Зэмос удмурт воргорон уг курда

Тодосчиослэн юртазы «Кыӵе со зэмос удмурт воргорон?» ужрад ортчиз. Радъязы сое «Удмурт кенешлэн» Ижысь ёзчиосыз.

Тодосчи Альберт Разин вакчияк тодматӥз асьме калыклэн вашкала но туала аръёсы данэ потэм удмурт пиосыныз: Кузебай Гердэн, Трофим Борисовен, Айво Ивиен, Максим Прокопьевен… Ма, соосты вераса но уд быдты, асьмелы вань кинлэсь адӟем карыны, пусйизы ужрадэ лыктэмъёс. Со воргоронъёс огзы но ӧз курдалэ, асьмелэсь улонмес ӟечгес карон понна пумозяз нюръяськизы, улонзэс сётӥзы.

Тросэз воргоронъёс та ужрадэ военной дӥсен лыктӥллям. Кылсярысь, «Уд­мурт кенешлэн» Ижысь Ленин ёросысь ёзэныз кивалтӥсь Владимир Ныров полковник. Со вань улонзэ армилы сӥзиз. Туркмение но, Африкае но, Прибалтикае но вуылӥз. Но удмурт сямызлэсь нокытын ӧз люкиськы.

Зэмос удмурт пиосъёсмес ӟечкыланы вуиллям Ижысь «Тюрагай», Дэри ёросысь Ягул гуртысь «Ягдор» но Ижысь Ленин ёросысь 25 номеро библиотекаысь «Эшъёс» кырӟась-верась коллективъёс. Котькудӥзлы ужрадэ пыриськем воргоронлы гадяз бырттэмын «Зэмос удмурт воргорон» медаль.

Ӝытэз быгатыса но чебер нуизы Юлия Разина но Людмила Разина.

Любовь Тихонова.

Вавож

Герд дорын куноязы «Эшъёс»

Тунсыко пумиськон ортчиз Гурезь-Пудгаысьтымы Гердлэн музеяз. Дорамы куное вуылӥз «Удмурт кенеш» огазеяськонлэн Ижысь Ленин ёросысь ёзэныз кивалтӥсь Владимир Ныров эшъёсыныз ӵош. Ма, кырӟанъя-веранъя ансамбльзылэн нимыз но – «Эшъёс».

Пумиськонэ озьы ик пыриськизы Вавож ёросысьтымы «кенешчиослэн» ки­валтӥсьсы Геннадий Шубин но ёрос администрациысь культурая управлениен кивалтӥсь Виктор Шутов. Музее мыло-кыдо люкаськизы «Жильырась ошмес» ансамбле ветлӥсьёс.

Кыл бӧрсьы кыл, кырӟан бӧрсьы кырӟан – пумиськон тунсыколэсь тунсыко пӧрмиз. Люкаськемъёслы музейын экскурсия ортчытӥз Галина Пчельникова. Вавожъёс городъёсты тодматӥзы вормонъёсынызы: бусыоссы ӟеч ю тысь, бакча емыш сёто, пудозы удалтэ… Нош городъёс гуртоосты паймытӥзы но шумпоттӥзы чылк-чылк удмурт вераськеменызы. «Жильырась ошмесъёс» кыӵе гинэ гур уг мыто, «Эшъёс» соку ик бордазы итӥсько ни – вань удмурт кырӟанъёсты тодо!

Гурезь-пудгаослэн но ижъёслэн та нырысь пумиськонзы. Но, шӧдске, со берлоез уз луы.

Лариса Протопопова,

Кузебай Гердлэн музееныз кивалтӥсь.

Можга

Ярам али, «Такъян» вань

«Удмурт кенеш» огазеяськонлэн Можга ёросысь ёзэтэзлэн бурд улаз ужась «Такъян» нылкышно кенеш пусйиз 15 ар тырмонзэ.

1997-тӥ ар. Россиысь дано дышетӥсь, Можга педколледжысь удмурт ёзэтэн кивалтӥсь Римма Данилова вожъяськыса учкылӥз ижъёслэн улэмзы шоры. Городын, пе, олокыӵе но ужрадъёс ортчыло, пӧртэм клубъёс ужало. Нош Можгаын сюлэмез усьтыса пукыны нокытын. Оло, асьме дорын но кыӵе ке клуб кылдытоно? Но кин сое валтоз? Собере тодаз лыктӥз: Можга педколледжысь коть­кыӵе ужрадэ капчиен пыриськись Татьяна Иванова та ныпъетэз одно вормоз! Ним но малпазы – «Такъян». Люкаськизы но нырысьсэ 25-тӥ январе, Татьянаослэн нуналазы.

Зэм, нырысь-валысь нылкышноос трос ӧй вал. Но отӥяз «Такъян» паськытаз. Доразы ӧтчазы пӧртэм удысысь специалистъёсты. Кылсярысь, педагогика наукаосъя кандидатэз Надежда Шишкинаез, крезьгурчиез Виктор Ильинскихез, суредасез Владимир Кашинэз, кылбурчиез но композиторез Сергей Созоновез. Озьы – толэзьлы быдэ.

«Такъянъёс» экскурсиен вуылӥзы ни Алнашысь Ашальчи Окилэн, Можга ёросысь Бадӟым Сибы гуртысь Вера Толстаялэн музейёсазы, Можгаысь Николай Байтеряков нимо библиотекае но трос мукет азе.

Туннэ «Такъян» клубысь «яна потэмъёс» но вань ни. Кылсярысь, Зоя Ильинских медколледжысь студентъёс пӧлын радъяз «Ашальчи» клуб. Римма Данилова арлыдоосын нимаз кариськиз. Но юбилейзэс пусъёнын ваньзы огазьын пукизы. Котькудӥз тау кариз Татьяна Ивановалы: азьланяз но, пе, милемыз тазьы ик валтыны мед быгатод.

Елена Сараматова.

Красногорск

Уйпал уӵы уз вуны

Красногорск ёросысь Дёбы черкогуртысь «Жильыртӥсь ошмес» удмурт культурая юртын Дарья Поторочиналэн вордскемез дырысен 75 ар тырмонлы сӥзем ужрад ортчиз. Гуртысь клубе калык зал тыр люкаськиз. Дано ёросчимы сярысь тупен-тупен мадиз Дёбы черкогуртысь библиотекаын ужась Фаина Ворончихина.

Дарья Ивановна Поторочина – Удмурт АССР-ысь дано артистка. Вордскемын Чумовай гуртысь крестьян семьяын. Атаез Быдӟым ожын быриз, анаез вить пиналэн огназ кылиз. Шуг-секытъёсты вормыны юрттэм кырӟан: шумпотыкуз но, куректыкуз но сюлэмзэ буйгатылэм крезьгурен. Анайзылэсь адӟем кариллям нылпиосыз, ужлы но, кырӟанлы но огкадь дышыса будӥллям. Тужгес но шулдыр куараез вылэм Дашалэн. Дёбыысь 7 классъем школаез йылпумъямез бере Глазын улӥсь апаез сое пинал возьманы дораз ӧтем. Даша нуныез утялтэм, городысь ресторанын ужам.

