Европаын таӵе брикетъёсын 20 арлэсь ятыр шунто ни палэнын, ветлыны секыт интыосысь улон коркаосты, пичи фермаосты, гаражъёсты, мунчоосты. Со инкуазез уг сапта, пу дасянэз-пилёнэз ӧвӧл, капчи.

Пул пызь сяна, брикетъёсты лэсьтонэ мыно лусйиськемъёс, пилиськем векчи чагъёс но вайёс. Конвейер кузя соос нырысь ик вуо векчиятон-изон агрегатэ, отысен – куасьтон гуре. Собере пресс пыр лэзьыса, пото чилясь, быглес брикетъёс.

Таӵе эстӥськон сярысь асьме республикаын ог вить ар талэсь азьло вераськыны кутскизы. Но сое поттон борды Андрей Анатольевич гинэ басьтӥськиз. Промышленностья но энергетикая министерствоын али дасяло шуныт сётонэз воштӥсь арбериосты лэсьтонъя программа.

Иван Аркашев.

Соин сэрен сисьмыны кутско бакча сиёнъёс. Гу пурысьта, отчы векчи губиос аляло. Суп-сап лэсьтэм йӧгулэн бервылъёсыз шараясько тулыс – ву люкаське. Кызьы йӧгуэз косатоно?

Нырысь сое рос-прос тӧлатоно но куасьтоно. Кылсярысь, котмемын ке огпал борддор, сое вӧзтӥз ик педло палтӥ 20-30 сантиметр пасьтала но ӝыны метр гудоно. Сюйлэсь сузяно но куасьтоно, небӟытэм битумен маялляно.

Луоз на мукет амалэз но кутыны. Куасьмем борддорез цемент суретэн яке цементэн кизер пиялаен суро суретэн волятоно. Куасьмемез бере битум мастикаен зырано. Собере гудэм интыез нап горд сюен тырмытыса, тып-тып лёгано. Табере со интыетӥ ву уз пыры ни.

Нош ву выж ултӥ пыре ке, соку выжез быдэсак сэрттоно. Музъемзэ ӵошкатыса, 10-15 сантиметр нап горд сюй тыроно. Со вылтӥ битумен маяллям 2-3 полэс толез (рубероидэз) вӧлдоно. Вылтӥз бетон кисьтыса, кӧс цементэн пазьгоно.

Иван Аркашев.

Пермь выжыысь дыдыкъёс.

Дыдык удмуртъёслэн одӥгез яратоно тылобурдозы луэ. Анай пичи пиналзэ дыдыкен ӵошатылӥз. Туж вӧлмемын вал Дыдык нылкышно ним но. Дыдыкъёсты вордон борды тужгес кыстӥсько пиос.

- Дыдыкъёсын вырыса, адями золгес шӧдыны кутске инкуазез, чылкыт сямо луэ. Соин ик нылпиос соосын эшъясько ке, алоно ӧвӧл. Озьыен, пиналлэсь ӟеч адями пӧрмоз, – шуэ Ува каргуртысь трос аръёс ӵоже дыдык вордӥсь Дмитрий Крымцев.

Дмитрий Петрович 9 арескысен дыдыкъёс борды дышиз. Бускель пиналъёслэсь адӟем карыса, со вордӥз Русский турман выжыез. Но дышетскыны, ужаны кутскемез бере палэнскиз яратоно тылобурдоосызлэсь.

- Соос сярысь мон ноку ӧй вунэтылы, ялан сюлэмме маке но бышке кадь, маке но ӧз тырмылы, – азьланьтэ со. – Дыдык коркаосты адӟыса, пичи мурт сямен отчы бызьыса тубем потылӥз. 2003-тӥ арын Уваын тодматски Удмуртиысь одӥгеныз устоеныз дыдык вордӥсен Николай Тарасовен. Солэн дыдык уллёез быдэс Приволжск федерал округъя устоез – Пермь гривунъёс выжыысь. Солэсь адӟем карыса, мон 80 йыр дыдык вордыны кутски. Дыдык – со парзэ яратӥсь тылобурдо. Эш шедьтӥз ке, кылёз соин вань улытозязлы.

- Тӥледыз соос маинызы бордазы кыско?

- Лобаменызы. Инмын, олокыӵе но пужыос лэсьтыса, поръяло. Тужгес ик Пермь гривунъёс. Нош Баку выжыысьёсыз йӧспӧртэмъяськыса шудо. Учкыса кӧт уг тыры. Йыр вадьсын пичи цирк. Нокыӵе кино уз вошты сое.

