Сюресмес лымылэсь сузясьёс кенер выламы пыризы. Нош со милям профнастиллэсь. Мар кароно?

Мария В.

Дэри ёрос.

Лымы сузясьёс янгыш шуыса, нимысьтыз акт лэсьтоно. Со понна дорады ӧте муниципал кылдытэтысь специалистэз, сюресэз тупатъян-утялтон огазеяськонлэсь кивалтӥсьсэ я воштӥсьсэ, шедьтэ на адӟисьёсты. Сюрес понна кыл кутӥсь огазеяськонлы вазиське, тӥям кенердылэсь дунзэ мед тыроз шуыса. Пумит кариськиз ке, вамыштэ судэ. Куриськонды борды итэ на профнастилды кӧня тыр усемез возьматӥсь чекъёсты. Сьӧрады кутэ адӟисьёсты.

Уллязы

Санитарка луыса ужасько вал. Утялтӥськонын ӵемысь кутоно луэ хлоркаез. Нош мынам тазалыкеным соин вырыны уг яра. III группаем инвалид мон. Больницаысь справкаме уж сётӥсьлы возьматӥ но, со монэ воксё мозмытӥз. Мукет уж, пе, ӵектыны ум быгатӥське. Шонер-а со?

Надежда Т.

Можга.

Тӥледлы мукет уж ӵектыны кулэ вал. Собере хлоркаез воштӥсь мукет суретъёс но вань. Соиз но, таиз но тӥледлы поттылэмын ӧй вал бере, вазиське прокуратурае. Югдурдэс таос рос-прос мед эскерозы. Но тодэ: уллямзы сярысь приказ гожтэм бере 1 толэзь ортчыса медаз вутты. 1 толэзь ортчем бере прокуратураын тӥледлы юрттыны уз быгатэ ни.

Анай кулӥз, уксёез кылиз

Анае кулӥз. Сберкнижкаез кылем. Быгатӥсько-а мон, одӥг гинэ нылыз,   сое аслым карыны? Анай луон правозэ суд пыр дас ар талэсь азьло талазы вал юэмысьтыз.

Ольга Р.

Алнаш ёрос.

Анай-атай луон право таламын ке но, нылпиос наследник луэмысь уг дугдо. Озьыен, тӥляд праводы вань анайдылэн сберкнижкаеныз кузёяськыны. Но отысь уксёзэ басьтон понна кулэмезлэсь 6 толэзь ортчемлэсь азьвыл вазиськоно анайдылэн улэм интыезъя нотариус доры. Сьӧрады кутэ паспорттэс, кулэмез сярысь свидетельство, вордӥськемды, быземды сярысь свидетельство, анайды зэмен ик со адресъя улэ вал шуыса возьматӥсь справка. Вань та документъёслэн копиоссы кулэ на. Соос вылэ пыкиськыса, нотариус Сбербанке куриськон ыстоз. Банкын рос-прос эскерозы: одӥг гинэ вал-а анайдылэн книжкаез, кӧня отын уксёез но мукет. Кык толэзь ортчыса, уксёез басьтыны быгатоды.

Коньдонэн кутчало?

Нылпиелы ӝыны арес. Сое утьыса, отпускын пукисько. Но шӧдӥ: ужысь бухгалтерия мыным толэзьлы быдэ вуись пособиез ялан пичиятыса ыстэ. Я кык сю, я вить сю манетлы ичигес келя. Мар та таӵе шуыса вазиськи но, бухгалтермы кассир вылэ чӧлскиз, со, пе, выре соин. Кӧня бен мынам пособие шуыса юай но, ог 3 сюрс манет, пе. Нош мон 2 но ӝыны сюрс но уг басьтӥськы! Кызьы югдурез рос-прос тодоно, кудбыдӟа мыным пособие вуыны кулэ?

Ирина С.

Иж город.

Ужан интыя бухгалтерие вуэ соцстрахысь документ. Отын пусъемын, кудбыдӟа пособие тӥледлы висъяське. Сое куре но учке. Тупатэм лыдпуслэсь ичигес тыро ке, вазиське Удмуртиысь ужъя кун инспекцие – югдурдэс тупатозы. Документ бухгалтериын уг возьмато ке, мынэ улэм интыдыя администрациысь улон-вылонэз утёнъя ёзэтэ. Отын но со бумага луыны кулэ. Эн вунэтэ созэ но: пособие толэзьлы быдэ огбыдӟа вуыны кулэ.