Чебер тусо нылаш ужан висказ кырӟаны яратэ вылэм. Одӥг нуналэ солэсь шулдыр куаразэ кылэм Глазовысь культурая юртлэн кивалтӥсез. Дораз ужаны ӧтемез токма луымтэ, со аре ик Даша Поторочина республиканской конкурсын вормисе потэм. Сое Совето Союзын ортчись вожвылъяськонэ трос пол ӧтьылӥллям.

Отӥяз со ужаз «Италмас» ансамбльын. 1958-тӥ арын дышетскыны пыре Москваысь П. Чайковский нимо консерваторие. Музыкальной образованитэк муртъёсты отчы ӧз кутэ ке но, удмурт нылашлэн куараезлы ваньзы синмаськизы. Москваын тодон-валан люкан сяменыз шор ёзо школаын, крезьгуро училищеын дышетскиз. Соосты йылпумъямез бере туж ӧтизы ке но Ленинградэ, берытскиз вордскем палъёсаз.

Уйпал уӵымы Ижысь крезьгуро училищеын дышетэмын. Со дырысен трос аръёс ортчизы. Жаляса верано, огвакытэ Дарья Ивановна сярысь вунэтыны ӧдъязы вал. Но ёросысь удмуртлык понна сюлмаськисьёс нимзэ выльысь улӟытӥзы. Аспал эшмес данъяса, пӧртэм ужрадъёс ортчыло. Ёросысьтымы анай кылмес утёнэ мыло-кыдо пыриськисьёсты куатетӥ арзэ Д. Поторочина нимо премиен пусъё. Таӵе дан басьтыны туэ удалтӥз Дёбы черкогуртысь нылпи садын ужасьёслы.

Василий Спиридонов.

Куинь кечез кутӥзы

Февраль пумын анай кыллэсь нуналзэ пусъён дыръя Красногорск ёросын улӥсьёс куинь кечез кутыны быгатӥзы.

Ёросысьтызы тодмо поэтъёсын тодматскизы, мастер-классъёсы пыриськыса, асьсэлы тунсыко арбериос лэсьтӥзы, шудон дышетӥзы. Черкогуртысь шаертодонъя музейын ужасьёс та ужрадлы нимысьтыз адӟытон дасязы.

Валентина Кутузова.

Пичи Пурга

Брангуртысь песянайёс нюлэскын кырӟало

Брангуртысь песянайёс доры куное алигес вуылӥзы Свердловск улосысь Верхняя Пышма городысь удмурт культурая «Шудбур» клубе ветлӥсьёс. Кырӟан-эктонъёсын, перепечъёсын пумитазы соосты.

«Бускель пумиськонэ» лыктыны мылкыд каризы шаерысьтымы мукет кырӟась-верась коллективъёс но – ог 60 артистъёс люкаськизы. Кык час пала соос концерт сётӥзы.

Концерт усьтӥськиз крезь­лэн жингырась куараеныз. Собере сцена вылэ потӥзы «Арганчиос», зал тыр кичабонъёс соку ик чузъяськизы. «Азвесь гырлы» ансамбле ветлӥсьёс яркыт костюмъёсынызы бубылиос музэн бергазы, «Буйгасьтэм мылкыдъёс» вашкала кырӟанъёсынызы пай­мытӥзы. Ма, Верхняя Пышмаысь куноос но буш лыктӥллямтэ – «песьтэр тыр» вайиллям кырӟанъёссэс, сценкаоссэс но мукет паймымон номеръёссэс. Учкисьёс зал тыр я серекъязы, я кичабонъёсын согылӥзы. Эстрада кырӟанъёсты быдэстӥзы Лена но Игорь Петровъёс, Брангуртысь егитъёс. Концертэз йылпумъязы Брангуртысь песянайёс. Но удмурт шудонъёс, кырӟанъёс, эктон гуръёс бер ӝытозь чузъяськизы на.

- «Шудбурлы» луыса Удмуртиысь лымшор удмуртъёс эшшо матэгес кариськизы, – мылкыдзэ усьтӥз Брангуртысь песянайёслэн кивалтӥсьсы Ольга Туктарева. – Та пумиськон дыръя кылдӥзы выль тодмоосмы-эшъёсмы.

«Бускель пумиськонлэн» ӵуказе нуналаз Брангуртысь песянайёс кунооссэс ӧтчазы нюлэскы. Тыл вылын пӧзьтӥзы удмурт пельнянь, егитъёс дорысьтызы вайизы пыжем перепечъёс. Кин ке куас вылын ширъяз, кин ке салазкиен нискылаз, лымыын погылляськисьёсыз-шулдыръяськисьёсыз но вал. Песянайёс егитъёслэсь чик бере ӧз кыле!

Элина Васильева.

Сергей Соснов вор­дӥськемын Баграш-Бигра гуртын. Солэн кык кылбур сборникез потӥз ни, ачиз ик крезьгур малпа, баянэн шудэ, кырӟа. Со сяна, Сергей Анатольевич туж усто суредаське вылэм. Ужрадэ люкаськемъёслы со кылзэ сётӥз, одӥгаз ёрос адӟытонэ аслэсьтыз ужъёссэ поттоз шуыса. Быгатонлыкъёссэ возьматэм сяна, Сергей Соснов мадиз трос нылпиё семьяын будэмез сярысь, шуныт кылъёс вераз мемеез но атаез сярысь.

Пётр Симанов куномы вордскемын Пичи Пургалан. Со Сергей Сосновлэн матысь эшез, солэн но мукет авторъёслэн кылбуръёссыя кырӟанъёс гожъя. Пётр Васильевичлэн но куараез туж чебер. Макем усто кылӥське Сосновен ӵош кырӟамзы.

Мукетыз эшсы пинал гинэ ай, адӟем каре та кык усточиослэсь. Андрей Кабышев но кылбур гожъя, крезьгур малпа, кырӟанъёссэ, гитараен шудыса, быдэстэ.

Усточи воргоронъёсын пумиськонэ трос калык люкаськиз: ми, «Ӵыдонтэм пумиськонъёс» но «Табань» клубъёсы ветлӥсь мӧйыос, школаын дышетскисьёс но дышетӥсьёс. Ог ньыльдон пала люкаськимы. Кенешон сямен пӧсь чай юимы, зыретэн табань сиимы. Асьмелэсь но кырӟаны быгатэммес куноосмылы возьматӥмы. Арганчимы Апполос Моисеев быдэстӥз Сергей Сосновлэн кылъёсызъя «Тон кулэ мыным» кырӟанзэ.

Пӧламы таӵе йӧно но быгатӥсь пиосмуртъёс вань ке, азьлань улонлы мылкыд ӝутске.

Лидия Петрова.

Вордӥськем Поӵыш гуртам Вуж Выль арез пумитаны люкаськылӥм. Чылкыт утялтэм школаямы ӝӧк выл тыр сиён-юонэн но пӧсь чаен милемыз пумитазы Антонида Гавриловна Арсентьева, Зоя Петровна Варламова но Пётр Гаврилович Кузьмин. Пётр Гаврилович гуртын дано адями. Со бригадир но староста луэ.

