Сьӧлталась киужъёсъя юртын сӧсыръёс горд сюен выро

Удмурт Дунне
By Удмурт Дунне Июнь 26, 2018 10:30

Удмуртиысь проектъёс туэ Россиысь Егитъёсын ужанъя агентстволэсь 29 грантсэ утӥзы, 2-ез соос пӧлысь — сьӧлтаослэн.

udmurt.ru

Киужъёсъя юртын сӧсыр адямиос понна ужаны кутскиз «Кузьыли» мастерской. / Туспуктэм: udmurt.ru

Сьӧлтаысь киужъёсъя юртэ май толэзьысен, нуналлы быдэ сямен инвалидъёс лыкто но гончарной круг сьӧры пуксё, горд сюйлэсь пӧртэм арбериос лэсьто. Озьы киужъёсъя юртын сӧсыр адямиос понна ужаны кутскиз «Кузьыли» мастерской. Сое ортчытъяны кичӧлтонэн потӥзы татысь егит кибашлыос.

— Горд сюен ужан — со ваньмон дырез тунсыко ортчытон, адямиосын пумиськон, оло, вуоно уж но.  Угось инвалидъёс лэсьтэм арбериоссэс вузаны но барыш поттыны быгатозы. Озьы та проектмылы 150 сюрс манет грант утӥмы. Гончарной круг, горд сюй, пӧртэм тӥрлык, суредаськон буёлъёс басьтӥмы, — вераз проектлэн одӥгез кичӧлтӥсез Роман Черных.

Мастерское инвалид адямиосты кыскон пумысен кибашлыослэн юртсы огкылысь ужаз ёрос больницаен, калыклы улон-вылонын юрттэт сётонъя центрен.

— Ёросын сӧсыр адямиос ӧжыт ӧвӧл, — вераз Сьӧлта ЦСО-ысь психолог Светлана Василькова. — Соосты кытчы ке поттыны секыт, угось асьсэ висёнэнызы ньыль сэргын пукыны дышемын, калык пӧлы потанлэсь возьдаськонзы но вань. Нош кин татчы лыктыны мылкыд кариз, шумпотон басьто, быгатонлыксэс усьто, ог-огенызы верасько.

Озьы проектэ пыриськыны мылкыд каризы 10 сӧсыр нылпиос но арлыдоос, нылкышноос но пиосъёс.

— Нырысь вераськимы вал, мастерскойын арняяз 2 пол пумиськыломы шуыса, — вераз  киужъёсъя юртлэн кивалтӥсез Светлана Никулай. — Инвалидъёсты киужлы дышетонъя нимысьтыз программа дасязы асьме методистъёс ик. Дорамы ветло пӧртэм висёнэн висись адямиос: кинлэн ке пыдыз сӧсырмемын, мукетыз вераськыны курадӟе. Котькудӥныз нимысьтыз ужано луэ. Соин проектэ пыриськисьёс нуналлы быдэ сямен вуылыны кутскизы. Мастерскойлэн ужез ар пумозь чакламын. Ноябре ӧдъяськомы огъя кужымен лэсьтэм киужмес адӟытыны. Малпаськомы, дорамы ветлэм адямиос киужен выронзэс азинтозы. Али ик куд-огез, горд сюен вырем сяна, усточиосмылэн кивалтэмзы улсын суредаськон, пужыятскон борды басьтӥськизы ни.

А. Снигирёва

Е. Пантюхина инвалидъёсты дышетэ горд сюен ужаны. / Туспуктӥз А. Снигирёва

 

«Кузьыли» мастерскойлэн ужаз мыло-кыдо пыриське Елизавета Лошкарёва. Киужен тодматскыны ӧтемзылы шумпотӥз, ас киыныз лэсьтэм арбериосыз толэзь куспын уно люкаськизы ни.

— Ноку но ӧй вал горд сюен ужаме, малпасько вал, секыт луоз, уг пӧрмыты шуыса, — мылкыдзэ вераз кышномурт. — Но чиньыосы сокем дышизы ни, ужаны кутскисько ке, дугдэме уг поты. Нырысь кутскимы капчигес арбериос бордысен — магнитъёс, борддоре ошон тусьтыос лэсьтӥмы, берло шуланъёс, тэркыос пӧрмытӥм ни. Бадӟым мылкыды сяська тыронъёс лэсьтыны, соос коркаме шулдыргес карозы кадь потэ. Горд сюен ужаны туж яраз, сыӵе гань-гань луисько кадь, со сюлэмез бурдъя, урод мылкыдэз улля.

Ирина Трудолюбова пыдъёсыныз курадӟе, но киосыз горд сюез шаплы посо. Кышномурт ужа ке но, мастерское ветлыны дыр шедьтэ.

— Шуизы, лэсьтэм ужъёсмес вузалляны но быгатомы. Нош али сокем азьпала уг учкиськы на, нырысь-валысь сад-бакчаме ас киыным лэсьтэм арбериосын чеберъяме потэ.

Выль киужен тодматскыны мылкыдзы вань коляскаен ветлӥсь куд-ог инвалидъёслэн но. Но али соослы юртэ шедьыны луонлык ӧвӧл ай. Та пумысен мар кароно, малпаськыны кулэ на, веразы проектэз радъясьёс.

Ангелина Снигирёва

 

 

Удмурт Дунне
By Удмурт Дунне Июнь 26, 2018 10:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*