Кынтэмзэ улӟытозы. Йылаз-пумаз вуттымтэ юрт бюджетлы трос ыштонъёс вае

Удмурт Дунне
By Удмурт Дунне Июнь 15, 2018 11:24

Шаерамы выльёссэ юртъёсты ӝутыны кутскозы кемаласен мытэмъёссэ йылаз-пумаз вуттэм бере гинэ. Сыӵе ужпум пуктэмын лэсьтӥськон удыс азе. Кыӵе школаосты, больницаосты туэ лэсьтыса вуттозы но кытысь соослы уксё шедиз?

udmurt.ru

Алнашын школа лэсьтонлы 352 миллион манет висъямын.

Поликлиника

Ижысь Ленин ёросын 4-тӥ поликлиникалэсь юртсэ 28 ар талэсь азьло аварийной лыдъязы но сэрттӥзы. Поликлиника пӧртэм юртъёсы интыяськиз. Огез ёззы Машиностроительёслэн урамысьтызы 107-тӥ коркалэн 1-тӥ этажаз интыяськиз. Тросэз юртъёсмы ӟоскытэсь, унояз эмъян оборудование пуктыны ик уг луы, шуэ поликлиникалэн валтӥсь врачез Кирилл Гасников. Висисьёс диагностика ортчон понна одӥгысьтыз юртэ мукетаз автобусэн я машинаен ветлоно луо. Нош маммографсы но флюорографсы чылкак ӧвӧл.

Шугъяськонъёс кылдо соин но: Ленин ёросын али ялан выль трос этажъем коркаос пуктӥсько. Таин ӵош поликлиникае вазиськисьёс но йыло. Али со 40 сюрс адямиослы кулэ ни.

2013-тӥ арын калык но эмъясьёс малпазы, ӝоген курадӟонзылы пум вуоз шуыса. Элькунмы 4-тӥ больницалы юрт лэсьтыны 93 миллион манет висъяз. Соку юртлэсь фундаментсэ лэсьтӥзы, бетон каркассэ ӝутӥзы, коммуникациос кыскизы. Но соин вань ужъёс дугдӥзы. Коньдон быремен, строительёс татысь кошкизы.

Югдур воштӥськиз элькун Тӧролэн Александр Бречаловлэн миым федерал кивалтӥсьёслы вазиськемез бере. Президентлэн резерв фондысьтыз 274 миллион манет висъямын вал. Озьы туэ лэсьтӥськон выльысь вырӟиз. Строительёс ӝуто юртлэсь борддоръёссэ, выльдӥзы инженер коммуникациосты. Юрт быдэсак вуыны кулэ ар пумозь. 3 этажъем поликлиникалэн быдӟалаез 6 сюрс квадрат метр луоз. Татын смена ӵоже 450 адямиослы юрттэт сётыны быгатозы. Выль корпусын интыяськозы клиника, нуназе ужась стационаръёс. Татчы люкалозы диагностикая оборудованизэс. Машиностроительёслэн урамысьтызы улон коркась инты бушалоз. Но куд-ог ёзэтъёс, кылсярысь, стоматология, азьло юртаз ик кылёзы.

udmurt.ru

Нылпи сад

Ленин ёросысь ик мукетсэ юртэз туж витё покчи пиналъёслэн анай-атайёссы. Баранов урамын сад лэсьтон кутскиз 2015-тӥ арын. Фундаментлы свайёс йыгамзы бере ик со дугдӥз. Коньдонзэ мукет азе кутӥзы. Али та объектэз вуттыны 191 миллион манет висъямын. Со пӧлысь 155 миллионэз «Дышетонэз азинтон» федерал программа чотын вуиз. Кылемзэ элькун ачиз шедьтӥз, вераз лэсьтӥськонъя, жилищно-коммунальной хозяйствоя но энергетикая министр Иван Ястреб.

Туннэ 220 нылпиослы чаклам садлэсь боддоръёссэ ӝуто ни. Гудырикошкон пумозь юрт дась луыны кулэ. Собере котырзэ чеберъялозы на. Лэсьтӥськисьёс юнматэм графикъя ужало, ӝеганъёс ӧвӧл. Ар пумозь ваньмыз дась луыны кулэ, пушказ вань тӥрлыкъёсты подрядчик басьтоз, вераз Ижысь «Лэсьтӥськонъя служба» муниципальной учреждениысь валтӥсь инженер Владимир Верещагин.

Нылпи садын 12 группаос луозы. Соос пӧлысь 2-ез — ясли. Отчы 2 толэзьысен 3 аресозь покчиосты басьтозы. Ленин ёросын нылпи садэ интыосын югдурез со трослы капчиятоз. Быдэс городын туннэ 939 пиналъёс нылпи сад возьмало. Уката шуг югдур ясли группаосын. 783 покчиосты интыяно.