Ужрадэ сьӧрло улыны кошкемъёс но трос гинэ бертӥзы. Кӧня люкаськиллям соослэн ог-огзылы веран кылъёссы! Поӵышын будэмъёс вашкала анай-атайёссылэн сямъёссыя гожъям кырӟанъёссэс быдэсъязы. Ӝожесь но шулдыресь соос, сюлэмез вырӟыто. Нош Пичи Пурга черкогуртысь «Зарни шеп» ансамбльысь усто арганчимы Николай Матвеевич Тубылов соку ик итӥськыны быгатэ туала кырӟанъёсты шудон борды. Собереяз отын ик капчи эктон гурез мытэ. Задор мылкыдо нылкышноосмы сьӧраз кырӟаны кутско, бубылиос сямен бергало.

Пумиськонмы тунсыко ортчиз: эктӥм, кырӟам, егит дырмес тодамы вайыса, синвуаським но.

Люкаськем калыкез шулдыртыны вуылӥзы Эдэйгуртысь (Бобья-Уча) культура юртын ужасьёс но. Озьы ик гуртоосты ӟечкылаз Бобья-Уча муниципал кылдытэтлэн тӧроез, «Удмурт кенешлэн» Пичи кенешезлэн ёзчиез Татьяна Петровна Сильвестрова. Антонида Гавриловналы но Пётр Гаврилович Кузьминъёслы со культураез но удмуртлыкез ӝутыса воземзы понна таукаронъёс сётӥз.

Шумпотӥсько, аръёс ортчыса но, Поӵыш гуртын вордскем адямиос гольык пыд бызьылэм интыоссэс но ог-огзэс уг вунэто, доразы котьку но шумпотыса берто, ужрадъёс сюлмысь ортчытъяло. Туэ «Гужем юонэ» выльысь пумиськыны чаклало.

Федосия Тубылова.

«Дэменъёсты» дунъян

Чайковский городын улӥсь удмуртъёс «Дэмен» огазеяськонзылэсь 7 ар тырмонзэ пусйизы. Нырысетӥ нуналъёсысеныз ик соин быгатыса кивалтэ Валентина Аристова. Та дыр куспын трос лэсьтэмын ни. Усьтэмын «Удмурт корка», кылдытэмын кырӟанъя коллектив. Концертъёсын уно пол потамын Удмурт шаерысь но Пермь улосысь пӧртэм городъёсы но гуртъёсы. Гужемлы быдэ «дэменъёс» удмуртъёслэн Гербер юмшаназы вуыло, кырӟаны-вераны быгатэменызы учкисьёсты паймытъяло.

Удмурт огазеяськонэз шуныт кылъёсын ӟечкылазы Чайковский городлэн администрациысьтыз Александр Пойлов, Михаил Мерзляков. Ужрадэ озьы ик вуэмын вал Удмурт шаерысь Воткинск городысь киужъёсъя но искусствоосъя, педколледжысь усточиослэн центръёсысьтызы ужасьёс. Соос асьсэ киужъёсынызы адӟытон радъязы. Пумиськонэ вуылӥзы Чайковскийысь 3 номеро лыдӟиськон юртысь библиотекарьёс но.

- Уно пӧртэм выжы калык пӧлын улыса но, тӥ асьтэлэсь культурадэс, сям-йылолъёстэс, анай-атайёстылэсь вашкала дӥсьёссэс уд вунэтӥське, сое калыке вӧлмытӥськоды, – «дэменъёслы» ӟеч кылъёссэ вераз Александр Пойлов. – Синмаськымон соиз: будӥсь-пушйись пиналъёстылы анай кылдэс пичиысен пыӵатыны тыршиськоды. Городмес но улосмес вашкала но туала кырӟан-веранъёсыныды, культураеныды, турлы киужъёсыныды узырмытӥськоды.

Чайковский городлэн йырызлэн нимыныз кивалтӥсьёс «дэменъёслы» синпель кузьымъёс но таукаронъёс сётъязы.

Люкаськем калыклы «Дэменэ» ветлӥсьёс шулдыр концерт возьматӥзы.

Котькудӥз кузьымен бертоз

- Та нуналъёсы ортчытӥмы ёросысьтымы культура юртъёслэн но библиотекаослэн кивалтӥсьёсынызы пумиськон, – февраль толэзьлы чаклам ужрадъёссы сярысь маде «Удмурт кенеш» огазеяськонлэн Яр ёросысь ёзэныз кивалтӥсь Валентина Дементьева. – Котькуд гуртын ортчозы анай кыллы сӥзем праздникъёс. Отчы пыриськозы нылпи садъёсын но школаосын дышетскись пиналъёс, анай-атайёс, воспитательёс но удмурт кылъя но литературая дышетӥсьёс. Ужрадъёсты асьсэос ик нылпиос шулдыртозы.

Озьы ик ӟеч дасяськон мынэ воргоронъёслэсь праздниксэс пумитан нуналлы – 23-тӥ февральлы. Ёрос библиотекае ӧтёмы адӟем карымон атайёсты, армие ветлэм воргоронъёсты но служить карыны дасяськись егит пиосты. Соос куспын чакламын пӧртэм ӵошатсконъёс ортчытыны. Жюри ужъёсты эскерон вискын куноосты шулдыртозы ёросысь «Ибырвесь», «Надежда», «Хорошее настроение» коллективъёс. Озьы ик ужрадэ мыло-кыдо пыриськыны мылкыд каремзэс ивортӥзы ини оген кырӟасьёс но. Малпаськом, котькудӥз воргорон ми дорысь пичи ке но синпель кузьымен кошкоз.

Любовь Тихонова.

Крезьгур шуккиське кыдёке

«Тюрагай»

Вотка городын 50 пала пӧртэм выжы калыкъёс уло, со пӧлысь 9 процентэз гинэ удмуртъёс луо. Таин сэрен удмуртлык понна сюлмаськисьёс ялан маке выльзэ утчазы. 1986-тӥ арын Альбина Вахрушева ӵектэмъя (бӧрысьгес со городысь удмуртъёслэн азьветлӥсьсы но вал) кырӟанъя «Тюрагай» ансамбль кылдӥз. Со вакытэ Альбина Николаевна городысь «Юбилейный» культура дворецысь ӟуч ансамбле кырӟаны ветлӥз, нош аслаз туж потэ вал удмурт гуртъёсты быдэсъямез. Озьы котыраз 7-8 муртэ люказ но ансамбль кылдытӥз. Кырӟазы асьсэ тодэмъя, нырысь-валысь арганчизы гинэ но ӧй вал. Озьы ке но дӥсьтӥсь кышномуртъёс вуоно араз «Жингырты, удмурт кырӟан» бадӟым ужрад ортчытыны быгатӥзы. Со ик луиз «Тюрагайлэн» вордскем нуналэз.

- Удмурт кырӟасьёслэсь куаразэс кылӥзы, – шуэ та ансамбльысь кырӟась, Вотка ёросысь удмуртъёслэн азьветлӥсьсы Зоя Николаева. – Шулдыръяськыны яратӥсьёс муш сямен котырамы биниськыны ӧдъязы. Нош 1993-тӥ арын ансамбльлы выль кужым пыӵатӥз крезен шудӥсь Семён Трофимов. Отӥяз милемыз быдэс шаер тодманы кутскиз, нош 1997-тӥ арын сётӥзы калык ансамбль ним.

