Пудо-животлэн пайда сётонэз (таза вакытыз) герӟаськемын арлыдыныз, арлэн вакытыныз, сюдонэн, кыӵе интыын вордэм-утемен, тазалыкеныз. Арлыдо но толэзьем пудолэн улон кужымез трослы улӥын.

Лул кылдон (эмбрион) вакытаз ик азинске ни пудо-животлэн сӥльвиро но тазалыко луонэз. Выль кылдэм лул кулэезъя кисьма ке, вордӥськемез бере пӧртэм шуг-секытъёсын нюръяськон кужымез золгес луэ. Нош нырысетӥ нуналъёсаз вож пудолэн улон кужымез тужгес ляб. Сое утись иммуноглобулин (антитела) возиське плацентаын яке йӧлын, яке – сояз но, таяз но.

Пуныослы, коӵышъёслы, кроликъёслы им­му­но­­­гло­булин выже жоб (плацента) но ӵӧжы пыр. Кунянъёслы, ыжпиослы, парсьпиослы, чуньыослы – ӵӧжы пыр гинэ. Кунянъёслэсь лулмугорзэс утись кужым (антитела) пыӵа нырысетӥ суткаосы – 36 час куспын, тужгес но пайдаё луэ вордӥськемез бере 2 часэз. Парсьпиослы утись кужым пыӵан 35 нунал ӵоже кыстӥське. Та дыр ортчыса, иммуноглобулинлэн ку­жы­мез лябӟе. Соин ик мумызылэсь люкем бере парсьпиос туж ӝог сётӥсько висёнъёслы.

Котькуд аре таза пудо басьтон понна чакланы кулэ куд-ог куронъёсты. Нырысь ик – дыраз бызьылытоно. Со бордысь но потэ ӟеч пи поттон. Эскером пудоез бызьылытон вакытъёсты.

Парсь

Дыраз бызьылытон шӧдӥське мумы парсьлэн пи поттон луонлыкез вылын. Шудон мылкыдызлэн шор вадесаз бызьылытыку, тросгес пи ваёз. Нош со вакыт кыстӥське 36-96 час пала. Шудон мылкыдзэ мумы парсьлэсь валаны луоз пи ваён ёзвиысьтыз дыльк быземъя. Паръяны тужгес тупамон вакыт: пи ваён ёзвиез гордмыт, пыктэмын, трос дылькез. Озьы ик, тыбыр уллапалаз зӥбиськод ке, парсь вырӟылэмысь дугдэ.

Мумы парсез нырысьсэ бызьылытоно 7,5 толэзьысен, шудон мылкыдыз куинетӥзэ кылдэм бере. Пудо 140 килограммлэсь ӧжыт ме­даз кыскы. Вазьгес бы­зьылытыса, пиякуз шуг-секытъёс кылдыны бы­гатозы – пи потон ёзвиосыз юнманы вуттымтэ на.

Кыкетӥзэ бызьылытыны луоз, 18-24 час ортчыса. Парсьёслэн пи вайыны кисьман вакытсы (половой цикл) кыстӥське 21 нунал. Пизэс шорлыдын 110-140 нунал нулло. Пиоссэ бордысьтыз басьтэм бере, 8-10 нунал ортчыса, мумылэн шудон мылкыдыз кылдэ.

Скал

Скалъёслэн кунян ва­йыны кисьман вакытсы араз 21 нунал котырын кыстӥське. Шудон мыл­кыдзэ скаллэсь валаны луоз керӟегъяськемезъя. ӵем бӧксыны ӧдъя, уг выды, быжзэ урдыса возе, сиськемысь дугдэ, йӧлзэ уг сёты, скалъёс вылэ туба.