* * *

Д. Крымцев.

Д. Крымцевлэн азбараз куинь дыдык корка сылэ. Кузё бурдоосызлэсь улон интызэс ялан чакласа, утялтыса возе. Нош тулыс мумыен айыенъёсты, мукетъёсызлэсь висъяса, нимысьтыз инкубаторе интыя – выжы мед йылоз. Дмитрий Петрович верамъя, али Уваын дыдык вордонэн выре дас адями. Соос пӧртэм выжыосты будэто: Шор Азиысь, Курск, Башкир, Арараны, Почта нуллӥсь, Воронеж но мукет. Каргуртысь дыдык вордӥсьёс ӵош люкаськыса кенешыло, выль тодон-валанъёссэс ог-огзылы шараяло. Ортчытӥзы ини адӟытон но.

- Огез умойтэм, – шуэ воргорон. – Гуртоос адӟо, паймо, юаллясько, ушъяло, нош ужез азьланьтӥсь ӧвӧл. Егитъёслэн со борды басьтӥськемзы уг поты – компьютер котыре думиськемын. Нош тылобурдоосын эшъяськон улыны кужым сётэ, жадёнэз улля. Милям, Удмуртиысь дыдык вордӥсьёслэн, кемалась ини огазеяськонмес кылдытыны малпанмы вань. Но та борды басьтӥськись ӧвӧл. Асьмелы одно ик утёно Пермь выжыысь удмурт селекциен поттэм дыдыкъёсты. Куд-огез соос 1000-1200 метре вылӥе ӝутӥськыны быгато, дугдылытэк 7 час лобаны чидало. Милям тылобурдоосмы номырин уг висъясько Сарапулысь дыдыкъёслэсь. Нош лыдъя но ӟечлыкъя ми азьпалтӥськом можгаосты но.

- Тӥ соосты ӟечлыксыя висъяськоды. Нош кызьы сое валаны луэ?

- Россиын ӟеч выжыысь 1 пар дыдык сылэ 5 сюрс манет. Немецъёс 2 яке 3 чубен (двух-трёхчубный) 1 пар понна «Мерседес» автомобилен но вошто. Соин ик выжыё дыдык возён – капчи уж ӧвӧл. Ми кусып возиськом Татарстанысь, Оренбург улосысь, Москваысь тылобурдо вордӥсьёсын.

Дыдыкез вордон понна трос тодоно, лыдӟиськоно, – азьланьтэ веранзэ воргорон. – Но нырысь ик чидан медло. Сотэк номыр уз пӧрмы. Дыдык яратэ эрикез, соин ик улон интыез вӧл-вӧл мед луоз. Ӵем лобаны лэзьяно, ӧсъёссэс усьтыса возёно. Эшшо одӥгзэ вунэтыны уг яра – дыдык басьтыны малпады ке, парен басьтэ, озьы соослы мӧзмыт уз луы.

* * *

Д. Крымцев уг буйгатскы дыдык вордонэн гинэ. Со возьылӥз ни кыр ӵӧжъёсты но, фазанъёсты но. Али курег вордэ. Укмыс выжы пӧлысь тужгес тунсыкоосыз – Голланд атас, Карлик кохинкин, Китай шелковистый но Серебристый брекс курегъёс. Куинь пумо цесаркаез: кыкез – пурысь, одӥгез – лыз.

Тылобурдо вордон Дмитрий Петрович понна – со улонэз ӟечгес валан. Макем шумпотоно, пе, тонэ ӵукна атас сайкатэ ке. Куке-соку солэн сизьым атасэз вылэм. Ӵукна 4 часын кытӥяз ёрмылэм но – ог-огзэс вормыны турттыса, кутско ук, пе, чоръяны.

Иван Аркашев.

Кизер пиялалэсь олокыӵе но арбериос лэсьтӥсьёс асьме шаерын ӧвӧл ни. Но ас вакытаз Можгаысь «Свет» заводын сыӵе кибашлыос тырмыт вал. Кылсярысь, Сергей Пушин. Пӧзись пиялаен ужазы солэн пересь атаез Кузьма Ефремович но Ужысь Горд Знамя орденэн пусъем атаез Михаил Кузьмич.

- Ми семьяын вить кузя будӥм: ньыль вынъёс но сузэрмы. Анаен-атай пичи дырысен ик ужаны дышетӥзы, – тодаз вае Сергей Михайлович. – Школаын но ужез данъяны дышетӥзы.

