Ваньмызлэсь азьло та уж борды басьтӥськизы «Ӝуё-Можга» хозяйствоын тыршисьёс. Арысь аре соос «кыкетӥ нянь» будэтонлы бадӟым саклык висъяло, удалтонлыкезъя но котькинлы адӟем карымон луо – гектарысьтыз 300 центнер картошка басьто. Соос «Grimme» техникаен ужало: муэз небӟыто, сылал ватсало. Хозяйствоын котьку сюлмасько ӟеч выжы кидыс уськытон сярысь, туэ но выль сорт муэ согизы.

Картошка мерттонзэс 100 гектар вылын азинто Мичурин нимо эштосын, «Удмуртия» но «Восход» хозяйствоос – 60 но 50 гектар вылын. Азинске трос но одӥг аръем турын кизён, нош «Колос» хозяйствоын 49 гектар вылэ кукуруза кизизы ини.

Валентина Богатырёва.

Пичи Пурга ёросысь «Восход» эштосын бусы ужъёс дыраз мыно.

Гурт удысъя но сиён-юонъя министерстволэн ивортэмезъя, та дырлы 61 процентэз юос киземын.

Кизёнзэс йылпумъязы ни Вавож, Алнаш но Можга ёросъёс. Бере кылё Яр ёрос – чакламезлэсь 5 процентэз киземын, Красногорск ёрос – 7 процентэз, Глаз ёрос – 12 процентэз. Турын шаплы кизё алнашъёс, можгаос но пичи пургаос. Та ёросъёсын турын 4 сюрс гектарлэсь ятыр киземын ини. 864 гектар картош мерттэмын. Со пӧлысь 646 гектарез – Вавож ёросын. Мытэмын ни «кыкетӥ нянез» мерттон Дэри, Пичи Пурга но Можга ёросъёсын. Огъя бусы ужъёс радъясько кылем арын сяменгес ик.

Бусы ужъёс йылпумъясько ни Пичи Пурга ёросын но. Татын киземын 47 сюрс гектар муос, та пӧлысь 23 сюрс гектарез – юос, 24 сюрс гектарез – пудо сиёнлы мынӥсь культураос, 125 гектарез – бакча сиёнъёс, 140 гектарез – картош. Бусы ужъёсты ӝог ортчытыны юрттӥз на кын улэ кизён но. Сӥзьыл та уж быдэстэмын вал 6 сюрс 624 гектар вылын.

Меӵак кизён амалэн туэ умой ужазы «Норьинское», УАССР-лы 10 ар нимо, «Малопургинский» хозяйствоосын. Муэз дасяны планъя чакламын вал 6 нунал ӵоже, нош кизёнэз йылпумъяны – 8-10 нунал ӵоже. План быдэстэмын. Бусыосын ужазы 75 агрегатъёс. Нырысь ик ужъёс мытэмын вал «Первый Май» но «Восход» СПК-осын.

«Восходысь» механизатор Виктор Кузьмин шуэ:

- Валаса ик ӧй вутты, кызьы ортчизы та кысык нуналъёс. Кидыс дыраз вутто, бусыын ик нуназе но ӝыт сюдылӥзы, тӥяськонъёс ӧз луылэ. Кулэ дыръя зорылӥз, кулэ дыръя пӧсь улӥз. Тани таиз берпуметӥез бусымы. Отчы кизёмы йыды. Эшъёсы-юрттӥсьёсы – Павел Алексеев, Михаил Ильин, Геннадий Романов. Тысь ворттэ Владимир Захаров, солы юрттэ Павел Семёнов.

Иван Аркашев.

С. Фёдоров.

Пичи Пурга ёросысь вань эштосъёс кылем арняе тулыс бусы ужъёс борды басьтӥськизы. Мытэм удыссы син азьын кужмоя, огдыре уно пумо ужъёсты быдэсъяло. Огъёсыз сӥзьыл кизем юосты но трос аръем турынъёсты усыяло-небӟыто но будосъёсты удобрениен пазяло, мукетъёсыз валэс юос кизё.

Бусы ужъёс сярысь маде ёросысь гурт удысъя управлениен кивалтӥсьлэсь ужзэ быдэсъясь Семён Фёдоров.

- Семён Никонорович, 37-тӥ тулысэз бусыын пумитаськоды ни. Таиз маин ке висъяське-а, уг-а?

- Куазь туэ нянь будэтӥсьёслэн куремзыя кадь возиське: бадӟым тудву ӧй вал, лымы шунам бере музъемысь мускытэз тӧлӟыса ӧз вуы, туж дыраз зоръёс усизы, табере механизаторъёсмы котькуд минутэз-часэз лыдъяса, тыршо ни. Соослэн йыразы котьку берга одӥг малпан – тулыс нунал арез сюдэ. Сое чакласа ик, туэ ӟырдыт бусы ужъёслы гурт хозяйствоос котькулэсь но ӟеч дасяськизы. Тракторъёс, сеялкаос но музон прицепной машинаос рос-прос тупатъямын. Сое тужгес но яркыт возьматӥз техникаез учконъя ёрос комиссия. Отын мыло-кыдо ужазы гостехнадзорысь инспектор Иван Николаев, гурт удысъя управлениысь агроном Юрий Орлов, инженер Олег Боталов, шуккиськон учыръёслэсь утиськонъя специалист Пётр Бармин но мукетъёсыз. Озьы комиссия тулыс бусы ужъёслы тужгес но ӟеч дасяськемзэс пусйиз Киров нимо СПК-лэсь, «Первый май» но «Молния» огазеяськонъёслэсь. Та хозяйствоослы премиос сётомы. Мукетъёсыз но эштосъёс техниказэс урод ӧз дасялэ.

