Кыл корась. Кылбурчиен Анастасия Шумиловаен интервью

Удмурт Дунне
By Удмурт Дунне Июнь 9, 2018 15:00
Чудья Жени

Анастасия Шумилова вордӥськиз Пичи Пурга ёросысь Орлой гуртын.

Таяз арняе кылбурчи Анастасия Шумилова  тодматӥз 2-тӥ кылбур бичетэныз — «Ку». Кыӵе пуштросъёс ватӥсько выль книгаяз?

Анастасия Шумилова вордӥськиз Пичи Пурга ёросысь Орлой гуртын, йылпумъяз УдГУ-ысь Удмурт кылосбуръя факультетэз, дышетскиз Эстониысь Тарту университетысь докторантураын, гожтэ удмурт кылбурчилэн  С. Матвеевлэн творчествоезъя диссертация. Ужа УдГу-ысь Удмурт кылосбуръя, финно-угроведениея но журналистикая институтын дышетӥсь луыса.
Кылбур бичетъёсыз: «Дыр-эктон» (2015-тӥ ар), «Ку» (2018-тӥ ар).

— «Дыр-эктон» бичетэд потэм бере тон астэ кылбурчиен ниманы кышкаськод вал ай, «Ку» книгаяд «тон луид кылбурчи» гожтӥськод ини.  Астэ кылбурчиен шӧдӥськод ни?

— Кытчы солэсь пырод? Мон валай: астэ кылбурчиен уд шӧдӥськы гожъяськыкуд, тон сое валаськод, куке кутскиськод кылбурчиос котырын берганы. Та югдурын кӧня ке серемесэз (ирония) но вань. Иське, текст нырысетӥ интыын уг сылы?

Нырысетӥ бичетме поттыкум, мон ас кожамгес улӥ, мукет кылбурчиосын кусып ӧй возьылы, соослэн улоназы ӧй пыриськылы, нош со зэм но кулэ вылэм. Верало ук: умой крезьгур гожтон понна кулэ крезьгурчиос пӧлын улыны, кулэ среда, астэ кылбурчиен шӧдон понна со омырен шокано. Берло дыре Россиысь кылбурчиослэн форумазы ветлӥ, кылысь кылэ берыктӥсьёс доры вуылӥ, Ижысь кылбурчиосын вераськыны кутски, альманах (Ижысь кылбурчиослэн книгазы авт.) потӥз, кылбуръёсме лыдӟылыны чортыло — со классно.

— Ӧжытэз удмурт кылбурчиос ӟучъёслэн поэтической улоназы пырисько. Кызьы пӧлазы сюрид?

— Огпол Ижысь кылбурчилэсь Андрей Гоголевлэсь кылбуръёссэ удмурт кылэ берыктӥ, со бере ми соин литература, кылбурет пумысен кенешылыны кутским. Оло, со мон сярысь вераз «ПоэтUP» огазеяськонлэн кичӧлтӥсезлы Герман Сусловлы. Таиз шуэ: ми, пе, ӧдъяськомы Ижысь кылбурчиослэсь альманахсэс поттыны, лэзь подстрочникъёсын кылбуръёстэ. Мон собере гинэ валай: кыӵе йырпормымон но кулэ уж соос берыкто. Книга потӥз, «Лифт» штабын презентация мынэ. Ижкарысь ӟучъёс кылзӥсько, кызьы мон удмурт кылын кылбуръёсме лыдӟисько!

Та ужрад азьын «Les Partisans» театр «Иж ты, поэт!» спектакльзэ возьматӥз. Отысь тодмое, драматург но актриса Катя Гузёма, шуэ, тон, пе, тодӥськод-а, отын тынад кылбуръёсыд но чузъясько шуыса. Мон пайми.

Ижын мыным кылбурчилы сямен туж умой. Татын сомында литературной ужрадъёс ортчыло.