Возьмано, пе…

Картэным сюан шудӥм 1962-тӥ арын толалтэ. Нош гожтӥськыны куриськон загсэ нуим гужем гинэ. Шуизы: лыктоды июне. Вуим но, ӧс бордын ӵабыштэмын: кошким турнаськыны. Озьы вуиз 1963-тӥ ар. Пимы вордӥськиз. Ачим висьыны уси. Гожтӥським 1963-тӥ арын мартэ гинэ.

Кылӥськиз: 50 ар ӵош улэм кузпалъёслы кунмы 2 сюрс манет висъя. Милемлы сое ум сётэ на, пе. Нош арлыдмы вань ни: мыным 75, картэлы – 79. Кызьы уксёез вазьгес басьтоно?

Анна К.

Ува ёрос.

Кӧня ар ӵош уло кузпалъёс – чаклаське загсын лэсьтэм документъёсъя. 1963-тӥ арын гожтӥськиды бере, возьмано луоды на эшшо 2 ар.

Дасяз Елена Фёдорова.

Нылпилы жаляно ӧвӧл сюлэм шунытэз.

Нылпиосты будэтонын кыӵе но юанъёс уг кылдо. Туннэ соослы валэктэ Ижысь «Психолог плюс» центрысь Олеся Марчук.

Ӵош изён вае изъян?

Пиелы 4 но ӝыны арес ни, нош со весь монэн изе. Атаез солы воксё но кулэ ӧвӧл кадь. Кин но со шуэ: нылпи анаеныз куинь аресозь гинэ кӧланы кулэ. Мукетъёсыз буйгато: номыр уродэз ӧвӧл – мед изёз. Кинлы осконо?

Алёна И.

Пичи Пурга ёрос.

Тодосчиос шуо: нылпи анаен уйлы быдэ изьыны кулэ 3 аресозь. Талэсь кемагес мумызы вӧзын кӧлась пиос отӥяз шугъясько семья кылдытыны. Анай – экелы нырысетӥ кышномурт уго. Мумы, нылпизэ бордаз изьтыса, ачиз но уг вала, макем сюбегатэ пичикаезлэсь дуннезэ. Будэмъяз пияш туган но анаезлы кельшисьсэ бырйыны кутске. Ӵемысь – уг шедьты. Семья кылдытыны но шугъяське. Анаез кадь кыкетӥ сыӵе кышномурт ӧвӧл ни уго. Таин сэрен ик кузпаллы быръе аслэсьтыз кӧня ке ареслы мӧйыгес нылкышноез. Ачиз но валатэк, берытскыны выре пичи дыраз, шуныт но мусо анаез доры. Соин куддыр, оло, асьмеды киямы возьыны но кулэ, пимес мултэс трос медам чупалэ-ӟыгыртэ шуыса.

Экеен ӵош кӧлан сӧре на кузпалъёслэсь кусыпсэс но. Эн вунэтэ: карт – со бадӟым нуны. Нылпиен йырин кышномурт ӵемысь уг вутты ни кузпалызлы саклыксэ азьло кадь висъяны. Воргорон амалтэк малпа: пимылы вить арес ни, нош со койкаын мынэсьтым интыме весь  тала на. Оло, мон воксё но кышноелы кулэ ӧвӧл? Таин сэрен кышномурт карттэк но кыльыны быгатэ. Мургес учконо ке, воргоронлы нылпи кулэ ӧвӧл, шуыны луоз. Кышномурт сое сюлэм улаз нуллӥз, котькуд выремзэ шӧдӥз, соин ик, пиналзэ яратытэк, со нокызьы уг быгаты. Нош пиосмуртлы нылпи – мурт адями кадь. Огласянь со вала – экеез аслаз, но кышномурт кадь сое соку ик яратыны уг быгаты. Кусыпъёссы юнмало, ӵошен шудыса-ужаса гинэ.

