10 ар талэсь азьло кылдћз удмурт кылын нырысетћез сайт. Уноез со сярысь уг тодо ни - вордћськиз со «Удмурт дунне» газетлэн редакцияз. Со бордын ужаз егит программист Сергей Акбаев. Но кык-куинь толэзь улэмез бере удмурт бам кысћз. Сергей Валерьевичмес басьтћзы армие. Вуоноез «нырысетћ» удмурт сайт кылдћз ай, вить ар ортчыса гинэ. Интернетын удмурт кыл али туж ќжыт кутћське. Мар люкетэ солы отчы выжыяськыны?
Россиын њеч валазы: улонлэсь бере медад кыльы шуыса, пиналъёсты дышетоно интернетэн ужаны. Озьы гурт школаосы но вуыны ќдъязы компьютеръёс. Жаль, интернет дунне нимо вотэсэн герњаськон отын дыггес мынэ.Компьютер вотэс котьма быгатэ шуиськом, но џемысь-а со лабыртэ удмурт сямен? Кыџе инвисъёс усьтћсько анай кылмы азьын?
Али дырлы удмурт кылын дасо пала сайтъёс вань. Зэм, куд-огзэ зэмос сайт шуыны уггес луы. Рос-просъёсыз пќлысь пусйыны луысал «Удмурт дунне» газетлэсь сайтсэ, Пичи Пурга ёросысь Курчум-Норья гуртысь Петров вынъёслэсь удмурт порталзэс. Берлоысьтыз џемгес лыдњыны луэ «Мынам Удмуртие» телерадиокомпаниысь журналистъёслэсь туж вакчи иворъёссэс. Порталын бадњым инты басьтэ удмурт кылбурчиослы сћзем люкет. Тунсыко статьяосъя висъетэз вань, но малы ке буш на. Петров вынъёслэсь ик нимысьтыз пусйысал «Удмурт кыл» сайтсэс. Трос пќртэм ивортонъёс сяна, интернетын удмурт кылын ужаны валэктэмын.
Сюлэмзэс поныса лэсьтћллям асьсэ сайтсэс Надежда Пчеловодова (егит кылбурчи, али Эстониын улэ) но Эрик Казаковский (Алнаш ёросысь Казакгуртысь Роман Романов). Но таосызлэн интернет вотэс бамъёссы укыр сюбегесь, асьсэ творчествоенызы гинэ тодмато, шуыны луоз.
Аспќртэм но туж мудрон удмурт кылын вераське «Ошмесдћнь» сайт. Тусыз - льќльырась-воринъясь буёло. Кузёосыз - Можга ёросысь Карашур гуртысь Ирина но Павел Лебедевъёс. Соос пусъё: «Ошмесдћнь», пе, со «Шудбурдћнь» удмурт воршудлэн сайтэз. Валантэм кадь. Сайтазы пыџамын инкуазен огинэ кариськон мылкыд, шорад долкало туспуктэм вылысь скалъёс...
Ортчем арын октябрь толэзе Франциын вордћськиз «Тангыра» удмурт сайт. Солэн авторъёсыз - Светлана Едыгарова (али Франциын улћсь егит тодосчи) но солэн эшез француз Бенуа. Укнозылэн нырысетћ бамыз туж чебер - Франциысь юртъёс вылын италмасъёсын керттэт. Та бам ас котыраз люканы выре удмурт кылэн тунсыкъяськисьёсты, проектъёс гожъясь адямиосты.
Нош Эгра ёрослы сћзем сайт (авторез Сергей Чирков ужбергатћсь) пушкын вань удмурт форумез но. Татын пќртэм сюлмаськытћсь ужпумъёсъя котькуд мылкыд карись быгатэ аслэсьтыз малпанзэ вераны, споръяськыны.
Нокызьы но палэнэ кельтыны уг луы удмурт крезьгурлы сћзем интернет бамез. Сое Сергей Чирков ик кылдытэм, вылды. Татысь дасо пала удмурт кырњанъёсты, усьтэм-кылзэм сяна, аслыд гожтыса кельтыны быгатод, ньыль удмурт кырњан гурез мобильникад но пуктэмед луоз.
Тужгес но егитэз удмурт сайт - серекъян-маскаръяськонлы сћзем «Лопшо Педор». Авторез - «Мынам Удмуртие» телерадиокомпаниысь корреспондент Фёдор Миннигараев.
Тћни озьы чылкак удмурт сайтъёс пќлысь таоссэ гинэ пусйыны луоно кадь. Но вань ай удмурто-њучо укноос но. Таосыз пќлын висъяське наукая, культурая но иворъёсъя «Удмуртология» сайт. Кылдытћсез - социальной коммуникациосъя институтысь историяя но политологияя кафедраысь егит тодосчи Денис Сахарных. Удмурт интеллигенцилы та ним туж тодмо. Денис Михайлович ачиз њуч ке но, удмурт кылын туж вольыт вераське, сайтысьтыз но удмурт кылъя туж трос тунсыкозэ шедьтыны луоз.