Школаос

Алнашысь школа азбарын мынӥсь лэсьтӥськон пала учкыса, пиналъёслэн, пе, чыртызы кырыжа ни. Миым куарусёнэ ик отчы потоды ни шуыса оскытӥзы вал кивалтӥсьёс. Али ке но школа ӧз вуы ай. 10-тӥ классын коть выль юртэ мед выжом вал ни, огымысь кадь верало нылпиос.

Ёрос центрысь школа 1960-тӥ аръёсы пуктэмын. Черкогурт паськытамъя но пиналъёс йылэмъя сое 3 пол бадӟыматъязы. Али отын 1 сюрс 240 нылпиос дышетско, нош чакламын 800 адямилы гинэ. Ёрос центрысь сяна, 9 гуртъёсысь 200 пиналъёсты татчы нулло 3 автобусэн. Ӵукна 6 час котырын автобусъёсмы пото сюрес вылэ, 7 часын ӝытазе гинэ гараже пыро, вера школалэн директорез Геннадий Махнёв. Инты тырмымтэен 2 сменаен дышетско.

Вуж школаын пиналъёсты сюдыны но шуг. Нылпиос 8 сменаен сиськыло. Роспотребнадзорлэсь чурытась куронъёссэ но быдэсъяны шуг ни, шуэ ёрос администрациысь дышетонъя управленилэн кивалтӥсез Алексей Князев. Ӧвӧл актовой залзы, 2 спортзалзы уг тырмы физкультурая урокъёс ортчытъяны.

Вань та шугъяськонъёссэс палэнтон понна алнашъёс дасо аръёс выль школа курыса улӥзы вал ни. 2016-тӥ арын югдур воштӥськыны кутскиз шуыса шумпотӥзы. Вужез вӧзы ик 500 адямилы чаклам дышетскон юрт пуктон кутскиз. Нырысетӥ этажзэ ӝутӥзы но, ужъёс гуньдӥзы. Строительёс 50 миллион манет ас уксёзэс быдтӥзы. Коньдон тырись ӧз луы но, кошкизы.

Выльысь берытскизы туэ куартолэзе. «Дышетонэз азинтон» федерал программа чотын школаез пуктыны 285 миллион манет висъямын. 67 миллион манет сётэмын элькун бюджетысь. Уксё тыронэн ӝеганъёс ӧвӧл. Соин ик ужъёс ӝог мыно. Али 2-тӥ этажзэ ӝуто ни. Улӥ этажын выжез, борддоръёсты бетонэн шобырто. Вӧл-вӧл чебер классъёс сяна, выль юртын луоз бадӟым актовой зал, со вадьсын вылӥяз — туала куронъёслы тупась спортзал. Тупатскоз югдур нылпиосты сюдонэн но. Юртын 246 адямилы чаклам сиськон инты луоз. Выль школае дышетскыны выжтозы 7-тӥысен 11-тӥ классозь пиналъёсты. Вань кулэ оборудованиез но тӥрлыкез озьы ик подрядчик басьтэ. Таизъя али куронъёс котькытын огкадесь. Школаез туэ куарусёнлы вуттыны кулэ. Но усьтозы бергес. Угось лицензия басьтон 3 толэзь пала кыстӥське.

Дэри ёросысь Совхозной черкогуртысь школалэн но юртэз 1960-тӥ арын пуктэмын. Туала куронъёслы со уг тупа. Интыез но туж ӧжыт. Городлы матэ интыяськем мукет гуртъёсын кадь ик, татын но выль коркаос кылдо, калыклэн лыдыз йылэ. Выль школазэс, Алнашын кадь ик, 2016-тӥ арын пуктыны ӧдъязы вал. Липет дорозь вуттӥзы ик. Собере коньдон вуэмысь дугдӥз. Йылаз-пумаз вуттыны туэ 137 миллион манет висъямын. Бадӟым люкетэз федерал программая вуоз. Мукетсэ элькун шедьтӥз.

Та сяна но, элькунамы трос на йылаз-пумаз вуттымтэ лэсьтӥськонъёс. Кылсярысь, Ижысь нылпиослэн творчествоя юртсы, гуртъёсысь культурая юртъёс. Министр Иван Ястреб верамъя, йылаз-пумаз вуттымтэ юрт, дыр ортчемъя эшшо но дуноя, бюджетлы ялан тросгес ыштонъёс вае. Соин ик туэ йылпумъяно азьвыл пуктыны кутскем юртъёсты. Собере ини выльёссэ ӝутыны дыр вуоз.

Эдуард Степанов
Туспуктэм: udmurt.ru

Удмурт Дунне
By Удмурт Дунне Июнь 15, 2018 11:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*