Табере со али кысык ужъёсын умой адӟиське ни. Одӥг хозяйстволэн но бере кылемез уг поты, таза, ӟеч кидысэз быг-быг небыт дасям муэ, минерал сылалъёсын сураса, сого. Хозяйствоос туэ 195 тонна юоссэс ӟеч кидысэн воштӥзы, таза йыды, сезьы но кӧжы шедьтӥзы. Сотэк удалтэм ю-нянь уд будэты, тырмыт но ӟеч пудо сиён уд дася. Сое умой валало эштос кивалтӥсьёс но специалистъёс. Соин ик тулыслы 300 сюрс тонна минерал сылалъёс басьтӥм, но со али вуэ. Коньдонэз тыремын ни. Та ласянь югдурмы капчи ӧвӧл. Валля арын кӧс гужемлэн бервылъёсыз али но шӧдӥсько ай, куд-ог хозяйствоослэн вань тыронъёссы берыктымтэ на. Но милемды тужгес зол сюлэмшугъяськытэ «Норьинское» ООО. Татын одӥг гектар но музы кын улэ гырымтэ, кизёнэн шуг-секытъёс кылдозы. Сое ӟеч вала кивалтӥсьлэсь ужзэ быдэсъясь Виктор Ушаков. Ёросысь хозяйствоос ласянь солы одно ик юрттэт кулэ луоз.

- Нош сӥзьыл кизем юосты кызьы толйизы?

- Урод ӧз. Ми ӟег но тол чабей будэтӥськом. Ваньмыз пӧлысь 660 гектарез быремын, яке 10 процентэз. Со трос ӧвӧл, куд-ог аръёсы кык-куинь поллы уногес быро. Быдэн 180-200 гектар юоссы быремын «Рассвет», «Байситово» эштосъёсын но «Первый май» огазеяськонын. Со уз но люкеты, уз но ӝегаты огъя бусы ужъёсты нуыны.

Соин ӵош ик тау карем потэ Удмуртиысь Правительстволы гурт удыслы дунтэмгес эстӥськонэн юрттэмез понна. Со иназ луиз. Эштосъёс сое басьтӥзы одӥг литр йӧллэн дуныныз. Туж умой со. Но татын дэмлам потэ, али юрттэт толэзьлы быдэ вуэ, нош сое одӥг толэзь ӵоже сётысалзы ке, эшшо умой луысал.

- Семён Никонорович, азьланезлы кыӵе ӟеч малпанъёсты вань?

- Нырысь ик, муэн ужанэз умоятоно. Берло дыре минерал сылалъёс туж дуноесь луизы. Куд-огез эштосъёс соосты тырмыт басьтыны уг быгато, уксёзы ӧвӧл. Соин ик туэ ми чакласьком быдэс ёросъя фермаосысь кыедэз поттонъя нимаз отряд кылдытыны. Совето аръёсы «Сельхозхимия» озьы ужаз вал. Со выллем, шуом. Пудо гидъёс котырысь аналтэм кыедэз ваньзэ бусыосы поттом. Та ужлы одӥг хозяйство но пумит уз луы, малы ке шуоно та ӟеч ужрадлэн кичӧлтӥсез луэ ёрос йыр Александр Ерохин. Ми кыкнамы пичи пурга музъем вылын вордскемын но будэмын бере, районэз азинтон но азьмынӥсьёс радэ поттон вылысь ваньзэ лэсьтом. Озьы ми, арлы быдэ ӟеч урожай басьтыса, пудо вордонэз но уката юнматом. Туннэ ведь 70-80 процент доход сётэ йӧл поттон. Нош та удысэз кужмоятыны но паськытатыны луонлыкъёсмы вань. Миым дасям пудо сиёнмы но туэлы кыле на.

Пусъеме потэ: бусыосамы али шулдыр ужгур чузъяське. Куд-огез эштосъёс сутка ӵоже 150-200 гектар ю кизё. Ваньзэ сое 2 мурт быдэсъя, нош азьло 10 мурт ужаз. Куазь тазьы ик умой улӥз ке, ёрос 9-тӥ маёзь кизёнзэ йылпумъялоз.

Геннадий Романов.

Механизатор О. Шумилов.

Республикаын бусы ужъёс мытэмын ни 20 ёросын.

Котькуд аре сямен ик нырысьёсыз пӧлын бусые потӥзы Вавож ёросысь хозяйствоос. Та дырлы ёросын усыямын 1 сюрс 524 гектар тол вылэ гырем бусыос но 497 гектар трос аръем турынъёс, 200 гектар турын будосъёс сылало ватсэтъёсын пазямын, 378 гектар юос киземын.