8 классэз йылпумъяса, Сергей нырысь ик ужаны пыриз «Красная звезда» фабрикалэн нюлэс дасян цехаз. Но, куинь толэзь ортчыса, выжиз атаез доры – «Свет» заводэ. Собере, 5 номеро училищеын дышетскыса, машинаосты тупатъясь луиз, армие ветлӥз но выльысь берытскиз пиялаен ужасьёс доры. Отын ужаз, пенсие потытозяз. 39 ар тыршытозяз, предприятиысь вань ужъёслы дышиз. Машина тӥрлыкез тупатъям сяна, пияла пӧзьтӥз но пельтӥз.

Сюлмо тыршемез пусъемын «Социалистической ӵошатсконын вормись» знакъёсын, трос пумо таукарон гожтэтъёсын но данъян грамотаосын. Россиысь ужысь ветеранлэн туспуктэмез ялан улӥз цехлэн, заводлэн, нош 1982-тӥ арын Можга городлэн Данъян пулъёсаз. Кылем арын «Свет» акционер огазеяськонлэн усьтӥськемез дырысен 175 ар тырмонэн валче С. Пушинлы Можга городлэн дано адямиез ним сётӥзы.

- Производство паськытамен, пияла посудалы кулэяськонъёс йылэмен, мукет арбериос лэсьтон но пельтон быризы, – вера воргорон. – Улонлэн мукет куронъёсыз луизы. Табере пияла пельтӥсь специальность Гусь-Хрустальный городын сяна, кылемын ӧвӧл ни, дыр. Нош кыӵе чебер адске пӧзись пияла. Сое омыртыса, тон выжыкыллы кузё луиськод кадь, ма лэсьтэмед потэ, ваньмыз тон киын. Пияла кизер дыръя маке но лэсьтыны вуттоно, соин ик ӝог ужано – луиськод суредась но, скульптор но.

Зэм, али Сергей Михайловичлэн дораз пиялалэсь пельтэм ужъёсыз ӧжыт кылемын: кӧняез ке заводлэн музеяз, предприятиысь кивалтӥсьлэн кабинетаз. Но вань, дыр, ай соос мукет адямиос киын но. Сюлэм шунытэз сётыса лэсьтэм уж озьы гинэ уг быры угось.

Иван Аркашев.

Шумпотон вуиз. Вордскиз удмурт выжыысь ыжпи.

Улонад одно ик мертты писпу, пукты корка, будэты пинал. Та калык веранэз гуртын улӥсь удмурт воргоронъёс тросэз быдэсто. Дэри ёросысь Ожмос-Пурга гуртысь Виктор Акилов, сад мерттэм, корка пуктэм, пиналъёс будэтэм сяна, куать гуртын улӥсьёслэсь улонзэс чылкак воштӥз.

Вордскемын Виктор Николаевич 1954-тӥ арын Дэри ёросысь Куӵос гуртын. Семьяязы ньыль пиналъёс будӥзы: куинь вынъёс но одӥг сузэр. Витя бадӟымез бере, гурт котырысь уж но со вылынгес вал. Угось анаез Екатерина Николаевна – соку «Свобода» колхозысь азьветлӥсь скал кыскись – ялан фермаын, атаез Николай Иванович – устоез комбайнёр – ялан я бусыын, я гаражын. Соин но, оло, куинь вынъёс улонзэс герӟазы музъемен.

- Мынам йырам малпан ик ӧз кылдылы кытчы ке палэнэ кошкон сярысь, – вера Виктор Николаевич. – Собере дырыз но сыӵе вал: гуртын улӥсьлы паспорт ӧз сётылэ. Нош сотэк кытчы мынод? Куинь ар морфлотын службаез ортчыса, бертӥ колхозэ. Куризы комбайнэн ужаны. Школа бӧрсьы мон йылпумъяй вал Ижевскысь 2-тӥ номеро училищеез. Али со 23-тӥ СПТУ. Кӧня ке толэзь ужаса, хозяйство ыстэмъя дышетскыны мынӥ Глазовысь техникуме. Сое йылпумъяса, бертӥ но, мыным, егит специалист шуыса, соку ик улон инты сётӥзы. Нырысь механик луыса ужай трактористъёслэн бригадаязы, собере юнматӥзы бригадире. 1985-тӥ арын бырйизы сельсоветлы кивалтӥсе.

- Со аръёсты али дырен кызьы ке ӵошатӥськоды-а?

Тракторез толалтэ но чакласа возёно.