«Сюбег» укноос пќлысь пусйыны луысал удмурт пќраськонъёслы сћзем сайтэз. Авторъёсыз - Петров вынъёс. Нош Сергей Чирковлэн эшшо «Вань улонмы - Игра» пичи сайтэз тодмо. Татысь Кедра Митрейлэн улонэз но творчествоез сярысь лыдњыны луоз.
Вань на удмурт гуртъёслы сћзем кќня ке сайт. Но удмурт кылын вераськыны отын уг дырто. Со понна анай кылынымы лабыртыны ќдъяз республикаысьтымы Кун Кенешлэн укноез. Отын нимаз бамын иворъёс удмурт сямен печатласько. Анай кылынымы куд-ог иворъёсты лыдњыны луэ Финн-угор калыкъёслэн иворъёсъя центрзылэн бамъёсысьтыз но.
Интернетын удмурт кыллэсь кутћськемзэ вылтћзгес гинэ учкыса потћ. Озьы но адњиське ни, анай кылынымы сайтъёс туж ќжыт. Џошатон понна, бигер кылын соос сюрс пала ни. Малы асьмелэн кылмы интернетэ дћсьтытэк пыџа? Солы нокин но уг люкеты ук.
* * *
Тросэз малпало, компьютер вотэсын удмурт сямен вераськыны нырысь ик кутскизы Петров вынъёс. Та тунсыко адямиос зэмзэ но туж сюлмасько удмурт сайтъёс кылдытон сярысь. Асьсэ интернет бамазы удмурт сямен вераськыны соос нырысьсэ кутскизы 2002-тћ арын. Кыџе шугъяськонъёсын соку пумиськизы?
- Удмурт шрифтъёс ќй вал. Соин ик удмурт кылын сайтъёс но ќз вордћськылэ, - шуо Петровъёс. - «Удмурт дунне» газетлэн редакторез Алексей Шкляев одћг пол милемлы удмурт шрифтъёс сётћз. Но соос ваньмызлы тупась маке ќвќл. Мукет компьютеръёс сьќрын пукисьёс сайтмес лыдњоно карисько ке, удмурт букваоссы уг усьтћсько. Ма, Кун Кенешлэн берло лэсьтэм шрифтъёсыз но мыдланесь. Соосты но котькуд компьютерысен уд лыдњы. Малпаськом, огъя кабъёс ќвќл бере, удмурт кыллэн «виртуальной» шуиськись дуннеын вќлмонэз љега.
Та малпанэн соглаш ќз луы Денис Сахарных. Солэн «Удмуртология» сайтэз 2003-тћ арын кылдћз.
- Нырысь кутскон понна кытћяз быдэсак њуч букваосын но гожъяськыны луэ ук. Озьы но ваньмыз валамон. Удмурт кыллэсь интернетын ќжыт вќлмемзэ мукет сямен валэктыны луэ, - шуэ Денис Михайлович. - Ужпум, оло, калык психология бордын. Удмуртъёс компьютерен ужаны уггес дћсьто на. Тросэз потэ тодымтэ бордысь но: кызьы сайт лэсьтоно? Уноез удмуртъёс уло гуртын. Интернет возён отын дуно усе.
Шугъяськытћсь югдурысь потон понна нырысь ик школаысь пиналъёсты компьютерен ужаны дышетоно. Ортчытъяно удмурт сайтъёслы конкурсъёс. Соку гуртоос но, оло, асьсэ сайтъёссэс кылдытон сярысь малпаськозы, - пусъе егит тодосчи.
Озьы ке но, огъя шрифтлэн ќвќлэз мылкыдмес љожомытэ ик.
- Бигеръёс Майкрософт компаниен герњаськизы но вазенгес ини асьсэ букваоссэс клавиатура вылэ выжтћзы, - шуэ редакциысьтымы компьютер отделэн кивалтћсь программист Сергей Акбаев. - Соин ик бигеръёслы вотэсын ужаны капчигес.
Но малы удмуртъёс но озьы ќз каре? Нокинлэн но та ужпумен выремез ќз поты шат?
- Удмурт кыл нокинлы кулэ ќвќл, лэся. Удмурт телеадњытонъёс, радиоверанъёс но туж ќжыт бере, мар веранэз на интернет сярысь, - љожтћськемзэс верало Петров вынъёс.
Но воксё номыр уг лэсьтћськы шуыны уг луы.