«Дыр-эктон» бичетысь кылбуръёс шудыса выллем гожтэмын, нош «Ку» книгаын соос лулсэрегъёсысьтыд поттэм макеос ни, эротикаез но шӧдӥське. Со сяна, книгалэн нимыз но уно пуштросъем.

— Таиз бичетэ мургес. Кылемез сярысь критик Лариса Дмитриева но шуиз вал: уг тырмы мылкыдыз, вӧсез.  Нош таяз радэ вань кылбуръёс пушкысь потэмын, сюлэм-а, визь-а пыр поттэмын.

«Ку», огласянь, мугор, со пыр ми дуннеез шӧдӥськом. Мукет ласянь, «ку» — юан. Ми ялан мае ке возьмаса улӥськом, омырын «ку?» юан ялан ошиськыса улэ. Тодэ лыктэ Г. Данелиялэн «Кин-дза-дза» киноез но. Отын «ку» — сыӵе пӧртэм пуштросо кыл, возьматэ ваньзэ, со дыре ик — номыре но.

Кыллэсь туссэ будосэн ӵошатыны яратӥсько — вылбамын но со адӟиське. Турын быгатэ йӧны кадь бышкись луыны яке ненег бинялскыны. Удмурт кыл — уд мурт — со, али бычыясь уд кадь ик, небыт, либыт, милям мать карон кылъёсмы но ӧвӧл, ӟучъёссэ кутоно луэ, соин книгае 18+ (серекъя). Л. Лосев кадь ик, кыллэсь пушсэ ик возьматэме потэ,  соин ик, дыр, лирической герое «сӥль корась» но луэ.

мыным уг тырмы сӥль —

будос кылы,

соин уг вия вир

куртчем кылысь.

 эн нималэ монэ

музъем ужась,

мон шерисько тӥрме:

мон сӥль корась.

Кылбуръёс сярысь ке, татын яратонэз туж трос — быдэс цикл сӥземын, со туж зол эмоция — но таӵе кылбуръёсты соку ик пальккыны уг яра, соос пушкад мед лапкалозы, сотэк кылбуран синкыли кисьтэмлы, зырымаськонлы пӧрме. Вуоно бичетме озьы ик нимало — «Зырым», берло дыре маке сыӵегес кылбуръёсы вордско (серекъя). Сыӵе вакытэ али: пукисько но малпасько: рифмаосы-то ӧвӧл ни,  оло, мон соосты быдтӥ — мар табере азьланяз? Та кышкан котьку пушкын улэ.

«Ку» кыкетӥ книга бичетэныз.

— Критик И. Кадочникова ӟуч кылэ берыктэм куд-ог кылбуръёсыдъя шуэ: тон этнофутуризмез азинтӥськод, мукетыз критик В. Пантелеева тонэ постмодернистъёс, мультикультуралистъёс пӧлы пыртэ. Кыӵе ӧрын ачид астэ шӧдӥськод?

— Ӟуч кылын сётэм кылбуръёсам мынам потэ вал удмурт шӧмез возьматэме, соин, дыр, И. Кадочниковалэн сыӵе малпанэз кылдӥз. Кылбурчилэн потэ ук висъяськемез, мон висъяськи удмурт темаен.

«Куэз» мынам кылбуръёсын книга кадь адӟеме потэ, кытын ваньмыз огазеяськемын, отын туж пӧртэм кылбуръёс пыремын: философской шӧмо но, лирика но туж трос, ӧч каронэз но, шаянтонэз но вань, пыӵкылонэз но, кылбуръёс вылтуссыя но пуштроссыя но пӧртэмесь. Уг тодӥськы, кыӵе ӧрын мон уясько: «пост-» яке воксё кыӵе ке «пре-».

— Таяз книгаяд туж трос интертекстэз. Берло дыре кинэ лыдӟиськод?

— Одӥг дыре мон О. Мандельштамез туж трос лыдӟи. Кылбуръёссэ но, ачиз сярысь но. Адями кадь но со монэ бордаз кыскиз, улон сюресэз зол бугыртӥз.