Кидысатон вакытэз шонер быръён понна нырысь ик шӧдыны-валаны кулэ сюролэсь вырӟылытэк сылон мылкыдзэ – рефлекссэ. Скалъёсты но ветылъёсты одӥг пол шудон вакытазы кык пол бызьылытоно-кидысатоно, 10-12 час вис карыса. Мылкыдыз ӧз ке буйга, та ужез быдэстоно котькуд 10-12 час ортчыса – буйгатскытозяз.

6-8 толэзьем ошпиос но ветылъёс кисьмало ни пи вайыны, но сӥльвирзы ляб на. Соин ик 5-6 толэзьем пудоез ог-огезлэсь висъяно. Ветылъёсты нырысьсэ бызьылытоно 18 толэзьысен, нош йӧло выжыысь ош­пиосты – 14-18 толэзьысен.

Вазь бызьылытэм ветыллэн кунянэз ляб вордӥське. Азьланяз со ӥӧлын но, таза кунянэн но уз шумпотты. Пи нуллон вакытыз скаллэн шорлыдын 240-311 нунал кыстӥське. Кунян ваемез бере 95 нунал ортчемлэсь азьло сое нош ик бызьылытоно. Но пудо утисьёс скаллэсь шутэтскон вакытсэ ӵемгес 40-60 нуналозь кыско.

Ыж

Ыжъёслэн пи вайыны луонлыксы кылдэ 7-9 толэзьысен, но сӥльвирзы таосызлэн но кыдамтэ на. Пиоссы таза мед луозы шуыса, вань выжыысь ыжъёсты 12-18 толэзьысен бызьылытоно. Шудэ та пудо арлэн огвакытаз.

Ыжъёсты бызьылытыку, чаклано: пизэс нонтон дырзы мед тупалоз ӟеч сиён ӝужанлы. Пи вайыны кисьман вакытэз та пудолэн кыстӥське 16-17 нунал котыр. Бызьылон вакытазы уг ке кидысало, 16-17 нунал ортчыса, ыжъёс выльысь шудыны кутско.

Та вакытэ ыжлэн пи ваён ёзвиез гордэктэ, пыктэ, дыльк бызьыны кутске. Пудо керӟегъяське, сиськемысь дугдэ. Эскеронъёс возьмато, шудон вакытыз 24 часлэсь кема кыстӥське ке, ыж кыкто пи вае. Ыжъёсты бызьылытоно кык пол: нырысьсэ – дыльк вияны кутскемез бере, кыкетӥзэ – 24 час ортчыса.

Такаослэсь бызьылон мылкыдзэс кемагес возён понна ыжъёс доры лэзёно ӵукнаысен ӝытозь, уйлы нимаз висъяно. Яке уйлы огинэ кельтыса, нуназелы висъяно.

Кеч

Кечъёслэн шудон мыл­кыдзы вакытэн-вакытэн кылдэ, ӵемысь – сентябре-декабре. Пи вайыны кисьмало 5-8 толэзьысен. Но сӥльвирзы бергес кыдамен, вазь бызьылытыны уг яра. Пи ваён понна вордоно кечез бызьылытоно 10-12 толэзьысен, нош выжыез умоятыны чакламзэ – 14-18 толэзьысен.

Пинал пудоез бы­зьылытыку, нырысетӥ шудон дырзэ кельтоно, кыкетӥзэ яке куинетӥзэ возьмано. Пи вайыны кисьман вакытыз кечлэн кыстӥське 17-22 нунал. Бызьылон дырыз ыжлэн мында ик – 24-28 час пала. Умойгес луоз, та вакытлэн шораз яке пумаз паръяса. Кусуллапалаз зӥбыса кеч лапыртӥське но быжыныз ӵем-ӵем шона ке, 6 час ортчыса, кечтака доры валтоно, кыкетӥзэ бызьылытоно, 18 час ортчыса. Ньыль арня ортчыса, керӟегъяськемысь дугдӥз ке, озьыен, со пияно.

Кечъёс но ыжъёс пизэс шорлыдын 146-160 нунал нулло. Пиямзы бере 10-14 нунал ортчыса, выльысь кылдэ шудон мылкыдзы.