- Техника пумысен соку чик но юанъёс ӧз кылдылэ. Тани трактор ворттылӥз, шуом, заводэн висъям 8 ар ужан дырзэ, сое соку ик келяло ни утиле. Заявка ыстӥськод но, выль техника вуэ. Озьы ик машинаосын. Но соку секытгес вал думытыса ужась техникаен. Выльзэ но, вужзэ но басьтылыны ӧз луылы. Тупатон ёзъёс утчаллям мукет улосъёсысь. Нош калык кыӵе ужась вал! Косӥськод механизаторез вазь ӵукна потыны – 4 часын ӵукна со бусыын ни. Али уж шоры мукет сямен учко. Тани комбайнёръёс-трактористъёс кылем арын ик Бабиноагрокомплексын ӧз тырме ни, нош туэлы эшшо ӧжытгес кылемын. Малы озьы луэ? Ужась адямиез адӟись ӧвӧл ни. Азьло аръёсы «Свобода» колхоз Удмуртиын тужгес бадӟымез но кужмоез вал. Арлы быдэ улон корка гинэ 700 квадрат метр лэсьтылӥзы. Ожмос черкогуртын вакчи дыр куспын 20 квартираен посёлок ӝутскиз. Лэсьтӥськись адямилы колхоз юрттылӥз коньдонэн, лэсьтӥськон материалэн. Нош али музъем гинэ но дунтэк уг сётӥськы ни. Туннэ адями шоры сыӵе учкон: ужа ке, мед ужалоз, кошкиз ке, мед кошкоз – ӵуказеяз уз но юалэ ни, кытчы со кариськиз. Соин ик быдэсак быризы, луоз, Дэри ёросысь «Россия», «Родина», «Пальники» хозяйствоос. Умой уло на Якшур но Казмаска гуртъёсын тыршисьёс. Соос но возисько на кужмоесь но валасесь кивалтӥсьёс чотын гинэ.

- Виктор Николаевич, тӥ туж бадӟым уж лэсьтӥды: сельсоветэн кивалтыкуды, гуртэ газ пыртӥды.

- Одӥг ар куспын ми куать гуртэ – Кӧтулэ, Байкузёе, Пальнике, Пиканэ, Куӵосэ но Ожмос-Пургае – газ кыскыны быгатӥм. Та уж борды басьтӥським 2006-тӥ арын. Туж бадӟым тау верам потэ Рустам Михайлович Хасановлы, Балезиноысь газ кыскон ужъёсын вырись огазеяськонлэн кивалтӥсезлы. Со юрттэмъя проектэз лэсьтӥм одӥг ар ӵоже. Соку ӧй вуттысалмы ке, гуртъёсын газ али ке но ӧй луысал. Та дырлы чагыр эстӥськон кыскемын ӧвӧл на Шайтангурт, Чипанка гуртъёсы но Ожмос черкогуртысь куд-ог урамъёсы. Ву ласянь но трос гинэ бызьылоно луиз.

- Нош кыӵе мугъёсын тӥ, колхозын ужакуды ик, асьтэ уждэс усьтоно, музъем басьтоно кариськиды?

- Со вакытэ тросэз гурт хозяйствоос куашканы кутскизы, музъемез нимаз адямиос кие люкыны ӧдъязы. Уждун уг тыриськы, кивалтӥсьёс ужысьтызы кошкылӥзы. Кивалтон интыез басьтылӥзы городысь музъем ужез валасьтэм адямиос. Азьланезлы осконмес ыштыса, 1994-тӥ арын ми семьяеным усьтӥмы ас ужмес. Басьтӥ соку 17 гектар музъем, та дырозь со бусыям ик ужасько.

- Музъем басьтӥсьёс соку трос гинэ вал, но тросэз ӧз ворме та ужез. Али бусыосазы векчи нюлэс будэ ни…

- Ваньмыз капчиен ӧз сётӥськы, йырын олокыӵе но мӧзмыт малпанъёс пуромылӥзы. Озьы ке но ми ваньзэ лэсьтыны быгатӥмы. Та дырлы куинь кысконо скал, ньыль ветыл но ошпи, сизьым парсь вордӥсько. 2010-тӥ арын 67 сюрс манет басьтӥ уже интыянъя центрлэн программаез пыр. Со коньдонэн вить ошпи вордӥ. Кемалась ик ӧвӧл Пичи Пурга ёросысь Эдэйгуртысь басьтӥ ӟеч выжыысь ыж но така. Сое удмурт выжы шуо. Выжызы медаз сураськы шуыса, мон соосты мукет гурт пудоен ӵош возьманы уг лэзьяськы. Огез гинэ умойтэм. Тани романовской выжыысь ыжъёс, кудъёссэ асьме палан будэто, араз кык пол пи ваё, вылаз ик, вордско кыкен-куинен, нош та выжыысь ыж араз огпол одӥг ыжпи вае. Соин уллё будэтыны дыр кулэ луоз.

