Кызьы Егор Корнилович Загребин Колчаклэн армиеныз ӵош Китаёзь вуэм

Удмурт Дунне
By Удмурт Дунне Июнь 9, 2018 13:00

Даур талэсь азьло большевикъёслы пумит ӝутскизы Ижевскысь но Воткинскысь 20-30 сюрс пала адямиос. Пӧлазы вылэм Кун Думаысь депутатлэн, история наукаосъя докторлэн Алексей Загребинлэн песятаез Егор Корнилович Загребин но. Колчаклэн армиеныз ӵош со Китаёзь вуэм.

Ижысь музейлэн «ВКонтакте» бамысьтыз

Ижысь музейлэн «Ижевский декалог» адӟытоназ возьматэмын Ижевск-вотка дивизилэн Георгиевской знамяез.

Малы кулэ бугырскон?

— Мыным ог 10 арес дыръя, — тодаз вае Алексей Загребин, — атае (тодмо драматург Егор Егорович Загребин — авт.) маке вераськон вискын поттылӥз, солэн атаез Китайын улӥз шуыса. Мар песятаймы сокемын карем? Атае шуиз: Шанхайын, пе, докер (портысь грузчик) луыса ужам. Со сяна, атае номыр ӧз мадьы ни, совето вакытэ угось большевикъёслы пумитъяськон сярысь туж ик шарае ӧз поттылэ. Но выльдӥськон кутскем бере атае ортчемез сярысь ватытэк вераз ини. Озьы мон тодӥ: песятаймы, Егор Корнилович, егит дыръяз Колчаклэн армияз шедем. Отчы сое подводаеныз валче басьтӥллям Ижевскын но Воткинскын восстание дыръя 1918-тӥ арын.

Егор Корнилович Ижысь заводлы пу дасянын ужа вылэм. Со быдӟа завод со вакытъёсы пуэн эстӥськем. Вӧзаз вӧл-вӧл казённой нюлэс вал, сое коратӥллям вӧзысь гуртъёсысь крестьянъёсты. Большевикъёслы пумит ӝутскем восстание дыръя Егор Корниловичлы 23 арес вылэм — егит шаплы пияш.

Нош малы заводчиос большевикъёслы пумит ӝутскизы? Нырысь ик, Ижысь но Воткаысь заводъёсын тыршисьёс революция кутскон азьын туж умой улӥллям. Со вакытъёсы заводын ужазы ӟеч дышетскем специалистъёс, уждунъёссы но бадӟымесь вал. Огшоры ужасьёс асьсэлы тып-тып коркаос пуктылӥзы, чеберлыкен тунсыкъяськизы, нылпиоссэс дышетыны тыршизы. Кунамы бугыръяськонъёс соослы воксё уг кельшо вал. Эшшо ке кужмысь Горд армие кысканы ӧдъязы.

Со вакытысь калыкез тӧдьыослы но гордъёслы висъян — со история шоры вылтӥз учкон гинэ. Вал огшоры ӟеч улон понна, кунмылэн ӵуказе нуналыз понна ожмаськисьёс. Сыӵе мылкыдын ик ӝутскиллям вылэм заводчиос. Али но ай туж секыт валаны, кин шонер вал, кин янгыш. Кӧня вир кисьтӥськиз, кӧня калык быриз!

Ижысь но Воткаысь заводъёсын ужасьёс, большевикъёслы пумит ӝутскыса, асьсэ калык армизэс кылдытӥзы, ожъёс вискын заводъёсын ужазы, нош тушмон вуэ ке, штыкъёссэс кутылӥзы. Озьы соос 3 толэзь ӵоже тапалась музъемъёсты ки улазы возизы. Соос гордъёслы пумит ӝутскизы ке но, тӧдьыос пала но дур ӧз басьтылэ. Зэм, бӧрысь Колчаклэн армиез борды кариськоно луизы ни. Угось соосызлэсь но, таосызлэсь но огвакытэ ик утиськыса улыны туж секыт вал.

