиен ӝуатскиз удмурт эстрадаын.

Ваня Удмурт кун университетысь удмурт филология факультетын дышетске. Пичи дырысен ик со кыл, литература, история борды кыстӥськиз, математикаез ӧз яраты. Маин али тунсыкъяське егит усточи? Мар малпа туала удмурт крезьгур сярысь? Кемалась-а эшъяське гитараен?

- 2008-тӥ арын «Орлёнок» лагерьын шутэтски. Отын трос егитъёс гитараен шудо но кырӟало вал, соослы вожъяськи, – веранзэ мытэ Ваня Белослудцев. – Соин ик гуртам бертэме бере атайме косӥ гитараен шудыны дышетыны. Со мыным валтӥсь аккордъёсты возьматӥз. Ны­рысьсэ сцена вылэ потӥ ас гурт клубам ик, пӧртэм ужрадъёсы пыриськылӥ. Умойгес шудыны кутскеме бере ӵужапае, Анна Ворончихина, ӵектӥз: ойдо, пе, мынам кылбуръёсылы крезьгур го­жтом. Со ик луиз нырысетӥ вамыш. Собере малпаськи: оло, аслым кылбур гожтыса утчано? Озьы гуръёсылы кылъёс кылдӥзы, нырысь ӟуч кылын, нош УдГУ-э дышетскыны пыреме бере удмурт сямен но гожъяны кутски.

Усточи верамъя, кылбур гожтыны крезьгурлэсь секытгес, пе, йӧтэ. Ванялы туж кельшо кунгож сьӧрысь пӧ­р­тэм рок-группаос, кыл­сярысь, Linkin park, Switchfoot, Everlast, Mew, Stone So­ur. Котькыӵе егит муртлэн сямен ик, В. Белослудцевлэн кырӟанъёсыз яратон сярысь.

- Мон – романтик. Сое валалоды, кырӟанъёсме кы­л­­­зӥськиды ке. Отын куректонэз но шумпотонэз, тодэ ваёнъёсысь но али улонысь мылкыдъёс вань. Инбам сьӧры мон уг лобӟиськы, ваньмыз басьтэмын зэмос учыръёсысь. Туннэ нуналлы куать кырӟанэ ини. Но со кутсконэз гинэ ай. Тросгес егитъёс милемды мед кылзӥськозы шуыса, котькуд кырӟанмес аспӧртэмлыко карыны турттом. Озьыен, мукет калыкъёслы возьматом, удмуртъёс пӧлын но туж тунсыко, быгатӥсь адямиос вань шуыса. Али удмурт эстрадаын тросэз бадӟымъёслы тупась кырӟанъёсы быдэсто, соос огвыллемесь. Соин ик ми удмурт лулчеберетэз узырмытыны но вылӥегес ӝутыны тыршом. Вань на мынам эшшо одӥг бадӟым малпанэ: кырӟанъёсме студиын гожтэм потэ.

Мария Векшина.

Настя Петрова.

Аслам синйылтэмея кык-куинь ар куспын Настя чутрак воштӥськиз: удмурт кылын пумен чебергес но вольытгес вераськыны ӧдъяз, мыло-кыдо басьтӥськиз студентлэсь шутэтскон улонзэ напчытыны но факультетлэсь данзэ утьы-ны. Настяез Италмас удмурт модель нимын но тодо. Со Полина Кубиста но Вужер дизайнеръёслэсь дӥсьсэс по-

диум вылын возьматъя Ирина Зангарик эшеныз ӵош, «Нео-

фолк» студиен Эстоние вуы-

лӥз. Нылъёсты мода гинэ ӧз эшъяськыты: ӵош шудӥзы «Узы-боры» киноын. Татын Настя воксё тунсыко ролен гочатӥз: шудӥз бигер пияш-лэсь шузи музизэ.

Россиысь дышетонъя но наукая министрен Андрей Фурсенкоен дӥсьтыса верась-кемез бере кӧня ке шара юан сётытэк ӧй чида.

- Малы удмурт кылосбур факультетэ пырид?

- Уг алда: озьы пӧрмиз, улон вуттӥз. Но малпаськытэк ӧй мыны, угось анаелэн эшез дэмлаз, кылъёсты дышетыны но кунгож сьӧры потаны луонлыкед кылдоз, пе. Таиз зэм вылэм!