- Пудоен сяна, маин выриськоды на?

- Семьямы бадӟым бере, котьма кулэ: картош, бакча сиёнъёс. Муш но вордыны кутски.

- Пиналъёсты юрттӥсько-а?

- Ми Валя кузпалэным ньыль пинал будэтӥм: кык пи, кык ныл. Ваньзылэн асьсэлэн семьяоссы ни. Али тямыс нунокмы будэ. Ваньзэс пичи дырысенызы ужаны дышетӥськом. Соин ик турын, картош утялтон дыръя, пудо возьман черод вуыку, быгатэмзыя ужаны вуо. Сыӵе дыръя уж но кырӟам улсын мынэ.

Иван Аркашев.

Туспуктӥз Владимир Беломорских.

Кызьы соин ужано? Скульптура лэсьтыны тупа 30 сантиметр зӧкта кынмем йӧ. Сое бензопилаен вандылоно. Но йӧ люкетъёс огвыллемесь мед луозы: ӝуждалаез 1 метр, кузьдалаез 50 сантиметр, пасьталаез 25 сантиметр.

Йӧэн ужаку, кулэ луозы электро- яке бензопила, пӧртэм ожонъёс, пуртъёс.

Маке лэсьтыны кутскемлэсь азьвыл суредано эскиз. Бадӟым люкетъёссэ вандылоно пилаен, собере волятоно пичи тӥрлыкъёсын. Но тодэ: макем трос сэрегъёсыз скульптуралэн, сокем со тыл яке шунды тылсиос азьын яркыт ворекъялоз. Ужды уйин но чильк-вальк мед кисьтаськоз шуыса, бырттэ котыраз буёло лампочкаос.

 Иван Аркашев.

В. Яковлев выль ужезлы эскиз дася.

Пу скульптураосын чебермам интыос республикаямы арысь аре паськытало. Соос вань ини Ижевск, Глазов но Можга городъёсын, Шаркан, Ува, Дэри, Эгра, Красногорск ёросъёсын. Егитъёс но, мӧйыос но синмасько та киужъёслы: пӧйшуръёслы, удмурт выжыкылъёсысь геройёслы. Та дырлы асьме шаерын 350 пала сыӵе скульптураос лыдъясько ни.

Удмуртиын арлы быдэ ортчыло парк скульптуралы сӥзем фестивальёс. Туэ гужем со вал дасэтӥез, кибашлыос ӵошатскизы Пичи Пургалан. Нош нырысетӥез таӵе ужрад радъямын вал Ува ёросын. Кылем арын но уваос ик пу ужъёсын вырисьёсты доразы люкаллязы. Озьы отысь колледж дорын кылдӥз чебер парк. Та бордын арня ӵоже тыршизы 16 кибашлыос но 15 вуоно мастеръёс. Удмуртиысь сяна, отчы пыриськиз Коми Республикаысь Салехард городысь Надежда Талигина но.

Уваын ортчем конкурсэз радъясьёс пӧлысь огез – Ува каргуртысь чеберлыкъя нылпи школаысь дышетӥсь Виктор Яковлев. Туэ Виктор Егорович кыкетӥзэ пыриськиз ни кибашлыослэн Тюмень улосысь Уват ёросын ортчылӥсь «Чудотворец» фестивалязы. Салехардысь, Выль Уренгойысь, Ноябрьскысь, Пензаысь, Москваысь сяна, ӵошатсконэ пыриськизы Швейцариысь но Болгариысь мастеръёс.

Кибашлылэн пу скульптураосызлы синмасько ваньмыз.

Яковлевлэсь «Шунды Мумы» ужзэ ваньзы туж шуныт пумитазы. Асьме кибашлылэн ужезлы вылӥ дунъет сётӥзы.

- Мон возьматыны тырши, кызьы анай аслаз чиданэныз, сюлмаськеменыз, яратэменыз ас калыкезлы сюрес ӵоге, – шуэ Виктор Егорович.

Пусъёно: та воргоронлэн уноез ужъёсыз герӟаськемын инкуазен, вашкала но али улонэн, адямилэн интыеныз. Автор вераны турттэ: дунне вылын ваньмыз огинэ герӟаськемын.