19-тӥ феврале Воткаын «Жингырты, удмурт кырӟан» праздник ортчоз, нош калык ансамбль 25 ар тырмонзэ пусъёз. Та дыр ӵоже кытчы гинэ ӧз вуылэ ини соос. Та ансамбле нырысетӥ нуналъёсысеныз ик мыло-кыдо ветло Валентина Корепанова но Людмила Тетерина. Коллективын соосты «уӵыос» гинэ шуо. Соослэсь бере кылемзы уг поты Маргарита Паздериналэн, Людмила Пахомовалэн, Иван Титовлэн но мукетъёсызлэн.

Валентина Емельянова.

Азьветлӥсьёс эшъясько

Вуж Выль аре Пичи Пурга черкогуртэ вань удмурт огазеяськонъёслэн – «Удмурт кенеш», Удмурт нылкышно кенеш, «Дэмен», «Шунды», «Инӧс» – азьветлӥсьёссы нырысьсэ огинэ люкаськылӥзы, кылем ар понна ужамзылы йылпумъянъёс лэсьтӥзы.

- Одӥг черкогуртын ке но улӥськом, ог-огмес ум тодмаське, – шуо пичи пургаос. – Тани туэ нырысьсэ малпамы огинэ люкаськыны, ог-огенымы рос-прос тодматскыны.

Ужрадэ нылкышноос удмурт дэремъёсын лыктӥллям. Люкаськем калыкез Выль арен ӟечкылазы ёрослэн йырыз Александр Ерохин, «Удмурт кенеш» огазеяськонлэн вице-президентэз Валентин Тубылов но мукетъёсыз.

- Кылем арын ёросын улӥсьёслэн бадӟымесь вормонъёссы вал гурт удысъя но, культура ласянь но, – вера Удмурт нылкышно кенешлэн ёросысь ёзэзлэн кивалтӥсез Алевтина Данилова. – Тужгес но адскымон вормонъёс басьтӥзы дышетӥсьёсмы. Кылсярысь, Пичи Пурга гимназиысь историлы дышетӥсь Римма Александровна Владимирова Приволжск федерал округысь визьнодасьёс пӧлын радъям конкурсын вормисе потӥз. Шор Кечолысь удмурт кыллы но литературалы дышетӥсь Нина Анатольевна Ермокина «Анай кылъя устоез дышетӥсь» конкурсын вормисьёс радэ султӥз. Дышетскись нылпиослэн но вормонъёссы вал гинэ. Соос шаерамы но ёросъёсын ортчылӥсь уно пӧртэм конкурсъёсы но ӵошатсконъёсы пыриськылӥзы.

- Удмурт огазеяськонъёслэн ужрадъёсазы мед пыриськозы вылэм гурт удысын тыршисьёс но, – сюлэмшугзэс веразы куд-ог нылкышноос. – Соосты но ӧтьылоно, палэнэ медаз кыле.

Люкаськем калык, ог-огеныз тодматскем сяна, ӝытбыт шулдыръяськиз, азьланезлы ужаны мылкыд пыӵатӥз.

Любовь ТИХОНОВА.

ЮКАМЕНСК

Бӧрдэм потэ

Трос аръёс ӵоже Юкаменск ёросысь удмурт кылъя но литературая урокъёсты нуисьёсын быгатыса кивалтэ Лариса Булдакова. Ёросысь чиньыен лыдъямон школаосын гинэ удмурт кылэз дышето на шуыкуз, Лариса Георгиевналэн синвуосыз ик пото. Удмуртлыклы сӥзем арняос, толэзьёс, котырес ӝӧк сьӧрын пумиськонъёс ортчытъяськом ке но, со ӧжыт, шуэ.

2009-тӥ арын Лариса Георгиевна шаерысьтымы кужмоез дышетӥсь ним басьтэмез бере быгатонлыкъёссэ возьматӥз Москваын. Тодмотэм адямиос азьын удмурт дышетӥсь ӧз ыштӥськы, куинетӥ инты басьтӥз. Россиысь конкурсэ пыриськемзэ туннэ но уг вунэты:

- Празднике вуылэм кадь потӥ. 19 улосысь дышетӥсь ас калыксылы тупась дӥськутэн лыктӥллям. Дышетӥсьёс куспын нюръяськон капчиен ӧз сётскы, конкурсэ пыриськемъёс пӧлысь ваньмыз сямен городъёсысь визьнодасьёс вал, нош мон кадьёсыз – ёрос центръёсысь яке гурт школаосысь шедемъёс – чиньыен лыдъямон гинэ. Мурт пиналъёсын урок сётонлэсь ӧй но кышка, ӧй но жадьы, вань секытэз ортчиз… гуртын.

Москвае мынон азяз Лариса Георгиевна дасяськыса трос уйёссэ кӧлытэк потэм. Ярано коть, кузпалыз но кык пиосыз валазы, быгатэмзыя уроклы материалъёсты вандыса, буяса дасязы. 7-тӥ классын дышетскись пиез Москвае сьӧраз ветлӥз. ӵок ойдо, мукет дышетӥсьёс понна висьыны министръёс ветлӥзы ке.

- Монэ мукетыз паймытӥз: Москваысь вуэме бере вормонэлы шумпотӥсьёсыз ӧжытгес вал кадь, со понна вожъяськисьёсыз – лачак, – шуэ Лариса Булдакова. – Жаляса верано, удмурт кылэз дунъясьёслэн лыдзы ичиёме. ЕГЭ шуон ваньзэс кышкатэ, соин сэрен анай кылъя урокъёсмес куд-ог дышетӥсьёслэн но, анай-атайёслэн но мултэс каремзы потэ. Ёросысь 5 школаын гинэ на удмурт кылъя урокъёс нуисько.

Валентина ЕМЕЛЬЯНОВА.

Туспуктӥз Владимир БЕЛОМОРСКИХ.

ДЭБЕС

Анайёс дырто клубе

Таяз арлы ужан план пусйыса, Удмурт нылкышно кенешлэн правлениезлэн берлояз пумиськоназ ужпум ӝутскиз быръёнъёслы но йылпумъянъёслы сӥзем котькуд конференциын адӟем карымон но азьмынӥсь кышномуртъёслы данъян пус сётон сярысь. Та юанэз ӝутыны чакламын таяз арын мартэ ортчоно конференциын.

Озьы ик азьланяз бадӟымгес саклык висъяськоз удмурт анайёслы, соослы сӥзьыса, элькун ужрадъёс ортчылозы. Талы инъет луиз Дэбесын радъям «Данъясько тонэ, удмурт анай!» конференция. Сӥземын вал со Анайлэн нуналэзлы. Отчы пыриськизы Дэбес, Эгра, Шаркан, Кез ёросъёсысь но Ижысь анайёс, семья ужпумъёсъя отделъёсын ужасьёс но Удмурт нылкышно кенешлэн ёрос ёзъёсызлэн кивалтӥсьёсыз. Вить ар талэсь азьло дэбесъёс таӵе ужрад асьсэ понна радъязы вал.

