Кин беромиз ӝыны арлы яке быдэс арлы гожтӥськыны, куре почтальондэс вуоно толэзьысен подписка лэсьтыны (индексэз 54400) Шуом, апрельысен басьтон понна тӥ 15-тӥ мартозь гожтӥськыса вуттыны кулэ. Газетлэн толэзьлы дуныз (12 номер понна) 50 манет 52 копейка. Али подписка лэсьтыны луэ, «Удмурт дуннеез» июль толэзёзь басьтон вылысь, кыкетӥ паларе но люкиськонтэм вылысь, июне сое азинтоно луоз.

Почтальон пумитъяське тӥледыз газетлы гожтыны яке номеръёсты беромыса вуттэ, жингыртэ редакцие.

Телефонъёсмы: 73-33-42, 73-33-44, 8-951-195 37 65

Почтаен кивалтӥсь Валентина Широбокова но почтальон Августа Корепанова.

Шаркан ёросысь Пороз муниципал кылдытэтэ 400 пала хозяйство пыре, огазея со кӧня ке гуртэз: Пороз, Кечгурт, Сильво, Липовка, Луговая, Ивановка, Собино, Собино починка, Пасека починка, Мочище починка. Порозын 204 корка ке, мукетъёсыз гуртъёс пичиесь, куд-огаз кӧня ке юрт гинэ кылемын. Пӧлазы вань ӟучъёсыз. Пороз, Липовка, Луговая, Кечгурт, Сильво пыро Пороз почта ёзэ, нош кылемъёсыз – Мишкиное.

Порозъёс анай кылынызы лыдӟиськыны кепыралогес на, шӧдске. Табыдӟа гуртын (пыро на Луговая но Липовка удмурт гуртъёс) «Удмурт дуннелы» туэ 26 мурт гинэ гожтӥськемын. Ӧжыт! Нош мукет ласянь гуртоосты ушъяны но кулэ – кылем арын газетмы 15 корка гинэ йыгаське вал. Пусйымон соиз, лыдӟыны мылкыд каро куинь пол потӥсь номерез. «Ӟечбур!» газетлы гожтӥськон но йылӥз, удмурт кылъя урокын сое ужазы кутыло. Газетъёсты нуллэ но гожтӥськонэз радъя Валентина Корепанова.

Нош Кечгуртын но Сильвоын «Удмурт дуннеез» та дырлы басьтэ 9 мурт, кылем арын 14 гожтӥськись вылэм. Почтальонын ужась Екатерина кенэзлы юрттӥськись Августа Корепанова шуэ, тросэз, пе, пятницае потӥсь номерез лыдӟыны мылкыд каро.

Почтальонъёс верамъя, лыдӟисьёслэн лыдзы усе арлыдоослэн улонысь кошкеменызы но. Куд-огез кылъёсты валамтэез вылэ чӧлске. Ёросын улӥсьёслэн ас кылзылэсь палэнскыны кутскемзы бордысь но, пе, таӵе югдур кылдэмын. Шаркан администрацие, магазинэ яке мукет кыӵе ке учреждение пыр ай, тып-тып удмуртъёс шорад ӟуч сямен вазёзы. Ма, кыдёке мынонэз ик ӧвӧл, асьмелэн Пороз гуртысьтымы нылпи садын ик, пе, покчиосын ӟучен верасько. Школае мыныса, пиналъёс курадӟо ини анай кылзэс дышетыны.

Валамон, ас кылдэ, культурадэ, калыктэ гажан кӧкыысен, анай йӧлын кутске. Тае валасьёс Порозын бырымтэ на, покчиосынызы доразы ас кылынызы ик верасько. Пусйымон, школаын дышетскисьёс газетэнымы ялэм конкурсъёсы но пырисько, «Дарт» газетын но татысь потэм егитъёслэн нимъёссы ӵемысь адскыло. Ветеранъёслэн «Акшан вакыт» огазеяськонысьтызы азьветлӥсьёс но газетысь асьсэлы кулэзэ синйылто. Мартэ ортчытыны чаклало «Чибориё кышет» ужрад.

Муниципал кылдытэтлэн улон-вылонэз туж ӟеч адӟиське асьсэ кужымен поттэм «Вести» газетазы. Сое дасян бордын ужа гурт администрациысь секретарь Елена Вахрушева. Мар ортче «Восход» гурт хозяйствоын, школаын, нылпи садын, ветеран огазеяськонын, ваньмыз асьсэ сярысь гуртооссылы иворто, туспуктэмъёссы но вань. Газет потэ кык бамен, буёло, 50 экземплярен, дасяське ӟуч кылын. Гурт кенешысь депутатъёслэсь ужзэс возьматыны нимаз приложение потто на.

