«Герд» газет: мылкыд ке вань — удмурт кылэз дышетыны луонлыкъёс сюро, нош кытын со уг шӧдӥськы

Удмурт Дунне
By Удмурт Дунне Июль 11, 2018 12:00
кияса удмурт кенеш

Киясаысь 1-тӥ нылпи садын удмурт культураен тодматско

Мылкыд ке вань — луонлыкъёс сюро. Та веран тупа удмурт кылэз улӟытыны но азинтыны тыршисьёслы. Ӵапак соос сюлмаськемъя элькунысьтымы школаосын но нылпи садъёсын усьтӥсько удмурт кылъя кружокъёс.

Быдэс ёрослы — 1 дышетӥсь
Асьмеос адӟиськом, кызьы чылкак удмурт гуртъёсын но анай-атайёс, туала улон сьӧры уйиськиськом шуыса-а мар-а, пиналъёсынызы ӟуч кылын гинэ верасько. Нош кыл семьяысь кошке ке, школа сое уз берыкты ни. Озьы ке но куд-огез та веранэн соглаш уг луо. Тазьы гинэ валэктыны луэ соослэсь ӟучомись яке ӟуч нылпиос пӧлы удмурт кылмес вӧлмытон мылкыдзэс.
Сарапул ёросэз ӟуч ке но шуиськом, отысь 14 школаосын кружок амалъя удмурт кылэз дышето.
— Урокъёс ми нуыны ум быгатӥське, малы ке шуоно ӧвӧл удмурт кылъя дышетӥсьёсмы, — вера Сигаево шор ёзо школаысь ӟуч кылъя дышетӥсь, «Удмурт Кенешлэн» Сарапул ёросысь ёзэныз кивалтӥсь Нина Бехметова. — Вераськыны быгатӥськом, но школаын асьмеос ноку анай кылмес ӧм дышетэ ке, кызьы солы пиналъёсты дышетом? Быдэс ёросамы удмурт кылъя дышетӥсь вань Тарасово школаын гинэ.

Соин мукет школаосын удмурт кылэз кружок амалэн гинэ нуо, котькуд дышетӥсь тырше урокъёсаз шудонъёс ортчытъяны, кырӟаны-эктыны. Озьы кылэз дышетэмлэсь тросгес пиналъёс тодматско культураенымы.
— Сигаево школаын, кылсярысь, «Родничок» школа-садын покчи классъёсысь дышетӥсь Оксана Анатольевна Нургалиева — Юкаменск ёросысь лыктэм удмурт нылкышно — аслаз классаз 2-тӥ арзэ ини удмурт кылъя кружок нуэ, — азьланьтэ веранзэ Нина Бехметова. — Занятиосаз классысьтыз 24 пиналъёс пӧлысь 18-эз ветло. Соос пӧлын вань ӟучъёсыз но, ӟучомем удмуртъёс но.

Урокъёссэ О. Нургалиева дотово тунсыко ортчытъя: пиналъёс шудо но, кырӟало но, лыдӟисько но, верасько но — ваньмыз удмурт кылын ортче. Кемалась уг ке но дышеты ай, Оксана Анатольевна пиналъёс понна «Кин мае сие?» темая интерактивной ватсэт дасяз ини. Шудон висказы пиналъёс тодматско дорысь пудо-животэн но соослэн улэменызы. Али озьы ик шумпотыса вераны быгатӥсько ни: вуоно дышетскон арысен Сигаевоысь ик «Росинка» нылпи садын но удмурт кылъя кружок усьтӥськоз. Со понна отысь воспитатель Ольга Ивановна Кирьянова ветлӥз нимысьтыз курсъёсы.

Кияса Удмурт Кенеш

Киясаысь 1-тӥ нылпи садын удмурт культураен тодматско

Ӧвӧл удмурт воспитательёс
Сарапул ёросын ӧвӧл ке удмурт кылъя дышетӥсьёс, киясаос та вакытэ куректо удмурт воспитатель ӧвӧлысь.
Сарапул ёрос сямен ик, Кияса черкогурт азьло вакытысен ӟуч лыдъяське. Озьы ке но 2 ар талэсь азьло отысь 1 номеро нылпи садын усьтӥськиз удмурт кылъя кружок, анай-атайёс пиналъёссэс отчы шумпотыса лэзьязы.

— Кружок кылдытон азьын анай-атайёсын кенешимы. Собраниысен пӧлысьтызы одӥгез — англи кылъя дышетӥсь — ваньмыз азьын вераськиз, валэктӥз, кылэз дышетон — со туж умой шуыса, — вера Валентина Агичева, Киясаысь 3 номеро нылпи садлэн кивалтӥсез. — Собере, пе, англизэ дышетыны капчигес ини, уго куд-ог кылъёс но куараос огвыллем кылӥсько. Сое кылыса но (ма, туала анай-атайёс асьсэос но валало, нылпиослы кружок азинскон, йырсазьзэс умоятон амал шуыса), нокин пумит ӧй вал. Маиз тунсыко на — кружокам туж ӧжыт удмуртъёс ветлӥзы, тросгес вал ӟуч но бигер нылпиос. Монэ коридорысен адӟо но — удмурт кылын ӟечбуръясько ни вал.