Зэм, пиналэз нимаз изьыны дышетыны секыт. Куддыръя анайёс шуо: нылпиме бордысьтым кужмысь уг ишкалты, юнме уг бӧрдыты. Но нимаз кариськоно луоз. Вазь-а, бер-а, нылпи вӧсь луоз. Чидано. Кин но со шуак ӵоге: ӵуказеысен нимаз изиськомы! Озьы уг яра. Валэктоно: тон бадӟым ини, нош бадӟым пиос анайёсынызы ӵош уг кӧлало. Одно ик «бадӟым ни» шуыса пусъёно. Нылпиос асьсэос ярато ук бадӟым кариськыны. Та вылын ик шудоно. Тон пичи на, лэся, соин ик, дыр, мумыеныд изиськод. Тазьы вераса утчалэ ай, нылпиды ачиз ик пумитъяськоз: мон бадӟым ни, нимаз изё.

Нимаз кыданлэн емышъёсыз

Куд-ог анайёс, 1 арессэ но тырмытымтэ пиналзэс песянайёссы кие кельтыса, уже потоно луо. Ярам, одӥг городын уло ке, нылпиен муми уйёссэс ке но ӵош ортчытыны быгато. Нош таосты иськемъёс люкыку,  шутэтскон нуналъёсы сяна адӟиськыны соослы уг кылды. Таӵе югдурын кыӵе кыда меда тэшкыли? Анаеныз кусыпъёсыз уг сӥялско-а?

Елена С.

Алнаш ёрос.

Анаеныз нимаз улэмез пиналлэн йыраз уз кыльы ни. Но сюлэмыз тае ноку уз вунэты. Ӵемысь малпаськомы: таид пичи ай, мае валалоз со, сюдэмын-дӥсямын луиз ке, ма кулэ на? Котьма мед шуозы, но нылпи шӧдэ: анаез-утисез вӧзаз ӧвӧл. Бадӟым адями, огназ кыльыкуз, ыше, ма карыны ёрме ай. Нош пичи мурт, али гинэ шуныт кӧтысь потэм маке, мумизтэк кынмыны кутске, лыдъя: монэ куштӥзы, мон мултэс. Та шӧдонэз уката золгес юнмаку, ӵемгес висьыны ӧдъя. Тужгес уродэз – ассэ мултэс карон мылкыдыз весяклы пушказ кыле.

Зэм, лэчыт югдурез небӟытыны луэ. Анай, нылпиеныз ӵош луыса, вань шунытсэ солы кузьманы кулэ: шудоно, вераськоно, мусояно, ӵемгес чупано. Ӵош изиды ке, эшшо устогес.

Эн вунэтэ: ассэ мултэсэн зол шӧдӥз ке, азьланяз нылпиды ассэ ултӥяны кутскоз. Ассэ дунъян пинал пушкын кылдэ пичи дыръяз анай-атаез пыр, тужгес бадӟым инты басьтэ анаез. Тэшкыли уго дуннеез мумизлэн синмыныз адӟе. Солэн та улонын нокыӵе опытэз ӧвӧл на. Соин ик со уг тоды, кызьы астэ дунъяно, возёно сояз я таяз учырын. Кылсярысь, пинал ассэ мултэсэн шӧдэ ке, ассэ яратыны рос-прос уг вала ни. Мумыос, ӟеч лэсьтӥськом кожаса, куддыр шуо: та юбкадэ эн дӥся – пыдъёсыд кырыжесь, серемес адӟиськиськод. Яке: пельёсыд укыр бадӟымесь – йырси улад ватом ай.  Куд-ог дыръя воксё но йылто: маке тон мынам шузи, нош Ивановъёслэн пизы сыӵе чебер, сыӵе визьмо…

Пиналэз ноку уг яра мукетыныз ӵошатыны! Пыдъёсыз кырыжесь ке но, шуоно: кыӵе тон чебер. Чупано но ӟыгыртоно. Нырысь вамышсэ лэсьтэ-а, пуньыен сиськыны дыше-а, гожъяськыны-лыдӟиськыны дауртэ-а – ушъяны жадёно ӧвӧл. Косэм уждэс уродос ке но быдэстӥз, макталэ, вождэс эн поттэ. Тӥ асьтэос но соку ик ваньзэ ӟеч ӧд пӧрмытэ, дыр, ук. Кытын ке янгышаз ке но, со одно ик мед тодоз: номыр шоры учкытэк, сое ярато но дунъяло. Соку нылпи ассэ яратоз, ассэ дунъялоз.