Оскиськом, матысь дыре «Удмурт дунне» но порозъёс пӧлын тросгес вӧлмоз, газетмы кепыратэк кожоз тросгес юртъёсы.

Лия Малых.

Туспуктӥз Владимир Беломорских.

Почтальон И. Серебренников гожтэ «Удмурт дуннелы».

Дэбес черкогуртлэсь 4 иськеме интыяськемын Лесагурт. Милемыз – «Удмурт дуннеысь» корреспондентъёсты – гуртысь библиотекарь Екатерина Павловна Лекомцева но солэн юрттӥсез Надежда Валентиновна Богданова туж шуныт пумитазы. Соос та удысын 20 ар пала тыршо ини. Шӧдӥське: ёросысь мукет гуртъёсын сярысь, Лесагуртын удмуртлык возиське.

Библиотека удмурт шӧмын шока: борддорын синмез мальдытӥсь пужъятэм ӝӧккышетъёс, ӵушконъёс ошылэмын. Котыр югыт но чылкыт, укно азьын, толалтэ куазь шоры учкытэк, пишто горд но льӧль сяськаос. Пырон дорын ик сылэ бабыллям бумагалэсь лэсьтэм бадӟым кыз. Гуртысь нылпиослэн, пе, со ужзы. Кыззэс соос шудонъёсын чебермаллям ни. Собере милемыз, библиотекаын пукыны ӟоскыт луоз шуыса, одӥг липет улэ интыяськем клубе пыртӥзы. Клубен но Екатерина Павловна ик кивалтэ вылэм.

Залын ньыль-вить адями сяна уг пукы на вал. Собере кутскизы ук лыктыны! Арлыдоос пӧлын одӥг-ог егитъёс но адӟиськизы. Вылаз ик та нуналэ ӵапак пенсия сётъяло вылэм. Эшшо одӥгез шумпоттэ на: нылкышноос пӧлын дасо пала воргоронъёс адӟиськизы. Пумиськонмы туж шуныт ортчиз. Гурт калык но чал-чал ӧз пукы, кенешонамы мыло-кыдо пыриськиз, газет но ужмы пумысен юанъёс сётъяз.

Лесагуртын куке-соку 80 корка вылэм. Та аръёссэ ог 60 пала гинэ луоз на, шуо гуртоос. Али, пе, ваньмыз-ӧвӧлэз 208 улӥсез.

- Гуртамы егитъёс ӧжыт кылемен, пиналъёс ичи вордско, – гуртэнызы тодматэ Екатерина Павловна. – Тани туэ кутӥзы но покчи классъем школамес ворсазы. Табере нылпиос Дэбесэ дышетскыны ветло. Ярам коть, нылпи садмы вань на. Сое гинэ медаз исалэ ни вал.

- Мон почтальон луыса туж кема, 45 ар пала ужасько ини, – вераськонмы борды итӥське Илья Иванович Серебренников (солы ужаны юрттэ кузпалыз Любовь Егоровна). – Азьло калык туж лыдӟиськись вал. Ой, кӧня журнал-газетъёслы гожтӥськылӥзы! «Советской Удмуртиез», ёросамы потӥсь «Новый путь» но «Байгурезь» газетъёсты коркалы быдэ басьтылӥзы. Табере тросэз со лыдӟисьёс дунне вылын ӧвӧл ни. Егитъёс уг лыдӟисько. Со муген ик арысь аре лыдӟиськисьёслэн лыдзы ичи но ичи кыле. Кылем арын «Удмурт дуннелы» 5 адями гожтӥськиз вал, туэ тани 4-лы ке но йылӥзы. Огвакытэ, синъёсы висемен, ужамысь дугдылӥ, соку шӧдӥськиз: адямиос газетъёслы гожтӥськемысь дугдӥзы.

- Журналистъёслы тау карыны кулэ, соосын кусып возёно, – вераськонмы борды итӥське ужбергатӥсь Вячеслав Витальевич Лекомцев. – Ма сярысь но соос уг гожъяло. Кытӥяз улонэз но тупатыны быгато. Та аръёсы туж трос верасько удмуртлыкез ӝутон сярысь. Мынам нырысь ик вазиськеме потэ «Удмурт кенеш» огазеяськонлы, культура удысын тыршисьёслы, озьы ик ёросъёсысь кивалтӥсьёслы, депутатэ потыны вырисьёслы: асьтэлэн нош нылпиосты верасько меда удмурт кылын? Ми, гуртын улӥсьёс, сое адӟыны мед быгатомы вылэм. Нылпиосынызы ӵош соосты мед ӧтьылозы вылэм     удмурт передачаосы. Сотэк асьмелэн удмуртлыкмы ноку уз ӝутӥськы. Вань улон соос бордысен кутске.