Виктор Егорович вордскиз 1969-тӥ арын Пичи Пурга ёросысь Итэш гуртын. 1986-тӥ арын Вуж Мӧнья школаез йылпумъяса, дышетскиз Удмурт кун университетысь худграф факультетын. Собере ужаз Уваысь 1 номеро школаын. 2000-тӥ арысен тырше нылпиосты суреданы дышетонъя школаын. Кузпалэныз Елена Анатольевнаен кык ныл будэто. Юля но Маша атайзылэсь сюрессэ бырйизы – йылпумъязы суредаськонъя школаез. Нылъёслэн суредъёссы пӧрмо, пӧртэм конкурсъёсын вормыло.

- Мон пичи дырысеным ик суредась луыны малпай, – вера кибашлы Яковлев. – Тодӥсько вал: гуртысь огшоры пияшлы со капчиен уз сётскы. Нош аръёс ортчемъя валай: котькудӥз ассэ ачиз шедьтыны кулэ. Но со понна ялан дышетсконо.

Виктор Егоровичез ӧтчало пӧртэм калыккуспо конкурсъёсы. Удмуртиысь сяна, солэсь пу композициоссэ пумиталод Салехардысь, Саранскысь, Сыктывкарысь, Тюмень улосысь. 2007-тӥ арын Саранск городын лэсьтэм «Гондыр выжы» ужзэ, эсьмаса, синйылтӥз но ушъяз Владимир Путин.

- Таӵе ужрадъёсы вуылыса, валаськод: азьвыл лэсьтэм ужъёсыныд гинэ улыны уг яра, мукетъёслэсь бере кылёнтэм вылысь ялан киез волятоно, выльзэ утчано, тодон-валанэз весь будэтоно.

Нылпиосты В. Яковлев дышетэ выль амалъёсын ужаны. Скульптураос со пӧртэм материалъёслэсь лэсьтэ: пластилинлэсь, горд сюйлэсь, пулэсь, лымылэсь, йӧлэсь, излэсь, гранитлэсь. Малпанэз вань кортэн ужаны. Кибашлы толалтэзэ но уг шутэтскы: я Тол бабай но Лымы ныл лэсьтэ, я йӧлэсь олокыӵе но скульптураос вӧлэ. Али дасяське Оренбургын ортчоно йӧ скульптураосъя фестивальлы.

Иван Аркашев.

1 - зӧк пулъёслэсь яке горбыльлэсь вӧлдэт; 2 - векчиятэм куроен ныркем горд сюй; 3 - ныркем горд сюй; 4 - йӧгу вӧзысь сюй; 5 - омырлы нырысетӥез гумы; 6 - цементлэсь сурет; 7 - битумен лякем рубероид; 8 - ныркем горд сюй; 9 - борддор (кирпичлэсь яке излэсь); 10 - омырлы кыкетӥез гумы; 11 - тыриськон ящикъёс.

Бакча сиёнэз, будэтэм сяна,  быгатоно утьыны. Уноез сое толлы гулбече интыя, нош отын шуныт: кубиста, картошка, кешыр но кушманъёс шуяло, куасьмо. Ижевскысь Михаил Сергеев сыӵе югдурысь потэм. Со одӥг арня куспын йӧгу лэсьтэм. Табере бакча сиёнъёсыз быдэс толзэ чебересь возисько.

Йӧгулы нырысь ик быръёно инты, со ӝужытгес но кӧс азьын мед луоз. Зор но тудву медаз шеде шуыса, выжзэ ӝыны метрлы музъемлэсь ӝужытгес кароно, сюй нуллыса.

Йӧгуэ ӝыныез музъем пушкын, ӝыныез кырын.

Гуэз гудэмын киын. Озьы шараясько ву пырон интыос. Сыӵе пасьёсты ӵоктаны кулэ цемент сурет (1 люкетэз цемент, 1,5 люкетэз луо). Ӝоггес мед кынмоз шуыса, суретэ ватсано 10 процентъем кизер пияла. Собере гулэсь пыдэссэ, тып-тып лёгаса, ӵошкатоно. Вылаз 9-10 сантиметр тыроно векчи из яке пильылэм кирпич. Бӧрысь няняно ныркем горд сюен. Со утёз музъем ултӥ пырись вулэсь.

Горд сюй куасьмем бере выж вылэ вӧлдоно шунтэм битумен кык полэс рубероид. Рубероидлэсь пумъёссэ кузьгес кельтоно. Мед луоз кыр палтӥ борддоре куасалтыны. Битум куасьмем бере вылтӥз 10-15 сантиметр цемент сурет кисьтоно (1 люкетэз цемент, 3 люкетэз луо). Собере пазяно 1 миллиметр зӧкта кӧс цемент. Ву отчы пыӵаз ке, выжез вольытатоно.