Трос аръем турынъёс вылэ удобрение пазяло Балезино, Дэри, Кияса, Пичи Пурга, Сарапул, Шаркан ёросъёсын. 2 сюрс гектарлэсь ятыр бусыоссэс кизьыны дасязы Алнаш но Сарапул ёросъёсын. Кизёнзэс мытӥзы на Ува ёросын – 35 гектар но Алнаш ёросын – 20 гектар. Вань ёросъёсын азьланьтӥське кидыс дасян.

Пичи Пурга ёросысь «Первый май» гурт предприятиын кын улэ киземын вал 1 сюрс 420 гектар ӟег. Нош али кизёно 1 сюрс 180 гектар вазь вуись юос, 800 гектар кукуруза, 751 гектар одӥг аръем турынъёс но усыяно 1 сюрс 570 гектар трос аръем турынъёсты. Со сяна, мерттоно 40 гектар кубиста. Теплицаын со чебер удаз ни. Хозяйствоысь специалистъёс валэктэмъя, бусы ужъёс татын куинетӥ нуналзэ мыно ни. Кылсярысь, трос аръем турынъёсты сылало ватсэтъёсын пазяло. Нош механизатор Олег Шумилов ю кизьыны бусы дася.

- Туэ музъем ӝог куасьме, – шуэ 1979-тӥ арысен тракторен ужась Олег Серафимович. – Соин ик шаплы ужано, мускыт медаз тӧлӟы. Тани та бусымы 100 гектарлэсь ятыр. Мон толон гинэ татчы выжи, быдэстӥсько ни усыянме. Милям котькудӥз механизатор котькыӵе ужез быдэстыны быгатэ. Соин ик кизёнэз 10 нунал ӵоже йылпумъяно бере, ми планэз быдэстом.

Иван Аркашев.

В. Блинов.

Сьӧлта ёросысь «Звезда» эштос пуксемын райцентрлэсь 20 иськеме. Хозяйствоез туж валаса но быгатыса нуэ ёросысь тодмо адями, усто но визьмо кивалтӥсь Владимир Николаевич Блинов. Узиос, нокыӵе шуг-секытъёс шоры учкытэк, музъемен герӟаськем ужъёссэс умоято но арысь аре тросгес сӥль-вӧй потто. Со ик юрттэ улон-вылонзэс умоятыны, выль ӟеч техника басьтыны.

Али узиос рос-прос дасясько тулыс бусы ужъёслы. Эштосын югдур сярысь маде Владимир Блинов.

- Владимир Николаевич, дыр ӝог ортче, уд но шӧдылэ, бусые потоно луоз. Кызьы солы дасяськиськоды? Мар лэсьтымтэ на?

- Ма, урод ӧй шуысал. Лудъёсмы сӥзьыл гырыса кельтэмын. Тулыс соосты культиваторъёсын небӟытом гинэ. Со юрттоз кизёнэз дыраз ортчытыны. Кылем сӥзьыл ик кукуруза но мукет культураос улэ кыед поттӥм. Соин ӵош ик 140 тонна минерал сылалъёс дасямын, со пӧлысь 40 тоннаез – сложной удобрение, ӝоген 5 тонна мочевина басьтом на.

Эштосмы ёросын шоро-куспоез лыдъяське. Гыроно-кизёно муосмы 3 сюрс гектарлэсь ӧжыт гинэ трос. Тулыс 1 сюрс 700 гектар тысё но пуртэсо юос кизём, нош етӥнмы туэ 230 гектар луоз. Кылем арын солэсь 200 тонналэсь трос треста люкам но 439 сюрс манет пайда басьтӥм. Ялан умоятӥськом музъем ужанэз. Миым, валля арен ӵошатыса, 1 сюрс 414 тонналы трос ю тысь кутсам, гектарлы быдэ вераса, ортчем арын шорлыдын 19,4 центнер люкам, нош 2010-тӥ арын 14 центнер вал. Ӟегмы но 19 центнер шедиз. Туэ но малпанъёсмы бадӟымесь, куазь умой луиз ке, удалтэм ю-нянь будэтом, тырмыт но ӟеч пудо сиён дасялом. Нош ортчемзэ пусъёно ке, 4-5 ар талэсь азьло котькуд гектарысь 11-12 гинэ центнер ю тысь басьтылӥм. Берло дыре син азьын ӝутске музъем ужан культура.

Зоотехник Е. Суслова.

- Нош кызьы мынэ гырон-кизён техникаез дасян?

- Туэ тулыслы котькулэсь ӟеч дасяськиськом. Эштосамы 5-тӥ апреле ортчоз техникамес учкон. Дорамы лыктозы быдэс ёросысь хозяйствоосысь инженеръёс но гурт управлениысь специалистъёс. Кизёнлы дасяськеммес умоен лыдъялозы шуыса, оскиськом. Тулыс нунал быдэс арез сюдэ. Механизаторъёсмы сое туж ӟеч валало. Кысык бусы ужъёс кутско ке, соос вазь ӵукнаысен, атасъёсын ӵош султыса, бер ӝытозь лудысь уг потало. Озьы тыршо ваньмыз трактористъёс но водительёс. Нош вань эшъёссылы адӟем карымон луо механизаторъёс Леонид Иванович Кабанов, Анатолий Михайлович Ямщиков, Николай Сергеевич Столбов, Дмитрий Николаевич Суднев но трос мукетъёсыз. Техникамес тупатъянын али синмаськымон тыршо токарь Василий Викторович Репин но егит сварщик Леонид Суднев.