Аслэсьтыз та пумысен малпанзэ вератэк ӧз чида Тольён муниципал кылдытэтлэн кивалтӥсез Люция Матвеевна Хохрякова:

- Культура удысын ужасьёслы туж ӧжыт коньдон тыро. Кылем арын «Герд» газетысь бӧрдыса, ӝожомыса лыдӟимы Галина Семёновалэсь «Удмурт культура – экзотика» материалзэ. Со милесьтым мылкыдмес бугыртӥз. Гуртоос юри сое лыдӟыны библиотекае ветлӥзы. Газетэз Дэбес черкогуртэ сьӧрам одӥгаз кенеше нуллӥ. Кин лыдӟиз та статьяез шуыса, юасько. Залын пукисьёс 2-3 адями сяна, кизэс ик ӧз ӝутэ. Мылкыды куашказ: удмурт газетэз лыдӟисьёс туж ӧжыт.

- Соиз уго сюлэмшугъяськытэ, асьмелэн нылпиосмы воксё уз ӟучоме меда, – вожмаськыса сямен верало гуртоос. – Райцентре вуиськод ке, отын анай кылын вераськисез туж ик уд пумитаськы ни. Сыӵе суредэз адӟыса, сюлэм вӧсь луэ. Школаосын гинэ но удмурт кылэз табере озьыгес каро ни.

- Вераськемдэс умой мед кылом шуыса, пельёсме ик кышет улысьтым поттыса,  пуки, – шуэ арлыдо нылкышно Ирина Егоровна Сабрекова. – Сыӵе чебер вераськиськоды, кылзэмъя кылзэм потэ. Ми ведь вераськонамы юн трос ӟуч кылъёс пыртӥськомы.

- Висьыны кутскиськом ке, кызьы эмъяськыны турттыса катьмы быре, – шуэ Лидия Ивановна Серебренникова. – Турын-куаръёс сярысь мед гожъялоды вылэм. Тросэзлэсь турын-куаръёслэсь туссэс но ум тодмаське. Соосты туспуктэмен сётысалды ке, эшшо умой луысал.

Ӵектонъёс но дэмланъёс трос вал. Гуртын улӥсьёс куризы пудо будэтон сярысь тросгес материалъёс гожъяны.

Лесагуртын улӥсьёс озьы ик ӝожтӥськизы, Удмуртиын улыса вылысь, пе, анай кылын мынӥсь передачаосты учкыны ум быгатӥське. Мугез антенна бордын, дыр, шуо. Но ми, пе, асьмеды асьмеос удмурт кырӟанъёсын быгатӥськом шулдыртыны. Огинэ люкаськыса, концерт дасяськом. Та нуналъёсы соослэсь коллективзэс Дэбесэ ӧтиллям. Ёросысь арлыдоослэн огазеяськонзылы 25 ар тырмон ужрадэ, гала-концертэ, пе, пыриськомы. Огинтыяд пӧзьыса уд пукы ук, быгатэмдэ калыклы возьматоно, шуо. Только, пе, асьмелэн арганчимы ӧвӧл, юри шулдыртыны Дэбесысь мыло-кыдо воргорон Пётр Шихов ветлэ.

Почтальон Илья Иванович шумпоттӥз милемыз ӟеч ивореныз: гурт калыкен пумиськон бере Лесагуртын эшшо одӥг адями «Удмурт дунне» газетлы гожтӥськем на. Озьыен, таӵе пумиськонъёслэн пайдазы вань.

* * *

Берло аръёссэ Дэбесысь почтаез Эграе выжтэмен, шуг-секытъёс пумиськылыны кутскизы, шуо гуртоос. Сокем кыдёке маин мынод? Почтальонъёс ӧз ке ужалэ, адями сокем кыдёке газетлы гожтӥськыны уз мыны ук.

«Удмурт дунне» газетлы гожтӥськон пумысен Эгра посёлокысь почтамтэ жингыртӥм. Гожтӥськон понна кыл кутӥсь Галина Мухаметгалиева ивортӥз: Дэбес ёросын кылем арын 189 адями «Удмурт дунне» газетлы гожтӥськемын вал, нош туэ – 117.

Дэбес ёрос понна 117 лыдпус туж ичи. Нош луоз на меда валлё аръёсы сямен лыдӟисьёслэсь лыдзэс будэтыны?

Сэрттыны-пертчыны луонтэм юан.

Любовь Тихонова.

Туспуктӥз Владимир Беломорских.

Шаркан ёросысь Вортча гурт администрациысь почта ёзэн дас сизьым арзэ кивалтэ Лариса Ротанова. Вортча гурт сяна, та ёзэ пыро Тыловыл, Кӧсшур, Бадяр, Кулак, Кусогурт. Туэ татын «Удмурт дунне» газетэз 54 семья басьтэ, ветлон нуналамы 26 мурт гожтӥськем ни вылэм.