Екатерина Михеева,

Ижысь гурт хозяйствоя академиысь пудо эмъян наукаосъя кандидат.

Нимаз кузёос но фермеръёс котьку сямен дасяло огвыллем пудо сиён: турын, куро, бакча емышъёс. Нош ӟечлыко йӧл кыскон понна скаллы кулэ 18-20 пала пӧртэм ватсэтъёс. Соос пӧлын йод, селен, кальций, фосфор, озьы ик трос пумо витаминъёс.

Бусыын будӥсь сиёнъёсын пудолы кулэ луись ватсэтъёс ӧжыт кылё музъем начарен, куазь пӧсь но кӧс улэмен. Эскеронъёс возьмато: заводын поттэм комбикормъёс кулэ ватсэтъёсын узырмытэмын ке но, со тырмыт ӧвӧл на. Берло дыре вылӥ ӟечлыко луэмзэ возьматӥз Россиын поттэм пудо сиён. Дасямын со «Фелуценлэсь». Скалъёс понна тужгес но пайдаё нюлӥськоноез.

Кезьыт куазен пудо-животлы трос пушкужымзэ (энергизэ) быдтоно луэ мугорзэ шунтыны. Таин валче йӧл сётон кужымез начаргес кыле. Соин ик скалъёслы берло дыре потто нимаз ватсэт – «Энергетической фелуцен». Отын трос ӝог сылмись углеводъёс, кӧйёс, А, Д-3, Е витаминъёс, минералъёс (йод, селен, кобальт). Ваньмыз та йӧллэсь ӟечлыксэ будэтэ, озьы ик скаллэсь тазалыксэ но иммунитетсэ юнматэ.

Вераны кулэ, углеводъёс соку ик сылмо ке, кӧйёслэн кужымзы кемалы кыстӥське. Ӧжытгес сиён сётыса но, пудолэн пушкужымез трос уг кошкы. Соин валче йӧл но бусьтыр люкаське, ӟечлыкезъя но со вылӥ луэ. Кузёоссэ скал шумпоттэ нап йӧлвылын, кисьтэм йӧлын (творог), вӧйын.

Гранулаос 5 килограммен вузасько, тырме со кема дырлы.

Светлана Егорова.

- Та дыре ветеринаръёс пудоез толлы дасяло. Сюлмасько пудолэн тазалыкез умой мед луоз, скалъёс трос йӧл мед сётозы но кунян вайыны мед быгатозы шуыса. Управлениысь специалистъёс та пумысен али ялан ёросъёсы потало, пудо утялтӥсьёс но кивалтӥсьёс пӧлын  дышетсконъёс радъялляло. Сыӵе ужрад алигес ортчиз Дэбес ёросын. Дышетсконъёс дыръя бадӟымгес саклык висъяны куриськом пудо сиёнлэн ӟечлыкезлы, угось урод дасям сиён бордысь трос висёнъёс пото. Куддыръя турын но, куро но, силос но тырмыт, нош ӟечлыксы улӥын.

- Кызьы чаклано сиёнлэсь ӟечлыксэ?

- Со понна хозяйствоосын кылдытэмын лабораториос. Отысь специалистъёс чаклало, хозяйствоосын маиз уг тырмы пудо сиёнын. Озьы сиёнэз тупатыны луэ чаклам нормаосъя. Шуом, ватсаны минерал сылалъёсын но витаминъёсын дасям концентратъёс.

- Нош нимаз хозяйствоосын кызьы чаклано пудо сиёнэз?

- Семьяос азьын та ужпум лэчыт уг сылы. Угось котькуд семья ас пудо-животсэ ческытгес сюдыны тырше. Вылаз ик, туала вакытэ гуртоос сокем трос пудо уг ни вордо. Соослэн турынзы но, бадӟым хозяйствоын сярысь, вож-вож, зоръёс улын сисьтыса возьымтэ ке. ӟеч кузё турынзэ но сенике чакласа тыре.

