Исполкомын ӝутэмын «Удмурт кенеш» ассоциацилэн уставаз воштонъёс пыртон сярысь ужпум.

«Удмурт кенеш» огазеяськонлэн кылем арня пумын люкаськем исполкомез ӟырдыт но тунсыко ортчиз. Кенешонэ исполкомлэн 20 ёзчиез пыриськиз. Таяз рад соослы пӧртэм ужпумъёсъя шара но, лушкем но куаразэс сётоно луылӥз.

Исполкоме люкаськемъёс нырысь ик вераськизы Пичи кенешын эскероно ужпумъёс сярысь. Пичи кенеш люкаськоз 11-тӥ апреле, эскероз удмурт кылэз школаосын дышетон ужпумез. Отчы пыриськозы министерствоосын ужасьёс, дышетӥсьёс, анай-атайёс, «кенешчиос». Нялтас вераса, «Удмурт кенешлэн» кичӧлтэмезъя дышетонлы сӥзем бадӟым ужрад Ижын ортчиз ни вал. Отын шугъяськытӥсь юанъёс туж лэчыт эскериськизы, но югдур интыысьтыз шуген вырӟе. Соин ик та ужпум борды нош но нош берытсконо луэ.

Исполкомын ик ӝутэмын вал «Удмурт кенеш» ассоциацилэн уставаз воштонъёс но ватсанъёс пыртон ужпум. Шуом, али уставъя исполкомлэн ёзчиосыз Пичи кенеше (Национальной собрание), пе, уг пыро. Но со озьы луыны быгатэ шат? Исполкомез аслаз радъёсысьтыз Пичи кенеш быръе ук. Нош ассэ Пичи кенешез удмуртъёслэн съездазы быръё. Уставе мукет воштонъёс пыртонъя но сюлмаськоно луоз. Со бордын ужан понна нимысьтыз группа кылдытэмын. Отчы вить адями пыртэмын: «Удмурт кенешлэн» кивалтӥсез Николай Мусалимов, «Удмурт кенешлэн» дано президентэз Валентин Тубылов, профессор Леонид Загребин, «Удмурт кенешлэн» исполкомезлэн ёзчиез Леонид Гонин, «Удмурт кенеш» огазеяськонлэн Ижысь Устинов ёросысь ёзэныз кивалтӥсь Елена Ленцова.

Исполкомын ик быръемын вал фин-угор калыкъёслэн Венгриын ортчоно куатетӥ конгрессазы делегатъёс. Соосты быръён мынӥз, куараосты лушкем сётыса. Озьы исполком 11 мурт понна куара сётӥз. Та вӧзы эшшо 9 делегат ватсаськоз на. Быдэн одӥген быръёзы Удмурт культурая «Дэмен» огазеяськон, Удмурт нылкышно кенеш, камсьӧр удмуртъёс но кыксэ – удмурт егитъёслэн «Шунды» огазеяськонзы. Со сяна, асьме делегацие пыртэмын луоз на Башкортостанысь, Татарстанысь, Марий Элысь, Свердловск улосысь удмурт диаспораосысь быдэн одӥг адями. Фин-угор конгрессэ мынӥсь быдэс делегация тодмо луоз 11-тӥ апреле. Угось соку Пичи кенеш аслэсьтыз мылкыдзэ вералоз но куаразэ сётоз. Фин-угор конгресс ортчоз туэ сентябрьлэн кутсконаз Венгриысь Шиофок карын.

Уноезлэсь «кенешчиослэсь» сюлэмзэс вӧсь кариз туэ пӧяськыса потэм «Новое время Удмуртии» газетлэн удмуртъёсты сантэмамез. Удмуртъёсты гинэ ӧвӧл, Россиын улӥсь вань ӧжыт лыдъем калыкъёсты. «Нерусские должны быть лишены гражданских прав» статья пумысен исполкомын туж зол лекъяськемзэс веразы. Кыӵе ке кужымъёслэн «сьӧд пиарен» выремзы, быдэс калыкез ултӥямзы, ваче вуттэмзы шоры чиньы пыр учкыны уг яра. Та ужпумез эскериз ни Нациосын ужан политикая министерствоысь СМИ-ослэн текстъёссылы мониторинг лэсьтонъя комитет. Со, югдурез рос-прос чакланы курыса, вазиськиз Прокуратурае, йыртэмасьёсты кыл кутон улэ кысконо. Та вазиськон борды итӥськиз «Удмурт кенеш» огазеяськонлэн исполкомез но.