- Малпасько, вуоно арын но «Удмурт дуннеез» лыдӟисьёс ӧжыт уз луэ, пятницае милям пенсия сётон нунал, – шуэ Лариса Борисовна, – тросэз пенсионеръёс соку ик гожтӥськозы. Таосыз тросгес куинь пол потӥсьсэ газетэз лыдӟо, нош егитъёсызгес пятница номерлы гожтӥсько. Арлы быдэ вань удмурт изданиосты библиотекае гожтэ ёрос кенешлэн депутатэз, Шаркан ёрос больницаысь валтӥсь врач Юрий Перевозчиков.

Вортча почта ёзын кык почтальон ужа. Антонида Шкляева сизьым арзэ газет-журнал нуллэ ни, нош Нина Перевозчикова кык но ӝыны ар пала та удысын тырше. Палэнысь гуртъёсы пыдын мынон-ветлонэз но вань, но лыдӟисьёссэс соос яратоно газет-журналъёссытэк уг кельто. Гожтӥськон 20-тӥ декабрёзь ялэмын, сюлмо почтальонъёс та нуналъёс ӵоже газетмылэсь выль эшъёссэ но шедьтозы, малпаськом.

Лия Малых.

Туспуктӥз Владимир Беломорских.

Туэ гожтӥськытэк кылиды ке но, 20-тӥ январёзь подписка лэсьтӥды ке, газет дорады вуоз февраль толэзьысен. Соин ик мылкыд карисьёс котькуд толэзьысен «Удмурт дуннеен» эшъяськыны быгато. Таӵе амалъя подписка радъяське арняяз куинь пол потӥсь газетлы (солэн индексэз 11597). Быдэс арлы комплектлэн дуныз 630 манет 22 коньы ке, коньдон тыроды басьтоно толэзьёс понна гинэ. Со сяна, куре почтальонлэсь 20 процентъем скидка – со сётӥське пенсионеръёслы но инвалидъёслы.

Мар шуыны луэ вуоно арлы подписка пумысен? Милям, газет поттӥсьёслэн, но почтаын ужасьёлэн малпанмы огкадьгес: адямиос газет-журналъёслы гожтӥськыны черодэ уг султо. Сое возьмато лыдпусъёс. Кылсярысь, Камбарка, Каракулино, Сарапул но Кияса ёросъёсысь почта ёзъёс пыро Сарапул почтамтэ. Татысь валтӥсь специалист, подпиская инструктор Светлана Шатунова верамъя, калыклэн лыдӟиськемез уг поты.

- Арлыдоослэн синзы лябӟе, егитъёслы Интернет вотэс тырме, лэся. Адямиосты тэльмыроно луэ. Тани туэ та ньыль ёросэз басьтоно ке, «Удмурт дунне» вуэ  297 корка, вуоно арлы гожтӥськемъёс туннэ нуналлы  243 мурт люкаськемын. Со пӧлысь 222-ез Кияса ёросын улӥсьёс (туэ татын 265 семья басьтэ вал ай), 17-ез – сарапул калык, 3-ез – камбаркаос но 1-ез лыдӟись  Каракулино ёросысь. Но та лыдпусъёс воштӥськыны быгатозы на.

Каракулино ёросын улэ 13 сюрслэсь ятыр адями, соос пӧлысь 5 процентэз, пе, удмуртъёс. Нош «Удмурт дуннеез» басьтэ 1 адями…

 Галина Семёнова.

- Лыдӟиськон понна со милям быремын, – Владимир Ильич сярысь вера Антонида Владимировна. – «Удмурт дуннелэсь» вуэмзэ гинэ возьмаса пуке. Мукет газетъёслы сокем «жадной» уг выры кадь. Лыдӟиськыса синъёссэ быдтӥз ини. Ужысь бертэмез бере ик «Удмурт дунне» борды кутске. Мынам но ӵыж-выль газетэз лыдӟем потэ ук. Тон берло учкод, шуэ но тӥни. Озьы ӝытмы ортче.

Яратӥсько мон адямиос сярысь гожъямъёсты лыдӟыны. Ас вордӥськем палъёстэ адӟиськод ке, кыӵе шумпотоно, сюлэм ик ырак луэ. Сыӵе дыръя мон чаляк гинэ ӵужапаелы Галина Харитоновна Демьяновалы жингыртӥсько. Лыдӟид-а сыӵе-сыӵе материалэз, юасько. Мыным но вай али газеттэ, учкысал, шуэ. Ӵужапае дорозь мынонмы кыдёкын, Восточной посёлокын со улэ. Бон тон ачид газетлы гожтӥськы ни, сюлворисько. Гожтӥськысал но, почта ящикмы ӧвӧл ук, ӧпкеле со.