Куд-огез пиналызлы вамышлы быдэ шуэ: тон ваньзэ тӥяд, эн люкеты, мын ай шуд. Валамон ни: таӵе югдурын нылпи ассэ сизьдыны ӧдъя: мар мон уродзэ лэсьтӥ, малы монэ улляло? Дышетскон удысын но та тодэ ваёнъёсыз солы маза уз сётэ. Кылсярысь, дышетӥсьлэн юанэзлы валэктон шонер тодӥз ке но, кизэ уз ӝуты, уз вера. Семья кылдытыны но шугъяськоз.

Гольык мугорез чакла…

Экеелы 4 арес. Со монэ ӵемысь паймытъя та выллем юанъёсыныз: мама, тон туннэ кыӵе трусикен? Нош алигес пыд йылысьтым воксё но пограсько вал. Ачиз быдӟа ик юлтошеныз ӝӧк улэ ватскиллям но, ог-огзылэсь кокооссэс кутылыса, шудо. Ма кароно таӵе дыръя? Тышкаськыны но ӧй дӥсьты, асме кызьы возьыны но ӧй вала. Адӟымтэ улсы кариськи.

Ольга К.

Шаркан ёрос.

Сьӧлыко дуннеен тунсыкъяськон нылпи пушкы вордскем дырысеныз пыӵамын. Соин ик ул дӥсьтэс чакламезлэн номыр уродэз ӧвӧл. Но ӟечгес луоз, дӥсьтэс пиналлэсь ватскыса вошъялляды ке. Со дыре ик уг яра сое алыны: берытскы, эн учкы. Озьы но, тазьы но солэсь тунсыкъяськонзэ муромытӥськоды.

Гольык мугорез чакланлэн но номыр уродэз ӧвӧл. Нылпиос озьы улон шоры учконзэс паськытато. Талэсь курданы уг яра. Соос озьы ик космосэн тунсыкъясько.

Ог-огзылэсь люкетъёссэс кырман ӵемысь возьматэ: нылпидылы уг тырмы саклыкты, яратэмды. Со шӧдэ ук: матысь кусыпъёс но яратон ог-огенызы герӟасько. Шунытлыкез утчаса ик, штаниязы но пыро. Та соосты огдырлы ке но буйгатэ.

Зэм, эскериськоно: весь озьы уг шудо-а, эшшо маке мултэссэ уг даурто-а? Сыӵе дыръя специалистлы вазиськытэк уз луы.

Пусйытэк кельтэм уг поты созэ но: анай-атай пиналзылэсь, валесын сяна, ватӥськыны кулэ ӧвӧл. Ог-огдэ чупано, ӟыгыртоно нылпи азьын ик. Тэшкыли мед адӟоз: таос ог-огзэс ярато. Ваче ки кутӥськыса пукемдэс огпол но ӧз адӟы ке, семья кылдытыса но, ачиз мусояськыны уз вала.

Нылпи лушкаське

Нылпи садысь воспитательмы кышкатӥз: нылды, пе, лушкаськылэ, эшъёсызлэн шкафазы пыра. Номырлы ум ёрмиське: ческыт сиён но, шудонъёс но тырмыт басьяськом. Со дыре ик кин ке маке сюлмысь сётэ ке, уг басьты. Паймисько: мар соин?

Марина О.

Дэри ёрос.

Пиналдылы валэктэ: лушкаськид ке, тон шоры кырыж учкозы, уз гажалэ, уз яратэ, калыкын кизэс кузь лэзьясьёслэсь кышкало. Тышкаськытэк гань-гань вераськемды юрттыны кулэ. Но асьтэос но туж эн курдалэ – ваньмыз сямен нылпиос лушкаськон пыр пото – озьы соос дуннеен тодматско.

