Пельнянь кутон.

Татарстан Республикаысь Балтач ёросысь Леонид Сапожников тэк пуконэз уг тод. Нылпиосын ужам сяна, мыло-кыдо пыриське удмуртлыкез азинтонэ. Балтач ёросын арлы быдэ Гырон быдтон ортчытъяло, со сяна, радъяло на «Жингырты, удмурт кырӟан!» фестиваль, «Зарни тылы» конкурс.

Сырья школаысь дышетӥсь Леонид Сапожников верамъя, анай кылмес дышетӥсь школаос, клубъёс толэзьлы быдэ кыӵе ке ужрадъёс ортчытъяло. Бигеръёсты но пӧлазы кыско. Бигеръёс удмуртъёслэн камали дӥсьсылы синмасько. Нош кыӵе вожъясько уксё тӥрлыклы!

Удмуртъёс бигеръёс кадь пӧраськыны дышиллям.

- Бигеръёслэн куно пумитаны быгатэмзылы синмаськоно, – шуэ Леонид Дмитриевич. – Котькуд кунолы нимаз тусьтые 2-3 пумо сиён понозы, ханэз кадь данъяло. Ӝӧксы «тӥяське» 12-15 турлы сиёнлэсь. Соослэсь адӟем каро выжыосмы. Токма шорысь кырӟаллямтэ, дыр, вашкалаосмы:

Ой, туганъёс, мусо туганъёс,

Мӧзмиллям милям туганъёс.

Пушмульы тысез мюэ веттылыса,

Витиллям милям туганъёс.

Шошма удмуртъёслэн «туганъёс» кылзы ӵыжы-выжы шуэмез возьматэ, нош мю – со чечы. Туннэ шошма удмуртъёслэн тужгес ческыт сиёнзы – мильым, пельнянь, куноясько кӧжы кисален но. Перепечъёссы ӧжытак бадӟымесьгес, соосты перемеч шуо. Пыжо но асьсэ сямен: таба вылын бадӟым табанез сямен, вылзэ картофкаен я шу кисален зыраса. Леонид Сапожников лыдӟисьёсмес тодматэ шошма удмуртъёслэн куд-ог сиёнъёсынызы.

Кӧжы кӧмеч

Кулэ: 3 стакан кӧжы пызь, 1 стакан чабей пызь, 2 курегпуз, 200 грамм вӧй, чечы пуньы йылын сода, сое уксусэн кисьтоно, шӧмызъя сылал.

Ваньзэ огазе сураса, нырконо, лаёно, погыльтоно 1 сантиметр зӧкта. Вандылоно котырес чаркаен. Пыжоно ог 20 минут.

Тапкатэм (уднянь)

Кулэ: маялэн лэсьтэм ыльнянь.

Та сиёнэз гур азьын пыжоно. Тапкатэм ог 2-3 сантиметр зӧкта мед луоз. Ӝӧк вылэ понэмлэсь азьло нӧкы вӧен зырано. Грузинъёслэн та выллем сиёнзы – лаваш, азербайджанъёслэн – чурек.

Шешери (шекера)

Кулэ: 6 стакан чабей пызь, 2 курегпуз, 100 грамм йӧлвыл, 100 грамм сакыр, 200 грамм вӧй, шӧмызъя сылал.

Ваньзэ огазе сураса, нырконо но лаёно. 1 сантиметр зӧкта «сюлъёс» лэсьтыса, 1 сантиметр кузьда вандылоно. Пыжоно пӧсь гурын табаын яке пыжиськон калайын.

Дур кутэм пирог (кокрок)

Пушкеслы кулэ: 3 стакан чабей яке йыды кеньыр, векчи юдэм кӧё сӥль, векчи пӧсьтурын, 2 йыр сугон, шӧмызъя сылал.

Ваньзэ небӟытозяз пӧзьтоно но сӥятоно.

Ыльняньлы кулэ: 6 стакан пызь, 2 курегпуз, 1 стакан ву яке йӧл, ӝыны чечы пуньы сылал.

