Лачмыт. Кызьы бесерманъёс Кӧрбаназы шулдыръяськизы

Удмурт Дунне
By Удмурт Дунне Июнь 14, 2018 13:44

Юкаменск ёросысь Ёжгурт но Шамардан гуртъёс вискын лудын бесерманъёс куно пумитало асьсэ шулдыръяськоназы — Кӧрбаназы.

Пичи гинэ луд. Тылысъёс сыло, валляна (вашкала) коркаос кадь мед адӟиськозы, пе.

Виро лэзён

Пичи гинэ луд. Тылысъёс сыло, валляна (вашкала) коркаос кадь мед адӟиськозы, пе. Шортӥз Лекма шурлэн вуосыз шукыръяськыса бызё. Кышноос — пӧрасьёс — ӵукнаысен ик пуртыоссы улэ тылскизы ни, така сӥлен ӝук пӧзьто. Пичи гинэ ӝутымтэ сцена, азяз сыло ӟусъёс. Тани-тани соосты тырмытоз калык, бесерманъёслэн шулдыръяськонзы кутскоз.

— Миым элькун Кӧрбан ортчытӥм, 400-лэсь трос адями вуиз, — шуэ Шамардан гурт поселенилэн кивалтӥсез Надежда Егорова. — Туэ куазь уродгес, но Инмар мед сётоз вал шундыё инбам. Ӝук пӧзе, шаньгиос-перепечъёс пыжемын.

Сётӥз, лэся. Котыр гуртъёсын жаль гинэ кисьтӥз, кытӥ-отӥ йӧзорен но ортчиз, нош та луд вадьсын — ӧз.

Лудэз кизён.

— Та палан бесерманъёс трос уло — Ёжгуртын, Шамарданын, Бакгуртын, Ӝуамын, Юндаын, Яр музъемысь Вортчалан… Та лудын милям табере Юкаменск ёрос понна Кӧрбанмы вичак ортчылоз, азьланяз пичиен-пичиен та местаез лэсьтыны но выромы, — азинтэ Надежда Егорова.

Тани кытысь ке кыдёкысь чузъяськыны кутскиз бесерман крезь — тӧл ӝожмыт куараосты быдэс луд тыр вӧлмытӥз: кышноос, воргоронъёс, вал кыткыса, гырыны лудэ пото.

— Арлы быдэ возьма-тӥськомы кӧрбан сяммес. Гыриськом, кизиськом, гырем бервылэ коко (курегпуз) саляськом, вӧсяськиськом, — шуэ Шамарданысь Ангелина Антуганова.

— Кӧрбан — со виро лэзён инмарлы курбон сётон. Та нуналэ ыж-така вандо, ӝук сиё, — бордаз итӥське Шамарданысь Римма Караваева. — Урожай мед луоз, инкуазь ӟеч улон мед сётоз. Гырыны потон азьын Акашка но лэсьтӥськом, тазьы ик лудэ люкаськылыса.

 

 

Лудэз гырон.

Тросэз сям-йылолъёссы бесерманъёслэн, зэм, али но утисько на. Кылсярысь, Илля пророкез данъян. Кӧрбанын но тани «капка» вылын ошисько така йыръёслэн лыоссы. Малы?

— Август толэзе, Илля пророкез буре вайыса, котькуд семья така вандэ, ӝӧк пуктэ, озьы бӧляк коркась корка сӥльын ӝук сиыса ветлэ, — шуэ Ёжгуртысь Анатолий Антуганов. — Такалэсь йырзэ сузяса, капка, кенер вылэ лызэ ошо, со одно ик шундыӝужан пала учкыны кулэ — Илля пророк ортчыт медаз лекъяськы.

Быдэс элькунысь бесерманъёс кӧрбанэ нырысьсэ люкаськизы вал 1996-тӥ арын, соку шулдыръяськыны вуизы ог 600 пала адямиос. Али ичигес вуыло ни, но со та праздниклы аспӧртэм шӧм сётэ: татын шуныт, умой, люр-ляр ӧвӧл. Огвакытэ трос пӧртэм азбаръёс ужало ке но — бесерман батыръёс ӵошатско, пиос юбо вылэ тубо, нылпиос, кышноос бесерман шудонъёсын шудо — ваньмыз бордын калык лачмытак люкаськемын, ӵыжы-выжыез, гуртысьтыз адямиез понна висе. Ачиз но собере лӧпкем мылкыдын шудыны я круген эктыны кутске.

