Огъя кун экзамен ортчытӥсьёс дунтэк уз ужалэ ни

Удмурт Дунне
By Удмурт Дунне Июль 20, 2018 14:59

Вуоно арысен огъя кун экзаменъёсты ортчытъясь дышетӥсьёсты уксётэк уз кельтэ ни. Россилэн Президентэз Владимир Путин дышетон сярысь федерал законэ воштонъёс пыртон пумысен ӵектонэз умоен лыдъяз.

Туэ Россиысь 600 сюрс егитъёс, 11-тӥ классэз йылпумъяса, экзамен сётӥзы, 9-тӥ классэз быдтэмъёс 1,2 миллион вал. Сомында адямиос понна радъям эскеронъёсты ортчытон ваньмыз усе дышетӥсьёс вылэ. Нош ватсаса кылдэм ужзы понна коньдон тырон радлык тупатэмын ӧй вал. Дышетӥсьёслэсь трос ӝожтӥськонъёс вуэм бере югдурез эскеризы «Огъя Россия» партилэн «Новая школа» проектэз понна кыл кутӥсьёс но. Солэн координаторез, Кун Думаысь депутат Алёна Аршинова верамъя, югдур зэмзэ но умойтэм.

Ужпум дышетонъя законлэн тырмымтэосыз бордын. Отын укыр огъя валэктон сётӥське ЕГЭ-ез радъясь педагогъёслэсь ужзэс дунъян ласянь. Законын гожтымтэ, талы уксё бюджетысь вуоз шуыса. Ваньмыз дэмланъёс но ӵектонъёс выллем гинэ вал. Соин куд-ог улосвылъёсын экзамен радъям понна коньдон тыриськиз. Мукетъёсаз уксё ӧз шедьтэ. Тросаз, соос пӧлын Удмуртия но, ёрос администрациос но школа кивалтӥсьёс дышетӥсьёслэсь ужамзэс дунъян понна амалъёс утчаллязы.

Тани али но Дэри ёросысь огъя кун экзамен ортчытъям школаосы дышетонъя управлениысь ӵектон вуиз дышетӥсьёслы ватсаса шутэтскон нуналъёс сётыны. Собере директоръёс экзаменын ужамъёсты мед пусъёзы шуыса ивортон келяллям на. Нош кызьы пусйыны, коньдонэн яке тау каронэн гинэ-а, номыр верамтэ. Ёрос бюджетын талы уксё ӧвӧл бере, кытысь коньдон шедьтыны кулэ директор?

Коньдон тырись улосвылъёсын но югдур пӧртэм. Одӥг кадь ужаса, Россиын дышетӥсьёс чылкак пӧртэм уксё басьто. Москваын экзаменын пукись педагоглы 1 час понна ог 300 манет тыро, Новосибирскын — 183 манет, Якутиын 345 манетозь вуэ, Белгород улосвылын 40 манет сяна уг луы.

Та югдурез лыдэ басьтыса, «Огъя Россия» партия дышетон сярысь федерал законэ воштонъёс дасяз. Отын пусъемын, огъя кун экзамен радъянэ вань пыриськисьёслы одно но котьку коньдон тыриськыны кулэ шуыса. Уз учке ни, ужан нуналаз-а яке шутэтскон вакытаз-а адями экзамен кутонэ пыриськиз. Закон улонэ пыӵаны кутскоз 2019-тӥ арын 1-тӥ толшорысен.

Кызьы пусйиз Алёна Аршинова, улосвылъёслы дыр сётэмын ужрадъёс кутыны но вуоно арлы бюджетъёсазы та удыслы уксё учкыны. Озьы ик Алёна Аршинова вазиськон келяз Россиысь просвещениея министрлы Ольга Васильевалы. Отын со куриз экзамен ортчытон ужез дунъян понна огъя радлык тупатыны. Али кадь пӧртэм улосвылъёсын, чылкак пӧртэм лыдпусъёс, пе, медаз луэ.

Эдуард Степанов

Удмурт Дунне
By Удмурт Дунне Июль 20, 2018 14:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*