Анае Зоя Аркадьевна Махнёва Алнаш ёросысь Варӟыл гуртын улэ. Бертэмме возьмаса гинэ улэ, газеттэ вайид, дыр, нылы, шуэ.

- «Удмурт дунне» газетэз мон пичи дырысеным лыдӟыса будӥ, – кенешонмы борды итӥське Владимир Ильич. – Мамае Нина Александровна Кабышева Можга городын одӥгаз больницаын фельдшер луыса  ужаз. Со арлы быдэ «Советской Удмуртилы»» гожтӥськылӥз. Нылпиоссэ пичиысен лыдӟиськыны дышетӥз. Милям асьмелэн но Костяен Илья пиосмы быдэ вуэмын ини, кыкназы ик удмурт выжызылэсь уг кепырало, удмурт кылэз тодӥсьтэм уг карисько. Висьыны кутскеменыз, мама берло аръёссэ газетлы гожтӥськыны  почтае ветлыны уг быгаты ни. Почтальонъёс асьсэос но дораз уг лыкто, лэся.

- Озьы ни со, озьы, – кыл куспамы пыре мукетыз лыдӟиськись Зинаида Ксенофонтовна Корнеплодкина. – Секыт сумкаосын кыдёке ветлоно шуыса, тросэзлэн почтальонъёслэн журнал-газетъёслы гожтӥськытэмзы уг поты. Уждунзы но соослэн туж ичи, видно. Газетлы гожтӥськон дыръя адямиос азьын уг адӟиськыло ни соос, шуэ анае. Со кыдёкысь, Сюмси ёросысь, одӥгаз пыдлось гуртын улэ. Удмурт кылын гожъямъёсты лыдӟемез потэ шуыса, городысен но мон сое гожтӥ вал. Пайдаез ӧйлась. Озьы ик ӧз басьты газетэз.

- Мон мамаелы, редакция пыр гожтӥськыса, «Удмурт дуннеез» нуллӥсько, – веранзэ азинтэ Владимир Кабышев. – Кык-куинь арня ортчыса, бертылӥсько бере, мама кие газетъёс ӝегаса вуо. Лыдӟиськыны соку тунсыкез быре ни кадь. Нош со газетъёсты сыӵе шумпотыса кутэ, кӧня иворъёс мыным вайид, шуэ. Аслэсьтым куд-ог лыдӟем газетъёсме цехам нуллӥсько. Ваньзы мед адӟозы шуыса, соосты ӝӧк вылэ тырисько. Милям заводамы туж трос удмурт калык ужа. Соос но мед лыдӟиськозы кадь потэ. Но мылкыд карисьёс туж ик трос ӧвӧл. Паймисько. Берло дыре калык малы ке но лыдӟиськемысь дугдӥз.

- Собере асьсэос ӝожтӥсько, – шуэ Ижысь одӥгаз заводын ужась Зара Петровна Каргашина (вордскемын Татарстанысь Агрыз ёросын). – Малы, пе, ми сярысь уг гожъяло, милемлы саклык уг висъяло. Удмурт движение милемыз чик уг кыско. Зэм ик но, ужась калыклы ӧжытгес саклык висъяло кадь потэ. Тросэз-а калык «Удмурт кенеше», «Дэменэ»  пыриське? Уг. Заводын ужасьёс асьсэ улонэнызы уло. Вазь ӵукна ужаны кошко, ӝытазе доразы берто. Нокытчы уг ветло соос. Куд-ог концертъёсы гинэ ке шат потало. Гуртысь вуэм егитъёс анай кылзэс шарае уг потто. Удмурт кылын шоразы вазиськод ке но, кылымтэ улсы карисько. Кызьы соосты удмурт кылын лыдӟиськыны  дышетод? Цехамы ужась нылъёслы но пиослы «Дарт» газетэз возьматӥ. Киынызы гинэ шонтӥзы: отын, пе, культураез но искусствоез сяна уг тодо.

Маргарита Мишкина Ижысь одӥгаз пудо эмъян станциын ветеринар луыса тырше. Арнялы быдэ анай-атаез доры Пичи Пурга ёросысь Гожняе бертылэ.