- Факультетын шӧдӥське аслаз «спецификаез». Татын «шыпыт» филологъёс дышетско, «чуртнаськисьёсты» уг ярато…

- Бен, мон шӧдӥсько со муртанэз. Мыным кулэ ӧвӧл кыӵе ке чеберъяськон, верало шонерзэ. Мукет азьветлӥсь мылкыдо егитъёслы сямен ик, мыным дышетскыны сокем капчи ӧвӧл. Пӧртэм ужрадъёсы пыриськиськом бере, параосты келляно луэ. Сыӵе ик одногруппнике Вова Вахрушев – пал кукы. Ӵошен уяськом: кылемъёсыз ӵош дышетскисьёс милемлы куддыр дорысь ужез но уг верало… Кӧтӝожмес ум возьматӥське, но мон трослы шумпотысал, мыным ваньзэ ымнырам верасалзы ке! Тодӥсько, тыбыр сьӧрам трос гинэ супыльто. Зэм, ачиз дышетскон мон понна валтӥсь интыын ӧвӧл. Соин ик трослы капчигес кусып возьыны 1-тӥ курсэн, соос ваньмызлы усьтэмын, шараесь.

- Шӧдӥськод-а будэмдэ, тыро-пыдо луэмдэ?

- Воштӥськонъёс ортчо. Тросэз мыным шуо: тонэ мукет кожасько вал. Малпало, кыӵе ке «цаца», вылтӥяськись. Малпасько, монэ удмурт дунне будэтӥз. Ужпум пуктӥ: возьматоно, удмуртъёс классноесь, тунсыкоесь шуыса. Яке мукет сямен: синмаськымон (озьы шуом ни-а, мар-а) егит шаплы нылмурт – со удмурт! Удмурт луэме – со мынам изюминкае. Огдышем малпанъя вань удмуртъёс ӧвӧл «лапегесь, вожъяськисесь но кепырасесь»… Нош Фурсенколы валэктэме потӥз: асьме калыкмы уг быры, со улон понна нюръяське!

Вераськиз Дарали Лели

Сайлентвугуръёс Италиын.

«Silent Woo Goore» – валтӥсь удмурт группа, кызьы пусйизы уноез СМИ-ос – кыкетӥ интые потӥз Европаысь пичи калыкъёслэн «Евровидение» ӵошатсконазы. Со ортчиз Италиысь Удине городын. Улӥын сётӥськомы сайлентвугуръёслэсь итальян палъёсы вуылэмзы сярысь мадемъёссэс.

…Удине каре шедён понна нырысь ик Венецие вуоно вал. Кык час ӵоже самолётэн лобыса, аэропортын милемыз пумитаз тушо воргорон. Тусыз – Егор Летов но Джон Леннон куспын. Англи кылын туж ӝог вераськыны ӧдъяз: сайлентвугуръёс пӧлысь гитаристлы но – англи кылэз кӧня ке но тодӥсьлы – эсьмаса, сое валаны туж секыт йӧтӥз. Валамы одӥгзэ: со тодэ асьмелэсь «Граждан оборона» но «Аквариум» группаосмес. Эх, дас минут ӵоже ми сое та кылъёсты шонер вераны дышетӥмы. Озьы-а, тазьы-а но, вольытлэсь вольыт автобанэтӥ ми ширтӥмы Удине каре. Сюрес кузя тодӥмы на: отын улӥсез 90 сюрс…

Городэ вуыса, ма соку ик син азямы йӧтӥз? Отель котыре люкаськемын бомжъёс. Но соос сокем яркыт но чылкыт дӥсяськемын – амалтэк туспуктэме шуккем потӥз! Кӧтъёсмы сюмало: авиарейс ӝегамен, ӝытазезэ сиськытэк кылимы. Но таиз – чыры-пырыос. Валтӥсез, эшъёс, ми Италиын!

