Паймымон интыос…Пичи Пурга ёросысь Норья черкогуртысь Мало-Дивеевской Серафимовской нылкышно монастырь

Удмурт Дунне
By Удмурт Дунне Июль 20, 2018 15:45

Асэныд ваче син

Пичи Пурга ёросысь Норья черкогуртын интыяськемын Мало-Дивеевской Серафимовской нылкышно монастырь. Быдэс Россиысь паломникъёслэн со яратоно интызы луэ. Вуыло кунгож сьӧрысь но оскисьёс.

Элькунысьтымы черкъёс, монастырьёс пӧлысь таиз тужгес егитэз. Нырысь ик, 1996-тӥ арын, монастырь усьтэмын вал Можга ёросысь Ӟуч Пычас черкогуртысь дун-чылкыт Александр Невскийлы сӥзем черк бордын. Но 2003-тӥ арын, инты тырмымтэен, сое выжтӥзы Норьяла.

Монастырьысь игумения Зоя (Абдрахманова) верамъя, туннэ нуналлы отын 15 пала монахиняос но послушницаос. Ваньзы туж зӥбытэсь, Инмарен валче уло.

Монастырьлэн ӧсъёсыз котьку усьтэмын. Но лыктӥсьёс уката трос луо кӧсутён вакытъёсы — куд-огъёсыз кӧня ке нуналлы но кылё. Исповеде ветло, причастие басьто, батюшкаен сюлмысь верасько.

— Монастырямы вань кунокуа, вуэз вӧсянлы иордань, — шуиз игумения Зоя. — Ӵукналы быдэ вӧсяськиськом Серафим Саровскийлы, котькуд ӝыт — киросэн ветлон. Службаос нуналлы быдэ луо.

Монастырь бордын интыяськемын Пётр но Павел апостолъёслы сӥзем черк. Тросэз христианъёс малпамъя, татын утиське Иисус Христосэз кортӵогам кирослэн оглюкетэз. Татысь ик адӟыны луэ дун-чылкыт Максим Сербскийлэн, Григорий Богословлэн лысьӧмъёссылэсь оглюкетсэс, Спиридон Тримифунтскийлэн мантиезлэсь, Афанасий Афонскийлэн дӥсезлэсь кесэгъёссэс, Тихон Задонскийлэн, Гермоген Московскийлэн коросъёссылэсь оглюкетсэс.

Но монастырь, паломникъёслы сяна, тунсыко луэ туристъёслы но. Татын соос адӟыны быгато, кызьы уло но ужало черкын служба нуисьёс, монашкаос, послушницаос. Нош макем чебер отын — чылкак мукет дуннее вуиськод кадь: ӵышкем газонъёс, пур-пур пурӟись сяськаос, фонтан… Ӧсъёстӥ пырем бере ик малы ке гань-гань луиськод, асэныд ваче кылиськод кадь. Монастырь пуксемын тымет доры ик. Отысь вуын со куд-ог дыръя пыласькылэ, кожалод.

Элина Кумачёва

Туспуктэм: Элина Кумачёва

Удмурт Дунне
By Удмурт Дунне Июль 20, 2018 15:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*