Муртлэсь номырзэ басьтыны уг дӥсьты ке, оло, кышка: басьтӥ ке, мынэсьтым маке но курозы я маке лэсьтыны косозы. Анай-атайёс ӵемысь шуо ук: тон выжез миськы, нош мон тыныд мунё кузьмало. Яке: дышеты уроктэ, мон тыныд кампет сёто. Пинал амалтэк малпа: номырзэс ӧй басьты ке, монэ номыр карыны уз косэ. Анай-атайёс, асьсэос но валатэк, пиналзылэсь мозмытскон амал утчало: мон тыныд шоколад сётӥ ни ук, мар кулэ на? Нылпилэсь маке лэсьтэмзэ возьмаськоды ке, мукет сӥзён быръёно. Кылсярысь, урокъёстэ лэсьтӥд ке, асьмеос ӵошен шудом я лыдӟиськом.

Атайлы, пе, эн вера…

Кык нылъёсы будо. Виссы ар но ӝыны. Кыксы но маке умойтэм лэсьто ке, соку ик куро: анай, атайлы эн вера! Кызьы таӵе дыръя асме возёно?

Ирина Ю.

Иж.

Уг вера шуыса оскытӥды ке, асьтэос карттылы шаянтэмзы сярысь сипыртӥды ке но, нылпиосты со сярысь ноку медаз тодэ. Но одно пусъе: нылы, мукетъят та сьӧлыктэ лэсьтӥд ке, атаедлы одно ик верало. Сыӵе дыръя со ассэ чакласькысагес возёз ни. Валэктыны выре созэ но: атайлэсь кышканы уг яра, со асьмелы тушмон ӧвӧл. Но ноку эн курдатэ, атаедлы чагисько шуыса. Кусыпъёстэс кышкатон тӥялоз гинэ.

Куспамы пыре

Дорамы кин ке куное лыктэ ке, куать аресъем пиелэн олокытысь куараез потэ – куспамы пыре, ог-огмес кылэмысь ик дугдӥськомы. Кызьы валэктоно пичи муртлы, бадӟымъёслэн кыл куспазы пырыны уг яра шуыса?

Светлана И.

Иж.

Экеды вожа: анаез мукет муртэн вераське, мон солы кулэ ӧвӧл. Таӵе дыръя солы кыӵе ке уж сётэ. Яке буйгатэ: мон тон сярысь ӧй вунэты, 15 минут возьма но, асьмеос вераськомы я шудомы. Одно пусъе, кӧня дыр ортчыса, тӥ ӵошен шудоды. Ноку эн кеське, чалмы шуыса.

Школалэсь кышкан

Нылылэн школае мынытозяз, одӥг ар кылемын на. Нош со али ик кышка ни. Югдурез кызьы небӟытоно?

Лариса Н.

Якшур-Бӧдья ёрос.

Асьтэлэсь школаын дышетскемдэс ӵемгес тодады вайылэ. Вералэ нылдылы, мар тӥледлы отын кельше вал. Оло, кыӵе ке серемес учыре шедьылӥды. Сое но пусъе. Пумен шӧдӥды ке, дыдыды котыр дунне сярысь золгес тунсыкъяське, книгаос сярысь юалляське, озьыен, школалы со дась.

Ломен но уд бералты

Нылы туж ваменэс. Вить арес солы. Магазинэ гинэ но пыреммы уг луы – тае ӧд басьты ке, уг берты, шуэ. Со сямзэ кызьы ке тупатыны луоно меда?

Юлия А.

Можга ёрос.

Нылпи котыр ласянь туж ӵем эскере анай-атайзэ. Кылсярысь, со огпол магазинын керетон ӝутӥз но, тӥ, соя кариськыса, вуз басьтӥды. Пинал мукет дыръя но озьы ик кароз. Малы ке шуоно со табере тодэ ни: бӧрдӥз ке, одно вормоз.

Таӵе югдурын нырысь ик воштӥськыны кулэ анай-атайлы. Асьсэ азе ужпум пуктоно: кыӵе учырын нылпизыя кариськозы, кыӵеяз асьсэос но ваменскозы. Одӥг пол, кык пол нылпизылэсь ӧз кылзӥське ке, со но валалоз: таосты уд вормы. Ачиз соку ик уз воштӥськы, но пумен ваменъяськемысь дугдоз.

Дасяз Елена Фёдорова.