Исполкомын «кенешчиос» трос мукет ужпумъёсты но эскеризы на.

Елена Панфилова.

«Удмурт кенешлэн» туэ арлы планаз трос гинэ дэмланъёс сётžллям егитъёс. Шуом, Павел Поздеев дэмла ассоциацилэн уставаз воштонъёс пыртыны, «Удмурт кенеше» пыриськись котькуд адями взносъёс мед тыроз. Исполкомын пусйизы: та малпан выль ӧвӧл, со сярысь вазен вераськонъёс мынӥзы, но… Взносъёс бичан кутскиз ке, адямиос «Удмурт кенеш» котырысь уз палэнске-а? Общественной ужен вырем понна нокин коньдон уг тыры ук, адямиос ас мылкыд каремзыя огазеясько, кыӵе ке тунсыко ужъёсты бугырто, лэсьто. Нош со понна эшшо взнос тырытӥзы ке? Та малпанъя «кенешчиос» огкылэ ӧз вуэ.

Лэчыт вераськон ӝутскиз республикаысь школаосын удмурт кылэз дышетон пумысь. Куд-ог удмурт егитъёс дэмлало: анай кылмес дышетон радъямын мед луоз вань школаосын. Дышетонъя но наукая министрлэн нырысетӥ воштӥсез Зоя Суворова пусйиз: егитъёс асьсэос но милемлы юрттыны быгатысалзы. Шуом, Егитъёслэн парламентсылы вазиськоно, мед потозы законэ кичӧлтонэн. Кин тодэ, оло, кужымез огазеяса, югдурез тупатыны, законэ воштонъёс пыртыны луоз ик. Нош али, Зоя Витальевналэн верамезъя, асьмелэн нокытын но гожтэмын ӧвӧл, удмурт кылэз одно ик дышетоно шуыса. Та бордысь ик ялан кылдо сюлмаськонъёс.

- Мукет ласянь, асьмеос вунэтӥськом: пиналлэн анай кылзэ школаын дышетэмез потэ ке, нош солы сыӵе луонлык уг ке сётӥськы, озьыен, нылпилэн правоосыз тӥясько, – шуэ история наукаосъя доктор Галина Никитина. – Конституцияя котькудӥзлэн анай кылзэ дышетон правоез вань ук.

«Кенешчиос» сыӵе малпанэн но соглаш кариськизы. Но отысь потӥз ини мукетыз ужпум: ӟучомем школаосын татчыозь одӥг анай-атай но пиналзэ удмурт кыллы дышетэмез потэ шуыса, заявлениен ӧз вазиськы. Сыӵе вазиськон луысал ке, оло, нимаз школаосын югдурез тупатыны луысал, шара малпасько исполкомын. Нош асьмелэн мыддорин югдур: заявление гожто, пиналзы удмурт кылэз медаз дышеты шуыса… Вань та ужпумъёс пыр-поч эскериськозы мартэ ортчоно котрес ӝӧк сьӧрын. Сое радъян сярысь сюлмасько «Удмурт кенеш» но Дышетонъя, наукая министерство.

Исполкомын трос мукет ужпумъёс эскеремын на вал. Люкаськемъёс тодматскизы «Удмурт кенешлэн» нырысетӥ президентэзлэн Михаил Шишкинлэн вазиськонэныз. Отын со удмурт движенилэсь 20 ар ӵоже азинсконзэ критиклэн синмыныз эскерыны куре. Ӝутэмын вал Иж город кенешъя ужпум но. Шоркарын ёрос кенешъёс кылдытэмын, но соослэн ужзы, пе, сокем уг адӟиськы. Ачиз город кенеш – пусйымтэ огазеяськон. Соин ик «Удмурт кенешлэн» уставаз кемалась ини воштонъёс пыртоно. Люкаськемъёс та малпанэн соглаш луизы.

