Киясаын 4-тӥ пӧсьтолэзе 27-тӥ гужем Гурт шудонъёс кутскизы

Удмурт Дунне
By Удмурт Дунне Июль 5, 2018 13:52

 

udmurt.ru

Киясаын ортчись шудонъёслэн утисьсы — Шеп

4-тӥ июле гуртъёсысь вань спортсменъёс люкаськизы Кияса черкогуртэ. 7-тӥ июлёзь отын мынозы 27-тӥ Гурт шудонъёс. Ужрадэ вань ёросъёсысь 1 сюрс 500 пала спортсменъёс пырисько.

Бадӟым ужрадлы шуыса, Кияса черкогуртэ ӵыжак-выль стадион пуктӥзы. Чебер стадионын нуназе шорын ӵошатсконъёс кутскизы. 27-тӥ гужем шудонъёсын спортысь 19 амалъя медальёс шудытӥсько: волейбол, мини-лапта, капчи атлетика, мини-футбол, дартс, шашки, дзюдо, гира ӝуткан. 16 ар ортчыса, Гурт шудонъёсы выльысь пыртэмын триатлон. 16 ёросысь 38 спортсменъёс огкутскемен 200 метрез уяса, 6 иськемез великен ортчозы но 1,5 иськем пыдын бызёзы. Пусйыны кулэ, отчы пыриськозы шаерысьтымы нимо-дано спортсменъёс: Шарканысь Максим Вылегжанин, Кезысь Константин Главатских, Можгаысь Сергей Тарасов но мукетъёсыз.

Толон ик нырысетӥ вормисьёслэн нимъёссы тодмо луизы ни. Нырысь ик стартэ потӥзы футболистъёс. Кияса ёросысь спортсменъёс нырысьсэ пырисько командаен шудонъёсы. Футболистъёс ӵошатсконзэс дыго-мого кутскизы вал: Дэриысь командалы 6:0 лыдын келязы, но берло Воткаысь командаез 3:0 лыдын вормизы, угось соос понна быдэс ёроссывисьыны лыктэмын вал кадь. Азьланяз футболистъёсты эшшо 4 ӵошатскон вите на.

udmurt.ru

Капчи атлетъёслэсь ӵошастконъёссэс мытӥзы кузьдалае тэтчасьёс

Капчи атлетъёслэсь ӵошатсконзэс усьтӥзы кузьдалае тэтчась нылъёс. Котькинлэсь кыдёке — 5 метр 34 сантиметре — тэтчиз Можга ёросысь Мария Бердникова. 2-тӥ-3-тӥ интые потӥзы Ярысь Юлия Дюкина но Камбаркаысь Полина Чуяс.

Ӝыт пал Гурт шудонъёсыз сӥё-дано усьтон ужрад вал. Стадион тыр пазьгиськизы 600 пала артистъёс, ёросъёсысь командаос огзылэсь чебер мукетсы пӧрмытскемын. Гуртысь спортсменъёслы капчи мылкыд но выль вормонъёс сӥзизы Удмурт Республикалэн Тӧроез Александр Бречалов, мугор кыдатон культурая, спортъя но егитъёсын ужан политикая министр Наталья Гольцова но мукетъёсыз. Шудонъёс дыръя гурт удысын ужась выль техникаез парадэ поттазы. Удмурт олимпиада йылпумъяськоз 7-тӥ июле эстафетаосын.

Валентина Емельянова

Туспуктэм: udmurt.ru

Удмурт Дунне
By Удмурт Дунне Июль 5, 2018 13:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*