«Воршуд» но «Мост» фестивальёс: Эктыса куэм кесэг

Удмурт Дунне
By Удмурт Дунне Июнь 28, 2018 15:17

Фин-угор калыкъёслэн «Воршуд» фестивальзы туэ 8-тӥзэ ортчиз. 23-тӥ инвожое Ижысь Киров нимо паркын соин ӵош эшшо 2 проект усьтӥськиз: эктонъя калыккуспо «Выж» лагерь но Россиысь куиськонъя школа.

«Воршудэ» люкаськизы фин-угор ӵыжы-выжыос.  / Туспуктӥз Наталья Дмитриева

Фин-угор парад

Ӵукнаысен паркын куараос кыдёке чузъяськизы ни. Пыронын ик куноосты арганэн но шулдыр кырӟанъёсын пумитазы Удмуртиысь коллективъёс. Пыдлогес мыныса, люкен-люкен сылӥсь адямиосты адӟыны луэ вал: таосыз концерт азьын эктонъёссэс, кырӟанъёссэс тодазы ваё. Парке огшоры калгыны яке спортэн вырыны вуэмъёс абдраса ик учко: «Мар та таӵе?» Кӧня ке улыса, телефон дуре кисыязы пыро — сокем аспӧртэмлыко калык дӥсен пӧрмытскем адямиосын туспуктэм лэсьтытэк уз луы.

Таяз аре фестивале оглом 25 коллектив пыриськиз. Ижкар пумитаз Удмуртиысь, Марий Элысь, Комиысь, Пермьысь, Кировысь, Самараысь фин-угор ансамбльёсты. Асьсэ флагъёсынызы зэмос парадын кадь ортчизы соос калык азьтӥ. Паймытӥз дӥськутъёссылэн узыр луэмзы — туж чебересь адӟисько. Таӵе пӧсь куазен нылкышноос жаль ик потӥзы: вылазы куэм дэремъёс, азькышетъёс дӥ-сямын, йыръёсазы кышетъёс керттэмын. Чуваш кышномуртъёслэн воксё хушпуос, коньдонэн чебермам йыре пононъёс дӥсямын вал. Таосыз секытэсь на.

100-лэсь трос эктӥсьёс бергазы калык крезьгуръя, бордазы учкисьёслэсь синъёссэс бурмытыса. Коллективъёс люкаськем калыкез шудонъёс, эктонъёс пыр культураенызы тодматӥзы. Праздник мед пӧрмоз шуыса, ӧвӧл кулэ вылэм нокыӵе салют, жонгетэменыз пеле пырись крезьгур. Эктонъёс ик бурдъято!

Вуныны кутскем куиськонэз калык пӧлы вӧлмытон. / Туспуктӥз Елеан Байкова

Черсонысен — куиськонозь

Ужрадлы аспӧртэм шӧм пыӵатӥзы Киров нимо паркын сылӥсь 20 куиськон станокъёс. Озьы Россиысь куиськисьёслэн «Кросна» школазы усьтӥськиз. Та нуналэ куиськисьлэсь ужзэ котькудӥз ас вылаз мертаны быгатӥз. Татчы Великий Новгородысь но Нижний Новгородысь, Москваысь, Кировысь, Челябинскысь, Тюменьысь но мукет городъёсысь текстилья но куиськонъя дизайнеръёс пыриськизы. 40-лэсь ятыр люкаськизы! Соос калыкез пӧртэм куиськон амалъёсын тодматӥзы. Кылсярысь, адӟыны луиз, кызьы куиське выж лёгет, пестрядь яке ажурной басма. Вань ужлэсь радлыксэ бӧрсьысь бӧрсе валэктӥзы: черсонысен кутскыса, станокез дасятозь.

Эшшо огез станок сылӥз сцена вӧзын. Отын эшъяськон кускерттон куиськиз. Вань мылкыд карисьёслэн тыршеменызы, со «Воршуд» фестивальлэн емышез луиз.

Сомында кибашлыос люкаськемын бере, уг луы вал соослэсь ужъёссэс адӟытэк кошкыны. Пӧртэм буёло куэм кесэгъёсын адӟытон паймытӥз. Макем трос дыр но чидан кулэ та быдӟа ужез лэсьтыны!

Выжен герӟазы

Фестивальысь адӟыны луиз кунгож сьӧрысь вуэм егит фин-угоръёсты но. Эстониысь «Каякас» коллектив но Румыниысь мадьяръёслэн «Сазлабу» ансамбльзы эктонъя калыккуспо «Выж» лагерьлы луыса Удмуртие вуизы. Та лагерь 15 ар ӵоже пӧртэм кунъёсын радъяськылӥз. Туэ, Президентлэн грантъёсъя фондэзлэн конкурсаз вормыса, «Выж» лагерез Удмуртиын ортчытон борды басьтӥськиз Кузебай Герд нимо гимназиысь калык эктонъя «Чебеляй» студилэн кивалтӥсез Наталья Чиркова. Солэн верамезъя, кыӵе ке кунэ вуыса, ульчаостӥ ортчыса, уг луы валаны калыклэсь сямзэ, ӵапак эктонъёс пыр шӧдӥське солэн манерыз, улон кужымез.

«Воршуд» фестивальлэн усьтӥськоназ эктӥсь егитъёсты учкисьёс, юн чабыса, пумитазы. Калыкез соос выж сямен огазеязы. Калык дӥськутъя валалод, кытын удмурт, эстон, пор яке коми. Соос ог-огзэс, кемалась тодмо эшъёс сямен, пумитазы. Бадӟым котыртэмын, киоссэс кутыса, бергазы. Пӧлазы эктонъёсты учкыны лыктэм калыкез но кутӥзы, угось таосызлэн тэк сылэмзы ӧз ни луы.

Мадьяр но эстон эктонъёсын Шаркан, Пичи Пурга, Балезино, Яр, Глазов ёросъёсын, Воткинск, Сарапул каръёсын улӥсьёс но тодматскыны быгатӥзы. «Выж» лагере лыктэмъёс отчы концертэн вуылӥзы, эктонъёсъя мастер-классъёс ортчытӥзы.

Мария Емельянова

Удмурт Дунне
By Удмурт Дунне Июнь 28, 2018 15:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*