Писатель Константин Яковлев калыке берытскиз 1990-тӥ арын

Удмурт Дунне
By Удмурт Дунне Июнь 20, 2018 14:00

К. Яковлев но солэн кузпалыз Екатерина Платоновна. 1920-тӥ ар.

Удмуртъёслэсь нырысетӥ ӧтчамзэс радъясьёс пӧлын огез яркытэз вал Константин Яковлев.

Нимыз ӵушемын вал

К. Яковлев вордӥськиз 1890-тӥ арын 9-тӥ толсуре Алнаш ёросысь Кузёбай гуртын. 1910-тӥ арын Казаньысь учительской семинариез йылпумъяз, собере Уфа губерниысь Бирск уездын дышетӥз. Нош 1914-тӥ арын оже келямын вал. Бӧрысь ужаз Елабугаысь земской управаын, исполкомын. 1920-тӥ аръёсы Ижысь пӧртэм огазеяськонъёсын экономист-плановик луыса тыршиз. Берло ужан интыез — Ижысь ТЭЦ.

К. Яковлев — удмурт калыклэн дано пиез, усто дышетӥсь, редактор, писатель. Солэн нимыз трос удысъёсын кылиз. Константин Сергеевич 1918-тӥ арын «Виль Синь» газетлэсь нырысетӥ номерзэ поттӥз. Со аре ик Елабугаын Россиысь удмуртъёслэн нырысетӥ ӧтчамзылэн кичӧлтӥсез луиз. Нош 2 учительской семинариос кылдытон понна Константин Сергеевич Москвае ачиз И. Сталин доры ветлӥз. Сюлмаськиз, школаосын удмурт кылэз мед дышетозы шуыса. Ортчытӥз удмурт калыклэсь переписьсэ Россиысь 5 губерниосын. 1926-тӥ арын кылдытэмын вал Удмуртиысь писательёслэн огазеяськонзы, солэн 24 ёзчиосыз пӧлы шедиз К. Яковлев но. Тыршемез-сюлмаськемез ик быронэ вуттӥз…

Творчествоез сярысь верано ке, ми тодӥськом солэсь «Коньяк» вероссэ, «Туноос», «Володя», «Сюртэм Карпа» пьесаоссэ. «Сюртэм Карпа» пьесаезъя адӟиськом, кыӵе зол Константин Сергеевич тодэ вылэм удмурт сямъёсты. Та пьесаез солэн сцена вылын но возьматэмын вылэм, ачиз ик шудэм Сюртэм Карпазэ. Уката но удалто вылэм солы «пушнеро» веросъёс. Со сярысь тодаз вае вал Илья Константинович — К. Яковлевлэн пиез (али улэп ӧвӧл ни).

Юри малпам «Софин» ужъя 1932-тӥ арын 7-тӥ мартэ арестовать каризы М. Тимашевез, 10-тӥ мае — П. Гороховез, 13-тӥ мае — К. Гердэз. 1932-тӥ арын май толэзе К. Яковлев Москвае совещание лыктэм вылэм. Отысен ик 13-тӥ мае сое пытсазы. Удмурт азьветлӥсьёсты возизы Бутырской тюрьмаын. Бӧрысь К. Яковлев Кузебай Гердэн ӵош Соловки шормуӵе келямын. 1937-тӥ арын 1-тӥ шуркынмонэ ыбемын. Солэн нимыз уно аръёс ӵоже вунэтэмын вал. 1930-тӥ аръёсы репрессия улэ шедем удмуртъёслэн нимъёссы 1950-тӥ аръёсы гинэ калыказы берытскизы.

Озьы котыр ласянь быгатӥсь но юн мылкыдо адями улонысь, литератураысь ӵушемын вал. 1990-тӥ арын гинэ «Молот» журналын А. Уваровлэн «Вунэтэм нимъёс» материалэз потӥз. 1956-тӥ арын зэмлыке поттэм Константин Яковлев 1990-тӥ арын гинэ калыке берытскиз.