Борддорез ӝутыны луэ излэсь яке зол сутэм кирпичлэсь. Кыр палтӥз борддорез ӵошкытатоно цемент суретэн (1:3). Куасьмемез бере ляконо кык полэс рубероид. Вӧзтӥз кисьтоно ныркем горд сюй.

Гу пушкысь борддорез ӵошкатоно цемент суретэн (1:2) но маялляно изваскаен.

Йӧгу вӧлдэтэз лэсьтоно зӧк пуллэсь яке горбыльлэсь. Вылтӥз шобыртоно битумен маяллям кык полэс рубероидэн. Собере кисьтоно корам куро яке ӝуйыен сурам горд сюй. Вылаз тыроно сюй. Озьы йӧгуын гужем салкым, толалтэ шуныт улэ.

Омырез чылкытатон понна кык гумы пуктоно. Огезлэн пумыз выж выл дорозь мед луоз, мукетыз вакчи. Бакча сиёнъёсты интыяно ящикъёсы.

 Иван Аркашев.

«Мынам атаелэн киосыз зарни. Cо йыг-йыг бад

Мон туж данъяськисько атаеным, со кадь ик луэме потэ. Нош со понна туж зол тыршоно но ужез яратоно», – тазьы гожтэ Алнаш ёросысь Чем-Куюк школаысь 5-тӥ классын дышетскись Александр Лесников атаез Рудольф Лесников сярысь.

Вашкала дырысен Лесниковъёс висъяськылӥзы быгатонлыкъёсынызы. Рудольф Родионовичлэн атаезлэн пересь песятаез Митрофан дано луэм корт дуременыз. Бадӟым корказы шур дурын сылэм, артэ ик кебитсы. Отын со дурылэм геры амезьёс, усыос, уробо питранъёс. Вашкала дыръя пуктэм хозяйствоын али  нокин уг улы ни. Пужыятыса лэсьтэм капкаос гинэ возьмато на кибашлылэсь быгатонлыкъёссэ.

Митрофан Александровичлэн Семён пиез Быдӟым войнаын бырыны шедиз. Со но киужлы етӥз вылэм. Тусьёс, умортоос лэсьтылэм. Али  но кылемын на солэн зӧк корлэсь вӧлэм вышкыез. Азьло отын ю тысь возиллям.

Рудольфлэн атаез Родион Семёнович кема аръёс ужамын школаын. Со дышетэм географиен но физкультураен.

Рудольф Лесников вордскиз та гуртын ик 1965-тӥ арын. Гуртысьтызы 8 классэз потыса, школаез йылпумъяз Варзи-Ятчиын. Собере – армия. Атыкай музъеммес утиз Амур улосын.

Киужен вырон борды кыстӥськемез ласянь Рудольф Родионович тазьы вера:

- Вирам пыӵамын, дыр, со вашкала выжыосылэсь. Визьмазы монэ дышетӥсьёсы Алексей Яковлевич но Анатолий Алексеевич Тарасовъёс. Ялан школалэн мастерскояз дырме ортчытъяй. ӵем гинэ юрттэмъяськылӥ дядяелы. Со колхоз кебитын ужаз. Туж кельшо вал суредан, черчение, труд урокъёс. Мылысь-кыдысь ветлылӥ авиамоделированиея, судомоделированиея кружокъёсы. Лэсьтэм ужъёсыным пыриськылӥ Алнашын ортчылӥсь ӵошатскылонъёсы. Азьпал интыосы но поталляй. Нискылай аслам бичам аэросалазкиеным.

Но лябгес дышетски, соин ик колхозэ кылё шуыса, малпай. Армиысь бертэме бере сизьым ар колхоз кивалтӥсьёсты нуллӥ, 15 арзэ ужай комбайнэн. Ужаме понна Президентлэн Александр Волковлэн таукарон гожтэтэз но вань.

- Туж бадӟым юртъерды. Кема-а пуктыны выриды?

- Нырысь ик ми выльдӥм анай-атайлэсь юртсэс. Отын ик семьяеным улӥм но. Нимаз пуктӥськыны кема вырим. Выжы-кумыосы, эшъёсы, гурт калык юрттӥськизы.

Коркалэсь проектсэ, эшъёсын кенешыса, малпай. Пумен лэсьтӥсько, пумен маке вылез йыре лыктэ. Ми 1993-тӥ арын лэсьтӥськон мытӥм. Со аръёсы туж секыт вал: материал уг сюры, уксё уг окмы. Асьмеос ай егитэсь. Нош али ваньмыз вань. Соин, лэся, весь мае ке выльдӥськом, утчаськом, юртмес мукет но мукет карыны турттӥськом. Тӥни сыӵе шулдыр юртын улэ семьяе.