- Кыӵе муген тӥ алигес Сьӧлта ёросэ вуылӥды?

- Татын йылпумъянъёс лэсьтэмын ёросысь ветеринарияя службалэн 9 толэзь ӵоже ужамезлы. Республикаямы секыт югдур возиське лейкозъя. Та висён Удмуртиын 131 интыын алямын, черлам пудоос вань Сьӧлта ёросын но. Соин ик татчы потамлэн огез мугез лейкозэн герӟаськемын вал. Та висёнэз огъя кужымен ӧм ке быдтэ, шуге-леке сюрем хозяйствоослы но улосъёслы йӧлзэс, сӥльзэс вузаны нокытчы луоз. Та ужпум уката но лэчытоме Россия ВТО-е куриськемен валче. Лейкозэн кемалась нюръяськиськомы ни ке но, куд-ог хозяйствоосысь кивалтӥсьёслэн та ужпумез пумозяз валамзы уг на поты, лэся. Кытчы карозы соос ас продукцизэс, басьтӥсь ке ӧз луы? Хозяйствоязы гинэ возёно луозы. Лейкозлэн вирусэз нырысь ик уродмытыны быгатоз йӧл-сӥль сиисьёслэсь тазалыксэс. Зэм, йӧлэз быректыса но сӥлез пӧзьтыса,  лейкозлэн вирусэз быре. Но со висёнэн ӧд ке нюръяськы, вирус нокытчы но уз кариськы, пудо пушкын ик возиськоз.

- Кызьы быдтоно та висёнэз?

- Россиысь тросаз улосъёсын лейкоз ӧвӧл ни. Солэн вирусэз кемалась быдтэмын ни кунгож сьӧрысь странаосын но. Отын солэсь вакчи дыр куспын мозмытскизы, висись пудоез выжыеныз ик быдтыса, фермаосты сэрттыса. Но фермеръёслы со бадӟым ыштонъёсын ӧз берытскы, угось страховка басьтӥзы. Со коньдонэн бӧрысь выль интыосы  мукет фермаос пуктылӥзы, выль пудо выжы уськытылӥзы.

Асьмелы таӵе чутрак амалъёс уггес тупало. Хозяйствоосмылы соос дуно усёзы, соин ик нюръяськиськом пичи вамышъёсын. Котькуд ёросын но хозяйствоын кутэмын лейкозэз быдтонъя план. Отын чаклам ужрадъёсъя тросаз ёросъёсын та висёнэз вормизы ни.

- Кыӵе ужпумъёс ӝутскыло на калыкен пумиськылонъёс дыръя?     

- Урмон висён пумысен. Туэ сӥзьыл карантин ялэмын «Нылгинское» муниципал кылдытэтын. Нош алигес урмон шараямын Шаркан ёросын. Нылгаын сямен ик, татын но висён шедем коӵышлы. Урмон висёнъя таиз витетӥез учыр ни.

- Пудо эмъясьёс понна 2011-тӥ ар кыӵегес вал?

- Удмуртиын ужало 9 ёрос но 15 элькун лабораториос. Ваньзы соос туэ аккредитациез ортчизы, ужаны лицензиос басьтӥзы. Лабораториос нокыӵе оборудованилы та дыре уг кулэясько, арлы быдэ соослы мае ке но выльзэ басьтӥськом. Улонлэсь бере ум кылиське, эскеронъёс нуонъя выль технологиос кылдо ке, пыӵатыны тыршиськом.

Лабораториосын ужась специалистъёс пӧртэм анализъёс, эскеронъёс лэсьтыны быгато. Отын тодыны луэ йӧллэсь, сӥльлэсь ӟечлыксэс. Специалистъёс вералозы, мар уг тырмы пудолэн вираз, кыӵе сиёнэн со сюдэмын но маин висе.