- Юри мон соос понна редакция пыр «Удмурт дунне» газетлы гожтӥськисько. Сыӵе амалэн гожтӥськонэз Кабышев кузпалъёслэсь адӟем кари. Одӥг юртын ми соосын улӥськом. Мемее Екатерина Михайловна но дядяе Николай Гаврилович Четвериковъёс мынэсьтым бертэмме гинэ возьмаса пуко. Одӥгаз шутэтскон нуналэ ӧй ке вуы – улон быриз. Сотовой телефонам жингырто ини, ку, пе, ваёд газетъёсты. Ой, кыкназы но ярато ук «Удмурт дуннеез» лыдӟыны! Уд оске, ява, огвакытэ дядяе «Ӟечбур!» газетэз но басьяз. Нылпиос сярысь но, пе, тодэм потэ: кызьы соос гожъясько, кызьы уло но дышетско. Собере асьсэос ик почтальонкаос сое сереме уськытӥзы, лэся, ма, тӥляд, пе, сое лыдӟыны пичиосты ӧвӧл ни ук. Дорам ке ӧвӧл, городын улӥсьёсыз вань шуыса, пе, валэктӥсько. Ма, зэмзэ но 6-тӥ классын дышетскись Игоре газетъёссэ мыло-кыдо учкылэ. Со Ижысь 59-тӥ школаын дышетске, удмурт классэ ветлэ. Пие туж умой дышетӥсь кие шедиз. Александра Михайловна Рахимоваез нылпиос гинэ ӧвӧл, анай-атайёс но, дышетӥсьёс но гажало.

Любовь Тихонова.

Туспуктӥз автор.

Совето вакытъёсы гуртысь котькуд семьяе вуэ вал 5-6 издание, табере  быдэс гуртэ сомындаез лыктэ. Вуоно арлы газет-журналъёслы гожтӥськон ӟеч мынэ шуыны ым уг пыры, со нюжтӥське, гызмыльтэ, канжаське. «Удмурт дуннелэн» тиражез 96 ар ӵоже трос пол шудӥз, тужгес бадӟым лыдпус вал ог 25 сюрс экземпляр. Туннэ нуналлы со 2 сюрсысен 6 сюрсозь шудэ. Но оскон ӧвӧл, вуоно арлы та лыдпус эшшо но уз усьы шуыса.  Малы ке шуоно, вуоно арлы подписка йылпумъяськытозь, кылиз на 6 нунал, нош калык почтаосы уг дырты.

Грак ёросысь почтамтлэн кивалтӥсезлэн воштӥсез Анастасия Габитова верамъя, адямиос ӝожтӥсько коньдонзы ӧвӧл шуыса. «Удмурт дунне» газетэз туэ басьтэ 1 сюрс 585 мурт, со пӧлысь 137 экземпляр вуиз Грак ёросэ, 1 сюрс 452-ез – Алнашысь лыдӟисьёс доры.

- Алнаш но Грак ёросъёсты учконо ке, вуоно арлы валтӥсь удмурт газетэз лыдӟыны мылкыд кариз ваньзэ-ӧвӧлзэ 748 семья, тросэз басьтозы пятницае потӥсь номерез гинэ. Подписка кыстӥське 15-тӥ декабрёзь, нош «Удмурт дуннелы» гожтӥськыны луэ на 19-тӥ числоозь. Соин ик мылкыд карисьёсты возьмаськом, – шуиз Анастасия Александровна.

Лымшор ёросъёсын югдур сыӵе урод бере, кыӵе лыдпусъёс уйпал районын? Сое тодон понна жингыртӥм Глазов ёросысь почтамтэ (татчы ик пыре Яр ёрослэн почта ёзэз). Инструктор Татьяна Боталова вера:

- Туэ «Удмурт дуннеез» Яр ёросамы басьтэ 30 семья, Глазов районын – 68 мурт. Вуоно арлы Ярын гожтӥськиз 26 адями, нош Глаз ёросын – 43. Асьмеос но мугзэ ум валаське, адямиослэн лыдӟиськемзы уг поты, гожтӥськыны уг дырто. «Удмурт дуннеен» гинэ сыӵе югдур ӧвӧл, ёросамы потӥсь газетлы но мед гожтӥськозы шуыса тэльмыроно луэ, – мылкыдыз усемын Татьяна Сергеевналэн.

 Галина Семёнова.

Семьяямы ми куать нылпи вал. Атаймы войнаысь сӧсырмыса бертӥз, но колхоз предмы малы ке сое туж обижать карыса возиз. Али но кӧты ӝож со понна. Атаймы туж яратэ вал кырӟаны. Войнае басьтыкузы, «Ой, машина, машина» кырӟанэз кырӟаса, кошкиз. Сое кыло ке, гуртоос шуо вал: Корниллэн кырӟанэз. Калыклэсь алама улэмъёсыз сярысь гожъямъёссэ лыдӟыса, синвуаськисько, тодэ лыктэ курадӟыса будэммы. Нош ӟечезлы ачим но шумпотӥсько.

Мон вордӥськемын Алнаш районысь Асангуртын, Ижын 1972-тӥ арысен улӥсько ни. Кузёеным ньыль нылпи будэтӥм. Одӥг арзэ но газеттэк ум кылиське вал, вожмаськыса лыдӟиськылӥм. Табере кузёе укмыс арзэ сояз дуннеын ни.

