Лул но мугор. Анатолий Перевозчиковлэн выль чуръёсыз

Удмурт Дунне
By Удмурт Дунне Июнь 22, 2018 17:16

Лул но мугор. Анатолий Перевозчиковлэн выль чуръёсыз

Туспуктӥз В. Беломорских

Анатолий Аркадьевич Перевозчиков /Туспуктӥз В. Беломорских

Анатолий Аркадьевич Перевозчиков — удмурт кылбурчи, прозаик, журналист, Россиысь писательёслэн огазеяськонзылэн ёзчиез, Удмурт Элькунысь лулчеберет удысысь дано ужась.

Мон лыдӟисько Кылбур

Мон лыдӟисько туннэ Кылбур,

Данъяськисько солэн чебереныз.

Зэмзэ ке нош — укно сьӧрын Кылбур:

Зарни сӥзьыл пиштэ куаръёсыныз.

Учкы, учкы, лыдӟы, лыдӟы сое,

Туннэ со вань, аскы уз лу!

Ас улонэ сямен чебер ышоз сюе,

Ас улонэ сямен ӝамдэ гинэ куар лул.

* * *

Люкиськон секыт ик, ой, секыт вылэм,

Пилиськыны турттэ мӧляысьтым сюлэм.

Азьло но-а таӵе секыт виси меда?

Яке али гинэ монэ кутӥз та кыль?

Аръёс-а, оло нош, бурмытӥзы меда?

Соос-а каризы пи сюлэмме такыр?

Отчы, кожай, номыр уз поты ни,

Лек тӧл гинэ шуэръяськоз понназ.

Но уть ай, уть, усе на шуд тыныд,

Люкиськонэн ке но суралтэмын…

* * *

«Вся жизнь моя, что недоступна взорам»

Петрарка

Адскись но чик адӟиськонтэм улон,

Лул но Мугор, юрт пуш но корка выл,

Макем пӧртэм сямен соос выло,

Макем пӧртэм таӵе адӟон кабыл…

Огез быдэс кырын, синмы азьын,

Сильтӧл, зор-кот я шунды си улын…

Нош мукетыз, тодмо, — возъет сьӧрын,

Но отын но туж ӟугырес улон.

Ай отын но жуге зор-кот, сильтӧл,

Ай отын но бугыръяське зарезь,

Сюлэм пыжез сэстэ малпаськон тӧл,

Куректонэн кынтэ кайгу армес!

Нош шумпотон ӝужа ке, шундыя

Лул но Мугор шудбур пӧлын уя.

* * *

Петрарка вакытэ, солэсь азьвыл

Визь бугоръёс вераллязы ялан,

Мар асьмеды бырон калэ вуттоз:

Со, пе, сиськон, азьтэмъяськон, юон…

Та алэмез тросэз-а кылӥзы,

Тросэз-а кутӥськиз йырыз борды?

Оло, эшшо но зол задормизы,

Ӧч карыса асьсэ Инмарзылы.

Озьы сьӧлык, лымы комок сямен,

Зӥр! погыля бырон гурезь улэ.

Нош адями визьбур уг сазёмы,

Адӟонэзлы юрттӥськыса, улэ.

* * *

«Наше — только прошлое»

С. Капутикян

Асьмелэн — ортчемез гинэ,

Нош кулэ улыны туннэ.

Учкисько укное — сӥзьыл,

Гужеммы уйвӧтын изе.

Асьмелэн — ортчемез гинэ,

Мон соин улӥсько туннэ.

Ортчемез — утись круг — кутэ,

Ву пыдсы кошкемлэсь уте.

* * *

Ӝог ортчись гужемез

Югдытӥсь горд шунды,

Я бен дугды, эн дырты сокем.

Я бен сыл на, тон сыл,

Я эн ышы ӝамдэ,

Мед дышоз ыштонлы лул-сюлэм.

Но мылкыд — со мылкыд ик

Котьку, дыр, кылёз:

Дыр-вакыт аслэсьтыз ик кароз.

Нош сюлэм, пичи мурт кадь

Бӧрдоз, ӧпкелёз —

Ыштонлы кыӵе лул,

Кин дышоз?

* * *

Сяськаос, сяськаос,

Ой, гужем сяськаос

Тӧлӟизы, быризы.

Малпанъёс, малпанъёс,

Тон сярысь малпанъёс

Малы ке кылизы.

Кылизы вунонтэм,

Сюлэме бурмонтэм

Яраос кельтӥзы…

Сяськаос, сяськаос,

Ой, гужем сяськаос

Нош тулыс улӟозы.

Нош тонэ адӟыса,

Чилектэ на малпан:

«Воштӥськоз-а маке?»

Нош тонэ адӟыса,

Сюлмысьтым сяськае

Ой, улӟоз-а куке?

 

Анатолий Перевозчиков писательлы — 70 арес

Удмурт Дунне
By Удмурт Дунне Июнь 22, 2018 17:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*