Ёросысь культура юртын ортчиз удмурт мемиосты данъян ӝыт. Удмурт нылкышно кенешлэн кивалтӥсез Надежда Степанова люкаськемъёсты тодматӥз огазеяськонлэн ужаменыз но азязы сылӥсь ужпумъёсын. Нылпиос анайёс понна дасяллям крезьгуро салам. Психолог Ольга Смирнова но сексолог Анатолий Бубин юрттэтлы кулэяськисьёслы валэктонъёс сётӥзы. Семьялы юрттэт сётӥсь специалистъёсын егит анайёс азьло нылкышно клубъёс пыр пумиськыны быгато вал.

Лия МАЛЫХ.

ИЖ

Буко пыр потон

14-тӥ январе Тодосчиослэн юртазы бадӟым ужрад ортчиз: Вуж Выль арез келян но пӧртмаськон, тунаськон-вожояськон сям-йылолъёсты утён-возьматон. Пумиськонэз радъяз тодосчи Альберт Разин, ӝытэз нуиз УдГУ-ысь дышетӥсь Елена Булычева.

Татчы шаерысьтымы пӧртэм интыосысь коллективъёс вуиллям: Ижысь – «Ижкар», «Эшъёс», «Ӟардон», «Тюрагай», «Чипчирган», Дэри ёросысь – «Пероггурт кильтырнаос», Ягулысь «Ягдор», Пичи Пурга ёросысь «Гожня кенакъёс». Пероггуртысь кенакъёс гын сапегъёссэс вайиллям. Соосты радэн-радэн тырыса, пӧртмаськон кутскиз. Вань мылкыд карисьёс сапегъёс пушкы кизэс лэзьязы, отысь кузьым шедьтылӥзы. Кинлы ке шеде сугон, мукетызлы – кампет, куинетӥезлы – ӟенелик… Нош гожня кенакъёс калыкез буко пыр поттазы. «Чипчирган» ансамбльлэн кивалтӥсез Ирина Пчеловодова уно шудонъёс ортчытӥз.

Люкаськем калыкез куно каризы чаен, перепечен но шаньгиосын. Ӝыт пайдаё но туж шулдыр ортчиз. Та мытэм ужмес вуоно арын но азинтоно, шуизы городын но гуртын улӥсь удмуртъёс. Туэ та ужрад куинетӥзэ ортчиз ини.

Раиса КОРЕПАНОВА,

Ижкар.

«Герд» огазеяськонлэн тӧроезлэн воштӥсез М. Сельченкова, удмурт постпредствоын ужась, удмурт бӧляклэн ар куспын ужамез сярысь вераз.

Маргарита Родионовна пусйиз, туэ трос пӧртэм ужрадъёс ортчытэмын вал, куд-огез кунгож сьӧрысь эшъёсын валче радъямын. Кылсярысь, тулыспал толэзьлэн пумаз Москваысь Национальностьёслэн юртазы ортчиз Удмуртиысь калык писательлэн Вячеслав Ар-Сергилэн но Черногориысь писательлэн Душан Джуришичлэн творчествозылы сӥзем ӝыт.

Кылем арлэн пумаз Удмуртиысь дано артисткаен Надежда Уткинаен пумиськон радъямын вал, озьы ик Удмуртиысь дано суредасьлэн В. Костылевлэн адӟытонэз усьтэмын. Тулыс Москваысь одӥгаз ресторанын удмурт егитъёслы сӥзем «Узы-боры» фильм возьматӥзы, отын шудӥсь артистъёсын пумиськон ортчиз.

Нош «Герд» огазеяськонлы 20 ар тырмонэн валче гужем шорын Бронницыын шулдыръяськон радъямын вал. Удмурт эшъёссэс ӟечкыланы Москваысь мукет огазеяськонъёслэн тӧрооссы но вуылӥзы. Шуныт кылъёс веразы В. Шаймиев – «Онар» пор огазеяськонлэн тӧроез но Г. Крылов – чуваш общиналэн кивалтӥсез.

Нош кыӵе праздник луоз концерттэк? Люкаськем калыкез шулдыртӥз Удмуртиысь культура удысысь дано ужась, полициысь подполковник В. Ельцов. Россиысь югдурез утёнъя министерстволэн Москва каръя валтӥсь управлениысьтыз духовой оркестрлэн шудэмез улсын ачиз гинэ ӧз, бичаськемъёсты но кырӟатӥз! Кужмо куараеныз паймытӥз аспалмы, калыккуспо конкурсъёслэн лауреатсы, «Геликон-Операысь» валтӥсь кырӟась П. Быков.

Быгатэмзэс возьматӥзы Щепкин нимо вылӥ театральной училищеысь куинетӥ курсын дышетскисьёс но. «Юри кырӟаны лыктӥм но юри вераны лыктӥм» шуыса лэзизы ук! Люкаськем калык но мылкыдзэ кутыса ӧз ни возьы – крезьгур шудэм улсын эктыны потӥз.

Лариса Марданова,

удмурт бӧляклэн ёзчиез.

«Удмурт кенешлэн» Пермь улосысь ёзэзлэн азьветлӥсез Станислав Гадиятов верамъя, таӵе быдӟым вӧсяськонэз ортчытыны дэмлаз Пермь улослэн администрациез. Со ик коньдонэн но юрттӥз. Ужрадлы коньдон озьы ик  висъяз районлэн администрациез.

Куеда палась удмуртъёслэсь вашкала сямъёссэс тодыны тырше история наукаосъя кандидат Александр Черных. Ачиз Александр Васильвич вордскемын та палъёсын. Выжыезъя со ӟуч, но удмурт сямен туж усто вала. Аслэсьтыз наукая ужъёссэ Черных сӥзиз удмуртъёслэн культуразылы но историзылы. Солы луыса Пермь улосын удмуртъёс сярысь трос тодӥськом.

Тол вӧсьлы дасяськон но рос-прос радъямын вал. Нырысь ик вашкала документъёсын бугыръяськизы, трос выльзэ шараязы. Уго та дырозь Бадӟым Гондырысь удмуртъёс мыло-кыдо радъяллязы «Дӧдьы кыткон» фестиваль. Нош та шулдыръяськон Тол вӧсьлэн кыкетӥ люкетэз гинэ луэ вылэм ай. Вашкала дыръёсы та палась удмуртъёс нырысь Инмарлы куриськылӥзы. Со вӧсяськон инты али но вань – Гондыр но Эсэт гуртъёс вискысь бусыын.

Тол вӧсь сӥземын сӥзьыл бусы ужъёсты быдэстонлы. Юэз октэм-калтэм, сое итымын кутсам бере гуртоос Инмарлы тау карылӥллям бадӟым урожай басьтэмзы понна. Вӧсяськонын Инмарлы чуньы сӥзё вылэм, азьпалан тол капчиен мед ортчоз шуыса но куриськиллям. Кылчинлы ветыл но ӟазег сӥзьылӥллям. Собере та пудо но тылобурдо сӥлен пӧсь лым но ӝук пӧзьтылӥллям.

Александр Черных историклэн таӵе верамъёсызлы Пермьысь мукет тодосчиос туж паймо: та дырозь язычникъёс вань на шат, пе? Вашкала удмурт инмаръёслы оскисьёс вань, утисько на калык сямъёс но.

Тол вӧсь йылпумъяськиз «Дӧдьы кыткон» фестивален. Татын радъяськизы ӵошатсконъёс, чузъяськизы шулдыр кырӟанъёс.

Елена Скворцова.

