Поръёслэн Семыксы ортчиз Пичи Пурга ёросысь Поргуртын

Удмурт Дунне
By Удмурт Дунне Июнь 14, 2018 13:21

Семык огазеяз поръёсты но, удмуртъёсты но.

Поръёслэн Семык шулдыръяськонзы туэ ортчиз Пичи Пурга ёросысь Поргуртын (Верхняя Иж-Бобья). Куазь шоры учкытэк, ужрад трос калыкез люказ: Удмуртиысь, Татарстанысь, Марий Элысь, Башкириысь, Киров улосвылысь поръёсты.

Та праздникен калыкез ӟечкылазы Удмуртиысь йӧскалык политикая министрлэн нырысетӥ воштӥсез Павел Орлов, Пичи Пурга ёрослэн йырыз Сергей Юрин, шаерысьтымы поръёслэн огазеяськонэнызы кивалтӥсь Анатолий Радыгин но мукет кивалтӥсьёс.

Семык! Озьыен, быремын бусы ужъёс, кутске гужем. Быгато ик поръёс шулдыръяськыны. Шукрес дэремъёссэс дӥсяса куное вуэм поръёс нырысь ик ортчо Поргуртлэн валтӥсь урамтӥз, куноятыса кузёос капка азьёсазы пукто тыро ӝӧкъёс. Куноослы палэнтӥ ортчыны уг яра. Собере ини мыно бусые — татын сылэ бадӟым сцена, чузъясько задор пор кырӟанъёс, калык тэк пукыны уг ӵыды, султыса гозыен эктыны кутске. Арлы быдэ шулдыръяськонын тунсыко ортчыло пор пампалчеослэн (нылъёслэн) но пор патыръёслэн (пиослэн) вожвылъяськонзы, туэ нимаз ӵошатскизы эктӥсьёс но. Со сяна, котькуд мылкыд карись быгатӥз пӧртэм шудонъёсы пыриськыны: пукыӵысь ыбылӥськыны, пор ибырвесьёс лэсьтылыны, такмак кырӟаса вожвылъяськыны.

Поргурт интыяськемын Пичи Пурга ёрослэн кунгож дораз ик — бусы сьӧрын адске ни Агрыз ёрос, нош бускель гуртъёсын уло удмуртъёс, Поргуртысь пиналъёс дышетскыны ветло удмурт гуртэ — Вуж Мӧньяла. Соин ик поръёс кусып возё вань калыкъёсын, тодо 4 кылъёсты — ӟучсэ, удмуртсэ, порзэ, бигерзэ. Семыкын но шӧдӥськиз, макем поръёс эшлыко кусыпъёс возё мукет гуртъёсын — татчы шулдыръяськыны вуизы бускель калыкъёс но.

Кызьы ортчиз Семык, учкелэ татысь. 

Мария Иванова
Туспуктэм: vk.com (Эшъяськон юрт)

Удмурт Дунне
By Удмурт Дунне Июнь 14, 2018 13:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*