Адӟытонысь «Корка» люкет.

Ижысь Киужъёсъя юртын Шаркан ёросысь усточиослэн возьматонзы усьтӥськиз. Отын кузёясько вурем мунёос но коӵышъёс.

Котькудӥз усточи киужъёсаз тырше чеберлыкез возьматыны, выльзэ малпаны, калыкез паймытыны. Огшоры басма, писпу сул, куар, вай но выжы пӧрмо паймымон чебер но дуно арбериослы. Оглом вераса – выжыкыллы.

- Шаркан музъем вылын быгатӥсь адямиос уло. Соослэн гинэ шаркан шортдэремзы вань. Киужъёссы Париже но вуылэмын. Отысь вормонъёсын бертылэмын. Шаркан усточиослэн мунёоссы шунытэсь, чебересь, мусоесь – пырак асьсэос кадесь. Котькудӥзлэн мунёлэн аслаз сямыз. Соосты учкыса, шӧдӥськод, тани-тани соос улӟозы, вераськыны но шудыны кутскозы, – тазьы дунъяз адӟытонэз история наукаосъя доктор Владимир Владыкин.

Выставкаез учкисьёс эшшо одӥг паймымонзэ пусйизы на: тросэзлэн мунёослэн йырсизы ӵыж-ӵыж горд.

- Шарканын трос горд адямиос уло, соин ик мунёосмы но ӵыж-ӵыжесь, – вера Шарканысь Кибашлыослэн юртэнызы кивалтӥсь Надежда Фёдорова.

Адӟытонлэн мукетыз валтӥсь героез – коӵыш. Соин герӟаськем адӟытон куинь люкетлы люкемын: «Азбар», «Корка», «Уж». Ваньмаз кузёяське коӵыш. Со котькытын ассэ капчи шӧдэ: пукон вылэ но пуксёз, койка вылэ но выдоз, керттӥськись кузё кышнолэн бугореныз но шудыны вуоз. Сое куаретӥсь уз луы.

- Коӵыш юнме шорысь быръемын ӧвӧл, – шуэ Н. Фёдорова. – Пытьыоссэ удмуртъёс вашкала дырысен ини пужыятылӥзы йыркерттэтъёсазы, ӵушконъёсазы, кускерттонъёсазы. Коӵыш – юрт котырез утись, кузёзэ витись но семьялы шуд вайись. Солэн сямыз пӧртэм: шудӥсь, нуныяськись, лекъяськись, уродъяськись.

Любовь Тихонова.

А. Ситникова но Е. Арвин кенешо.

Толэзьлэсь кема Ижын ужаз «Ыж гон пилем» адӟытон. Сое дасяз «Гнездо» огазеяськонлэн кивалтӥсез Елена Арвин. Тросэзлы та усточи мунёос лэсьтылэменыз тодмо. Но берло ньыль арзэ солэн кичӧлтэмезъя Ижысь кибашлыос ыж гонлэсь пӧртэм арбериос лэсьтылыны кутскизы.

Ыж гон пыдвылъёслы-пӧзьыослы, гын сапегъёслы асьмеос дышемын ини. Нош нуны бинялтонъёсты, сумкаосты, кильтыръяськон арбериосты сокем ӵем адӟылэммы ӧвӧл. Елена Арвин верамъя, та творчество дунтэм ӧвӧл. Кибашлыос, магазинысь буёло ыж гон басьтэм сяна, одно ик гуртъёсы потало на – сузямзэ, тугемзэ отысь ваё.

- Соосты сураса, туж ӟеч материал пӧрме. Одӥг ласянь, та узырлыкез ачиз инкуазь киямы сётэ кадь. Мукет ласянь, со туж вашкала но туж туала луэ. Берло дыре адямиослэн бадӟым тунсыксы кылдӥз ыж гонлы, милям но бере кылеммы ӧз поты. Соин ик радъямы мастер-классъёс. Мылкыд карисьёс выставкаямы ик утчаны быгатӥзы та материаллэсь кылзӥськись луэмзэ, – шуэ Елена Арвин.

Куинь ар ини ыж гонэн эшъяське Ижысь кибашлы Анна Ситникова. Солэн мудрон сумкаосызлы, весьёсызлы, сяськаосызлы синмасько ваньзы.

- Ыж гон – шуныт материал, сое мон горд сюен ӵошатӥсько, соос ӵыжы-выжыос выллем. Кызьы соизлэсь котьма лэсьтыны луэ, таиз но киын сыӵе ик кылзӥськись. Солэсь дӥськут, пыдкук сяна, мебель но пӧрмытыны луэ.

Мон али тросгес ужасько кильтыръяськон бордын. Одӥг сяська брошь лэсьтӥсько одӥг нунал. Соос пӧрмытэмын кӧс амалэн. Нимысьтыз пинё-пинё венен. Ыж гонэз бышкылоно. Веньлэн пинё люкетъёсыз сое тугало, со гынме, чурытоме но тӥледлы тупась формалы пӧрме. Таӵе амалэн ик киужлэн ёзъёсыз куспазы герӟасько. Соин ик люкетъёсты вуроно ӧвӧл ни – куспазы тач-тач кырмисько.

