70 удмурт егитъёс люкаськылӥзы Татарстанын ортчем «БиГерд» форуме

Удмурт Дунне
By Удмурт Дунне Июль 11, 2018 17:18
Марина Матвеева

Егитъёсты эшъяськытӥсь шудон

28-тӥ инвожоысен 1-тӥ пӧсьтолэзёзь Татарстанысь Балтаси ёросысь Покчи Лӧзя гуртын удмурт егитъёс понна «БиГерд» форум ортчиз. Сое 2-тӥ ползэ ини радъяз Татарстанысь удмуртъёслэн национально-культурной автономизы.

Ужрадлэн валтӥсь ужпумез — удмурт егитъёсты кылмес, культурамес утён но азинтон уже кыскыны. Форуме лыктэмъёс ужазы 4 ӧръёсъя: творчество, мугорез кыдатон, этноблогинг но дизайн. Егитъёс форумлэн нырысетӥ 3 нуналъёсыз ӵоже быгатонлыкъёссэс волятӥзы, нош берпуметӥ нуналаз пыриськизы Татарстанысь удмуртъёслэн Гыронбыдтон праздниказы: творчествоен вырисьёс пуктӥзы пичияк концерт, физкультураез гажасьёс пыриськизы спортъя ӵошатсконъёсы, этноблогингысь егитъёс шулдыръяськон сярысь вакчи иворъёс гожъязы вотэс бамъёсы, нош дизайнеръёс дасязы туспуксьылон инты — пуллэсь «БиГерд» кылэз. Со сяна, форуме ваньмыз пыриськемъёс ортчытӥзы яркыт флешмоб, соос борды итӥськизы Балтаси ёросысь кырӟась-эктӥсь коллективъёс но.

Та форумлэн валтӥсь малпанэз: егитъёс — егитъёс понна. Мукет сямен вераса, асьсэос егитъёс дышето эшъёссэс кыӵе ке ужлы. Кылсярысь, Казаньысь студентка Анна Самсонова 2-тӥ арзэ ини форумын эктыны дышетӥз, флешмоб пуктӥз.
— Мон весь тазьы верасько: кин тае, мон сяна, лэсьтоз? Мынам удмурт лулчеберетэз ӝутэме потэ, Татарстанын со понна луонлыкъёс вань, — вера Анна. — Удмурт сямен кырӟаны но эктыны форумын гинэ ум дышетӥське, таӵе уж нуиськомы Казаньын но.

Дышетскем сяна, 4 нунал ӵоже егитъёс удмурт шудонъёсын, туала эстрадаен тодматскизы, шур дуре чорыг лым сиыны потазы. Со сяна, соос доры куное вуылӥзы Румыниысь удмурт кылын вераськись семья Анастасия но Миклош Деметеръёс нылъёсынызы ӵош, Удмуртиысь гожъяськись Дарали Лели, Балтаси ёросысь кубызэн шудӥсь Мишагай — Михаил Романов — но Татарстанысь удмуртъёслэн «Кенеш» огазеяськонзылэн Балтаси ёзэтэныз кема аръёс ӵоже кивалтэм Леонид Сапожников.

Тужгес яраз… сиён!
— Та форумез кылдытон сярысь малпан 2009-тӥ арын кылдӥз вал ини, но кисьмаз ай кылем арын гинэ, — вераз Татарстанысь удмуртъёслэн национально-культурной автономизылэн быдэсъясь директорез, «БиГерд» форумез радъясь Марина Иванова. — Кылем арын со люказ 37 адямиез, туэ — 70-зэ ини. Та лыдпусъя гинэ но вераны быгатӥськом, проектмы удмурт егитъёслы тунсыко шуыса.

Нялтас вераса, кылем арын «БиГерд» форум Татарстанысь гинэ егитъёс понна ортчиз, нош туэ со огазеяз Татарстанысь, Удмуртиысь но Марий Элысь 16-30 аресъем егитъёсты. Со сяна, пыриськись чотын ик отчы вуылӥз Удмурт кун университетэ венгер кыллы дышетыны Будапештысь лыктэм Жофи Сираки.

— Тӥ кузь но тунсыко сюрестылэн кутсконаз гинэ ай, — шуиз егитъёслы Татарстанысь Президентлэн Национальной политикая департаментысьтыз кивалтӥсьлэн воштӥсез Евгений Ефимов. — Тӥ понна та туж ӟеч луонлык огазе люкаськыны, мар ке выльзэ малпаны.

Со озьы ик пусйиз, Татарстанысь калыкъёс пӧлын удмуртъёс асьсэды туж усто возьмато, тыршыса ужало шуыса, нош «БиГерд» форум трос мукет форумъёс пӧлысь висъяське аслаз семьяын кадь шуныт омыреныз.
Зэм но, нырысетӥ нуналысеныз ик «БиГердэ» лыктэмъёс капчиен огкыл шедьтӥзы ог-огенызы но, радъясьёсын но, куно пумитасьёсын но. Кузёос та ужрадэз ортчытон понна Покчи Лӧзя школае 70 валесъёс вайиллям. Та уж борды быдэс школа, быдэс гурт итӥськиз — кин ке дорысьтыз валес ваем, мукетыз — пукон, куинетӥез — миндэр…

Пумитазы но туж зол. Нош кыӵе сюдӥзы! Котькудӥзлэсь юа, мар тужгес зол тодаз кылиз, огымысь шуозы: сиён! Зэм но, пӧраськисьёс ӵукнаысен ӝытозь егитъёслэн кузязы ветлӥзы, туж ческыт но ӵем — нуналаз 5 пол — сюдӥзы.
— Мон та форумысь бурдъяськыса бертӥ, ярам ай, ветлӥ! — вера Балезиноысь Мария Булдакова. — Сомында адямиосын тодматскыса, аслам но выль малпанъёсы кылдӥзы, тыршо соосты уж дурам кутыны, улонэ пыӵатыны.
Вуоно арын бигер удмуртъёс та проектсэс улонэ пыӵатыны малпало Мамадыш ёросын. Угось «БиГерд» радъяськылэ Гыронбыдтонэз ортчытон интыын, вуоно арын со ӵапак Мамадышын луоз.

Елена Рябина

Туспуктэм: Марина Матвеева

Удмурт Дунне
By Удмурт Дунне Июль 11, 2018 17:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*