Гуртъёсын пудо сиён дасян мынэ. Кыӵе юрттэт возьмано гуртоослы?

Удмурт Дунне
By Удмурт Дунне Июль 6, 2018 09:47
Максим Егоров

Шаерамы пудо сиён дасян мынэ

Кыӵе мыно бусы ужъёс? Кыӵе юрттэт но кыӵе воштӥськонъёсты возьмано гуртоослы матысь дыре? Та но мукетыз пумысен журналистъёслы ивортӥз гурт удысъя но сиён-юонъя министр Ольга Абрамова.Сиёнэз эскерозы

Кыкетӥ арнязэ ни бусыосын пудо сиён дасяло. Куазь сётыку, гуртоос гуосы тросгес силос, сенаж, лапасъёсы уногес турын дасяны тыршо. Ваньзылы кутскон нырысь ик сётӥзы Дэри, Можга но Алнаш ёросъёс. Зэм, бабеме кылисьёс но вань. Кылсярысь, 4-тӥ июльлы турын, сенаж дасян борды воксё но басьтӥськемын ӧй вал на Камбарка ёросысь хозяйствоос, нош силос но куро борды ӧз кутскылэ на вал каракулиноос. Оглом шаерамы дасямын ни 187 сюрс 891 тонна силос (чакламлэсь со 12 процент), 45 сюрс 16 тонна турын погыртэмын (чакламлэсь со 23 процент) но 217 сюрс 390 тонна сенаж (30 процент). Миым пудо сиён дасян борды вазьгес ке но басьтӥськимы, туэ гуртоос ӝоггес ужало. Зэм, шугъяськонъёстэк уг луы.

— Дизтопливолы дунъёс ӝутӥськемен, гуртоос кызьы ужаны паймо, — шуэ Ольга Викторовна. — 1 литрез шорлыдын 47 манетозь вуэмын ни. Куд-ог ёросъёсын со 52 манетозь ӝутӥськемын. Россиысь Правительство компенсация тырыны оскытэ ик. Югдур угось котькытын секыт. Шаерысьтымы гуртоос туэ, эстӥськонлы дун оглом 34 процентлы будэмен, 200 миллион манет тыр ыштон адӟизы ни. Нош сиён дасянэз йылпумъяны, тол улэ кизьыны но музъемез небӟытыны 15 сюрс тонна дизтопливо но 5 сюрс тонна бензин кулэ на. Уксё котыр ласянь уг тырмы. Но сое республикалэн казнаысьтыз уд потты.

Тазалыкез эмъян, дышетон удысъёсты шымыртод шат? Огъя бюджетэз учконо ке, гурт удыслы висъям 2 миллиард манет ӧжыт адӟиське кадь. Нош артысь Киров улосысь кивалтӥсьёс та лыдпуслы паймо, узыр улӥськоды, шуо. Отын 1 литр йӧллы бюджетысьтызы 70 копейка субсидия висъяло. Ӵошатон вылысь, асьмелэн со 1 манет но 10 копейка. Азинскон вылысь кировъёс пудо сиёнзэс туж чаклало, экономиказэс радъянъя ужрадъёс куто. Нош асьмеос? Пудомес вож турынэн сюдӥськомы, посыпка басьяськомы. Озьы ке но йӧлмы уг буды.

Туэ 5 толэзь ӵоже шаерамы 299 сюрс тонна йӧл люкаськиз. Кылем арен ӵошатыса, со 2,4 процентлы уногес. Вань кыскем йӧл пӧлысь 50 процентсэ сёто 7 ёросъёс: Вавож, Можга, Шаркан, Алнаш, Балезино, Ува но Глазов. Мукет ёросъёс лыдпуссэс уськыто. Уй-нунал куспын али 100-200 граммлы гинэ йӧл йылэ. Котькуд скал шорлыдын 17,7 килограмм йӧл сётэ. Ольга Абрамова тае сиёнлэн уродэныз герӟа.

— Лэсьтыны кулэ пудо сиёнлэн ӟечлыкезъя паспортизация, — шуэ министр. — Зэм, вань хозяйствоосты, тужгес но частникъёсты, та уже кыскыны кужмысь уд быгаты. Но племенной хозяйствоос бордысен басьтӥськыны луэ. Туннэ угось йӧл поттонлэн асдунызлэн (себестоимость) ӝыныез потэ сиён дасян, отчы уксё кисьтон бордысь. Нош асьмеос ум тодӥське, макем трос сиёнын чырсэз, сюез но мукет компонентъёсыз. Оло нош, жмых воксё но кулэ ӧвӧл. Сое котькуд скаллы 2 килограммен сюдоно, нош 1 килограммез 18 манет котыр сылэ. Сое но кыӵезэ хозяйствоосы вутто, ум тодӥське — эскерыны лабораториос ӧвӧл. Соин ик асьме дасям пудо сиёнлэсь ӟечлыксэ эскерыны кутскимы ке, соку, оло, воксё но шараяськоз, комбикормъёс но добавкаос сокем трос кулэ ӧвӧл шуыса. Котькуд килограммысь 1 манетмес ке но шыръяны быгатӥмы ке, кудбыдӟа экономия луоз! Азинскыны малпась хозяйство паспортизация сярысь ачиз сюлмаськыны кулэ.

