Парадельфийской шудонъёслы дасяськыса лэсьтэм ужлэн пайдаез шӧдӥськоз ялан

Удмурт Дунне
By Удмурт Дунне Июль 9, 2018 09:56

Шуркынмонэ Удмуртиын ортчозы 2-тӥ калыккуспо Парадельфийской шудонъёс. Ужрадлы дасяськонлэсь мынэмзэ эскерон вылысь элькунамы толэзьлы быдэ вуыло Россиысь Парадельфийской комитетлэн ёзчиосыз.

Инвалидъёс понна ужась огазеяськонысь делегация 3 нунал ӵоже эскериз, кызьы элькунмы Парадельфийской шудонъёслы дасяське. Эскеронъёс бере Парадельфийской комитетлэн кивалтӥсез Наталья Крель Удмуртиысь Правительстволэн Тӧроеныз Ярослав Семёновен но мукет кивалтӥсьёсын пумиськылӥз.

1-тӥосыз Парадельфийской шудонъёс ортчизы Санкт-Петербургын. Россилэн уйпал шоркарез соосты котыр ласянь усто радъям. Табере Удмуртилы но солэсь лябгес луыны уг яра. Макем тросгес лэсьтӥське шудонъёслы дасяськон улсын инвалидъёс понна, сокем уногес шараясько быдэстоно ужпумъёс, шуэ Правительстволэн Тӧроезлэн воштӥсез Анастасия Муталенко. Туннэ кыре пото азьвыл адскисьтэм чыры-пыры шуг-секытъёс но. Соосты но ваньзэ палэнтыны тыршоно.

Кылсярысь, шудонъёсы лыктэм тросэз инвалидъёс интыяськозы кунокуаосы. Нош туж ӧжытаз гостиницаосын коляскаен ветлӥсь инвалидъёслы пыран интыос но ӧсъёс тупатъямын. Шудонъёслы дасяськон улсын пумиськонъёс ортчыло ужбергатӥсьёсын. Кенешонъёс мыно транспортъя компаниослэн кивалтӥсьёсынызы.

udmurt.ru

Удмуртиысь Правительствоын кенешизы Парадельфийской шудонъёсты ортчытон сярысь.

Валтӥсь ужрадъёс ортчозы Ижысь театръёсын но циркын. Котькудаз площадкаын радъялозы пӧртэм удысъёсъя конкурсъёс. Озьы ик луозы инвалидъёс понна мастер-классъёс, тунсыко пумиськонъёс, инвалидъёслэсь ужпумъёссэс сэрттон-пертчонлы сӥзем конференциос. Туннэ ик чакламын ни ортчытыны 78 экскурсиос.

Наталья Крель верамъя, лыктыны мылкыд карисьёс туж трос, ваньмыз 2 сюрс пала ӵошатскисьёс луозы.

Парадельфийской комитетлэн кивалтӥсез Удмуртилэн шудонъёслы дасяськемезлы вылӥ дунъет сётӥз. Татысь кивалтӥсьёслэн ужрадэз рос-прос ортчытон пумысен сюлмаськемзы ӟеч шӧдӥське, вераз Наталья Крель.

Парадельфийской шудонъёслэн трос полэс пайдазы азьланяз но шӧдӥськоз. Уго со ӵошатскон гинэ ӧвӧл. Шудонъёс быгатӥсь муртъёсты шараяны юртто.

Эдуард Степанов

Туспуктэм: udmurt.ru

Удмурт Дунне
By Удмурт Дунне Июль 9, 2018 09:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*