Ыльнянез пельняньлы зӧкта лаёно но стаканэн вандоно. Пушкессэ тырыса, дуръёссэ кутоно. Пӧсь гурын 15-20 минут пыжоно.

Немыри

Кулэ: 1 килограмм картофка, 200 грамм чабей кеньыр, 50 грамм вӧй, ӝыны литр йӧл, шӧмызъя сылал.

Картофкаез паласа пӧзьтоно вуын, ватсано сылал. Пӧзьыса вуон азяз ватсано чабей кеньыр. Кӧня ке пӧзьтэм бере лымзэ нимаз тэркые кисьтоно, нош картошказэ нельконо. Отчы ватсано вӧй, йӧл, озьы но напгес луиз ке – лымзэ. Ӟузьылон туж ческыт пӧрме.

Бамез дасяз Валентина Емельянова.

Туспуктӥз Леонид Сапожников.

Алнаш ёросысь Тыло школаысь столовойын ньыль нылкышноос ужало: Валентина Глухова, Надежда Тарасова, Надежда Ситникова но Ольга Курбатова. Пӧрасьёс сиён пӧзьто 89 пиналлы, озьы ик нылпи садысь 35 тэшкылилы.

Валентина Глухова витетӥ арзэ татын тырше. Нылпиосты, кӧттырымон сяна, ческыт но пайдаё сюдыны сюлмаськиськом, шуэ.

- Соос будо ук, соин ик тыршиськом. Сӥзьыл тани котькуд нунал салат юдӥськом. Тэргаськись пиналъёсмы туж ик ӧвӧл, ушъяськем кадь медаз кылӥськы но, школьникъёсмы уг ӝожтӥсько. Сыӵе ческытэн сиё, ява, шоразы учкыса ик, кӧт тыре, сюлэм шумпотэ, – вера Валентина Григорьевна.

Сыӵе ушъямзы бере ми но, «Удмурт дуннеын» ужасьёс, сиськытэк ӧм чидалэ. Зэм но, усто пӧрасько вылэм. Тэркыоссы муресь, сиёнзэс уг жаляло. Дуныз но бадӟым вылымтэ.

- Ӵук сиськон 12 манет котыр луэ, нуназеез 21 манет но 34 коньы усе. Трос нылпиё но ёрмыса улӥсь семьяосысь пиналъёсты дунтэк сюдӥськом, – вера валтӥсь повар Надежда Тарасова.

Надежда Николаевна 15 ар пӧраськись луыса ужа ини. Школаысь нылпиосты но, семьязэ но со ческыт сюдыны тырше. Одӥг амалъя пӧзьтэм-пыжем сиён ик пӧртэм кышномуртлэн пӧртэм шӧмо луэ. Но пӧраськоно одно ик капчи мылкыдын, соку тыршемед юнме уз луы, сиёнэд но калыклэн кӧтызъя луоз, шуэ Надежда Тарасова.

Котькыӵе нылкышнолэн вань яратоно рецептъёсыз, витьымтэ шорысь куноос лыктон вакытлы тупасез но мудронъёсызгес, сюан ӝӧквылэз чебертӥсез. Тылоысь пӧрасьёслэн но соос трос.

Салатъёс

Воргоронлэн шумпотонэз

Кулэ луоз: 200 грам ӵынатэм курег сӥль, 200 грамм чернослив, 200 грамм губи, 2 йыр сугон, 1 банка кукуруза, 2 курегпуз, 1 гранат но майонез.

Черносливез ог 10 минут пӧсь вуын возёно, собере юдоно. Губиез но сугонэз ӵош табаын пырсатоно но сӥятоно. Тэркы пыдсы нырысь вӧлдоно векчи вандылэм курег сӥлез, вылаз – черносливез, маялляно майонезэн. Со вылэ кисьтоно пырсатэм губиез-сугонэз, нош зырано майонезэн, собере мынозы кукуруза но юдэм курегпуз. Вылзэ таш-таш майонезэн шобыртэм бере салатэз чеберъяно гранат тысьёсын.