Кызьы Лёгор шедиз Колчак доры

Ижевскын но Воткинскын кылдытэм дивизия Колчаклэн армияз тужгес кужмоез, пе, вал. Иж завод вӧзын нюлэс дасянын ужась Егор Корнилович нырысь-валысь кытчы шедемзэ но ӧз вала, дыр. Но подводэныз валче ожгарчиос пӧлы сюрем пияш соосын ӵош пӧсез но, кезьытэз но чидано луэм, пумитъяськисьёсын ӵош быдэс Уралэз, Сибирез, Забайкальеез, Маньчжуриез ортчем, Харбинозь вуэм. Алексей Егоровичлэн верамезъя, со вакытъёсы Ижысь гинэ 17 сюрс адями, восстаниез ӝутӥсьёс борды итӥськыса, палэнэ кошкем. 5-6 сюрс палаез — Воткинскысь ужасьёс.

— Со дивизилэн командирез вылэм Викторин Молчанов генерал — кадровой офицер, — маде Алексей Загребин. — Та кышкасьтэм адями, Нырысетӥ мировой войнаын сӧсырмыса, Алнаше интыяськем, татысен ини со революциез пумитам, совето властьлы пумит ожмаськем, нош собере тӥни восстаниен кивалтэм. Ижевск-вотка дивизия пыре вылэм Владимир Каппель генераллэн корпусаз. В. Каппель — граждан ожъёс вакытысь одӥгез тодмоез но визьмоез военачальник. Солэсь мугорзэ солдатъёс кулэм бераз но ки вылазы кӧня ке сю иськем нуиллям, гордъёс кие гинэ медаз сюры шуыса. Озьы короссэ солдатъёс Китаёзь вуттӥллям, отысь Харбин городын гинэ В. Каппелез сӥё-дано ватӥллям ни.

В. Каппель генераллэсь лысьӧмъёссэ кӧня ке ар талэсь азьло Москвае ватӥзы. Нош асьме палась адямиос тросэз вордӥськем шаеразы ӧз ни бертэ, Китае ик кылизы. 1940-тӥ аръёсы, Китайын коммунистъёслэн азьветлӥсьсы Мао Цзэдун кивалтыны кутскем бере ваньзы сямен США-е кошконо луизы. Нош Егор Корнилович вордӥськем шаераз 1920-тӥ аръёслэн кутсконазы ик бертӥз. Зэм, татын сое выль шугадӟонъёс витизы…

Бертӥз — пытсэт сьӧры шедиз

— Песятайме, Колчак сьӧры ветлэмзэ вунэтытэк, кӧня ке пол пытсэт сьӧры келяллязы. Но со ожмаськонъёсы ӧз пыриськы, обозъёсты гинэ нуллӥз бере, солэн киосыз вирын наштаськемын ӧй вал. Соин ик песятайме ӧз ыбе. Китайысь бертэмез бере сое нырысьсэ пытсэт сьӧры келязы 1924-тӥ арын. Кӧня ке пукемез бере лэзизы. Но 1938-тӥ арын нош ик пуктӥзы. Песятае нуналлы быдэ аслэсьтыз кулонзэ возьмаса улэм, оглом 4 ар ӵоже тюрьмаын пукем, но сое ыбиллямтэ.

Атае улонысь кошкон азяз мыным кельтӥз архивзэ. Отын вань песятайме реабилитировать карон сярысь справка. Таӵе гожтэмез вань: «Загребин Егор Корнилович — участник Ижевско-Воткинского восстания, белогвардеец, ярый враг советской власти и противник колхозного строительства…» Кызьы совето вакытъёсы адямилы сыӵе справкаен улоно вал? Кызьы улоно вал нылпиосызлы? Макем секыт вал, дыр, атаелы но солэн агаезлы улон сюрес кузя азьлань вамышъяны. Угось соос борды лякемын вал «тушмонлэн нылпиосыз» ним.