Кузёбайёс данъясько

Ми, Алнаш ёросысь Кузёбай гуртын улӥсьёс, тыршиськом асьме дано адямимылэсь улон сюрессэ ӟечгес тодыны, утчаськом соин герӟаськем материалъёсты.

«Софин» ужъя следственной документъёс пӧлын кылемын солэн ас киыныз гожтыса кельтэм автобиографиез. «Вордски пеймыт, шоро-куспо улӥсь удмурт семьяын. Выжыямы, мон но выны сяна, дышетскем адямиос ӧй вал. Одӥг классъем начальной школаысь нылкышно дышетӥсь мыным юрттӥз 2 классъем школае пырыны, собере — Казаньысь семинарие. 16 аресозь ӟуч сямен ӧй вераськы. Тусыя но огшоры удмурт. Соин ик серекъянъёсты но мыскыллянъёсты ас вылам шӧдылӥ. Ваньмыз со ултӥянъёс но сантэманъёс, удмурт калыкелэн пумтэм курадӟонъёсыз будэтӥзы мынэсьтым национальной ас мылкыдын висёнме, удмурт адямиез мыскыл карон шоры вожпотыса учконме», — гожтэ К. Яковлев дышетскемез сярысь.

Константин Сергеевич сярысь милемлы трос тунсыкозэ мадиз солэн сузэрезлэн нылыз, милям гуртамы ик улӥсь Валентина Николаевна Дмитриева.

— К. Яковлев сярысь материал вуыку, — вера со, — 80 аресъем анае ми дорын улэ вал. Визьмыз ӧжытак сураськемын. Милемыз уг тодма ни вал. Соин ик «Молот» журналэз нырысь ӧй возьматы. Арня ортчыса гинэ, шуисько: «Тани, анай, учкы ай: кин адями та?»

Константин Сергеевичлэн туспуктэмез 3-4 сантиметр быдӟа гинэ, вылаз ик, урод луэмын. Анайлэн очкиез ке но ӧй вал, со вазиз:

— Ма, родной брат Игнатей та, уд тодмаськы шат? Ми пограськом вал. Собере оским ини, Игнатей ӵужмурт но Константин Сергеевич Яковлев — одӥг адями шуыса. Яковлевез пытсамзы бере дорысьтыз солы посылка лэзиллям вылэм. Пушказ гын сапег но сиён-юон понӥллям. 6 толэзь ортчыса, бинет берен гуртэ вуэм. Быдэсак, пе, сургучен лякылэмын. Интыысь интые ветлыса, кузёзэ шедьтымтэ.

1997-тӥ арын Валентина Николаевна ветлӥз Карелие, отысь Сандормох урочищеын трос пичи калыкъёслэн визьмо адямиоссы быдтэмын. Отын ортчиз «Покаяние» калыккуспо акция.

Константин Сергеевич сюлмо адями вылэм, быгатэмезъя куанеръёслы юрттылэм. Вашкала удмурт гуръёсты кырӟаз, гитараен, мандолинаен, скрипкаен шудӥз. Туж чебер суредаське вылэм. Адямилэсь тусбуйзэ 5 минут куспын суреда но кияз сётэ, пе, вал. Ми данъяськиськом, милям сыӵе синмаськымон ас пал эшмы вань шуыса, кудӥз вань улонзэ сётӥз ас калыкезлы. Нимыз дауръёслы вордскем палъёсаз мед кылёз шуыса, 2004-тӥ арын Кузёбай школамылы К. Яковлевлэн нимыз сётэмын вал, со понна туж сюлмаськиз удмурт кылъя дышетӥсьмы Л. Прокопьева.

Марина Никонова,
Алнаш ёросысь Кузёбай школаысь дышетӥсь

Удмурт Дунне
By Удмурт Дунне Июнь 20, 2018 14:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*