Кылдэ ньылод

Кулэ луоз: банка ананас, 3 яблок, 1 ӟуски виноград, 2 банан, ӝыны стакан майонез но ӝыны банка напчытэм йӧл (сгущёнка). Вань емышъёсты огкадь юдоно но майонезэн-йӧлын суралтоно.

Пумиськон

Кулэ луоз: 2 огреч, 3 ческыт пӧсьтурын, 3 курегпуз, банка кукуруза, банка оливки, сылалтэм губи но майонез. Ваньзэ сое юдоно, сылал пызьнано но майонезэн суралтоно. Та салат кӧттыро, шӧмыз туж небыт, аспӧртэм.

Пӧсь сиёнъёс

Сӥльын картош

Кулэ луоз: 300 грамм корам сӥль, 2 йыр сугон, 200 грамм губи, одӥг ческыт пӧсьтурын, 5-6 йыр картошка, 50 грамм нӧкы вӧй, ӝыны стакан йӧл, сылал но перец,  сема вӧй но 2 пуньы томат соус.

Фаршез юдэм сугонэн, губиен но пӧсьтурынэн сема вӧй пӧлын пырсатоно, сылалэн пызьнано, соусэн кисьтоно. Картошез пӧзьтыны пуктоно. Ог 20 минут ортчыса, сое шаньгилы сямен нельконо, нӧкы вӧй, йӧл но сылал поныса. Ӟырдатэм табае нырысь вӧлдоно  сӥльын, губиен пырсатэм пушкесэз, вылаз валёно картошка пунемез но вилкаен пужыос суредано. Табаез донгоно 15 минутлы гуре (духовкае). Картошты ӵыжыт тусо луэм бере сиёнэз луоз ӝӧк вылэ пуктыны.

 Пырсатэм тыкмачен шыд

Кулэ луоз: ӝыны курег, 5-6 картошка, 1 ӵужкушман, 2 йыр сугон,  тыкмач (вермишель), кык-куинь кӧжы пӧсьтурын, укроп, петрушка, сылал, сема вӧй. Быректэм вуэ пононо сӥль, пӧземез бере будэтоно юдэм картошез, пӧсьтурынэз. Табаын пырсатоно вуштэм ӵужкушманэз но  сугонэз. Пӧсь куен ик шыдэ пононо. Собере  вӧям табае ик вӧлдоно тыкмачез но, нап-ӵуж луытозяз, пырсатоно. Сое шыдэ кисьтоно но 2-3 минут пӧзьтоно. Тэркые ӝутон азьын укроп но петрушка пызьнано, шыдэ йӧлвыл будэтоно.

Галина Семёнова.

Толэзь пумын аслэсьтыз вордскем нуналзэ пусйыны дасяське история наукаосъя доктор, Удмурт Республикаысь наука удысысь дано ужась Галина Никитина. Веськрес мугоро кышномурт наукаен гинэ уг тунсыкъяськы, ваньмон дыръяз киужен выре, курико венен керттӥське, вуриське, юртъер пушсэ чеберъяны яратэ.

- Эгра ёросысь Мазьги гуртын вордски, но отын кема улыны ӧз кылды, – шуэ Галина Аркадьевна. – Улон монэ пӧртэм интыосы вуттӥз: Можгаын, Ижын, Москваын дышетски. Валамон, студент дыръя тыро-пыдо сиськыны дыр ӧз шедьылы. Москваын дышетскыкум, эшъёсы куро вал: пӧра ас калыкедлэсь сиёнъёссэ, кырӟа удмурт кырӟанъёсты. Кырӟаны яратӥсько, нош пӧраськыны, тужгес но пыжиськыны, уггес.

Одӥг пол Галина Аркадьевналэн юмоке шедьылэмез но вань. Быземын ни вылэм, куноос пельнянь кутыны дасяськиллям. Галина Никитинаез лайиськыны косӥллям, нош со, нокыӵе кариськытэк, уг быгатӥськы шуэм.

