Калыкын — шулдыр, Выльын — кӧттыр

Удмурт Дунне
By Удмурт Дунне Август 10, 2018 15:12

Калыкын — шулдыр, Выльын — кӧттыр

Зарниез музъемысь шедьтод ай, нош ю тысез кизьытэк-утялтытэк, нянь уд сиы, шуо калыкын. Соин но выль емышъёслы сӥзем Выль праздникез пусйыны, зоро куазь шоры учкытэк, Можгае быдэс элькунысь удмуртъёс вуизы.

Кватчиос табанен куноято

Можгалан Выль праздник 2004-тӥ арысен ортче. Ужрад котыраз трос калыкез люкаменыз, фермеръёсты огазеяменыз 2-тӥ арзэ ни элькун праздниклы пӧрмиз.

— Выле лыктэм куноосты 15 арзэ ни ческыт ӝукен утялтӥсько, — вера валтӥсь пӧраськись Надежда Коротаева. — Нырысь-валысь городысь паркын гинэ ужрад ортчылӥз. Калык отчы сокем трос ӧз кыстӥськы. Ог 5 ар талэсь азьло ужрадэз Сюга шур дурысь возь вылэ выжтӥзы, адямиослы возь выл кельшиз. Озьы арысь аре уногес но уногес адямиос люкасько. Тани туэ но 3 сюрс адямилы выль изэм чабей кеньырен, выль бичам сугонэн но выль вандэм пудоен ӝук пӧзьтӥськомы. Пӧраммес котьку туж мактало (ушъяло). Кырӟаса пӧзьтэмысьтымы но сокем ческыт луэ, вылды.

Тыл вылын пӧзись ӝуклэн зыныз возь выл тыр вӧлске, калыкез гочатэ. Но татын мукет но трос веръяны, басьтыны, адӟытыны луоноез поттэмын. Кылсярысь, усьтӥськемын Йӧл, Нянь, Чечы, Емышо, Сӥль урамъёс. Котькуд ульчае нимызлы тупась вузъёсынызы интыяськизы фермеръёс, ужбергатӥсьёс, хозяйствоос, асьсэ киынызы поттэм, будэтэм вуззэс калыклы вуттӥзы. Кылсярысь, Можга ёросысь «Заря» эштосын туэ нырысьсэ будэтӥзы помидор — удалтӥз. Сыӵе быгатонлыкъёсынызы калыкез но тодматоно кариськизы. Нош Нянь ураме интыяськиз та хозяйствоысь ик клубен кивалтӥсь Тамара Александрова. Но та рад со уг кырӟа — ӝуась гур азьын пыжиське. Табань пыжыны тросгес луонлык мед кылдоз шуыса, юромо бадӟым машина басьтэм.

— Табере машинаям 40 литр ыльнянь тэре, — шуэ нылкышно. — Нылъёс но вӧзам юрттӥсько. Мон ачим ик мужик но, ачим ик нылкышно но — ваньмыз ас вылам. Табанен калыкез куноятыны туж яратӥсько. Та сямме тодыса, клубмы доры гур пуктыны колхоз, быдэс гурт калык юрттӥськиз. Табере вань ужрадъёсты гур азьын дэмен ортчытъяськомы. 1-тӥ сентябрьысен удмурт дэремъёслы сӥзем тур-маршрут но гуртамы усьтомы, гур туж умой луоз ай.

Чечы шоры учкылӥсьёсыз но лачак люкаськизы. Дэри ёросысь мушкась Олег Чураков пусъемъя, таӵе ярмаркаостэк чечы вузаны шуг луоз, угось магазинын олокыӵе но ческыт сиён вузало. Но амалоосыз муш вордонын но выль амалъёс утчало. Кылсярысь, Пичи Пурга ёросысь Любовь но Леонид Герасимов кузпалъёс чечыен, прополисэн, пергалэсь, пыльцалэсь лэсьтэм продукциен вуз каро. Мазь но асьсэос ик лэсьто, таиз ёзвиосты, пӧськыосты, кынмам бервылъёсты бурмытыны юрттэ, пе. Кузпалъёсты огез шугъяськытэ: берло дыре колхозъёс туж трос ядохимикатъёсын выро, мушъёс таин сэрен быро. Со сяна, люцерна, клевер сяськаяку, пудо сиён дасяло, комбайнлэн жатка улаз озьы Герасимовъёслэн туэ уно мушъёссы быризы. Азьланяз но тазьы ик луиз ке, Китайын музэн, сяськаосты, писпуосты киын опылять кароно луоз — отын мушъёссы быризы, шуо кузпалъёс.

— Асьме гуртоос быдэс элькунмес сюдо, — котькуд ульчаетӥ котырскыса, шуиз Кун Кенешысь ялан ужась комиссиен кивалтӥсь, «Удмурт Кенеш» огазеяськонлэн Тӧроез Татьяна Ишматова. — Шумпотымон: пиналъёс но та праздник сярысь тодо. Мынам нылы но котьку Вылез возьма, бакчаысь выль емыш бичаса пыртэ, кудзэ тылобурдоез вандомы шуыса юа.

Выль праздник сяме арысь аре пыре ни. Зэмен ик, бакча сульдэръёсын, выль аспӧртэм емышъёсын, вашкала удмурт дэремъёсын адӟытон сяна, вал маизлы абдраны но кытчы кыстӥськыны. Нимысьтыз площадкаос усьтэмын вал покчиослы. Татын соос кырӟаны-вераны, эктыны быгатэменызы паймытъязы. Егитъёс куспазы вожвылъяськизы визьмо, шаплы луэменызы. Нош тужгес синмаськымон удмурт семьяос куспазы ӵошатскизы юн луэменызы: веник керттӥзы, мунчо ӵыпизы, шурысь карнанэн ведраен ву нуллӥзы. Таос котырысь калык но ӧз быры — сокем тунсыко вал. Озьы бӧлякъёсын-бӧлякъёсын Вылез пусйизы. Вань вормисьёс кузьымъёсын пусъемын. Учкисьёс понна визь сынан радъязы. Шонер валэктон сётӥсьёс но кузьымъёстэк ӧз кыле. Озьы зор бере котмем дӥсьсылэсь кӧсамзэ но адямиос валатэк ик кылизы — ваньзы задор мылкыдын, но кӧттыро бертӥзы.

— Та аръёс ӵоже возь вылын олокыӵе но ужрадъёс ортчытъямы, оломалы но дышимы ни. Куазез гинэ воштыны ум быгатӥське на. Малпанъёсмы эшшо трос на. Вуоно арын возь вылэ поттыны чакласькомы гуртысь техникаез, бакчаосын кутӥськись тӥрлыкез. Адӟытон сяна, кулэ арбериосты, палэнэ ветлытэк, адӟыны, басьтыны мед быгатозы. Инты ваньзылы тырмоз, — шуэ ужрадэз радъясь, «Удмурт Кенеш» огазеяськонлэн Можга ёросысь ёзэныз кивалтӥсь Эдуард Петров.

Ёросъёсысь фермеръёс, кивалтӥсьёс но Выль элькун праздник Можгаын ортчемлы дышизы ни — татчы котырысь районъёслы но сюрыны капчигес угось. Табере вуоно Вылез возьмало ни.

Елена Сараматова

Туспуктӥзы Елена Сараматова но Андрей Поздеев

Удмурт Дунне
By Удмурт Дунне Август 10, 2018 15:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*