Таяз исполкомын ик «Удмурт кенешлэн» ревизионной комиссияз юнматэмын выль адями – Ува ёросысь «кенешчи» Юрий Горячих. Азьвыл та интыын вал Андрей Андреевич Гребин. Но кылем арын секыт висьыса, со улонысь кошкиз.

* * *

Исполкомын кенешонэз йылпумъяса, «Удмурт кенешлэн» кивалтӥсез Николай Мусалимов вакчияк мадиз на фин-угор калыкъёслэн туэ сӥзьыл Венгриын люкаськоно конгрессы сярысь.

Елена Панфилова.

«Кенешчиослы» Николай Николаевич ивортӥз: арня ӵоже тырше ини шаерысьтымы Правительстволэн Тӧроезлэн воштӥсезлэсь ужзэ быдэсъясь луыса. Кивалтӥсьлэн верамезъя, та инты тросгес луонлыкъёс сётоз удмуртлыкен герӟаськем ужпумъёсты быдэстыны. Азьвыл ӵем йыбырттоно вал пӧртэм министерствоослы, удмурт ужрадъёслы коньдон курыса. Николай Николаевич тодаз вайиз огзэ сыӵе учырез: макем секыт вал кылем арын «Шундыкар» лагерьлэн сменаезлы тросгес нунал ватсаны, со пумысен коньдон утчаны.

«Удмурт кенеш» огазеяськон но куинь министерствоос – Дышетонъя но наукая, Культурая, печатья но иворъёсъя, Егитъёсын ужанъя – куспазы огкыл гожтӥзы ке но, уж вылын трос ужрадъёс секытэн вырӟо. Озьы ке но исполкоме люкаськемъёс пусйизы: ӧжыт лэсьтэмын ӧвӧл. Ортчем арез чакласа потоно ке, Т. Борисов азьветлӥсьлы сӥзьыса гинэ, кӧня ужрадъёс ортчытэмын: фильм лэсьтэмын, книга поттэмын, пумиськонъёс, фестиваль радъямын но трос мукет. Куд-ог ужпумъёсты ӝутон понна удмурт огазеяськонлы зол гинэ бергано луиз. Но сюлмаськонъёс ӧжытгес ӧз кыле. Тужгес но – анай кылэз школаосын дышетонъя.

«Удмурт кенешлэн» политикае пыриськемез пумысен ке… Сое пӧртэм сямен дунъяны луэ. Но «кенешчиос» пусъё: табере ялан ӧпкельыса пукод шат? Быдэс Россиын югдур, быръёнъя система сыӵе ке… Нош «Удмурт кенеш» азьын сылӥсь ужпум – анай кылэз, удмуртлыкез утён. ӵапак та ужъёс борды ик пыр-почгес басьтӥськоно, огъя малпанэ вуо исполкомчиос. Азьлань мыноно.

Удмуртлыкен герӟаськем вань шуг-секытъёсты «Удмурт кенеш» вылэ куштӥсьёс, вань шекъёс понна удмурт огазеяськонэз янгыш карисьёс котьку вал. Жаляса верано, ӵемысь бугыръяло «Удмурт кенешлэн» ужаз воксё пыриськымтэ адямиос, ӧпкелизы «кенешчиос». Чузъяськизы мукет малпанъёс но. Оло, зэм но, дыр вуиз «Удмурт кенешлэсь» ужзэ мукет сяменгес радъяны? Кызьы? Исполкомын асьсэ малпанъёссэс веразы, туэ арлы планъя дэмланъёссэс сётӥзы. Пичи кенешын план юнматэмын луоз.

«Удмуртия» издательствоез Николай Мусалимов куриз на удмурт кылын книгаос поттонъя список дасяны. Матысь дыре анай кылын книгаос поттонлы нимысьтыз коньдон висъямын луоз. Туэ ик «Удмурт кенешлэн» исполкомез пыр-поч ужаны чакла Т. Борисовлы сӥзем синпелет пуктон бордын.

2012-тӥ арлы планэз юнматэм сяна, 18-тӥ январе Пичи кенешын исполком ар ӵоже ужамезлы йылпумъян лэсьтоз. Пусъёно созэ но: ӝоген, апрель толэзе, Удмуртие люкаськылоз Фин-угор калыкъёслэн консультативной комитетсы. Туэ сӥзьыл Венгриын луоз быдэс дуннеысь фин-угор калыкъёслэн конгрессы. Нош ар пумын дуннеысь вань удмуртъёслэн съездзы ортчоз.