Мастерскойын тулыслы дасяськонэз умой радъяз Сергей Анатольевич Королёв. Азьло со шофёр но, экскаваторщик но луыса ужаз. Калыкен огкыл ӝог шедьтэ, оскем ужзэ уго ӟеч тодэ, кулэ дыръяз ачиз но эшъёсызлы техниказэс выльдыны юрттэ. Оглом вераса, али сеялкаосмы, дискаторъёсмы, усыосмы но мукет тӥрлыкмы бусые поттыны дасесь ни. Ӝоген тракторъёсмес тупатъяса быдтом.

Прораб П. Дубовцева, экономист Е. Щербакова.

- Владимир Николаевич, тодэммы потэ на пудо вордонды сярысь но.

- Та удысэз азинтон сярысь милемлы трос сюлмаськоно луоз ай. Туэ гинэ быдтӥм лейкозэн висись скалъёсмес, сьӧд-тӧдьы выжы пудомес голштин ошъёсын тазамытӥськом. Сюро тазаез али 1 сюрс 135 йыр, со пӧлысь скалъёс – 357. 2008-тӥ арен ӵошатыса, скалъёслэсь лыдзэс 24 йырлы будэтӥм. Со урод ӧвӧл. Узи фермаын али ветылъёсты возьыны выль гид ӝутӥськом. Отын соос думылытэк улозы.

Берло дыре бадӟым саклык висъяськом тросгес йӧл но сӥль поттонлы. Берло куинь ар ӵоже арлы быдэ 1 сюрс 500 тонна йӧл кыскиськом, котькуд скаллэсь шорлыдын 4 сюрс 400 килограмм потэ. Ваньзэ сямен йӧлмес вылӥ но нырысетӥ сортэн вузаськом. Озьы ке но йӧл вузан ваньзэ-ӧвӧлзэ 117 сюрс манет гинэ табыш сётӥз. Мугез тодмо. Йӧллэн асдуныз вылӥын на, миым одӥг килограммез 12 манет 47 коньы усиз. Нош переработчикъёс йӧлмес ялан дунтэмгес басьтыны выро. Миым тани одӥг килограммзэ 12 манет но 71 коньыен вузам, 2008-тӥын – 10,15-ен, 2009-тӥын – 12,18-ен, нош 2010-тӥын – 11,68 манетэн. Тӥни сыӵе югдур. Пӧртэм ӧвӧл сӥль вузанъя но. Миым улэп секталаен одӥг килограммзэ 66 манет палаен вузам. Нош асдуныз 87 манет усиз. Тӥни соин ик кылем арын сӥль поттон 323 сюрс манет изъян вайиз. Музон хозяйствоын сярысь, пудомы но урод уг буды кадь, 145 тонна сӥль поттӥськом. Нуналаз 570 грамм привес басьтӥськом. Соин ик азьланьын продуктивностез будэтоно. Азямы сыӵе ужпум сылэ.

Эштосмес бадӟым уд шуы. Берло дыре ужасьёслэн лыдзы огкадь, 120-130 мурт, возиське, уждунзы ялан йылэ. Тани 2008-тӥ арын котькудӥз ужась толэзяз 3 сюрс 285 манет ке басьтӥз, 2009-тӥын – 5 сюрс, 2010-тӥын – 5 сюрс 575, нош кылем арын – 6 сюрс 608 манет луиз. Со трос ӧвӧл. Но гурт калыклы эшшо мукет трос юрттэт сётӥськом на, уката ик – корка пуктӥсьёслы.

Оглом вераса, кызьы калык ужа, озьы ик улэ-вылэ. Сыӵе мылкыдын пумитаськом тулысэз но.

Геннадий Романов.

Сьӧлта ёросысь «Звезда» эштосысь С. Королёв, Л. Кабанов тулыслы дасясько.

Сьӧлта ёросын «Звезда» эштос – одӥгез устоез. Тулыс бусы ужъёслы татын ваньмызлы адӟем карымон дасясько.

5-тӥ апреле ёросысь ваньмыз инженеръёс доразы техниказэс учкыны лыктозы. Хозяйство солы дась ни.

Техника дасянэз быгатыса радъяз мастерскойлэн кивалтӥсез Сергей Королёв. Солы юрттӥськизы механизаторъёс. Пӧлысьтызы тужгес быгатӥсез но ушъямонэз – Леонид Иванович Кабанов. Огъя ужамез 47 ар ни. Али пенсиын ке но, трактор-машиналэсь люкиськемез уг поты. Тыршемез адӟытэк кельтымтэ, Леонид Ивановичлы сётэмын «За заслуги перед Отечеством» орденлэн IV степенё медалез но трос данъян грамотаос.

Геннадий Романов.

Республикаысь гурт предприятиос кутско ни октыны «кыкетӥ нянез». СПК-осты, фермеръёсты но ас музъем бордазы ужасьёсты лыдэ басьтыса, шаерамы туэ 36 сюрс гектар картошка мерттэмын. Со пӧлысь 4,5 сюрс гектарез – фермер-крестьян хозяйствоослэн, 4,4 сюрсэз – СПК-ослэн но эштосъёслэн.