Зоя Лощилова (бурысез), солэн Ольга нылыз но нунокъёсыз.

Свердловск улосысь Верхняя Пышма городын вить ар талэсь азьло усьтӥськиз удмурт культурая «Шудбур» клуб. Вакчи дыр куспын со огазеяны быгатӥз улосысь удмуртъёсты, эшъёсыз кылдӥзы мукет шаеръёсын улӥсьёс пӧлын но. Та умой адӟиськиз центрлэсь юбилейзэ пусъён нуналэ. Пӧртэм сэрегъёсысь куноос вуылӥзы – Екатеринбургысь, Свердловск улосэ ик пырись Дегтярск, Нижний Тагил, Среднеуральск, Каменск-Уральский городъёсысь, Балтыма, Горный Щит черкогуртъёсысь. Вал Казахстанысь но Удмуртиысь вуэмъёс.

«Шудбурлэсь» юбилейзэ пусъён Свердловск улосын удмурт движенилэсь кылдэмзэ но юнмамзэ тодэ ваёнлы муг луиз. 1991-тӥ арын Ижын ортчиз быдэс Россиысь удмуртъёслэн нырысетӥ съездзы. Отчы ӧтемъёс пӧлын ик вал ни Свердловск палась делегатъёс.  Со – А. Белоусова но З. Сабирзянова. Удмуртилэн шоркарысьтыз соос, шумпотон синкылиосын пачыласа, берытскизы, сокем синмаськиллям удмурт калыклы, солэн чеберезлы но кужмо луэмезлы.

Верхняя Пышмаын удмурт движениез кылдытон борды кылем даурысь 90-тӥ аръёсы гижысь-пиньысь басьтӥськизы Зоя но Виктор Лощиловъёс. Со вакытысь секытъёслы ӧз сётӥське, удмуртлыкез утён понна сюлмаськизы. Праздникъёсы но, огшоры нуналъёсы но калыкез люкаллязы, удмурт кырӟанъёсты нёжъязы, удмурт гуръёсъя эктӥзы, анай кылынызы вераськизы.

Тодаз вае журналист Лариса Хлебцева:

- Городысь калык культураослы сӥзем нырысетӥ фестиваль али но син азям. Зоя Лощилова пӧрмемын вал вашкала удмурт дэремен, чыртывесьёсын – шӧдӥськиз, соос даурлэсь кемалась вуремын-бичамын. Нялтас вераса, Лощиловалэн нунокъёсыз но удмурт дэрем дӥсяло ни. Зоя ачиз соослы дӥсь вуриз. Нылкышно серекъяса вералля: нунокъёсыз умме усьыны уг быгато, кӧлон азязы соослы удмурт кырӟан уд кырӟаськы ке.

* * *

Свердловск улосын удмуртлыкез ӝутонлы трос кужымзэ но быгатонлыксэ сётэ Евгения Вахрушева. Улэ Екатеринбургын. Ӵапак со нырысь ик вазиськиз Зоя Лощиловалы Верхняя Пышмаын удмурт клуб усьтон мылкыдын. Кык нылкышноос куспазы кенешизы, шуизы: «Шудбур» удмурт кырӟан-эктонъёсын гинэ медаз выры. Со мед басьтӥськоз удмурт сямъёсты но йылолъёсты улӟытон борды. Нимысьтыз саклык висъялоз Свердловск улосысь, Верхняя Пышмаысь удмуртъёсты огазеянлы. Озьы ик луиз.

«Шудбуръёслэн» сюлмаськемзылы-тыршемзылы луыса интыын печатласькись газетын толэзьлы быдэ кык-куинь пол но пото удмуртъёслы сӥзем гожъямъёс. Талы луыса котырысь кӧня ке сюрс адямиос тодматскизы ни та калыклэн культураеныз, улэм-вылэменыз, киужъёсыныз. Кытчы гинэ медаз мынэ «шудбуръёс», котькытын ик радъяське «Бускель пумиськон» – пӧртэм интыосын улӥсьёс ог-огенызы матэгес тодматско. Сыӵе ужрадъёс ортчизы ни Тюменьын, Свердловск улосысь Каменск-Уральский городын, Кислово, Мартюши черкогуртъёсын но Октябрьский каргуртын улӥсьёсын.

Пышмаосты тодо Удмуртиын но. «Бускель пумиськонъёс» радъяськылӥзы Алнаш черкогуртын но Алнаш ёросысь Сыръезь гуртын, Пичи Пургалась Эдэйгуртын, Выль Мӧньялан, Брангуртын улӥсьёсын.

Зоя Лощилова ужа Верхняя Пышмаысь калыкез улон-вылонын утёнъя управлениын. Соин ик ужезъя трос пумиськылоно луэ городын улӥсьёсын. Огшоры пумиськонъёсты но со табере пӧрмытэ удмуртлыкез азинтонлы – одно пыжо перепеч, киужъёсын но удмурт дӥсен адӟытонъёс радъяло.

«Шудбуре» ветлӥсьёслэн лыдзы пумен йылэ. Пӧлазы ӧжыт ӧвӧл ни ӟуч выжыысь потэмъёс но. Тодаз вае Любовь Автамонова:

- Городлэсь нуналзэ пусйиськом вал. Шор площадетӥ ортчисько, кылӥсько – сыӵе чебер кырӟало! Юатэк ӧй чида: кыӵе кылын кырӟаськоды? Удмурт! – жингрес кеське Зоя. Кузпалыз Витя арганзэ та вискын кысканы кутскиз – сюлмы ачиз пӧлазы кыстӥськиз. «Шудбуре» кыски ни внучкаме но.

Валентина Пантелеева но удмурт клубе малпамтэ шорысь шедиз. «Шудбуръёс» репетиция ортчыто вылэм – урамын ӝокыт, укноос вӧлак усьтэмын. Кырӟан гуръёссы кыдёке чузъясько. Нылкышно эшъёсыныз ӵош ӵап со вакытэ укноос ултӥ ортчыны тупаз. Доразы кожытэк ӧз чида. Пӧлазы пыраклы кылиз.

* * *

Лощиловъёслэн Ольга нылзы но табере удмуртлык пӧлы выемын, «Шудбурен» кивалтэ. Юбилеез пусйыку, со ӧз ваты:

- Анай-атае кема турттӥзы монэ та ӧре кыскыны. Пумитъяськисько вал, малы со кулэ, малпалляй. Но табере азязы йыбырттыны дась! Шонер сюрес вылэ султытыны монэ быгатӥзы, удмурт тулкымъёс вылын азьлань вамыштыны луонлык сётӥзы. Табере асме син азям мукетэн пуктыны но уг быгатӥськы ни.

Праздникез пусъён программае юнме пыртэмын ӧй вал 40 нуналъем нунылэн пушказ лулпыронэз возьматӥсь йылол. Со вань люкаськем калыклы оскон сётӥз: кутскем ужзы уката паськыталоз, радъёссы йылозы. Верхняя Пышмаын 80 пала пӧртэм выжыысь калыкъёс ог-огзэс гажаса-валаса уло. Удмуртъёслэн соос пӧлын асьсэлэн интызы.

Лариса Степанова.