Елена ПАНФИЛОВА.

- 25-тӥ ноябре Ижын, Удмурт театрын, радъяськоз «Удмурт кенеш» огазеяськонлы 20 ар тырмонлы сӥзем бадӟым сӥё-дано ужрад, – тодэ вайытӥз «Удмурт кенеш» огазеяськонлэн кивалтӥсез Николай Мусалимов. – Отчы 500 пала адями люкаськоз. Вуозы Россиысь но кунгож сьӧрысь куноос, шаерысьтымы но пӧртэм улосъёсысь удмуртъёс.

Николай Николаевичлэн верамезъя, юбилейлы чакласа потоз «Удмурт кенешлы» сӥзем книга. Отчы асьсэ ужамзы, кылдэмзы но азинскемзы сярысь гожъямъёссэс келязы ни «Удмурт кенешлэн» вань городъёсысь но ёросъёсысь ёзъёсыз. Юри та юбилейлы «Удмуртия» ГТРК дася фильм. Нош сиё-дано ужрадэ шедем делегатъёслы лэсьтэмын луозы синпель гадьпусъёс. «Удмурт кенешлэн» котькуд ёросысь ёзэз октябрь-ноябрь ӵоже аслэсьтыз ужрадзэ ортчытыны кулэ на.

Туэ, юбилей аре, «Удмурт кенеш» огазеяськон нырысьсэ ялӥз Э. Батуев нимо премия сётон сярысь. Сое басьтыны быгато удмурт калыклэсь историзэ, культуразэ возьматӥсь, калыкен герӟаськем мукет шугъяськытӥсь ужпумъёсты ӝутӥсь журналистъёс. Зэм, со юромо чакламын удмурт журналистикалэсь, анай кылын гожъяськонлэсь данзэ ӝутон вылысь, но та конкурсэ пыриськыны быгато ӟуч кылын гожъяськисьёс но, соос асьсэ ужъёссэс калыкмылы сӥзё ке.

Исполкомын пусъемын вал: Э. Батуев нимо конкурсэ 12 уж вуэмын. Вормисе потэмъёсты ӟечкылалозы 10-тӥ октябре Ижысь Эшъяськон юртын.

Шумпотон ивор вераз «Удмурт кенешлэн» исполкомезлэн ёзчиез, ужбергатӥсь Павел Титов. Ижын, пе, Удмурт культурая центр лэсьтон уж интыысьтыз вырӟиз. Тодады вайытӥськом: та центр пуксьыны кулэ вал Ленин ульчае, ипподромлэсь кыдёке ик ӧвӧл. Но вӧзысь коркаосын улӥсьёс пумитъяськемен, уж ӝегаз. Павел Леонидович пусйиз, судлэн решениез вазенгес ик вал ни: ваньмыз умой, пуктӥськыны яра. Центр лэсьтон пумысен та нуналъёсы кенешемын Иж город администрацилэн йырыныз Денис Агашинэн. Кылдытэмын нимысьтыз группа. Отчы пыро «Удмурт кенеш» огазеяськонлэн кивалтӥсез Николай Мусалимов, солэн воштӥсез Татьяна Ишматова, профессор Владимир Владыкин, суредась Касим Галиханов но мукетъёс. Озьыен, чагыр малпанъёс быдэсмо: удмурт центр сярысь сомында аръёс ӵоже куриськонъёсмы юнме ӧз луэ.

Но тужгес но бадӟым шумпотон сьӧраз ваем Башкортостанысь удмуртъёслэн азьветлӥсьсы Ренат Галямшин. ӝоген, пе, башкир музъем вылын усьтӥськоз удмурт нылпиослы гимназия. Со сярысь ялэм Башкортостанысь дышетонъя министр.

Та малпаськытӥсь но бурдъясь иворен «кенешчиос» люкиськизы. Син кышка, ки лэсьтэ, шуо. «Удмурт кенешлэсь» юбилейзэ капчи мылкыдын но ӟечезлы осконъёсын пумитано мед луом.

Елена Миннигараева.