Гурт удысъя но сиён-юонъя министерствоысь специалистъёслэн чакламзыя туэ «кыкетӥ нянь» 150 центнерлэсь ичи луыны кулэ ӧвӧл.

Удалтӥз картошкаез Дэри ёросысь фермерлэн Василий Чернышевлэн но.

- Миымлэсь кык поллы тросгес потэ, – шуэ Василий Васильевич. – Бусыме мерттӥ-будэтӥ, жуг-жаглэсь утялтӥ аслам малпам агрегатэным. Сое трактор борды юнматыса, октӥсько тани.

Василий Чернышев трактореныз чуретӥ ортчыку, бӧрсяз мугыль-мугыль картошка кыле. Туэ со зэм ик трос но, удалтэмын но. Сюлмаськон кылиз на кытчы интыяны но тол вылтӥ утён пумысен.

Иван Аркашев.

Туспуктӥз Константин Семёнов.

Балезино ёросысь «Кеп» хозяйствоысь валтӥсь агроном Галина Корепанова.

Балезино ёростӥ котыръяськыса-котыръяськыса бызе пичигес Кеп шур. Котырысьтыз гурт эштосъёслэн лудъёсазы али вазь ӵукнаысен бер ӝытозь шулдыр ужгур чузъяське. Тапалан кемалась гинэ таӵе ӟеч урожай ӧз будэтъялэ ни. Туэ куазь удалтӥз: тулыс но валэс юосты дыраз кизьыны сётӥз, собере зоръёс но умой усизы, вань  ужъёс планъя мынӥзы. Табере нянь будэтӥсьёслэн тыршемзы зарни ю тысен берытске.

Сюресмы вуттӥз «Кеп« егит хозяйствое. Сое 2005-тӥ арын кылдытӥз Сергей Рудольфович Поздеев. Азьло татын «Рассвет» СПК вал. Со бырыны ӧдъяз. Выль гурт кузё огазеяськонэз пыд йылаз пуктэ ни. Солэн сюлмаськеменыз, арысь аре выль техникаен узырмо, чеберско фермаоссы но будэ сӥль-йӧл поттонзы. Хозяйствоез пичи уд шуы. Гыроно-кизёно муоссы 3 сюрс гектар пала. Музъемъёсыз Балезинолэн мыд-мыд палаз интыяськемын. Кылсярысь, Маркогурт (Эркешево) бригадазы кабзэ мукет палан.

Комбайнёръёс В. Волков, М. Корепанов.

Нуназе котыр пумиським Миктапи (Нововолково) отделениысь агрономен Галина Корепановаен. Усто специалист, Асанысь совхоз-техникумез быдтэмез бере 30 арлэсь кема ю-нянь будэтэ. Огдыре ужаса, Ижысь гурт удысъя институтын ватсаса тодон-валан люказ на. Дас ар экономист вал. Татын ик пумитам отделенилэсь кивалтӥсьсэ Сергей Булдаковез. Кӧня ке вераськеммы бере Галина Валерьевна ӵектӥз ю бусые потаны.

Вуим вӧл-вӧл паськыт чабей бусые. Лудэтӥ, зарезьтӥ выллем, поръяло кужмо «Вектор-410» комбайнъёс. Одӥгез ньылетӥ арзэ ужа ни, кыкетӥез – туэ нырысьсэ. Владимир Волков, Михаил Корепанов комбайнёръёслэн машиназэс дугдытэмзы уг поты, куспазы вожмаськыса котыръясько. Син азямы бункерзы тырме зарни тысен. Водительёс Александр Жуйков но эшъёсыз комбайнъёсты одӥг минутлы но уг ӝегато, юзэс шумприч вортто. Нош механизаторъёс Борис Корепанов но Алексей Ефремов пумен куроез рулонэ керттыло но сюрес дуре люкало. Отысь, пе, фермае нуллыны лякыт луоз.

Ростовысь инженеръёс усто комбайн потто. Кабинаын кондиционер ужа, тузон уг пыры, моторлэн гуретэмез уг кылӥськы. Механизаторъёслы выль техника туж яра.

- Чабейды чебер. Кыӵе сорт? – юаськом агрономлэсь.

Кунян сюдћсь Л. Князева.

- Кидысъёсмес арлы быдэ вошъяськом-выльдӥськом, – маде Галина Валерьевна. – 168 гектар «Раушан» йыдымес октӥм ни, гектарысьтыз 18 центнер потӥз, нош та чабеймы – «Свеча» – выль сорт, туэ нырысьсэ кизим но, удалтӥз, гектарысьтыз ичизэ 25-26 центнер люкаськыны кулэ. Нянь пыжыны усто пызь луоз. 80 гектар «Аргамак» сезьы киземын. Ӝоген утялтом ни, таиз но удалтэмын. Со сяна, 400 гектар кӧжыен суро сезьымы вань на. Со одӥг аръем турынлы мыноз.