Номер люкылон

Вуоно арын 1-тӥ январьысен НДС-эз 2 процентлы йылтыны медо. Озьы луиз ке, комбикорм но, топливо но, техника но дуноялозы. Талэсь утиськон вылысь, НДС-эз йылтонлэсь возиськыны курыса, министерство Кун Думае вазиськиз

— Огез шумпоттэ: берло 2 арня ӵоже йӧл дун 1 манетлы йылӥз но 19 манет но 40 копейкаозь вуиз, — шуэ Ольга Викторовна. — Гуртоослы со гань-ганьгес шокчыны юрттэ. Йӧллэсь сиён-юон поттӥсь заводъёслэн угось складъёссы бушаны кутскизы, вӧйёслэн но сыръёслэн срокъёссы быризы, кунгож сьӧрысь вуись йӧл ичияз. Оскон вань, ар пумозь йӧл дун улӥе уз лэзиськы ни шуыса. Озьы ке но туннэ асьмеос йӧл дунъя 2016-тӥ аре кылемын. Мукетызлы дунъёс кемалась ӝутӥськемын ни.

Туэ гуртоос дорозь 1,2 миллиард манет юрттэт вуттэмын ни. Матысь дыре эшшо 700 миллион манет субсидия келяны чакламын. Со гидъёсты тупатыны но, техника басьтыны но иназ луысал. Ольга Абрамова пусъемъя, туннэ шаерысьтымы 60 процентэз техника 10 арлэсь но вуж ни. Тупатъяса ик кӧня уксё кошке! Лизинг амалэн хозяйствоос туэ 14 техника басьтыны быгатӥзы ик. Ваньмыз сямен со комбайнъёс но тракторъёс. Ярам, тазэ Россиын потто, солы кун ласянь субсидия но сётӥське.

Нош кунгож сьӧрын поттэмезлы нокыӵе льготаос ӧвӧл. Ӵапак соизлы ик тросгес кулэясько али гуртоос. Нош бусыын мукет техника но туж кулэ, уката ик — механизаторъёс тырмымтэ дыръя кӧня ке ужез огназ лэсьтӥсь машина. Соин ик кунгож сьӧрысь техника басьтӥсьёслы но льготаос мед чаклалозы шуыса, Удмуртиысь министерство вазиськонэн потӥз Москвае.

Юрттэт чакламын ӟеч выжыысь пудо басьтыны мылкыд карись хозяйствоослы но. Кылсярысь, матысь дыре племенной хозяйствоослы келяны чакламын ог 300 миллион манет. Соослэсь угось лыдзэс но, ужамзэс но 20-тӥ июльысен золгес эскерозы. Ӵапак та нуналозь шаерысьтымы вань 42 племенной хозяйствоосын йылпумъяськыны кулэ пудозэс лыдъян, котькуд сюролы электронной номер сётон. Озьы огъя электронной база кылдыны кулэ. Кунян вордскиз, я ветыл кытысь ке палэнысь вуттӥзы — соослы но нимысьтыз номер сётӥськоз.

Куд-ог хозяйствоос гидазы лушкем кӧня ке йыр скал возё, сое учёт дыръя уг пусъё. Озьы трос йӧл кыскемзэс возьмато. Со бордысь угось субсидилэн быдӟалаез потэ. Котькуд скаллы номер сётӥськиз ке, зэмос суред адӟиськоз. Ольга Абрамова малпа: электронной идентификационной номеръёс кылдэм бере йӧл кыскон усёз, дыр.

Но та ужез лэсьтыны кулэ. Угось 2019-тӥ арысен племенной ужен вырисьёс скалъёслэн лыдзыя субсидия басьтозы. Гидъёсысь номертэм пудоосты шараязы ке, Россельхознадзор соосты вандытоз. Азьланяз чакламын вань хозяйствоослэсь, частникъёслэсь но пудозэс электронной базае пыртыны.

Елена Сараматова

Туспуктэм: Максим Егоров

Удмурт Дунне
By Удмурт Дунне Июль 6, 2018 09:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*