Одӥг нунал – кык учыр

Нырысетӥез. Нуназе бере куинь час котырын ортчиз бадӟым саундчек – крезьгуро арбериослэсь куаразэс пуктон. Тодэ вайытон вылысь: ӵошатсконэ пыриськыны ӧтемын вал Европаысь 12 коллектив. Шуг-секытъёс кылдӥзы тани ма бордын: котькуд группалэн вал сьӧраз ваем аслаз техрайдерез (кырӟанъёсмес быдэстыны кулэ луись инструментъёс). Одӥгез группа сцена вылын шудыны вуттэ гинэ, ужрадэз нуисьёс калыкен вераськон куспын мукетызлы коллективлы дасяськоно ни – 2-3 минут ӵоже. Та дыр куспын вуттоно вал инструментъёсты лэзьыны-радъяны, соослэсь куаразэс ог-огзылы тупатыны. Ӟечен пусъеммы потэ конкурсэз радъясьёсты – уже кыскиллям зэмос профессионалъёсты: техникъёсты, куарая режиссёръёсты. Соос котькуд группалы, пал кыл но вератэк, юрттӥськизы. Такем бадӟым ужез ми палэнысен гинэ ӧвӧл, пуш ласянь но дунъяны быгатӥмы. Тау соослы, угось куаралэсь чузъяськемзэ радъятэк, уг пӧрмо ӟеч концертъёс.

Репетициос, куара пуктон, огыр-бугыр бызьылонъёс шокчыны маза ӧз сётэ ке но, Удине каретӥ поръялскыны вуттӥмы ик. Со туж пичи город вылэм. Но отын но вань, мае учкыны. Котькулы син азямы луоз городлэн вашкала вакытысь утиськыса кылем шорсюлмыз, сюбег урамъёс, уйлы пытсаськись укноосын лапег коркаос, соослэн нырысетӥ этажъёсазы интыяськем дуно бутикъёс.

Удинеын отельын дыр но аспӧртэм ортчиз кадь. Кыӵе ке дезориентация кадь луиз: кӧлэмысь сайкаськод – уй кадь на, но изем уг поты ни. Укноосты усьтӥськод – шунды сиос синъёсты суто. Вӧсь…

Кыкетӥез. Со нуналэ ик ӝыт милемыз концерт сётыны куризы Чивидале-дель-Фриули карын. Со Удине городлэсь 20 иськемлы палэнын интыяськемын, Италилэн одӥгез административной шорсюлмыз луэ. Жаляса верано, Чивидале-дель-Фриули городэн мургес тодматскыны милемлы ӧз кылды.

Концерт сётӥмы «Ристори» театрын. Ми сяна, шудӥзы-веразы Норвегиысь Rollfa, Швейцариысь Rezia Ladina но Италиысь BK Evolution группаос. Тунсыко потӥз Rollfa группалэн шудэмез. Соос быдэстӥзы ска но регги стилен кырӟанъёссэс. Эсьмаса, милям но, партерын пукисьёслэн, эктэммы потыны кутскиз. Бӧрысь тодӥмы ни: Rollfa-ослэн кырӟанъёссы саам кылын вылӥллям. Малпамы: респект тӥледлы, фин-угоръёс.

Сюлэм тэтчыны дась

Шугъяськонмы йылыны ӧдъяз генпрогонын – конкурс азьын валтӥсь репетициын. Курон пуктӥзы: шудоно вань сюлмысь но зэмос концертын кадь – жюрилэн, пе, котькуд команда сярысь малпанэз мед кылдоз.

Судейство сярысь вератэк кельтыны уг луы. Куара сётон понна котькуд командаысь быдэн одӥг адямиен быръемын вал – соос ик пыриськозы  коллективъёслы дунъет сётонэ. Валамон, асьсэ группазы понна куара сётыны соос ӧз быгатэ. Удмуртъёслэсь куара сётонэ ӧтемын вал шаерамы тодмо луэм “Авиатор” клублэн кивалтӥсез Антон Янцен. Но пӧртэм мугъёсъя со милемын ӵош Италие лобӟыны ӧз быгаты. Ӵошатсконэз радъясьёс асьсэ адямизэс ӵектӥзы. Зэмзэ вераса, ми ӧм ик тодэ, кин со. Шуизы, кышномурт.

Репетиция бере кӧня ке шутэтскыса, дыртӥмы Удине городысь валтӥсь объектэ -  «Teatro Giovanni da Udine» театре. Ӵапак отын тани-тани ӧсъёссэ вӧлъяны кулэ «Евровидение» ӵошатскон. Театрлэн юртэз паймытӥз. Группаысьтымы бас-гитарист Анатоль Галиханов – архитекторлы дышетскем пияш – юртэз улӥысеныз йылозяз учкыса, ӟуч кылын вазиз:  «Модернизм новой волны с реверансом к деконструктивизму». Театр паймытӥз милемды ӟеч акустикаеныз, вӧл-вӧл залэныз.