Нош сумкаосты, выж лёгетъёсты, изьыосты кот амалэн лэсьтоно. Шуом, сумкалы кулэ луоз ыж гон, буёло шорт. Выж вылэ валёно ву пыӵасьтэм материал яке клеёнка. Со вылэ вӧлдоно ыж гонэз. Майталэз векчи пыргытоно но пӧсь вуын сылмытоно. Собере ыж гонэз со вуэн солань-талань маялляно. Ыж гон огез борды мукетыз мед кырмиськоз. Озьы кӧня ке полэс тыроно, нырысь огшорызэ, бќрысь буёлозэ, нош ик майтал вуэн маялляно. Тӥледлы 2 сантиметр зӧкталаем «басма» кулэ ке, ыж гон «шобретты» 4 сантиметрлэсь векчи медаз луы. Ваньзэ шонер лэсьтӥды ке, куашкасьтэм но огъя суредо басма кылдоз. Солэсь вузэ пызьыртоно но, сумка лэсьтӥськоды ке, сумка кадь ик карыса, куасьтоно. Уд дыртӥське ке, ӵушконэн ӵушылыса, сое кык-куинь нунал возёно. Ӝоггес кулэ ке, зол-зол пызьыртыса, шуныт интые пуктоно. Куасьмем сумкаез кин ке пужъятэ, кин ке турлы бирдыос вурӟылэ. Мон ыж гонлэсь лэсьтэм сяськаосме ик бордаз юнматӥсько яке вылӥын верам веньёсын ик сумкае, векчи-векчи бышкыса, пужы пуктӥсько, – шуэ Анна Ситникова.

Егит усточи одӥг сумказэ кык-куинь нунал куспын вуттэ. Киыз уго волямын ини. Ыж гон борды кутскыкуз, со тодэ: мар лэсьтоз, кыӵе буёлъёсты кутоз, буртчин сӥньысъёсын яке лентаосын гындоз.

- Тулыс вуэ, соин ик киужъёсам яркыт буёлъёс, сяськаос трос. Коньдон понна уг, аслэсьтым мылкыдме ӝутон вылысь тазьы вырисько. Собере мон нылмурт ук, соин ик мукетъёсызлэсь висъяськыны, кильтрогес луыны тыршисько. Уго таӵе сумкаосты, шляпаосты, весьёсты магазинысь уд басьты.

Галина Семёнова.

Быръем кузьымдэс чебер коробкае интыяны быгатоды. Сое дасяны пӧрмытоды асьтэ киосыныды.

Упаковкалэн быдӟалаез – 24x20x9 сантиметр. Бумагалэн быдӟалаез A3 форматъем – 40×29 сантиметр пала – мед луоз.

Коробка пӧрмоз таӵе люкетъёслэсь: развёртка (1-тӥ суред) – 1 номеро деталь (азьпалыз, мышпалыз но урдэс люкетъёсыз); галстук (2-тӥ суред) – 2 номеро деталь (отделкалы чаклам люкет), кульчо – 3 номеро деталь (галстуклэн герӟетэз).

Кулэ луоз: лякись карандаш (ПВА клей уз тупа), линейка, огшоры графит карандаш, качы, 4 скрепка.

* Чылкыт бумага вылэ, 1-тӥ суредэз учкыса, развёрткалэсь выкройка суредалэ. Пусйылэ куасалляно интыоссэ – соосты янгышен вандыны но быгатоды.

* Выкройкадэс вандэ, сое мукет бумага вылэ интыяса, котыръёссэ пусъе – со гожъёсъя вандэ. Та кык пӧрмем арберидэс ог-огзы борды ваче ляке.

* Суредэз учкыса, ваче лякем бумагадылэсь дуръёссэ 1 сантиметрлы пушказ куасалтэ (пурысь буёлэн возьматэмын). Упаковкалэсь азьпалзэ мышпалыныз со куасалтэм дурыз борды ляке.

* Куасалтыны чаклам интыоссэ куасаллялэ, суредэз чакласа.

* Развёрткалэн улӥяз разрезъёс лэсьтэ – суред вылын соос пусъемын гожъёсын-стрелкаосын.

* Пыдэссэ куасалтэ, нош урдэсказ кылем прямоугольникъёсты пушказ пыртэ, пыдэсызлэсь паськыт полосказэ со прямоугольникъёс вылэ ляке.

* Сиресэз (воротникез) куасалтэ (1-тӥ суредын возьматэмын котырес А стрелкаосын). 1 сантиметр пала кельтэм дуръёссэ воротниклэн пушказ пыртэ но ляке. Суредысь воротник вылысь кык полэс пунктир гожъёсты чакласа, сирестылэсь дуръёссэ кырыж куасалтэ.

Басьтӥськиськом галстукез лэсьтон борды:

* Галстуклэсь кульчозэ (герӟетсэ) лэсьтэ со бумагалэсь ик, вандэ 5×8 сантиметр быдӟалаен прямоугольник, дуръёссэ куасалляса, ваче ляке – пӧрмоз 2,5×3,3 сантиметръем дась прямоугольник. Та герӟетэз ляке галстуклэн йылӥяз.