Гужемзэ сад-бакчаын улӥсько. Нылы газет вайыны вунэтэ ке, куаретӥсько. Тазалыке ляб ни, ужаме уг луы. Нош лыдӟиськыны туж яратӥсько. Артэ бакчаосысь удмурт кышноос юанъёсынызы ӵемысь мыным вазисько: тон, пе, оломае но тодӥськод. Шуисько: газет лыдӟыны кулэ, тӥ но котьмае тододы. Паймисько, малы газетлы уг гожтӥсько? Вина ӧд ке юы, тамак ӧд ке кыскы, ма, кызьы  уксёед газетлы уз тырмы?

Надежда Кузнецова,

Ижын улӥсь.

Та выллем фонтанэз Можгаысь вуз карон центрысь адӟем но гуртэ лэсьтоно кариськем культура юртлэн кивалтӥсез Рудольф Петров. Маин пӧртэм гурт калык городын улӥсьёслэсь, соосты чеберлыкез дунъяны-валаны дышетоно, пе.

Клубе пырыкумы, татын куинь кузя пуко вал: аккомпаниатор, крезьгурчи Пётр Бикузин, культура юртын ужась Ирина Ушакова но библиотекарь Алевтина Замятина. Соос котькуд нунал, пе, тазьы ужало – 12 часысен 16 часозь, собере ӝытазе пото на. Таиз пусйымон, уго куд-ог гурт клубъёс нуназе ӵогамын, ӝыт дискотекаослы гинэ усьтэмын луо.

- Ёросъя гурт клубъёсты учконо ке, милямез тужгес устоез луэ, – веранзэ мытэ Пётр Бикузин. – Рудольф Филиппович хозяйствоен кивалтӥсенымы Виктор Леонидовичен ӵош клубе туала аппаратура вуттӥзы. Милям ваньмыз вань: барабанъёс, клавишаен инструментъёс, микрофонъёс, гитараос, прожекторъёс, куарая режиссёрлы ужан тӥрлык но мукет. Алнаш ёрос культура юртлэсь бере ум кылиське. Но отын специалистъёссы золэсь. Милемлы но туж кулэ вылэм хореограф, режиссёр но кырӟась. Вал одӥгез, Ольга Глазкова, культурая колледжез йылпумъяса, ар ужаз но Можга ёросэ бызиз, нош ик кырӟасьтэк кылимы. Татын пиосмы трос, нылъёслы ёрмиськомы.

Таӵе клубын ужаны киыз но пыдыз. Фонтанзы пызъе, выль прожекторъёс пишто, бильярдэн шудыны инты дасяло. Клубын ужасьёс коть али ик быдэс концертэн бускель гуртъёсы потыны дась, транспортэн шуг-секытъёс кылдо. Татын «Азамат ӧрӟиос» коллективзы вань, хорзы кырӟа, егитъёслэн ансамбльзы ужа. Усточиос шал-шал уг пуко. Клублэн кивалтӥсезлэн машинаеныз но куинь кузя концертэн потало. Варӟылэ, Лялие вуылӥзы ини. Алигес ортчытӥзы Анайлэн нуналэзлы сӥзем праздник. Быръёнъёс бере Выль арлы дасяськом ини, шуо.

- Бадӟым мероприятиосты оген вормыны секыт ук, соин ик ми культура юртысь усточиосын валче тыршиськомы. Милемлы удалтӥз: Рудольф Филиппович крезьгуръя но культурая колледжъёсты йылпумъямын ӧвӧл ке но, со туж ӟеч организатор. Ӧвӧлэз вань карись шуиськомы сое. Мар малпаз, одно ик лэсьтоз, ӝожтӥськыса уз улы, соин ик ми но тыршиськом умой ужаны. Праздникъёслы удмурт сценарийёс шедьтыны туж секыт. Со понна ёросысь культурая ёзэ но вазиськиськом, асьмеос но бергаськом. Та ласянь газетты но милемлы юрттӥське. «Удмурт дуннеысь» сценкаосты, серемес учыръёсты огазеяса-тупатъяса, мар но со пӧрмытъяськомы. Кылем арын библиотекае арняяз куинь пол потӥсь газеттэс басьтӥськомы вал. Туэ ёрос вылэ оскиським но гожтӥськытэк кылимы. Табере дорам басьто ини но библиотекае нулло, газеттэс юасьёс вань, – мылкыдзэ усьтэ Алевтина Анатольевна.

Галина Семёнова.

Пумиськонэ лыктэмъёс.

Кемалась ик ӧвӧл лыдӟисьёсынымы кенешон вылысь вуылӥмы Алнаш ёросысь Азамат гуртэ. Пумиськонмы ортчиз школаын. Анай-атайёсты люказ Азамат школаысь директорлэн воштӥсез, удмурт кылъя но литературая дышетӥсь Ольга Рябина.