Ортчем арын Кун Кенешысь Наукая, дышетонъя, культурая но егитъёсын ужан политикая комиссилэн кивалтћсез Алексей Красильников дораз ќтчаз кќня ке программистъёсты. Интернетын кутоно удмурт шрифтъёс сярысь мылкыдзэс юаз. Со бќрсьы Кун Кенешлэн бурд улаз удмурт букваосын куинь шрифт кылдытэмын вал. Но Майкрософт компаниен герњаськытэк, компьютер клавиатураез воштыны уг луы. Соин ик быдэс дуннеысь котькуд мылкыд карись компьютерысеныз удмурт букваосын печатланы уг быгаты.
Нациосын ужан политикая министерствоысь отделэн кивалтћсь Павел Орлов удмурт кыллэсь интернет вотэсын вќлмемзэ кемалась ини чакласа возе. Та пумысен солэн аслаз малпанэз:
- Анай кылынымы сайтъёс кылдытон али, оло, сокем кулэ но ќвќл. Нырысь ик дышетоно егитъёсмес интернетэн ужаны. Вакчияк вераса, чорыг сётэм интые, киязы визнан мычоно. Озьы будэтоно тодћсь-валась егитъёсмес.
Ваньмыз валамон кадь. Но кин ай шуиз: та егитъёс, компьютер сьќрын пукыкузы, удмурт кылэз кутозы? Оло, зэм но, кыџе ке конкурсъёс, нимысьтыз программаос кулэ?
Та ласянь, пе, Нациосын ужан политикая министерствоын вераськонъёс мыно ни. Павел Орлов сюлмаськемзэ вераз: я, удмурт кылын сайтъёслы конкурс ортчытом, коньдон висъялом, нош вормисе потэм мурт уксё басьтоз но ужамысь дугдоз. Соку мар? Сое радъян амалъёс пумысен малпаськоно на...
Нош со вие куд-ог шаплы бускельёсмы йырзэс кема ќз тћялэ. Татарстанын бигер кылын сайтъёслы конкурсъёс ньылетћ арзэ ортчо ни. Туэ гинэ та конкурсэ 170-лэсь трос выль бигер сайт пыриськем.
* * *
Ваньзэ тае џошатыса, интернетын удмурт кыллэн азинскемез шоры Петров вынъёс љожмыт мылкыдын учко:
- Кин тодэ, оло, кќня ке ар ортчыса, анай кылынымы сайтъёс туннэлэсь но ќжыт кылёзы. Али уноез соос кызьы кылдытэмын вал, озьы ик тэк «ошиськыса» уло. Нош сайт нуналлы быдэ «шоканы», выльдћськыны кулэ. Отчы адямиос мед пыралозы, выль но выль иворъёс мед шедьтозы, сюлмаськытћсь ужпумъёсъя мед вераськозы.
- Ялан выльдћськись, зэмзэ но улћсь-шокась бамъёс пќлысь мон пусйысал куиньзэ гинэ, - шуэ Павел Орлов но. - Со - «Удмурт дунне» газетлэн укноез, Петров вынъёслэн удмурт порталзы но «Лопшо Педор» сайт.
Интернет бамъёс возён понна дыр но кулэ ай. Нош асьмелэн со ноку уг тырмы.
- Эк, кин ке мыным юрттысал ке, сомында удмурт проектъёс лэсьтыны луоно! - лулњылэ Денис Сахарных но.
Зэм, дуннеын асьсэ сайтъёссы вылын коньдон поттыны быгато ни. Но удмурт кылын укноос ноку но коньдоно уз луэ, вылды. Оло нош соосын выронэз ик ќвќл? Пиналъёсмы огдышем сямен мед улозы, ульчаетћ тросгес мед бызьылозы. Но туала улонлэсь воксё бере ум кыле-а? Анай кылынымы вераськись егитъёслэн лыдзы кулэсме. Интернетэз валасьтэм пиналъёс асьсэ тодонъёссыя уг ни быгато вожвылъяськыны городысь пиналъёсын. Озьыен, та ужпумъёслы саклык висъяны кулэ Дышетонъя но наукая министерство но, Егитъёсын ужанъя кун комитет но.
Денис Сахарных киоссэ вќлъяса ик вера:
- Удмурт кылэз улњытонын но вќлмытонын интернетлэн кужымез туж бадњым. Интернет - со туж паськыт дунне, отчы котьма тэроз, со - эрико, со кылдытэ выль луонлыкъёс, - пальыша егит тодосчи.
Иське, марлэсь кышкаськом? «Виртуальной» шуиськись дуннее пыром, нош отын милемлы зуч-зуч чебер удмурт кылын «Њечбур, эше!» шуозы. Солэсь-а?
Елена Миннигараева
Потэмын ? № 090-091 (24038-24039) от 22.06.07.
Просмотров статьи: 1447
Оставьте свой отзыв:
.gif)
