Трос быгатэм уз люкеты

Удмурт Дунне
By Удмурт Дунне Август 10, 2018 15:30

1-тӥ августысен шаерамы усьтӥськиз нылпиосты дышетыны сертификат басьтонъя 489 центр. Та сертификатэн 5-сен 18 аресозь пиналэз гожтыны луэ пӧртэм кружокъёсы но секциосы.

Сертификатъёс люкылон

Фортепианоен шудыны — 35 иськеме

Гуртын будыса, вожъяськоно вал городысь яке райцентрысь пиналъёслы. Эктэм потэ — кружок ӧвӧл, гитараен шудысал — дышетӥсь ӧвӧл. Анай-атайёс но соку бадӟым саклык ӧз кадь висъяллялэ.

Али югдур воштӥське, мумы-бубыос нылпиоссылэсь быгатонлыкъёссэс азинтон понна золгес сюлмасько ни. Тани Пичи Пурга ёросысь Улын Юри гуртысь Елена Кукаркина райцентрлэсь 35 иськемын улэ. Озьы ке но сюлмаське нылъёсызлэсь быгатонлыкъёссэс азинтон понна. Елена эшъёссэ ӝутказ: ойдолэ, пе, пиналъёсмес Пургалась искусствоосъя школае нуллом. 3 семья люкаськизы. Озьы кылем дышетскон аре черодэн котькуд субботае нылпиоссэс райцентре машинаен нуллӥзы.

— 6 аресъем Софиямы крезьгурлы но гимнастикалы дышетске. Нылпилэсь быгатонлыкъёссэ адӟиськод ке, уката шумпотоно. Нокыӵе иськемъёсты лыдъяно ӧвӧл ни, — шуэ Елена.

Нош бадӟымзэ — Ульяназэ — нылкышно райцентре нуллыны ӧз ни быгаты. Но кылем дышетскон арын Юриысь нылпиослэн асьсэлэн шумпотонзы вал — гуртысьтызы школае ветлӥз Ижысь хореограф. Эктыны дышетӥсь арнялы 2 пол вуылӥз. Зэм, Дмитрий Сергеевич сюрес вылын жадиз — туэ эктыны уз ни дышеты.

Озьы ке но Елена Кукаркина таяз арняе ик басьтӥз ни нылъёсызлы сертификатъёс. Со понна гуртысьтызы школае ӧтчазы — Пичи Пурга ёросын 25 интыын таӵе документ сёто.

Пичи Пурга ёросысь анай-атайёс сертификатлы уг дырто, куд-огез уг но валало солэсь кулэлыксэ. Кылсярысь, районын 5-18 аресъем пиналъёс 6 сюрс пала. Сертификат сётэмын 329 муртлы гинэ, шуэ ёрос администрациысь дышетонъя управлениысь специалист Галина Кириллова.

Сертификатэз вузаны уз луы

Ижын 1-тӥ августэ сертификат басьтыны мылкыд карисьёс тачак люкаськизы. Куд-ог центръёсын черодъёс но кылдӥзы. Сертификатлы вазиськыны быгатӥзы субботае но. Зэм, городын портал пыр гожтӥськонэн шугъяськонъёс кылдӥзы — сайтэ пырисьёс трос луэмен, со «ошиськиз». Соин мон сертификатлы пыдын вамыштӥ. Городын 40 интыын центръёс усьтэмын — вазиськыны луэ котькудаз. Соос ужало 9-сен 19 часозь, субботае — 9-сен 12 часозь. 69 номеро школаын 2 специалист сертификат сётъя. Ужысь бертыкум, малпай: калыкез татын лачак луоз. Янгышаськем, нокин ӧвӧл. Ог 5 минут куспын мыным заявление печатлазы, сертификат поттӥзы, тыро-пыдо валэктон сётӥзы.

Нимысьтыз вераны кулэ созэ но. Шуом, нылпилэн пропискаез Дэри ёросын, нош улэ со Ижын. Озьы ке но документ понна мыноно Дэри ёросысь сертификат сётъянъя кудаз ке центре, угось шоркарлэн базаяз та пинал ӧвӧл.

Удмуртиысь нылпиослы ватсаса тодон-валан сётонъя модельной центрен кивалтӥсь Римма Бякова верамъя, пиналъёс 7 сюрс 500 программая визьмаськыны быгатозы. Татчы пыризы школаос бордын ужась кружокъёс, искусствоосъя но спортъя школаос но.

Котькуд сертификатлэн дуныз вань. Удмуртиын солэн быдӟалаез котькуд ёросын пӧртэм чакламын. Сое тупатэ ачиз муниципал кылдытэт. Тужгес пичиез дун пуктэмын 7 сюрс манет, тужгес бадӟымез — 12 сюрс манет. Кылсярысь, Пичи Пургалан сертификатлэн дуныз 11 сюрс манет мында. Но та уксё «улэп» ӧвӧл, сое басьтыны, сертификатэз вузаны уз луы. Кыӵе ке кружоке гожтӥськыку, тодон-валан басьтэм понна коньдон тыроно уз луы, возьматоно луоз сертификатэз гинэ.

Озьы ке но сертификат но котькудаз учырын уз юртты. Кылсярысь, мон вордскымтэ чуньы вылын ворттылыса вуи. Малпай, пиелэсь дзюдоя секцизэ сертификатэн ворсало, толэзьлы быдэ 700 манет тыроно уз луы. Но тренермы ӧз шумпотты: милям секцимы кружокъёсын огъя навигаторе ӧз пыры, пе. Малы? Секцимы ватсаса тодон-валан сётонэ уг пыры, пе, спортъя подготовка лыдъяське.

Удмуртиын арня ӵоже 23 сюрс сертификат сётэмын. Азьпалтэ ваньзэсты Ижкар — татын 15 сюрс 200 муртлы тодон-валан дунне ӧс усьтӥськиз ни.

Елена СКВОРЦОВА

Фото басьтэмын допобразование.рф сайтысь

Удмурт Дунне
By Удмурт Дунне Август 10, 2018 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*