Ижын ортчиз «Улыны вакыт» акция

Удмурт Дунне
By Удмурт Дунне Июль 2, 2018 15:28

Ижын ортчиз «Улыны вакыт» акция

Ижын, наркотикъёсын нюръяськон нуналлы сӥзьыса, ортчиз «Улыны вакыт» акция. Сое радъяз «За здоровое поколение» огазеяськон, Югдурез утёнъя министерство, Ижысь егитъёсын ужанъя управление.

Ижысь Серафим Саровский собор азьын уно калык люкаськиз — тужгес трос егитъёс. Ӵапак соос понна Егитъёслэн нуналзы азьын та акция радъямын вал. Угось быдэ вуымтэ адями котыре урод сямъёс ӝоггес лякисько.

— Акция «Улыны вакыт» шуыса юнме уг нимаськы, та дунне вылэ ваньмыз улыны вордӥськемын, нокыӵе урод сямъёс адямилэсь улонзэ куспетӥ медаз каре. Ужрадэ ӧтимы школа бордысь лагерьёсы ветлӥсь, секыт югдуре сюрем, начар улӥсь семьяосысь 12-14 аресъем пиналъёсты. Та арлыдын нылпиослэн мылкыдзы дурыныз пӧзе, ваньзэ эскеремзы, уката ик лэзьымтэзэ, потэ, — вераз МВД-ысь наркотикъёсын нюръяськонъя ёзэтлэн кивалтӥсезлэн воштӥсез Татьяна Романова.

Егитъёсты уродэзлэсь алӥзы соос кадь ик егит муртъёс. Школаосын, техникумъёсын дышетскисьёс таза улон, алама сямъёслэсь куштӥськон сярысь чуръёс лыдӟизы, кырӟанъёс быдэстӥзы. Гитара но микрофон киязы кутӥзы Удмуртиысь реабилитационной центрын йӧнатӥськись 2 егитъёс. Ульяна ассэ вокалын эскере, нош солэсь азьвыл, 5 толэзь ӵоже, наркотикъёс пӧлы выйыса улэм, али йӧнатӥське. Табере улонысьтым янгышъёссэ адӟисько, выль сямен улэме потэ, вераз нылаш.

Собор вӧзын сюсьтылъёс ӝуатэмын. Борддор вылэ гожтэмын усыкмытӥсь суретъёслэсь бырем егитъёслэн нимъёссы. Ӧжыт ӧвӧл 17-18 аресъем но солэсь но еж нылпиослэн нимъёссы. Удмуртиысь сяна, Екатеринбургысь, Пермьысь, Татарстанысь адямиос гожъямын.

— Та адямиос милям тодмоосмы яке тодмоосмылэн тодмооссы вал. Татчы лыктэмъёс мед адӟозы, кытчы вуттэ наркотик, — вераз «За здоровое поколение» огазеяськонлэн азьветлӥсез Светлана Дерюшева.

Та огазеяськонэ пыриськись нылкышноос ваньзы куке но секыт адӟонэн пумиськизы — кинлэн ке нылпиез наркотикъёсын кушласькиз, кинлэн ке — быриз но. Табере кышномуртъёс сыӵе ик сюлэмшуге вуэм анайёслы, секыт югдуре шедем муртъёслы юрттӥсько.

Кылбуръёсты, кырӟанъ-ёсты кылзэмзы бере егитъёс квест ортчизы, отын чузъяськизы наркотикъёсты алон, тазалыко улон борды кыстӥськон сярысь юанъёс.

Ужрад азинскиз ӝыт-лань но — Киров нимо паркын Ижысь нылпи но мукет коллективъёс концерт возьматӥзы. Татын ик ВИЧ-лы дунтэк эскериськыны луиз. Эскеронэз радъяз СПИД-эз но паласькись висёнъёсты алонъя элькун центр. Озьы ик вань мылкыд карисьёс скандинав амалъя ветлыны дышетскизы.

Ангелина Снигирёва

Удмурт Дунне
By Удмурт Дунне Июль 2, 2018 15:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*