Малы ке ӟучъёсыз ик пиналъёс золгес тыршизы удмуртэз дышетыны, тросгес тунсыкъяськизы буёлъёсын но, лыдпусъёсын но. Кружок шуиськом ке но, со книгаосын пукон ӧвӧл: занятиосамы шудӥськом но, эктӥськом-кырӟаськом но вал. Подготовительной группаын 2 ар ужаса вуттӥ, шоро-куспояз — 1 ар, нош али, уже воштӥськемен, кружок нуыны дыры ӧвӧл ини. Пиналъёсты дышетон понна, Р. Кузнецовалэн программаез вылэ пыкиськыса, ачим программа гожтӥ, соя ужай вал.

Ог толэзь талэсь азьло Валентина Агичевалы Киясаысь 3 номеро нылпи садэн кивалтыны оскизы. Солэн али но бадӟым мылкыдыз удмурт кылъя кружокез азинтыны, но, жаляса верано, 1-тӥ но 3-тӥ номеро нылпи садъёсын ӧвӧл удмурт воспитательёс. Кияса ёросысь «кенешчиос» оскыто, та югдурез эскерыса возё шуыса. Матысь дыре соос чаклало вазиськыны ёросысь дышетонъя управление, та шугъяськонэз сэрттыны курыса.

7 интые — 17
Алнаш ёрос но черкогурт котьку но удмурт лыдъяськизы ке но, 3 ар талэсь азьло Алнашын бадӟым шугъяськон кылдӥз — нырысетӥ удмурт классэ гожтӥськиз… 7 мурт. Удмурт ёрос центрын!
— Гуртъёсын 7 адямиен класс усьтӥськом, нош Алнаш понна со туж ӧжыт, — вера Алнаш ёросысь дышетонъя ёзэн кивалтӥсьлэн воштӥсез, «Удмурт Кенеш» огазеяськонлэн Алнаш ёросысь ёзэныз кивалтӥсь Галина Павлова. — Кышкытлык кылдӥз, удмурт класс чик уз усьтӥськы, нош 7 удмурт пиналъёсыз ӟуч классэ выжтозы шуыса.

Та югдурез чакланы кутскиз ачиз ёрос йыр А. Семенов.
— Ми ортчытъямы 1-тӥ классэ мынӥсь пиналъёслэн анай-атайёсынызы собраниос, валэкъямы, удмурт кыл мукет предметъёсты дышетыны уз люкеты шуыса, — азьланьтэ Г. Павлова. — Дуннеысь тодмо исследовательёс кемалась верало ни, аслэсьтыз анай кылзэ тодӥсь нылпи визьмогес, мукет пиналъёс пӧлын ассэ эрикогес шӧдэ шуыса.

Удмурт анай-атайёсын нимаз но трос пумиськылӥм. Ужмы вырӟиз, куке ёрос кивалтӥсьмы шуиз: удмурт класс дышетскоз выль, туала сямен лэсьтэм, удмурт шӧмо кабинетын, отын луозы выль партаос но туала оборудование. Со понна анай-атайёслэсь уксёзэс уз бичалэ. Со классэн ужалозы юнъёсыз дышетӥсьёс. Пиналъёсты нуллозы элькунысьтымы, ёросысьтымы но школаысь тунсыко ужрадъёсы.

Со арын уно собраниос но пумиськонъёс бере нырысетӥ классэ, 7 интые, мынӥзы 17 пиналъёс.
— Мон соослы удмурт кылын ӝӧквыл но мукет шудонъёс нуи, переменаоссы тунсыко мед ортчозы шуыса, — вера Г. Павлова. — Соос пичиесь на, но школаысь удмурт ужрадъёсы мыло-кыдо пырисько ини.

Та учыр мукет анай-атайёслы но адӟем карымон луиз: кылем арын люкаськизы ини 2 нырысетӥ удмурт классъёс, туэ но 2 луыны кулэ. Ваньзы ик соос дышетскозы выль, удмурт шӧмо кабинетъёсын.
Ватсам потэ на тодмо удмурт этнографлэсь, история наукаосъя докторлэсь, профессорлэсь Владимир Владыкинлэсь кылъёссэ. Туэ юбилейысеныз со шуиз:

— Вордскиз ке удмурт, со удмурт ик луыны кулэ. Ӧз ке быгаты удмурт кылын вераськыны, со урод ӟуч луоз, но удмурт уз ни лу. Али пичи калыкъёс азьын Гамлетлэн юанэз сылэ: быть или не быть? Тыршоно зол луыны. Тон удмурт пинал ке — самой ӟечез дышетскись луыны кулэ, удмурт дышетӥсь ке — самой ӟеч дышетӥсь. Вормоно ӟечлыкен, малы ке шуоно лыдэнымы вормыны ум быгатӥське.
Ярам ай, асьме пӧлын вань удмурт кыл понна сюлмаськисьёс, сое азинтон но калыке вӧлмытон бордын тыршисьёс.

Елена Рябина

Туспуктэм:  «В Контакте» бамысь

Удмурт Дунне
By Удмурт Дунне Июль 11, 2018 12:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*