И. Бродскиез берло ӧжыт лыдӟисько, Л. Лосевез котьку бугыръясько. Берло дыре Б. Рыжий улонам бадӟым инты басьтыны кутскиз. Асме куддыръя дугдытӥсько: стоп! мыным уг яра ни сое лыдӟыны, малы ке шуоно солэн туж секыт, со дыре ик чылкытатӥсь кылбуретэз. Валасько, со монэ кыӵе ке но ӝож пеймыт нюлэскы кыске.

«Ку» книга усьтӥське «Кылбурет» кылбурен, йылпумъяське «Кылбуретэн» ик. Берлояз 3 эпиграфез — О. Мандельштамлэн, Л. Лосевлэн но Б. Пастернаклэн. Соос возьмато, кызьы мон творчество шоры учкисько. Кылбур пумам гожтӥсько: «соин уг пуктӥськы пумпус», татын точкаез ӧвӧл — оло, маке азьланяз луоз ай.

— Вуоно бичетэд эшшо но мургес луоз-а? Марлы дасяськоно лыдӟисьлы? Оло, проза борды басьтӥськемед потоз?

— Мон али огшорыез пала берытскисько. Оло, рифмаослэсь куштӥськыса, верлибръёс борды кутско, оло номыри но уз луы. Проза — секыт маке. Мон ӧвӧл веросчи. Учыръёсты но мон кылбурен гожтӥсько. Кызьы В. Брюсов вераз: прозаын кыл — со малпанъёсты вераны тӥрлык, нош кылбуретын со — самоцель, мар понна гожтӥське кылбур. Татын валтӥсез — кылшӧдон.

Мария Векшина

Анастасия Шумиловалэн кылбуръёсыз:

веттан гур

 

вал толон шуныт

нош туннэ кезьыт

вал ӵукна — ӵукна

нош али — бер ӝыт

уй вуиз мын выд

шутэтскы ӧжыт

ӵуказе ӵукна

нош потод яна

нош луоз шуныт

нош али кезьыт

толэзьлы кезьыт

пунылы кезьыт

коӵышлы кезьыт

мынӥсь-ветлӥсьлы

мыныкуз кезьыт

ветлыкуз кезьыт

толэзьлы — ву ныл

пунылы — пӧсь лы

коӵышлы — пӧсь лым

мынӥсь-ветлӥсьлы —

пӧсятэм чильым

мед шуналозы

мед ӵыжектозы

умме усёзы

ог-огзы вӧзын

 

* * *

синъёссэ посэ — изёз,

ой, изёз инь но уз тод,

ма вера пичи вож ӟоз,

ма — тылобурдо,

 

ма понна тӧлъёс бӧрдо,

малы дыр чаляк ортче —

со куке сое тодоз,

нош али — изе.

 

уйвӧтаз тылобурдо

чиргетэ, пичи вож ӟоз

ӟозгетэ, тӧлъёс бӧрдо

но аръёс ортчо.

 

сайкалоз но вунэтоз

ваньзэ. малы со кулэ?

мед луоз али шудо

та тулыспалэ.

 

 

кар

ярдур вал. кыӵе ке но парк —

мон вунэтӥ нимзэ.

кар вал мукет.  мукет вал кар.

ӝуям лёгетъёссэ

 

вӧлдӥз азям но — мон мынӥ

ӝуась тылъёс пала.

кымин вал кар. вал кар кымин.

ӵындӥз ӝужыт куала.

 

ӟечбуръяськиз лусьтро пуны,

чырткемъяськиз чорыг.

шуныт вал кар. вал кар шуныт.

сылӥз дунне шорын.

 

со мертчалтӥз корт но бетон

коркаоссэ муэ.

кар яратон вал (яратон

лэчыт, бышкись луэ).

 

уг поты вал яратэме,

но берытскиз йыры —

выйи, Офелия сямен.

выйи мон та карын.

 

Удмурт Дунне
By Удмурт Дунне Июнь 9, 2018 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*