Со дырысен трос аръёс ортчизы. Табере Галина Аркадьевна яратоно сиёнзэ – табанез – но пыжоз, толлы ческыт сылалтӥськемъёс, варення-компотъёс дасялоз. Ужаны кутскыса, котьмалы дышем. Историяя, кылъя но литературая Удмурт институтын, пе, ас вакытаз нылкышноос куспын ӵошатскон выллем ортчытъязы: киужзэс возьматъязы, толлы дасям сиёнъёсынызы ог-огзэс куноятылӥзы. Галина Аркадьевна но эшъёсызлэсь бере кыльымтэ.

- Егит дыр ӝог ортче вылэм, – веранзэ азьланьтэ кышномурт. – Пиналъёс будӥзы, сылалтӥськемъёсты, ческыт варенняосты сиисьёс ӧвӧл ни. Соин ик бакча емышъёсты тросгес кынтыны тыршисько, озьы шӧмзы но, витаминъёссы но тросгес кылё. Та вакытэ бадӟым саклык висъяны ӧдъяй тазалыкме  юнматонлы. Дырын-дырын диета  возисько, канфет-тортъёслэсь но пыжиськемъёслэсь возиськыны тыршисько.

Галина Аркадьевналы ӝоген 60 арес тырмоз, котырес лыдпуссэ Удмуртилэн палэназ – Латвиын улӥсь апаез дорын – ортчытыны медэ. Кӧё-вӧё сиёнлэсь возиськыны тырше ке но, бадӟым праздникъёс дыръя яратоно «Фантазия» салатсэ пӧра ик. Латвиысь ӵыжы-выжыоссэ аслаз коронной сиёнэныз куноятыны малпа. Озьы ик туж яратэ фольгаын пыжем карпез.

Фольгаын пыжем карп

Чорыг юдэсъёсты сылалтоно, пӧсьтурынэн пызьнано, майонезэн маялляно, сугон ватсано но 1-2 юдэс лимон пононо. Чырс маке чорыглэсь лызэ пыргытыны юрттэ. Юдэсъёсты фольгае бинялтоно но духовкаын пыжоно.

«Фантазия» салат

Кулэ: 300 грамм курег сӥль, 120 грамм консервировать карем ананас, 120 грамм шампиньон, 2 пуньы нӧкы вӧй, вож петрушка.

Соус понна кулэ: ӝыны стакан йогурт (кефир но яралоз), 4 пуньы тӧдьы вина, 1 пуньы горчица, 3-4 пуньы майонез.

Курег сӥлез но ананасэз векчи юдоно. Шампиньонэз но миськыса юдоно, пӧсь таба вылын 5-6 минут пырсатэм бере сӥятоно.

Соусэ мынӥсь сиёнэз ваньзэ ӵош суралтоно. Тусьтые нырысь ик курег сӥль, губи, ананас пононо, нош виссэ соусэн зырано. Салатлэн вылаз курег сӥль пононо но векчи юдэм петрушкаен чебермано.

 Толлы гордкушман

Кулэ: 2 килограмм гордкушман, быдэн килограммен ческыт пӧсьтурын, сугон но горд помидор, 25 грамм курыт пӧсьтурын.

Сугонэз но ческыт пӧсьтурынэз кузялэс векчи юдоно но ӧжытак гинэ пӧсь таба вылын пырсатоно. Сӥль коран пыр поттэм помидорез но бадӟым вуштон пыр лэзем гордкушманэз пичи тыл вылын пӧзьтоно, ӵем сураса. Час ӵоже париськемез бере отчы ватсано на пырсатэм сугон, пӧсьтурын, курытсэ пӧсьтурынэз сӥль коран пыр поттоно. Сылал шӧмызъя пононо. 5-10 минут пӧземез бере дась салатъёсты банкаосы тыроно.

Валентина Емельянова.

Туспуктӥз Владимир  Беломорских.