Сцена вылэ потон черодын «Silent Woo Goore» группа берпуметӥезлэсь азьвылгес тупаз. Тани вуиз Икс час. Сюлэм гадьысь тэтчыны дась. Тани милесьтым потонмес ялӥзы. Азьлань!

Ми кыдамы!

Сцена вылын шудэммес-кырӟаммес пӧлысьтымы нокин но уг тоды ни кадь: ваньмыз кытчы ке ышиз-тӧлӟиз… Но шудӥмы вань сюлмысь, кӧтмы тырымон-веськамон. Синйылтӥмы: кырӟан вискамы залын калык но лачак люкаськем, эсьмаса, туйнаськемын. Сцена вылысь берпуметӥез команда кошкем бере жюрие пырисьёс ог ӝыны часлы нимаз кариськизы. Омырын лӧсъяськиз возьман мылкыд.  Асьмеды кытчы карыны валатэк, дыртӥмы Noid группаысь эшъёсмы доры – Россиысь та ӵошатсконэ вуэмъёс пӧлын кыкетӥез коллектив, кырӟало вепс кылын, Карелилэсь данзэ утё. Соосын рос-прос кенешыны ик ӧм вуэ, милемыз ӧтизы йылпумъянъёс лэсьтыны.

Интернет пыр куара сётонын ми укмысэтӥ инты басьтӥмы. Кызьы валэктӥзы бӧрысь, ӵошатсконлэн сайтэз глючить карыны кутскем, жюрилэн ёзчиосыз куара сётонэз валаса ик вуттӥлямтэ. Озьы-а, тазьы-а но, огъя йылпумъянъёс лэсьтыны кулэ вал судьяослэн коллегизы. Жюрие пырисьёс огез бӧрсьы мукетыз сцена вылэ потаны кутскизы но кин понна куара сётэмзэс шараязы. Та ваньмыз возьматӥськиз бадӟым экран пыр. 6 points (очко), 8 points, 10 points, 12 points – ялӥз жюри, соос бӧрсьы – ужрадэз нуисьёс. Зэмос  бадӟым «Евровидение» сюрид, кожалод.

Куараослэн лыдзыя ми нырысь-валысь нырысетӥ интыын мынӥмы. Но жюриысь берлоосыз адямиос сцена вылэ потэм бере суред воштӥськиз: одӥгез милемлы дунъет сётонлэсь палэнтэмын вал (угось жюрие удмуртъёслэсь быръемын), нош кыкетӥез дунъясь милемлы одӥг очко но ӧз пукты. Озьы вормисе потӥз мукетыз группа. Куспамы – кык куара. Но ми таизлы но туж шумпотэмын вал ини! Тыршеммылэн емышез ушъямонлэсь но ушъямон! Озьы ке но сюлэммес кӧня ке бичатӥз нырысетӥ интылэн ныр ултӥмы син куспын лобемез. Но сыӵе мылкыдмы, зэмзэ вераса, ӝог тӧлӟиз. Кыкетӥ инты! Европаысь группаос пӧлын! Кин малпаз вал! Группамы понна та номырин воштонтэм бадӟым вамыш. Ми кужмо луимы, кыдамы, будӥмы!

«Liet International 2011» ӵошатсконлэн йылпумъянъёсыз:

1. Janna Eijer, 83 куара

2. Silent Woo Goоre, 81 куара

3. Coffeeshock Company, 80 куара

4. Macanta, 77 куара

5. Siroka, 70 куара

6. Aoife Scott, 63 куара

7. Rezia Ladina, 55 куара

8. Skama La Rede, 52 куара

9. Noid, 40 куара

10. Cuntra Lum, 35 куара

11. Rolffa, 32 куара

12. Priska, 28 куара

P.S. Со сяна, «Silent Woo Goore» яратоно группамес ӟечкыласькомы на «Дунне Адями» ӵошатсконын вормисе потэменыз! Йылпумъяськиз со та нуналъёсы. «SWG»-ос тужгес но трос куара люказы. Зэмзэ но, удмурт культурамес азинтонын-ӝутонын соослэн тыршемзы номырин ӵошатонтэм. Вормонъёс тӥледлы! 