Нуназе пал ми потӥмы Андрейшур фермае. Татын бадӟым лэсьтӥськон мынэ. Огдыре 2 гид пукто, огаз 150 скал пыртозы, мукетыз кунян ваён отделение луоз. Нош артэ гидын али 200 скал интыямын. Пудооссэс нуназеозь возь вылын сюдо, собере – гидын. Ӵапак та вие 20 тоннаем МАЗ-эн вож сиён вуттӥз Лев Васильев. Нуналлы быдэ, пе, кык пол таӵе машинаен вож сиён ваёно.

Водитель А. Жуйков, механизатор Б. Корепанов.

Вераськон вискамы нуназеямысь ури-бери вуиз фермалэн кивалтӥсез Людмила Корепанова. Со но татын 30 ар ужа ни: кунян, парсь сюдӥз, скал кыскиз, кладовщик но, бригадир но вал. Чырткем кышномурт секыт ужлэсь уг палэнскы. Со понна Людмила Георгиевнаез гуртоосыз гажало но кылзӥсько. Дояркаосыз сярысь шуныт кылъёс гинэ вера. Кылсярысь, Эльвира Щепина 25 ар скал кыске но ваньмызлы адӟем карымон луэ. Скалъёсты возьма но нуназе бере сюдэ Николай Адамов. Али скалъёссэс нуналаз кык пол кыско, йӧлзы шорлыдын 13 килограмм пала люкаське. Ваньмыз сямен вылӥ сортэн кошке, «Глазов-молоко» огазеяськонэ вузало. Фермаязы куинь ар талэсь азьло молокопровод но 3 тоннаем йӧл сӥятон холодильник пуктӥзы.

- Кунян сюдӥсьёсмы пӧлысь синмаськымон тырше Людмила Князева, – ушъяса вера фермаен кивалтӥсь. – Вож кунянъёсты со нуныосты кадь утялтэ, озьы соос син азьын чеберско но ӝог будо.

Огазеяськонлэн директореныз пумиськыны милемлы ӧз кылды. Но ужасьёс огымысь кадь шуо, «Кеп» кылдэм бере, пе, улонмы ялан умоя, толэзьлы быдэ шорлыдын 6-7 сюрс манет уждун вуэ. Кылем толэз но кепъёс умой потӥзы: турынзы но, силоссы но асьсэлэн тырмиз, пудо уллёзэс но йылэтӥзы. Нош туэ азьланезлы уката ӟеч инъет лэсьтэмын ни. Со миктапиослэн, андрейшуръёслэн но маркогуртъёслэн вис карытэк тол но, гужем но лулысь-сюлмысь тыршемзылэн емышез.

Геннадий Романов.

Туспуктӥз Владимир Беломорских.

Балезиноысь кидыс эскеронъя станциысь егит комбайнёр Денис Наговицын.

Балезино ёросын одӥгез азинскисез но юнмасез луэ «Балезиноысь сортоиспытательной станция» ОАО. Сое куинетӥ арзэ йыг-йыг пыд йылаз возе ни егит но визьмо кивалтӥсь Николай Волков. Дядьпиос (удмуртъёс Люк гуртэз озьы шуо) берло дыре син азьын умоято музъем ужанэз но пудо вордонэз. Вань удысъёссы быгатӥсь, усто специалистъёслы оскемын. Тыршемзы син азьын. Али со тужгес но яркыт адӟиське. Лудъёсын шулдыр ужгур чузъяське вазь ӵукнаысен бер ӝытозь. Зарни ю тысен тырмо кеносъёс.

Кылем арня вискын милемлы шуд усиз огазеяськонэ вуылыны, нянь будэтӥсьёсын тодматскыны, специалистъёсын бусыосы потаны но директорен кенешыны. Николай Евгеньевич бер ӝыт гинэ вуиз Кезысь агроснабысь. Инженереныз воштос ёзъёс учкыны ветлӥллям. Озьы ке но ваньзэ пыр-поч валэктыны вуиз.

Н. Волков 2004-тӥ арын, огдыре ужаса, йылпумъяз Россиысь аграрной университетэз, инженер-механик луиз. Балезиноысь кидыс эскеронъя станциен куинетӥ арзэ кивалтэ. Ужезлы дырзэ но, кужымзэ но уг жаля, калыкез ӟеч тодэ, огкыл ӝог шедьтэ. Етӥз сямыныз нунал ӵоже кытчы но уг вуы! Ваньзэ аслаз синмыныз адӟемез потэ. Калыклэсь улон-вылонзэ умоятон сярысь вис карытэк сюлмаське.

- Николай Евгеньевич, вакчияк вералэ хозяйстводылэсь кылдэмзэ.

-  Азьло татын «Мир» колхоз но Карсовайысь сортоучастоклэн ёзэз вал. Соос интые вордскиз «Балезиноысь сортоиспытательной станция» ОАО – усьтэм амалэн ужась акционер огазеяськон. Хозяйствомес пичи уд шуы, гыроно-кизёно муосмы  сюрс гектарлэсь ятыр. Отын будэтӥськом тысё но пуртэсо юос, трос но одӥг аръем турынъёс.

- Али тӥляд тужгес пӧсь ужан вакытты. Огдыре уно кысык ужъёсты быдэсъяно. Юосты утялтэмен ӵош вуоно урожай сярысь малпаськоно ни. Кызьы та ужъёсты мыно?