* Пӧрмем галстуктэс ляке упаковкадылэн азьпалаз – шораз ик.

Кузьымдэс та упаковкае интыялэ, урдэсъёссэ – дэрем кадь пӧрмем упаковкалэсь пельпум котыръёссэ – скрепкаосын юнматэ. Куасалтытэк кылем интыоссэ куасаллялэ.

Галина Матвеева.

Бумагалэсь чебер суред борддорез гинэ

Кулэ: ПВА клей, чибориё кагаз но картон, пинь сузян боды.

Горд яке нап-ӵуж кагазэз кузьласянь вандылоно, пасьталаез 4-5 миллиметр мед луоз. Векчи бумагаез быгыльтоно пинь сузян бодыосын. Бумага пумез, медаз сэрттӥськы шуыса, клеен юнматоно. Одӥг палэзь бирды понна кык полоскаез быгыльтоно, нош пуры понна ог куамын котресъёс кулэ.

Куаръёслы кутоно ӵуж, нап-ӵуж, вож но нап-вож буёло векчи юдэсъёсты. Одӥг куарлы кык пӧртэм бумага кутыны быгатоды. Соосты быгылляно. Куаръёс одӥг быдӟа мед луозы шуыса, геометрической формаосын линейка кутоно. Круг пушкы поныса, быгыльтэм арбериез ӧжытак сэрттоно. Собере юдэс пумез ляконо но кругез кыкналасянь чепыльтоно. Куаръёс дасесь.

Модослы вож бумага кулэ. Вань листокъёсты но быгыльтыса дасям арбериосты картон борды клеен ляконо. Дасям картинкаез рамкае поныса, ужды туссэ воштоз. Соку сое кузьымлы но кельыштыны быгатоды.

Валентина Емельянова.

Шляпа керттэмын 2 полэс сӥньысэн. Киужез кутсконо пыдэсысеныз. Курико венен нырысь 3 огшоры син лэсьтоно, соосыз кульчое огазеяно. Отӥяз котыръяса керттоно кыӵесъёстэк синъёсын (накидъёстэк огшоры синъёсын). Шляпалэн пыдэсыз круг выллем луыны кулэ, соин ик котькуд чурын 6-8 син ватсалляно. Йыр понон умой мед возиськоз шуыса, киужез ляб керттоно ӧвӧл. Пыдэсызлэн диаметрез 15-16 сантиметр пала луыны кулэ, озьы ке но пасьтаназэ йырдыя чаклалэ, бадӟымгес йырлы 19 сантиметрозь но вуттыны луоз.

Табере керттоно шляпалэсь мурдалазэ. Пыдэсыз бордысен ик керттонэз азьланьтоно котыръяса, но синъёсты ватсатэк. Киужлэн та люкетэз горшоклы кельше, ӝуждалаез 10 сантиметр котыр луыны кулэ.

Шляпалэсь дурзэ быдэстоно тазьы: 1-тӥ чурын синъёс ватсано котькуд 8-тӥ син бере. 2-тӥ чурез ортчоно ватсанъёстэк, 3-тӥ чурын синъёсты йылтоно котькуд 5-тӥ син бере. Собере 5-6 чурез керттоно, синъёсты йылтытэк. Берпуметӥ чурез йылпумъяно, синъёсты берлань  ортчыса («рачий шаг» амалэн).

Шляпаез чебермано керттыса ик лэсьтэм сяськаен но кык куарен. Сяськалы бичано 12 син. Собере котькуд синысь 2 кыӵесэн (накидэн) синъёс поттыса мыноно. Чурлэн пумаз ужез берыктоно. Эшшо огпол тазьы ик керттыса ортчоно но котькуд 5-тӥ синысь 2 кыӵесэн синъёс поттоно. Ужез берыктоно, берпуметӥ чурез керттоно «рачий шаг» амалэн. Керттэм уж ачиз сяськалы бинялскоз.

Кык куарлэн быдӟалазы пӧртэмесь. Бадӟым куарлы 10 синлэсь «цепочка» бичано, сое кыкналасянь 2 кыӵесэн синъёсын ортчоно, куарлэн йылаз кӧня ке синъёс ватсано. Пичи куарез 6 синлэсь «цепочкалэсь» лэсьтоно. Куаръёсты «рачий шаг» амалэн йылпумъяно.

Шарфлэн пасьталаез 14 сантиметр, кузьдалаез 110 сантиметр. Та киужлы 2 кузь вень кулэ. Быдэстэмын кышет керттон амалэн (кыкнапалтӥз азьдорин синъёсын). Керттэмын, кырыж мыныса: бичано 26 син, собере азьдорин чурез кутсконо кыӵес синэн (накидэн), йылпумъяно, 2 синэз огинэ карыса. Тазьы керттоно котькуд азьдорин чурез. Мыддорин палтӥз огшоры мыноно, кыӵесэн синэз азьдорин керттоно.

Татьяна Миронова.