Батыръёс куспын вожвылъяськонын вормиз Юкаменск ёросысь Юндаысь Иван Урасинов.

Маин удмуртлэсь пӧртэм?

Куноосты пумитакузы ик, бесерманъёс лэзизы куно пумитан удмурт гуръёсты, сцена вылысь кылӥськизы удмурт эстрада кырӟанъёс, ма, верасько но соос прак уйпал удмуртъёс кадь. Маин, иське, соос пӧртэмесь — таӵе юан йырысьтым ӧз потылы. Кин ке шуэ, бесерманъёс тюрк выжыысь потэмын, мукетъёсыз — фин-угор писпуысь.

— Валлё юн ик пӧртэмесь вал ми, дӥськутъя но, сиён-юонъя но, вераськемъя но, — шуо кенакъёс.

— Бесерман со чурытгес адями, зол ужась вал, нош кышноос кыӵе чырткемесь! Калыкмы валлё нимазъяськыса бадӟым семьяосын улӥз, бабуш вералля вал, кызьы одӥг коркан 22 ӵошен вылӥзы. Дед вичак наряд сётылӥз — со семьяын йыр вал, гуртэ 2 пӧрасьёсты — кышноосты озьы шуылӥзы — кельтыса, мукетъёсыз кошкылӥзы ужаны лудэ, нюлэскы, — вера Анатолий Антуганов.

Бесерманъёслэн обществоенызы кивалтӥсь Валериан Сабреков воксё шуэ, бесерманъёс удмуртъёслэсь но, бигеръёслэсь но вазьгес кылдӥзы шуыса. Историклэн Николай Карамзинлэн «История государства российского» книгаяз, пе, 997-тӥ арын бесерманъёс сярысь кыл поттэмын ни.

Нош али дано, чырткем калык сюлэм вӧсен вера шерамез сярысь. Берпуметӥ лыдъян-чотанъя асьсэзыс бесерман шуыса пусйиз 2 сюрс 300 адями.

— Жаль, калыкмы быронлы матэктэ ни шуыса. Ужан местамы милям ӧвӧл, колхозмес быдтӥзы, — вера Шамарданысь Римма Караваева. — Егитъёс бесерман сямен уг верасько, школае, садэ ветлӥсьёс ӟучомо. Валлё улӥсез но тросгес вал бере, калыкез но Кӧрбанэ тросгес люкаське вал.

— Бесерман кылэз луэ улӟытыны, со али удмуртлэсь юн уг висъяськы ук. Но удмурт кылэз школаын но уг дышето ни. Со юн мыдлань, — мылкыдзэ кисьтэ Анатолий Антуганов.

Огазея вотэс

Озьы ке но бесерманъёслэн культуразы гуртын зол возиське — вань музейёс, бесерман гуртлы быдэ ансамбльёс — Яр палась Вортча гуртысь «Бесерман крезь», Юнда гуртысь «Азвесь крезь», «Юнды-шунды», Шамарданысь «Лампачей» но мукет. Со сяна, бесерманъёслэн огазеяськонзы арлы быдэ пичи газет поттэ. Тапала ӵем гинэ вуыло тодосчиос, бесерман улонэн тодматскыны мылкыд карисьёс. Кызьы меда туала вакытэ воштӥське бесерманъёслэн лулчеберетсы?

— Улон, туала технологиослэн азинскемзыя, — вера бесерман тодосчи Елена Попова. — Али бесерманъёс сярысь трос мае шедьтыны луэ, вань нимысьтыз вотэсбам, вань виртуальной музей. Мон малпасько, Кӧрбанэ вуэмъёс но мерлыко вотэсбамъёсы шулдыръяськон сярысь мар но со поттозы. Вераны кулэ, дыр ортчемен, бесерман культура адямиосты бордаз золгес кыскыны кутске.

Зэм, вотэслэн кужымез туж зол. Уго дуннелэн пӧртэм сэрегъёсаз пазьгиськем бесерман калык огазеяське отын, ужрадъёс сярысь тодэ отысь.

Мария Векшина

Удмурт Дунне
By Удмурт Дунне Июнь 14, 2018 13:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*