- Гурт калыклы али зэмен но огдыре уно кысык ужъёсты быдэсъяно луэ. Бырымтэ на пудо сиён дасян. Арамен ӵош ӟег кизёно, кын улэ гыроно, фермаосты толлы тупатъяно но музон. Ваньмыз та ужъёсмы урод уг мыно: аранлы ӟеч дасяським, техникамы тырме. Гырон-кизён машинаосмес арлы быдэ выльдӥськом. Туэ басьтӥм Италиын бичам пресс-подборщик. Кыкетӥзэ «Вектор-410» выль комбайнмес сётӥм егит механизаторлы.

Туэ куазь милемлы, музъем ужасьёслы, юн юрттэ. Озьы вань механизаторъёслэн но специалистъёслэн тулыс мылысь-кыдысь тыршеменызы, юосмы удалтэмын. Миым сярысь, кык пол трос ю тысь люкаське, яке котькуд гектарысь шорлыдын 20 центнер ёрос усе. Кеносъёсы жильк-жильк зарни тысь люкаське. Чебер вал кӧжымы, гектарлы быдэ 27 центнер шедиз, нош Сазангуртын йыдымы 23-26 центнер потэ. ӟегмы 500 гектар вал. Со пӧлысь 220 гектарзэ силосэ тырим – вож сиёнлы.

Туэ 400 гектар ӟегмы луоз. Ӝыныезлэсь ятырез, аммиак селитраен сураса, муэ согемын ни. Кидысмы вужез тырмоз. Быг-быг небыт музъем дасязы Т-150 тракторен Евгений Наговицын но Николай Дмитриев. Соос азьло силос дасянын ужазы, али кын улэ гыро. Туэ 1500 гектар ёрос зябьмы луоз.

Лыдъясь-чотасьёс Т. Наговицына, А. Лекомцева но И. Дементьева.

Музъем ужанэз туж валаса нуэ удмурт кышномурт, валтӥсь агроном Наталья Наговицына. Оскем ужзэ юн яратэ, туэ 16-тӥ тулысэз лудын пумитаз ни. Нимысьтыз саклык висъя ӟеч, таза сорт кидыс уськытонлы. Али «Неван» йыды будэтӥськом, сезьы – «Гунтер», чабей – «Иргина» но «Свеча»,  кӧжы – «Аксайский усатый». Туэ клевер кидысмы тимофеевкаен суро 60 гектар кельтэмын. Сое льносемстанциын шертӥськом. Нош ӟегмес, тол вика ватсаса, кизём на. Со вазь тулыс подкормка луоз.

Нимысьтыз пусъеме потэ зернотокысь ӟеч кидыс дасясез но кибашлы воргоронэз Анатолий Назаровез. Туж востэм сямо пиосмурт хозяйстволы арлы быдэ таза кидыс вуттэ. Вылаз ик, туэ выль сортировка басьтӥм. Со юэз шертэ но, куасьтэ но. Собере зарни тысь складэ вуэ. Татын вань ужъёсты быгатыса радъяз кладовщик Ольга Горбушина.

Водитель Н. Наговицын.

Музъем ужын но, пудо вордонын но азьмынӥсьёсмес вераса уд быдты. Тани Владимир Евгеньевич Наговицын КамАЗ-эн ужа, али бусыысь ю тысь ворттэ, нош Денис пиез ӵыжак-выль комбайнэн юосты октэ. Армие ветлэмезлэсь азьло но со комбайнэн ужаз. Одӥг «Вектормы» вал ни, но Денислы шуыса эшшо одӥгзэ басьтӥм на. Озьы лудъёсмес шулдырто кужмо комбайнъёс. Таӵе ӟеч техника потто Ростов городын. Кабинаяз пуктэмын кондиционер, пушказ нокыӵе тузон уг пыры, куара-ланга уг кылӥськы. «Палессеослэсь» номырин уг висъяськы. Собере, выль техникаен ужаны егитъёс но гуртэ кылё.

Техникамес азьланьын но ялан выльдом. Сотэк музъем ужанэ выль амалъёсты кутыны уд быгаты. Туала ӟеч машинаосын ыштонъёс но кулэсмо, ужазинлык но ӝутске.

Кидыс дасясь Н. Горбушин.

- Нош пудо сиёнъя кыӵе югдурды, кезьыт толлы дась ни-а?

- Дась ни, шуыны луоз. Жалем сиёнмы – силос но сенаж – 11 сюрс тонна тыремын ни. Кылем арен ӵошатыса, 2 поллы трос дасямын. Миым угось кӧня ке силос но, палэнысь вайыса, сюдӥм. Туэ сое лыдэ басьтӥм, кызьы верай ни, куазь но юрттӥз. Турынмы 800 тонна люкаськиз. Со узгес окмы, но татысь фермермы вуж «Енисей» понна турын ӵектэ. Соин ик воштӥськом, дыр.

Пудо уллёмес арлы быдэ будэтӥськом. Али котькуд скаллэсь нуналаз 15 килограммлэсь уно йӧл кыскиськом, гужем со лыдпусэз 20-ёзь вуттылӥм. Та секыт удысэз быгатыса нуэ валтӥсь зоотехник Надежда Фёдорова. Нош техникаез ӟеч ужатон сярысь трос сюлмаське Евгений Нелюбин.