Ольга Владимировна кемаласен ини эшъяське «Удмурт дунне» газетэн, соин ик уг вала, малы мукетъёс сое уг басьто.

- Газетысь очеркъёсты лыдӟиськод но адямизэ тодэм кадь луиськод. Мар сярысь но уд гожъяське, паймисько. Паймисько соизлы но: малы мукетъёс мон сямен паймыны уг быгато? Удмурт иворъёс, дано муртъёс сярысь лыдӟемзы уг поты шат? Тани школаямы пӧртэм пумиськонъёс ортчытъяны тыршиськом. Кемалась ик ӧвӧл дорамы вуылӥз аспал эшмы, Удмуртиысь культура удысысь дано ужась Леонид Гусев. Сыӵе тунсыко пумиськон вал. Леонид Федотович вань турын-куаръёсты удмурт сямен тодэ, Азамат котырысь инты нимъёсты вера. Нылпиослэсь юа – соос уг тодо ни. Малы ке шуоно пиналъёс но анай-атайёс кусып тупатыны уг быгато. Нылпиос тодо сое, мае тодо анай-атайёс. Нош бадӟымъёс уг лыдӟисько, уг тунсыкъясько ке, пиналлы но со палаське ини.

Газетты урокъёслы, ужрадъёслы дасяськыны туж юрттэ. «Чибориё кышет» конкурс сярысь лыдӟыса, та нуналъёсы милям но кышетлы сӥзем праздникмы орчиз. «Удмурт кизилиос» рубрикадэс ялан ушъясько. Сьӧлта ёросын улӥсь апаелы та сярысь верай но, табере со но «Удмурт дуннелы» гожтӥськиз ини, – шуэ Ольга Владимировна.

Ольга Рябина кадь лыдӟисьёс Азаматын вань. Огез соос пӧлысь – школаын сиён пӧрась Людмила Гирбасова.

- Кӧня асме тодӥсько, сомында ик дорамы вуэ ини «Удмурт дунне», – веранзэ мытэ Чумолё гуртын вордскем кышномурт. – Атае Илья Матвеевич Христофоров, азьмынӥсь комбайнёр сяна, туж лыдӟиськись адями вал. Солэсь ик та сям пыӵаз милемлы но. Картэным вожмаськыса лыдӟиськом. «Удмурт дуннелэсь» вуэмзэ возьмаса, чырты кузь луэ. Карина внучкае бордамы улэ, солы шуисько: мын ай учкы, газет вайизы-а ни. Кузпалы Юрий Анатольевич лыдӟиськыны яратэ бере, библиотекаысь солы книга нуллӥсько. Подпискалы уксёзэ уг жаля, ноку но «эн гожтӥськы» шуэмез ӧвӧл, уждунэнымы ушъяськыны ум быгатӥське ке но. 12 аресъем внучкаме удмурт карыны выриськом. Ваньзэ вала, анай кылын сочинениосыз но чебер пӧрмо, пуштросэз тунсыко луэ. Мон ачим но гожъяськисько, кылбуръёсы печатласько «Удмурт дуннеын» но «Кенеш» журналын. Малы ке газет бамады Людмила Гирбасова интые Светлана луиськем вылэм. Но воже туж зол ӧз поты, ужасьтэм мурт гинэ уг янгыша, дыр. Мынам эше но Людмила Замятина газеттэс кемалась басьтэ ини. Котькуд номерез лыдӟеммы бере газет пумысен ог-огмылы мылкыдмес усьтӥськом, – вера Людмила Ильинична.

Азаматысь почта ёзэн кивалтӥсь Екатерина Соловьёва верамъя, подписка арысь аре кулэсме. Та почта ёзэтэ пыре ньыль гурт – Азамат, Шайтангурт, Вязовка но Ӝакгурт. Туннэ нуналлы «Удмурт дунне» вуэ 49 корка. 27 мурт басьтэ арняяз куинь пол потӥсь газетэз, кылемез – пятница номерез гинэ. Азаматъя учконо ке, 16 корка лыктэ быдэс комплект, 6 семья «Удмурт дуннеез» лыдӟе арнялы огпол.

- Мон 10 ар татын ужасько ини. Та дыр куспын лыдӟиськись адямиос, дуныз шоры учкытэк, ялан газетлы гожтӥсько, нош вань сыӵе семьяос – одӥг газет-журнал но уг басьто. Со понна куд-ог корка вуэ 5-6 издание. Шумпотыса пусйыны луэ Азаматысь «Решительный» огазеяськонлэсь кивалтӥсьсэ Виктор Ганьковез, дышетӥсез Ольга Рябинаез, Шайтангуртысь пичи классъёсысь пиналъёсты дышетӥсез Лидия Николаеваез но мукетъёссэ. Таоссэ косонэз ик ӧвӧл, трос изданиосты басьто.

Галина Семёнова.