Одӥгзэ улляло, мукетыз пегӟыны выре…

Удмурт Дунне
By Удмурт Дунне Август 6, 2018 17:35

Удмуртилэн Прокурорез А. Николаев

Элькунысь Прокуратуралы кивалтӥсе алигес гинэ юнматэмын Артём Николаев. Удмуртилэн Прокурорез журналистъёсын нырысьсэ пумиськиз.

Ваньзэ синйылтозы

Нырысь-валысь чакласа, прокуратуралэн ужез туж ик уг адскы. Но ӧвӧл сыӵе удыс, кудзэ уг эскеро прокуроръёс. Соос бадӟым уж нуо калыклэсь правооссэ утёнъя. Чаклало уждун тыронэз, льготной эмъюмъёс висъянэз, жилищно-коммунальной услугаослы дунъёсты но трос мукетсэ.

Кыӵе ке нимаз удысъёслы гинэ бадӟымгес саклык уз висъяськы. Элькунысь Прокуратура вань законъёслэсь быдэсъяськемзэс сак эскероз, шуиз Артём Николаев.

Ортчем палар ӵоже гинэ прокуроръёс законэз тӥян 20 сюрс учыръёсты дугдытӥзы, 4,8 сюрс кивалтӥсьёс кыл кутытэмын, 127 уголовной ужъёс ӝутэмын.

Уждун дыраз тыроно

Прокуратура индылэм бӧрсьы ӝыны ар куспын 62 миллион манет тыр ӝегатэм уждунъёс тыремын. Та югдурез прокуроръёс ялан сак чакласа уло. Кивалтӥсьты яке уж сётӥсьты коньдон уг тыры ке, соку ик ёрос прокуратурае яке ужъя инспекцие ӝожтӥськыны быгатӥськоды, вазиськиз калыклы Артём Николаев. Ӵапак сыӵе ӝожтӥськонъёс бӧрсьы 14 уголовной ужъёс ӝутэмын. 400 кивалтӥсьёс административной кыл кутон улэ кыскемын, 1-ез дисквалификация улэ сюриз.

Секыт югдуре шедё банкрот калэ вуэм предприятиосын ужасьёс. Татын прокуроръёс чаклало, банкрот луэм фирмалэсь ваньбурзэ вузам уксё нырысь социальной тыриськонъёслы но уждунлы мед мыноз шуыса. Та фирмалэсь прибыльзэ яке ваньбурзэ пунэмен сётъямъёс кысканы кутско ке, арбитражной управляющиез прокурор судэ вазиськыны косэ.

Уго нырысетӥ интыын уждун тырон сылэ. Ӵапак сыӵе амал кутэмын вал Глазовысь «Лэсьтӥськонъя Чепецкой управление» огазеяськонын. Та предприятиын югдур 2010-тӥ аръёсы уродмиз ни, банкрот луэм огазеяськон киысь кие выжылӥз, отын тыршисьёслы 10 миллионъёсын уждун тырымтэ вал.

Асьсэды секыт югдуре вутто лушкем уждун басьтыны соглаш луисьёс. Сыӵеос нокыӵе вытъёс но уг тыро, озьы ик уж сётӥсьсы котькызьы пӧяны быгатэ. Прокуратураын тодо: законэз чакласа кутэмъёсын ӵошатыса, лушкем уксё басьтӥсьёслы пунэмъёс данаклы бадӟымгес. Рос-прос лыдъяны уг луы, но вераськон мынэ миллионъёс сярысь, шуиз элькун Прокурор. Но югдур быдэсак воштӥськоз соку гинэ, куке калык ачиз визьмаськоз.

Коррупцилы пумит

Коррупциен нюръяськон улсын 1 сюрслэсь трос закон тӥян учыръёс шараямын. 358 кивалтӥсьёсты кыл кутытӥзы, 6-сэ уллязы. 25 уголовной ужъёс ӝутэмын. Кинлы ке суд приговорзэ ялӥз ни, кудӥз ке ужъёс али сэрттӥсько.

4 арлы пытсэт сьӧры келямын Дэбес ёросысь азьвыл депутат Михаил Чунарев 1,25 миллион манет взятка куремез понна. Ёросысь депутатъёслэн кенешсылэн президиумезлэн ёзчиез коньдон кыске вылэм предприятилы, законэз тӥяса, юрттэмез понна. Пытсэт сьӧрын пукем сяна, ёросысь депутат эшшо взяткаез быдӟа ик штраф тыроз на. Нюлэс хозяйствоя азьвыл министрлы Рафис Касимовлы суд 2 ар условно сётӥз 7 заказникъёсысь тэлез кораны лэземез понна.