Оглом вераса, котырам матысь юрттӥсьёсы – специалистъёс – зол бергало, оскем удысъёссэс валаса нуо. Озьы ик мылысь-кыдысь тыршо валтӥсь бухгалтер Анна Лекомцева, кассир-бухгалтер Татьяна Наговицына, шудтэм учыръёслэсь утиськонъя инженер Ирина Дементьева, кадръёсъя инспектор Татьяна Ардашева но уно мукетъёсыз.

Тӥни озьы огазеяськон огъя кужымен юнма-кужмоя, калыклэн улон-вылонэз пумен умоя. Али хозяйствоын 186 мурт ужа. Валля арын котькудӥз 3 сюрс 600 манет ёрос уждун басьтӥз ке, туэ 2 поллы тросгес тыриськом. Валамон, азьланьын эшшо будоз на. Сыӵе оскон сёто чебер юосмы но тырмыт пудо сиёнмы.

Геннадий Романов.

Туспуктӥз Владимир Беломорских.

 

Кылем арын уно турын будосъёс но ю-нянь шунды шорын сутскемен, республикаын чутрак воштэмын пудо сиёнлы мынӥсь культураосты будэтон. Тросгес киземын вал толйись юос, одӥг аръем турынъёс, тари, рапс, судан  но кукуруза.

Али тодмо ни: сюрес шонер быръемын. Азьвыл аръёсын ӵошатыса, та дырлы тросгес дасямын чурыт но жалем сиёнъёс. Пудоез ӟеч толйытон понна утялтоно луоз на кукурузаез, тариез, рапсэз но трос аръем турынъёсты. Гектарысьтыз ӧжытсэ 250 центнер турнаса, дасяно 750 сюрс тонна силос. Озьы котькуд йыр пудолы ватсаськоз на шорлыдын 4 центнер сиён. Котькуд йыр пудолы та дырлы республикая дасямын шорлыдын 17,3 центнер жалем  сиён. Грак, Эгра, Каракулино, Шаркан ёросъёсын со люкамын ни 22 центнерлэсь ятыр, Вотка ёросын – 12,9, Дэриын – 14, Камбаркаын – 12,2, Сьӧлтаын – 13,2, Юкаменскын – 14,5, Яр ёросын – 12,7 центнер.

Нимаз хозяйствоос пӧлын тужгес но трос толлы сиён дасямын ни Эгра ёросысь «Прогресс» эштосын – таза сюро йырлы быдэ 40 центнер, Глаз ёросысь «Чура» эштосын – 32 центнер, Можга ёросысь «Красный Октябрь» СПК-ын – 29 центнер. Республикая кӧс турын ӝоктэмын 215 сюрс тонна, яке чаклам планлэсь 84 процентэз. Чурыт сиёнэн планзэс быдэстӥзы Вавож, Грак, Кизнер, Красногорск, Сарапул, Сюмси но Шаркан ёросъёс.

Гуосы сенаж тыремын 468 сюрс тонна. Со планлэсь 93 процентэз луэ. Силос дасямын 1 сюрс 189 тонна. Та жалем сиёнэз тырмыт дасязы Эгра но Дэри ёросъёсысь хозяйствоос.

ӟеч будэмын туэ юос. Тужгес но выль технологиосты чакласа ужам хозяйствоосын но сылало ватсэтъёс пазям бусыосын.

Музъем ужасьлэн али тужгес но кысык дырыз вуиз. Пудо сиён дасянэн ӵош кутскиз юослы аран-кутсан, етӥнэз утялтон, тол юослы чаклам муосты гырон. Со понна кулэ трос кизер эстӥськон. Сое висъян республикаын быдэсъяське.

Бусыосын жуг-жаг турынъёс вӧлмемен, туэ секытгес луоз кидыслы ю тысь кисьтыны. Со понна ужзэс золгес радъяно луозы ю шертон комплексъёс.

Шаермыя туэ 452 сюрс гектарысь ю культураосты утялтоно. Комбайнлы быдэ шорлыдын 370 гектар усе, нош Кияса но Сарапул ёросъёсын – 600 гектарлэсь но ятыр. Специалистъёс чакламъя берло аръёсы одӥг нунал ӵоже тужгес но трос кутсамын юос 15 сюрс гектар вылысь, яке вань киземез пӧлысь 3 процентэз. Но Гурт удысъя но сиён-юонъя министерство та ужез ӝоггес радъяны куре. Та дырлы юос утялтэмын 17 сюрс гектар площадьысь. Со 4 процентэз. Котькуд гектарысь шорлыдын люкаське 19 центнер.

21 процентэз арамын-кутсамын юоссы Можга ёросысь «Россия» эштосын, 20 процентэз – Вотка ёросысь «Пихтовка» чорыг хозяйствоын, 30 процентэз – Сьӧлта ёросысь «Звезда» СПК-ын. Вотка ёросысь «Июльское» хозяйствоын котькуд гектарысь кутсало 34,2 центнер, Грак ёросысь «Родина» СПК-ын – 29,2 центнер.

Иван Аркашев.

Туспуктӥз Владимир Беломорских.