Малы куректӥз Дойчланд?

Удмурт Дунне
By Удмурт Дунне Июнь 26, 2018 11:01

Малы куректӥз Дойчланд?

«Россия-Саудовской Аравия» матчез Россиын ог 10 миллион адями учкиз. Нош ми асьме футболистъёсмы понна кунгож сьӧрын висимы.

Турциысь отельын шутэтскисьёс 18 часлэсь азьло ик бадӟым телевизор азе интыяськизы. Россиысь туристъёс сяна, матчез учкыны лыктӥзы немецъёс, чехъёс, белорусъёс, турокъёс.

Воргоронъёсмы ӝыт понна кӧт тырыны но ӧз дыртэ. Шудонын вис дыръя гинэ маке со куртчыны тыпыр-тапыр бызьылӥзы. Собере нош ик телеэкран борды бурмизы. Котькуд голэз ӟучез но, чехез но огъя мылкыдын пумиталлязы — борддоръёс ик «Ура!» кесяськемлэсь зуркаллязы кадь. 5:0 лыдын Россилэн сборноез «лёгаз» Саудовской Аравиысь футболистъёсты.

Зэмос эшъяськон тулкым кузёяськиз та ӝыт отелямы. Футболэз гажась воргоронъёс ӟыгыръяськизы, ог-огзылэсь кылзэс тодытэк но.

Кузпалы немецлы кизэ сётэ, ӟуч сямен шуэ: тау, пе, Россия понна висемды понна.

Немец пумитаз «Русланд — чемпион!» вазе.

«Дойчланд — чемпион!» — пумитаз шуэ картэ. Уго 4 ар талэсь азьло Германия чемпион луиз вал.

Ог-огзылэсь кылзэс уг тодо, нош мылкыдзы уртче.

— Дойчланд-Мехико ам зонтаг, — вераны выре немец.

Удмурт воргоронъёс чиньыязы лыдъяны выро: монстаг — понедельник, динстаг — вторник, собере мар? Уго школаез 20 ар талэсь азьло йылпумъямын, немец кыл кемалась йырысьтызы тӧлӟемын.

Ярам, телефонзы ки улазы. Календарез усьтыса, немец возьматэ — 17-тӥ инвожое, арнянуналэ, шудозы Германия но Мексика. Озьы удмурт воргоронъёсмы но Германия понна висьыны дасяськизы.

Арнянуналэ телеэкран азьын буш интыез ӧй вал. Кинлы пукон ӧз шедьы, сылыса учкизы. Шудон туж ӟырдыт мынӥз. Немец чемпионъёс матчлэн нырысетӥ люкетаз зол бызьылытӥзы мексиканецъёсты. Но… нырысетӥ гол вуиз немецъёслэн капкаязы. Со бӧрсьы кӧня пол турттӥзы чемпионъёс гол пыртыны — Мексикалэн капкаяз туп ӧз пыры ни.

Кӧня сур юизы та матч ӵоже немецъёс! Макем трос тамак кыскизы — телеэкран дорын ӵын сылӥз. Но таиз матч бере ӟыгыръяськон мылкыдзы ӧй вал ни. Немецъёс, зэмзэ но, куректонэ выйизы…

Елена Скворцова

Удмурт Дунне
By Удмурт Дунне Июнь 26, 2018 11:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*