Зинаида Рябинина: Сьӧлӧм пытшкын помтӧм шуд!

Удмурт Дунне
By Удмурт Дунне Июнь 14, 2018 12:30

Зинаида Рябинина, валтӥсь редактор

Кылем шутэтскон нуналъёс туж узыр ортчизы. Гуртоос пусйизы гырон быдтонэз, городъёс — асьсэлэсь нуналзэс (сое ваньмыз сямен тупато та шулдыр вакытлы). Ижкарын огдыре пусйизы Россилэсь но городлэсь нуналзэ, Гербер праздникез. Нош ми вуылӥм на Коми шаере — Сыктывкар котырысь Ыб черкогуртысь фин-угор этнопарке — татын радъяськизы «Коми му» газетлэн 100 ар тырмонэзлы сӥзем ужрадъёс.

Фин-угор журналистъёс ог-огзы доры куное 5 арскын огпол ке но одно вуыло. Озьы газетсылы 95 ар тырмыку, шуим вал: сюрес укыр кузь, Интернет пыр но ог-огеным вераськыса тырме, мукетъят ум ни мынэ. Но вакытэз вуиз но, нош ик потӥм 12 часъем сюрес вылэ, малы ке шуоно ми ужъя огпаръёс гинэ ӧвӧл, ми — зэмос ӵыжы-выжыос!

Ижысь, куазез курласа, кошким вал, нош отчы вуим но — уката кезьыт но зоро, нош бакчаоссы гыремын но ӧвӧл на! Картош мерттом ай, пе, июнь пумын. Но коми эшъёсмы сьӧры зор ултӥ пӧйшураны тэле мынӥськом. Зэм, нокинэ ӧм кутэ, но сютэм ӧз кельтэ — асьсэ кутэм ӵӧж сӥлен, зумыт лымен утялтӥзы.

Коми газет сярысь верано ке, со туж тупа «Удмурт дуннелы». Туж кельшиз Нациосын ужан политикая министрзылэн Галина Габушевалэн верамез: калыклэсь улэм-вылэмзэ, мылкыдзэ тодэмед потэ ке — «Коми муэз» лыдӟы.

Зэм, калык сярысь гожъяны коми эшъёсмылы, милемын ӵошатыса, данаклы шуггес: холдингазы пыре 5 газет, собыдӟа редакцилэн одӥг но транспортэз ӧвӧл! Соос та дырозь ёросъёстӥ-гуртъёстӥ ветло автобусъёсын! Туж паймо, милям ваньмыз редакциос нимаз машинаен шуыса. Со дыре ик уждунъёссы милесьтым но пичиесь. Но журналистъёс бурмемын яратоно ужзы борды.

Ми, удмурт журналистъёс, коми ужрадъёсын кылысь кылэ берыктӥсьтэк пукиськом — сотэк но валалоды, пе. Ма, данакез зэмзэ но туж мусо но тодмо. Кылсярысь, татын ӟечкылакузы тужгес но ӵем чузъяське «сьӧлӧм пытшкын помтӧм шуд» сӥзён.

Иже бертыса, Герберын нош ик лыдӟисьёсынымы пумиськиськом. Туж чебер, буёло луиз газет, шуо соос, вуоно паларлы гожтӥськыса. Нош тӥ ӧд вунэтэ-а квитанцидэс эскерыны?

Удмурт Дунне
By Удмурт Дунне Июнь 14, 2018 12:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*