Ижысь 59-т

«Удмурт кенеш» огазеяськонлэн Первомай ёросысь ёзэз но та ужрадэ пыриськиз. Ӟучъёс кедр но пужым мерттӥзы ке, удмуртъёс – палэзьпу. Кызьы вераз ёросысь удмуртъёслэн азьветлӥсьсы Ольга Шилова, азьланяз та школаын «Шуныт пумиськонъёс» радъяны чаклало. Школа музейын толэзьлы быдэ удмуртъёс люкаськылозы. Тодазы ваёзы вашкала удмурт выжыосты, йылол-сямъёсты. Кылем толэзе нырысетӥ пумиськон ортчиз, куное ӧтчамын вал шаерысьтымы тодмо нылкышноос: Нина Игнатьевна Малых но Валентина Николаевна Чернова. Матысь дыре та школаын ортчытыны дасясько Трокай Борисовлы сӥзем ужрадъёс.

Валентина Емельянова.

Вавож ёросысь Выль Бия культура юртын бадӟым праздник ортчиз. Со сӥземын вал кылбур дуннелы. Ужрадэ быдэс ёросысь кылбурез яратӥсь нылпиос но мӧйыос пыриськизы. Пумиськонэ ӧтемын вал «Удмурт кенешлэн» вице-президентэз Татьяна Ишматова, кылбурчиос Елена Миннигараева, Любовь Тихонова, Лидия Нянькина но писатель Олег Четкарёв.

Ӝытэз усьтӥз Выль Бия культура юртысь нылкышноослэн коллективзы. Соос кылбурлы сӥзем кырӟанзэс быдэстӥзы. Куноослы нылпиос трос юанъёс сётъязы, асьсэлэсь но гожтэмъёссэс лыдӟизы. Гурезь-Пудгаысь, Зямбайысь но Выль Бияысь тэшкылиос, эсьмаса, чуренак султыса, кисьтӥзы ук чуръёссэс! Милям пичи Гердъёсмы будо шуыса, ушъяськизы соос.

Татьяна Ишматова интыяз пукыны ӧз чида ни: кырӟаса лэзиз ук!

- Вавож музъем узыр кылбурчиосын, – шуиз «Удмурт кенешлэн» Вавож ёросысь ёзэныз кивалтӥсь Геннадий Шубин. – Ми дорын вордскемын Кузебай Герд, Фома Ермаков, Сергей Матвеев. Кылбуръёс гожъялляз Нина Голубьева. Жаляса верано, со улонысь вазь кошкиз.

Озьы ик та ӝытын аслэсьтыз кылбуръёссэ лыдӟиз Выль Бия шор ёзо школаысь удмурт кыллы но литературалы дышетӥсь Мария Дягелева. Мария Павловна туэ нылпиосын литературно-творческой кружок нуыны басьтӥськем.

Вератэк кельтыны уг луы Выль Бия школаен кивалтӥсез Нина Ефремоваез но. Можга педучилищеын дышетскыкуз, со Геннадий Павлов крезьгурчиен ӵош «Кӧня меда, кӧня меда лыз инмын кизилиос» кырӟанэз гожтӥз.

Сцена вылэ потытэк ӧз чида кылбурчи Владимир Наймушин но. Калыкез  паймытӥз чебересь чуръёсыныз – Вало шур кадь визылало соос.

Та сяна, пумиськонын эшшо паймытӥсез вал на. Суредась Николай Бушков синмез мальдытӥсь ужъёссэ возьматӥз. Вавожысь культура отделэн кивалтӥсь Владимир Шутов но ӟуч но удмурт кылъёсын чебересь  кылбуръёс гожъя вылэм. Нош черкогуртысь нылпи садын ужась Людмила Волкова яратыса, пе, лыдӟисько «Удмурт дуннеез». Газетын ужасьёсты со ваньзэсты нимын-тулын тодэ.

Любовь Яковлева.

Ваньмыз али гинэ, но со дыре ик туж кемалась кутскиз кадь. «Удмурт кенеш» ассоциацилы – 20 ар. Та дыр

Вераськиськом «Удмурт кенеш» ассоциацилэн президентэныз, Кун Думаысь депутатэн Николай Мусалимовен.

- Николай Николаевич, «Удмурт кенешен» куинь ар пала кивалтӥськоды ни. Секыт-а вал биньгозыез кияды кутыны?

- «Удмурт кенешен» кивалтыны кутски Валентин Кузьмич Тубылов бере. Азьвыл та ӧрез валтоно луоз шуысалзы ке, ӧй но оскысал, дыр. Но улон ачиз сямен берыктӥз. «Удмурт кенешен» кивалтыны кутскыку, со  йыг-йыг пыд вылаз сылӥсь огазеяськон вал ни. Ассоциациез тодо, гажало. Соин ик мыным, одӥг ласянь, капчигес вал. Мукет ласянь, гажамзы ик косэ саесъёсты пужалляса ужаны. «Удмурт кенеш» котыре тросгес но тросгес калык мед люкаськоз, огъёсыз котырын гинэ ваньмыз медаз берга, выль кужым мед вуоз.

Нош кужым потэ интыосысь. Макем зол ужало каръёсын, ёросъёсын, сокем тросгес адямиос тодо «Удмурт кенеш» сярысь.

- Огвакытэ удмурт огазеяськонъёс кир-пазь ужазы. Али тросэз «Удмурт кенеш» ассоциацилэн бурд улаз. Ог-огдэс валамтэос луо-а?

- «Удмурт кенеш» – со кык-куинь адями гинэ ӧвӧл. Со – вань удмурт калыклэн ассоциациез. Озьыен, солэн ужаз котькуд адями пыриськыны быгатэ: егитэз но, пересез но, колхозын тыршись но, школа директор но. Валамон ини – адямиос туж пӧртэмесь. Шуом, кинлы ке матын удмурт культурая «Дэмен» огазеяськон, мукетызлы – Удмурт нылкышно кенеш, куинетӥез ассэ камсьӧръёс пӧлы пыртэ, ньылетӥез «Шундые» вамыштэ. Но вань та огазеяськонъёслэн инъетсы анай кылэз, удмуртлыкез утён. Адями, та дунне вылтӥ паськыт вамышъяса, медаз вунэты дорзэ но выжызэ, удмурт луэмзэ.

Шумпотӥсько, али вань удмурт огазеяськонъёс, киысь чиньыос выллем, одӥг кырымын. Ӵошен, огкылысь ужаса, соос тросгес лэсьтыны быгато, пӧртэм ужпумъёсты ӝутыку, ог-огзылы юртто.

- «Удмурт кенешлэн» Россиысь 17 улосын, шаерысьтымы ваньмаз ёросъёсын ёзъёсыз вань. Кудӥз тужгес синмаськымон ужа?

- Котькытын быгатыса тыршо. Вуылӥ ни Пермь, Свердловск улосъёсы, Башкортостанэ, Татарстанэ, Марий Элэ. Аспӧртэмлыксы вань. Шуом, Свердловск улосын кӧня ке удмурт огазеяськон ужа. Соос куспазы вожвылъясько, котькудӥзлэн валтӥсь луэмез потэ. Сыӵегес ик югдур Пермь улосысь Чайковский карын. Зэм, огвакытэ ик кӧня ке удмурт огазеяськонъёслэн ӝужамзы туж умой. Соос калыклэн мылкыдызъя пушъё ук. Мукет ласянь, соослы куспазы одӥг кыл шедьтыны быгатоно, огъя центр, огъя тӧро юнматоно. Соку капчигес луысал ёросысь кивалтӥсьёсын кусып тупатыны, коньдонэн герӟаськем ужпумъёсты вырӟытыны. Но, малпасько, ваньмыз та, кызьы ӟучъёс шуо, «болезнь роста» – интыосысь ёзъёслэн быдэ вуон вакытсы. Удмурт шаерысь удмурт движение но со пыр потӥз ук.