Дасяз Антонио

Возьдаськись нылаш.

Макс Неизвестных – тодмотэм, но кибашлы. Вордскемын Нижнекамскын, улэ Cанкт-Петербургын, нокытын но уг ужа, нош Инмарен сётэм быгатонлыкез аслэсьтыз бадӟым – со чеберез адӟыны быгатэ. Макс – туспуктӥсь. «Кумышка но Клаудия» огинмылэн (группамылэн) эшез.

Иже Макс вуылэмын куинь пол. Нырысьсэ – 2009-тӥ арын, «Творческая дача» арт-группа доры куное. Собере  – гужем, Ижкарлы синмаськыса. Кылем арняе – куинетӥ ползэ. Оло, малэсь ке мӧзмиз та шыпыт сӥзьыл карын? Чебер фотоос лэсьтон понна вуылӥз ке шат? Иж сярысь маде Макс Неизвестных.

- Иже нырысьсэ вуылыкум нырысетӥ синйылтэме – вунонтэм, – маде Макс. – Трос тунсыкоез: «ТВДачаысь» суредаськисьёс, Железный Макс скульптор, Энвиль Касимовлэн арт-форумъёсыз… Та муртъёс «ас пуртыязы пӧзё». Мыным кельше, татын ваньмыз огшоры лэсьтӥське шуыса, нокыӵе пафостэк – «русское бедное» искусстволэн огэсэпез. Шуом, Мускоын но Питерын ик лулчеберет удысъёс лоск но чеберлык пӧлы выемын.

Мон пессимист. Иж выллем карын кема улыны ӧй быгатысал. Город укыр пичи, соин ик тусовкаос туж ӝог акыльто. Соос татын тупатонъёсты кулэ каро. Кыӵе ке кафеысь сервисысен кутскыса – искусствоозь. Шӧдӥське, уг тырмо вошъяськон амалъёс, эрик. Ванез пӧлысь но аслыд тупасьсэ шедьтыны секыт. Маргиналъёслы татын капчи ӧвӧл. Бадӟым городъёс, Муско но Питер, оригинальностез кулэ каро, сое дунъяло. Ижын калыклэсь пӧртэм луон кулэ ӧвӧл. «БВИ»-ын но («Бар весёлых историй» клуб, Ижысь уй улонлэн огез йыгмыт пусэз – авт.) ӧвӧл нокыӵе яркыт аспӧртэмлыкез. Та интыын ваньмыз дась модельёсъя лэсьтэмын. Солэн ӧвӧл аслаз тусыз но, пуштросыз но.

Ижысь ульчаын.

Пичи городысь бадӟымаз кошкемед потэ ке, юан кылдэ: мае тон улонад воштыны дась. Мынам вань сыӵе тодмоосы, кудъёсыз, мегаполисэ вуыса, огдышем манеръя уло: пичи карысьтызы тодмоосынызы пумиськыло, номыр выльзэ уг усьто, уг утчасько. «Выльвыл гырисьёс», малпасько, ностальгие выйыса, ас дуннеязы улыны кулэ ӧвӧл. Азьлань мыноно. Азьвыл эшъёсыныд эшъяськемед потэ ке, эшъяськы. Но аслэсьтыд соку шара юаны кулэ: иське, малы тон улон интыдэ воштӥд?

Питере выжи, 17 аресме тырмытыса. Амбициосы трос вал угось, нош Нижнекамск со мылкыдъёсме нокызьы но бурдъяны ӧз пӧрмыты. Отын мукет адямиос, мукет кулэяськонъёс. Отчы кыльысал ке, туннэ мон туспуктон ужен ӧй вырысал, малпасько.  Профессионализм сярысь но, чеберлыклэсь шӧмзэ валан ласянь но ӧй сюрысалзы валэктӥсьёс-дышетӥсьёс, кудъёсыныз луэ вераськыны, ог-огедлэсь дышетскыны, техника но эстетика тубатъёсъя ӝутскыны.

Макслэсь айфонэ лэсьтэм фотооссэ, лыдӟисьёслы возьматытэк, ӧй чида. Паймисько: телефон пыр но со сыӵе выжыкыл дуннеез суреданы быгатэ. Оло, ми но, Ижын улыса, укыр дышимы ни кар тусмылы. Сое куддыр мурт синмын но дунъяно.

 Дарали Лели.