Татьяна Банникова.

Толлы дасям турын бордысь пыкмем зын потэ. Изъян уз вайы-а со пудолы?

Галина Широбокова.

Шаркан ёрос.

Валэктэ Екатерина Михеева, Ижысь Гурт хозяйствоя академиысь доцент, пудо эмъян наукаосъя кандидат.  

Гурт пудо-живот, уродмыны шедем сиёнъёсын сюдыса, ӵем дыръя висьыны усе, шугоме. Нырысь ик сыӵе шуг-секытъёсы вуттэ микотоксикоз. Мар со сыӵе? Пудо сиёнэ аляло пӧртэм губи висёнъёс: аспергилюс, фузариум, пенициллум но мукетъёсыз. Сиён борды соос ӝабырскыны быгато бусыысен, транспортэн нуыку-вайыку, изыку яке толйыны дасям интыосын.

Губи висён каръяськем бере пудо сиёнын утиськись витаминъёс, белок, углеводъёс, липидъёс изъянмо, турын кӧсэктыны ӧдъя. Озьы сиёнлэн ӟечлыкез трослы улӥе лэзиське.

Губи висёнъёсын валче пудо-животлы аляны быгатозы паласькись висёнъёс. Губиосын йырин ик пудо будыны курадӟе, иммунитетэз лябӟе, пи ваён луонлыксы кулэсме.

Пудо сиёнлэсь изъянмемзэ валаны луоз таӵе тодметъёсъя: турын сьӧдэктыны кутске, бордаз су выллем мар ке няняське. Нош тысь сиёнъёс тӧдьмыт выллем луо, вылласянь яке пушласянь гордмыт яке гордмыт-ӵуж виштыос кылдо. Пурысьтаны кутскем тысь вожмыт, пурысь яке чагыр тусо луыны быгатоз.

Пудоез уг яра сюдыны пурысьтам нянен, париськем, пурысьтаны кутскем но пыкмем зын пыӵам турынэн. Таӵе сиёнэз ӝегатскытэк сутоно-быдтоно. Губи висёнъёсты шараян понна пудо сиёнэз эскерыны нуоно лабораторие.

Изъянмыны медаз шедьы шуыса, пудо сиёнэз чакласа возёно. Толлы дасянозэ ӟеч-ӟеч куасьтоно. Дырын-дырын эскерылоно ӟечлыксэ: изъянмыны кутскымтэ-а? Пудо сиён тӧлано интыосын  утиськыны кулэ. Азьвыл аре дасям кылем-мылем сиёнэз ваньзэ чылкыт утялтоно, выльзэ со вылэ интыяны уг яра. Куроез но турынэз музъем вылын толйытыса, пудолы озьы ик висёнъёс паласькыны быгатозы. Бадӟым кышкытлык ваё, турнатэк яке аратэк кельтыса, лымы улын толъем тысё турынъёс.

Кырсьмыны шедьтэм пудо сиён, чылкытатэм бере, куд-ог учыръёсы сюдыны яра. Но эскерыны кулэ, кыӵе губи отчы алямын вал. Куд-ог висёнэз номырин быдтыны уг луы. Комбикормез губи висёнъёслэсь чылкытатыны юрттоз кальцинировать карем содалэн 0,1 процентъем суретэз – пӧсятоно 2 час ӵоже. Куроез но турынэз утьыны юрттоз аммиак, гасить карымтэ известь. Озьы ик кутыны луоз сорбентъёсты: фитосорб, микосорб, эгыр но мукетсэ. Выльысь улӟытэм пудо сиёнэз узырмытыны луоз Е, С витаминъёсын, каротинэн но селенлэсь препаратъёсын.

 

Юанъёслы валэктэ Екатерина Михеева, Ижысь гурт хозяйствоя академиысь доцент, пудо эмъян наукаосъя кандидат.