Кузпалэным Антонина Никоновнаен тодматским та гуртын ик. Сое татчы школае практикае лэзизы вал. Татчы ик кылиз. Ужа школаын, дышетэ биологиен, географиен. Бадӟымез Юля нылмы техникумез йылпумъяз. Лена нылмы Казаньын дышетске. Саша пимы школае ветлэ ай. Ялан мон сьӧрын, мон котырын. Ваньзэ тодэмез, ас киыныз эскеремез потэ. Воштӥсе будэ!

- Тӥляд мастерскойды бадӟым, со нимысьтыз киужъёсын вырыны лэсьтэмын, дыр?

- Нырысь ик милям татын гараж вал. Мынам пичияк мастерской нергее вал ик, но отчы ӧй тэры ни – тӥрлыке трос люкаськиз.

Выль мастерскоям гурез но вань, толалтэ шунытын ужасько. Гур ачим сварка аппаратэн кышъяй. Столяр ужъёсын вырон кык пумо станокъёсы. Укноос, ӧсъёс, соослы янакъёс, наличникъёс, гардинаос лэсьясько. Ас вакытаз бичай трактор, мотоблок, тележкаос.

Тани тракторелэн моторез Т-16 тракторлэн, передачаосын коробкаез ЗИЛ-лэн, мостэз ГАЗ-53 машиналэн. Ваньмыз соос лошъяськыса улӥзы. Мыным яразы.

* * *

Лесниковъёс трос пудо вордо, уно муш семьязы. Чечы кылем арын но, туэ но трос кыскизы. Ушъяськымон улмо садзы. Трос ужъёсты Рудольф Родионович аслаз лэсьтэм техникаеныз быдэсъя.

Иван Аркашев.

Туспуктӥз Владимир Беломорских.

Кирилл, нылпи садэ ветлыкуз ик, эшъёссэ но, отын ужасьёсты но чебересь суредъёсыныз паймытъяз. Дораз бертыса но, синпӧртмась буёлъёс борды кутскылӥз. Ужъёссэ атаезлы возьматъяз. Соиз ини пиезлы ӟеч дунъет сётылӥз.

Кириллэн атаез Юрий Иванович Волков Кунгурысь суреданъя училищеез йылпумъямын. Со – скульптор. Кортэз вандылыса, суредъёс лэсьтэ. Солэн ик быгатонлыкез Кириллы но паласькем.

Пияш Ижысь 59 номеро школаын дышетскиз, «4»-ёс но «5»-ёс гинэ басьялляз. Урокъёс бере искусствоосъя школае дыртылӥз. Отын но мыло-кыдо суредаськиз. Ужъёссэ ӵемысь пӧртэм адӟытонъёсы басьтылӥзы.

- Акварелен-а, карандашен-а суреданы яратӥськод? – юасько.

- Соиз но, таиз но кельше. Карандашен адямиослэсь тусбуйёссэс умой суреданы, нош акварелен инкуазез чебер но яркыт возьматыны луэ. Суредъёсы киям туж ӧжытэз кылизы, – шуэ  Кирилл. – Ваньзэ но ай али ке но кузьмасько.  Эшъёс но, ӵыжы-выжыос но трос ук.

Кирилл ИжГТУ-ын 5-тӥ курсын дышетске. Дизайнер луоз. Ялан компьютер сьӧрын пуке. Но ваньмон дырзэ тэк уг быдты: профакадемиын дышетонъя курсъёсын ужа. Агайёсыз но солэн адӟем карымонэсь: Артём ИжГТУ-эз йылпумъяз, Павлик Ижын пинь эмъясь луыса ужа. Агай-вынъёс удмурт кылын верасько, удмуртлыкез гажало.

Суредаськем сяна, Кирилл туж умой кырӟа но саксафонэн, валторнаен шудэ. Крезьгуръя школа пыр но потэмын. Школаын дышетскыкуз ик вуылӥз Челябинске но Новоуральске.

Студентъёслэн «Биг БЭНД ИжГТУ» джазовой оркестразы но Кириллэсь лыктэмзэ возьмаса гинэ уло. Со отын крезьгур инструментъёсын быгатыса шудэ. Та группаен ӵош усточилы шуд усиз ини Россилэн пӧртэм сэрегъёсаз вуылыны.

Любовь Тихонова.

Туспуктӥз автор.