«Иж Юпитер-2» мотоциклэн — Германие

Удмурт Дунне
By Удмурт Дунне Июль 6, 2018 14:48


Ижысь 2 егит байкеръёс, тодмо конструкторлэн, мотоцикл лэсьтӥсьлэн Пётр Можаровлэн 130 ар тырмонэзлы сӥзьыса, «Иж» мотоциклэн Германиозь вуылозы. 3-тӥ июне соос сюрес вылэ потӥзы, берыктӥськыны чаклало сентябре.

Пётр Можаров — «Иж» мотоциклэз кылдытӥсь, Ижкарысь нырысетӥез байкер, шуыны луоз. Со техникаез эскерыны сюрес вылэ ачиз потаз, мотоциклэн Ижысен Москваозь, Псковозь, Харьковозь вуылӥз. К. Герд нимо музейысь ужась, та акциез одӥгез радъясь Анастасия Данилова верамъя, асьме дорын поттэм мотоциклъёсын та дырозь пӧртэм кунъёсысь адямиос ворттыло. Кылсярысь, сокем кемалась ик ӧвӧл Ижкарысь музее вазиськиллям Казахстанысь пыдлось гуртысь, «Ижлы» воштон ёзъёс басьтон сярысь юаськыса.

Асьме дорын но та машинаез гажасьёс ӧжыт ӧвӧл. Кирилл Тапков 1969-тӥ арын поттэм но тӥяськем «Иж Юпитер-2» мотоциклэз басьтэм, тупатъям. Табере 3 ар пала ворттылэ ни. Ӵапак та техникаен кузь сюрес вылэ потыны малпазы Кирилл Тапков но Елена Стариченко. Та 2 егитъёс — Национальной музейлэн эшъёсыз, П. Можаровлы сӥзем уно ужрадъёсты дасянэ пыриськизы.

Ангелина Снигирёва

Ижысь Е. Старченко но К. Ташков Германиозь вуыны малпало

— Дано конструкторен герӟаськем трос фотографиосын тодматским. Германиын дышетскыкуз, трос фотографиос лэсьтылэм, туж потӥз отын туспуктэм интыосты ас синмынымы адӟеммы, — вераз Е. Стариченко.
Елена но Кирилл кузь сюрес вылэ нырысьсэ уг пото ни. Байкеръёс дугдылыны чаклало Подольск, Владимир, Москва, Санкт-Петербург, Калининград, Рига городъёсы, нош сюрессы йылпумъяськоз Германиысь Миттвайда городын. Отын ас вакытаз дышетскиз Пётр Можаров. Озьы одӥг пала гинэ ог 5 сюрс иськем люкаськоз. Байкеръёс Миттвайдаысь П. Можаровен герӟаськем документъёс шедьтыны но Удмуртие вайыны малпало.

— Городъёс юнме шорысь быръемын ӧвӧл, — вераз К. Тапков. — Вуылыны чакласьком мотоцикл поттонэн герӟаськем интыосы. Кылсярысь, Владимир городын мотоциклъёслы спидометръёс лэсьто, Санкт-Петербургысь заводын нырысьсэ Можаровлэсь мотоциклзэ тросэн поттыны кутскизы (серийной производство), Литваысь Шауляй городын мопедъёслы двигательёс бичало но мукет.

Егитъёс сюреслэсь уг кышкало: сьӧразы палатка, мотоцикллы воштон ёзъёс. Азьвыл ик герӟаськизы ини ортчоно городъёсысь адямиосын, Ижысь байкеръёслы огдырлы улон сэрег висъяны мылкыд карисьёс сюризы.

Еленалы но Кириллы ӟеч сюрес сӥзьыны вуизы ӵыжы-выжыоссы, эшъёссы, огшоры калык. Егитъёсты сюрес вылэ удмурт сямья келязы — кырӟанъёсын, перепечъёсын, сьӧразы ӵушкон келяса. Елена но Кирилл Удмуртие берыктӥськыны чаклало сентябрь толэзе, Пётр Можаровлэн вордӥськем нуналэзлы. Кызьы ортче путешествизы, меӵак эфир нуозы асьсэлэн «ВКонтакте» вотэс бамъёсазы.

Та байкеръёслэн кичӧлтонзы борды итӥськыны чаклало Ижысь мукет байкеръёс но. Но таосыз сюрес вылэ потозы 15-тӥ июле. Россиысь трос пӧртэм городъёстӥ ортчыса, вуылыны чаклало Тамбов улосысь Саюкино черкогуртэ. Отын 1888-тӥ арын вордӥськемын дано конструктор. Сюрессы йылпумъяськоз Сочиын, та городын 1934-тӥ арын ватэмын П. Можаров.

Ангелина Снигирёва

Туспуктэм: Ангелина Снигирёва

Удмурт Дунне
By Удмурт Дунне Июль 6, 2018 14:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*