Малы курегпузлэн ӵужез луэ яркытгес яке бездытгес?

Курегпуз ӵуж яркытгес луэ, бурдоосты каротинэн узыр сиёнэн сюдыса. Гуртоос курегъёссэс ӵужкушманэн но, картошкаен но, мукет бакча сиёнъёсын но тысьёсын утялто. Соин ик кукейлэн ӵужез яркыт луэ. Отын витаминэз тросгес ке но, магазинын вузаськисезлэн но ӟечлыкез улӥ ӧвӧл.

Марлы одӥгез курегпуз сьӧм тӧдьы, мукетыз – куреньмыт? ӟечлыксы ласянь соослэн кыӵе ке пӧртэмлыксы вань-а?

Тылобурдо пузлэн буёлэзлэн пӧртэмлыкез выжы бордысь потэ. Кылсярысь, кыр бурдоослэн пузъёссы виштыё луо. Буёлъёслэн пӧртэмлыксы герӟаськемын пигмент виштыосын, нош ӟечлык ласянь номыр пӧртэмез ӧвӧл.

Берло дыре курень буёло курегпуз паськытгес вӧлмемын калык пӧлын, сое басьтӥсь тросгес. Нош мукет ласянь, тӧдьы буёлозэ эскерыны капчигес, сьӧмыз чильпырамен.

Куд-ог курегпузын вир виштыос кылдэмын. Та чипкетӥсьёс кылдонэн герӟаськемын шуоно ке, тылобурдо фабрикаосысь басьтэмъёсыз пи поттонтэмесь – курегъёсты атасъёс адӟылымтэ. Соку малы вир виштызы вань?

Курегпузын вир виштыос кылдыны быгатозы, мумы безын (яичникын) герд клеткаос кылдон вакытэ вир ветлонлэн сураськеменыз. Курегпуз тӧдьыын сыӵе виштыос кылдыны быгатозы, А витамин тырмымтэен, пуз потон нёредын кыӵе ке шугъяськонъёс луэмен. Вир вишты кылдон озьы ик паласькыны быгатоз выжыысь выжые. Курегпуз ӵужын но вир кульчо луыны быгатоз. Но таин валче кукейлэн ӟечлыкез уг уродмы. Нош виштыез палэнтыны быгатӥськоды.

Юанъёслы валэктэ Вячеслав Сабреков, Удмуртиысь Пудо эмъянъя валт

- Скалмы луд вылысь кӧня ке пол кӧтыз тордыса бертылӥз ни. Малы озьы луылэ? Оло, пудо возьмасьёс янгышесь?

Р. Четкарёва.

Дэри ёрос, Изгурт.

- Таӵе учыръёс ӵемгес луыло сӥзьыл. Бусыосын та вакытэ тырмыт пудо сиён: пуртэсо но трос аръем турынъёслэн – рапслэн, клеверлэн, люцерналэн – утялтэм бервылъёссы. Собере ю-нянез кутсам бере но бусыосын кытӥ-отӥ ю тысь кисьтӥське. Вань та ческыт сиёнъёс пудоез зол гочато. Возьмась ӧз чакла ке, сюроос одно ик отчы кошкозы. Но та бордын гинэ ужпум ӧвӧл. Пудо уллёлэн тазалыкез понна сӥзьыл юн сюлмаськыны кулэ хозяйствоослэн, фермаослэн кивалтӥсьёссы но скалъёслэн кузёоссы. Пудоез луд вылэ сютэм поттоно ӧвӧл. Люктано, пичильтык сиён сётоно. Сютэм скал, пуртэсо сиёнъёс вылэ шедьыса, кӧттырмостэм луэ. Солэн ӝушез тордэ. Нош ӝуше мертчисько на ке йыдылэн кузь шепъёсыз, скал зол уродмыны быгатоз. Соин ик котыр ласянь чакласьконо.