Вань депутатъёс, интыысь аскивалтон ёзъёсын ужасьёс но кун служащийёс котькуд ар миым поттэм табышсы пумысен декларация сётыны кулэ. Кин тае ӧз быдэсты, озьы ик коррупционеръёс пӧлы шедёз. Антикоррупционной законъёслэсь кужымзэс ас вылазы шӧдӥзы ни Иж город Думаысь 7 депутатъёс. Соос законэз тодыса но декларация сётӥллямтэ. Прокуратура доходъёссэс ватӥзы шуыса лыдъяз но мандатсэс таланы ӵектӥз. Кудзы ке асьсэос кошкыса вуттӥзы, мукетъёсызлэсь мандатсэс суд талаз.

Али эскериське Ижысь администрациен герӟаськем югдур. Кемалась ӧвӧл городысь администрация ужысьтыз мозмытӥз благоустройствоя но транспортъя управленилэсь кивалтӥсьсэ Артём Богдановез. Социальной сетьёсы со гожъяз, ас мылкыд каремезъя кошке шуыса. Но со малы ке кошкиз ӵапак соку, куке ужамзэ прокуратура эскерыны кутскиз. Управленилэн кивалтӥсез коррупциен герӟаськем учыръёсы пыриськиз шуыса шараяськиз. Кылсярысь, Артём Богданов конкурсъя комиссилэн ёзчиез вылэм, кудаз вормон понна нюръяськем соин герӟаськем фирма. Чиновник решение кутэм предприятилы муниципальной контрактъёсъя пунэмъёсты тырон пумысен. Нош со дыре ик мукет предприятиослы сыӵе ик пунэмъёс тырытэк кылемын вылэм ай.

Инкуазез утёнын янгышъёс но шекъёс пумтэм трос. Сюлмаськыто свалкаос. Туннэ соос элькунамы 300 пала пусъемын. Тросэз законэз чаклатэк кылдытэмын. Кема аръёс ӵоже та удысын ужан радлык рос-прос ӧй вал. Кайтаысен ваньмыз выль сямен луоз.

Жуг-жаг бичан понна кыл кутӥсь огъя улосвыл оператор быръемын. Жуг-жаг бичан интыосъя выль куронъёс ужало ни. Зэм, соосты ваньзэ али ик быдэсъяны кутсконо ке, элькунын экологияя шукрес югдур кылдоз. Уго троссэ свалкаосты пытсано луоз.

Ӵапак сыӵе учыре шеде вал ни Глазов. Отысь полигон куронъёслы уг тупа, кулэ документъёсыз ӧвӧл. Сое огвакытлы пытсазы вал. Но прокуратура выльысь усьтыны лэзиз. Уго городлэн чылкытлыкезлы но калыклы уродэн берытскыны быгатэ вал. Прокуроръёс та удыс понна кыл кутӥсьёслы шекъёссэс тупатыны дыр сётӥзы. Вуоно арлы ваньмыз дась луыны кулэ.

Лагерьёслы — нимысьтыз куронъёс

Пиналъёсын ужась организациос азе но чурытэсь куронъёс пуктӥсько. Трос полэс эскеронъёс ортчытъясько. Кылсярысь, вань нылпи лагерьёсты гужем азьын чаклазы, тырмымтэоссэс палэнтыны косӥзы. Ваньмыз сямен индылонъёсты быдэстӥзы. Нош Ижысь «Волна» шутэтскон база кылэм карымтэ. Отын шутэтскись пиналъёс висьыны усем бере лагерез пытсазы. Тодмо луиз, отын куронъёс тӥямын вал. Сиён пӧрасьёссылэн санитарной книжкаоссы вылымтэ. Соос ик кӧт висёнзэс пиналъёслы палатӥллям.

Озьы ик тӥямын уж сярысь законъёс. Лагере пиналъёсын ужасьёсты огкылъя кутыны кулэ, эскероно, ӧвӧл-а соос кыскамын суд улэ. Та куронъёс отын быдэстымтэ. Али эскерон уж азьланьтӥське.

Эдуард Степанов

Туспуктэм: Эдуард Степанов

Удмурт Дунне
By Удмурт Дунне Август 6, 2018 17:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*