Шӧкыч «лекаське»… Юртъерзэс утялто, инкуазез саптало

Удмурт Дунне
By Удмурт Дунне Август 3, 2018 16:43

НЬӦРАН

Паймод, отэ, та Шаркан палъёслы. Дасяськи вал татысь чылкыт омырен шоканы, гурезьёстӥ ортчыны. Нош со интые вуи Таклёысь жаг куянтӥе.

Гуртоос таӵе югдурлы асьсэос но паймемын. Уго кык толэзьлы огпол жуг-жаг нуыны нимысьтыз машина ӧтё.

— Пичи мешокен жаглы 60 манет тыроно, бадӟым пуйылы — 120 манет. Котькуд ар та пумысен гурт кенешын вераськиськом. Кылсярысь, пиялаез сётыны луэ Шарканэ — татын нимысьтыз заготовительной контора ужа. Адямиос, валче кариськыса, отчы нуыны быгатысалзы, — шуэ Кыква муниципал кылдытэтлэн йырыз Яков Батаногов.

Иське, кин жаг нуллыны ӧдъям луо поттон карьере? Кык машиналэсь ветлэмзэ синйылтӥз гуртын улӥсь Татьяна Иванова.

— Нылъёсыным татчы лыктӥм изъёс вайыны, сяськаосын убоосмес котыртыны малпамы вал, — шуэ нылкышно. — Ӵапак соку вуиз горд «Калина». Сылэ но сылэ, нокытчы уг дырты, лэся, машинаысь но нокин уг поты. Ми карьерысь тубим гинэ, мышмы но ӧз на ышы — машина гурезь уллань васькиз. Юромо берытским чакланы. Егит воргорон багажникысьтыз жагзэ кисьтаз но дыртыса пегӟиз.

Татьяна верамъя, артэ Куреггуртысь машина вал, пе. Жаль, «Калиналэсь» номерзэ туспуктыны тодаз лыктымтэ. Нош пичи машина бере та карьере «Газель» но кожам ини.

Табере нюк пыдэсын сомында узырлыкез. Вуж матрасэз мунчоын ик сутыны луысал. Вашкала диванэз но кораса, гур эстыны ярасал. Егит воргоронлэн «кузьымъёсыз» — нылпи памперсъёс. Таосты но сутыны секыт ӧвӧл, дыр. Нош кӧня эмъюм посудаос — кызонлэсь, мугор ӟырдамлэсь… Таиз но егит семьялэн «узырлыкез» шуыса, валаны луэ. Уката трос — пияла. Кин ке сюан карем но вань ӟенеликъёссэ татчы вайыны сюлмаськем.

Гурт поселенилэн йырыз Яков Батаногов шуэ, та луо поттон карьер «Труженик» предприятилэн, пе. Со гыре Таклё котырысь бусыосты. Но «Труженик» «кулыны» дасяське. Озьыен, кӧня машина татчы жаген вуоз на — гурт хозяйстволы дунне.

ШӦКЫЧ УРОМ

Удмурт Дунне
By Удмурт Дунне Август 3, 2018 16:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*