Пуртэсо сиёнъёс вылэ пудоез лэзьыны уг яра зоръёс но лысву усем бере, сыӵе куазен та сиёнъёс ӝушын уката но зол чырсаны кутско. Пудоез чакламтэен, алигес 16 ветыл быриз Кияса ёросысь «Агро-Терра» эштосын.

- Республикаямы пумиськылэ урмон висён. Маин со герӟаськемын?

Г. Иванова.

Якшур-Бӧдья ёрос.

- Кемалась ӧвӧл, урмон аляз Ува ёросысь Нылга черкогуртын. Нылкышноез куртчем шыраны быгатӥсьтэм писэйпи. Ярам, кышномурт ӝегатскытэк вазиськиз специалистъёслы. Ува ёросысь ветслужбаын ивортӥзы: коӵышпи урмонэн висе вылэм. Солы та висёнэз кузьмам шырась анаез.

Шаерамы али шыръёс трос. Соосты кутылӥсь ӟичыос, комакъёс, коӵышъёс урмонэн висьыны быгатозы. Али Нылгаын карантин ялэмын.

- Пӧйшурасьёс куддыръя вузало гондырлэсь, кырпарсьлэсь, койыклэсь сӥльзэ. Дӥсьтоно-а сое басьтыны?

Е. Жуйкова.

Эгра ёрос,

Чутыр черкогурт.

- Та пӧйшуръёсты ыбылыны лэземын нимысьтыз лицензияя. Кутэм пӧйшурлэсь сӥльзэ пӧйшурасьёс вузаны быгато. Но котьма ке но сӥльлэсь ӟечлыксэ эскероно ветлабораториын, соос ёросъёсын вань. Зэм, эскерон лэсьтӥське, дун тырыса. Кылсярысь, гондырлэсь, кырпарсьлэсь адямилы паласькыны быгатоз трихиннелёз. Та висёнэз шараяны шуг, витьымтэ шорысь аллергия кутске, мус, сюл курадӟыны ӧдъяло.

Койык сӥльлэсь адямилы сюрыны быгатоз финноз (цистицеркоз) висён, солэн паразитъёсыз каръясько йырвиыме, тыосы, мусэ. Таиз но висён кышкыт. Сое вӧлмыто пуныос но. Соин ик койыкез (озьы ик парсез, сюро таза пудоез) вандыку, пунылы куяно ӧвӧл животлэсь йырзэ но кӧтпуш тӥрлыкъёссэ. Пӧйшурасьёслэсь басьтэм сӥлез котькуд адями ачиз лабораторие нуыны быгатэ. Котькыӵе сӥлез кема пӧзьтэм бере гинэ сиёно.

- Городысь кошкыса, гуртын улыны малпасько. Кыӵе пудо вордон борды басьтӥськоно меда?

Н. Сафронова,

Ижын улӥсь.

- Нырысь ик солы дасяськоно. Ноку пудо вордылэмды ӧвӧл ке, та удысъя трос лыдӟиське. Али уноез кролик вордо, мушъёсын выро. Гурт калыкен вераське. Куддыръя тазьы но луэ: огаз гуртын ыжъёстыгес ярато, мукетаз – парсьёсты, куинетӥяз – ӟазегъёсты, курегъёсты. Соин ик тӥледлы но тодматсконо гуртлэн йылолъёсыныз. Пудо першал доры но кожаны мултэс уз луы.

Сое но лыдэ басьтоно: кынарды вань-а пудо сиён дасяны? Кинлэн кынарыз тырме, со скал вордэ. Куд-огезлы кеч кельше. Вылаз ик, кечъёслы трос сиён кулэ ӧвӧл, бадь но мукет писпу вайёсын но буйгатско.

Сӥль понна пудо вордыны малпаськоды? Бакчаяды трос картошка мерттӥськоды? Озьыен, тупалоз парсь вордыны.

Татьяна Банникова.