Туж синмаськымон ужало Татарстанысь но Башкортостанысь удмурт автономиос. Шуом, Башкортостанын пӧртэм ёросъёсын удмурт огазеяськонъёс, соослэн азьветлӥсьёссы вань. Но со дыре ик ваньзэс валтэ одӥг адями – Ренат Галямшин. Солэн кивалтэмезъя вань ёзъёс пыч-пыч тыршо. Соос мында али уг лэсьто, дыр, огаз диаспораын но. Тодамы ваём трос аръёс ӵоже ужась «Усточикар» лагерьзэс ик. Нош али вераськон мынэ ни Башкортостанын удмурт гимназия усьтон пумысен.

- «Удмурт кенешлэн» ужез кӧня ке удысъёсъя радъяське: этнополитика но право, дышетон, иворъёсты вӧлмытон, культура, экономика но ужбергатон, тазалык, инкуазез утён но демография. Кудӥз тужгес секытэн мынэ?

- Ужбергатон. Та удысъя маке лэсьтыны тыршиськом кадь, пайдаез уггес шӧдӥськы на. Малпасько, ужбергатӥсьёсты котырамы кыскыны луысал, асьмеос но соослы маин ке юрттысалмы ке. Но кызьы, маин? Али «Удмурт кенешен» юн кусып возись ужбергатӥсьёс пӧлысь пусйысал Павел Титовез («Титан»), Павел Вершининэз («Пастарель»), Анатолий Максимовез («КОМОС»).

Юртто СПК-ос но: Грак ёросысь «Родиналэн» кивалтӥсез Михаил Крестьянинов, Вавож ёросысь «Колослэн» – Владимир Красильников, Мичурин нимо хозяйстволэн – Валентин Калинин, Пичи Пурга ёросысь «Нырысетӥ майлэн» – Александр Ерохин, «Родиналэн» – Семён Фёдоров но мукетъёс.

- Ньыль арлы одӥг пол люкаськылэ вань удмуртъёслэн ӧтчамзы. Отын ӝутӥсько шугъяськытӥсь  ужпумъёс, кутӥське азьланезлы ужан программа. Солэн быдэсъяськемезъя ма шуысалды?

- Кызьы мыно ужъёс – эскериськом исполкомын но Пичи Кенешын. Котькуд ужпумъя исполкомын нимысьтыз группа юнматэмын. Нимаз-нимаз нокинэ ӧй пусйысал – ваньзы тыршо, программаын ӝутэм ужпумъёсты быдэстон сярысь сюлмасько.

Котькуд калык дуно аслаз культураеныз. Милемыз, удмуртъёсты, туж ӟеч тодо фин-угор дуннеын, нош оглом кунамы, Россиын, пӧртэм-пӧртэм калыкъёс пӧлын ми сылмиськом. Нош туж потэ вылэм, калыкмы сярысь тросгес мед тодозы Россиысь кивалтӥсьёс но, огшоры адямиос но. Оло, «Удмурт кенеш» огазеяськонэз Россиысь удмуртъёслэн автономизы дорозь ӝутыса, югдур умойгес луоз. Бигеръёслэн сыӵе автономизы вань ук. Соку, оло, федерал кисыысь коньдон но тросгес висъяськоз. Та ужпумез матэктӥсь ӧтчамын эскероно. Ужпумез вырӟытыны луиз ке, соку Россилэн кыдёкысь улосъёсысьтыз удмуртъёс бордамы капчиенгес кыстӥськысалзы.

Берло аръёсы быдэстэм ужъёс пӧлысь пусйысал: «Удмурт кенешлэсь» ужзэ паськытатон понна куинь министерствоос – Культурая, печатья но иворъёсъя, Дышетонъя но наукая, Нациосын ужан политикая – куспын тупанкыл гожтэмын. Туэ быдэс республикаямы ортчо Т. Борисовлы сӥзем ужрадъёс. Мон уг ни вераськы арлы быдэ ортчылӥсь ужрадъёсмы сярысь – Герд лыдӟонъёс, фольклор фестивальёс, семинаръёс, акциос…

Малпасько, «Удмурт кенешлэн» ёросысь ёзъёсызлэн азьветлӥсьёссылы юнгес кусып возёно интыосысь кивалтӥсьёсын, муниципал кылдытэтъёслэн йыръёсынызы. Угось удмурт съездъёсын кутэм огкылъёсты оген уд быдэсты.

Огинтыяз лёгаськись мурт нокинлы тунсыко ӧвӧл, дыр. Бордамы тросгес кысконо пӧртэм удысъёсысь удмурт азьветлӥсьёсты. Та ласянь ачим но, исполком но, оло, тырмыт ум ужаське на. Но, мукет ласянь, котькуд адямилэн аслаз но граждан позициез луыны кулэ. Оло, вазиськемез возьмаса, пуконо ӧвӧл?

- «Удмурт кенеш» пыр 20 ар ӵоже  туж трос адямиос ортчизы. Кыӵе кылъёс верасалды соослы?

- Тау кареме потэ ваньзылы, кин бергаз та ассоциация котырын, сюлмаськиз солэн ужез сярысь. Нимысьтыз тау та огазеяськонэн кивалтэм адямиослы. Трос-а, ӧжыт-а ужано луиз соослы, но вань сюлэмзэс сётыны тыршизы. Михаил Шишкин – «Удмурт кенешлэн» нырысетӥ кивалтӥсез, солы инъет кылдытоно, фин-угор ӧре пыроно луиз. Нош кутскыны котьку секыт. Роза Яшиналэн лыктэмез «Удмурт кенешез» сэзъялтэм кадь луиз, бугыртӥз, выль мылкыд пыӵатӥз. Иван Гришкинэн ӵош вуизы тодосчиос, эмъясьёс. Василий Осипов предприятиосын кусып тупатӥз, ужась калыкез кыскиз, Валентин Тубылов интыосысь но палэнысь ёзъёсты юнматӥз.

Тау кареме потэ вань вице-президентъёслы. Ӵемысь соос вылэ усе тужгес трос бызьылонэз. Нош исполкомтэк, Пичи кенештэк, интыосысь ёзъёстэк маке лэсьтод шат? Мон сӥзисько ваньмызлы тазалык, ог-огдэ валан но бурдъясь мылкыд! Калыкмы азинлыко мед луоз!

«Удмурт кенеш» кылдӥз аслаз удмурт калыклэн мылкыдызъя. Вылӥысен нокин ӧз косы. Озьыен, со кулэ калыклы. Оскисько, ассоциацилэн но оглом удмурт калыклэн азинлыкез юнмалоз. Угось асьмелэн туж тунсыко, визьмо егитъёсмы будо!

Елена Миннигараева.