Быдӟым ож дыръя Алексей Егоровичлэсь песятайзэ трудовой армие басьтӥллям, со пӧртэм секыт ужез быдэсъям, чугун сюрес лэсьтонын но ужам. Гуртэ кылиллям Анна кузпалыз но Егор но Маша пиналъёсыз.

— Туж курадӟыса улӥзы, Анна песянае ялан колхозын ужаз, нош Егор пиез (мынам атае) сузэрме утись но сиён поттӥсь вал. 7-10 аресаз ик со пӧйшураз, нюлэскы я кыӵе ке тылобурдоез, я лудкечез ыбон понна ветлӥз, — маде Алексей Загребин. — Атае туж секыт дыръёсы но улон шоры капчиен учкыны быгатэ вал, котьма бордысь ӟечсэ адӟыны тыршылӥз. Та сям, малпасько, солы пыӵаз песятаелэсь.

Кузьым вуиз дораз

— Азьвылгес ай мон кылылӥ, 1919-тӥ арын адмирал Колчак Ижевск-вотка дивизиез кышкасьтэм ожмаськемез понна пусъем Георгиевской знамяен, — шуэ Алексей Загребин. — Но та знамяез со дивизилы сётыса вуттымтэ. Уно аръёс ӵоже ни знамя утиське Иркутскысь шаертодонъя музейын. Зэм, одӥг пол, Иркутск-Ижевск мотопробег дыръя, та знамяез шоркарамы вуттылӥзы ик. Ог 10 ар талэсь азьло малпан кылдӥз: со знамялэсь копизэ ке но Иже ваёно. Мыло-кыдо адямиос шедизы. Ижысь гуманитарной лицейлэн директорез Михаил Черемных Иркутскысь монастырь бордын улӥсь кибашлыослы вазиськиз. Зэмос знамя но татын лэсьтэмын вал бере, копизэ но, оло, пӧрмытоды шуыса. Пужыятскисьёс, вуриськисьёс 3 толэзь ӵоже Георгиевской знамялэсь копизэ лэсьтӥзы. Туэ февраль толэзе та знамя бертӥз Иже. Сое сӥё-дано пумитазы Ижысь аэропортын, нош Викторин митрополит со понна молебен ортчытӥз…

18-тӥ апрельысен Ижлэн музеяз ужа «Ижевский декалог» адӟытон. Отысь тодыны луэ 1918-тӥ арын Ижын но Воткинскын пумитъяськон сярысь 10 учырез: «Накануне», «Командующий», «Прикомуч», «Пастухов», «Артистка из дивизии Азина», «Исход», «В далёком Харбине», «Ижевка», «Обыск», «Американский Ижевск». Та учыръёсты мадё ни восстание пыриськемъёслэн внукъёссы. Пӧлазы Алексей Загребин но. Ижлэн музеяз адӟытон ужалоз 2-тӥ декабрёзь. Озьыен, Удмурт шаермылэн историысьтыз тодмотэм вакытэз ӟечгес тодыны быгатозы вань мылкыд карисьёс.

Нош Америкаысь Сан-Франциско город вӧзысь Берклийской черкын али но ӝуа восстаниез буре ваён сюсьтыл. Отын ӟуч но англи кылъёсын гожтэмын: «В память ижевчан и воткинцев, восставших 7 и 17 августа 1918 года против коммунистической власти, павших на поле брани, или умученных и убиенных, или в изгнании скончавшихся».

— Со бугырес вакытъёс дырысен ортчиз 100 ар, — пусъе Алексей Егорович. — Мар на али адямиосты тӧдьыослы но гордъёслы люконэз? Курадӟон йыгаськиз котькуд семьяе. Сыӵе дыръёс ноку медаз ни вуэ.

Елена Миннигараева
Туспуктэм: Ижысь музейлэн «ВКонтакте» бамысьтыз

Удмурт Дунне
By Удмурт Дунне Июнь 9, 2018 13:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*